Category دلچسپ و عجیب

برطانیہ(نیٹ نیوز/ایمرا نیوز) برطانیہ کی ایک ڈاکٹر نے ایسا کمپاؤنڈ تیار کیا ہےجو تیزاب پھینکے جانے پر خواتین کے چہرے کو جھلسنے سے بچاسکتا ہے۔

برطانیہ میں بھی خواتین پر تیزاب پھینکنے کے واقعات میں اضافہ ہورہا ہے جس کے بعد ایک مقامی ماہر ڈاکٹر الماس احمد نے ایسا میک اپ تیار کیا ہے جو خواتین کو اس ہولناک حملے سے محفوظ رکھ سکتا ہے۔ڈاکٹر الماس نے بتایا کہ وہ گزشتہ 10 برس سے ایسے میک اپ پر کام کررہی ہیں جو خواتین پر اچانک ہونے والے تیزابی حملے سے بچاسکے۔ پہلے مرحلے میں انہوں نے اسے ایک فاؤنڈیشن کریم میں ملایا اس کے بعد وہ اس مرکب سے سن اسکرین اور موئسچرائزر بنائیں گی۔ڈاکٹر الماس احمد کے مطابق ان کا کیمیکل 400 درجے سینٹی گریڈ تک حرارت برداشت کرسکتا ہے اور اس کی تیاری پر وہ اپنی جیب سے لاکھوں روپے خرچ کرچکی ہیں۔ انہیں امید ہے مجاز ادارے ان کی نئی ایجاد کو استعمال کرنے کی اجازت دے دیں گے۔الماس کا کہنا ہے کہ ان کا تیار کردہ کمپاؤنڈ نہ صرف واٹر پروف ہے بلکہ یہ جلد کو آگ کی حدت سے بھی بچاتا ہے۔
ڈاکٹر الماس اس وقت میڈیسنز اینڈ ہیلتھ کیئر پراڈکٹس ریگولیٹری ایجنسی سے میک اپ کمپاونڈ کی منظوری کا انتظار کر رہی ہیں اور ممکنہ طور پر یہ میک اپ کمپاؤنڈ آئندہ برس تک مارکیٹ میں دستیاب ہوگا۔گزشتہ کچھ برسوں کے دوران دنیا بھر میں خواتین پر تیزاب گردی کے واقعات اضافہ دیکھنے میں آیا ہے اور 2017 میں صرف برطانیہ میں 6 ماہ میں 400 واقعات سامنے آئے۔

نارتھ کیرولائنا:(نیٹ نیوز/ایمرا نیوز) امریکی ریاست شمالی کیرولائنا میں واقع ہاٹ ڈاگ ڈائنر کا اسٹاف اس وقت ششدر رہ گیا جب ایک یوٹیوب اسٹار نے صرف دو گلاس پانی منگوانے کے بعد خاتون ملازمہ کو 10 ہزار ڈالر ٹپ دے دی۔انٹرنیٹ پر یوٹیوبر مسٹر بیسٹ کے نام سے مشہور ہے اور 90 لاکھ افراد اس کے فالوورز ہیں۔

چند روز قبل مسٹر بیسٹ نارتھ کیرولائنا کے شہر گرین ویلی میں آیا اور اس نے دو گلاس یا دو بوتل پانی منگوایا۔ پانی پینے کے بعد اس نے نقد کی صورت میں ڈالروں کی ایک بڑی گڈی خاتون ملازمہ کو بطور ٹپ دے دی جسے بعد میں گنا گیا تو اس میں 10 ڈالر کے چھوٹے بڑے نوٹ شامل تھے۔مسٹر بیسٹ نے پانی کے چند گھونٹ بھرے اور رقم میز پر رکھ کر ریستوران سے باہر چلا گیا۔ اس واقعے کے بعد ریستوران کے مالک بریٹ اولیور نے ایک مقامی ٹی وی چینل کو بتایا کہ رقم کا بڑا حصہ ویٹرس اپنے پاس رکھیں گی جبکہ کچھ رقم بقیہ اسٹاف میں بانٹی جائے گی۔ اس سے قبل گاہک بڑی ٹپ دیتے رہے ہیں لیکن 10 ہزار ڈالر کی رقم ہم نے پہلی بار دیکھی ہے۔ریستوران کے مالک نے کہا کہ زندگی میں ایک بار ہی ایسا ہوتا اور اتنی بڑی ٹپ کی پورے شہر میں خبر پھیل گئی ہے۔

فلوریڈا:(نیٹ نیوز/ایمرا نیوز) وسطی افریقہ کی جھیل میں مگرمچھ کی ایک بالکل نئی قسم دریافت ہوئی ہے لیکن افسوسناک خبر یہ ہے کہ ایسے مگرمچھوں کی تعداد بہت کم ہے اور ان کی بقا کو شدید خطرات لاحق ہیں۔

میٹھے پانی میں رہنے والا یہ مگرمچھ درمیانے درجے کا ہے اور اس کی تھوتھنی پتلی اور ہموار ہے ۔ پہلے ماہرین اسے ایک نئی قسم سمجھے تھے مگر اب ان مگرمچھوں کو دو مختلف اقسام میں بیان کیا گیا ہے۔ماہرین نے وسطی افریقہ کے چھ ممالک کے فطری ماحول یا قید میں ایسے مگرمچھوں کے ڈی این اے کا جائزہ لیا ہے۔ اس تحقیق سے معلوم ہوا ہے کہ جسے وہ صرف ایک قسم کا مگرمچھ جان رہے تھے اصل میں ان کی دو اقسام ہیں لیکن ان کی ظاہری کیفیت ہوبہو یکساں ہے۔ ان میں سے ایک نوع مغربی افریقہ میں پائی جاتی ہے جبکہ دوسری قسم وسطی افریقہ میں عام ہے۔اسے فلوریڈا انٹرنیشنل یونیورسٹی کے ماہر میتھیو شرلے نے دریافت کیا ہے۔ ان کے مطابق ان مگرمچھوں کی 90 فیصد تعداد ختم ہوچکی ہے اور اب ماحول میں ان کی 10 فیصد تعداد بچی ہے جس کے تحفظ کے لیے خاطر خواہ اقدامات کرنا ہوں گے۔ اسی بنا پر مغربی افریقہ کی قسم کی بقا کو شدید خطرات لاحق ہیں۔ انٹرنیشنل یونین آف کنزرویشن آف نیچر (آئی یو سی این) نے ہموار تھوتنی والے اس مگرمچھ کو 2014 میں ہی شدید خطرے سے دوچار جانداروں کی فہرست میں شامل کرلیا تھا۔اس مخلوق کا قدرتی مسکن تباہ ہورہا ہے، ان کا شکار کیا جاتا ہے، اور مچھلیوں کے شکار سے ان کی غذا ختم ہورہی ہے اور اکثر یہ جال میں بھی پھنس جاتے ہیں۔ اسی بنا پر مگرمچھوں کی تعداد تیزی سے گھٹ رہی ہے۔

بدین(نیٹ نیوز/ایمرا نیوز) ٹماٹر کی نئی فصل ضلع بدین کی مارکیٹ میں آتے ہی کوڑیوں کے مول ہو گئی، عام مارکیٹ میں بھی ٹماٹر 5روپے فی کلو فروخت ہو رہا ہے۔ضلع بدین کو ٹماٹر کی کاشت وپیداوار کے لحاظ سے ملک میں نمایاں مقام حاصل ہے اور یہاں کی ٹماٹر منڈی کا شمار بھی ملک کی بڑی ٹماٹر منڈیوں میں کیا جاتا ہے۔

بدین میں ٹماٹر کی نئی فصل کے مارکیٹ میں آتے ہی ٹماٹر کے بھائو انتہائی گر گئے ہیں جس سے کاشتکار شدید پریشانی اور مالی مشکلات کا شکار ہوگئے ہیں۔مقامی منڈی سے ملک کے تمام بڑے شہروں کو ٹماٹر لے جایا جا رہا ہے اور موجودہ وقت میں روازنہ 50سے 60گاڑیاں ٹماٹر کی کراچی، لاہور اور پشاور تک لے جائی جاتی ہیں ۔کاشتکاروں کا کہنا ہے کہ جب فصل کھیت کھلیان میں ہو تو قیمت کوڑیوں کے مول ہوجاتی ہے اور جب بڑے تاجروں کے سرد خانوں میں ٹماٹر محفوظ ہوجائیں تو یہ مہنگے داموں بکتا ہے اور اسی عمل سے کاشتکار دن بدن بدحال ہوتے جا رہے ہیں ۔

کراچی(نیٹ نیوز/ایمرا نیوز)پاکستانی ’’کنگال ارب پتی‘‘خوف کا شکارجبکہ ٹینشن کی وجہ سے اہلیہ بھی بیمار ہوگئی ہے۔رکشہ چلانے والے محمد رشید کے نام سے بنے اکائونٹ میں3ارب روپے کا انکشاف ہوا تھا۔تفصیلات کے مطابق پاکستان کا رکشہ ڈرائیور ایک سال سے اپنی بیٹی کو بائیک خرید کر دینے کیلئے 300 روپے کی بچت کرتا ہے لیکن جب اسے معلوم ہوا کہ اس کے نام سے بنے ایک غیر استعمال ہونے والے اکائونٹ میں 3ارب روپے ہیں تو 43سالہ محمد رشید پریشان اور حیران ہوگیا اور اسے یہ بھی معلوم تھا کہ ملک کے وزیر اعظم عمران خان نے کرپشن کا سر کچلنے کیلئے عزم کر رکھا ہے تو پہلے اس نے سوچا کہ کہیں چھپ جائے لیکن دوستوں نے اسے ایسا کرنے سے منع کیا اور اسے حکام کے ساتھ تعاون کرنے کیلئے کہا۔ اسے ایف آئی اے کی کال بھی موصول ہوئی تھی، انہوں نے کہا کہ میرا نام کلیئر ہوگیا لیکن اب بھی میں خوف اور بے چینی کا شکار ہوں اور اچانک رکشہ روک سڑک پر روک دیتاہوں کہ جیسے کوئی اور انویسٹی گیشن ایجنسی میرا پیچھا کررہی ہے،اس نے کہا کہ میری بیوی بھی ٹینشن کی وجہ سےبیمار ہوگئی ہے۔

بیجنگ:(نیٹ نیوز/میڈیا 92 نیوز) ایک چینی شخص شرط کے دوران 8 انچ لمبا چمچہ نگل لیا جو غلطی سے اس کے ایسوفیگس یا غذائی نالی میں ایک سال تک اٹکا رہا تاہم ڈاکٹروں نے ایک مشکل آپریشن کے بعد اس کی پریشانی دور کردی ہے۔
چین کے خودمختار علاقے زنجیانگ سے تعلق رکھنے والے ایک نامعلوم شخص نے بتایا کہ چمچہ پھنسنے کے باوجود اسے کھانے پینے اور سانس لینے میں کوئی دقت پیش نہیں آرہی تھی اور اسی وجہ سے وہ ڈاکٹر کے پاس نہیں گیا لیکن چند روز قبل اس کے سینے میں درد اٹھا تو اس نے ڈاکٹر سے رجوع کیا۔
ایکسرے سے معلوم ہوا کہ چمچہ سیدھا ہوکر اس کی غذائی نالی میں پھنسا ہوا ہے اور یہ اس کی خوش قسمتی ہے کہ وہ زندہ رہا کیونکہ اس سے سانس میں رکاوٹ پیدا ہوسکتی تھی۔ ایک دن وہ شراب کے نشے میں تھا کہ اس نے دوستوں کے ساتھ چمچہ نگلنے اور اسے دوبارہ اگلنے کی شرط لگوائی۔ اس شرط کے دوران چمچہ نالی میں جاکر پھنس گیا اور باہر نہ آسکا لیکن وہ اسپتال جانے کی بجائے دیکھنا چاہتا تھا کہ چمچہ کسی پریشانی کی وجہ بنتا ہے یا نہیں۔
جب اس نے ڈاکٹروں کو غذائی نالی میں پھنسے چمچے کے بارے میں بتایا تو وہ یہ جان کر حیران رہ گئے کیونکہ اس وقت تک اس کے معدے میں انفیکشن پھیلنا شروع ہوچکا تھا۔ ڈاکٹروں نے فوری طور پر چمچہ نکالنے کا فیصلہ کیا اور مریض کو بے ہوش کرنے کے بعد دو گھنٹے کی جدوجہد کے بعد اس کی نالی سے چمچہ نکال لیا۔
اگرچہ یہ ایک خطرناک عمل تھا لیکن ڈاکٹروں نے کہا کہ خوش قسمتی سے اس واقعے سے مزید پیچیدگیاں پیدا نہیں ہوئیں ورنہ صرف سوتے دوران ہی دم گھنٹے سے اس کی موت یقینی تھی۔

یوگینڈا:(نیٹ نیوز/میڈیا 92 نیوز) افریقا میں ایک تنظیم اور دیگر اداروں کی مدد سے تیار کردہ خاص کرسی نما کُشن سے بچوں کی ولادت میں بہت سہولت نوٹ کی گئی ہے۔
اطالوی تنظیم ’ڈاکٹرز وِد افریقا‘ اور یونیسیف کے تعاون سے یہ کم خرچ اور انقلابی ایجاد بنائی گئی۔ اپنی افادیت کی بنا پر کئی افریقی ممالک کے میٹرنٹی ہومز اور اسپتالوں میں اسے استعمال کیا جارہا ہے اور دیگر اسپتال بھی اسے تیزی سے قبول اور استعمال کررہے ہیں۔ جنوبی سوڈان میں بھی نرسوں نے اسے کامیابی سے استعمال کیا ہے اور ماؤں نے اسے بہترین قرار دیا ہے۔
یوگینڈا کے ایک علاقے کاراموجا میں اکثر خواتین گھروں میں بچوں کو جنم دیتی ہیں اور اس عمل میں اکڑوں بیٹھا کرتی تھی تاہم اب خاص زچگی صوفے کی بدولت وہ اپنی سہولت سے بچے کو جنم دے رہی ہیں اور بچہ نرم فوم پر آکر رکتا ہے۔ اس ضمن میں رپورٹ کے مصنف اولیوفیمی اولاپاڈو کہتے ہیں کہ زچگی صوفے کی بدولت خواتین اپنی پسندیدہ پوزیشن میں بچے کو جنم دے سکتی ہیں۔
صوفے کے دائیں اور بائیں جانب فولادی ہینڈل نصب ہیں جنہیں خواتین زچگی کے دوران تھام سکتی ہیں۔ کشن کی ساخت کچھ اس طرح بنائی گئی ہے کہ آنول نال گرنے میں بھی آسانی ہوتی ہے۔ یونیسیف کے مطابق صوفہ بچے کی پیدائش کے عمل کو بھی تیز کرتا ہے۔

اطالوی تنظیم اور یونیسیف اس کشن کی کامیابی کے بعد اسے پورے افریقا میں رائج کرنے کے متعلق سنجیدگی سے غور کررہے ہیں۔

(نیٹ نیوز/میڈیا 92 نیوز) برطانوی اخبار کے مطابق چین میں ہرہفتے دو افراد ارب پتی بن جاتے ہیں، 2017 میں دنیا کے ارب پتیوں کی دولت میں ریکارڈ اضافہ دیکھا گیا ہے۔

سوئس بینک کی رپورٹ کے حوالے سے برطانوی اخبار نے لکھا ہےکہ دنیا میں 2158امیر ترین افراد کی مجموعی دولت 11 ہزار 881 کھرب روپے سے زائد ہوگئی ہے۔

ارب پتیوں کی دولت میں 2017میں جس قدر اضافہ ہوا، اِس سے پہلے تاریخ میں کبھی نہیں ہوا، یہ اضافہ آسٹریلیا یا اسپین کی ملکی پیداوار سے زیادہ تھا۔

رپورٹ کے مطابق2017میں ایشیا پیسیفک میں814ارب پتی تھے جن کی2007میں تعداد صرف 178تھی، 701ارب پتی افراد ایسے ہیں جن کی عمر 70 سال سے زائد ہے، ان میں سے 30 افراد کی مجموعی دولت 10 کھرب ڈالر سے زائد ہے۔

لاہور: (نیٹ نیوز/ایمرا نیوز) چین میں اینشی گرینڈ کینیون نامی وادی میں ہاٹ ایئر بیلون فیسٹیول کاانعقاد کیا گیا۔ منعقد کئے گئے اس ہاٹ ایئر بیلون فیسٹیول کے دوران درجنوں رنگ برنگے غبارے آسمان پر دلکش نظارے بکھیرتے نظر آئے۔

اس بیلون فیسٹیول میں جہاں درجنوں خوبصورت اور دلکش ڈیزائن کے غباروں نے آسمان کو سجایا وہیں دوسری جانب ہزاروں سیاحوں کی آمد نے بھی رونقیں بڑھا دیں۔ واضح رہے کہ اس حسین نظارے کو دیکھنے نہ صرف مقامی بلکہ دنیا بھر سے بھی ہزاروں افراد نے یہاں کا رخ کیا۔

جکارتا:(نیٹ نیوز/ایمرا نیوز) انڈونیشیا میں عوامی ٹرانسپورٹ میں اب پلاسٹک کی خالی بوتلیں دے کر مفت سفر کیا جاسکتا ہے۔
سورا بایا شہر کی انتظامیہ نے عوام کو کچرے کی بازیافت (ری سائیکلنگ) کی ترغیب دینے کے لیے اس اہم اقدام کا اعلان کیا ہے۔ اس کے بدلے شہری ٹرانسپورٹ کی سرخ بسوں کے ٹرمینل پر پلاسٹک کے کین اور بوتلیں براہِ راست جمع کراکے انہیں کرائے میں تبدیل کراسکتے ہیں اور مفت سفر کیا جاسکتا ہے۔

اگر بس کا راستہ دو گھنٹے طویل ہے تو ضروری ہے کہ آپ پلاسٹک کی 5 بوتلیں یا 10 کپ جمع کروائیں تاہم ان کی جسامت کا خیال رکھا جاتا ہے، انڈونیشیا کے اس شہر کی انتظامیہ نے اعلان کیا ہے کہ وہ کسی طرح 2020ء تک اس شہر سے پلاسٹک کے کچرے کا خاتمہ کرنا چاہتی ہے۔
سورابایا کے مطابق شہر میں روزانہ 400 ٹن پھینکا جانے والا کچرا کسی نہ کسی طرح پلاسٹک کی صورت میں ہوتا ہے۔ ایک بس روزانہ 250 کلوگرام پلاسٹک جمع کرسکتی ہے جو ایک ماہ میں ساڑھے سات ٹن تک پہنچ سکتا ہے۔ بعد ازاں یہ پلاسٹک جمع کرکے ان کمپنیوں کو فروخت کیا جائے گا جو پلاسٹک ری سائیکل کرتی ہیں۔ اس رقم سے بسوں کے اخراجات اور شہر میں سبزہ اگانے کا کام کیا جائے گا۔

آبادی کے لحاظ سے انڈونیشیا دنیا کا چوتھا بڑا ملک ہے اور ایشیا میں سب سے بڑے بارانی جنگلات بھی یہاں پائے جاتےہیں لیکن اس ملک میں پلاسٹک کے خلاف جاری حالیہ مہم میں نہایت اہم اقدامات کیے گئے ہیں۔