Category بزنس

اسلام آباد (میڈیا 92 نیوز آن لائن ) وزیراعظم عمران خان کی زیرصدارت چھٹی والے دن بھی ایک اہم اجلاس طلب کیا گیا ہے جس میں ایمنسٹی اسکیم سے متعلق مشاورت ہوگی۔

ذرائع کا کہنا ہے کہ اسکیم کی آخری تاریخ میں دو دن کی توسیع کی جاسکتی ہے جس کی حتمی منظوری عمران خان ہی دیں گے۔

توسیع کی صورت میں امکان ہے کہ وزیراعظم آج شام قوم سے اہم خطاب بھی کریں گے۔

خیال رہے کہ اثاثہ جات ظاہر کرنے کے حوالے سے ایمنسٹی اسکیم کا آج آخری دن ہے اور فیڈرل بورڈ آف ریونیو(ایف بی آر) نے بھی اپنے دفاتر رات 11 بجے تک کھلے رکھنے کا اعلان کیا ہے تاکہ زیادہ سے زیادہ لوگ فائدہ اٹھا سکیں۔

اس سے قبل 10 جون کو بھی وزیر اعظم نے قوم سے اہم خطاب کیا تھا جس میں 30 جون تک اثاثے ظاہر کرنے کی ہدایت کرتے ہوئے کہا تھا کہ پھر موقع نہیں ملے گا۔

وزیر اعظم کا کہنا تھا کہ گزشتہ 10 سال میں پاکستان کا قرضہ 6 ہزار ارب روپے سے 30 ہزار ارب روپے تک پہنچ گیا اور ٹیکس ادائیگی کے بغیر قوم ترقی نہیں کر سکتی۔

اپنے خطاب میں انہوں نے کہا کہ عوام ایمنسٹی اسکیم کا فائندہ اٹھائیں اور اپنے بچوں اور ملک کا مستقبل ٹھیک کریں۔

عمران خان نے کہ 30 جون تک تمام افراد اپنے بے نامی اکاؤنٹس کی تفصیلات فراہم کریں اور ہمیں موقع دیں کہ قوم کو پیروں پر کھڑا کر کے لوگوں کو غربت سے نکالیں۔

اسلام آباد (ایمرا نیوز آن لائن)
ملک بھر میں بینک اکاؤنٹس مکمل بائیو میٹرک کیے جانے کا آج آخری دن ہے جس کے بعد بائیو میٹرک سسٹم پر منتقل نہ ہونے والے اکاؤنٹس بند ہو جائیں گے۔

بینکنگ حکام کے مطابق ملک بھر میں بینک اکاؤنٹس کا بائیو میٹرک کروانے کا آج آخری دن ہے۔

حکام کے مطابق کل سے بائیو میٹرک سسٹم پر منتقل نہ ہونے والے اکاؤنٹس بند ہوجائیں گے۔

بینکنگ حکام کا کہنا ہے کہ لاکھوں بینک اکاؤنٹس بائیو میٹرک سسٹم پر منتقل کر لیے گئے ہیں، مختلف بینکس میں 60 سے 80 فیصد اکاؤنٹس بائیو میٹرک نظام پر منتقل کیے جاچکے ہیں۔

نیشنل بینک کے ترجمان ابن حسن کے مطابق نیشنل بینک میں 30 لاکھ سے زائد اکاؤنٹس بائیو میٹرک سسٹم میں آچکے ہیں اور تقریباً 80 فیصد اکاؤنٹ ہولڈرز نے بائیو میٹرک تصدیق مکمل کر لی ہے۔

اسلام آباد (میڈیا 92 نیوز آن لائن ) آئل اینڈ گیس ریگیولیٹری اتھارٹی (اوگرا) نے یکم جولائی سے گیس کی قیمتوں میں اضافے کا نوٹی فکیشن جاری کردیا۔

اوگرا کی جانب سے جاری نوٹی فکیشن کے مطابق ماہانہ 50 مکعب میٹر گیس استعمال کرنے والے گھریلو صارفین کے لیے گیس کی قیمت 121 روپے فی یونٹ برقرار رکھی گئی ہے جب کہ ماہانہ 100 مکعب میٹر گیس کے استعمال پر فی یونٹ گیس کی قیمت 127 روپے سے بڑھا کر 300 روپے کردی گئی ہے۔

نوٹی فکیشن کے مطابق ماہانہ 200 مکعب میٹر گیس استعمال کرنے والوں کے لیے فی یونٹ گیس کی قیمت 264 روپے سے بڑھا کر 553 روپے جب کہ ماہانہ 300 مکعب میٹر گیس استعمال کرنے والوں کیلئے فی یونٹ 275 روپے سے بڑھا کر 738 روپے کی گئی ہے۔

اسی طرح ماہانہ 400 مکعب میٹر گیس استعمال کرنے والوں کیلئے فی یونٹ گیس کی قیمت 780 روپے سے بڑھا کر 1107 روپے، ماہانہ 400 مکعب میٹر گیس سے زائد گیس استعمال پر گیس کی قیمت 1460 روپے برقرار رکھی گئی ہے۔

نوٹی فکیشن کے مطابق کھاد کارخانوں کے لیے بطور فیڈ گیس کی قیمت میں 61 فیصد جب کہ بجلی کارخانوں، سی این جی اور جنرل انڈسٹری کیلئے تمام شعبوں میں گیس کی قیمت 31 فیصد بڑھائی گئی ہے۔

اسلام آباد(ایمرا نیوز آن لائن)رواں مالی سال جو آج ختم ہو رہا ہے، ایف بی آر نے نظر ثانی ٹیکس کلیکشن ٹارگٹ 4150ارب کے مقابلے میں3761ارب روپے جمع کیے ہیں ، جن میں 25ارب روپے ٹیکس ایمنسٹی کے بھی شامل ہیں ۔ یہ اس بات کا عندیہ ہے کہ ایف بی آر کااب بھی نظر ثانی شدہ ہدف سے 389 ارب کا شارٹ فال ہے، ٹیکس مشینری میں اعلیٰ سطح پر اگلے

ماہ تبدیلیاں بھی نوشتہ دیوار ہیں ۔ حکومت نے رواں مالی کیلئے ابتدا میں4398ارب کا ہدف مقررکیا تھا تا ہم شارٹ فال کی وجہ سے اس کا حجم4150مقرر کر دیا گیا تھا، اگر پہلے ہدف سے مقابلہ کیا جائے تو آج ختم ہونے والے مالی سال کا شارٹ فال637ارب روپے ہوجا تا ہے۔ آخری روز ایف بی آر ایڑی چوٹی کا زور لگا ئے گا تا کہ ہدف کو3842تک پہنچا دے اس کیلئے آج ( اتوار) کو اسے81ارب روپے کے محصولات جمع کرنا ہوں گے۔ دوسری طرف چیئرمین ایف بی آر شبر زیدی نے

اس نمائندے کو بتایا کہ ایمنسٹی سکیم میں کوئی توسیع نہیں دی جا ئے گی اور اب تک اس حوالے سے رسپانس بہت اچھا رہا ہے۔ تا ہم ذرائع کا کہنا ہے اگر حکومت ایمنسٹی سکیم کی مدت میں توسیع کرنا چاہتی ہے تو اسے پھر نیا آرڈیننس نافذ کرنا ہو گا، اس حوالے سے فیصلہ آج ( اتوار) رات کو کیا جا ئے گا، پارلیمنٹ سے فنانس بل2019-20کی منظوری کے بعد ایمنسٹی

سکیم ملک کا قانون بن گئی ہے اور اس کی مدت30جون2019کو ختم ہو رہی ہے۔ایف بی آر کے ایک اعلیٰ افسرنے ’’دی نیوز‘‘ کو بتایا کہ ایمنسٹی ڈیٹا سے عیاں ہے کہ 35000نئے ڈیکلریشن سسٹم میں شامل ہوئے ہیں تا ہم ان میں سے آدھے نے ڈیکلیرڈ رقم کو ڈیپازٹ نہیں کیا ، اس کا مطلب یہ ہے کہ آدھا ٹیکس اس سال جمع ہو گا ا ور نصف دس سے چالیس فیصد سر چارج کے ساتھ ا گلے مالی سال میں جمع کیا جا ئے گا۔

اسلام آباد (ایمرا نیوز آن لائن)
حکومت کی جانب سے جاری کردہ اثاثے ظاہر کرنے کی اسکیم کا آج آخری روز ہے اور اس حوالے سے فیڈرل بورڈ آف ریونیو (ایف بی آر) نے اشتہارات بھی جاری کیے ہیں۔
ٹیکس ایمنسٹی کی مدت آج رات 12 بجے ختم ہوجائے گی اور اس میں توسیع کا بھی کوئی امکان نہیں جب کہ ایف بی آر کی جانب سے آگہی کے لیے اسکیم کے آخری دن سے متعلق اشتہارات میں کہا گیا ہے کہ ٹیکس ایمنسٹی کے تحت پوشیدہ اثاثے ظاہر کرنےکا آج آخری دن ہے۔
ایف بی آر نے اشتہار میں کہا ہے کہ کسی کے چھپے اثاثے بتانے والے کو 5 فیصد انعام بھی ملے گا۔
وفاقی کابینہ نے اثاثے ظاہر کرنے کی اسکیم کی منظوری دے دی
یاد رہے کہ وفاقی کابینہ نے 14 مئی 2019 کو ٹیکس ایمنسٹی اسکیم کی منظوری دی تھی۔
اسکیم کے تحت ملک اور بیرون ملک موجود رقوم اور جائیدادیں ظاہر کرنے پر 4 فیصد رقم جمع کرانی ہوگی، رقم ہر صورت میں بینکوں میں جمع کرانی ہوگی، پیسا پاکستان نہ لانے پر 6 فیصد رقم قومی خزانے میں جمع ہوگی۔

اسلام آباد (ایمرا نیوز آن لائن)قطر سے پاکستان کو امداد کی پہلی قسط موصول ہوگئی۔ ذرائع وزارت خزانہ کے مطابق قطر نے 3 ارب ڈالر کی امداد کا اعلان کیا تھا جس میں سے پاکستان کو 50 کروڑ ڈالر کی پہلی قسط ملی ہے جس سے زرمبادلہ کے ذخائر میں اضافہ ہوگا۔
قطر کا پاکستان میں 3 ارب ڈالرز کی سرمایہ کاری کا اعلان یاد رہے کہ امیر قطر شیخ تمیم بن حمد الثانی 22 جون کو دو روزہ دورے پر اسلام آباد پہنچے تھے جہاں انہوں نے دونوں ملکوں کے درمیان مختلف شعبوں میں تعاون کے معاہدوں پر دستخط کیے تھے۔
دورے کے اگلے ہی روز امیر قطر شیخ تمیم بن حمد الثانی کی ہدایت پر قطر کے نائب وزیراعظم اور وزیر خارجہ نے پاکستان میں 3 ارب ڈالر کی سرمایہ کاری اعلان کیا تھا جو ڈپازٹ اور ڈائریکٹ انویسٹمنٹ کی صورت میں ہوگی۔
قطری نائب وزیراعظم اور وزیر خارجہ کا کہنا تھا کہ دونوں ممالک کے درمیان 9 ارب ڈالرز کی شراکت داری ہوگی۔

(ایمرا نیوز آن لائن)
اسلام آباد: حکومت کی ٹیکس ایمنسٹی اسکیم کی مدت ختم ہونے میں 2 دن رہ گئے ہیں اور اس دوران دبئی سے اثاثے ظاہر کرنے والے سب سے آگے ہیں۔

حکومت کی جانب سے ایسیٹس ڈیکلیریشن آرڈینس 2019 کے نام سے جاری کردہ ایمنسٹی اسکیم کے تحت ٹیکس نادہندگان 4 فیصد ٹیکس کی ادائیگی کرکے اپنے ملکی اور غیر ملکی اثاثے ظاہر کر سکتے ہیں۔ ایمنسٹی اسکیم کی مدت 30 جون کو ختم ہورہی ہے۔ ٹیکس ایمنسٹی اسکیم کے آن لائن پورٹل پر شدید دباؤ پڑ چکا ہے۔ جس کی وجہ سے متعدد صارفین کو اثاثے ظاہر کرنے میں شدید مشکلات کا سامنا ہے۔

ایف بی آر حکام کا کہنا ہے کہ ٹیکس ایمنسٹی میں متحدہ عرب امارات سے اثاثے ظاہر کرنے والے سب سے آگے ہیں، پاکستانیوں نے دبئی کی جائیدادوں کو بڑے پیمانے پر ظاہر کیا ہے۔
ایف بی آر نے اثاثے ظاہر کرنے والوں کی شکایات کے لیے ٹیمیں تشکیل دے دی ہیں، ایف بی آر پورٹل پر دباؤ کو کم کیا جارہا ہے، کراچی , لاہور اور راوالپنڈی میں 3 کمشنرز کو آن لائن سسٹم اپ ڈیٹ کرنے کی ہدایات جاری کردی ہیں، ایف بی آر پورٹل کو آن لائن رکھنے کے لیے پرال کا عملہ بھی متحرک کردیا گیا۔

تاجروں، سرمایہ کاروں اور صنعتکاروں نے ٹیکس ایمنسٹی کی مدت میں 3 ماہ کی توسیع کا مطالبہ کیا ہے، اس کے علاوہ بینک اور چارٹرڈ اکاونٹنٹس فرم بھی اسکیم کی مدت میں توسیع کا مطالبہ کررہی ہیں۔ جس کے بعد ایسیٹس ڈکلیریشن آرڈینس 2019 کی میعاد میں توسیع کا امکان ظاہر کیا جارہا ہے۔

دوسری جانب چیئرمین ایف بی آر نے ٹیکس ایمنسٹی کا پورٹل ہر صورت آن لائن کرنے کی ہدایات جاری کردی ہیں۔ ایف بی آر نے اثاثے ظاہر کرنے والوں کی شکایات کے لیے ٹیمیں تشکیل دے دی ہیں، ایف بی آر پورٹل پر دباؤ کو کم کیا جارہا ہے، کراچی , لاہور اور راوالپنڈی میں 3 کمشنرز کو آن لائن سسٹم اپ ڈیٹ کرنے کی ہدایات جاری کردی ہیں، ایف بی آر پورٹل کو آن لائن رکھنے کے لیے پرال کا عملہ بھی متحرک کردیا گیا۔

ایف بی آر حکام کا کہنا ہے کہ ٹیکس ایمنسٹی اسکیم کی مدت بڑھانا بہت مشکل ہے کیونکہ ٹیکس ایمنسٹی اسکیم کی مدت بڑھانے کیلئے وزیراعظم نے کوئی ہدایات جاری نہیں کیں، 30 جون تک ایسیٹس ڈیکلیریشن آرڈینس 2019 سے مستفید ہونے والوں کو ہر ممکن سہولت فراہم کی جائیں گی، ایف بی آر کے تمام فیلڈ دفاتر 29 جون کو رات 8 بجے جب کہ 30 جون کو رات 11 بجے تک کھلے رہیں گے، تمام ٹیکس گزار ٹیکسز، ڈیوٹیز اور ٹیکس گوشوارے جمع کرا سکتے ہیں۔

کراچی (میڈیا 92 نیوز آن لائن ) روپے کی قدر میں کمی اور بجٹ 20-2019 میں 2.5 سے 7.5 فیصد تک کی شرح میں فیڈرل ایکسائز ڈیوٹی (ایف ای ڈی) عائد ہونے کے بعد انڈس موٹر کمپنی (آئی ایم سی) نے اپنی مختلف گاڑیوں کی قیمتوں میں 2 لاکھ 30 ہزار روپے سے لے کر 8 لاکھ 30 ہزار روپے تک بڑھادی جس کا اطلاع یکم جولائی سے ہوگا۔

قیمتوں میں اضافے سے ٹویوٹا کرولا ایکس ایل آئی ایم ٹی اور ایکس ایک آئی اے ٹی کی قیمت بالترتیب 3 لاکھ 90 ہزار اور 4 لاکھ 15 ہزار اضافے سے 24 لاکھ 99 ہزار اور 25 لاکھ 99 ہزار روپے جبکہ جی ایل آئی ایم ٹی اور جی ایل آئی اے ٹی کی قیمت 3 لاکھ 85 ہزار اور 4 لاکھ 10 ہزار اضافے سے 27 لاکھ 49 ہزار اور 28 لاکھ 49 ہزار روپے ہوگئی۔ اسی طرح الٹس 1.6 کی قیمت 4 لاکھ 75 ہزار اضافے سے 31 لاکھ 49 ہزار روپے ہوگئی ہے۔

نئی قیمتوں کے مطابق الٹس 1.8 ایم ٹی، الٹس 1.8 سی وی ٹی، گرینڈی ایم ٹی ایس آر اور گرینڈی سی وی ٹی ایس آر کی قیتمیں 30 لاکھ 69 ہزار روپے، 32 لاکھ 5 ہزار روپے، 32 لاکھ 60 ہزار روپے اور 34 لاکھ 9 ہزار روپے سے بڑھ کر بالترتیب 32 لاکھ 99 ہزار روپے، 34 لاکھ 49 ہزار روپے، 34 لاکھ 49 ہزار روپے اور 36 لاکھ 99 ہزار روپے ہوگئی ہیں۔

کمپنی کی جانب سے فورچیونر 4×4 اور فورچیونر4×2 پیٹرول کی قیمت میں سب سے زیادہ 8 لاکھ 30 ہزار اور 7 لاکھ روپے کا اضافہ کیا گیا، جس کے بعد یہ قیمت 86 لاکھ 49 ہزار اور 79 لاکھ 99 ہزار روپے ہوگئی جبکہ ریوو جی ایم ٹی، ریوو جی اے ٹی اور ریوو وی اے ٹی کی قیمت بالترتیب 5 لاکھ 90 ہزار، 6 لاکھ 60 ہزار اور 6 لاکھ 90 ہزار اضافے کے بعد 55 لاکھ 99 ہزار، 58 لاکھ 99 ہزار اور 62 لاکھ 49 ہزار روپے ہوگئی۔

اس کے علاوہ ہائلکس کے مختلف ماڈلز کی قیمتوں میں 3 لاکھ 40 ہزار سے 5 لاکھ 30 ہزار روپے تک بڑھائے گئے ہیں۔

کمپنی کا کہنا ہے کہ نئی قیمتیں یکم جولائی سے فروخت ہونے والی تمام گاڑیوں پر لاگو ہوں گی اور 17 فیصد سیلز ٹیکس اور ڈیلرز کمیشن، تمام کرولا ماڈلز پر 5 فیصد ایف ای ڈی اور فورچیونر ماڈل پر 7.5 فیصد ایف ای ڈی (فنانس بل 2019 کے تحت لاگو) کیا گیا۔

قبل ازیں ہونڈا اٹلس کار لمیٹڈ (ایچ اے سی ایل) نے منفی ایکسچینج ریٹ کے اثرات کے پیش نظر 24 جون سے 2 لاکھ 60 ہزار سے 4 لاکھ 25 ہزار روپے اضافہ کیا تھا۔

اسلام آباد (میڈیا 92 نیوز آن لائن ) عالمی مالیاتی فنڈ (آئی ایم ایف) نے حکومت پاکستان کی جانب سے اثاثے ظاہر کرنے کی اسکیم پر تحفظات کا اظہار کردیا۔

وفاقی حکومت نے اثاثہ جات ظاہر کرنے کی اسکیم دی ہوئی ہے جس کی ڈیڈلائن 30 جون تک ہے تاہم وزیراعظم عمران خان نے گزشتہ روز سرکاری ٹی وی کو انٹرویو دیتے ہوئے اسکیم کی تاریخ میں توسیع کا عندیہ دیا تھا۔

دوسری جانب عالمی مالیاتی ادارے (آئی ایم ایف) نے حکومت کی ایمنسٹی اسکیم کی مخالفت کی ہے اور اسے ٹیکس گزاروں کے ساتھ ناانصافی قرار دیا ہے۔

جیو نیوز سے گفتگو میں آئی ایم ایف کے کنٹری ڈائریکٹر کی ترجمان ٹریسا ڈبن کا کہنا تھا کہ ٹیکس ایمنسٹی معیشت کے لیے بہتر نہیں ہوتیں اور آئی ایم ایف ٹیکس ایمنسٹی اسکیم کے حق میں نہیں ہے۔

انہوں نے کہا کہ پوری دنیا کے تجربات سے ثابت ہوا ہے کہ ایمسنٹی نقصاندہ ہیں، ٹیکس ایمنسٹی اسکیم وقتی فائدے کے لیے مؤثر لیکن دیانتدار ٹیکس گزاروں کے ساتھ سراسر ناانصافی ہے۔

یاد رہے کہ فیڈرل بورڈ آف ریونیو (ایف بی آر) کو حکومت کی اثاثے ظاہر کرنے کی اسکیم سے اب تک توقعات کے مطابق نتائج حاصل نہیں ہوسکے ہیں جس کے بعد اثاثہ جات ڈکلیئر کرنے کی اسکیم میں 3 ماہ کی توسیع کا امکان ہے۔

اسلام آباد (میڈیا 92 نیوز آن لائن ) قومی اسمبلی نے آئندہ مالی 20-2019 کے لیے بجٹ کی منظوری دے دی ہے۔

اسپیکر اسد قیصر کی زیر صدارت ہونے والے قومی اسمبلی کے اجلاس میں فنانس بل کو بھی شق وار کثرت رائے سے منظور کر لیا گیا جب کہ اپوزیشن کی بجٹ میں کٹوتی کی تمام تحاریک مسترد ہو گئیں۔

حکومتی ارکان کی جانب سے فنانس بل کی منظوری پر وکٹری کے نشان بنائے گئے جب کہ اپوزیشن ارکان کی جانب سے فنانس بل کی منظوری پر نو نو کے نعرے لگائے گئے۔

وفاقی بجٹ پیش: 11 کھرب روپے کے نئے ٹیکسز عائد، گھی، چینی، گیس اور گاڑیاں مہنگی

مسلم لیگ ن اور پیپلز پارٹی کے اراکین سالانہ بجٹ منظور ہونے پر احتجاجاً اپنی نشستوں پر کھڑے ہو گئے۔

بجٹ دستاویزات کے مطابق وزیر اعظم سیکریٹریٹ کے لیے ایک ارب 17کروڑ روپے مختص کیے گئے ہیں جو گزشتہ برس 98کروڑ 60 لاکھ روپے تھے۔

دستاویزات کے مطابق آئندہ سال کے لیے وزیر اعظم سیکریٹریٹ کے بجٹ میں 18کروڑ 59 لاکھ روپے زیادہ مختص ہوئے۔

اسپیکر اسد قیصر نے قومی اسمبلی کا اجلاس ہفتے کی صبح 11 بجے تک ملتوی کر دیا۔