Category بزنس

اسلام آباد:(ایمرا نیوزآن لائن) عالمی بینک نے پاکستان میں جاری اصلاحات کا خیرمقدم کیا ہے۔عالمی بینک نے پاکستان میں جاری اصلاحات کو سراہتے ہوئے پاکستان کے ساتھ بھرپور تعاون کی یقین دہانی کروائی ہے۔ یہ یقین دہانی عالمی بینک کے نئے صدر نے آئی ایم ایف و عالمی بینک کے سالانہ اجلاس کے موقع پر وفاقی وزیر خزانہ اسد عمر سے ہونیوالی سائیڈ لائن ملاقات میں کروائی ہے۔وزیر خزانہ کے دورہ واشنگٹن کی مصروفیات بارے جاری کردہ تفصیلات کے مطابق وزیر خزانہ اسد عمر نے اپنے وفد کے ہمراہ آئی ایم ایف و عالمی بینک سمیت دیگر اہم حکام سے ملاقاتیں کی ہیں۔

اسلام آباد (میڈیا 92 نیوز آن لائن ) وزیر خزانہ اسد عمر نے کہا ہے کہ آئی ایم ایف کے ساتھ پروگرام جلد مکمل ہو جائے گا، آئی ایم ایف کی شرائط سے پہلے ہی بنیادی تبدیلیاں کی جا چکی ہیں اور اگلا کام بنیادی ڈھانچے میں اصلاحات کا ہے، ہم پاکستان میں بنیادی ڈھانچے کی اصلاحات پر کام کررہے ہیں ۔

وزیر خزانہ اسد عمر جو اس وقت امریکہ کے دورے پر ہیں‘ نےواشنگٹن میں میڈیا سے گفتگو کی ہے۔

وزیر خزانہ کا کہنا تھا کہ خطرناک حد تک ادائیگیوں کے توازن کا بحران تھا جس سے نمٹنے کے لیے اقدامات کیے اور قیمتوں میں اضافے سے متعلق اقدامات پہلے ہی کیے جا چکے ہیں، ہم نے آپشنز پیدا کیے تھے اس لیے فوری طور پر آئی ایم ایف سے معاہدہ نہیں کیا، معیشت میں ایسے اقدامات کرنے پڑتے ہیں۔

اسد عمر نے کہا کہ پہلے آئی ایم ایف کی تجاویز پاکستان کی معیشت کے لیے بہتر نہیں تھیں، اس لیے اُس وقت تک معاہدہ نہیں کیا جب تک وہ ہمارے سامنے ایسی تجاویز نہ رکھے جوہماری معیشت کی بہتری کے لیے ہوں۔

وزیر خزانہ نے بتایا کہ فروری میں کرنٹ اکاؤنٹ ڈیفیسٹ یعنی جاری کھاتوں کا خسارہ پچھلے سال کے مقابلے میں 72 فیصد کم تھا اور ہر ماہ تجارتی خسارے میں کمی آرہی ہے اور قلیل مدتی فنانسنگ کا بھی انتظام کرلیا ہے، آئی ایم ایف پروگرام معیشت کو بہتری کی طرف لے جا سکےگا۔

ان کا کہنا تھا کہ علاقائی تجارت سے خطے کے عوام کی بہتری ہوگی، بھارت کے ساتھ دوطرفہ مسائل اور تجارت پر بات چیت کا ارادہ ہے، امید ہے بھارت میں آنے والی نئی حکومت پاکستان کے ساتھ بیٹھے گی۔

اسد عمر نے کہا کہ ترکی کے ساتھ اسٹریٹکجک اکنامک فریم ورک کا ڈرافٹ تیار کرلیا جس پر ایک ماہ میں دستخط کریں گے جب کہ ترکمانستان کے ساتھ گیس پائپ لائن معاہدہ ہوچکا ہے، آج افغانستان کے وزیرخزانہ اور تاجکستان کے نائب وزیر خارجہ سے ملاقات ہوئی، دونوں ممالک کے ساتھ تجارت بڑھا سکتے ہیں۔

وزیر خزانہ اسد عمر نے کہا ہے کہ ان کے استعفے کی باتیں غلط ہیں وہ کہیں نہیں جارہے۔

گفتگو کے دوران ایک صحافی نے ان کے استعفے سے متعلق افواہوں سے متعلق سوال کیا تو انہوں نے اس کا جواب مرزا اسد اللہ خان غالب کے ایک شعر کا مصرعہ پڑھ کر دیا:

’ہزاروں خواہشیں ایسی کہ ہر خواہش پہ دم نکلے‘

اسد عمر نے کہا کہ وزیراعظم کے بغیر بیرون ملک جاتا ہوں تو ایسی باتیں کی جاتی ہیں تاہم وہ کہیں نہیں جارہے، وزیراعظم عمران خان نے کہا تھا کہ پاکستان کو تمہاری ضرورت ہے۔

وزیرخزانہ اسد عمر کی واشنگٹن میں عالمی مالیاتی اداروں کے وفود سے ملاقاتیں

وزیرخزانہ اسد عمر کی واشنگٹن میں عالمی مالیاتی اداروں کے وفود سے ملاقاتیں جاری ہیں ۔وزات خزانہ حکام کے مطابق وزیرخزانہ اسد عمر نے ایشیائی ترقیاتی بینک کے صدر تاکی ہیکو ناکائو کے ساتھ ملاقات کی ۔

ملاقات میں اسد عمر نے صدر اے ڈی بی کو پاکستان کی موجودہ میکرواکنامک صورتحال سے آگاہ کیا۔ ایشیائی ترقیاتی بنک کے صدر تاکی ہیکو ناکائو نے پاکستان میں اصلاحاتی نظام کو سراہا۔صدر اے ڈی بی نے کہا کہ وہ پاکستان کے ساتھ تعاون جاری رکھیں گے۔

وزیرخزانہ اسد عمر کی ورلڈ بینک کے وفد سے بھی ملاقات ہوئی ہے ۔ ملاقات کے دوران جاری منصوبوں پر تبادلہ خیال کیا گیا ۔
وزیرخزانہ اسد عمر کی ورلڈ بینک انوسٹمنٹ گارنٹی ایجنسی کے وفد سے بھی ملاقات ہوئی ہے ۔ ملاقات میں وزیرخزانہ نے ورلڈ بنک انوسٹمنٹ گارنٹی ایجنسی کے وفد کوحکومت کی نجکاری پالیسی سے آگاہ کیا۔وزیر خزانہ اسد عمر نے پبلک پرائیویٹ پارٹنر شپ فریم ورک میں توسیع پر بھی بات کی۔

وزیر خزانہ اسد عمر کی امریکی محکمہ خزانہ کے حکام سے بھی ملاقات ہوئی ہے۔
اسد عمر نے سعودی ہم منصب محمد الجدان سے بھی ملاقات کی ہے۔ ملاقات میں دوطرفہ امور اور باہمی دلچسپی کے امور پر تبادلہ خیال کیا گیا۔

لاہور (میڈیا 92 نیوز آن لائن ) سام سنگ کے یہ فلیگ شپ فونز 20 فروری کو سان فرانسسکو میں ایک ایونٹ کے دوران متعارف کرائے گئے جبکہ پاکستان میں گزشتہ ماہ فروخت کے لیے پیش کیے گئے۔

اس وقت گلیکسی ایس 10 کی قیمت ایک لاکھ 64 ہزار 999 روپے جبکہ ایس پلس کی ایک لاکھ 79 ہزار 999 روپے رکھی گئی تھی۔
مگر ایک ماہ بعد ہی سام سنگ نے دونوں فونز کی قیمتوں میں کمی کا اعلان اس وقت کیا ہے جب ہواوے پی 30 پرو کو جلد پاکستان میں فروخت کے لیے پیش کیا جارہا ہے۔
سام سنگ کی جانب سے سوشل میڈیا پر ان فونز کی قیمتوں کی کمی کا اعلان کیا گیا۔

اس وقت پاکستان میں ایس 10 اور ایس 10 پلس کے 8 جی بی ریم اور 128 جی بی اسٹوریج والے ورژن دستیاب ہیں۔
سام سنگ نے گلیکسی ایس 10 کی قیمت 25 ہزار روپے کمی سے ایک لاکھ 40 ہزار جبکہ ایس 10 پلس کی قیمت 20 ہزار روپے کمی سے ایک لاکھ 60 ہزار روپے کردی ہے۔
یہ فونز گزشتہ سال کے گلیکسی ایس نائن سیریز کے فونز کے مقابلے میں کچھ بڑے ہیں، گلیکسی ایس 10 میں 6.1 انچ ڈسپلے، 3 بیک کیمروں کا سیٹ اپ اور ایک سیلفی کیمرا دیا گیا ہے۔

گلیکسی ایس 10 پلس میں 6.4 انچ ڈسپلے ہول پنچ ڈوئل کیمرا سیٹ اپ موجود ہے، یہ دونوں فون گزشتہ سال کے گلیکسی ایس 9 کی طرح واٹر ریزیزٹنٹ اور ڈسٹ پروف ہے۔
گلیکسی ایس 10 میں 3400 ایم اے ایچ جبکہ گلیکسی ایس 10 پلس میں 4100 ایم اے ایچ بیٹری دی گئی ہے ، جو کہ کسی بھی گلیکسی ایس فون میں اب تک کی سب سے طاقتور بیٹری ہے۔

دونوں فونز میں کوالکوم اسنیپ ڈراگون 855 پراسیسر اور بیک پر 3 کیمروں کا سیٹ اپ ہے، جن میں سے ایک 16 میگا پکسل الٹرا وائیڈ اینگل لینس ہے، دوسرا 12 میگا پکسل وائیڈ اینگل جبکہ تیسرا 12 میگا پکسل ٹیلی فوٹو کیمرا ہے۔
دونوں میں وائرلیس چارجنگ کا فیچر بھی موجود ہے بلکہ اس سے دیگر ڈیوائسز کو بھی وائرلیس چارج کیا جاسکتا ہے۔

اسلام آباد (ایمرا نیوزآن لائن) : بیرون ملک مقیم پاکستانیوں نے اپنا پیسہ وطن پر نچھاور کر دیا ۔ تفصیلات کے مطابق پاکستان تحریک انصاف کی وفاقی حکومت کو بڑے تجارتی خسارے کے باعث ڈالرز کی کمی کا سامنا ہے۔ اسی کے پیش نظر موجودہ حکومت کی جانب سے دوست ممالک چین، سعودی عرب اور متحدہ عرب امارات کے علاوہ آئی ایم ایف سے قرض حاصل کرنے کی کوشش کی جا رہی ہے۔ایسے حالات میں اب اسٹیٹ بینک آف پاکستان کی جانب سے جاری کی گئی ایک خصوصی رپورٹ میں کہا گیا کہ اسٹیٹ بینک آف پاکستان نے ترسیلات زر کے حوالے سے رپورٹ جاری کی ہے۔ جس میں بتایا گیا کہ رواں سال ترسیلات زر میں ریکارڈ اضافہ ہوا ۔ اسٹیٹ بینک کی جانب سے جاری رپورٹ میں کہا گیا کہ رواں سال بیرون ممالک مقیم پاکستانیوں نے گذشتہ برس کے مقابلے میں زائد رقوم پاکستان بھیجیں۔گذشتہ 9 ماہ کے دوران بیرون ممالک مقیم پاکستانیوں کی جانب سے 16 ارب ڈالرز سے زائد کی رقوم پاکستان بھیجی گئی ہیں۔ ریکارڈ تعداد میں غیر ملکی کرنسی موصول ہونے سے حکومت پر بیرونی ادائیگیوں کا بوجھ کسی حد تک کم ہوا ہے۔ اس حوالے سے حکومت کا کہنا تھا کہ بیرون ممالک مقیم پاکستانیوں کو زیادہ سے زیادہ سہولیات اور معاونت فراہم کرنے کی کوشش کی جا رہی ہے۔
ہماری کوشش ہے کہ بیرون ممالک مقیم پاکستانیوں کی ضروریات کا زیادہ سے زیادہ خیال رکھا جائے، تاکہ پھر اپنی حکومت سے مطمئن ہو کر پاکستانیوں کی جانب سے زیادہ سے زیادہ رقوم پاکستان بھیجی جائیں۔ بیرون ممالک مقیم پاکستانیوں کی جانب سے زیادہ تعداد میں رقوم پاکستان بھیجے جانے سے حکومت کو بیرونی قرضوں پر زیادہ انحصار نہیں کرنا پڑے گا۔ واضح رہے کہ پاکستان تحریک انصاف کی حکومت آنے کے بعد وزیراعظم عمران خان نے اپنے خطاب میں بھی اوورسیز پاکستانیوں سے ملک میں ڈالر بھیجنے کی درخواست کی تھی۔

واشنگٹن (میڈیا 92 نیوز آن لائن ) عالمی بینک کے صدر ڈیوڈ مالپاس نے پاکستان میں جاری اصلاحات کے عمل کو سراہا اور پاکستان کی معاونت جاری رکھنے کی یقین دہانی بھی کرائی۔
وزیر خزانہ اسد عمر عالمی مالیاتی ادارے (آئی ایم ایف) اور عالمی بینک کے موسم بہار کے اجلاس میں شرکت کے لیے واشنگٹن میں موجود ہیں جہاں انہوں نے حکام سے ملاقاتیں کیں۔
وزیر خزانہ اسد عمر نے عالمی بینک کے صدر ڈیوڈ مالپاس سے ملاقات کے دوران انہیں پاکستانی کی میکرو اکنامک صورتحال سے آگاہ کیا اور اس موقع پر پاکستان اور عالمی بینک کے درمیان جاری منصوبوں پر تبادلہ خیال کیا گیا۔
وزیر خزانہ نے آئی ایم ایف کی ڈپٹی مینجمنٹ ڈائریکٹر ڈیوڈ لپٹن سے بھی ملاقات کی، اس موقع پر پاکستان اور آئی ایم ایف کے درمیان جاری مذاکرات پر گفتگو کی گئی۔
وزیر خزانہ اسد عمر کے ہمراہ گورنر اسٹیٹ بینک طارق باجوہ، خزانہ اور اقتصادی امور کے سیکرٹریز بھی ہیں۔
اسد عمر نے امریکا پاکستان بزنس کونسل کے ممبران سے بھی ملاقات کی جس میں ملٹی نیشنل کمپنیز کے حکام بھی شریک تھے جب کہ حکام نے پاکستان میں اپنے مستقبل کے منصوبوں اور ان پر پاکستان کی مدد پر گفتگو کی جب کہ کئی ملٹی نیشنل کمپنیز نے پاکستان میں کام کرنے کے لیے دلچسپی کا بھی اظہار کیا۔
اس موقع پر وزیر خزانہ اسد عمر کا کہنا تھا کہ پاکستان کاروبار کرنے والوں کے لیے آسانیاں پیدا کر رہا ہے اور وزیراعظم عمران خان اصلاحاتی عمل کی خود نگرانی کررہے ہیں۔

100 انڈیکس تین سال کی نچلی ترین سطح پر ریکارڈ
کراچی (میڈیا 92 نیوز آن لائن ) کراچی اسٹاک مارکیٹ میں سب کچھ ڈوب گیا ۔ تفصیلات کے مطابق 100 انڈیکس گذشتہ تین سال کی نچلی ترین سطح پر پہنچ گیا۔ 550 پوائنٹس کی کمی کے ساتھ 36500 پر آگیا۔ اسد عمر یقین دلا رہے ہیں کہ معیشت بہتر ہو جائے گی لیکن سرمایہ کار ماننے کو تیار نہیں ہیں۔ ماہر معاشیات کا کہنا ہے کہ اسٹاک مارکیٹ کی یہ صورتحال کافی تشویشناک ہے ۔
محمد سہیل کا کہنا تھا کہ حکومت نے تیل اور گیس کے ذخائر کے سہارے سرمایہ کاروں کو کافی یقین دہانی کروانے کی کوشش کی ہے لیکن سرمایہ کار کسی طور ماننے پر تیار نہیں ہیں۔ سرمایہ کاروں کا کہنا ہے کہ صرف دعووں اور وعدوں سے کچھ نہیں ہو گا۔ جب تیل اور گیس کے ذخائر دریافت ہو جائیں گے ، تب کی تب دیکھیں گے۔ موجودہ معاشی صورتحال اور اسٹاک ایکسچینج میں مندی کی وجہ سے حکومت اور سرمایہ کاروں کے مابین بھی دوری پیدا ہو گئی ہے اور سرمایہ کار اب کسی طرح بھی حکومت پر یقین کرنے کو تیار نہیں ہیں کیونکہ مارکیٹ میں ایک غیر یقینی صورتحال ہے۔

یاد رہے کہ آج عالمی مالیاتی فنڈ آئی ایم ایف نے پاکستان کے حوالے سے اہم انکشافات کیے۔ آئی ایم ایف کے مطابق پاکستان کے معاشی حالات ابھی مزید خراب ہوں گے اور آئندہ مالی سال میں بھی پاکستان کی معیشت میں بہتری آنے کا کوئی امکان نہیں ہے۔ آئی ایم ایف نے اس بات کا انکشاف کیا کہ آنے والے وقتوں میں پاکستان میں بے روزگاری میں اضافہ ہوگا۔ پاکستان کی شرح ترقی 2.9 فیصد رہے گی۔
آئندہ مالی سال میں بھی معیشت میں بہتری ممکن نہیں ہے۔ 2024ء میں شرح نمو 2.5 فیصد سے بھی کم رہنے کا امکان ہے۔ پاکستان میں 2019ء میں مہنگائی کی شرح میں 7.6 فیصد اضافہ ہوگا۔ 2019ء میں بے روزگاری میں6.1 فیصد اضافہ ہوگا۔ جبکہ 2020ء میں بے روز گاری کی شرح 6.2 فیصد سے بڑھ جائے گی۔ پاکستان میں مہنگائی کی شرح میں مزید اضافہ ہوگا۔ 2020ء تک مہنگائی کی شرح 9.3 فیصد سے بھی بڑھ جائے گی۔
پاکستانی برآمدات سال 2019ء میں 6.6 فیصد کم ہوں گی۔ 2020ء میں مزید کم ہوجائیں گی۔ آئی ایم ایف کے مطابق 2024ء تک بیرونی ادائیگیوں کا توازن 65 ارب ڈالر تک پہنچ جائے گا۔ تیل کی قیمتوں میں عدم توازن اور خطے میں بدلتی صورتحال کا اثر پاکستان پر بھی ہوگا۔ جس کے پیش نظر پاکستان سمیت جنوبی ایشیائی ممالک کو اپنی پالیسیوں پر نظرثانی کرنا ہوگی۔

حکومتی اقدام سے رشوت کی شرح میں اضافہ ہوگیا ، زیادہ بدعنوان ممالک نے کم ٹیکس جمع کیا ، لوگ اس سے بچنے کیلئے رشوت ادا کرتے ہیں ،کک بیکس کی ادائیگی کیلئے ٹیکس میں ڈیزائن کی گئی خامیاں شامل ہوتی ہیں ، رپورٹ
واشنگٹن(ایمرا نیوز آن لائن )آئی ایم ایف نے ایک حالیہ تحقیق میں کہا ہے کہ پاکستان میں کارکردگی کی بنیاد پر ٹیکس حکام کی تنخواہوں کی وجہ سے ٹیکس وصولی قابل ذکر حد تک بڑھی لیکن اس حکومتی اقدام سے رشوت کی شرح میں بھی اضافہ ہوگیا۔ آئی ایم ایف کی ‘حکومتوں میں بدعنوانی سے نمٹنے’ سے متعلق تحقیق میں 180 سے زائد ممالک کا جائزہ لیا گیا اور یہ بات سامنے آئی زیادہ بدعنوان ممالک نے کم ٹیکس جمع کیا کیونکہ لوگ اس سے بچنے کے لیے رشوت ادا کرتے ہیں، جس میں کک بیکس کی ادائیگی کے لیے ٹیکس میں ڈیزائن کی گئی خامیاں شامل ہوتی ہیں۔تحقیق میں یہ بات بھی سامنے آئی کہ جب ٹیکس دہندگان کو یہ لگتا ہے کہ اس کی حکومت بدعنوان ہے تو وہ ٹیکس کی ادائیگی سے بچنے کی زیادہ کوشش کرتا ہے۔آئی ایم ایف نے اپنی تحقیق میں پاکستان کی جانب سے کارکردگی کی بنیاد پر ٹیکس حکام کے لیے حالیہ مراعات کا جائزہ لیا جس میں پسندیدہ اور ناپسندیدہ نتائج دونوں شامل تھے۔تحقیق میں یہ پتہ چلا کہ ‘ پاکستان میں ٹیکس حکام کی کارکردگی کی بنیاد پر تنخواہوں نے (زیادہ سے زیادہ 50 فیصد) تک ٹیکس وصولی میں نمایاں اضافہ کیا جبکہ رشوت کی درخواستیں بھی 30 فیصد تک بڑھ گئیں’۔آئی ایم ایف کی جانب سے اس مسئلے سے نمٹنے کے لیے زائد اجرت کو نگرانی اور پابندیوں سے جوڑنے کی تجویز دی گئی۔
ساتھ ہی جارجیا میں اصلاحات کی مثال دیتے ہوئے بتایا کہ اس سے کرپشن میں نمایاں طور پر کمی اور ٹیکس ریونیو دوگنا سے زیادہ بڑھا جس سے 2003 سے 2008 کے درمیان جی ڈی پی کے 13 فیصد پوائنٹس میں اضافہ دیکھنے میں آیا۔1990 کی دہائی کے وسط سے کرپشن کے خلاف روندا کی اصلاحات سے ٹیکس آمدنی میں جی ڈی پی کے 6 فیصد پوائنٹس تک اضافہ ہوا۔کرپشن سے لڑنا اقوام متحدہ کے پائیدار ترقی کے مقاصد میں سے ایک ہے کیونکہ اس کا وسیع تصور ہے کہ بدعنوانی سے نمٹنا معاشی کارکردگی اور اقتصادی ترقی کے لیے اہم ہے۔آئی ایم ایف کی تحقیق بتاتی ہے کہ مجموعی طور پر کم کرپٹ حکومتیں ان ممالک کے مقابلے میں ٹیکس آمدنی میں جی ڈی پی کا 4 فیصد زیادہ جمع کرتی ہیں جو کرپشن کی بلند سطح کے ساتھ اسی سطح کی اقتصادی ترقی کی شرح پر ہوں۔ساتھ ہی اس بات کی نشاندہی کی گئی کہ کرپشن حکومتی ترجیحات کو بھی مسخ کردیتی ہے۔آئی ایم ایف کی جانب سے یہ بھی کہا گیا کہ کرپشن لوگوں کو ملک کی قدرتی وسائل سے بننے والی رقم کے مکمل فائدے سے مستفید ہونے سے بھی روکتی ہے کیونکہ تیل یا کان کنی کی تلاش سے بڑا منافع ہوتا ہے اور یہ کرپشن کے لیے ایک مضبوط رغبت پیدا کرتا ہے۔عالمی ادارے کی تحقیق یہ ظاہر کرتی ہے کہ وسائل سے مالا مال ممالک میں عموما کمزور ادارے اور زیادہ کرپشن ہوتی ہے۔

اسلام آباد(ایمرا نیوز آن لائن)رواں مالی سال کے ابتدائی9 ماہ کے دوران تجارتی خسارہ میں 14 فیصد کمی واقع ہوئی ہے اور تجارتی خسارہ 27 ارب 29 کروڑ ڈالر سے کم ہو کر23 ارب 45 کروڑ ڈالر رہا ہے۔ وزارت تجارت کے مطابق حکومت کی طرف سے ٹھوس پالیسی اقدامات، توانائی کی صورتحال میں بہتری، اقتصادی استحکام کےلئے کی جانے والی کوششوں اور مختلف درآمدی اشیاء پر ڈیوٹی کے نفاذ کی وجہ سے درآمدات میں کمی کا رجحان ہے اور جولائی 2018ء سے مارچ 2019ء کے دوران تجارتی خسارے میں 3 ارب 84 کروڑ ڈالر کی کمی معاشی صورتحال کو بہتر بنانے میں مدد گار ثابت ہوسکتی ہے جبکہ رواں مالی سال کے اختتام تک گزشتہ مالی سال کے مقابلہ میں تجارتی خسارے کا حجم 5 سے 7 ارب ڈالر کم رہنے کا امکان ہے۔مارچ 2018ء میں گزشتہ مالی سال کے اس ماہ کے مقابلہ میں تجارتی خسارہ میں 37.74 فیصد کمی ریکارڈ کی گئی ہے اور یہ 3 ارب 10 کروڑ ڈالر سے کم ہو کر ایک ارب 93 کروڑ ڈالر تک آگیا ہے۔ رواں مالی سال کے ابتدائی 9 ماہ کے دوران درآمدات کا حجم 40 ارب 66 کروڑ ڈالر ریکارڈ کیاگیا جو کہ گزشتہ مالی سال کے اسی عرصہ میں 44 ارب 32 کروڑ ڈالر تھا۔ رواں مالی سال کے دوران درآمدی حجم گزشتہ مالی سال کے اس عرصہ کے مقابلہ میں 8.25 فیصد کم ہے۔ رواں مالی سال کے ابتدائی 9 ماہ کے دوران برآمدات کا حجم 17 ارب 21 کروڑ ڈالر رہا جو کہ جولائی 2017ء سے مارچ 2018ئ کے عرصہ کے دوران 17 ارب 3 کروڑ ڈالر تھا۔

کراچی( ایمرا نیوز آن لائن) عالمی بینک نے پاکستانی معیشت پر رپورٹ جاری کر دی ہے، رپورٹ میں امکان ظاہر کیا گیا ہے کہ اگلے سال پاکستان کی شرح نمو2.7 فیصد تک سکڑنے کا خدشہ ہے جبکہ رواں سال پاکستان کی شرح نمو3.4 فیصد تک رہنے کا امکان ہے۔عالمی بینک کے مطابق پاکستان کی سروسز سیکٹر کی شرح نمو میں 4.4 فیصد کمی کا امکان ہے تاہم اس سے پاکستان میں غیر ملکی مصنوعات کی کھپت میں کمی آئے گی اور برامدات میں بتدریج اضافہ ہو گا۔ رپورٹ کے مطابق زرعی اور صنعتی شعبے کی شرح نمو رواں سال کافی حد تک کم ہو گی۔ عالمی بینک نے کہا ہے کہ اگر پاکستان میں ہنگامی اصلاحات نافظ کی جائیں تو 2021 تک پاکستانی معیشت کی شرح نمو 4 فیصد تک بڑھ سکتی ہے۔ عالمی بینک کے مطابق رواں سال ملکی معیشت کی شرح نمو 3.4 فیصد رہنے کا امکان ہے جبکہ ایشیائی ترقیاتی بینک نے اپنی رپورٹ میں یہ شرح نمو 3.9 فیصد رہنے کا امکان ظاہر کیا ہے۔ پاکستان میں غیر ملکی سرمایہ کاری آنے کے باوجود معیشت گراوٹ کا شکار ہے اور اسکی وجہ ملکی صورتحال ہے تاہم حکومت اس ضمن میں اہم اقدامات کر رہی ہے اور2021 تک ملکی معیشت میں بہتری کی امید کی جارہی ہے، اس سے پہلے حکومت نے بھی یہی کہا تھا کہ دو سے ڈھائی سال تک پاکستان کی معیشت ترقی کرنے لگے گی۔

سی پیک کے دوسرے مرحلے سے صنعتی ترقی تعاون کو فروغ ملے گا‘عبدالرزاق داؤد
تیار مال کی پیداوار اولین ترجیح ہے ‘تجارتی خسارہ کم کرنے میں مدد ملے گی،
بزنس کونسل اجلاس سے خطاب
اسلام آباد(ایمرا نیوز آن لائن) وزیر اعظم کے مشیر برائے تجارت، صنعت اور سرمایہ کاری عبدالرزاق داؤد نے کہا ہے کہ پاک چین اقتصادی راہداری (سی پیک) کے دوسرے مرحلے کے لیے اسٹیج اب صنعتی تعاون کے لیے مقرر کیا گیا ہے، جس سے نجی سرمایہ کاری کو اپنی طرف متوجہ کرنے اور ملک کی برآمدات کو فروغ دینے میں مدد ملے گی۔ سرمایہ کاری بورڈ (بی او آئی) کے تحت سی پیک بزنس کونسل کے پہلے اجلاس میں وزیراعظم کے مشیر تجارت ،صنعت اور سر مایہ کاری عبدالرزاق داود نے کہا کہ ہم اب سی پیک کے دوسرے مرحلے میں ہیں ،جہاں صنعت کاری اور زرعی ترقی موجودہ حکومت کا اہم اہداف ہوں گے۔انہوں نے کہا کہ خصوصی اقتصادی زونز (ایس ای زیس) گزشتہ کچھ دہائیوں سے دنیا بھر کی کئی ترقی پذیر ریاستوں کے لیے ترقی کا انجن رہا ہے اور یہ پاکستان کے لیے بہتر وقت ہے کہ وہ اپنے خصوصی اقتصادی زون کو ترقیاتی مرکز میں تبدیل کرے۔عبدالرزاق داؤد نے اس امید کا اظہار کیا کہ خصوصی اقتصادی زونز مختلف ذرائع سے سرمایہ کاری کو اپنی طرف متوجہ کریں گے کیونکہ یہ ٹیکس اور ٹیرف کی مراعات، کسٹم طریقے کو درست اور کم پابندیوں کی پیش کش کرتا ہے۔ان کا کہنا تھا کہ تیار مال کی پیداوار اولین ترجیح ہے اور اس سے پاکستان کو تجارتی خسارہ کم کرنے میں مدد ملے گی۔اس موقع پر مشیر تجارت کےساتھ سی پیک بزنس کونسل کی مشترکہ صدارت کرنے والے وزیر برائے ترقی، منصوبہ بندی اور اصلاحات خسرو بختیار کا کہنا تھا کہ اس فورم کے قیام کے پیچھے کا مقصد حکومت اور کاروباری برادری کے درمیان ایک رابطہ قائم کرنا اور پاکستان اور چین کے درمیان صنعتی تعاون کو باہمی مفاد کے لیے نئی بلندیوں پر پہنچانا ہے۔خسرو بختیار کا کہنا تھا کہ اس صنعتی تعاون کے ذریعے ہم تجارتی عدم توازن کو دور کرنے، زرعی مصنوعات کے لیے مارکیٹ تک رسائی وسیع کرنے اور دونون ممالک کے درمیان کاروبار سے کاروبار تعاون کو فروغ دینا چاہتے ہیں۔وفاقی وزیر نے کہا کہ سی پیک کا دائرہ کار صنعتی اور زرعی تعاون، سماجی-اقتصادی ترقی، تجارت اور مارکیٹ تک رسائی تک بڑھانے پر توجہ دی گئی اور اب نجی شعبے کے نمائندوں کےساتھ سی پیک بزنس کونسل کا قیام بڑے منصوبوں کی چھت کے نیچے صنعت کاری کی رفتار کو تیز کرے گا۔قبل ازیں سرمایہ کاری بورڈ کے چیئرمین ہارون شریف نے کونسل کے پہلے اجلاس میں تمام اراکین کا استقبال کیا اور کہا کہ بی او آئی سی پیک بزنس کونسل کے لیے بطور سیکریٹریٹ خدمات انجام دے گا اور اس سلسلے میں پیشہ وارانہ افراد کی ٹیم کو رکھا جائےگا۔انہوں نے کہا کہ سرمایہ کاری بورڈ چین کےساتھ صنعتی تعاون کے معاملات کو طے کرنے کی اپنی صلاحیت کو بہتر کر رہا ہے اور اراکین سے درخواست ہے کہ وہ اس سلسلے میں ٹھوس تجاویز پیش کریں۔