Category بزنس

اسلام آباد(ایمرا نیوز آن لائن)فیڈرل بورڈ آف ریونیو (ایف بی آر) کے چیئرمین شبرزیدی نے قومی اسمبلی کی قائمہ کمیٹی کے اجلاس میں اعتراف کیا ہے کہ شناختی کارڈ کی شرط سے کاروبار متاثر ہو رہے ہیں۔سابق وزیرخزانہ اسد عمر کی زیر صدارت قومی اسمبلی کی قائمہ کمیٹی برائے خزانہ کا اجلاس ہوا جس میں چیئرمین ایف بی آر شبر زیدی بھی پیش ہوئے۔ کمیٹی کو بریفنگ دیتے ہوئے چیئرمین ایف بی آر کا کہنا تھا کہ مالی سال کی پہلی سہ ماہی میں ایف بی آر نے 1071 ارب روپے کے محصولات کا ہدف مقرر کیا تھا جن میں سے 963 ارب روپے وصول کیے گئے۔

کسی نے 50 ہزار کی شاپنگ کی ہے تو شناختی کارڈ دکھانا پڑے گا انہوں نے کہا کہ مالی سال کی پہلی سہ ماہی میں محصولات کی وصولیوں کی شرح میں گزشتہ سال کے اسی عرصہ کے مقابلے میں 15.8 فیصد اضافہ ریکارڈ کیا گیا ہے۔ ان کا کہنا تھا کہ حکومت کی جانب سے سنجیدہ اقدامات کے نتیجے میں مقامی محصولات میں اضافے کی شرح 26 فیصد ریکارڈ کی گئی ہے، پہلی سہ ماہی میں مقامی محصولات کا حجم 519 ارب روپے ہے، گزشتہ سال اسی عرصہ میں 411 ارب روپے کے محصولات اکٹھے کیے گئے، اسی طرح ان لینڈ ٹیکسوں میں اضافہ کی شرح 11 فیصد ریکارڈ کی گئی ہے، مالی سال کی پہلی سہ ماہی میں ان لینڈ ریونیو کے ضمن میں 292 ارب روپے حاصل کیے گئے جبکہ گزشتہ سال اسی عرصے میں کسٹم ڈیوٹی کی مد میں 151 ارب روپے اکٹھے کیے گئے تھے۔

چیئرمین ایف بی آر کا کہنا تھا کہ ٹیکس ریٹرن جمع کرانے کی شرح میں 67 فیصد اضافہ ریکارڈ کیا گیا، فائلرز کی تعداد میں 8 لاکھ 15 ہزار 502 افراد کا اضافہ ہوا ہے، اس وقت فائلرز کی تعداد 26 لاکھ 5 ہزار 73 ہے۔انہوں نے بتایا کہ ڈائریکٹ ٹیکسوں میں اضافہ کی شرح 19 فیصد، سیلز ٹیکس میں اضافہ کی شرح 21 فیصد اور فیڈرل ایکسائز ڈیوٹی کی وصولی شرح میں 19 فیصد اضافہ ریکارڈ کیا گیا ہے۔ شناختی کارڈ کی شرط سے متعلق ارکان کے سوالات کے جوابات میں شبر زیدی کا کہنا تھا کہ شناختی کارڈ کی شرط کی وجہ سے کاروبار متاثر ہو رہے ہیں، اس صورتحال میں ٹیکس دینے کی سکت نہیں رہے گی، نرمی برتی جائے، اس مطالبے پر دو راستے ہیں، شناختی کارڈ کی شرط ختم کردیں یا کوئی درمیانی راستہ نکالیں۔

تاہم بعد ازاں چیئرمین ایف بی آر شبر زیدی کا کہنا تھا کہ شناختی کارڈ کی شرط ختم کرنے کی کوئی تجویز زیر غور نہیں اور ایف بی آر اپنی پوزیشن پر قائم ہے لہٰذا 50 ہزار کی خریداری پر شناختی کارڈ کی شرط پر نرمی نہیں برتی جائے گی۔یاد رہے کہ تاجروں کی جانب سے حکومت کی معاشی و تجارتی پالیسیوں پر احتجاج کیا جارہا ہے اور خاص طور پر 50 ہزار کی خریداری پر شناختی کارڈ کی شرط ختم کرنے کا مطالبہ زور پکڑ رہا ہے۔

(میڈیا 92 نیوز آن لا ئن) چیئرمین قومی احتساب بیورو (نیب) جسٹس ریٹائڑڈ جاوید اقبال کا کہنا ہے کہ غریب عوام کو لوٹنے والی مافیا کے اختتام کا وقت قریب ہے۔

کراچی میں تقریب سے خطاب کرتے ہوئے چیئرمین نیب جسٹس ریٹائرڈ جاوید اقبال کا کہنا تھا کہ عوام کو لوٹنے والی ہاؤسنگ سوسائٹیز یا بلڈرز نیب سے نہیں بچ سکیں گے۔

چیئرمین نیب نے کہا کہ کسی کے لیے رعایت نہیں ہے، نیب کو ڈوبی ہوئی رقم واپس کرانی ہے، اب بھی وقت ہے مافیا عوام کی لوٹی ہوئی رقم واپس کر دے۔

انہوں نے کہا کہ غریبوں کو لوٹنے والے بزنس مین نہیں مافیا ہیں اور غریب عوام کو لوٹنے والی مافیا کے اختتام کا وقت قریب ہے، کسی کے ساتھ ڈیل نہیں کی، ہم نے ریت پر بھی کرپشن فری پاکستان لکھا ہے۔

چیئرمین نیب نے کہا کہ حکومت سے نیب کا کوئی سروکار نہیں ہے لیکن نیب اکیلا کچھ نہیں کر سکتا، ہمیں سب کے تعاون کی ضرورت ہے۔ انہوں نے کہا کہ جلد وہ وقت آئے گا جب پاکستان میں کرپشن نہ ہونے کے برابر ہو گی، خود احتسابی شروع کر دیں تو نیب کی ضرورت نہیں ہے۔

جسٹس ریٹائرڈ جاوید اقبال نے کہا کہ نیب میں کسی قسم کی کرپشن کا سوال ہی پیدا نہیں ہوتا، کسی بھی کرپٹ آفیسر کی نیب میں جگہ نہیں ہو گی۔ چیئرمین نیب نے کہا کہ 5 ہزار کا کام 5 کروڑ میں کرنےکا پوچھنا کیا سیاسی انتقام ہے؟

انہوں نے کہا کہ اشتہار دیکھ کر یہ ضرور معلوم کریں کہ زمین کا کوئی تنازع تو نہیں، کچھ ایسی سوسائٹیز ہیں کہ رقم جمع کر کے دبئی اور دیگر ملکوں میں جا بیٹھے، ایسی سوسائٹیز تک نیب کا ہاتھ نہیں پہنچ سکا تو اللہ کا تو پہنچ سکتا ہے۔

ان کا کہنا تھا کہ یہ سمجھ کر کرپشن نہ کریں کہ ہم سےکوئی پوچھے گا نہیں بلکہ یہ ذہن میں رکھیں کہ کفن میں جیب نہیں ہوتی لہذا بہتر ہے کہ حقوق ادا کر دیں۔

کراچی(ایمرا نیوز آن لائن) انٹربینک میں ڈالر 5 پیسے سستا ہو کر 155 روپے 5 پیسے پر ٹریڈ ہونے لگا۔دوسری جانب سٹاک ایکسچینج میں 234 پوائنٹس کا اضافہ ہوا جس کے بعد 100 انڈیکس 33 ہزار 433 پوائنٹس کی سطح پر آگیا۔

(میڈیا 92 نیوز آن لا ئن) اسلام آباد: سینٹرل پاور پرچیزنگ کمپنی نے نیشنل الیکٹرک پاور ریگولیٹری اتھارٹی (نیپرا) کو فی یونٹ بجلی 2 روپے 97 پیسے مہنگی کرنے کی درخواست کی ہے۔

ذرائع نیپرا کے مطابق بجلی مہنگی کرنےکی درخواست ستمبر کی فیول پرائس ایڈجسٹمنٹ کی مد میں کی گئی ہے۔

سینٹرل پاور پرچیزنگ کمپنی کی درخواست میں مؤقف اختیار کیا گیا کہ ستمبر میں 13 ارب 62 کروڑ یونٹ بجلی پیدا کی گئی جس کی وجہ سے بجلی پیداوار پر لاگت 70 ارب روپے سے زائد رہی۔ ذرائع کے مطابق نیپرا 20 اکتوبر کو درخواست کی سماعت کرے گا۔

واضح رہے کہ رواں ماہ 8 اکتوبر کو نیپرا نے جولائی کے مہینے کے لیے فیول ایڈجسٹمنٹ چارجز کی مد میں بجلی کی فی یونٹ قیمت میں ایک روپیہ 78 پیسے اضافہ کیا تھا اور مزید اضافے سے عوام پر مہنگائی کا بوجھ مزید بڑھ جائے گا۔

(میڈیا 92 نیوز آن لا ئن) صرف آٹو سیکٹر سے 10 ہزار کے قریب پروفیشنلز کو روزگار سے ہاتھ دھونا پڑا جبکہ مختلف پارٹس بنانے والی کمپنیوں نے فیکٹریوں کو 3 شفٹوں سے 2 اور 2 سے ایک پر منتقل کر دیا ہے۔

کمپنیوں سے ختم کی گئی شفٹوں سے نوکری پیشہ افراد کو ملازمت سے ہاتھ دھونے پڑے ہیں اور کار بنانے والی بڑی کمپنیوں نے مہینے میں 8 سے 20 دن پروڈکشن روکی ہوئی ہے۔

آٹو پارٹس ایسوسی ایشن کے سابق چیئرمین منیر بانا کے مطابق ان کا اندازہ ہے کہ 10 سے 15 ہزار افراد کو نوکریوں سے نکالا جا چکا ہے۔

انہوں نے کہا کہ ٹیکسوں کا دباؤ بھی آٹو سیکٹر کی فروخت پر اثر انداز ہو رہا ہے، کار سازی کے کاروبار سے منسلک کمپنیاں دیگر کے مقابلے میں کم منافع کماتی ہیں۔

خیال رہے کہ گزشتہ دنوں اسٹیٹ بینک کے گورنر رضا باقر نے اعتراف کیا تھا کہ پاکستان کی معاشی شرح نمو سست روی کا شکار ہے اور معاشی سست روی کے باعث معیشت کیلئے خدشات پیدا ہو رہے ہیں۔

وفاقی ادارہ شماریات نے جنوری 2019 میں لیبرفورس سروے رپورٹ 18-2017 جاری کی تھی جس کے مطابق پاکستان میں بے روزگار افراد کی تعداد میں ایک لاکھ 70 ہزار کا اضافہ ہوا ہےجس کے بعد بے روزگار افراد کی تعداد بڑھ کر 37 لاکھ 90 ہزار ہوگئی ہے۔

اب موجودہ ملکی معاشی سست روی کے باعث بے روزگاری میں اضافے کا امکان ہے اور بے روزگار افراد کی تعداد بڑھنے کا خدشہ ہے۔

اسلام آباد(ایمرا نیوز آ ن لائن)فنانشل ایکشن ٹاسک فورس (ایف اے ٹی ایف) نے فرانس میں جاری اجلاس میں پاکستان کے اقدامات کی تعریف کی ہے۔ایف اے ٹی ایف نے اجلاس کے دوران پاکستان کے بارے میں ایشیا پیسیفک گروپ کی رپورٹ کی توثیق کی اور کہا کہ پاکستان نے دہشت گردوں کی مالی معاونت روکنے کے لیے قابل تعریف اقدامات اٹھائے ہیں۔

چین کی سربراہی میں ہونے والے ایف اے ٹی ایف کے اجلاس میں پاکستانی وفد وفاقی وزیر حماد اظہر کی قیادت میں شریک ہے۔ذرائع کے مطابق اجلاس کے ایجنڈے پر پاکستان اور ایران سرفہرست ہیں، پاکستان نے گزشتہ پیرس اجلاس سے اب تک بہت پیشرفت کی ہے۔ذرائع نے مزید کہا کہ پاکستان کی کارکردگی اور 4 ممالک کے تعاون کے ساتھ اسے بلیک لسٹ کیے جانے کے امکانات تقریباً ختم ہوگئے ہیں۔ایف اے ٹی ایف نے اعتراف کیا کہ پاکستان نے 40 میں سے 36 اہداف میں پیشرفت کی ہے ۔

ایف اے ٹی ایف کی طرف توثیق کی گئی ایشیا پیسفک گروپ کی رپورٹ میں دہشت گردی اور کرپشن کیخلاف پاکستان کی کوششوں کا اعتراف کیا گیا اور ممنوعہ تنظیموں کے اثاثے منجمد یا ضبط کرنے پر زور دیا گیا ہے۔رپورٹ میں منی لانڈرنگ میں ملوث بزنس اور پیشوں کی نگرانی موثر بنانے پر زور دیا گیا جبکہ منی لانڈرنگ اور دہشت گردی کی معاونت کےخلاف اقدامات کا بھی ذکر کیا گیا ہے۔رپورٹ میں مطالبہ کیا گیا ہے کہ قانونی نظام میں شفافیت رکھی جائے اور صارفین کا مکمل فنانشل ڈیٹا اکٹھا کیا جائے۔بھارت کی پوری کوشش رہی ہے کہ پاکستان کو ایف اے ٹی ایف میں بلیک لسٹ کرایا جائے، بھارتی وزیر دفاع راج ناتھ چند روز قبل اس خواہش کا اظہار بھی کرچکے ہیں۔

اسلام آباد(ایمرا نیوز آن لائن) وزیراعظم عمران خان کا کہنا ہےکہ حکومت کی معاشی ٹیم ایک سال کے اندر اندر ملکی معیشت کو بحال کرنے میں کامیاب ہو گئی ہے۔ٹوئٹر پر جاری بیان میں وزیراعظم نے بتایا کہ ملک میں براہ راست غیر ملکی سرمایہ کاری میں 111.5 فی صد اضافہ ہو چکا ہے جب کہ غیر ملکی نجی سرمایہ کاری میں 194 فی صد اضافہ ہوا ہے۔وزیراعظم کا کہنا تھا کہ حکومت کی معاشی ٹیم ایک سال کے اندر اندر ملکی معیشت کو بحال کرنے میں کامیاب ہو گئی ہے، جاری خسارے میں کمی آئی، غیر ملکی سرمایہ کاری میں اضافہ ہوا ہے

انہوں نے کہا کہ برآمدات میں 5.9 فی صد اور ترسیلات زر میں 17فی صد اضافہ ہوا ہے۔اس کے علاوہ وزیراعظم عمران خان نے احساس پروگرام کے تحت غریب افراد کو آٹے کے تھیلے تقسیم کرنے کا پروگرام جلد شروع کرنے کا بھی فیصلہ بھی کیا ہے۔وزیراعظم نے مصنوعی مہنگائی پیدا کرنے والوں کے خلاف سخت کارروائی کی ہدایت بھی کی ہے۔

امریکہ (ایمرا نیوز آن لائن)امریکا میں یورپی مصنوعات اب مزید مہنگی ہوجائیں گی کیونکہ امریکی حکومت کی جانب سے یورپ سے درآمد شدہ اشیاء پر ریکارڈ ٹیرف( درآمدی ٹیکس) عائد کردیا گیا ہے۔امریکا کی جانب سے یورپی ممالک کی مصنوعات پر ریکارڈ 7 اعشاریہ 5 ارب ڈالر کا اضافی ٹیرف عائد کردیا گیا ہے۔نئے ٹیرف کا اطلاق آج 18 اکتوبر سے ہوگا جس کے تحت یورپی یونین کی منتخب مصنوعات پر 10 سے 25 فیصد ٹیرف عائد کیا جائے گا۔

تجارتی امور کی عالمی تنظیم ورلڈ ٹریڈ آرگنائزیشن (ڈبلیو ٹی او) نےگذشتہ ماہ امریکا کوٹیرف عائد کرنےکی منظوری دیتےہوئے کہا تھا کہ امریکا یورپی یونین کی جانب سے غیر قانونی ترجیحی سلوک پر ٹیرف عائدکرسکتا ہے۔گذشتہ روز امریکی صدر ٹرمپ نے اپنے بیان میں کہا تھا کہ امریکا بڑےتجارتی عدم توازن کی وجہ سے یورپ کے ساتھ تجارتی جنگ ہار نہیں سکتا، وہ اس صورتحال کا بڑی آسانی سےحل نکال سکتےہیں۔

امریکا اور چین کی تجارتی جنگ میں ٹیکس عائد کرنے کا نیا سلسلہ شروع ہوگیا امریکی حکومت کے اس فیصلے کو یورپی یونین اور امریکا کے درمیان جاری 15 سالہ معاشی جنگ کا نتیجہ قرار دیا جارہا ہے۔اس جنگ کا آغاز 2004 میں ہوا تھا جب امریکا نے یورپی یونین کے ممالک پر الزام عائد کیا تھا کہ ان کی جانب سے ہوائی جہاز بنانے والی یورپی کمپنی ائیر بس کو غیر قانونی سبسڈیز دی گئی ہیں۔

ڈبلیو ٹی او نے رواں ماہ 2 اکتوبر کو اس مقدمے کا فیصلہ امریکا کے حق میں سناتے ہوئے اسے یورپی مصنوعات پر ٹیرف بڑھانے کی اجازت دی تھی۔جواب میں یورپی یونین کا کہنا ہے کہ اگر امریکا کی جانب سے یہ قدم اٹھایا گیا تو جواب میں یورپی ممالک کے پاس بھی ایسے ہی ردعمل کے علاوہ کوئی اور جواز نہیں ہوگا۔

لاہور (ایمرا نیوز آن لائن) برائلر کی قیمتوں میں دوسرے روز بھی اضافہ،مرغی کا گوشت 5 روپے فی کلو مزید بڑھ گیا۔ قیمت 218 روپے سے بڑھ کر 223 روپے فی کلو ہوگئی۔ واضح رہے گزشتہ روز برائلر کی قیمت میں 9 روپے فی کلو اضافہ ہوا۔ قیمت 209 روپے سے بڑھ کر 218 روپے فی کلو ہو گئی تھی ۔

مہنگائی کا جن بے قابو ہوگیا ، سبزی منڈیوں میں بھی گراں فروشی جاری ہے ۔ پیاز 62 روپے کے بجائے 80 روپے کلو فروخت ،ٹماٹر 65 کے بجائے 70 روپے کلو بکنے لگے ۔ لہسن 228 کے بجائے 280 روپے کلو فروخت ہونے لگا، خریداری کیلئے آئے شہری پریشان ہوگئے

ہانگ کانگ (ایمرا نیوز آن لائن)ہانگ کانگ کی پورٹ ہولڈنگ کمپنی ہچی سن نے پاکستان میں 240 ملین ڈالر کی سرمایہ کاری کا اعلان کیا ہے۔سفیر برائے بیرون ملک سرمایہ کاری علی جہانگیر صدیقی کی کوشش سے پاکستان کے شپنگ سیکٹر میں سرمایہ کاری شروع ہوئی ہے۔ہانگ کانگ کی پورٹ آپریٹنگ کمپنی کے وفد نے وزیر اعظم عمران خان سے ملاقات کی جس میں سفیر برائے بیرون ملک سرمایہ کاری علی جہانگیر صدیقی ، وفاقی وزیر بحری امور علی زیدی، مشیر تجارت رزاق داؤد اور ذلفی بخاری بھی شریک ہوئے۔

وزیر اعظم نے سرمایہ کاری اور ملکی معاشی خوشحالی کے عزم کا خیر مقدم کیا اور وفد کو سرمایہ کاری اور کاروبار میں آسانیوں کے لیے اٹھائے گئے حکومتی اقدامات سے آگاہ کیا۔وزیراعظم نے کہا کہ معاشی نمو اور روزگار کی فراہمی کے لیے سرمایہ کاروں کو ہر ممکن مدد فراہم کریں گے۔اعلامیے میں کہا گیا ہے کہ ہچی سن پورٹ ہولڈنگ کراچی پورٹ کو ایشیا کی تجارت کا مرکز بنانے میں سہولت فراہم کرے گی اور بندرگاہ پر ٹرمینل کی استعداد میں اضافہ کرے گی۔اعلامیے کے مطابق اس نئی سرمایہ کاری سے 3 ہزار ملازمتیں پیدا ہوں گی جب کہ کمپنی پاکستان میں اپنی سرمایہ کاری کو ایک ارب ڈالر تک لے جائے گی۔

اس موقع پر علی جہانگیر صدیقی کاکہنا تھا کہ موجودہ صورت حال کے پیش نظر اضافی کنٹینر ٹرمینل کی ضرورت ہے جب کہ سرمایہ کاری کے نتیجے میں قومی خزانے اور کراچی پورٹ ٹرسٹ دونوں کی آمدنی میں اضافہ ہو گا۔انہوں نے کہا کہ کرنسی کی قیمت کے باعث برآمدی یونٹ کی مقدار میں اضافہ ہورہا ہے۔