Category بزنس

اسلام آباد:(ایمرا نیوزآن لائن) عالمی مالیاتی فنڈ(آئی ایم ایف) نے گذشتہ 5 سال کے دوران پاکستان کی ٹیکس ٹو جی ڈی پی کی شرح میں اضافے کے رجحان پر اطمینان کا اظہار کرتے ہوئے اس رجحان کو برقرار رکھنے اور ٹیکس آمدنی جی ڈی پی کے 13.2 فیصد تک بڑھانے کا مطالبہ کیا ہے تاہم حکومت پاکستان نے12.7 فیصد تک بڑھانے کی یقین دہانی کرائی ہے۔

ذرائع کے مطابق پاکستان نے10سال کی ٹیکس ٹو جی ڈی پی کی شرح کی تفصیلات آئی ایم ایف کو پیش کردی ہیں۔ جس میں یہ بات سامنے آئی ہے کہ گذشتہ 5 سال کے دوران ٹیکس ٹو جی ڈی پی کی شرح 8.7 سے بڑھ کر 11.2 فیصد ہوگئی ہے۔دستاویز کے مطابق پاکستان نے آئی ایم ایف کو بلاواسطہ ٹیکسوں اور بالواسطہ ٹیکسوں کی الگ الگ تفصیلات فراہم کی ہیں۔ مالی سال 2015-16 میں پاکستان کی ٹیکس ٹو جی ڈی پی کی شرح بڑھ کر10.7 فیصد ہوگئی جس میں جی ڈی پی کے لحاظ سے ڈائریکٹ ٹیکسوں کی شرح بڑھ کر4.2 فیصد ہوگئی جبکہ جی ڈی پی کے لحاظ سے ان ڈائریکٹ ٹیکسوں کی شرح بڑھ کر6.5 فیصد ہوگئی اور ان میں سے کسٹمز ڈیوٹی کی جی ڈی پی کے لحاظ سے شرح بڑھ کر1.4 فیصد، جی ڈی پی کے لحاظ سے سیلز ٹیکس کی شرح بڑھ کر4.5 فیصد ہوگئی۔

جی ڈی پی کے لحاظ سے فیڈرل ایکسائز ڈیوٹی کی شرح بڑھ کر0.6 فیصد رہی اور مالی سال 2016-17 میں پاکستان کی ٹیکس ٹو جی ڈی پی کی شرح ایک بار پھر کم ہو کر 10.5 فیصد ہوگئی جس میں جی ڈی پی کے لحاظ سے ڈائیریکٹ ٹیکسوں کی شرح4.2 فیصد ہی برقرار رہی جبکہ جی ڈی پی کے لحاظ سے ان ڈائریکٹ ٹیکسوں کی شرح کم ہو کر6.3 فیصد ہوگئی اور ان میں سے کسٹمز ڈیوٹی کی جی ڈی پی کے لحاظ سے شرح پھر سے کم ہو کر1.1 فیصد ہوگئی، جی ڈی پی کے لحاظ سے سیلز ٹیکس کی شرح کم ہوکر 4.2 فیصد ہوگئی۔

لاہور(ایمرا نیوز) محکمہ ایکسائز موٹر برانچ میں سمارٹ کارڈ اور نمبر پلیٹ کا اجراءمحکمہ کے لئے امتحان بن کے رہ گیا۔ سائل ذلیل و خوار ہو کے رہ گئے اور کارڈ کی وصولی کے لئے روزانہ کی بنیاد پر چکر لگانے پر مجبور ہیں اور مایوس ہو کر واپس لوٹ جاتے ہیں۔

لیکن یہاں ایک بات قابل غور ہے تبدیلی سرکار کی ناک کے نیچے کرپشن عروج پر ہے ڈی جی آفس ایکسائز موٹر برانچ کا عملہ لوگوں سے زیادہ پیسے وصول کر ک

ے ایک دن کے اندر لوگوں کوکارڈ کی فراہمی کر رہا ہے۔ لیکن عام شہریوں کے لئے بغیر پیسوں کے یہ سہولت نہ ہے۔

(ایمرا نیوز آن لائن)
انتباہ پہلی مرتبہ نہیں ملا،ہم ایسی باتیں سننے کے عادی ہیں۔کئی بار ایسے حکمران آئے جنہوںنے قرض اتارو ملک سنوارو نعرجیسے خوب صورت اور فلکشگاف نعرے لگائے مگر نہ ان کے دور میں قرض اترااور نہ ہی ان کے بعد آنے والے حکمران ایسی کسی خواہش میں کامیاب ہو پائے۔پہلے دن سے پاکستان کے عوام قرض کی زنجیر میں ایسے جکڑے ہیں کہ آج تک اس سے نکل ہی نہیں پائے۔قرض اتارنے کی خواہش آج تک تو خوابوں میں ہی شایدپوری ہو پائی ہو۔پاکستان کے عوام دہائیاں دیتے ہیں ان کی حالت پہلے سے بھی بدتر ہوتی جا رہی ہے اور قرضے کی ویلیو بڑھتی جا رہی ہے سمجھ نہیں آتی کہ غریب عوام کی حالت سدھارنے کے لیے لیاجانے والا قرض جاتا کہاں ہے۔ موجودہ حکومت تبدیلی حکومت ہے۔

موجودہ وزیراعظم نے الیکشن جیتنے سے قبل قسمیں لے لے کر وعدے کیے تھے کہ میں آئی ایم ایف یا کسی اور ملک کے پاس قرضہ لینے نہیں جاﺅں گا بلکہ خود کشی کرنے کو ترجیح دوں گا تاہم آج وہی وزیر اعظم آئی ایم ایف سے قرضہ لینے میں کامیاب ہونے کے لیے وزیرخزانہ کو بھی بدل دیتا ہے اور عوام کو بھی قرض حاصل کرنے کی افادیت پر لیکچر دیتا نظر آتا ہے۔ بہر حال آئی ایم ایف سے پاکستان کومزید قرضہ ملنے کی نوید تو مل چکی ہے مگر گزشتہ میٹنگ میں آئی ایم ایف نے یہ رپورٹ بھی جاری کر دی کہ آنے والے دو سالوں میں پاکستان نے بیرونی قرضے کی مد میں27بلین ڈالر واپس کرنے ہیں۔جبکہ اس وقت ملنے والا قرضہ لے کررواں برس جون کے مہینے تک پاکستان کا مجموعی قرضہ جی ڈی پی کی ریشو کے حوالے سے77فیصد ہو جائے گا جو کسی بھی ملک کی معیشت کو ڈبونے اور اسے برباد کرنے کے لیے نقطہ عروج سمجھا جاتا ہے۔

کسی بھی ملک پر جب جی ڈی پی کے تناسب سے مجموعی بیرونی قرضة70فیصد تک پہنچتا ہے تو اس کی معیشت ڈاﺅن ہونا شروع ہو جاتی ہے جبکہ پاکستان کا بیرونی قرضہ مجموعی طور پر72فیصد تک گزشتہ ن لیگ کے دور حکومت تک پہنچ گیا تھا۔اب دیکھنا یہ ہے کہ ان دو سالوں میں 27بلین ڈالر کا قرضہ موجودہ حکومت کیسے واپس کرتی ہے اور عوام کے لیے ریلیف مہیا کرنے میںکیا اقدامات کرتی ہے کیونکہ اس وقت کی معاشی صورت حال تو کچھ اور منظر نامہ پیش کررہی ہے

اسلام آباد(میڈیا 92 نیوز ویب ڈیسک)پاکستان بھر میں گزشتہ کئی سال سے کسٹم ڈیوٹی اور دیگر ٹیکسز کے بغیر اسمگلنگ کے ذریعے آنے والے موبائل فون کے اعدادوشمار کو تمام موبائل فون نیٹ ورک پر اکٹھا کرنے کے بعد ان30 لاکھ سے زائد غیر قانونی موبائل فون کو بند کرنے کا سلسلہ شروع ہو گیا ۔

روزنامہ جنگ کے مطابق پاکستان ٹیلی کمیونیکیشن اتھارٹی نے بذریعہ میڈیا اور سوشل میڈیا کے ذریعے عوام کو گزشتہ کئی مہینے پہلے سے آگاہ کیا جاتا رہا کہ غیر قانونی موبائل فون نہ خریدیں اور اس کی تصدیق بھی بذریعہ شارٹ کوڈ کے ذریعے کریں،
ذرائع نے بتایا ہے کہ ڈھائی کروڑ سے زائد ایسے موبائل فون کا ڈیٹا اکٹھا کیا گیا ہے جس پر کوئی ڈیوٹی ادا نہیں ہوئی اور یہ تمام موبائل فون پاکستان میں غیر قانونی طریقے سے آئے اور مار کیٹو ں میں فروخت ہوئے اب اس کے پہلے مرحلے میں 30لاکھ سے زائد موبائل فون بند ہونے شروع ہوگئے ہیں

تمام بند ہونے والے موبائل فون کو گزشتہ کئی مہینے سے بذریعہ ایس ایم ایس آگاہ بھی کیا جاتا رہا ہے کہ وہ قانونی طریقے سے اس کا ٹیکس ادا کریں بس صورت دیگر آپ کے فون کو بند کیا جائے گا۔

اسلام آباد(ایمرا نیوزآن لائن) مشیر خزانہ عبدالحفیظ شیخ نے کہا ہے کہ آئی ایم ایف کے ساتھ ابتدائی مذاکرات کیے گئے ہیں، پُرامید ہیں کہ یہ مذاکرات کامیاب ہوں گے۔بین الاقوامی مالیاتی فنڈ (آئی ایم ایف ) سے آج کے مذاکرات کے دور کے بعد عبدالحفیظ شیخ میڈیا سے گفتگو کر رہے تھے۔انہوں نے بتایا کہ مذاکرات میں آئی ایم ایف کو اقتصادی اصلاحات کے ایجنڈے سے آگاہ کیا ہے، پاکستان اور آئی ایم ایف کے مذاکرات آئندہ مزید چند روز جاری رہیں گے۔انہوں نے یہ بھی کہا کہ پُرامید ہیں کہ آئی ایم ایف کے ساتھ مذاکرات کامیاب ہوں گے۔

اسلام آباد(ایمرا نیوز آن لائن)رواں مالی سال2018-19ء کے پہلے دس مہینوں میں جولائی تا اپریل کے دوران فیڈرل بورڈ آف ریونیو( ایف بی آر) کے ٹیکس محصولات میں3.09 فیصد کااضافہ ہوا ہے۔ ایف بی آرکے اعدادوشمارکے مطابق جاری مالی سال میں اپریل2019ء کے اختتام پر فیڈرل بورڈ آف ریونیو نی2.981 کھرب روپے کے ٹیکس وصول کئے ہیں جبکہ گذشتہ مالی سال کے ابتدائی دس ماہ کے دوران ایف بی آرکے ٹیکس محصولات کا حجم 2.922 کھرب روپے رہا تھا۔ اس طرح گذشتہ مالی سال کے مقابلہ میں رواں مالی سال کے دوران ٹیکسز کی وصولی کے حجم میں59 ارب روپے یعنی3 فیصد سے زائد کا اضافہ ریکارڈ کیا گیا ہے۔

اسلام آباد(ایمرا نیوزآن لائن) پاور ڈویژن نے 10لاکھ روپے سے زیادہ بجلی کے بقایا جات کے نادہندگان کی لسٹیں پاور انفارمیشن ٹیکنالوجی کمپنی کی ویب سائیٹ پر جاری کر دیں۔نادہندگان کے 45ہزار سےزیادہ نجی جبکہ بجلی نادہندگان کی طرف 244 ارب روپے کے بقایاجات ہیں۔ترجمان پاورڈویژن کے مطابق نادہندگان کے خلاف آپریشن شروع کردیا گیااور بجلی بقایاجات کی سب سے زیادہ رقم کوئٹہ الیکٹرک سپلائی کمپنی کے نادہندگان کی طرف 212 ارب روپے ہے ۔

ترجمان پاور ڈویژن کے مطابق تمام بجلی تقسیم کار کمپنیوں میں 10 لاکھ روپے سے زیادہ کے تمام بجلی ڈیفالٹرز کے کنکشنز منقطع کیئے جارہے ہیں ، جبکہ 10 لاکھ روپے سے زیادہ کے ایسے تمام ڈیفالٹرز جن کے بجلی کنکشن پہلے سے منقطع کیئے گئے ہیں اور انہوں نے متبادل نام یا جگہ سے بجلی کنکشن حاصل کیئے ہیں ان کی بجلی بھی منقطع کی جارہی ہے۔پاور ڈویژن پہلے ہی ان نادہندگان کو 30اپریل تک اپنے بقایا جات کلیئر کرنے کی ہدایات جاری کر چکی ہے 12ارب روپے کے بقایاجات کے ساتھ پیسکو کے نادہندگان دوسرے اور 8ارب روپے کے بقاجات کے ساتھ سیپکو کے نادہندگان تیسرے نمبر پر ہیں ۔

اسلام آباد:(ایمرا نیوزآن لائن) نئے بیل آؤٹ پیکیج کے لیے پاکستان اور آئی ایم ایف حکام کے درمیان دوسرے روز ہونے والے تکنیکی سطح کے مذاکرات میں آئی ایم ایف کی جانب سے ایف بی آر کی کارکردگی اور ایف بی آر کے 3سو ارب روپے سے زائد کے ریونیو شارٹ فال پر تحفظات کا اظہار کیا۔پاکستان نے مذاکرات میں آئی ایم ایف کو 6سو ارب روپے سے زائد کے نئے ٹیکسز لگانے، بجلی اور گیس کے نرخ بڑھانے سمیت دیگر اہم یقین دہانیاں کرائی گئیں ،مذاکرات 10مئی تک جاری رہیں گے جبکہ آج صبح وزارت خزانہ میں آئی ایم ایف کے ٹیکنیکل سطح کے مذاکرات کا اہم دور ہوگا اور آج کے مذاکرات میں ایف بی آر،وزارت خزانہ،وزارت تجارت،ایس ای سی پی،اسٹیٹ بینک سمیت دیگر تمام متعلقہ وزارتوں کے حکام شریک ہونگے۔

وزارت خزانہ ذرائع کے مطابق پاکستان اور آئی ایم ایف کے درمیان جاری تکنیکی سطح کے مذاکرات میں آئی ایم ایف کو پاور سیکٹر، سوشل سیفٹی نیٹ، سرکلر ڈیٹ کمی، بجلی اور گیس کے نرخ بڑھانے کی حکمت عملی پر بریفنگ دی گئی جس کے تحت جون تک بجلی کی قیمتوں میں مرحلہ وار ا ضافہ کا ا مکان ہے۔وفد نے ایف بی آر ہیڈ کوارٹر کا بھی دورہ کیا ،ایف بی آر کی کارکردگی کے بارے میں بریفنگ دی گئی تاہم آئی ایم ایف نے ایف بی آرکی کارکردگی اور رواں مالی سال کے پہلے نو ماہ کے دوران 335 ارب روپے کے لگ بھگ ریونیو شارٹ فال پر تحفظات کا اظہار کیا ۔ مذاکرات میں پاکستان نے 6سو ارب روپے کے نئے ٹیکسز لگانے کی یقین دہانی کرادی ۔
نئے بجٹ میں ایف بی آر کا ہدف 4500 ارب روپے سے زائد مقرر کیا جائے، رواں سال ایف بی آر 4100 ارب روپے کا ٹیکس اکٹھا کرے گاکہ آئی ایم ایف جائزہ مشن کے ساتھ آئندہ مالی سال 2019-20 کے وفاقی بجٹ کیلیے تیار کردہ تجاویز اور بجٹ اسٹریٹجی پیپر اور مڈ ٹرم اکنامک فریم ورک بارے بھی تفصیلی تبادلہ خیال ہوا ہے۔

اسلام آباد(ایمرا نیوز آن لائن) رواں مالی سال 2018-19ء کے پہلے 9 ماہ کے دوران لیدر گارمنٹس کی ملکی برآمدات میں 18.30فیصد کا اضافہ ریکارڈ کیا گیا ہے۔ادارہ برائے شماریات پاکستان (پی بی ایس)کی رپورٹ کے مطابق گزشتہ مالی سال 2017-18ء میں جولائی تا مارچ کے دوران 6لاکھ 12 ہزار درجن لیدر گارمنٹس برآمد کئے گئے جن کی کل مالیت 23ہزار 782 ملین روپے تھی جبکہ رواں مالی سال 2018-19ء کے اسی عرصہ کے دوران لیدر گارمنٹس کی ملکی برآمدات 7 لاکھ 24ہزار درجن تک بڑھ گئیں جن کی کل مالیت 25 ہزار 184ملین روپے تک پہنچ گئی۔اس طرح گزشتہ مالی سال 2017-18ء کے پہلے 9 ماہ کے مقابلہ میں رواں مالی سال2018-19ء کے اسی عرصہ کے دوران لیدر گارمنٹس کی ملکی برآمدات میںایک لاکھ 12ہزار درجن یعنی 18.30فیصد کا اضافہ ریکارڈ کیا گیا ہے۔

اسلام آباد:(ایمرا نیوزآن لائن) آئی ایم ایف نے کہا ہے کہ پاکستان پر 2سال میں 27 ارب ڈالر کا بیرونی قرض واجب الادا ہوجائے گا جب کہ قرض کا یہ حجم پاکستان کے مجموعی بیرونی قرضوں کا 27 فیصد ہے۔حکومت اور کچھ نجی سیکٹر کے ماہرین کے جائزوں کے مطابق جاری کھاتوں کے خسارے کو پورا کرنے کے لیے درکار رقم کو شامل کرنے کے بعد پاکستان کو اقتصادی بحران سے بچنے کے لیے اگلے دو برسوں میں 46 سے 50 ارب ڈالر کی ضرورت ہوگی۔ 27 ارب ڈالر کے بیرونی قرضوں کا ذکر پیر کو جاری کردہ آئی ایم ایف کی نئی ریجنل آؤٹ لُک رپورٹ اپ ڈیٹ میں کیا گیا ہے۔
رپورٹ کے مطابق پاکستان واحد علاقائی ملک ہے جسے سب سے زیادہ غیرملکی قرضہ ادا کرنا ہے۔ آئی ایم ایف کی رپورٹ کے مطابق رواں برس جون تک قرض کا تناسب جی ڈی پی کے 77 فیصد تک رہنے کی توقع ہے۔ سابقہ دور حکومت کے اختتام پر یہ تناسب 72.5 فیصد تھا۔ آئی ایم ایف کی جانب سے یہ رپورٹ اسی دن جاری کی گئی ہے جس روز پاکستان کے ساتھ ممکنہ بیل آؤٹ پیکیج پر مذاکرات شروع ہوئے ہیں۔

قبل ازیں گذشتہ برس نومبر میں بہت اہم معاملات پر اختلافات کے باعث مذاکرات ناکام ہوگئے تھے۔ تاہم اس بار حکام کو توقع ہے کہ اختلافات دور کرلیے جائیں گے اور 6.5 ارب ڈالر قرض کے معاہدے پر دستخط ہوجائیں گے۔پاکستان کو یہ قرض 3 سال میں ادا کرنا ہوگا۔ بیجنگ میں جمعے کو بیلٹ اینڈ روڈ فورم کی سائیڈلائن پر وزیراعظم پاکستان کی ملاقات آئی ایم ایف کی ایم ڈی کرسٹائن لوگارڈ سے ہوئی تھی۔ایوان وزیراعظم سے جاری کردہ بیان کے مطابق دونوں رہنماؤں نے فنڈ پروگرام کی اہمیت اور معاہدے کی جانب پیش قدمی پر اتفاق کیا تھا۔ پاکستان اورآئی ایم ایف کے درمیان تکنیکی سطح کے مذاکرات شروع ہوگئے ہیں، پیرکو ہونے والے مذاکرات کے پہلے روزپاکستان نے آئی ایم ایف کو 600 ارب روپے سے زائدکے نئے ٹیکسزلگانے پرآمادگی ظاہرکردی۔پاکستان نے ٹیکس اصلاحات، توانائی کے شعبہ میں تجاویز تیارکرلی ہیں جبکہ آئی ایم ایف سے 3 سالہ پروگرام کے تحت ساڑھے 6 ارب ڈالرکے لگ بھگ قرضے کا معاہدہ 10مئی کوطے پانے کا امکان ہے، مذاکرات میں آئی ایم ایف جائزہ مشن کی سربراہی ارنستو ریگوکرہے ہیں جبکہ پاکستانی ٹیم کی قیادت سیکریٹری خزانہ نے کی، وفد نے پہلے روز وزارت خزانہ ، ایف بی آر اور وزارت توانائی کے حکام سے مذاکرات کیے۔پاکستان نے 600ارب روپے کے نئے ٹیکسز لگانے کی یقین دہانی کرادی، آئی ایم ایف کو یقین دہانی کرائی گئی ہے کہ نئے بجٹ میں ایف بی آرکا ہدف 4500 ارب روپے سے زائد مقررکیا جائے گا، رواں سال ایف بی آر 4100 ارب روپے کا ٹیکس اکٹھا کرے گا، مذاکرات میںچیئرمین ایف بی آر اور ٹیکس حکام نے ٹیکس اصلاحات پر بھی آئی ایم ایف کو بریفنگ دی اورٹیکس کی چھوٹ محدود کرنے پر بھی تبادلہ خیال ہوا۔

آئی ایم ایف جائزہ مشن کے ساتھ مذاکرات میں رواں مالی سال کے پہلے 9 ماہ کے اقتصادی اعدادوشمار پر مشتمل مرتب کردہ ڈیٹا شیئرکیاگیا ہے، ذرائع کا کہنا ہے کہ آئی ایم ایف جائزہ مشن کے ساتھ آئندہ مالی سال 2019-20 کے وفاقی بجٹ کے لیے تیارکردہ تجاویز اور بجٹ اسٹریٹجی پیپراورمڈٹرم اکنامک فریم ورک بارے بھی تفصیلی تبادلہ ہوا ہے اور بجٹ اسٹریٹجی پیپر کے مجوزہ اہداف کو حتمی شکل دینے پرتبادلہ خیال ہواہے۔ذرائع کا کہنا ہے کہ آئی ایم ایے کے ساتھ مالیاتی خسارہ اور ادئیگیوں کے توازن سمیت دیگر اہداف پر بھی بات چیت ہورہی ہے او مالیاتی خسارہ رواں مالی سال کے آخر تک 7 فیصدکے لگ بھگ جبکہ پروگرام کے تحت اس میں بتدریج کمی لائی جائیگی اور 5.6 فیصد تک اگلے سال لایا جائے گا۔آئی ایم ایف پاکستان کی ٹیکس آمدنی جی ڈی پی کے 13.2 فیصد تک بڑھانے کا مطالبہ کررہا ہے لیکن حکومت پاکستان نے 12.7 فیصد تک بڑھانے کی یقین دہانی کرائی ہے، ذرائع کاکہنا ہے کہ آئی ایم ایف سے ہونے والے مذاکرات میں ریونیو فریم ورک کے بارے میں بھی تفصیلی تبادلہ خیال ہوا ہے۔ذرائع کا کہنا ہے کہ مذاکرات میں چین سے لیے جانے والے قرضوں کے بارے میں آگاہی سے متعلق آئی ایم ایف کو آگاہی دینے میں بھی پیشرفت ہوئی ہے، قرضوں کی تفصیلات پاکستان کے مجموعی قرضوں میں ظاہرہے، وہی آئی ایم ایف کو دی جائے گی۔آئی ایم ایف کو بتایا گیا ہے کہ پاکستان آمدن بڑھانے کی کوشش کر رہا ہے، تجارتی خسارے میں کمی ہو رہی ہے جبکہ درآمدات کو روکا جا رہا ہے، امید ہے رواں سال جاری کھاتوں کا خسارہ کم ہوگا، پاکستان نے ٹیکس اصلاحات، توانائی کے شعبہ میں تجاویزتیارکرلی ہیں۔