Category بزنس

لاہور (ایمرا نیوز) ملک میں گیس بحران بے قابو ہو نے لگا، صنعتیں بند ہو رہی ہیں، گھریلو صارفین بھی پریشان ہیں۔
بحران کی وجہ گیس کے محدود ملکی ذخائر میں ہر سال تیزی سے ہونے والی کمی ہے، حکام کے مطابق صرف ایک سال کے دوران گیس کی پیداوار میں 6 فیصد کمی ہوئی جبکہ طلب میں سالانہ بنیادوں پر 5 فیصد کا اضافہ ہورہا ہے۔
پاکستان میں اس وقت گیس کی کل پیداوار 2006 ملین کیوبک فٹ اور طلب 3884 ملین کیوبک فٹ ہو چکی ہے جبکہ 2025 میں یومیہ 1 ارب 20 کروڑ کیوبک فٹ گیس اضافی درکارہو گی۔
پٹرولیم ڈویژن حکام نے خبردار کیا ہے کہ سردیوں میں گیس کی یومیہ طلب 8 ارب کیوبک فٹ تک پہنچنے کا امکان ہے، اس دوران گیس کی مجموعی پیداوار 3 ارب 75 کروڑ کیوبک فٹ یومیہ ہو گی اور ‏1 ارب کیوبک فٹ یومیہ ایل این جی بھی درآمد کی جائے گی، یوں شارٹ فا ل نمایاں اضافے سے 3 ارب 25 کروڑ کیوبک فٹ یومیہ سے زائد ہوسکتا ہے۔
عالمی مارکیٹ میں گیس کی بڑھتی قیمتیں بھی بحران کی اہم وجہ ہیں، پاکستان ایل این جی لمیٹڈ نے ایل این جی کے ساٹھ اضافی کارگوز فراہمی کے لیے بڈنگ طلب کی لیکن 3 اکتوبر کی مقررہ تاریخ تک کسی کمپنی نے دلچسپی ہی ظاہر نہیں کی۔
حکومت نے گیس کی طلب کو مدنظر رکھتے ہوئے 2023 سے 2028 تک ہر سال 12 اضافی کارگوز منگوانے کا فیصلہ کیا تھا، اس صورتحال میں وزارت پٹرولیم نے ممکنہ گیس بحران سے نمٹنے کیلئے گیس لوڈ منیجمنٹ پلان کے لیے کمپنیوں سے ورکنگ پیپر طلب کر لیا ہے۔
پلان کی روشنی میں یہ فیصلہ کیاجائے گا کہ کس سیکٹر کو کتنی گیس ملے گی؟ ایسے میں اوگرا نے بھی واضح طور پر بتادیاہے کہ گیس بحران سے نمٹنا ہے تو ذخائر کی تلاش کیلئے آپریشنز تیز کرنے کیساتھ نئے ایل این جی ٹرمینلز لگانا ہوں گے جبکہ صنعتی صارفین کو پرائَیویٹ سیکٹر کے ذریعے ایل این جی فراہمی کا بھی میکنزم بنایا جائے۔

کراچی (ایمرا نیوز)کراچی کے مختلف علاقوں میں موبائل فون سروس صبح سویرے سے بند ہے۔صارفین کے مطابق گلستان جوہر، ڈیفنس اور ناظم آبادمیں موبائل نیٹ ورکس بند ہیں۔
اس کےعلاوہ ملیر، صدر اور ٹاور سمیت کئی علاقوں میں بھی صارفین نیٹ ورکس بند ہونے کی شکایات کررہے ہیں۔
ابتدا میں پی ٹی اے حکام نے موبائل فون سروس بند ہونے سے لاعلمی کا اظہار کیا تاہم اب پی ٹی اے حکام کا کہنا ہےکہ حکومت کی درخواست پر 12 ربیع الاول کے سلسلے میں سروسز بند ہیں۔

اسلام آباد(ایمر ا نیوز)وفاقی وزیر خزانہ سینیٹر اسحاق ڈار کی زیر صدارت ایگزیکٹو کمیٹی آف دی نیشنل اکنامک کونسل (ایکنک) کے اجلاس میں اربوں روپے کے منصوبوں کی منظوری دے دی گئی۔
اسحاق ڈار کی زیر صدارت ہونے والے ایکنک اجلاس کا اعلامیہ جاری کیا گیا ہے جس میں بتایا گیا ہے کہ اجلاس میں سیالکوٹ میں 500 کے وی کا سب اسٹیشن بنانےکی منظوری دی گئی۔
وزارت خزانہ کے مطابق سب اسٹیشن کے قیام پر 31 ارب 82 کروڑ روپے کی لاگت آئے گی جس میں سے 17 ارب 20 کروڑ روپے کی فنڈنگ فرانس کا ترقیاتی ادارہ فراہم کرےگا۔
اجلاس میں این ٹی ڈی سی سسٹم میں بہتری کے لیے 500 اور 220 کے وی کے منصوبے کی منظوری بھی دی گئی، این ٹی ڈی سی سسٹم میں بہتری پر15 ارب روپے سے زیادہ لاگت آئے گی، منصوبے کے لیے 8 ارب 92 کروڑ روپے ایشین ڈویلپمنٹ بینک فراہم کرےگا۔
وزارت خزانہ کے حکام کا کہنا ہے کہ منصوبے سے رحیم یار خان، فیصل آباد، ملتان، شیخوپورہ، دادو اور کشمور کے صارفین کو فائدہ ہو گا، بجلی کی طلب پوری ہونے کے ساتھ لائن لاسز میں کمی آئے گی۔
اعلامیے میں بتایا گیا ہے کہ وہاڑی میں 220 کے وی سب اسٹیشن کو 500کے وی پر منتقل کرنےکا فیصلہ کیا گیا ہے، سب اسٹیشن کی اپ گریڈیشن پر17 ارب روپے سے زیادہ لاگت آئے گی۔
وزارت خزانہ کی جانب سے جاری اعلامیے میں بتایا گیا ہے کہ ایکنک اجلاس میں چشمہ رائٹ بینک کینال منصوبے کی تعمیر کی منظوری بھی دی گئی، منصوبے پر189 ارب 60 کروڑ روپےخرچ ہوں گے، وفاقی حکومت 65 فیصد جبکہ خیبرپختونخواحکومت 35 فیصد فنڈ کا انتظام کرے گی۔
ایکنک اجلاس میں 43 ارب 80 کروڑ لاگت کے نولانگ ملٹی پرپز ڈیم کی بھی منظوری دی گئی، ضلع جھل مگسی میں 186 فٹ اونچا اور 2996 فٹ طویل ڈیم تعمیر کیا جائے گا، منصوبے سے سیلاب کی روک تھام، غربت میں کمی اور سماجی ترقی ہو گی۔
اس کے علاوہ اجلاس میں ایچ ای سی نے افغان طلبا کے لیے علامہ اقبال اسکالرشپ منصوبے کی بھی منظوری دی، افغان طلبا کو 4500 اسکالر شپس دی جائیں گی جس پر 12 ارب 70 کروڑ روپے کی لاگت آئے گی۔
اعلامیے میں بتایا گیا ہے کہ قومی شاہراہ این 25کراچی کوئٹہ چمن روڈ کو دو رویہ کرنےکا منصوبہ ہے، این 25 کو دو رویہ کرنے پر 74 ارب 71 کروڑ روپے لاگت آئے گی، منصوبہ کے تحت کراچی تا خضدار سڑک کو دو رویہ بنایا جائے گا۔

اسلام آباد (ایمرانیوز) سپریم کورٹ نے ریکوڈک منصوبے میں کرپشن کے ملزمان کی ضمانتوں کا بلوچستان ہائیکورٹ فیصلہ کالعدم قرار دیتے ہوئے نیب کو 60 روز تک ملزمان کی گرفتاری سے روک دیا۔
عدالت عالیہ میں چیف جسٹس عمر عطا بندیال کی سربراہی میں تین رکنی بنچ نے ریکوڈک منصوبے میں کرپشن سے متعلق کیس کی سماعت ہوئی جس میں عدالت نے ریکوڈک منصوبے میں کرپشن کے ملزمان کو 60 دن میں احتساب عدالت سے رجوع کرنے کا حکم دے دیا۔
چیف جسٹس عمر عطابندیال نے ریکوڈک منصوبے میں کرپشن کے ملزمان کی ضمانتوں کا بلوچستان ہائیکورٹ فیصلہ کالعدم قرار دے دیا اور نیب کو ملزمان کو 60 دن تک گرفتار کرنے سے روک دیا۔
چیف جسٹس پاکستان نے کہا کہ ہائیکورٹ نے فیصلے میں 2 ملزمان کو ضمانت بعد ازگرفتاری جبکہ 8 ملزمان کو ضمانت قبل از گرفتاری دی لیکن فیصلے میں ضمانت دینے کی وجوہات نہیں بتائی گئیں۔
چیف جسٹس عمر عطابندیال نے کہا کہ ضمانت کے قوانین اب بدل چکے ہیں، سپریم کورٹ قرار دے چکی ہے کہ حقائق کے درست جائزے کے بغیر ضمانت قبل از گرفتاری نہیں ہو سکتی۔
انہوں نے سماعت کے دوران ریمارکس دئیے کہ ملزمان کو جیل کی سلاخوں کے پیچھے نہیں، مناسب فورم پر فیصلے کے لیے بھیج رہے ہیں کیوں کہ نیب قوانین میں ترامیم کے بعد ضمانتوں کا اختیار اب احتساب عدالت کے پاس ہے۔
واضح رہے کہ بلوچستان ہائیکورٹ نے نیب کے دائر کردہ کرپشن ریفرنس میں ریکوڈک منصوبے کے ملازمین اور کنٹریکٹرز کو ضمانت دی تھی جس کے بعد نیب نے بلوچستان ہائیکورٹ کے فیصلے کے خلاف سپریم کورٹ سے رجوع کیا تھا۔

کراچی (ایمرا نیوز)پاکستانی روپے کے مقابلے میں امریکی ڈالر مزید 2 روپے 19 پیسے سستا ہو گیا جبکہ اسٹاک ایکسچینج میں بھی کاروبار کا مثبت رجحان جاری ہے۔
کاروباری روز کے آغاز سے ہی انٹربینک میں امریکی ڈالر کی قدر میں گراوٹ کا سلسلہ جاری ہے اور ڈالر 2 روپے 19 پیسے سستا ہو کر 221 روپے 75 پیسے کا ہو گیا ہے۔
پاکستان اسٹاک ایکسچینج میں کاروبار کا مثبت رجحان دیکھنے میں آ رہا ہے اور 100 انڈیکس 151 پوائنٹس اضافے سے 41762 پر ٹریڈ کر رہا ہے۔

لاہور(ایمرا نیوز)ستمبر میں پاکستان کی تجارتی اشیا کی برآمدات میں قدرے کمی آئی جس کی وجہ تیاری کی لاگت خاص طور پر اب تک کا سب سے زیادہ بجلی کا ٹیرف ہے۔
ایک رپورٹ کے مطابق پاکستان ادارہ شماریات کے اعداد و شمار سے ظاہر ہوتا ہے کہ اگست کو چھوڑ کر رواں مالی سال کے پہلے مہینے سے برآمدات میں منفی نمو شروع ہو گئی جبکہ جولائی کے بیک لاگ کی وجہ سے اگست میں معمولی اضافہ دیکھا گیا تھا۔
برآمدات میں کمی ایک تشویش ناک عنصر ہے جو ملک کے بیرونی اکاؤنٹ میں توازن پیدا کرنے میں مسائل پیدا کرے گا۔
ستمبر میں برآمدات صفر اعشاریہ اکیانوے فیصد کم ہو کر 2 ارب 38 کروڑ ڈالر رہیں جو گزشتہ سال کے اسی ماہ میں 2 ارب 40 کروڑ ڈالر تھیں جبکہ ماہانہ بنیادوں پرتین اعشاریہ آٹھ فیصد کمی نوٹ کی گئی۔
رواں مالی سال کے پہلے مہینے جولائی میں برآمدات میں تین اعشاریہ پانچ صد کمی واقع ہوئی تاہم گزشتہ سال کے اسی ماہ کے مقابلے میں برآمدات بحال ہوئیں اور ان میں 11.6 فیصد اضافہ ہوا۔
جولائی تا ستمبر کے دوران برآمدات کی مجموعی آمدنی 7 ارب 12 کروڑ ڈالر رہیں جو گزشتہ سال کی اسی مدت میں 6 ارب 99 کروڑ ڈالر تھی جو کہ 1.84 فیصد کی نمو کو ظاہر کرتی ہے۔یہ معمولی نمو ظاہر کرتی ہے کہ رواں مالی سال میں سالانہ برآمدی ہدف حاصل کرنا مشکل ہوگا۔

اسلام آباد(ایمرا نیوز)پاکستان انٹرنیشنل ایئرلائنز (پی آئی اے) کے بیڑے میں شامل کیا نیا ایئربس اے 320 طیارہ اسلام آباد سے کراچی کی جانب اپنی پہلی پرواز کے بعد آپریشنل ہو گیا۔
رپورٹ کے مطابق 166 مسافروں کو لے کر طیارہ پی کے-369 اسلام آباد انٹرنیشنل ایئرپورٹ سے شام 4 بجے کراچی کے لیے روانہ ہوا۔
پی آئی اے کے ترجمان نے بتایا کہ اے پی-بی ایم وی رجسٹریشن نمبر والا طیارہ نئی سیٹوں کے ساتھ ساتھ جدید کیبن سے آراستہ ہے۔
ترجمان پی آئی اے نے مزید بتایا کہ طیارے کو 6 سال کے لیے ڈرائی لیز پر حاصل کیا گیا ہے جب کہ طیارے کے حصول کا مقصد پی آئی اے کی جانب سے اپنے مسافروں کو آرام دہ سفر اور بہترین سفری سہولیات فراہم کرنا ہے۔
اس نئے طیارے کے بیٹرے میں شمولیت کے بعد پی آئی اے کے فلیٹ میں موجود طیاروں کی مجموعی تعداد 32 ہوگئی ہے جن میں 13 ایئربس طیارے بھی شامل ہیں۔
پی آئی اے نے یہ طیارہ اپنے بیڑے میں مزید ہوائی جہاز شامل کرنے کے منصوبے کے تحت حاصل کیا ہے، یہ طیارہ گزشتہ ماہ شارجہ سے پاکستان لایا گیا تھا۔
پاکستان انٹرنیشنل ائر لائنز کے ترجمان نے مزید کہا کہ گزشتہ سال پی آئی اے نے 4 طیاروں کے حصول کے لیے ٹینڈر طلب کیے تھے جن میں سے 3 طیارے حاصل ہو چکے ہیں، آخری طیارہ آئندہ چند روز میں آجائے گا جب کہ پہلا طیارہ اپریل میں پاکستان لایا گیا تھا۔

کراچی (ایمرا نیوز)چند روز کے دوران پاکستانی روپے کے مقابلے میں امریکی ڈالر کی قدر میں 15 روپے 75 پیسے کی کمی واقع ہو چکی ہے۔
آج بروز بدھ بھی کاروباری روز کے آغاز پر انٹربینک میں ڈالر ایک روپے 74 پیسے سستا ہوا جس کے بعد اس کی قیمت 223 روپے 90 پیسے ہو گئی ہے۔
یاد رہے کہ انٹر بینک کے آٹھویں کاروباری سیشن میں امریکی ڈالر 15 روپے 75 پیسے سستا ہو چکا ہے۔
ذرائع کا بتانا ہے کہ ڈالر کی قدر میں کمی سے پاکستان کے قرضوں میں 1950 ارب روپے کی کمی آئے گی۔

کراچی (ایمرا نیوز)ڈالر کے مقابلے میں روپے کی قدر میں اضافے کا سلسلہ جاری ہے، آج انٹربینک مارکیٹ میں ڈالر تقریباً 2 روپے سستا ہوا ہے۔
فاریکس ایسوسی ایشن آف پاکستان کے مطابق روپے کی قدر گزشتہ روز 225 روپے 64 پیسے پر بند ہونے کے بعد آج 2 روپے 14 پیسے مزید بڑھ گئی، صبح 10 بجے کے قریب ڈالر کی قدر 223 روپے 50 پیسے تک آ گئی۔
گزشتہ 8 روز کے دوران ڈالر کی قدر میں 14 روپے 7 پیسے یا 5.87 فیصد کی کمی واقع ہوئی ہے۔

اسلام آباد (ایمرا نیوز)پاکستان تحریک انصاف نے پیپلزپارٹی کے رہنما اور سابق وزیراعظم یوسف رضا گیلانی کے خلاف ریفرنس دائر کردیا۔
تحریک انصاف کے رہنما اعظم سواتی نے سابق وزیراعظم یوسف رضا گیلانی کے خلاف ریفرنس چیئرمین سینیٹ کے پاس دائر کیا۔
اعظم سواتی نے کہا کہ یوسف رضا گیلانی سینیٹ کے رکن نہیں رہ سکتے، انہوں نے بطور وزیراعظم 2008 میں توشہ خانہ سے4 گاڑیاں لیں اور 3 گاڑیاں آصف زرداری کو دیں،یوسف رضا گیلانی نے حلف کی خلاف ورزی کی ہے، وہ آرٹیکل 63 کے تحت رکن سینیٹ نہیں رہ سکتے، آپ ریفرنس کو جلد الیکشن کمیشن بھیجیں۔
چیئرمین سینیٹ نے اعظم سواتی سے کہا کہ ہم نے ریفرنس وصول کر لیا ہے۔