Category جرم وانصاف

اسلام آباد ہائیکورٹ نے العزیزیہ اور ایون فیلڈ ریفرنسز میں نواز شریف کو اشتہاری قرار دے دیا۔ عدالت نے سابق وزیراعظم کے ضمانتیوں کو شوکاز نوٹس جاری کر دیا۔

اسلام آباد ہائیکورٹ میں نواز شریف کی العزیزیہ اور ایون فیلڈ ریفرنسز میں سماعت ہوئی۔ عدالت نے نواز شریف کے ضمانتی سخی عباسی اور ان کے دو بیٹوں کو نوٹس جاری کر دیا۔ اسلام آباد ہائیکورٹ نے نواز شریف کی اپیل کی آئندہ سماعت مریم نواز کی اپیل کے ساتھ مقرر کر دی۔ اسلام آباد ہائیکورٹ نے سماعت 9 دسمبر تک ملتوی کر دی۔

جیب تراشی کی وارداتوں میں ملوث نیدو جیب تراش گینگ کے 2ملزمان گرفتار۔ گرفتار ملزمان میں گینگ کاسرغنہ نوید احسن عرف نیدو اوراس کا ساتھی ندیم شامل ہیں۔ گرفتار ملزمان سے چوری کی گئی نقدی،موبائل فونز اوردیگرقیمتی اشیاء برآمدکرلیا گیا۔ ملزمان نے ایک روز قبل شادی کے فنگشن میں شہری اقبال کی جیب سے نقدی اور موبائل فون بھی نکال لیا تھا۔ پولیس کے مطابق ملزمان کا شہر کے مختلف علاقوں میں جیب تراشی کی متعدد وارداتوں کا اعتراف

سندھ ہائیکورٹ نے ڈاکٹر ماہا شاہ قتل کیس میں ملزمان جنید اور وقاص کی درخواست ضمانت پر فیصلہ محفوظ کرلیا۔

ڈاکٹر ماہ شاہ قتل کیس کی سندھ ہائیکورٹ میں سماعت ہوئی۔ عدالت نے ملزمان کی درخواست ضمانت پر فیصلہ محفوظ کرتے ہوئے کیس میں ناقص تفتیش پر پولیس پر برہمی کا اظہار کیا۔ ڈاکٹر عرفان قریشی کا نام بھی ڈسچارج کرنے اور اسے چیلنج نہ کرنے پر عدالت نے برہمی کا اظہار کیا۔

جسٹس عمر سیال نے استفسار کیا صرف ڈاکٹر عرفان قریشی کو ہی کیس میں کیوں ریلیف دیا جا رہا ہے، ایف آئی آر میں ڈاکٹر عرفان قریشی بھی دیگر ملزمان میں شامل ہے، تو کیسے آزاد چھوڑ دیا ہے۔ ملزم جنید اور وقاص کی جوڈیشل میجسٹریٹ جنوبی کی عدالت نے ضمانت مسترد کر دی تھی۔ ملزمان نے ضمانت مسترد ہونے کے بعد سندھ ہائیکورٹ سے رجوع کیا تھا۔

احتساب عدالت نے رمضان شوگر ملز ریفرینس میں حمزہ شہباز کی پیرول رہائی کے باعث حاضری معافی کی درخواست منظور کرلی۔

احتساب عدالت میں قائد حزب اختلاف قومی اسمبلی شہباز شریف اور اپوزیشن لیڈر پنجاب اسمبلی حمزہ شہباز کیخلاف رمضان شوگر ملز ریفرنس کی سماعت ہوئی۔ احتساب عدالت کے جج امجد نذیر چودھری کے روبرو حمزہ شہباز نے دادی کی وفات کے باعث اپنے وکیل کے ذریعے حاضری معافی کی درخواست جمع کروائی۔

عدالت نے ریمارکس دیئے کہ جنازہ، قل ہوچکے، اب کیسی حاضری معافی، احتساب عدالت نے حمزہ شہباز کے وکیل کی دوبارہ استدعا پر حاضری معافی کی درخواست منظور کرلی جبکہ شہباز شریف کیجانب سے ان کے نمائندے نواز چودھری نے حاضری لگوائی۔

لاہور ہائی کورٹ ملتان بنچ نے پیپلزپارٹی کے رہنما یوسف گیلانی کے صاحبزادے علی قاسم گیلانی کی ضمانت منظور کر لی، ان کے خلاف مقدمہ بھی خارج کر دیا گیا ہے.

علی قاسم گیلانی کے بھائی علی حیدر کا کہنا ہے کہ ملتان جلسے کو روکنے کیلئے حراست میں لئے گئے علی قاسم گیلانی کی روبکار ڈسٹرکٹ جیل پہنچا دی گئی ہے۔ ان کے خلاف 16 ایم پی او کے تحت درج کیا جانے والا مقدمہ بھی ختم کردیا گیا ہے۔

28 نومبر کی رات ملتان میں قاسم باغ کے گرد حالات اس وقت کشیدہ ہوگئے تھے جب پی ڈی ایم کے کارکنوں نے جلسہ گاہ کے راستوں کو کھولنے کی کوشش کی تھی جس پر پولیس بھی حرکت میں آئی۔ جیالوں اور متوالوں کی پولیس کے ساتھ جھڑپوں میں کئی پکڑے گئے۔ پولیس نے یوسف رضا گیلانی کے صاحبزادے علی قاسم گیلانی کو تھانہ گلگشت منتقل کیا جس کے بعد ڈپٹی کمشنر نے 30 روز کیلئے نظر بندی کے احکامات جاری کر دیئے تھے۔۔ ان پر شر پسندی، نقص امن اور کورونا ایس او پیز کے خلاف ورزی سمیت دفعات کے تحت مقدمہ درج کیا گیا تھا۔

ساہیوال میں گزشتہ روز آٹھ سالہ بچی کے قتل کا ڈراپ سین ہو گیا۔ والد ،چچا،پھوپھی اور پھوپھا کمسن بچی کے قاتل نکلے۔ ملزمان نے مخالفین کو مقدمے میں پھنسانے کیلئےمعصوم کی جان لی۔

تفصیل کے مطابق ساہیوال گزشتہ روز اغوا کے بعد قتل ہونے والی دوسری کلاس کی کمسن طالبہ رخسانہ کے قتل کا ڈراپ سین ہو گیا ہے۔ مقتولہ رخسانہ کو اس کے باپ، چچا، پھوپھی اور پھوپھا نے گھر میں قتل کر کے لاش بوری میں ڈال کر گھر کے باہر پھینکی۔

پولیس ذرائع کے مطابق بچی کو چھوٹی کلہاڑی کے ساتھ رات کو گھر میں بے دردی سے قتل کیا گیا۔ پولیس نے گھر سے بچی کے جوتے، خون اور آلہ قتل برآمد کر لیا ہے۔

پولیس کا کہنا ہے کہ والد اور رشتہ داروں نے مقدمہ بازی کی رنجش پر اپنی ہی بیٹی کو قتل کیا۔ پولیس ہڑپہ نے مقتولہ کے والد اور پھوپھی کو حراست میں لے کر تفتیش کا دائرہ کار تمام رشتہ داروں تک بڑھا دیا ہے۔

صوابی کے علاقے چھوٹا لاہور میں زمین کے تنازعے پر فائرنگ سے آٹھ افراد جان کی بازی ہار گئے۔

ڈی پی او کے مطابق دو فریقین کے مابین سابقہ ایم پی اے کے حجرے میں جائیداد کے سلسلے میں جرگہ ہو رہا تھا، اس دوران فائرنگ سے چھ لوگ موقع پر ہی مارے گئے جبکہ دو افراد زخمی ہوگئے۔

کشمور: زیادتی کے ملزمان گرفتار کرنے والے سندھ پولیس کے بہادر افسر محمد بخش کا تبادلہ کردیا گیا۔ اسسٹنٹ سب انسپکٹر (اے ایس آئی) محمد بخش کا تبادلہ کشمور سے کراچی کردیا گیا ہے اور اس کا نوٹیفکیشن بھی جاری کردیا گیا ہے۔

نوٹیفکیشن کے مطابق محمد بخش کا تبادلہ کراچی کے پولیس ٹریننگ سینٹر میں کیا گیا ہے جہاں اب وہ پولیس اہلکاروں کو تربیت دیں گے۔

واضح ر ہےکہ محمدبخش نے زیادتی کے ملزمان کی گرفتاری کے لیے اپنی بیٹی کی جان خطرے میں ڈالی تھی جس پر پولیس افسر کو سندھ پولیس اور سندھ حکومت نے شاندار خراج تحسین پیش کیا اور پولیس افسر کے اعزاز میں تقاریب کا انعقاد کرکے انعامات سے نوازا گیا۔جب کہ وزیراعظم عمران خان نے بھی اے ایس آئی محمد بخش کو فون کیا تھا اور ان کے کارنامے پر شاباش دی تھی۔

اسلام آباد (وقت ٹی وی آن لائن ) سپریم کورٹ نے ججز کی توہین اورجسٹس قاضی فائز عیسیٰ کو قتل کی دھمکیاں دینے والے ملزم مرزا افتخار الدین آغا پر فرد جرم عائد کر دی۔

اعلیٰ عدلیہ کے ججز کی توہین اور جسٹس فائز عیسی کو قتل کی دھمکیوں سے متعلق کیس کی سماعت چیف جسٹس گلزار احمد کی سربراہی میں تین رکنی بینچ نے کی۔

ملزم آغا افتخارالدین کو جیل حکام اپنی تحویل میں سپریم کورٹ لےکرآئے جب کہ ایف آئی اے کے متعلقہ افسران بھی سپریم کورٹ میں پیش ہوئے۔

مرزا افتخار الدین آغا نے عدالت میں مؤقف اپنایا کہ میں اپنے ویڈیو بیان پر تہہ دل سے معذرت خواہ ہوں، میں انتہائی شرمندہ ہوں، قانون کے علاوہ بطور مسلمان بھی معافی چاہتا ہوں۔

چیف جسٹس نے ریمارکس دیے کہ یہ معافی والا کیس نہیں ہے، آپ عدالت سے مذاق نہیں کر سکتے، اس طرح تو پاکستان کا سارا نظام فیل ہو جائے گا۔

جسٹس اعجاز الاحسن نے کہا کہ آپ مسجد کے منبر پر بیٹھ کر وہ زبان استعمال کر رہے تھے جو کوئی جاہل آدمی بھی استعمال نہیں کر سکتا۔

دوران سماعت چیف جسٹس نے اٹارنی جنرل کو مخاطب کرتے ہوئے کہا کہ جسٹس قاضی فائز عیسیٰ کی اہلیہ کا بیان حلفی عدالت میں جمع کرایا گیا ہے،کیا آپ نے بیان حلفی پڑھا ہے۔

اٹارنی جنرل نے کہا کہ مجھے بیان حلفی نہیں ملا، جس پر چیف جسٹس نے ریمارکس دیے کہ اسے پڑھیں اور جواب دیں۔

عدالت نے ایف آئی اے اور سی ٹی ڈی کی رپورٹس پر بھی اظہار عدم اطمینان کیا اور کہا کہ اٹارنی جنرل صاحب یہ محکمےکیاکر رہے ہیں؟ معاملے کو سنجیدہ نہیں لے رہے۔

جسٹس گلزار احمد نے کہا کہ تحقیقاتی رپورٹس میں کوئی ٹھوس چیز موجود نہیں ہے، یہ ایک جج کا معاملہ نہیں بلکہ پوری عدلیہ کی کردار کشی کی گئی ہے۔

سپریم کورٹ نے مرزا افتخار الدین کی جانب سے داخل کرائے گئے گزشتہ تحریری جواب پر عدم اطمینان کا اظہار کرتے ہوئے ان پر فرد جرم عائد کر دی اور ملزم کو جواب جمع کرانے کے لیے ایک ہفتے کی مہلت دیدی۔

عدالت عظمیٰ کی جانب سے مرزا افتخارالدین آغا کو فرد جرم کی کاپی بھی فراہم کر دی گئی۔

خیال رہے کہ آغاافتخارالدین مرزا نے اعلیٰ عدلیہ اور ججز کے خلاف توہین آمیز کلمات پرمشتمل ویڈیو وائرل کی تھی جس پر عدالت عظمٰی نے گزشتہ سماعت پر ملزم کو پیش ہونےکا حکم دیا تھا۔

اسلام آباد (وقت ٹی وی آن لائن ) اسلام آباد ہائیکورٹ میں پیپلز پارٹی کے رہنما اعتزاز احسن کے خلاف پولٹری فیڈ کیس کی سماعت کے دوران چیف جسٹس اطہر من اللہ اور اعتزاز احسن میں دلچسپ مکالمہ ہوا۔

سماعت میں اعتزاز احسن ویڈیو لنک کے ذریعے پیش ہوئے جس پر چیف جسٹس اطہر من اللہ نے کہا کہ اعتزازصاحب ہم آپ کو ویڈیو لنک پر خوش آمدید کہتے ہیں۔

اعتزاز احسن نے بتایا کہ میں یہاں بھی ماسک ساتھ رکھ کر اور سینیٹائزر استعمال کرکے بیٹھا ہوں جس پر چیف جسٹس کا کہنا تھا کہ اکیلے ہیں تو وہاں آپ کو ماسک کی ضرورت نہیں۔

بعدازاں چیف جسٹس اطہرمن اللہ نے ریمارکس دیے کہ یہ ملک کی واحد ہائیکورٹ ہےجہاں بیرون ملک سےبھی دلائل دینےکی سہولت ہے، اس پر اعتزاز احسن نے جواب دیا کہ مطلب ہم جہاں بھی ہوں کورٹ پیچھا نہیں چھوڑے گی۔

دلائل پیش کرنے سے قبل اعتزاز احسن نے معزز جج سے کہا کہ معافی چاہتاہوں میں روسٹرم پرنہیں جہاں آپ کے سامنے کھڑا ہوسکتا۔

چیف جسٹس نے جواب دیا کہ آپ کوکھڑا ہونے کی ضرورت نہیں،آپ دلائل شروع کریں، ویسے بھی آپ کا پتہ بھی نہیں چل رہا کہ آپ کھڑے ہیں یا بیٹھے ہیں۔

اعتزاز احسن کے دلائل کے دوران اٹارنی جنرل بھی روسٹرم پر موجود تھے۔