Category بزنس

لاہور( ایمرا نیوز) ایکسائز حکام نے گاڑیوں کی رجسٹریشن بکس کی جگہ متعارف کرائے گئے سمارٹ کارڈ کے بحران پر قابو پانے کے لئے 7لاکھ سمارٹ کارڈ کی پرنٹنگ کا عمل مکمل کر لیا ، اور تمام متعلقہ ایکسائز موٹر برانچ کو ان کی ترسیل کا عمل شروع کر دیا گیا ہے ، روزانہ کی بنیاد پر20سے 25ہزار سمارٹ کارڈ پرنٹ کئے جائیں گئے تاکہ التوا کا شکار ہونے والے سمارٹ کارڈ کی پرنٹنگ کا عمل مکمل کیا جا سکے تاہم کمپیوٹرائز ڈ نمبر پلیٹ کا بحران تاحال جاری ہے اور اس پر قابو نہیں پایا جا سکا، ذرائع کے مطابق ایکسائز حکام نے چند ماہ قبل شہریوں کی سہولت کیلئے رجسٹریشن بک کی جگہ سمارٹ کارڈ متعارف کرایا جس کی قیمت530روپے مقرر کی گئی ، ایک ماہ سمارٹ کارڈ کی پرنٹنگ کا عمل جاری رہا جس کے بعد ایکسائز کی جانب سے ادائیگی نہ ہونے پر کمپنی نے سمارٹ کارڈ کی پرنٹنگ بند کر دی جس پر سمارٹ کارڈ التوا کا شکار ہو گئے ، شہریوں کو بر وقت رجسٹریشن سمارٹ کارڈ نہ مل سکے اور شہری ایکسائز دفاتر چکر لگانے پر مجبورہو گئے ، ایکسائز حکام نے بحران شدید ہونے پر کمپنی کو ادائیگی کی یقین دہانی کرائی اور ہنگامی بنیادوں پر سمارٹ کارڈ کی تیاری شروع کی گئی جس کے بعد7لاکھ سمارٹ کارڈ تیار کر کے متعلقہ ایکسائز دفاتر کو بھجوانے کا عمل شروع کر دیا گیا ، پہلے 10ہزار کارڈ روزانہ کی بنیاد پر تیار کئے جاتے تھے جبکہ ڈی جی ایکسائز آفس لگائی گئی مشین روزانہ کی بنیاد پر25ہزار کارڈ تیار کئے جا سکتے ہیں، ایکسائز حکام نے کمپیوٹرائز ڈ نمبر پلیٹوں کی تیاری اور ان کے اجرا کیلئے آج اجلاس طلب کر لیا ہے جس میں حکمت عملی طے کی جائے گئی ، ٹریفک پولیس کی جانب سے چالان اور ناکوں پر پولیس کی جانب سے پوچھ گچھ ہونے پر عوام کو مشکل کا سامنا ہے ، ایڈیشنل ڈی جی ایکسائز چوہدری مسعودالحق کاکہنا ہے التو اکا شکار ہونے والے سمارٹ کارڈ کی پرنٹنگ کا عمل آئندہ چند روز میں مکمل کرلیا جائے گا اور7لاکھ کارڈ تیار کر لئے گئے ہیں ، جلد کمپیوٹرائز ڈ نمبر پلیٹوں کی تیاری شروع کر دی جائے گی۔

کراچی(وقت آن لائن)ٹیکنالوجی پر مبنی تخلیقی کاروباری آئیڈیاز کا میلہ منگل 30اپریل سے یکم مئی تک کراچی میں منعقد ہوگا۔ اس سال ہونے والی مومینٹم کانفرنس میں 100 سے زائد تخلیقی سٹارٹ اپ پیش کیے جائیں گے جو حتمی کامیابی کے لیے ایک دوسرے کے مقابل ہوںگے۔پری ایونٹ 100 سٹارٹ اپس کے درمیان پچنگ سمیت سرگرمیاں 28 اور 29 اپریل کو نیشنل انکوبیشن سینٹر کراچی میں ہورہی ہیں۔ مومینٹم ایک عالمی سٹارٹ اپ کمیونٹی ہے جو جدید اور اختراعی ٹیکنالوجیز پر کام کرنے والے کاروباری افراد کو تعلیم دینے، ان میں شوق پیدا کرنے اور ایک دوسرے سے منسلک کرنے کے لیے تیار کی گئی ہے تا کہ آئندہ برسوں میں پاکستان کی ترقی کے لیے علم پر مبنی معیشت کو فروغ دیا جاسکے۔گذشتہ سال پورے ایکو سسٹم سے300 اسٹارٹ ا پس اپنے بہترین کاروباری تجربے اور جدید دماغ کے ساتھ ساتھ سپیکر سیشن ، ورکشاپس اور حاضرین کے ساتھ مصروف رہیں۔اس طرح شرکا کو 500 مختلف مینٹورز، مقررین اور اسٹارٹ اپس کے تجربات سے سیکھنے کا موقع میسر آیا۔بانی عامر جعفری نے کہا کہ 2016 میں موبائل ورلڈ کانگریس سے واپسی کے بعد انھوں نے اپنے سفر کا آغاز کیا۔ یہ میرے لیے ایک شاندار تجربہ رہا۔ فیس بک، گوگل، آئی بی ایم، مائیکرو سافٹ اور اے ڈبلیو ایس جیسی ٹیکنالوجی کی بڑی کمپنیوں کی مومینٹم میں شرکت اور اسٹیج پر ان کی موجودگی ہمارے لیے بہت عمدہ تجربہ رہا ہے۔سٹارٹ اپ 100 اس سال کا نیا اضافہ ہے جو ایک عمودی مسابقتی عمل ہے جس میں 100 سٹارٹ اپس نہ صرف اپنے نظریات اور خیالات پیش کریں گے بلکہ اپنی مصنوعات کی رونمائی کے ذریعے ان کے بارے میں مکمل معلومات بھی دیں گے۔جیتنے والوں کو 10 ہزار ڈالر مالیت کے کیش اور سروسز انعامات دیے جائیں گے۔ 100میں سے صف اول کے 10 سٹارٹ اپس گرینڈ پرائز کے لیے مرکزی سٹیج پر ایک دوسرے کے مقابل آئیں گے جن میں سے پہلے 3 کو نقد انعامات دیے جائیں گے۔ پروگرام ڈائریکٹر مومینٹم ٹیک کانفرنس ثنا میلا نے کہا ہے کہ یہ کوئی معمولی ووٹ نہیں ہے بلکہ ہم سب کے لیے ایک بہترین تجربہ کا حامل ہے، یہ انٹرپرینیورز کے لیے ایک بہترین موقع ہے۔ مومینٹم کے اس سال کے لیے تعاون و اشتراک میں سٹارٹ اپس 100 کے لیے ورچوئل فورس، کوویلنٹ گا فچ ہیکاتھون، دفتر خوان برائے سرمایہ کاری مینجمنٹ اور دیگر کے علاوہ ریڈیکل اینڈ امپیکٹ ڈائنامکس فار ورکشاپس شامل ہیں۔

کراچی(وقت آن لائن)فنانس ڈویژن کی جانب سے شائع کردہ رپورٹ میں کہا گیا ہے کہ قومی معیشت میں بنیادی ساختی کمزوری درآمدات اور برآمدات کے مابین بڑھتی ہوئی خلیج ہے، اور اسی باعث ہر چند سال بعد توازن ادائیگی کا بحران جنم لیتا ہے۔رپورٹ میں بتایا گیا ہے کہ ڈومیسٹک مارکیٹ میں ہائی ریٹرن اور نان ٹریڈ ایبل سیکٹرز جیسے ٹیلی کام اور فنانشل سییکٹرز میں سرمایہ کاری کی حامی پالیسیوں کی وجہ سے برآمدات پر منفی اثر پڑ رہا ہے۔ رپورٹ میں برآمداتی مسابقت بڑھانے کے لیے مختلف اقدامات تجویز کیے گئے ہیں جیسے پیداوار میں اضافہ، گلوبل ویلیو چین میں شرکت، کاروبار کی لاگت میں کمی وغیرہ۔ وفاقی ادارہ شماریات کے مطابق رواں مالی سال کے ابتدائی 9ماہ کے دوران تجارتی خسارہ گذشتہ مالی سال کے اسی عرصے کی نسبت 13.02 فیصد کم رہا۔ اس دوران درآمدات میں 7.96 فیصد کمی واقع ہوئی جب کہ برآمدات 0.11 فیصد بڑھیں۔ تجارتی خسارے میں کمی کا سبب درآمداتی حجم کا محدود ہونا ہے۔

اسلام آباد(وقت آن لائن)آئی ایم ایف کا وفد آج سے پاکستان کا جائزہ مشن شروع کرے گا، آئی ایم ایف وفد سے پہلے مرحلے میں معاونت کے پروگرام پر تکنیکی بات چیت ہوگی۔ذرائع کے مطابق آئی ایم ایف سے مذاکرات کیلیے حکومت نے معاشی فریم ورک کی تیاری پر جامع کام کیا ہے، وزارت خزانہ نے متعلقہ وزارتوں اوراداروں کے حکام سے مشاورت کی ہے، ذرائع کے مطابق مذاکرات کیلیے ایف بی آر، وزارت توانائی، منصوبہ بندی، نجکاری، تجارت اورریگولیٹری اداروں نے تیاری مکمل کر لی اور وزارت خزانہ نے مرکزی بینک، بجلی اور پٹرولیم، ٹیکس اور نجکاری حکام کے ساتھ مشاورت کو حتمی شکل دے دی ہے، آئی ایم ایف کو غربٹ مٹاؤ پروگرام پر جامع بریفنگ دی جائے گی۔ذرائع کے مطابق آئندہ مالی سال کیلیے ٹیکس وصولیوں کا ہدف 5500 ارب روپے مقررکرنے پر غور کیا جائے گا، اتنا ہدف رکھنے سے ٹیکس ٹو جی ڈی پی شرح کو 13 فیصد کرنے میں مدد ملے گی، بجلی اور گیس سیکڑ میں چوری روکنے کیلیے ٹیکنالوجی اور سخت اقدامات لینے کی شرائط طے پانے کا امکان ہے ۔

بیجنگ(نیٹ‌نیوز) پاکستان اور چین کے درمیان ریلوے کے معاہدے ‘ایم ایل ون’ پر دستخط کر لیے گئے جس کے تحت پشاور سے کراچی تک ریلوے کا ڈبل ٹریک بنایا جائے گا۔

وزیراعظم عمران خان اور چینی ہم منصب لی کی چیانگ نے ‘ایم ایل ون’ معاہدے پر دستخط کیے۔

نئے ٹریک پر ٹرین کی اسپیڈ کم از کم 160 کلو میٹر فی گھنٹہ ہوگی، منصوبے کی تکمیل سے کراچی سے پشاور کے سفر کے دورانیے میں کمی واقع ہوگی۔

وزیر ریلوے شیخ رشید کا کہنا ہے کہ 13 سال پہلے میں نے ہی اس منصوبے کی فزیبلٹی پر دستخط کیے تھے، منصوبے کے تحت پشاور سے کراچی تک ڈبل ٹریک بنایا جائے گا جس پر ٹرین کی اسپیڈ کم از کم 160 کلو میٹر فی گھنٹہ ہوگی۔

اس سے قبل وزیر اعظم عمران خان نے بیجنگ میں چین کے صدر شی جن پنگ اور وزیر اعظم لی کی چیانگ سے بھی ملاقات کی تھی جب کہ دونوں ملکوں کے درمیان وفود کی سطح پر بھی بات چیت ہوئی۔

تمام بندرگاہوں پر میلا مائن کی نشندہی کرنے والی مشینیں نصب کئے جانے تک پابندی برقرار رکھنے کی سفارش
نئی دہلی(ایمرا نیوز آن لائن )میلا مائن کی موجودگی کے باعث بھارت نے چین سے دودھ اور اس سے بننے والی مصنوعات کی درآمد پرعائد پابندی میں چھ ماہ کی توسیع کردی۔بھارتی ٹی وی کے مطابق بھارت کے فارن ٹریڈ ڈائریکٹوریٹ جنرل سے جاری ایک نوٹس میں کہاکہ چین سے دودھ اور اس سے بننے والی مصنوعات کی درآمد پرعائد پابندی میں 6 ماہ کی توسیع کردی گئی ہے۔بھارت نے چین سے آنے والے دودھ اور دودھ سے بنی اشیا جن میں چاکلیٹ، کینڈی، پنیر، مکھن وغیرہ میں میلا مائن کی موجودگی کے باعث ان کی درآمد پر 24اکتوبر 2008 میں پہلی بار پابندی عائد کی تھی جس میں بار بار توسیع کی گئی۔آخری مرتبہ 24 دسمبر 2018 کو پابندی عائد کی گئی جس کی مدت 23 اپریل کو ختم ہوگئی تھی.

رواں ہفتے پاکستان اسٹاک ایکسچینج کے 100 انڈیکس میں 161 پوائنٹس کی کمی واقع ہوئی جس کے بعد ہفتے کے آخری روز انڈیکس 37 ہزار 131 پوائنٹس پر بند ہوا
کراچی(ایمرا نیوز آن لائن ) پاکستان اسٹاک ایکسچینج میں رواں ہفتے 100 انڈیکس 3 سال کی کم ترین سطح پر پہنچ گیا، ہفتے کے آخری روز انڈیکس 37 ہزار 131 پوائنٹس پر بند ہوا۔تفصیلات کے مطابق رواں ہفتے پاکستان اسٹاک ایکسچینج کے 100 انڈیکس میں 161 پوائنٹس کی کمی واقع ہوئی جس کے بعد ہفتے کے آخری روز انڈیکس 37 ہزار 131 پوائنٹس پر بند ہوا۔رواں ہفتے انڈیکس 3 سال سے زائد کی کم ترین سطح 36 ہزار 136 پوائٹس پر رہا۔100 انڈیکس میں 3 سال کی کم ترین سطح 23 اپریل کو منگل کے روز دیکھی گئی جب کاروبار کے دوران 100 انڈیکس میں 700 سے زائد پوائنٹس کی کمی ہوئی۔ایک دن میں 100 انڈیکس میں 1.9 فیصد کی نمایاں کمی دیکھی گئی۔ انڈیکس نیچے جانے کے بعد شیئرز کی قیمت کم ہونے سے سرمایہ کاروں کے 110 ارب ڈوب گئے۔رپورٹ کے مطابق رواں ہفتے اسٹاک مارکیٹ میں 23.44 ارب مالیت کے 61 کروڑ شیئرز کا کاروبار ہوا، مارکیٹ کپیٹلائزیشن 40 ارب کمی سے 7 ہزار 528 ارب روپے ہوگئی۔دوسری جانب رواں ہفتے کے دوران روپے کی قدر میں استحکام رہا۔ مارکیٹ کی ہفتہ وار رپورٹ کے مطابق انٹر بینک میں ڈالر 141.38 کی سطح تک ٹریڈ ہوا۔انٹر بینک میں ڈالر 141 روپے 39 پیسے کی سطح پر برقرار رہا۔

اسلام آباد/ کراچی(نیٹ‌نیوز) حکومت کی جانب سے مارکیٹ میں اپنی رٹ پر عملدرآمدات کے عزم کے باوجود رمضان المبارک کی آمد سے قبل ہی ملک بھر میں ضروری غذائی اشیا کی قیمتوں میں نمایاں اضافہ ہوگیا۔

ملک میں ہول سیل اشیا کی سب سے بڑی مارکیٹ جوڑیا بازار میں قیمت میں اضافے کے بعد چینی کی ریٹیل قیمت 70 روپے کلو تک پہنچ گئی ہے جو کچھ روز قبل تک 65 روپے فی کلو تھی۔

موسم گرما میں شیرے (سویٹنر) کی ڈیمانڈ میں تیزی سے اضافہ ہوتا ہے کیونکہ یہ عام طور پر ڈرنکس، سیرپ، جوسز اور کنفیکشنریز کی تیاری میں زیادہ استعمال ہوتا ہے۔

اگر چینی کی قیمت پر نظر ڈالیں تو رواں سال کے آغاز میں اس کی قیمت 55 روپے کلو تھے جو فروی میں بڑھ کر 58 سے 60 روپے فی کلو ہوئی جبکہ مارچ میں ریٹیل مارکیٹ میں چینی 63 روپے فی کلی دستیاب تھی۔

ساتھ ہی جولائی 2018 سے فروری 2019 کے درمیان ملک میں چینی کی پیداوار میں 8 فیصد تک کمی ہوئی اور یہ 3.728 ملین ٹن رہی جو گزشتہ سال کے اسی عرصے میں 4 ملین ٹن تھی۔

کراچی میں دکاندار 68 سے 70 روپے فی کلو چینی فروخت کر رہے ہیں جبکہ ان میں سے بہت سے ایسے ہیں جنہوں نے پہلے ہی کم ہول سیل قیمت میں اسٹاک جمع کیا ہوا تھا اور وہ اب مارکیٹ میں قیمت کے مسلسل اضافے کو دیکھتے ہوئے اچھا منافع بنا رہے ہیں۔

اس حوالے سے کراچی ہول سیلر گروسرز ایسوسی ایشن (کے ڈبلیو جی اے) کے سربراہ انیس مجید کا کہنا تھا کہ 2 ماہ قبل ہول سیل قیمت 53 سے 55 روپے فی کلو تھی جو اب 63 سے 64 روپے کلو کے درمیان ہے۔

انہوں نے کہا کہ کارخانوں کی جانب سے قیمتوں میں اضافہ کیا گیا، شوگر ملز والے کاشتکاروں سے 182 روپے کے سرکاری نرخ کے بجائے 200 روپے کا 40 کلو گنا حاصل کر رہے ہیں جبکہ اس سیزن میں ملک میں گنے کی پیداوار بھی کم ریکارڈ کی گئی ہے۔

انیس مجید نے کہا کہ گزشتہ برس گنے کی پیداوار زیادہ ہوئی تھی لیکن کاشتکاروں کو ملز مالکان کی جانب سے 182 روپے کے سرکاری نرخ سے کم قیمت ملی تھی۔

رواں مالی سال کے ابتدائی 9 ماہ کے دوران چینی کی برآمدات میں نمایاں کمی دیکھنے میں آئی جو گزشتہ سال کی 10 لاکھ ٹن کے مقابلے میں صرف 3 لاکھ 77 ہزار 6 سو 77 ٹن رہی جبکہ آمدن بھی 36 کروڑ 20 لاکھ کے مقابلے میں صرف 11 کروڑ 50 لاکھ ڈالر رہی۔

قیمتوں میں یہ اضافہ سالانہ بنیادوں پر 13 فیصد کے قریب ہے جس میں آئندہ ہفتوں میں مزید اضافے کا امکان ہے۔

قیمتوں کے تعین کی کمیٹیوں اور اسپیشل پرائس مجسٹریٹ کی موجودگی کے باوجود بنیادی اشیائے خورونوش کی قیمتوں میں اضافہ دیکھنے میں آیا۔

ایس پی آئی مانیٹرز نے 17 شہروں میں 53 مارکیٹس میں 53 اشیا کی بنیاد پر سروے کیا، اس دوران 20 اشیا کی قیمتوں میں اضافہ اور 10 کی قیمتوں میں کم ہوئی جبکہ 23 کی قیمتوں میں کوئی تبدیلی نہیں آئی۔

یہ بھی پڑھیں: مہنگائی کا اثر صرف امیروں پر پڑا، غریب طبقہ اس سے محفوظ رہا، اسد عمر

ان قیمتوں کے مختلف آمدنی والے گروپس پر پڑنے والے اثرات کا بھی جائزہ لیا گیا، سب سے کم آمدنی والی گروپ (8 ہزار روپے ماہانہ کمانے والوں) کے لیے گزشتہ ہفتے ایس پی آئی میں 0.4 فیصد اضافہ ہوا جبکہ (35 ہزار یا اس سے زائد) کمانے والے گروپ کے لیے مہنگائی میں 0.35 فیصد تک اضافہ دیکھنے میں آیا۔

جن اشیا خورونوش کی قیمتوں میں گزشتہ ہفتے اضافہ دیکھنے میں آیا ان میں ٹماٹر کی قیمت میں 9.32 فیصد، اس کے بعد پیاز کی قیمت میں 8.35 فیصد، آلو 4.71 فیصد، انڈے 4.52 فیصد، کیلے 3.42 فیصد، دال مونگ 1.98 فیصد، چینی 1.86 فیصد، دال ماش 1.42 فیصد، لہسن 0.73 فیصد، دال چنا 0.67 فیصد، تیار چائے 0.59 فیصد، مٹن 0.51 فیصد، دہی 0.28 فیصد، سادہ ڈبل روٹی 0.14 فیصد، ہڈی والا گوشت 0.03 فیصد، چاول اری 0.03 فیصد، پکی ہوئی دال 0.02 فیصد اور گڑ 0.02 فیصد مہنگا ہوا۔

اس کے علاوہ ہفتے کے دوران جو غیر غذائی اشیا مہنگی ہوئیں ان میں سیگریٹ میں 0.02 فیصد اور شرٹ 0.47 فیصد اضافہ شامل ہے۔

سروے کے دوران جن اشیا کی قیمتیں کم ہوئیں، ان میں مرغی کی قیمت 1.11 فیصد، گندم 0.77 فیصد، گندم کا آٹا 0.51 فیصد، سرخ مرچ پاؤڈر 0.25 فیصد، کھانے پکانے کا تیل 0.23 فیصد، ویجیٹیبل گھی 0.23 فیصد اور دھلی دال 0.05 فیصد کم ہوئی جبکہ غیر غذائی اشیا میں ایل پی جی سیلینڈر میں 1.06 فیصد اور فائرووڈ ہول میں 0.45 فیصد کمی دیکھنے میں آئی۔

لاہور(ایمرا نیوزآن لائن) عالمی مارکیٹ میں سونے کی قیمت میں اضافہ ہوگیا جبکہ ملکی سطح پر سونے کی قیمت میں کوئی تبدیلی نہیں ہوئی۔سندھ صرا فہ بازار ایسوسی ایشن کے مطابق ملک میں سونے کی فی تولہ قیمت 68 ہزار 900 روپےپر برقرار ہے، 10 گرام سونےکی قدر 59 ہزار 71 روپے پر برقرار ہے۔دوسری جانب عالمی مارکیٹ میں سونےکی فی اونس قیمت 4 ڈالر اضافے سے 1281 ڈالر ہوگئی ہے۔

کراچی: (ایمرا نیوزآن لائن) اسٹاک ایکسچینج میں مثبت رجحان کے سبب آج 231 پوائنٹس کا اضافہ ہوا اور100 انڈیکس 37 ہزار کی حد عبور کر گیا۔سٹاک ایکس چینج میں آج کاروبار کے آغاز پر تیزی کا رجحان دیکھنے میں آیا جب 231 پوائنٹس اضافے کے سبب 100 انڈیکس 37 ہزار 27 پوائنٹس کی سطح پرپہنچٓ گیا۔گذشتہ روز بھی سٹاک مارکیٹ میں مثبت رجحان دیکھنے میں آیا تھا،انڈیکس میں 291پوائنٹس اور سرمایہ میں 26 ارب سے زائد کا اضافہ ہوا تھا جبکہ 207 کمپنیوں کے حصص میں بڑھاوا اور 108 کمپنیوں کے حصص میں کمی دیکھنے میں آئی تھی۔ تجزیہ کاروں کے مطابق سٹاک مارکیٹ میں حالیہ تیزی سرمایہ کاروں کا مارکیٹ پر اعتماد کا اظہار ہے جس سے ملکی معیشیت کی مثبت سمت میں پیش رفت کا امکان ہے۔