Category بزنس

لاہور (نیٹ نیوز)
رواں مالی سال کے دوران پاکستان کے 11 صنعتی شعبوں میں براہ راست غیر ملکی سرمایہ کاری میں اضافہ دیکھنے میں آیا ہے جس سے مستقبل میں پاکستان کی صنعتی ترقی کے روشن مستقبل کے امکانات نظر آنے لگے ہیں۔

پاکستان کے جن شعبوں میں غیرملکی سرمایہ کاری دیکھنے میں آئی ہے ان میں ٹیکسٹائل، کیمیکلز، فرماسوٹیکل اور الیکٹریکل مشینری شامل ہیں جن کے حجم میں 50 سو 800 فیصد تک تبدیلی دیکھنے میں آئی۔

رواں مالی سال 19-2018 کے ابتدائی 9 ماہ کے دوران براہ راست غیر ملکی سرمایہ کاری میں 51 فیصد کمی ریکارڈ کی گئی جس کی سب سے بڑی وجہ پاور سیکٹر میں چینی سرمایہ کاری کی ادائیگی تھی جس نے دیگر صنعتی شعوں پر مرتب ہونے والے مثبت اثرات کو بھی ختم کردیا۔

چینی سرمایہ کاری کی ادائیگی کا حجم 29 کروڑ 40 لاکھ ڈالر رہا جبکہ گزشتہ مالی سال کے دوران اس نے 92 کروڑ 90 لاکھ ڈالر کی سرمایہ کاری کی تھی۔

جن شعبوں میں رواں مالی سال کے دوران سرمایہ کاری کی گئی ان میں برقی آلات کی صنعت تھی جس میں تقریباً 813 فیصد اضافہ ہوا جو گزشتہ مالی سال کے ایک کروڑ 38 لاکھ ڈالر کے مقابلے میں بڑھ کر 12 کروڑ 66 لاکھ ڈالر ہوگیا۔

دوسرے نمبر پر جس شعبے میں سب سے زیادہ سرمایہ کاری ہوئی وہ ٹرانسپورٹ کا شعبہ تھا جس میں راوں مالی سال کے دوران 8 کروڑ 96 لاکھ ڈالر کی سرمایہ کاری ہوئی ہے جو گزشتہ مالی سال کے مقابلے میں تقریباً 663 فیصد زیادہ ہے۔

اسی طرح کیمیکل کے شعبے میں سرماریہ کاری کا حجم 11 کروڑ 39 لاکھ ڈالر رہا، جو گزشتہ مالی سال کے 2 کروڑ 76 لاکھ ڈالر سے 332 فیصد زیادہ ہے۔

فرماسوٹیکل سیکٹر میں رواں مالی سال 247 فیصد زائد سرمایہ دیکھنے میں آئی جو پہلے ایک کروڑ 47 لاکھ ڈلر تھی تاہم اب 5 کروڑ 50 لاکھ ڈالر ہے۔

ٹیکسٹائل سیکٹر میں گزشتہ مالی سال کے دوران 3 کروڑ 36 لاکھ ڈالر کی سرمایہ کاری دیکھنے میں آئی تاہم رواں برس اس میں 50 فیصد اضافہ ہوا جو اب بڑھ کر 5 کروڑ 40 لاکھ ڈالر ہوگئی۔

خیال رہے کہ گزشتہ 2 برس کے دوران پاور سیکٹری اور تعمیری سیکٹر پاکستان میں سرماریہ کاروں کے لیے مرکز نگاہ رہا ہے، تاہم اس کے مقابلے میں دیگر شعبوں میں سرمایہ کاری معمول سے بھی کم رہی تھی۔

تاہم اگر موجودہ اعداد و شمار کو سرمایہ کاری میں تبدیلی کے طور پر دیکھا جائے تو یہ مقامی صنعت کے دیگر شعبوں کے لیے حوصلہ افزا ہوسکتا ہے۔

پاور سیکٹر میں چینی سرمایہ کاری کی ادائیگی کے بعد تعمیراتی شعبے میں بھی سرمایہ کاری میں واضح کمی دیکھنے میں آئی ہے۔

اسلام آباد ( میڈیا 92 نیوز مانٹرنگ ڈیسک ) حکومت نے عالمی مالیاتی ادارے (آئی ایم ایف) سے ملک میں وفاق اور صوبائی آمدن کو بڑھانے کے لیے سنگل ویلیو ایڈڈ ٹیکس (وی اے ٹی) کے نفاذ پر رضامندی کا اظہار کردیا۔

ڈان اخبار کی رپورٹ کے مطابق حکومتی دستاویزات سے واضح ہوتا ہے کہ پاکستان کو آمدن بڑھانے کے لیے اضافی کوششیں کرنی ہوں گی جو ملکی مجموعی پیداوار (جی ڈی پی) کے 2.6 فیصد تک ہوگا۔

آئی ایم ایف پروگرام کے تحت تین سالہ اصلاحاتی عمل کے دوران وفاقی سطح پر ٹیکسز میں 2.3 فیصد تک اضافہ کیا جائے گا جو مجموعی طور پر 10 کھرب 80 ارب روپے تک ہوگا۔

ان ٹیکسز کو لاگو کرنے کا عمل آئندہ مالی سال 20-2019 سے کردیا جائے گا جس میں 1.1 فیصد اضافہ کیا جائے گا، اس کے بعد مالی سال 20-2021 میں 0.9 فیصد جبکہ 21-2022 میں 0.3 فیصد اضافہ کیا جائے گا۔

اس کے ساتھ ساتھ صوبائی سطح پر ٹیکسز کو بھی 0.1 فیصد سالانہ بنیادوں پر بڑھایا جائے گا تاکہ مالی سال 21-2022 میں 1.6 فیصد تک ٹیکس سے جی ڈی پی کے تناسب کو حاصل کیا جاسکے جو رواں مالی سال کے دوران 1.3 فیصد ہے۔

مذکورہ پیشرفت سے متعلق دستاویزات کے مطابق وسیع پیمانے پر ٹیکس اقدامات سے مختلف اہداف حاصل کرنے کی امید لگائی گئی تھی، جس میں انکم ٹیکس، سیلز ٹیکس اور فیڈرل ایکسائز ڈیوٹی پر اضافی ٹیکس کریڈٹ اور استثنیٰ کو ختم کرکے ٹیکس اخراجات میں واضح کمی کرنا شامل ہے جبکہ اس کے ساتھ سنگل ایڈڈ ویلیو ٹیکس (وی اے ٹی) کے نفاذ سے خصوصی طریقہ کار کو دور کیا جائے گا جبکہ شرح ٹیکس کو کم کیا جائے گا۔

اس حوالے سے حکام کا کہنا ہے کہ ان وسط مدتی مالیاتی تخمینے آئی ایم ایف پروگرام کے تحت سالانہ بنیادوں پر کلیدی اقدامات کے ممکنہ نتائج پر سامنے آئے ہیں۔

اگر حکومت پاکستان اورعالمی مالیاتی ادارہ معاہدے کے بعد پہلے مالی سال کے دوران جی ڈی پی کو 1.1 فیصد تک بڑھانے پر رضامندی کا اظہار کرتے ہیں تو اس سے 0.4 فیصد تک جی ڈی پی کا ایک بڑا حصہ متاثر ہوگا جو تقریباً 175 ارب روپے تک ہوسکتا ہے۔

تاہم اس پر قابو پانے کے لیے وی اے ٹی کا نفاذ ضروری ہوگا جو 0.3 فیصد کی بحالی میں معاون ثابت ہوگا جبکہ دیگر فرق ٹیکس میں دی جانے والی چھوٹ کے خاتمے سے پورا کیا جائے گا۔

اس حوالے سے فیڈرل بورڈ آف ریونیو کے حکام کا کہنا تھا کہ حکومت کی جانب سے دیگر پالیسی اور اصلاحاتی اقدامات میں بیکنگ سیکٹر پر لگائے جانے والے ود ہولڈنگ ٹیکس کی کمی شامل ہے جس کی وجہ سے بینکنگ سیکٹر پر منفی اثرات مرتب ہورہے ہیں اور یہ آمدن پر بھی اثرانداز ہورہے ہیں۔

ان کا یہ بھی کہنا تھا کہ حکومت کارپوریٹ ٹیکس ریٹ کو 29 یا 30 فیصد پر برقرار رکھنے اور فیڈرل ایکسائز ڈیوٹی پر اخراجات کو بڑھانے کی بھی خواہش مند ہے۔

کراچی (میڈیا 92 نیوز آن لائن ) ٹویوٹا انڈس موٹرز کمپنی نے کرولا اور مختلف گاڑیوں کی قیمتوں میں اضافے کا اعلان کیا ہے۔

پرو پاکستانی کی ایک رپورٹ کے مطابق پاکستانی روپے کی قدر میں کمی سے گاڑی کی تیاری پر آنے والی لاگت کا بوجھ کمپنی نے صارفین پر منتقل کردیا ہے اور قیمتوں میں 3 لاکھ 7 ہزار روپے تک اضافہ کردیا ہے۔

انڈس موٹرز کی جانب سے یہ رواں سال تیسری بار کیا جانے والا اضافہ ہے۔

کمپنی کی جانب سے کم از کم اضافہ 64 ہزار جبکہ زیادہ سے زیادہ 3 لاکھ 7 ہزار ایک سو روپے تک کیا گیا ہے۔

گاڑیوں کی نئی قیمتیں اب کچھ اس طرح ہیں جن کا اطلاق 20 اپریل سے ہوگا:

کرولا ایکس ایل آئی کی قیمت اب 20 لاکھ 44 ہزار روپے سے بڑھا کر 21 لاکھ 9 ہزار روپے کر دی گئی ہے۔

کرولا ایکس ایل آئی اے ٹی کو اگر پہلے 21 لاکھ 19 ہزار روپے میں خریدا جاسکتا تھا تو اب اس کے لیے 21 لاکھ 84 ہزار روپے خرچ کرنا ہوں گے۔

کرولا جی ایل آئی اب 22 لاکھ 99 ہزار روپے کی بجائے 23 لاکھ 64 ہزار روپے میں دستیاب ہوگی۔

کرولا جی ایل آئی اے ٹی کی قیمت پہلے 23 لاکھ 74 ہزار روپے تھی جو اب 65 ہزار کے اضافے سے 24 لاکھ 39 ہزار روپے ہوگئی ہے۔

کرولا الٹس 1.6 کو خریدنے کے لیے اب آپ کو 25 لاکھ 74 ہزار کی بجائے 26 لاکھ 74 ہزار روپے خرچ کرنا ہوں گے۔

کرولا الٹس 1.8 ایم ٹی کے لیے اب 29 لاکھ 57 ہزار 900 روپے کی بجائے 30 لاکھ 69 ہزار روپے خرچ کرنا ہوں گے۔

کرولا الٹس 1.8 سی وی ٹی کی قیمت 30 لاکھ 95 ہزار 400 روپے سے بڑھا کر 32 لاکھ 5 ہزار روپے کردی گئی ہے۔

کرولا گرینڈ ایم ٹی ایس آر کی قیمت میں ایک لاکھ 9 ہزار روپے کا اضافہ ہوا ہے اور یہ اب 31 لاکھ 50 ہزار 400 روپے کی بجائے 32 لاکھ 60 ہزار روپے میں دستیاب ہوگی۔

کرولا گرینڈ سی وی ٹی ایس آر بھی ایک لاکھ 10 ہزار روپے اضافے سے 32 لاکھ 98 ہزار 900 روپے سے بڑھ کر 34 لاکھ 9 ہزار روپے ہوگئی ہے۔

ہیلکس 4×2سنگل کیب ڈیک لیس کی قیمت 27 لاکھ 39 ہزار روپے سے بڑھ کر 28 لاکھ 19 ہزار روپے ہوگئی ہے۔

ہیلکس4×2 ایس سی اسینڈرڈ کی قیمت 29 لاکھ 94 ہزار روپے سے بڑھ کر 30 لاکھ 74 ہزار روپے ہوگئی ہے۔

ہیلکس 4×2 سنگل کیب کے لیے اب 30 لاکھ 24 ہزار روپے کی بجائے 31 لاکھ 4 ہزار روپے خرچ کرنا ہوں گے۔

ہیلکس 4×4 اسینڈرڈ 41 لاکھ 99 ہزار سے چھلانگ کر 43 لاکھ 29 ہزار روپے کی ہوگئی ہے۔

ہیلکس ڈبل کیب اسینڈرڈ کی قیمت 45 لاکھ 89 ہزار روپے سے بڑھا کر 47 لاکھ 19 ہزار روپے کردی گئی ہے۔

ریوو جی 2.8 کی قیمت 48 لاکھ 59 ہزار روپے سے بڑھ کر 50 لاکھ 9 ہزار روپے ہوگئی ہے۔

ریوو جی اے ٹی 2.8 کی پرانی قیمت 50 لاکھ 89 ہزار روپے تھی جو اب بڑھا کر 52 لاکھ 39 ہزار روپے کردی گئی ہے۔

ریوو وی اے ٹی 2.8 کی قیمت اب 54 لاکھ 9 ہزار روپے کی بجائے 55 لاکھ 59 ہزار روپے ہوگی۔

فورچنر4×2 ہائی پٹرول کی قیمت 70 لاکھ 38 ہزار 900 روپے سے بڑھ کر 72 لاکھ 99 ہزار روپے ہوگئی ہے۔

فورچنر4×4 ڈیزل اب 75 لاکھ 11 ہزار 900 روپے کی بجائے 78 لاکھ 19 ہزار روپے میں دستیاب ہوگی۔

کراچی:(ایمرا نیوزآن لائن) کراچی چیمبر آف کامرس اینڈ انڈسٹری نے وفاقی وزیر خزانہ اسد عمرکے اچانک استعفے پر تشویش کا اظہار کیا ہے۔کراچی چیمبر آف کامرس اینڈ انڈسٹری نے وفاقی وزیر خزانہ اسد عمرکے اچانک استعفے پر تشویش کا اظہار کرتے ہوئے کہا ہے کہ وزیر خزانہ کا استعفیٰ پاکستان کے جاری حالات کے تناظر میں درست نہیں۔

بزنس مین گروپ کے چیئرمین سراج تیلی اورکراچی چیمبر کے صدرجنید ماکڈاکاکہنا تھاکہ بطور وزیر خزانہ اسد عمر کو معاشی بحران کے لیے اکیلا ذمے دار نہیں ٹھہرایا جا سکتا ہے۔ انہوں نے مطالبہ کیا کہ حکومت اب وزارت خزانہ کی پوری ٹیم، بیوروکریٹس و متعلقہ سیاست دانوں سے بھی استعفے طلب کرے۔

لاہور(میڈیا 92 نیوز آن لائن ) وزیراعظم عمران خان نے وزیر خزانہ اسد عمر کا استعفیٰ منظور کرتے ہوئے ڈاکٹر عبدالحفیظ شیخ کو مشیر خزانہ تعینات کر دیا ہے۔

ڈاکٹر عبدالحفیظ شیخ سندھ کے علاقے جیکب آباد میں پیدا ہوئے۔ ان کے والد عبدل نبی شیخ پاکستان پیپلز پارٹی کے بانی ارکان میں سے تھے۔ وہ اقتصادی پالیسی سازی اور عمل درآمد کا وسیع تجربہ رکھتے ہیں۔

ڈاکٹر عبدالحفیظ شیخ نے ڈاکٹریٹ کی ڈگری بوسٹن یونیورسٹی امریکا سے حاصل کی اور ہارورڈ یونیورسٹی میں بطور پروفیسر خدمات انجام دیں۔ وہ 1990ء کے عشرے میں سعودی عرب میں ورلڈ بینک کے ڈائریکٹر اکنامک آپریشن تعینات رہے اور بینک کی طرف سے 21 ممالک میں خدمات سرانجام دیں۔

ڈاکٹر عبدالحفیظ شیخ 2003ء سے 2006ء تک وفاقی وزیر برائے نجکاری اور سرمایہ کاری رہے۔ 2000ء سے 2002ء تک سندھ کے وزیر برائے خزانہ اور منصوبہ بندی جبکہ 2010ء سے 2013ء تک پاکستان کے 20ویں وزیر خزانہ کہ ذمہ داریاں سرانجام دیتے رہے۔

ان کے کے دور وزارت میں 5 ارب ڈالر کی 34 نجکاری کی ٹرانزیکشن ہوئیں۔ ڈاکٹر عبدالحفیظ شیخ 2012ء میں پیپلز پارٹی کی طرف سے بہت متحرک رہے اور سینیٹر منتخب ہوئے۔

اسلام آباد(نیٹ نیوز) وفاقی وزیر خزانہ اسد عمر نے وزارت چھوڑنے کا فیصلہ کرلیا۔

وزیر خزانہ اسد عمر کو عہدے سے ہٹائے جانے سے متعلق خبریں پچھلے دنوں سرگرم تھیں تاہم اب اسد عمر نے سوشل میڈیا پر اس حوالے سے کہا کہ وہ کابینہ کا حصہ نہیں رہیں گے۔

اسد عمر نے کہا کہ کابینہ میں تبدیلی سے متعلق وزیراعظم کی خواہش ہے میں وزارت خزانہ چھوڑ کر توانائی کی وزارت لے لوں لیکن میں نے وزیراعظم کو اعتماد میں لیا ہے کہ میں کابینہ کا مزید حصہ نہیں رہوں گا۔

اسد عمر کا مزید کہنا تھا کہ میرا یقین ہے کہ عمران خان پاکستان کیلیے امید ہیں، ہم ان شااللہ نیا پاکستان بنائیں گے۔

کراچی: (ایمرا نیوزآن لائن) انٹر بینک اور اوپن مارکیٹ میں آج ڈالر کے ریٹ میں استحکام دیکھنے میں آیا، انٹر بینک میں ڈالر کی 141 روپے 40 پیسے، اوپن مارکیٹ میں 142 روپے 20 پیسے پر ٹریڈنگ ہوئی۔مارکیٹ میں آج کاروبار کے آغاز پر انٹر بینک اور اوپن مارکیٹ میں ڈالر مستحکم رہا، انٹر بینک میں ڈالر 141 روپے 40 پیسے پر ٹریڈ ہوا جبکہ اوپن مارکیٹ میں ڈالرکا 142 روپے 20 پیسے میں لین دین ہوا۔

تجزیہ کاروں کے مطابق آئی ایم ایف سے 8 ارب ڈالر تک معاہدہ طے پانے کے حکومتی اعلان کے بعد مارکیٹ میں اعتماد کی فضا قائم ہو گی اور سرمایہ کاروں میں انویسٹ کرنے سے متعلق ہچکچاہٹ کی بجائے مثبت رجحان فروغ پائے گا۔

لاہور(وقت آن لائن)فیڈرل بورڈ آف ریونیو (ایف بی آر) نے ٹاپ ٹیکس پیئرز کو اعزازی کارڈز جاری کرنے کا فیصلہ کیا ہے۔ذرائع کے مطابق ایف بی آر نے ٹاپ ٹیکس پیئرز کو اعزاز کارڈ جاری کرنے کا فیصلہ ٹیکس پیئرز کی حوصلہ افزائی کے لیے کیا ہے جسے 2 کٹیگریز میں تقسیم کیا گیا ہے۔ذرائع کا کہنا ہےکہ ایک کروڑ روپے سالانہ ٹیکس دینے والوں کو گولڈ کارڈ اور 50 لاکھ روپے سالانہ ٹیکس دینے والوں کو سلور کارڈ جاری کیے جائیں گے۔ذرائع کے مطابق اعزازی کارڈز کے ذریعے ٹاپ ٹیکس پیئرز کو سہولیات دی جائیں گی، اعزازی کارڈز رکھنے والوں کے لیے ائیرپورٹس پر الگ کاؤنٹر بنائے جائیں گے جبکہ ان افراد کو وی آئی پی پروٹوکول بھی دیا جائے گا۔ذرائع نے بتایا کہ ایف بی آر نے اعزازی کارڈز کے لیے متعلقہ وزارتوں کو خط بھی لکھ دیے ہیں۔

اسلام آباد(ایمرا نیوز آن لائن)
مارچ 2019 کے اختتام پر تھری اور فور جی صارفین کی تعداد 66.14 ملین تک پہنچ گئی ہے جبکہ مارچ کے دوران ملک میں موبائل فون صارفین کی تعداد میں 2.104 ملین کا اضافہ ہوا ہے۔پاکستان ٹیلی کمیونیکیشن اتھارٹی (پی ٹی ای) کے اعدادوشمار کے مطابق فروری2019 کے اختتام پر موبائل فون صارفین کی تعداد156.92 ملین تھی جو مارچ2019 کے اختتام پر2 ملین سے زائد کے اضافہ سے 159.024 ملین صارفین تک بڑھ گئی ہے۔ رپورٹ کے مطابق اس وقت پاکستان میں تھری اور فور جی کی سہولیات سے استفادہ کرنے والے صارفین کی تعداد 6 کروڑ61 لاکھ40 ہزار سے تجاوز کرچکی ہے.

کراچی:(ایمرا نیوزآن لائن) مقامی ادویہ ساز کمپنیوں نے حکومت کی جانب سے395 دواؤں کی قیمتوں میں کمی کو تسلیم کرتے ہوئے فوری طورپر موثر بہ عمل کرنے کا اعلان کردیا۔پاکستان فارماسیوٹیکل مینوفیکچررز ایسوسی ایشن کے صدر زاہد سعید نے قیصر وحید اوردیگر کے ہمراہ پریس کانفرنس سے خطاب کے دوران دواؤں کی قیمتوں میں کمی کو تسلیم کرتے ہوئے اعلان کیا، انھوں نے کہا کہ 464ضروری دوائیں بغیرکسی منافع کے پیداواری لاگت پر فروخت کی جائیں گی۔

زاہد سعید نے کہا کہ گزشتہ ڈیرھ سال میں ڈالر کی قدر104سے بڑھ کر143روپے اورشرح سودمیں6 فیصداضافے سے فارماانڈسٹری کی پیداواری لاگت 35 سے40فیصد بڑھ گئی ہے، دواؤں کی قیمتوں میں 200 فیصد اضافے کا تاثر غلط ہے کیونکہ جن چند دواؤں کی قیمتوں میں200فیصد اضافہ کیاگیا ہے وہ درآمدہ ہیں اور پاکستان میں نہیں بنتیں،45ہزار دواؤں کی قیمتوں میں صرف15فیصد جبکہ صرف 105دواؤں میں50فیصد کا اضافہ کیا گیا، انہوں نے کہا کہ حکومت جنوری2018 والی معیشت لوٹادے توفارماانڈسٹری قیمتوں میں اضافے کے مطالبے سے دستبردارہوجائیگی۔

انھوں نے بتایا کہ فارما انڈسٹری نے وزیرصحت کے دباؤ پرناقابل پیداوار464ادویہ کی قیمتوں میں رضاکارانہ طورپر کمی کی ہے، ادویہ کے نئے اسٹاک کی فراہمی آئندہ15یوم میں مکمل کرلیاجائے گا۔