Category بزنس

(ایمرا نیوز آن لائن)
اسلام آباد:عالمی مالیاتی فنڈ کے ساتھ ڈیل اسٹاف کی سطح پر فائنل ہوچکی ہے مگر پچھلے 9 ماہ کے دوران پاکستان کے تذبذب اور ہچکچاہٹ نے معیشت کو تباہی سے دوچار کردیا ہے۔ اس عرصے کے دوران جی ڈی پی کی شرح نمو تقریباً نصف ہوچکی ہے، افراط زر دگنا ہوگیا ہے اور اہم کرنسیوں کے مقابلے میں پاکستانی روپیہ ایک چوتھائی قدر کھوچکا ہے۔

اگر حکومت بروقت فیصلہ کرلیتی تو ان تمام مسائل سے بچا جاسکتا تھا۔ اب حکومت کو دوسری بڑی آزمائش کا سامنا ہے، اس میں کامیابی یا ناکامی کے سنجیدہ مضمرات کی حامل ہوگی۔ اگلے 39 ماہ کے لیے آئی ایم ایف کا 6.6 ارب ڈالر کا بیل آؤٹ پیکیج مختصر مدتی حل ہے۔ طویل المدت نتائج کے لیے حکومت کو ایک جامع پلان اور دیگر ممالک کے تجربات سے رہنمائی حاصل کرنے کی ضرورت ہوگی۔ ماضی میں لیے گئے پروگراموں میں سے بھی حکومت رہنمائی لے سکتی ہے۔ اگرچہ پچھلے 60 برس میں دو درجن سے زائد بار آئی ایم ایف سے رجوع کیا گیا مگر پروگرام کے سائز کے اعتبار سے پچھلے 3 پروگرام ہی قابل موازنہ ہیں جو الگ الگ حکومتوں نے لیے تھے۔ یہ پروگرام بالترتیب 2001، 2008، اور 2013 لیے گئے تھے۔

ان میں سے کوئی بھی پروگرام طویل المدت معاشی استحکام فراہم نہیں کرسکا تھا اور ان کی کامیابی کی سطح بھی مختلف رہی تھی۔ پاکستان کی موجودہ معاشی صورتحال سے 1991 کے انڈیا کی مثال زیادہ قریب ہے۔ 1991 میں انڈیا سنگین معاشی بحران کا شکار تھا۔ منجمد برآمدات اور بڑھتی ہوئی درآمدات کی وجہ سے مالیاتی خسارہ بے حد بلند ہوچکا تھا۔ ڈیفالٹ سے بچنے کے لیے انڈیا کو اپنے سونے کے تمام ذخائر گروی رکھنے پڑے اور 2.2 ارب ڈالر کا قرضہ لینے کے لیے آئی ایم ایف کی تمام شرائط تسلیم کرنی پڑیں۔ اس کے بعد سے انڈیا نے اصلاحاتی سفر شروع کیا۔ دروں بینی کے بجائے مرکز گریز اپروچ اختیار کی۔ 2000ء میں عالمی تجارتی تنظیم کے قواعد اپنائے جس سے اصلاحاتی عمل میں مدد ملی۔ مثال کے طور پر انڈیا نے آٹو ڈیلیشن پالیسیاں ختم کردیں جس کی وجہ سے انڈسٹری مسابقت کی پوزیشن میں آتی چلی گئی۔ ان اصلاحات کے نتیجے میں بھارت کی برآمدات 1992 کے 25 ارب ڈالر سے بڑھ کر 2018 میں 500 ارب ڈالر ہوگئیں۔

اس کے زرمبادلہ کے ذخائر اب 420 ارب ڈالر کی سطح پر ہیں۔ پاکستان کو بھی اسی صورتحال کا سامنا ہے جو انڈیا کو 1991 میں درپیش تھی۔ اگر ہم نے وہی پالیسیاں جاری رکھیں جو پچھلے دو پروگرام لینے کے بعد جاری تھیں تو پھر اس پروگرام کے اختتام پر بھی ہم اسی صورتحال سے دوچار ہوں گے۔ اگر ہم اس قرض کو آئی ایم ایف سے لیا گیا آخری قرضہ بنانا چاہتے ہیں تو پھر بڑھتی ہوئی درآمدات اور خسارے میں چلنے والے ریاستی اداروں کا مسئلہ حل کرنا ہوگا جو ہمارے وسائل پر بہت بڑا بوجھ ہیں۔

اسلام آباد (ایمرا نیوز آن لائن)ایف بی آر نے جولائی سے بے نامی اکائونٹس سمیت انکم ٹیکس آرڈیننس کے زمرے میں آنے والے تمام اکائونٹس فریز کرنیکا فیصلہ کیا ہے ،اس سلسلے میں تمام معلومات اکٹھی کر لی گئیں،ایف بی آر نے اکائونٹس فریز کرنے والا سسٹم بھی حاصل کر لیا ۔

دستاویزات کے مطابق ایف بی آر نے تمام بینکوںکو تنبیہ پر مبنی خط لکھا ہے جس میں چیئرمین ایف بی آر نے کہا کہ جولائی میں ایف اے ٹی ایف کا جائزہ اجلاس ہے اس لئے بینکوںکو مکمل طور پر عالمی قوانین کی پابندی کرنا ہو گی ، انکم ٹیکس آرڈیننس 2001 کے تحت بے نامی اکائونٹس ہولڈرز کو ایمنسٹی سکیم کے ذریعے آخری موقع دیا گیا ہے تاکہ وہ آسانی سے اپنے معاملات درست کر لیں۔ ایف بی آر نے کہا کہ ایف اے ٹی ایف جائزہ اجلاس کی بھی یہ ضرورت ہے

کہ بے نامی اکائونٹس اور قانونی کے برخلاف ہر کام کو مکمل بند کیا جائے ،دہشتگردی سمیت قانون شکنی میں استعمال ہونے والے پیسے کی روک تھام کی جاسکے ،اس سلسلے میں ایف بی آر نے ملک بھر کے تمام بے نامی اکائونٹس اور انکم ٹیکس آرڈیننس 2001 کے بر خلاف کام کرنے والے تمام اکائونٹس کی معلومات اکٹھی کرلی ہیں اور ان کو فریز کرنے کیلئے سسٹم بھی حاصل کرلیا گیا ہے ،جولائی سے جب کسی کسٹمر کا اکائونٹ منجمد کیا جائے گا تو کوئی دبائو یا سفارش قابل قبول نہیں ہوگی۔

کراچی: (ایمرا نیوزآن لائن) عالمی منڈی میں خام تیل کی قیمتوں میں کمی آگئی، 2 روز میں امریکی خام تیل 6 ڈالر 20 سینٹس سستا ہوا۔

امریکی خام تیل 52 ڈالر 90 سینٹس پر ٹریڈ، دو روز قبل امریکی خام تیل 59 ڈالر 10 سینٹس پر ٹریڈ کر رہا تھا۔ اسی طرح دو روز میں برطانوی خام تیل 8 ڈالر 50 سینٹس سستا ہوا برطانوی خام تیل 61 ڈالر 10 سینٹس پر ٹریڈ، دو روز قبل برطانوی خام تیل کی قیمت 69 ڈالر 6 سینٹس تھی۔

کراچی (میڈیا 92 نیوز آن لائن ) عید کی لمبی تعطیلات سے قبل اسٹاک مارکیٹ میں کاروبار کے آخری روز پاکستان اسٹاک ایکسچینج میں مندی کا رجحان دیکھا جارہاہے ۔

کاروبار کےآغاز پر 100 انڈیکس میں 340 پوائنٹس کمی دیکھی گئی اور کرنٹ انڈیکس 35 ہزار 650 کی سطح سے نیچے آگیا۔

تاہم اس وقت مارکیٹ میں 100انڈیکس 235پوائنٹس کمی کے ساتھ ہے اور کرنٹ انڈیکس 35ہزار 739پوائنٹ 24کی سطح پر موجود ہے۔

گزشتہ ہفتے پاکستان اسٹاک ایکسچینج میں کاروبار کے دوران ملا جلا رجحان رہا تاہم کاروبار کا اختتام مثبت ہوا اور کے ایس ای 100 انڈیکس 15 پوائنٹس اضافہ کے ساتھ بند ہوئی۔

جمعرات کو کاروباری ہفتہ کے چوتھے روز اسٹاک مارکیٹ کا آغاز مثبت زون میں ہوا اور کے ایس ای 100 انڈیکس 571 پوائنٹس اضافہ کے ساتھ 36 ہزار 536 پوائنٹس پر ٹریڈ کرتے دیکھا گیا۔ کاروبار کے آغاز پر کے ایس ای 100 انڈیکس 36 ہزار کی نفسیاتی حد عبور کر گیا تھا۔

کاروبار کے دوران کے ایس ای 100 انڈیکس میں 300 سے زائد پوائنٹس کی کمی بھی ریکارڈ کی گئی اور 100 انڈیکس 35 ہزار 655 پر بھی ٹریڈ کرتے دیکھا گیا۔

کاروبار کے دوران کے ایس ای 100 انڈیکس میں 176,397,730 شیئرز کی لین دین ہوئی جس کی مالیت پاکستانی روپوں میں 8,544,309,325 بنتی ہے۔

لاہور(ایمرا نیوز آن لائن)ٹاپ سول انٹیلی جنس ادارے کی رپورٹ کے مطابق حکومت کو اپوزیشن کی جانب سے شروع کی جانے والی تحریک سے کوئی بڑا خطرہ نظر نہیں آتا ،لیکن حکومت کو اپوزیشن سے رابطے رکھنے والے اپنے اتحادیوں پر توجہ دینے کی ضرورت ہے ۔اعلیٰ حکومتی ذرائع نے اپوزیشن کی جانب سے عید کے بعد شروع کی جانے والی تحریک کے حوالے سے روزنامہ 92نیوز سے ٹاپ سول انٹیلی جنس ادارے کی رپورٹ شیئر کرتے ہوئے

مزید بتایا کہ رپورٹ میں اپوزیشن جماعتوں سے رابطوں کے حوالے سے حکومتی اتحادی بلوچستان نیشنل پارٹی(مینگل) کے بارے میں لکھا ہے جن کے صدر اختر مینگل نے اپوزیشن کی پریس کانفرنس میں شرکت کی جو کہ معنی خیز ہے ۔ حکومت کی ایک اور اتحادی متحدہ قومی مومنٹ(پاکستان)بھی حکومت پر بڑھتے دبائو کو نظر میں رکھتے ہوئے اپنے بعض مطالبات کیلئے ازسر نو بات کر سکتی ہے اور مطالبات منظور نہ ہونے کی صورت میں حکومت مخالف لائن لے سکتی ہے ، اسکے ساتھ ہی حکومت کو اپنے دیگر اتحایوں پر بھی توجہ دینے کی ضرورت ہے ۔عید کے بعد اپوزیشن کی جماعتیں حکومت مخالف تحریک چلانے کیلئے اکٹھا ہو رہی ہیں،

جن میں مسلم لیگ ن، پیپلز پارٹی،عوامی نیشنل پارٹی،جمعیت علماء اسلام(ف)،پختوانخواہ ملی عوامی پارٹی اور نیشنل پارٹی شامل ہیں۔رپورٹ کے مطابق ن لیگ کی قیادت اور کارکن حکومت مخالف تحریک کے حوالے سے زیادہ متحرک نہیں پائے جاتے ،سابق حکمران جماعت کے اندر نواز شریف اور شہاز شریف گروپ مریم نواز اور حمزہ شہباز شریف کی جانب سے ایک ہونے کا تاثر دینے کے باوجود ورکرز کو قائل نہیں کر سکے ،جسکی بڑی مثال 28مئی کو پارٹی آفس میں کمزور پاور شو تھا۔ پیپلز پارٹی سندھ میں کچھ نظر آنیوالے مجمے کو اکٹھا کرنے میں کامیاب ہو سکتی ہے ،وفاقی دارالحکومت میں مجمع اکٹھا کرنا دو لیڈ اپوزیشن جماعتوں ن لیگ اور پیپلز پارٹی کیلئے مشکل نظر آتا ہے ،

لیکن پیپلز پارٹی سندھ سے اپنے ورکر ٹرانسپورٹ کر سکتی ہے اور خیبر پختوانخوا سے بھی اپنے ورکر لانے میں کامیاب ہو سکتی ہے ۔ن لیگ وسطی پنجاب سے اپنے کچھ ورکر لانے میں کامیاب ہوسکتی ہے لیکن کوئی بڑا شو کرنے میں کامیاب نہیں ہو سکتی۔اپوزیشن کے ممکنہ حکومت مخالف اتحاد میں صرف جمعیت علماء اسلام(ف) تحریک شروع کرنے کی صورت میں حکومت کیلئے مشکلات پیدا کر سکتی ہے جو خیبر پختوانخوا اور سابق قبائلی علاقوں میں قائم اپنے مدرسوں سے طلبہ کی بڑی تعداد کو وفاقی دارلحکومت میں اکٹھا ہونے کی کال دے سکتی ہے ۔جمعیت علماء

اسلام(ف) صوبوں کی سطح پر حکومت مخالف تحریک کی صورت میں خیبر پختوانخوا اور بلوچستان میں اپنے ووٹرز،سپورٹرز اور مدرسہ سسٹم کی مدد سے مشکلات پیدا کر سکتی ہے ۔عوامی نیشنل پارٹی خیبر پختونخوا میں متحرک سپورٹ رکھتی ہے اوراپوزیشن کے اسلام آباد کو بیس کیمپ بنانے کی صورت میں اس سپورٹ کا استعمال کر سکتی ہے ۔

(ایمرا نیوز آن لائن) پاکستان نے مالی سال2019-20میں آئی ایم ایف پروگرام کے تحت 12 ارب ڈالر کے غیرملکی قرضے لینے کا ارادہ کرلیا لیکن اس کیلیے پہلے 10.7ارب ڈالرکے قرضوں کی ادائیگی اور زرمبادلہ کے ذخائر مستحکم کرناہوں گے۔

حکام کے مطابق وفاقی وزارت خزانہ نے تخمینہ لگایاہے کہ یوروبانڈ کے اجرا اور عالمی اداروں سے قرض کی مد میں12.3ارب ڈالر مل سکتے ہیں جبکہ ملکی ضروریات کیلیے19ارب ڈالر چاہیے ہوں گے جس میں زرمبادلہ کے ذخائر کے استحکام کیلیے اضافی رقوم اور 3ماہ کی درآمدات کیلیے مالی ضروریات شامل نہیں ہیں۔ حکومت کوبیرونی قرضوں کی ادائیگی کیلیے10.7ارب ڈالر اورکرنٹ اکاؤنٹ خسارے کو پورا کرنے کیلیے 8.3ارب ڈالر درکارہوں گے۔

ذرائع کے مطابق 2.5ارب ڈالر کی بیرونی سرمایہ کاری اور اداروں کی نجکاری سے2ارب ڈالر حاصل ہوں گے۔ حکومت کیلیے اصل چیلنج زرمبادلہ کے ذخائر کو13ارب ڈالر کی سطح پر لاناہے جو رواں ماہ کے آخر تک صرف7ارب ڈالر ہوں گے جبکہ اس وقت زرمبادلہ کے ذخائر8ارب ڈالر ہیں۔ اسٹیٹ بینک کو مالی سال 2019-20میں زرمبادلہ کے ذخائر کو مستحکم رکھنے کیلیے6سے 7ارب ڈالر درکار ہیں۔

اسلام آباد(ایمرا نیوز آن لائن)
اوگرا نے ایل پی جی کی قیمت میں 15.40 روپے فی کلو کمی کر دی، جس کے بعد نئی قیمت 118 روپے فی کلو ہوگئی۔اوگرا سے جاری نوٹیفکیشن کے مطابق ایل پی جی کی قیمت کم ہونے کے بعد گھریلو سلنڈر 181 روپے اور کمرشل 700 روپے سستا ہوگیا۔اوگرا کے مطابق ایل پی جی کی قیمت میں کمی جون کے مہینے کیلئے کی گئی ہے ، فیصلے سے گیس کی قیمت 133 روپے 40 پیسے سے کم ہو کر 118 روپے فی کلو ہوگئی۔ قیمتوں کا اطلاق آج رات 12 بجے سے ہوگا۔ یہ قیمت پورے ملک میں یکساں طور پر نافذ العمل ہوگی۔گھریلو سلنڈر کی نئی قیمت 1580 سے کم ہو کر 1399 روپے جبکہ کمرشل سلنڈر کی قیمت 6 ہزار 83 سے کم ہو کر 5383 روپے ہو گئی۔

اسلام آباد (میڈیا 92 نیوز آن لائن ) فیڈرل بورڈ آف ریونیو (ایف بی آر) نے رواں مالی سال کے پہلے 11 مہینوں کے دوران ریکارڈ کمی کے ساتھ صرف 447 ارب روپے وصولی کرسکی۔

ڈان میں شائع رپورٹ کے مطابق جولائی اور مئی کے درمیانی عرصے میں کی گئی وصولیاں میں غیرمعمولی کمی کے باعث بجٹ خسارہ توقعات سے کہیں زیادہ بڑھ جائےگا۔

ایف بی آر ریونیو میں کمی کے نتیجے میں بجٹ خسارہ بڑھے گا بلکہ رواں مالی سال میں صوبوں کو منتقل ہونے والے شیئرز میں بھی غیر معمولی کمی آئے گی۔

اعداد وشمار کے مطابق رواں مالی سال کے پہلے 11 مہینوں کے دوران صرف 33 کھرب 3 ارب روپے وصول کیا جبکہ گزشتہ مالی سال کے اسی عرصے میں 37 کھرب 51 ارب روپے قومی خزانے میں جمع کرائے گئے۔

خیال رہے کہ حکوم تنے مالی سال 19-2018 کے لیے ریونیو وصولی کا ہدف 43 کھرب 97 ارب روپے طے کیا تھا۔

اعداد وشمار سے واضح ہوتا ہے کہ تمام ٹیکس ادائیگیوں میں ہدف کے مقابلے میں کمی دیکھنے میں آئی۔

کم وصولی آئندہ مالی سال کے لیے بین الاقوامی مانیٹری فنڈ (آئی ایم ایف) کے بیل آؤٹ پیکج کے لیے اٹھائے گئے ایف بی آر کے اصلاحاتی اور آمدنی کے اقدامات کو عیاں کرتی ہے۔

واضح رہے کہ حکومت کی جانب سے بجٹ 20-2019 میں 600 ارب روپے مالیت کے آمدنی اقدامات نافذ کیے جانے کا امکان ہے۔

کسٹم کلیکشن میں کمی کی بڑی وجہ فرنس آئل کی درآمدات پر پابندی، استعمال شدہ گاڑیوں اور غیر ضروری لگژری اشیا کی درآمد کے طریقہ کار میں تبدیلی ہے۔

کسٹم حکام کے مطابق ڈالر میں درآمد کی قدر میں تنزلی اور کھانے پینے کی چیزوں کی درآمد میں 20 فیصد کمی کے باعث ریونیو وصولی میں 15 فیصد اور ہوئی۔

اس سے قبل رواں مالی سال کے پہلے 10 ماہ کے دوران ایف بی آر کی وصولی میں 3 فیصد کا معمولی اضافہ دیکھنے میں آیا جبکہ جولائی سے اپریل کے دوران شارٹ فال 356 ارب روپے سے زائد پر رہا تھا۔

کراچی (ایمرا نیوز آن لائن)
ایف بی آر کا بیوٹی پارلرز سے اِنکم ٹیکس لینے کا فیصلہ ،ایف بی آر حکام کے مطابق شہر میں 500 بیوٹی پارلرز کی نشاندہی کر لی گئی ، حکام کے مطابق بیوٹی پارلرز لاکھوں روپے کما کر تقریباً کوئی ٹیکس نہیں دے رہے،ٹی وی رپورٹ میں ایف بی آر حکام کے حواے سے بتایا گیا ہے کہ غیر رجسٹرڈ بیوٹی پارلرز کیخلاف کارروائی ہو گی ۔

اسلام آباد (ایمرا نیوز آن لائن)
فیڈرل بورڈ آف ریونیو نے اپیل کی ہے کہ عوام اسمگل شدہ اشیاءکی خریدوفروخت سے اجتناب کریں،ا سمگل شدہ اشیا ءکی خرید و فروخت سے معیشت پر منفی اثرات مرتب ہوتے ہیں اور ملکی پیداوار کی فروخت و استعمال میں نمایاں کمی واقع ہوتی ہے، عوام اشیا ء کی خریداری کے بعد ریٹیلر اور دکاندار سے رسید ضرور حاصل کریں

یہ تمام عمل غیر دستاویز ی معیشت کو دستاویزی بنانے میں معاون ہو گا، عوام اس بات کا خاص خیال رکھیں کہ ریسٹورینٹ اور ہوٹلز میں کھانے کے بعد رسید یا بل ضرور طلب کریں ، عوام ذمہ داری سے ملکی معیشت کو ترقی دینے میں کردار ادا کریں اور محب وطن پاکستانی ہونے کا ثبوت دیں۔