Category کرکٹ

لاہور: جنوبی افریقہ کے خلاف دوسرے ایک روزہ میچ میں فخر زمان کے رن آوٹ معاملے کی تحریری شکایت نہ کرنے کی وجہ سے کونٹین ڈی کوک ممکنہ جرمانے سے فی الحال بچ گئے۔

ٹیم انتظامیہ ذرائع نے اس بات کی تصدیق کی ہے کہ میچ ختم ہونے کے بعد فخرزمان کے متنازع رن آوٹ پر ٹیم مینجر منصوررانا نے میچ ریفری اینڈی پائی کرافٹ سے زبانی بات ضرور کی ہے تاہم تحریری طور پر باقاعدہ کوئی شکایت نہیں کی گئی۔

قواعد کے مطابق کسی بھی متنازع ایکشن پر تحریری رپورٹ کرکے معاملہ میچ ریفری کے علم میں لانا ضروری ہوتا ہے۔ اگر اس معاملے میں بھی تحریری شکایت کی جائے تو میچ ریفری کونٹن کھلاڑی ڈی کوک پر جرمانے کرنے کا اختیار رکھتے ہیں۔ جنوبی افریقہ میں پیدا ہونے کے بعد زمبابوے منتقل ہونے والے میچ ریفری اینڈی پائی کرافٹ نے پاکستانی ٹیم مینجر منصور رانا کی زبانی بات کو سنا ضرور ہے لیکن اس پر کوئی ایکشن متوقع نہیں۔

دوسری جانب کرکٹ قوانین بنانے والے میری لی بون نے اپنی سوشل میڈیا پوسٹ پر واضح کیا ہے کہ شق 41.5.1 کے تحت فیلڈرز کی جانب سے کھیل کی روح کے خلاف ایکشن غلط ہے اور یہ امپائرز پر منحصر ہے کہ اگر وہ سمجھتے ہیں کہ فیلڈر نے کوئی خلاف قواعد ایکشن کیا ہے تو وہ رولز کے تحت بلے باز کو ناٹ آوٹ قرار دینے کے ساتھ پانچ رنز پنالٹی اور دو وہ اسکور جو بلے باز دوڑ کر بناچکے ہیں یعنی مجموعی سات رنز ایوارڈ کرسکتے تھے۔

اس قانون کے تحت بلے باز کو یہ بھی اختیار ہے کہ وہ پسند کرسکے کہ اب اسٹرائیک خود کرنی ہے یا دوسرے بیٹسمین کو کرنی چاہیے۔اس کے ساتھ بال بھی کاونٹ نہ ہوتی اور باولر دوبارہ یہ بال کروانے کا پابند ہوتا۔قانون کے تحت میچ ختم ہونے کے چوبیس گھنٹوں میں ٹیم انتظامیہ تحریری شکایت کرکے اس واقعے پر ایکشن لینے کی استدعا کرسکتی ہے۔ رولز کے تحت پاکستانی ٹیم اب بھی چند گھنٹوں میں میچ مکمل ہونے کے وقت ایسا کرنے میں حق بجانب ہے۔

فخر زمان کے بیٹ کی ضرب سے ریکارڈز کا طوفان جاری ہوگیا، ون ڈے کرکٹ میں ہدف کے تعاقب میں سب سے بڑی اننگز کھیل ڈالی، وانڈررز اسٹیڈیم میں بھی اپنا جھنڈا گاڑ دیا،اننگز میں سب سے زیادہ چھکے جڑنے والے دوسرے پاکستانی بن گئے۔
تفصیلات کے مطابق جنوبی افریقہ کے خلاف دوسرے ون ڈے میں پاکستان کے اوپنر فخر زمان نے 193 رنز کی اننگز کھیلی، اگرچہ وہ ٹیم کو فتح سے ہمکنار نہیں کرپائے مگر کئی ریکارڈ اپنے نام کرنے میں ضرور کامیاب رہے، یہ ون ڈے انٹرنیشنل کرکٹ میں ہدف کے تعاقب میں کھیلی جانے والی سب سے بڑی اننگز ہیں جبکہ شکست سے دوچار ہونے والی ٹیم کے کسی بھی کھلاڑی کی جانب سے دوسری بڑی اننگز بھی ہے۔ فخر زمان نے جوہانسبرگ کے وانڈررز اسٹیڈیم پر سب سے بڑی انفرادی اننگز کا ریکارڈ بھی اپنے نام کرلیا ہے۔
اس سے قبل یہاں پر سب سے زیادہ 175 رنز بنانے کا اعزاز ہرشل گبز کے پاس تھا۔ جنوبی افریقہ میں کسی بھی مہمان کھلاڑی کی جانب سے سب سے بڑی ون ڈے اننگز کھیلنے کا ریکارڈ بھی اب فخر کے نام ہوچکا ہے، ان سے قبل اس ریکارڈ پر آسٹریلیا کے ڈیوڈ وارنر قابض تھے جنھوں نے 2016 میں 173 رنز بنائے تھے۔ پاکستان کی جانب سے ون ڈے انٹرنیشنل کرکٹ میں سب سے بڑی اننگز میں فخر زمان کی تازہ کاوش تیسرے نمبر پر رہی، ٹاپ پر بھی فخر 210 رنز ناٹ آؤٹ کے ساتھ موجود ہیں جوکہ انھوں نے 20 جولائی 2018 کو بولاوایو میں زمبابوے کے خلاف اسکور کیے تھے۔دوسرے نمبر پر سعید انور 194 رنز کی اپنی شہرہ آفاق اننگز کے ساتھ موجود ہیں جوکہ انھوں نے 21 مئی 1997 کو چنئی میں بھارت کے خلاف کھیلی اور طویل عرصے تک یہ ایک روزہ کرکٹ کی سب سے بڑی انفرادی اننگز رہی تھی۔ فخر زمان نے اتوار کے میچ میں 10 چھکے جڑے، یہ کسی بھی پاکستانی کھلاڑی کے ایک ون ڈے میں دوسرے سب سے زیادہ چھکے ہیں، اس فہرست میں ٹاپ پر 11 چھکوں کے ساتھ شاہد آفریدی موجود ہیں۔

فخر زمان کی 193 رنز کی شاندار اننگز کے باوجود جنوبی افریقہ نے پاکستان کو دوسرے ون ڈے میچ میں دلچسپ مقابلے کے بعد 17 رنز سے شکست دے کر سیریز 1-1 سے برابر کردی۔

جنوبی افریقہ نے جوہانسبرگ میں کھیلے گئے سیریز کے دوسرے ون ڈے میچ میں پاکستان کی دعوت پر اننگز کا آغاز کیا تو کوئنٹن ڈی کوک اور ایڈن مرکرم نے اپنی ٹیم کو 55 رنز کا اچھا آغاز فراہم کیا۔

ایڈن مرکرم نے قدرے جارحانہ انداز اپنایا اور 34 گیندوں پر دو چھکوں اور چار چوکوں کی مدد سے 39 رنز بنائے لیکن اس سے قبل کہ وہ مزید خطرناک ثابت ہوتے، فہیم اشرف نے ان کی اننگز کا خاتمہ کردیا۔

اس کے بعد کوئنٹن ڈی کوک کا ساتھ دینے کپتان ٹیمبا باووما آئے اور دونوں نے سنبھل کر ذمے دارانہ بیٹنگ کرتے ہوئے اسکور آگے بڑھانا شروع کیا۔

اس دوران باووما نے فہیم اشرف کی گیند پر ایک شاٹ کھیلا جس پر ان کا بلا ٹوٹ کر دو حصوں میں تقسیم ہو گیا۔

دونوں کھلاڑیوں نے اپنی ٹیم کی سنچری مکمل کرا دی جبکہ اس دوران ڈی کوک نے اپنی نصف سنچری مکمل کر لی۔

دونوں نے دوسری وکٹ کے لیے 114 رنز کی شراکت قائم کی لیکن حارث نے ڈی کوک کی وکٹیں بکھیر کر پاکستان کو دوسری کامیابی دلا دی، وکٹ کیپر بلے باز نے آؤٹ ہونے سے قبل 86 گیندوں پر ایک چھکے اور 10 چوکوں کی مدد سے 80 رنز بنائے۔

حارث کو اگلی ہی گیند پر دوبارہ وکٹ لینے کا موقع ملا لیکن وکٹوں کے عقب میں موجود محمد رضوان جنوبی افریقی بلے باز وین ڈر ڈوسن کا آسان کیچ نہ لے سکے۔

ڈوسن نے ڈراپ کیچ کا بھرپور فائدہ اٹھایا اور وکٹ پر آتے ہی جارحانہ انداز اپنایا۔

انہوں نے وکٹ کے چاروں جانب جارحانہ اسٹروکس کھیلتے ہوئے برق رفتاری سے اپنی نصف سنچری مکمل کی، وہ 37 گیندوں پر 6 چوکوں اور 4 چھکوں کی مدد سے 60 رنز کی اننگز کھیلنے کے بعد حسنین کا شکار بنے۔

باووما بطور کپتان پہلی سنچری نہ بنا سکے اور 92 رنز کی عمدہ اننگز کھیلنے کے بعد پویلین لوٹ گئے۔

اختتامی اوورز میں جنوبی افریقہ نے یکے بعد دیگرے وکٹیں گنوائی لیکن دوسرے اینڈ سے ڈیوڈ ملر نے جارحانہ بیٹنگ کا مظاہرہ کر کے پاکستانی باؤلرز کو آڑے ہاتھوں لیا۔

ڈیوڈ ملر نے 27 گیندوں پر 3 چھکوں اور اتنے ہی چوکوں کی مدد سے ناقابل شکست 50 رنز کی اننگز کھیلی جس کی بدولت جنوبی افریقہ کی ٹیم مقررہ اوورز میں 6 وکٹوں کے نقصان پر 341 رنز بنانے میں کامیاب رہی۔

پاکستان کی جانب سے حارث رؤف تین وکٹوں کے ساتھ سب سے کامیاب باؤلر رہے۔

پاکستان نے اننگز کا آغاز کیا تو گزشتہ میچ میں نصف سنچری بنانے والے امام الحق اننگز کے دوسرے ہی اوور میں لنگی نگیدی کو وکٹ دے بیٹھے۔

اس کے بعد فخر زمان کا ساتھ دینے کپتان بابر اعظم آئے اور دونوں نے دوسری وکٹ کے لیے 63 رنز کی ساجھے داری قائم کی۔

گزشتہ میچ میں سنچری بنانے والے بابر ایک مرتبہ پھر اچھی فارم میں نظر آئے لیکن 31 رنز بنانے کے بعد اینرج نوکیا کی وکٹ بن گئے۔

ابھی پاکستانی ٹیم اس نقصان سے سنبھلی بھی نہ تھی کہ ایک گیند کے فرق سے محمد رضوان کھاتا کھولے بغیر ہی سلپ میں کیچ دے بیٹھے۔

فخر نے دانش عزیز کے ساتھ مل کر اسکور کو 85 تک پہنچایا ہی تھا کہ دوسرا ون ڈے کھیلنے والے بلے باز بھی ہمت ہار گئے۔

شاداب خان اور آصف علی بھی وکٹ پر سیٹ ہونے کے بعد پویلین لوٹے اور دونوں کھلاڑی بالترتیب 13 اور 19 رنز بنانے کے بعد آؤٹ ہوئے۔

جب 11 رنز بنا کر فہیم اشرف آؤٹ ہوئے تو پاکستان کی ٹیم 205 رنز پر 7 وکٹیں گنوا چکی تھی اور ایسا محسوس ہوتا تھا کہ شاید قومی ٹیم جلد پویلین لوٹ جائے گی لیکن فخر زمان نے تمام اندازوں کو غلط ثابت کردیا۔

فخر نے شاہین کے ہمراہ آٹھویں وکٹ کے لیے 68 رنز کی شراکت قائم کرنے کے ساتھ ساتھ اپنی سنچری بھی مکمل کی اس شراکت میں شاہین کا حصہ صرف 5 رنز کا تھا۔

فخر نے ہمت نہ ہاری اور حارث رؤف کے ساتھ مل کر اسکور کو 312 تک پہنچا دیا اور اس دوران فاسٹ باؤلر نے صرف ایک رن بنایا۔

ڈبل سنچری سے چند قدم کے فاصلے پر وکٹوں کے درمیان سست روی کا مظاہرہ کرنے پر فخر زمان رن آؤٹ ہو گئے اور کیریئر کی دوسری ڈبل سنچری اسکور نہ کر سکے۔

اوپننگ بلے باز نے 155 گیندوں پر 8 چوکوں اور 10 چھکوں کی مدد سے 193 رنز کی اننگز کھیلی۔

پاکستان کی ٹیم نے مقررہ اوورز میں 9 وکٹوں کے نقصان پر 324 رنز بنائے اور جنوبی افریقہ نے میچ میں 17 رنز سے کامیابی حاصل کر لی۔

اس میچ میں کامیابی کی بدولت جنوبی افریقہ نے تین میچوں کی سیریز بھی 1-1 سے برابر کردی۔

دونوں ٹیموں کے درمیان تیسرا اور فیصلہ کن میچ 7 اپریل کو سنچورین میں کھیلا جائے گا۔

اس سے قبل جوہانسبرگ میں کھیلےگئےسیریز کے دوسرے ون ڈے میچ میں پاکستان نے ٹاس جیت کر میزبان ٹیم کو پہلے بیٹنگ کی دعوت دی تھی۔

دوسرے ون ڈے میچ کو پنک ون ڈے میچ کا نام دیا گیا تھا کیونکہ یہ بریسٹ کینسر کے حوالے سے آگاہی بیدار کرنے کے لیے کھیلا جا رہا تھا۔

جنوبی افریقہ کی ٹیم نے اسی دن کی مناسبت سے میچ روایتی ہرے رنگ کی جرسی کے بجائے پنک رنگ کی جرسی میں کھیلا۔

قبل ازیں دونوں ٹیموں نے میچ کے لیے ٹیم میں کوئی تبدیلی نہیں کی اور گزشتہ میچ کی ٹیم کو برقرار رکھا۔

واضح رہے کہ سیریز کے پہلے ون ڈے میچ میں پاکستان نے میزبان ٹیم کو سنسنی خیز مقابلے کے بعد تین وکٹوں سےشکست دی تھی۔

اگر پاکستان کی ٹیم آج کا میچ جیت جاتی ہے تو وہ تین میچوں کی سیریز اپنے نام کر لے گی۔

میچ کے لیے دونوں ٹیمیں ان کھلاڑیوں پر مشتمل تھیں:

جنوبی افریقہ: ٹیمبا بووما (کپتان)، کوئنٹن ڈی کوک، وایڈن مرکرام، راسی وین ڈر ڈوسین، ہینری کلاسن، ڈیوڈ ملر، اندائل فلکو وایو، کگیسو ربادا، اینرچ نوکیا، لنگی نگیدی، تبریز شمسی

پاکستان: بابر اعظم (کپتان)، امام الحق، فخر زمان، محمد رضوان، دانش عزیز، آصف علی، شاداب خان، فہیم اشرف، شاہین شاہ آفریدی، محمد حسنین، حارث رؤف

بنگلہ دیش میں جاری تین ملکی بلائنڈ کرکٹ سیریز میں پاکستان نے بھارت کو اٹھاون رنز سے شکست دے دی۔

پاکستان نے بھارت کو جیت کےلیے ایک سو چھیاسی رنز کا ہدف دیا تھا جس کے جواب میں بھارتی ٹیم نو وکٹوں پر ایک سو ستائیس رنز تک محدود رہی۔

سہلٹ میں کھیلے گئے اس میچ میں پاکستان نے پہلے کھیلتے ہوئے مقررہ بیس اوورز میں نو وکٹ کھوکر ایک سو پچاسی سکورکیا۔ بدرمنیر نے ستائیس گیندوں پر پچاس رنز کی اننگز کھیلی،جس میں چار چھکے بھی شامل تھے۔ معین اسلم نے تینتیس اور نثار علی نے تیس رنز کا حصہ ڈالا۔ اجے نے دو وکٹیں حاصل کیں۔

منتظمین نے لاجسٹک مسائل کی وجہ سے ٹورنامنٹ کے شیڈول میں ترمیم کی ، پہلے شیڈول میں پاکستان اور بھارت کایہ میچ چار اپریل کو ہونا تھا۔

قومی کرکٹ ٹیم کے کپتان بابر اعظم نے ایک روزہ کرکٹ میں ایک اور منفرد اعزاز اپنے نام کر لیا ہے۔

جنوبی افریقا کے خلاف گزشتہ روز کھیلے گئے پہلے ایک روزہ میچ میں بابر اعظم نے شاندار بلے بازی کا مظاہرہ کرتے ہوئے 103 رنز اسکور کیے۔

یہ بابر اعظم کی ایک روزہ کرکٹ میں 13 ویں سنچری تھی جو انہوں نے اپنے 76 ویں انٹرنیشنل میچ میں اسکور کی۔

بابر اعظم نے سنچری اسکور کر کے ناصرف اپنی ٹیم کی جیت میں اہم کردار ادا کیا بلکہ انہوں نے ایک روزہ کرکٹ میں 13 سنچریاں اسکور کر کے جنوبی افریقا کے ہاشم آملہ اور بھارتی کپتان ویرات کوہلی کو بھی پیچھے چھوڑ دیا۔

سابق جنوبی افریقی بلے باز ہاشم آملہ نے 13 سنچریوں کا کارنامہ اپنے 83 ویں میچ میں سرانجام دیا تھا جبکہ بھارتی کپتان ویرات کوہلی نے اپنی 13 ویں ایک روزہ سنچری 86 ویں میچ میں مکمل کی تھی۔

سنچورین: پاکستان نے پہلے ایک روزہ میچ میں جنوبی افریقا کو سنسنی خیز مقابلے کے بعد شکست دیدی۔

پاکستان اور جنوبی افریقا کے مابین سنچورین میں کھیلے گئے پہلے ایک روزہ میچ میں جنوبی افریقا نے مقررہ اوورز میں 6 وکٹ کے نقصان پر 273 رنز بنائے جس کے جواب میں قومی ٹیم نے مطلوبہ ہدف آخری گیند پر 7 وکٹ کے نقصان پر پورا کیا۔

فخرزمان اور امام الحق نے اننگز کا آغاز کیا تاہم فخرزمان صرف 8 رنز کے مہمان ثابت ہوئے جس کے بعد کپتان بابراعظم نے امام الحق کے ساتھ تیسری وکٹ کے لیے 177 رنز کی اہم شراکت قائم کی اس دوران امام الحق نے نصف سنچری مکمل کی، وہ 70 رنز بنانے کے بعد آؤٹ ہوئے۔
پتان بابراعظم نے ایک بار پھر ذمہ داری کا مظاہرہ کرتے ہوئے شاندار اننگز کھیلی، وہ 104 گیندوں پر 103 رنز کی اننگز کھیل کر آؤٹ ہوئے جس میں 17 چوکے شامل تھے۔ دانش عزیز کا ڈیبیو مایوس کن رہا وہ صرف 3 رنز بناکر اینرک کا شکار بنے جب کہ آصف علی بھی صرف 2 رنز کے مہمان ثابت ہوئے۔

وکٹ کیپبر بیٹسمین محمد رضوان اور شاداب خان 53 رنز کی شراکت قائم کرکے پاکستان کو میچ میں واپس لائے، رضوان 40 رنز کی اننگز کھیل کر آؤٹ ہوئے جب کہ شاداب خان 33 رنز پر آؤٹ رہے۔ جنوبی افریقا کی جانب سے اینرک نورکیا نے 4 ، کگیسو ربادا اور اینڈیلے فیفلکوایو نے ایک ایک وکٹ حاصل کی۔

اس سے قبل میچ کا ٹاس پاکستان نے جیت کر پہلے فیلڈنگ کرنے کو ترجیح دی۔ جنوبی افریقا کی جانب سے ایڈن مارکرم اور کوئنٹن ڈی کاک نے اننگز کا آغاز کیا تاہم شاہین شاہ آفریدی نے دونوں کھلاڑیوں کو جلد ہی پویلین واپس بھیج دیا۔ مارکرم 19 اور ڈی کاک 20 رنز بناکر آؤٹ ہوئے۔

جنوبی افریقا کے کپتان ٹیمبا باؤما اور ہینرک کلاسن صرف ایک رنز کے مہمان ثابت ہوئے۔ ڈیوڈ ملر اور راسی وینڈر ڈیوسن نے پانچویں وکٹ کے لیے 116 رنز کی اہم شراکت قائم کرکے ٹیم کا اسکور بورڈ مستحکم کیا۔ ڈیوڈ ملر نصف سنچری اسکور کرنے کے بعد حارث رؤف کا شکار بنے تاہم راسی وینڈر ڈیوسن نے ذمہ داری اننگز کھیلتے ہوئے ون ڈے کیریئر میں اپنی پہلی سنچری بنانے میں کامیاب رہے اور 123 رنز پر ناٹ آؤٹ رہے۔

آخری اوورز میں اینڈیلے فیفلکوایو نے راسی وینڈر ڈیوسن کا بھرپور ساتھ دیتے ہوئے 29 رنز کی اننگز کھیلی جب کہ ڈیوسن 105 رنز پر ناٹ آؤٹ رہے۔ قومی ٹیم کی جانب سے شاہین آفریدی اور حارث رؤف 2،2 محمد حسنین، فہیم اشرف، نے ایک ایک وکٹ حاصل کی۔

جنوبی افریقہ کی ٹیم میں ٹیمبا بووما (کپتان)، کوئنٹن ڈی کاک (وکٹ کیپر)، ایڈن مارکرم، راسی وینڈر ڈیوسن، ڈیوڈ ملر، ہینرک کلاسن، اینڈیلے فیفلکوایو، کگیسو ربادا، اینرک نورکیا، لنگی اینگیڈی اور تبریز شمسی شامل ہیں۔

قومی ٹیم میں بابراعظم (کپتان)، امام الحق، فخر زمان، محمد رضوان، دانش عزیز، آصف علی، شاداب خان، فہیم اشرف، محمد حسنین، شاہین شاہ آفریدی اور حارث رؤف شامل ہیں۔ پاکستان کی جانب سے دانش عزیز ڈیبیو کررہے ہیں۔

سنچورین: جنوبی افریقا نے پاکستان کو پہلے ایک روزہ میچ میں جیت کے لیے 274 رنز کا ہدف دیا ہے۔

تین ایک روزہ میچوں کی سیریز کا پہلا میچ آج سپر اسپورٹس پارک سنچورین میں کھیلا جا رہا ہے۔

پاکستان نے جنوبی افریقا کے خلاف پہلے ون ڈے میچ میں ٹاس جیت کر بولنگ کا فیصلہ کیا۔ ابتدائی چار وکٹیں جلدی گرنے کے باوجود میزبان ٹیم نے مقررہ 50 اوورز میں 6 وکٹوں کے نقصان پر 273 رنز بنائے۔

جنوبی افریقا کے وان ڈرڈیوسن 123 رنزکی ناقابل شکست اننگز کھیلی جب کہ پاکستان کی جانب سے شاہین شاہ آفریدی اور حارث رؤف نے 2، 2 اور فہیم اشرف اورمحمد حسنین نے ایک ایک وکٹ حاصل کی۔

پاکستان کی ٹیم میں حسن علی شامل نہیں کیا گیا ہے جب کہ دانش عزیز پاکستان کی جانب سے اپنا ڈیبو کریں گے۔

یاد رہے کہ دانش عزیز ڈومیسٹک ون ڈے کرکٹ میں 7 میچوں میں 297 رنز بنانے کے بعد قومی ٹیم میں شامل کیے گئے ہیں۔

لاہور: پاکستان نے افریقی شیروں کے دانت کھٹے کرنے کی ٹھان لی پہلا ون ڈے جمعے کو سنچورین میں کھیلا جائے گا۔

گرین شرٹس نئے سال میں پہلی فتح حاصل کرنے کے لیے بے تاب ہیں، مشکل مقامی کنڈیشنز میں بیٹنگ لائن کا سخت امتحان ہوگا، ٹاپ آرڈر کا ذمہ دارانہ کھیل بڑے اسکور کی بنیاد فراہم کرے گا،کپتان بابر اعظم، فخرزمان، امام الحق اور محمد رضوان سے بلند توقعات وابستہ ہوں گی،پاور ہٹرزکو بھی پیس اور باؤنس کا چیلنج قبول کرتے ہوئے رنز بنانا ہوں گے۔

آل راؤنڈرز شاداب خان اور فہیم اشرف امیدوں کا مرکز ہیں،پیس بیٹری میں شاہین شاہ آفریدی اور حارث رؤف سازگار پچز پر تہلکہ خیز کارکردگی دکھانے کیلیے کوشاں ہونگے، حسن علی یا محمد حسنین میں سے کسی ایک کو جگہ ملے گی، کپتان بابر اعظم کا کہنا ہے کہ ہم نے جدیدکرکٹ کو سامنے رکھ کر پلان بنا لیا، بے خوف اور مثبت انداز سے کھیلیں گے، ہماری بولنگ حریف کو300 سے کم رنز تک محدود رکھنے کی صلاحیت رکھتی ہے، سرفراز احمد اور حسن علی سمیت تمام کھلاڑی باصلاحیت اور سلیکشن کیلیے دستیاب ہیں۔
دوسری جانب پروٹیز بھی بھرپور قوت سے مہمانوں کے حوصلے پست کرنے کیلیے پْرعزم ہیں،نئے کپتان ٹیمبا باووما کوابتدائی دونوں میچز میں اسٹار کرکٹرز کی خدمات حاصل ہوں گی۔ تفصیلات کے مطابق پاکستان اور جنوبی افریقہ کے مابین ون ڈے سیریز کا پہلا میچ جمعے کو سنچورین کے سپر اسپورٹس پارک میں کھیلا جائے گا، آئی سی سی سپر لیگ میں شامل ان تینوں مقابلوں کے پوائنٹس ورلڈکپ کوالیفائنگ کیلیے بھی کار آمد ثابت ہوں گے۔
گرین شرٹس نے ورلڈکپ2019کے بعد صرف 5ون ڈے میچز کھیلے ہیں،ٹیم آخری بار زمبابوے کیخلاف ایکشن میں نظر آئی تھی،ہوم کنڈیشنزکے باوجود گرین شرٹس کی کارکردگی قابل رشک نہیں تھی،سیریز تو 2-1سے جیت لی لیکن بھارت، انگلینڈ،آسٹریلیا اور نیوزی لینڈ جیسی جدید کرکٹ کا مظاہرہ دیکھنے میں نہیں آیا،آخری میچ ٹائی ہونے پر سپر اوور میں مہمان ٹیم نے فتح حاصل کرلی تھی،ہوم سیریز کے اسکواڈ میں تبدیلیاں کرتے ہوئے پاکستان نے اب نئے چہروں کو بھی اسکواڈ میں شامل کیا ہے،ٹیم مینجمنٹ کو کمبی نیشن کے حوالے سے چند اہم فیصلے کرنا ہوں گے۔
کپتان بابر اعظم، فخرزمان، امام الحق، محمد رضوان تو بیٹنگ لائن کا لازمی حصہ ہیں،حیدر علی،آصف علی اور دانش عزیز میں سے دیگر کا انتخاب ہوگا، اسپن بولنگ کا شعبہ شاداب خان سنبھالیں گے جو بیٹ سے بھی کارآمد ثابت ہوسکتے ہیں، پیس آل راؤنڈر کے طور پر فہیم اشرف کی جگہ پکی نظر آ رہی ہے،فاسٹ بولرز میں شاہین شاہ آفریدی اور حارث رؤف کی خدمات ٹیم کو میسر ہوں گی،اگرچہ حسن علی کو بابر اعظم نے سو فیصد فٹ قرار دیا ہے مگر کورنا سے نجات پانے والے پیسر کو کھلانے کا خطرہ مول نہ لیا گیا تو محمد حسنین کو میدان میں اتارا جائے گا، مہمان کرکٹرز نے ملک میں انٹرااسکواڈ میچز سے ون ڈے کرکٹ کی کمی سے ہونے والے نقصان کا ازالہ کرنا چاہا تھا مگر جنوبی افریقہ کنڈیشنز میں کوئی پریکٹس میچ کھیلنے کا موقع نہیں ملا،اس لیے خاص طور پر بیٹنگ کو مشکل کا سامنا کرنا پڑ سکتا ہے۔
البتہ کپتان بابر اعظم نے سیریز میں گرین شرٹس کو فیورٹ قرار دیتے ہوئے فتح کی امیدیں وابستہ کرلی ہیں، ورچوئل میڈیا کانفرنس میں انھوں نے کہا کہ جنوبی افریقہ میں بھی پریکٹس اچھی رہی، تمام کھلاڑی خود کو کنڈیشنز سے ہم آہنگ کرنے کیلیے کوشاں رہے،پوری ٹیم جیت کیلیے پْراعتماد ہے،ہم نے اس سیریز کیلیے جدیدکرکٹ کو سامنے رکھ کر پلانز بنائے اور پریکٹس بھی کی، بہتری کی گنجائش ہمیشہ رہتی اور اس پر کام جاری رہتا ہے، ہمیں بے خوف اور مثبت کرکٹ کھیلنا ہے۔
ہم اسٹرائیک ریٹ اچھا رکھتے ہوئے 350 رنز کے ٹوٹل تک پہنچنے کی کوشش کریں گے، ٹاپ 4 میں شراکتیں بنیں تو اسٹرائیک ریٹ بھی اچھا ہو گا، فخرزمان، امام الحق اور محمد رضوان سے امیدیں وابستہ ہیں،انھوں نے کہاکہ مجھے اپنی بولنگ لائن پر اعتماد ہے کہ وہ حریف ٹیم کو 300 سے کم رنز تک محدود رکھ سکتی ہے، آئی سی سی سپر لیگ میں شامل سیریز ہونے کی وجہ سے پوائنٹس ورلڈکپ کوالیفائنگ کیلیے بھی اہم ہیں، جنوبی افریقی ٹیم اپنی کنڈیشنز میں اچھا کھیلتی ہے، ہماری کوشش ہوگی کہ فتح سے قیمتی پوائنٹس حاصل کریں، بابر اعظم نے کہا کہ ٹیم کمبی نیشن ہمارے ذہن میں ہے، 1 یا2 تبدیلیاں ہوتی ہیں، سرفراز احمد اور حسن علی سمیت تمام کھلاڑی باصلاحیت اور سلیکشن کیلیے دستیاب ہوں گے۔
دیکھیں گے کہ پچ کی صورتحال کے مطابق کس کا انتخاب مناسب ہوگا۔ دوسری جانب جنوبی افریقی ٹیم کی قیادت نئے کپتان ٹیمبا باووما کے سپرد ہوگی،کوئنٹن ڈی کک، ڈیوڈ ملر، کاگیسو ربادا،اینرچ نورکیا اور لونگی نگیڈی کو تیسرے ون ڈے سے قبل آئی پی ایل میں شرکت کیلیے بھارت جانا ہے، البتہ ابتدائی دونوں مقابلوں میں میزبان ٹیم بھرپور قوت کے ساتھ میدان میں اترے گی،اگرچہ پاکستان ٹیم گذشتہ سیریز میں بہتر مقابلہ کرتے ہوئے ناکام ہوئی تھی لیکن اس بار بابر اعظم کو کئی تجربہ کار کھلاڑیوں کی خدمات حاصل نہیں ہیں،پروٹیز اسی کمزوری کا فائدہ اٹھاتے ہوئے پہلے ہی میچ میں گرین شرٹس کا اعتماد متزلزل کرنے کی کوشش کریں گے۔

لاہور: پاکستان اور بھارت میں عرصے سے جاری کشیدہ تعلقات اور تناؤ کے باوجود بلائنڈ ٹیموں نے کرکٹ پچ پر دوستی کے سفر کا ایک بارپھر آغاز کردیا۔

پاکستان اور بھارت کی بلائنڈ کرکٹ ٹیموں کا ٹاکرا چار اپریل کو بنگلا دیش کے شہر ڈھاکا میں ہوگا، ٹیم میں شامل آفیشلز اور کھلاڑیوں کی کوویڈ ٹیسٹ رپورٹس منفی آگئی ہیں۔ رواں سال میں یہ پاکستان بلائنڈ کرکٹ ٹیم کا پہلا غیر ملکی دورہ ہے۔

پاکستان، بھارت اور بنگلا دیش کے اس ٹی ٹوئنٹی سیریز میں شرکت کے لیے پاکستانی ٹیم نثار علی کی قیات میں کل لاہور سے ڈھاکا روانہ ہوگی۔ گلش یوتھ کلب ڈھاکا گراؤنڈ میں 2 اپریل کو افتتاحی میچ بھارت اور بنگلا دیش کا ہوگا جب کہ 3 اپریل کو پاکستان کا مقابلہ بنگلا دیش سے طے ہے۔
چار اپریل کو پاکستان اور بھارت کی ٹیمیں آمنے سامنے ہوں گی جب کہ 6 اپریل کو پاکستان اور بنگلا دیش جبکہ پاکستان اور بھارت کا دوسرامیچ 7 اپریل کو کھیلا جائے گا۔ دو بہترین ٹیموں کا فائنل آٹھ اپریل کو شیڈول ہے۔

قومی کرکٹ ٹیم کے سابق کپتان وسیم اکرم کی اہلیہ شنیرا اکرم بھی اپنے شوہر کی ایک ماضی کی تصویر کو دیکھ کر حیران ہوگئیں۔

شنیرا اکرم نے اپنی ٹوئٹ میں لکھا کہ آج صبح جب میں نے ٹوئٹر چیک کیا تو پہلی بار اپنے شوہر کو ایسے دیکھا ۔کیا یہ نارمل ہیں ؟

خیال رہے کہ وسیم اکرم کی وائرل تصویر حال ہی میں بھارتی پریزینٹر اور کمنٹیٹر گوتھم بھیمانی نے ٹوئٹر پر شیئر کی۔

گوتھم بھیمانی نے وسیم اکرم کی تصویر شیئر کرتے ہوئےا سے پسندیدہ یادگار قرار دیا۔

گوتھم بھیمانی نے اپنی ٹوئٹ میں لکھا کہ یہ میری اور وسیم اکرم کی پہلی ملاقات تھی جب پاکستانی اور بھارتی ٹیم نے پول میں ہولی کھیلی۔

میڈیا رپورٹس کے مطابق یہ تصویر پاکستانی ٹیم کے 1987میں بھارت کے دورے کے دوران لی گئی تھی۔