Category بزنس

حکومت کی جانب سے مہنگے داموں ایل این جی خریدے جانے کے معاملے کی تصدیق ہوگئی۔

آڈیٹر جنرل آف پاکستان کی رپورٹ نے پروگرام آج شاہ زیب خان زادہ کے ساتھ کی جانب سے کی گئی تحقیق کی تصدیق کردی۔

آڈیٹر جنرل کی رپورٹ میں بتایا گیا ہے کہ بدانتظامی، بری پلاننگ اور غیر ضروری تاخیر کی وجہ سے مہنگے داموں ایل این جی خریدی گئی جس کی وجہ سے ملکی خزانے کو اربوں روپے کا نقصان ہوا۔

رپورٹ میں مزید بتایا گیا ہے کہ ٹرمینلز پوری طرح استعمال نہ کرنے کی وجہ سے 11 ارب روپے سے زائد کی اضافی ادائیگی کرنا پڑی۔

رپورٹ کے مطابق انتظامیہ ملک میں نہ سردیوں کی ڈیمانڈ کے تاریخی رحجان کو مدِنظر رکھ سکی اور نہ ہی بین الاقوامی مارکیٹ میں گیس کی بڑھتی ہوئی قیمتوں پر نظر رکھ سکی۔

واضح رہے کہ گزشتہ دنوں پروگرام ’آج شاہزیب خانزادہ کے ساتھ‘ میں یہ انکشاف کیا گیا تھا کہ حکومت نے ستمبر کے لیے تاریخ کی مہنگی ایل این جی خریدی جب کہ طویل مدتی معاہدوں کی اوسط کے مقابلے میں 13 ارب روپے اضافی ادا کیے جائیں گے۔

کراچی: بجلی کے بل ادا کرنیوالے لاکھوں صارفین اپنی ماہانہ بجلی کے بلوں میں اضافی ٹیکس کی ادائیگیاں کرنے پر مجبور ہوگئے ہیں۔

مقامی 8 پاور ڈسٹری بیوشن کمپنیوں(ڈیسکوز) کی جانب سے انکم دینے والے صارفین کی عدم رجسٹریشن کے باعث 25ہزار روپے مالیت کے بجلی کے بل ادا کرنیوالے لاکھوں صارفین اپنی ماہانہ بجلی کے بلوں میں اضافی ٹیکس کی ادائیگیاں کرنے پر مجبور ہوگئے ہیں۔

واضح رہے کہ رواں سال کے وفاقی بجٹ میں 25ہزار روپے کے بجلی کے بل پر 7.5فیصد ٹیکس عائد کیاگیا تھا اور فنانس بل کے مطابق انکم ٹیکس گوشوارے جمع کرانے والے رجسٹرڈ ٹیکس دہندگان مذکورہ ٹیکس کا ریفنڈ کلیم کرنے کے مجاز ہیں۔
ذرائع نے بتایا کہ ایف بی آر نے ڈیسکوز کو انکم ٹیکس ریٹرن فائل کرنے والے صافین کا ڈیٹا بل کے ساتھ منسلک کرنے کی ہدایت کی تھی لیکن اب تک لیسکو اور کے الیکٹرک کے علاوہ کسی ڈیسکو نے ٹیکس فائیلرز کا ڈیٹا بل سے منسلک نہیں کیا۔

یہی وجہ ہے کہ اب 25ہزار روپے مالیت کے بل ادا کرنے والے انکم ٹیکس فائلر صارفین کو ٹیکس کی کٹوتی کے بعد ریفنڈ کے لیے انتظار کرنا ہوگا۔ ایف بی آر میں پہلے سے ٹیکس ریفنڈ کی مخدوش صورتحال کی وجہ سے تاجرو صنعتکاروں کی ریفنڈز میں تاخیر کی شکایات زدعام ہیں۔

ذرائع نے بتایا کہ مقامی 10 میں سے 8 ڈیسکوز کی نااہلی کی وجہ سے ہزاروں انکم ٹیکس دہندگان کو دہرے ٹیکس کا سامنا کرنا پڑرہا ہے۔

ایف بی آر کے ذرائع کا کہنا ہے کہ مقامی پاورڈسٹری بیوشن کمپنیوں (ڈیکسوز) نے تاحال انکم ٹیکس ریٹرن بھرنے والے صارفین کو سہولت فراہم نہیں کی ہے۔

آڈیٹر جنرل آف پاکستان نے چینی کی برآمد کو ملک میں چینی کی قیمتوں میں اضافے کی وجہ قرار دے دیا۔

آڈیٹر جنرل آف پاکستان کی رپورٹ کے مطابق اپریل 2019 سے جنوری 2020 کے دوران 49 کروڑ 57 لاکھ 42 ہزار کلو گرام چینی برآمد کی گئی جس کے نتیجے میں مقامی طور پر چینی کی قیمت 55 روپے سے بڑھ کر 80 روپے فی کلو ہوگئی، چینی کی قیمتوں میں اضافے سے عوام پر اضافی بوجھ پڑا۔

چینی اسکینڈل، ایف آئی اے نے جہانگیر ترین کیخلاف مقدمےکا ازسرنو جائزہ لینا شروع کردیا
رپورٹ کے مطابق اقتصادی رابطہ کمیٹی(ای سی سی) نے اکتوبر سے دسمبر 2018 کے دوران 11 لاکھ میٹرک ٹن چینی مشروط طور پر برآمد کرنے کی اجازت دی تھی، ای سی سی نے چینی کے اسٹاک اور ایکسپورٹ اور قیمتوں کا جائزہ لینے کے لیے بین الوزارتی کمیٹی کو ہر 15روز میں اجلاس کرنے کی ہدایت کی تھی تاہم بین الوزارتی کمیٹی ہر 15 روز میں اجلاس منعقد نہیں کرسکی۔

رپورٹ میں کہا گیا ہے کہ بین الوزارتی کمیٹی نے چینی کی قیمتوں میں غیر معمولی اضافے پر مزید چینی برآمد نہ کرنے کی سفارش کرنا تھی، اگر کمیٹی کے باقاعدگی سے اجلاس ہوتے تو چینی کی برآمد یکم اپریل 2019 سے بند ہوجانی چاہیے تھی۔

اس سے قبل وزیر اعظم عمران خان کی جانب سے قائم کردہ انکوائری کمیشن نے بھی چینی کی برآمد کو بلا جواز اور چینی کی قیمتوں میں اضافے کی ایک وجہ قرار دیا تھا۔

گذشتہ روز 900 روپے فی تولہ کمی کے بعد آج ملک میں سونے کی فی تولہ قیمت میں 700 روپے کا اضافہ ہوا ہے۔

سندھ صرافہ بازار جیولرز ایسوسی ایشن کے مطابق 700 روپے اضافے کے بعد ملک میں ایک تولہ سونے کی قیمت ایک لاکھ آٹھ ہزار 300 روپے ہوگئی ہے۔

10 گرام سونے کی قدر 600 روپے اضافے سے 92 ہزار 850 روپے ہے۔

ایسوسی ایشن کے مطابق عالمی صرافہ بازار میں سونے کی قدر 7 ڈالر اضافے سے ایک ہزار 737 ڈالر فی اونس ہے۔

روپے کے مقابلے میں ڈالر کی اونچی اڑان کا سلسلہ جاری ہے۔

انٹر بینک تبادلہ مارکیٹ میں آج کاروباری دن کے دوران ڈالر کی قدر میں اضافے کا رجحان رہا۔

انٹربینک تبادلہ مارکیٹ میں ڈالر کی قدر ایک موقع پر 46 پیسے اضافے سے 164 روپے 22 پیسے بھی رہی، تاہم کاروبار کا اختتام 16 پیسے اضافے سے 163 روپے 92 پیسے پر ہوا۔

اسٹیٹ بینک آف پاکستان کی جانب سے جاری اعداد و شمار کے مطابق اوپن مارکیٹ میں ڈالر کی قدر 164 روپے پر برقرار ہے۔

سرکاری کمپنی پاکستان ایل این جی لمیٹڈ (پی ایل ایل) اور بجلی کی نجی کمپنی کے-الیکٹرک نے ایک باضابطہ معاہدے پر دستخط کیے ہیں جس کے تحت سرکاری کمپنی بن قاسم میں کے ای کے آئندہ 900 میگاواٹ کے پاور پلانٹ کو 150 ملین مکعب فٹ یومیہ ری گیسیفائیڈ مائع قدرتی گیس (آر ایل این جی) فراہم کرے گی۔

رپورٹ کے مطابق گیس فراہمی کے معاہدے پر کے-الیکٹرک کے چیف ایگزیکٹو افسر مونس علوی اور پی ایل ایل کے چیف ایگزیکٹو مسعود نبی نے دستخط کیے۔

اس موقع پر تقریب میں وزیر توانائی حماد اظہر، معاون خصوصی برائے توانائی اور پیٹرولیم تابش گوہر اور سیکریٹری پیٹرولیم ڈاکٹر ارشد محمود بھی موجود تھے۔

اس معاہدے سے کے-الیکٹرک ستمبر کے پہلے ہفتے میں 450 میگا واٹ کے پہلے یونٹ کی ٹیسٹنگ کرسکے گی جو کامیاب ٹیسٹنگ کی صورت میں ستمبر کے آخر یا اکتوبر کے اوائل میں فعال ہوجائے گا۔

اس کے بعد 900 میگا واٹ کے بن قاسم پاور اسٹیشن پر 450 میگا واٹ کا دوسرا یونٹ دسمبر کے اواخر سے کمرشل آپریشن شروع کرے گا۔

آر ایل این جی فروخت کی قیمت آئل اینڈ گیس ریگولیٹری اتھارٹی (اوگرا) کی جانب سے آر ایل این جی کے ماہانہ جاری کردہ نرخ کے مطابق ہوگی۔

حماد اظہر نے کہا کہ یہ اپنی نوعیت کا پہلا معاہدہ ہے جس میں سرکاری کپمنی کی جانب سے براہِ راست آر ایل این جی فراہم کی جائے گی۔

انہوں نے اسے کراچی کے مستقبل کے لیے درست سمت میں اہم قدم اور کے الیکٹرک اور پی ایل یل دونوں کے لیے مثبت اقدام قرار دیا۔

وزارت توانائی کے مطابق بن قاسم پاور اسٹیشن-3 کے الیکٹرک کا ایک فلیگ شپ منصوبہ ہے جس کی لاگت 60 کروڑ ڈالر ہے اور اس سے کراچی کی بڑھتی ہوئی بجلی کی ضرورت کو پورا کرنے کے لیے کے الیکٹرک کی بجلی پیدا کرنے کی صلاحیت میں 900 میگا واٹ کا اضافہ ہوگا۔

اس پاور اسٹیشن کے پہلے یونٹ کو اصل میں مارچ میں فعال کرنے کا ہدف تھا جس کے بعد دوسرا یونٹ نومبر 2021 میں فعال ہونا تھا۔

نظرِثانی شدہ ٹائم لائن میں منصوبے کو کراچی میں بجلی کی کمی کو پورا کرنے کے لیے موسم گرما سے قبل فعال ہونا تھا لیکن کووِڈ کی بندشوں کی وجہ سے مشرق وسطیٰ سے کچھ اہم آلات پہنچنے میں تاخیر ہوئی۔

اس موقع پر خطاب کرتے ہوئے کے الیکٹرک کے مونس علوی نے کراچی کے لیے تعاون اور عزم پر وزارت توانائی کا شکریہ ادا کیا۔

خیال رہے کہ گزشتہ برس اکتوبر میں دونوں اداروں کے سربراہوں نے 900 میگا واٹ کے بن قاسم پاور اسٹیشن 3 کو 150 ایم ایم سی ایف ڈی آر ایل این جی فراہم کرنے کے معاہدے پر دستخط کیے تھے۔

اس کے بعد معاہدے کے سربراہان کو دسمبر یا جنوری میں گیس فراہمی کا ایک اور معاہدہ کرنا تھا جس میں سوئی سدرن گیس کمپنی لمیٹڈ اور کے الیکٹرک کے معاملات حل نہ ہونے کی وجہ سے تاخیر ہوئی۔

پی ایل ایل کے-الیکٹرک کو گیس فراہم کرنے کے لیے ایس ایس جی سی کا نیٹ ورک استعمال کرے گی۔

کراچی: دنیا بھر میں کام کرنے والے پاکستانی تارکین وطن نے گزشتہ ماہ 2 ارب 71 کروڑ ڈالر اپنے وطن بھیجے ہیں۔

رپورٹ کے مطابق اسٹیٹ بینک آف پاکستان (ایس بی پی) نے کہا کہ یہ جولائی کے مہینے میں ترسیلات زر کی دوسری بلند ترین سطح ہے۔

ترسیلات زر کی آمد مسلسل 14 مہینوں سے 2 ارب ڈالر سے زائد رہی ہے۔

اسٹیٹ بینک نے کہا کہ ‘نمو کے لحاظ سے ترسیلات زر میں گزشتہ مہینے کے مقابلے میں 0.7 فیصد اضافہ ہوا اور گزشتہ سال کے اسی مہینے کے مقابلے میں 2.1 فیصد کمی دیکھی گئی’۔

بینک نے کہا کہ گزشتہ سال کے مقابلے میں یہ معمولی سی کمی بڑی حد تک عیدالاضحی کی وجہ سے ہوئی جس کے نتیجے میں جولائی میں کام کے دنوں میں پچھلے سال کے اسی مہینے کے مقابلے میں کمی دیکھی گئی تھی۔

گزشتہ مالی سال میں 29 ارب 40 کروڑ ڈالر مالیت کی ترسیلات زر کی ریکارڈ آمد ہوئی جس میں 27 فیصد اضافہ ہوا جس نے ملک کے بیرونی کھاتے کو سہارا دیا تھا۔

ترسیلات زر کی آمد نے حکومت کو بہت زیادہ تجارتی خسارے کو پورا کرنے کے قابل بنا دیا ہے کیونکہ مالی سال 2021 کے ہر مہینے میں درآمدی بل میں اضافہ ہوتا جارہا ہے جس کی وجہ سے مالی سال 2021 کے اختتام میں کرنٹ اکاؤنٹ سرپلس میں رہا۔

مالی سال 2021 کے 11 ماہ کے اختتام تک کرنٹ اکاؤنٹ 15 کروڑ 30 لاکھ ڈالر کے ساتھ سرپلس تھا تاہم جون میں ایک بڑا خسارہ اور جی ڈی پی کا 0.6 فیصد کرنٹ اکاؤنٹ خسارہ تھا۔

منگل کو جاری کردہ تازہ ترین اعداد و شمار کے مطابق سعودی عرب سے آنے والی آمدنی گزشتہ مالی سال کے اسی مہینے میں 82 کروڑ 10 لاکھ ڈالر سے کم ہو کر 64 کروڑ 10 لاکھ ڈالر رہ گئی۔

مالی سال 2020 کے 6 ارب 61 کروڑ ڈالر کے مقابلے میں مالی سال 2021 میں 7 ارب 66 کروڑ 70 لاکھ ڈالر کے ساتھ سعودی عرب سے آمد سب سے زیادہ رہی تھی۔

اسٹیٹ بینک کے اعداد و شمار سے معلوم ہوتا ہے کہ 53 کروڑ ڈالر کی دوسری سب سے زیادہ ترسیلات زر متحدہ عرب امارات سے موصول ہوئی جو گزشتہ مالی سال کے اسی مہینے سے 1.4 فیصد کم ہے۔

جولائی میں امریکا سے آنے والے ترسیلات زر میں 24 فیصد اضافہ ہوا، پاکستان کو گزشتہ سال کی اسی مدت میں 25 کروڑ 10 لاکھ ڈالر کے مقابلے میں 31 کروڑ 20 لاکھ ڈالر ملے۔

گزشتہ مالی سال کے مقابلے میں برطانیہ سے ترسیلات زر جولائی میں 39 کروڑ 30 لاکھ ڈالر کے ساتھ ایک ہی رہیں۔

بین الاقوامی بلین مارکیٹ میں سونے کی قیمت میں کمی کے بعد پاکستان میں بھی سونے کی قیمتوں میں واضح کمی دیکھنے میں آئی ہے۔

بین الاقوامی بلین مارکیٹ میں فی اونس سونے کی قیمت 17 ڈالر کی کمی سے 1730 ڈالر کی سطح پر پہنچنے کے باعث مقامی صرافہ مارکیٹوں میں بھی منگل کو سونے کی قیمتوں میں کمی دیکھنے میں آئی، بین الاقوامی بلین مارکیٹ میں کمی کے باعث فی تولہ اور فی دس گرام سونے کی قیمت میں بالترتیب 900 روپے اور 771 روپے کی کمی واقع ہوئی۔

سونے کی قیمتوں میں کمی کے باعث کراچی، حیدرآباد، سکھر، ملتان، لاہور، فیصل آباد، راولپنڈی، اسلام آباد، پشاور اور کوئٹہ کی صرافہ مارکیٹوں میں فی تولہ سونے کی قیمت گھٹ کر 107600 روپے اور فی دس گرام سونے کی قیمت گھٹ کر 92250 روپے ہوگئی۔ اسی طرح فی تولہ چاندی کی قیمت 40 روپے گھٹ کر 1400روپے اور دس گرام چاندی کی قیمت 34.29روپے گھٹ کر 1200.27روپے ہوگئی۔

واضح رہے کہ گزشتہ روز بھی بین الاقوامی بلین مارکیٹ میں سونے کی قیمتوں میں 16ڈالر کی کمی کے بعد ملک میں سونے کی قیمتوں میں 700 روپے تک کمی ہوئی تھی۔

انٹربینک اور اوپن دونوں مارکیٹوں میں روپے کے مقابلے میں ڈالر کی قدر کم ہوگئی۔

زرمبادلہ کی دونوں مارکیٹوں میں منگل کو بھی ڈالر کے مقابلے میں روپیہ تگڑا رہا۔ اس کے نتیجے میں انٹربینک مارکیٹ میں ڈالر کی قدر طلب ورسد کے تناظر میں اتار چڑھاؤ کا شکار ہونے کے بعد کاروبار کے اختتام پر مزید 15 پیسے کی کمی سے 163.75 روپے پر بند ہوئی۔

دوسری طرف اوپن کرنسی مارکیٹ میں ڈالر کی قدر 10پیسے کی کمی سے 164روپے کی سطح پر بند ہوئی۔

لکی موٹرز کارپوریشن نے آئندہ چھ ماہ کے دوران کیا اور پیجو گاڑیوں کے جدید ترین ماڈلز پاکستان میں متعارف کرانے کا اعلان کردیا۔

رپورٹ کے مطابق لکی موٹرز کارپوریشن جنوبی کوریا ئی کار کمپنی “کیا” کا پکانٹو ماڈل، ایس یو وی ماڈلز ” سٹانک” اور ” اسپورٹیج” اور فرانسیسی کمپنی پیجو کی ایس یو وی 2008 متعارف کرائے گی ۔یادرہے سٹانک کو ہونڈا ویزل ایچ آر وی اور ٹویوٹا سی ایچ آر کے مقابلے میں متعارف کرایا جارہا ہے ۔

لکی موٹرز کارپوریشن پہلے سے ہی ملک میں ” کیا اسپورٹیج” تیار کررہی ہے جو پاکستان کی مقبول ترین ایس یو وی ہے۔ ذرائع کے مطابق ” کیا ” گاڑیوں کی پیداوار کو ترجیح دی جائے گی جبکہ فرانسیسی کارمیکر پیجو کی گاڑیاں پہلے پہل کم مقدار میں تیار کی جائیں گی جبکہ طلب میں اضافے پر پروڈکشن میں اضافہ کردیا جائے گا۔