Category بزنس

اسلام آباد (میڈیا 92 نیوز آن لائن ) وفاقی کابینہ منگل کو آئندہ مالی سال کیلئے 6800 ارب روپے کے لگ بھگ محاصل کے حجم پر مشتمل وفاقی بجٹ اور فنانس بل کے مسودے کی منظوری دیگی، جس کے بعد منظوری کیلئے پارلیمنٹ میں پیش کردیا جائے جبکہ اس سے قبل آج( پیر) اقتصادی جائزہ رپورٹ جاری کی جائے گی تاہم معاشی ترقی، زراعت، صنعت، مینوفیکچرنگ، خدمات سمیت اہم اہداف حاصل نہ ہوسکے۔

تفصیلات کے مطابق بجٹ 2019-20ء ، مجموعی حجم 6800 ارب روپے متوقع، ٹیکس وصولیاں 5550 ارب، دفاع کیلئے 1250 ارب سے زائد، ترقیاتی منصوبوں کیلئے 925 ارب، مالی خسارے کا ہدف 3000 ارب جبکہ قرضوں پر سود کی ادائیگی کیلئے 2500 ارب روپے مختص کرنے کی تجاویز، 1400 ارب کے ٹیکس اقدامات، سرکاری ملازمین کی تنخواہ و پنشن میں دس فیصد اضافہ متوقع، وفاقی کابینہ منگل کو بجٹ اہداف کی منظوری دے گی۔

اس سے قبل آج (پیر)وفاقی حکومت کی جانب سے رواں مالی سال19 2018-ء کی اقتصادی کارکردگی پر مشتمل اقتصادی سروے جاری کیا جائے گا۔ ذرائع کا کہنا ہے کہ رواں مالی سال کیلئے معاشی ترقی، زراعت، صنعت، مینوفیکچرنگ، خدمات سمیت دیگر تمام اہم اقتصادی اہداف حاصل کرنے میں ناکام ہونیکا انکشاف ہوا ہے۔

یہ انکشاف حکومت کی جانب سے تیارکردہ قومی اقتصادی سروے 2018-19 ئکے مسودے میں ہوا ہے۔ حکومت کی جانب سے تیار کردہ اقتصادی سروے آج (پیر) جاری کیا جائیگا۔ ذرائع کا کہنا ہے کہ اقتصادی سروے کے مندرجات کے مطابق معاشی ترقی، زراعت، صنعت، مینوفیکچرنگ، خدمات سمیت اہم اہداف حاصل نہ ہو سکے مجموعی معاشی ترقی 6.2 فیصد ہدف کے مقابلے میں 3.3 فیصد، عمومی حکومتی خدمات نے 7.2 فیصد کا ہدف پورا کر لیا، کارکردگی 7.9 فیصد رہی۔
زرعی شعبے کی گروتھ 3.8 فیصد ہدف کے مقابلے میں صرف 0.8 فیصد، صنعتی شعبے کی ترقی 4.9 فیصد ہدف کے مقابلے میں1.4 فیصد،خدمات کے شعبے کی گروتھ 6.5 فیصد ہدف کے مقابلے میں4.7 فیصد،بجلی کی پیداوار اور گیس کی ترسیل میں نمایاں اضافہ، 7.5 فیصد ہدف کے مقابلے میں40.5 فیصد،تعمیرات کا 10 فیصد ہدف پورا نہ ہوا، گروتھ منفی 7.6 فیصد رہی

جبکہ بڑی فصلوں کی پیداوارکا ہدف3.01 فیصدلیکن نتائج منفی 6.5 فیصد رہے۔کاٹن، جنگلات، فشریز سمیت دیگر شعبوں کا ہدف بھی پورا نہ ہوسکا، لائیو سٹاک نے3.8 فیصد کے ہدف سے زیادہ 4 فیصد شرح سے ترقی کی سمال اینڈ ہاوس ہولڈ سیکٹر نے بھی8.2 فیصد کا ہدف پورا کر لیا اور ہول سیل، ریٹیل شعبے نے 7.8 فیصد ہدف کے مقابلے میں صرف3.1 فیصد شرح سے ترقی کی۔ ذرائع کے مطابق اجلاس میں نوجوانوں کیلئے آسان قرضوںکا پروگرام شروع کرنے کی تجویز پر بھی غورکیا جائیگا، کامیاب نوجوان پروگرام کے لیے 200 ارب روپے مختص کیے جائیں گے۔

کراچی (ایمرا نیوز آن لائن)
سینئر تجزیہ کار حسن نثار نے کہا ہے کہ حکومت بیوٹی پارلرز پر تو ٹیکس لگارہی ہے لیکن وکیلوں پر ٹیکس لگانے کی ہمت نہیں ، لوئر مڈل کلاس ، مڈل کلاس کی بچیاں گھروں میں پارلر کھول کر بیٹھی ہیں وہ بددعائیں ہی دیں گی عمران خان کو دوبارہ مودی کو مذاکرات کی پیشکش نہیں

کرنی چاہئے تھی، امن کی بات اچھی لیکن عزت نفس کی لاگت پر امن نہیں چاہئے،بلاول کی عوامی رابطہ مہم کے سوال پر کہا کہ جن کے بیلٹ باکسز سے کچھ نہیں نکلا ان کیلئے باہر کون نکلے گا،صرف تنخواہ دار طبقہ ہی کیوں ٹیکس دے، عوام کو تعلیم و شعور دینا ہوگا تاکہ وہ خود ٹیکس دینے پر آمادہ ہوسکیں۔ وہ جیو نیوز کے پروگرام ”میرے مطابق“ میں میزبان شجعیہ نیازی سے گفتگو کررہے تھے۔حسن نثار نے کہا کہ انسان اپنے

منصب کی وجہ سے بڑا نہیں ہوتا بڑے بڑے جوکرز دنیا میں ممالک کے سربراہ رہے ہیں، بھارت میں نریندر مودی جیسا انتہاپسند شخص دوسری بار وزیراعظم بن گیا ہے، مودی اور ڈونلڈ ٹرمپ جیسے لوگوں کو دیکھ کر دعا کرتا ہوں کہ پروردگار انسانوں کو ایسے انسانوں سے محفوظ رکھ،حسن نثار ایک سوال پر کہا کہ تھیلیسمیا کی بیماری سے بچنے کیلئے ضروری ہے کہ دلہا اور دلہن کا شادی سے پہلے ٹیسٹ کروایا جائے، اگر ماں اور باپ دونوں کو تھیلیسمیا کا مسئلہ ہو تو بچہ اس بیماری سے نہیں بچ سکتا۔

اسلام آباد (ایمرا نیوز آن لائن)
وفاقی بجٹ سے ایک روز قبل صفر شرح نظام کی بحالی پر ہفتہ اور اتوار کو کراچی اور فیصل آباد کی ایکسپورٹ انڈسٹری اور حکومت کی اقتصادی ٹیم کے درمیان نتیجہ خیز مذاکرات کیلئے آخری کوششیں ناکام ہوگئیں کیونکہ حکومت نے واضح الفاظ میں بار بار کہا ہے کہ وہ آئی ایم ایف سے عہد کے تحت صفر شرح سے پیچھے ہٹنے کا اپنا فیصلہ واپس نہیں لے سکتی۔ حکومت نے اس انڈسٹری کو گارنٹڈ ریفنڈ میکانزم میں توسیع سے بھی یہ کہتے ہوئے انکار کردیا ہے کہ میکانزم پر بجٹ کے بعد کام کیا جائے گا۔ حکومت کی اقتصادی ٹیم نے انڈسٹری کو یہ بھی بتایا کہ وہ ٹیکسٹائل، چمڑا، قالین، سرجیکل اور اسپورٹس کی ایکسپورٹ انڈسٹری پر 17 فیصد سیلز ٹیکس عائد کرنے والی ہے۔ اس سے قبل حکومتی عہدیداران نے اجلاس میں وزیر اعظم عمران خان کی موجودگی میں مذکورہ ایکسپورٹ انڈسٹری پر ساڑھے سات فیصد سیلز ٹیکس پر اتفاق کیا تھا لیکن اتوار کے اجلاس میں اقتصادی ٹیم نے ساڑھے سات فیصد سیلز ٹیکس عائد کرنے سے انکار کردیا اور مذکورہ ایکسپورٹ
انڈسٹری پر 17 فیصل سیلز ٹیکس عائد کرنے کا عزم کیا۔ تاہم حکومت نے آئی ایم ایف سے سخت مذاکرات کے بعد مزید 6 ماہ کیلئے ٹیکسٹائل، قالین، سرجیکل، چمڑا اور اسپورٹس شعبوں کیلئے توانائی پیکج کی توسیع کا فیصلہ کیا ہے۔ عہدیدار اور انڈسٹری ذرائع نے دی نیوز کو بتایا کہ حکومت کا کہنا ہے کہ وہ 6 ماہ بعد توانائی پیکج کے تسلسل پر نظرثانی کرے گی۔ ذرائع کے مطابق اجلاسوں میں کراچی، فیصل آباد اور لاہور سے انڈسٹری کے نمائندوں نے درخواست کی کہ جہاں تک برآمدات کا تعلق ہے تو اس مرحلے پر صفر شرح کی واپسی خطرے سے بھرپور ہے اور گزشتہ 9 ماہ میں برآمدات میں 20 فیصد مقداریت کے اضافے کے حاصل کیے گئے معیار حرکت کو نقصان پہنچے گا۔ وزارت خزانہ میں سرکاری ذرائع نے بھی دی نیوز کو ایکسپورٹ انڈسٹری کے ساتھ اجلاسوں کی تصدیق کی۔ انہوں نے تصدیق کی کہ آئی ایم ایف نے بھی حکومت کو ایکسپورٹ انڈسٹری پر ساڑھے سات فیصد تک سیلز ٹیکس کی کمی کی اجازت نہیں دی بلکہ اس نے حکومت کو ہدایت دی کہ مذکورہ انڈسٹری پر 17 فیصد اسٹینڈرڈ سیلز ٹیکس عائد کرے۔ انہوں نے یہ بھی تصدیق کی کہ حکومت نے آئی ایم ایف کو منانے کے بعد انڈسٹری کو مزید 6 ماہ کیلئے توانائی پیکج جاری رکھنے کا فیصلہ ہے۔ گزشتہ ہفتے کے اجلاس میں شرکت کرنے والے کراچی کے تاجر زبیر موتی والا نے دی نیوز کو بتایا کہ کراچی کی ایکسپورٹ انڈسٹری صفر شرح کی واپسی کے خلاف آج احتجاج کرے گی۔ ان کا یہ بھی کہنا تھا کہ انڈسٹری کو یقین نہیں آرہا کہ حکومت ریفنڈ میکانزم پر کیا ضمانت دے گی جیسا کہ ماضی میں وہ اس محاذ پر اپنے بیانات پر کھڑی نہیں رہی۔ ان کا کہنا تھا کہ سیلز ٹیکس کی مد میں حکومت انڈسٹری کے 51 ارب روپے، قابل واپسی محصول کی مد میں 82 ارب روپے اور کسٹمز رقم کی واپسی کی مد میں مناسب رقم کی مقروض ہے۔ موتی والا کا کہنا تھا کہ حکومت نے کہا ہے کہ وہ آئی ایم ایف سے عہد کے تحت مجبور ہےاور صفر شرح واپس لینے کا اپنا فیصلہ واپس نہیں لے سکتی۔ ان کا کہنا تھا کہ اس فیصلے سے انڈسٹری خود بخود ختم ہوجائے گی اور اسے بہت بڑے سیالیت (لیکوئیڈیٹی) بحران کا سامنا کرنا پڑے گا اور مزید اہم بات یہ ہے کہ انڈسٹری کمرشل بینکوں سے 14-15 فیصد شرح سود پر قرض نہیں لے سکتی۔ انہوں نے کہا کہ ہم کراچی پریس کلب میں دوپہر ڈھائی بجے پریس بریفنگ کریں گے اور اس کے بعد حکومت کے فیصلے کے خلاف احتجاج کیا جائے گا۔

اسلام آباد (ایمرا نیوز آن لائن)
ذرائع کا کہنا ہے کہ ایف بی آر فنانس بل 2019-20کے ذریعے ان افسران پر سزا مقرر کرنے کیلئے چند اقدامات تجویز کرنے پر غور کر رہا ہے جو رشوت لینے میں ملوث پائے گئے۔ ایسے ٹیکس افسران اور ٹیکس دہندگان کیلئے چند سخت اقدامات بشمول قید متعارف کرائی جائے گی جو رشوت لینے اور دینے میں ملوث پائے گئے ہوں۔ رشوت دینے یا لینے کے حوالے سے کسی بھی وڈیو کی صورت میں ٹیکس افسر کو فوری طور پر معطل کردیا جائے گا اور انکوائری کی جائے گی۔ مزید یہ کہ رشوت میں ملوث ٹیکس دہندگان کے تمام بینک کھاتے بلاک کردئیے جائیں گے اور پینل کارروائی کا آغاز کیا جائے گا۔ ٹیکس افسران کو محض اپنے اہداف کو پورا کرنے کیلئے ٹیکس دہندگان سے ایڈوانس سیلز ٹیکس یا انکم ٹیکس قرض ادا کرنے کیلئے ہراساں کرنے سے باز رکھا جائے گا۔ صنعت کاری اور سرمایہ کاری کے فروغ کیلئے پلانٹ اور مشنری کی درآمد پر انکم ٹیکس ودہولڈنگ کو ختم کردیا جائے گا۔دوسری جانب پانچ ایکسپورٹ اورینٹیڈ انڈسٹریز کی مختلف ایسوسی ایشنز بشمول ویلیو ایڈڈ ٹیکسٹائل، اسپورٹس، سرجیکل، چمڑا اور قالین نے صفر شرح نظام کی منسوخی اور آنے والے بجٹ میں ساڑھے سات فیصد پر جنرل سیلز ٹیکس کے کم ریٹ کے نفاذکو مسترد کردیا ہے۔ تاہم آل پاکستان ٹیکسٹائل ملز لمیٹڈ نے آنے والے بجٹ میں صفر شرح نظام کے خاتمے کیلئے کسی بھی اقدام پر اپنا موقف دینے سے قبل بجٹ کے اعلان تک انتظار کرنے کا فیصلہ کیا ہے۔ ٹیکسٹائل کے تاجر اعجاز گوہر سے رابطے کی کوشش کی گئی لیکن انہوں نے جواب نہیں دیا۔

لاہور (ایمرا نیوز آن لائن)

شہرمیں برائلر کی قیمت تین روپےکم ہوگئی، مر غی کا گو شت تین روپے روپے کمی کے بعد 244 روپے فی کلو میں دستیاب ہے۔

تفصیلات کے مطابق برائلر کی رسد میں بہتری کےساتھ ہی قیمت میں بھی کمی ریکارڈ کی گئی،زندہ مرغی دو روپےکمی کےبعد ایک سو اڑسٹھ روپے جبکہ مرغی کا گوشت تین روپے کمی کے بعد 244 روپے فی کلو ہوگیا ہے۔

شہریوں کا کہناتھا کہ حکومت برائلرکی قیمت میں مزید کمی کرے تاکہ عام شہری کو ریلیف مل سکےجبکہ دوسری طرف پاکستان پولٹری ایسوسی ایشن کےترجمان کا کہنا ہے کہ جیسے ہی برائلر کی رسد میں بہتری ہوگی قیمت مزید کم ہو جائے گی۔

اسلام آباد (میڈیا 92 نیوز آن لائن ) حکومت اس وقت بجٹ تیاریوں میں مصروف ہے اور ممکنہ طور پر آئندہ ایک ہفتے میں بجٹ پیش کر دیا جائے گا تاہم وزیراعظم عمران خان کے فوکل پرسن برائے انسداد تمباکونوشی نے سگریٹ پر لگائے جانے والے ٹیکس کی تصدیق کر دی ہے ۔

رپورٹ میں بتایا ہے کہ سگریٹ پر ہیلتھ ٹیکس کے نفاذ کی منظوری دیدی گئی ہے یعنی 20 سگریٹ کے پیکٹ پر 10 روپے ٹیکس عائد کرنے کا فیصلہ کیا گیاہے جبکہ اس کے علاوہ کاربو نیٹڈ ڈرنکس پر بھی ٹیکس عائد کرنے کی منظوری دید ی گئی ہے ۔250 ملی لیٹر (ریگولر)کاربونیٹڈ ڈرنک پر ایک روپیہ ٹیکس عائد کیا جائے گا ۔ ہیلتھ ٹیکس کے نفاذ کا باضابطہ اعلان بجٹ میں کیا جائے گا ۔

وزیراعظم عمران خان کے فوکل پرسن بابر عطا کاکہناتھا کہ ا سے حاصل ہونے والی رقم صحت کارڈ کے ذریعے غریبوں پر خرچ کی جائے گی ، پہلی بار تمباکونوشی کی حوصلہ شکنی کیلئے ٹیکس لگانے جارہے ہیں ، اس ٹیکس سے چارسے پچاس ارب کے وسائل حاصل ہون گے ، تاریخ میں پہلی مرتبہ اس قدر جرات مندانہ فیصلہ کیا گیاہے ۔ ان کا کہناتھا کہ موت کے سوداگروں کی بلیک میلنگ میں نہیں آئیں گے ۔

کراچی (میڈیا 92 نیوز آن لائن ) عید الفطر کی وجہ سے ہونے والی صرف ایک روزہ ٹریڈنگ کی وجہ سے رواں مالی ہفتے کے اختتام پر کراچی اسٹاک ایکسچینج (کے ایس ای) 100 انڈیکس 469 پوائنٹس کی کمی کے ساتھ 35 ہزار 5 سو 5 پر بند ہوگیا۔

ڈان اخبار کی رپورٹ کے مطابق عید کی چھیٹیوں سے قبل سرمایہ کاروں کو پریشان کرنے والے مختلف عوام موجود تھے، لیکن 2 عوامل ایسے تھے جنہوں نے مارکیٹ کی سمت کے تعین میں بڑا کردار ادا کیا۔

یہ دو عوامل مارکیٹ سپورٹ فنڈ اور آئندہ مالی سال 20-2019 کا بجٹ ہے جو چند روز میں پیش کیا جانا ہے۔

وزیر خزانہ نے یقین دہانی کروائی تھی کہ تمام معاملات کو حل کر لیا جائے گا جن کی منظوری لے لی گئی ہے جبکہ سیکیورٹیز اینڈ ایکسچینج کمیشن پاکستان (ایس ای سی پی) نے بھی اشارہ دیا تھا کہ حکومت اقتصادی رابطہ کمیٹی (ای سی سی) سے منظوری کے بعد حکومتی فنڈ 10 روز بعد جاری کردیا جائے گا۔

چونکہ ای سی سی نے پہلے ہی اپنی رضامندی کا اظہار کردیا ہے تاہم اس کے سبب نئے بجٹ کے دوران مارکیٹ 20 ارب روپے کے سپورٹ فنڈ کی جانب دیکھ رہی ہے۔

سیکٹر کے اعتبار سے عارف حبیب لمیٹڈ (اے ایچ ایل) کو خدشہ ہے کہ آئندہ بجٹ کے دوران سیمنٹ، ٹیکسٹائل، آٹوز اور اسٹیل کی صنعت پر منفی اثر پڑے گا۔

اے ایچ ایل نے جس جانب اشارہ کیا ہے ان میں فی ٹن سیمنٹ پر فیڈرل ایکسائز ڈیوٹی (ایف ای ڈی) میں 5 سو روپے تک اضافہ اور اس شعبے کے لیے پی ایس ڈی پی میں کمی ہے۔

اسی طرح ٹیکسٹائل میں صفر درجہ بندی کے نظام کا ممکنہ خاتمہ جبکہ اسٹیل اور آٹوز پر سیلز ٹیکس میں اضافہ اس کی بڑی وجہ ہیں۔

ٹاپ لائن سیکیورٹیز کا کہنا ہے کہ آئندہ مالی سال کا بجٹ اسٹاک مارکیٹ کے لیے زیادہ مثبت نہیں ہوگا۔

مذکورہ کمپنی نے سال 2019 کے اختتام پر کے ایس ای 100 انڈیکس پوائنٹس کا ہدف 38 سے 42 ہزار پوائنٹس کے درمیان مقرر کرلیا۔

لاہور(ویب ڈیسک) پنجاب حکومت نے آئندہ مالی سال کے بجٹ میں 30سے 35ارب روپے کے نئے ٹیکسز لگانے کی تجاویز تیار کر لی ہیں ، پنجاب کو تین حصوں جنوبی ، شمالی اور وسطی پنجاب کی تقسیم کے تحت فنڈز دئیے جائیں گے ،وزیر اعظم عمران خان نے پنجاب کے بجٹ کے حوالے سے اہم اجلاس 10جون کو طلب کر لیا۔

روزنامہ خبریں کے مطابق آئندہ بجٹ میں زرعی آمدنی کی شرح بڑھانے کی تجویز زیر غور ہے، صوبے میں فیول کے ا ستعمال پر ایک فیصد نیا کاربن ٹیکس لگانے پر غور کیا جا رہا ہے، پروفیشنل ٹیکس کادائرہ کاربڑھانے کی تجویز ہے تاہم وکلا ءپروفیشنل ٹیکس لگانے کی تجویز موخر کر دی گئی۔بیوٹی پارلرز اور ہیئر ڈریسرز پر بھی ٹیکس لگانے کی تجویز سامنے آئی ہے۔ٹیکس لگانے کے ساتھ ساتھ آئندہ مالی سال 5عشاریہ 2فیصد گروتھ ریٹ بڑھانے کی تجویز بھی دی گئی۔
آئندہ مالی سال کے دوران5 لاکھ 10 ہزار نوکریاں پید اکرنے کی تجاویز تیار کر لی گئیں۔اورنج لائن ٹرین منصوبے کو مکمل کرنے کے لئے 14ارب روپے مختص کرنے کی تجویز زیر غور ہے۔ پبلک پرائیویٹ پارٹنر شپ کے تحت بڑے پیمانے پر انڈسٹریزاور فیکٹریوں کو فروغ دینے کا منصوبہ تیار کیا گیا ہے۔

جنوبی پنجاب سیکرٹریٹ کیلئے 3ارب روپے مختص کرنے کی تجویز زیر غور ہے۔ آمدن کا تخمینہ گزشتہ برس کی نسبت 31فیصد زائد رکھنے کی تجویز ہے جس کے تحت صوبائی آمدن کے 368ارب روپے کا تخمینہ تجویز کیا گیا ہے۔ جنوبی پنجاب میں ڈسٹرکٹ ڈیلیوری فنڈز یونٹ بنانے کی تجویز دی گئی ہے۔ صاف پانی پراجیکٹ کیلئے 10ارب روپے رکھے جانے کی تجویز ہے۔

ذرائع کے مطابق پنجاب کو تین حصوں میں تقسیم کیا گیا ہے جس میں جنوبی پنجاب کیلئے 35فیصد، شمالی پنجاب کیلئے 33فیصد جبکہ وسطی پنجاب کیلئے 32فیصد مختص کرنے کی تجویز ہے۔وزیراعظم عمران خان نے 10 جون پنجاب کے بجٹ سے متعلق اہم اجلاس طلب کر لیا ہے۔ وزیراعظم نے وزیراعلی عثمان بزدار، وزیر خزانہ سمیت 4 رکنی ٹیم کو اسلام آباد طلب کیا ہے۔ اجلاس میں پنجاب کے بجٹ کی ممکنہ تجاویز پر تفصیلی بریفنگ دی جائے گی اورنئے ترقیاتی سکیموں سے متعلق وزیراعظم عمران خان سے منظوری کے بعد بجٹ میں شامل کیا جائے گا۔

اسلام آباد (ویب ڈیسک) مالی سال 2019-20 کے سالانہ وفاقی بجٹ میں تمام تر مالی دشواریوں کے باوجود وزیراعظم عمران خان نے سول و فوجی سرکاری ملازمین کی تنخواہوں اور پنشنوں میں اضافے کا اصولی فیصلہ کر لیا ہے اور اس بارے میں ضروری ہدایات اپنی مالیاتی ٹیم جس کے سربراہ وفاقی مشیر خزانہ ریونیو اقتصادی امور ڈاکٹر حفیظ اے شیخ ہیں کو دے دی ہیں چونکہ پی ٹی آئی دور حکومت کے کم وبیش دس گیارہ ماہ میں افراط زر کی شرح کم وبیش دس فیصد بڑھی ہے افراط زر کی اس شرح کے گرانی کے اثرات ہر قسم کی اشیاء پر پڑے ہیں۔

روزنامہ جنگ کے ذرائع کے مطابق وفاقی مشیر خزانہ ریونیو اقتصادی امور ڈاکٹر حفیظ شیخ 11 جون کو وفاقی کابینہ کے خصوصی بجٹ اجلاس میں یہ تجویز وزیراعظم عمران خان اور وفاقی کابینہ کو سیاق وسباق اور اعدادوشمار کے ساتھ پیش کریں گے کہ بنیادی سکیل نمبر16 تک کے سرکاری ملازمین کی تنخواہوں اور پنشنوں میں کم وبیش 12 فیصد اضافہ کر دیا جائے اور بنیادی سکیل نمبر17 تا بنیادی سکیل نمبر22 کے افسروں کی تنخواہوں پنشنوں میں 10 فیصد کے لگ بھگ اضافہکر دیا جائے۔

وزیراعظم عمران خان کی زیر صدارت تنخواہوں اور پنشنوں میں اضافے کی حتمی شرحوں کا فیصلہ ہوگا کابینہ کو 11 جون کی دوپہر جو سمری وفاقی مشیر خزانہ ریونیو و اقتصادی امور ڈاکٹر حفیظ اے شیخ پیش کرنے والے ہیں اس کے بارے میں وہ وفاقی کابینہ کے اجلاس میں بتائیں گے کہ سرکاری ملازمین سے مراد سول وعسکری ملازمین دونوں ہوں گے۔

10 فیصد اضافہ تنخواہ پنشن میں وفاقی کابینہ سے منظور کیا گیا تو اس سے قومی وسائل پر 40 ارب روپے کا امکانی بوجھ پڑے گا۔ سول وفوجی ملازمین کی تنخواہوں پنشنوں میں بارہ فیصد اضافہ کابینہ منظور کرے گی تو قومی خزانے سے 52 ارب روپے اس زمرے میں دینا ہوں گے۔ ذرائع کے مطابق سول و فوجی سرکاری ملازمین کی تنخواہوں اور پنشنوں میں اضافے کے علاوہ بعض کیٹیگری کے سرکاری ملازمین کے الائونسوں مراعات سہولیات میں بھی ردوبدل کئے جانے کا امکان ہے۔

لاہور(میڈیا 92 نیوز آن لائن ) اقتصادی جائزہ رپورٹ کے مطابق سابق حکومت کی جانب سے اقتصادی ترقی کی شرح 6.3 فیصد طے کی گئی تھی تاہم جون میں اختتام پذیر ہونے والے رواں مالی سال میں اقتصادی ترقی کی شرح تنزلی کے بعد 3.3 فیصد رہ جانے کا امکان ہے۔

ڈان میں شائع رپورٹ کے مطابق رپورٹ کی رو سے موجودہ حکومت پہلے سے طے شدہ تمام اہداف کے حصول میں ناکام رہی۔

حکومت کی جانب سے اقتصادی جائزہ رپورٹ 19-2018 باقاعدہ طور پر بجٹ کے بعد پیش کی جائے گی تاہم رپورٹ کے چند اقتباسات ڈان کو موصول ہوئے ہیں۔

رپورٹ میں فراہم کردہ اعداو شمار کے مطابق لائیو اسٹاک کے شعبے میں طے شدہ اہداف کے مقابلے میں معمولی بہتری آئی لیکن دیگر تمام شعبہ جات میں توقعات سے کم نتائج رہے۔

صنعتی شعبہ میں شرح نمو تیزی سے تنزلی کا شکار ہوئی اور مقررہ ہدف 7.6 فیصد کے مقابلے میں صرف 1.4 فیصد شرح نمو ریکارڈ کی گئی۔

یہ امر قابل توجہ ہے کہ توانائی کے شعبے میں متعدد پاور پلانٹس کا اضافہ ہوا اور شعبہ کے دیگر سیکٹر کے منصوبے بھی مکمل ہونے کے باوجود شرح نمو غیر معمولی کم رہی۔

مینوفیکچرنگ کے شعبے میں شرح نمو کا ہدف 8.1 فیصد طے کیا گیا تھا تاہم رپورٹ کے مطابق اسمال مینوفیکچرنگ کے شعبے میں 0.3 فیصد اور بڑے مینوفیکچرنگ کے شعبے میں 2 فیصد ہی اضافہ ہوسکا۔

سروس کے شعبے میں رواں مالی سال کے اختتام تک شرح نمو کا ہدف 6.5 فیصد کے مقابلے میں صرف 4.7 فیصد رہا جبکہ تعمیراتی شعبے میں شرح نمو 10 فیصد کے مقابلے میں 7.6 فیصد رہا۔

رپورٹ کے مطابق اہم پالیسیوں سے متعلق حکومتی فیصلوں میں تاخیر کے باعث کئی شبعے متاثرہ ہوئے۔

رپورٹ کے مطابق بیل آؤٹ پیکج کے لیے عالمی مالیاتی ادارے (آئی ایم ایف) سے معاہدوں، تعمیراتی اور صنعتی شعبوں سے متعلق فیصلوں میں تاخیر کے باعث سرمایہ کار اور ایکسپورٹرز تذبذب کا شکار رہے۔

رپورٹ کے مطابق لائیو اسٹاک کے شعبے میں شرح نمو کا ہدف 3.8 فیصد طے کیا گیا تھا جو مالی سال کے اختتام پر بہتری کے ساتھ 4 فیصد ریکارڈ کیا گیا۔