Category بزنس

کراچی: حالانکہ بینکنگ کی صنعت نے مالی سال 2021 کے زرعی قرضوں کا ہدف مکمل نہیں کیا لیکن اس نے کووِڈ 19 اور ماحولیاتی چیلنجز کے باوجود سالانہ بنیاد پر 12 فیصد زائد قرضے دیے۔

پورٹ کے مطابق اسٹیٹ بینک آف پاکستان کا کہنا تھا کہ ’مالی سال 2021 میں گزشتہ برس کے مقابلے میں 12 فیصد بڑھ کر زرعی شعبے میں دیے گئے قرض بڑھ کر 13 کھرب 66 ارب روپے ہوگئے‘۔

تاہم سال کے دوران قرض لینے والوں کی تعداد میں کمی ہوئی، مرکزی بینک کئی برسوں سے ملک بھر میں قرضوں کی رسائی کو بڑھانے کے لیے قرض لینے والوں کی بنیاد کو وسیع کرنے کی کوشش کر رہا ہے۔

اسٹیٹ بینک کا کہنا تھا کہ ’زرعی قرضے لینے والوں کی تعداد میں 5 فیصد کمی دیکھی گئی جو مالی سال 2020 کے 37 لاکھ سے کم ہو کر مال سال 2021 میں 35 لاکھ ہوگئی جس کی بنیادی وجہ عالمی وبا کے باعث محدود رسائی ہے’۔

مرکزی بینک کا مزید کہنا تھا کہ قرضوں کا یہ حجم 49 مالیاتی اداروں کی مشترکہ کاوش ہے جو سال کے لیے مقررہ 15 کھرب روپے کا 91 فیصد رہا۔

اسٹیٹ بینک نے کہا کہ بقایا زرعی قرضوں کا حجم 30 جون تک 6 کھرب 28 ارب روپے تھا جس میں سالانہ 8 فیصد اضافہ ہوا جو مالی سال 2021 کے دوران زرعی شعبے کی مجموعی مثبت صورتحال کی تکمیل کرتے ہوئے 2.77 فیصد بڑھا۔

رپورٹ کے مطابق مالی سال 2021 کے دوران کمرشل، اسپیشلائزڈ اور اسلامی بینکوں نے بہتر کارکردگی کا مظاہرہ کرتے ہوئے 12 کھرب 70 ارب روپے کے ہدف کے مقابلے میں 12 کھرب 10 ارب روپے کا قرض دیا اس طرح مقررہ قرضوں کے ہدف کو 95 فیصد تک پا لیا۔

تاہم مائیکرو فنانس بینکوں نے بحیثیت گروپ چھوٹے کاشت کاروں کو ایک کھرب 32 ارب روپے کے زرعی قرضے دے کر 73 فیصد ہدف پورا کیا۔

مائیکرو فنانس اداروں اور دیہی سپورٹ پروگرامز نے مجموعی طور پر چھوٹے اور پسماندہ کاشت کاروں کو 23 ارب روپے کے قرضے دے کر 57 فیصد ہدف پورا کیا۔

اس حوالے سے جاری بیان میں کہا گیا کہ اسٹیٹ بینک نے حکومت اور نجی شعبے کے ساتھ مل کر مالیاتی خدمات فراہم کر کے زرعی شعبے کی ترقی اور کمرشلائزیشن کے لیے ٹھوس کوششیں کی ہی۔

پالیسی ریٹ کو 625 بیسس پوائنٹس تک کم کرنے کے علاوہ اسٹیٹ بینک نے بینکوں کو زرعی قرضوں کی ادائیگی میں تاخیر اور ری اسٹرکچرنگ کی اجازت دی تا کہ معاشی مسائل پر قابو پایا جاسکے۔

بینک کا مزید کہنا تھا کہ حکومت کے فصل کی قرض انشورنس اور مال مویشی قرض انشورنس اسکیمز نے بھی چھوٹے کاشت کاروں کو قرض دینے میں بینکوں کی حوصلہ افزائی کرنے میں اہم کردار ادا کیا۔

فیڈرل ایکسائز ڈیوٹی میں کمی کے باوجود ملک میں سیمنٹ کی قیمتوں میں ایک سال کے دوران 20.09 فیصد اضافہ ہوا ہے ، سیمنٹ مہنگا ہونے سے تعمیراتی لاگت بڑھنے کے باعث متوسط طبقے کی گھر بنانے کی صلاحیت بری طرح متاثر ہوئی ہے۔

میڈیا رپورٹ کے مطابق اگست 2020 سے لے کر 5 اگست 2021 کے دوران اسلام آباد اور گوجرانوالہ میں سیمنٹ کی قیمت 553 سے بڑھ کر 667 روپے ، راولپنڈی میں 552 سے بڑھ کر664 روپے، سیالکوٹ میں 525 سے بڑھ کر 670 روپے ، لاہور میں 530 سے بڑھ کر 680 روپے ، فیصل آباد میں 505 سے بڑھ کر 650 روپے ، سرگودھا میں 530 سے بڑھ کر 665 روپے ، ملتان میں 517 سے بڑھ کر 667 روپے ، بہاولپور میں 520 سے بڑھ کر 670 روپےہو گئی ہے۔

کراچی میں سیمنٹ کی قیمت 675 سے بڑھ کر 695 روپے، حیدر آباد میں 600 سے بڑھ کر 690 روپے، سکھر میں 600 سے بڑھ کر 650 روپے ، لاڑکانہ میں 610 سے بڑھ کر 637 روپے ، پشاور میں 500 سے بڑھ کر 660 روپے اور کوئٹہ میں 570 سے بڑھ کر 700 روپے ہوگئی ہے ۔

چیئرمین نیپرا نے بجلی سبسڈی ختم کرنے کی حکومتی تیاریوں پر کہا ہے کہ عوام کی چیخیں نکلیں گی اور زوردار جھٹکا لگے گا۔

نیپرا میں پاورسیکٹر سبسڈیز کو ٹارگٹڈ بنانے کے حوالے سے پالیسی گائیڈ لائنز پر سماعت ہوئی۔

حکام پاورڈویژن نے کہا کہ چھ ما ہ کی کھپت پر پروٹیکٹڈ صارفین کی کٹیگری بنانے کی تجویز ہے، سروے سے پتا چلا کہ دو سو یونٹ والے صارفین کے پاس لگژری آئٹمز نہیں ہوتے، لہذا دوسویونٹ والے صارفین کو پروٹیکٹڈ صارفین کی کٹیگری میں رکھا جائے گا، حکومت احساس پروگرام کے ذریعے صارفین کو سبسڈی دے گی، دو سویونٹ والے صارفین مستقبل میں بجلی قیمتوں میں اضافے سے بھی مستثنی ہوں گے ، جب تک چیزیں شناختی کارڈ سے منسلک نہیں ہوتیں اس وقت تک پلان دیاہے، لائف لائن صارفین کی حد پچاس یونٹ سے بڑھا کر سویونٹ کررہے ہیں، سبسڈی تمام صارفین کی بجائے سماجی و اقتصادی بنیادوں پر دی جانی چاہیے۔
یہ بھی پڑھیں: حکومت کی بجلی صارفین کے لیے سبسڈی ختم کرنے کی تیاریاں

چیئرمین نیپرا نے کہا کہ اگر ایک صارف چھ ماہ میں 200 یونٹ سے اوپر چلا گیا تو وہ پروٹیکٹڈ سے نکل جائے گا، ہم نے قوم کو ذہنی مریض نہیں بنانا ہم نےبجلی بل کو سادہ بناناہے ۔ پاور ڈویژن حکام نے جواب دیا کہ فیز ون میں کراس سبسڈی کی کوئی تبدیلی نہیں لارہے۔

چیئرمین نیپرا نے کہا کہ پہلے مرحلے میں آپ ہمارے پاس سلیبز لے کر آئے ہیں، دوسرے مرحلے میں حکومتی ٹیرف لے کر آئیں گے، لوگوں کی چیخیں دوسرے فیز میں نکلیں گی اور انہیں زور کا جھٹکا لگے گا، اس پوری حکمت عملی کے لیے پانچ سال کا عرصہ کیوں لگےگا، مجھے شک ہے کہ اگر ہم آج فیز ون منظورکردیں کل فیز ٹو آجائے گا، سلیبز کی منظوری اور چیز ہے اور اسکا ٹیرف اورچیز ہے، ضروری نہیں کہ اگر سلیبز کی منظوری دے دی تو ٹیرف سٹرکچر بھی منظورکردیں۔

حکام پاور ڈویژن نے جواب دیا سبسڈیز اور کراس سبسڈیز کو مرحلہ وار کم کریں گے۔

چیئرمین نیپرا نے کہا کہ نیپرا پاورانڈسٹری کی موجودہ صورتحال سے مطمئن نہیں، ہم ٹیکنیکل اینڈ ڈسٹریبیوشن لاسز سے مطمئن نہیں ہیں، ڈسکوز کے بورڈز میں قابل افراد کو لایاگیاہے، پاورسیکٹر میں سستی روی سے سہی مگر تبدیلی آرہی ہے۔

گندم کی 57 ہزار میٹرک ٹن کی پہلی کھیپ پاکستان پہنچ گئی۔

ذرائع کے مطابق فی من گندم کی لینڈڈ کاسٹ تقریباً 1880 روپے میں پڑی، ایک من پر 250 سے 300 روپے ٹرانسپورٹیشن اور ہینڈلنگ چارجزالگ سے ہوں گے۔

ٹریڈنگ کارپوریشن آف پاکستان (ٹی سی پی) نے بتایا کہ گندم پاسکو کیلئے ٹریڈنگ کارپوریشن آف پاکستان نے درآمد کی، پاسکو اور صوبوں کیلئے گندم کی درآمد کی جارہی ہے جبکہ دوسرا جہاز 53 ہزار 912 ٹن گندم لیکر 14 اگست کو پاکستان پہنچے گا۔

ذرائع کا کہنا ہے کہ وفاقی حکومت کا رواں مالی سال40 لاکھ ٹن تک گندم درآمد کرنے کا منصوبہ ہے جبکہ گزشتہ مالی سال حکومت نے 36 لاکھ 12 ہزار 638 ٹن گندم درآمد کی تھی۔

ذرائع کے مطابق رواں سال گندم کی پیداوار 2 کروڑ 72 لاکھ 73 ہزار ٹن رہی، اس مالی سال گندم کی کھپت کا تخمینہ 2 کروڑ 93 لاکھ ٹن لگایا گیا یوں رواں مالی سال کیلئے 20 سے 21 لاکھ ٹن گندم کے شارٹ فال کا تخمینہ ہے۔

وفاقی حکومت نے 6 پاور پلانٹس کی بندش کا فیصلہ کرلیا۔

قومی اسمبلی اجلاس میں وقفہ سوالات میں جواب دیتے ہوئے وزارت توانائی کا کہنا تھاکہ 6 پاور پلانٹس کی بندش سے 1796میگا واٹ بجلی کی کمی ہوگی۔

وزارت توانائی کا کہنا تھاکہ لاکھڑا اور کوٹری پاور پلانٹس لائسنس منسوخ ہونے پر غیر فعال ہیں۔

وزارت توانائی کے مطابق موجودہ دور میں 3 ہزار میگا واٹ بجلی کی پیداوار میں اضافہ کیا گیا۔

کراچی: بین الاقوامی بلین مارکیٹ میں فی اونس سونے کی قیمت 16ڈالر کی کمی سے 1747ڈالر کی سطح پر پہنچ گئی۔

اس کے باعث مقامی صرافہ مارکیٹوں میں بھی پیر کو فی تولہ اور فی دس گرام سونے کی قیمتوں میں بالترتیب 700روپے اور 600روپے کی کمی واقع ہوئی ۔ جس کے نتیجے میں کراچی ،حیدرآباد ، سکھر ، ملتان ، لاہور ، فیصل آباد ، راولپنڈی ، اسلام آباد ، پشاور اور کوئٹہ کی صرافہ مارکیٹوں میں فی تولہ سونے کی قیمت گھٹ کر 108500 روپے اور فی دس گرام سونے کی قیمت گھٹ کر 93021 روپے ہوگئی۔

اس کے برعکس فی تولہ چاندی کی قیمت بغیر کسی تبدیلی کے 1460روپے اور دس گرام چاندی کی قیمت 1251.71 روپے پر مستحکم رہی ہے۔

کراچی: زرمبادلہ کی دونوں مارکیٹوں میں پیر کو بھی ڈالر کے مقابلے میں روپے کی قدر میں کمی واقع ہوئی نتیجے میں اوپن کرنسی مارکیٹ میں ڈالر دوبارہ 164 روپے سے تجاوز کرگیا۔

آئی ایم ایف اور عالمی بینک کے پاکستان کے لیے قرضوں کے اجراء کو پاور ٹیرف میں اضافے سے مشروط کیے جانے اور درآمدی شعبے کی بڑھتی ہوئی ڈیمانڈ کے باعث زرمبادلہ کی دونوں مارکیٹوں میں پیر کو بھی ڈالر کے مقابلے میں روپیہ تنزلی سے دوچار رہا۔

نتیجے میں اوپن کرنسی مارکیٹ میں ڈالر دوبارہ 164 روپے سے تجاوز کرگیا۔ انٹربینک مارکیٹ میں ڈالر کی قدر مزید 65 پیسے بڑھ کر 163.90 روپے کی سطح پر بند ہوئی جبکہ اوپن مارکیٹ میں ڈالر کی قدر 40 پیسے کے اضافے سے 164.10 روپے پر بند ہوئی۔

ملک میں ایک ہفتے کے دوران مہنگائی 0.12 فیصد بڑھ گئی اور رواں ہفتے 17 اشیائے ضروریہ کی قیمتوں میں اضافہ ہوا۔

ادارہ شماریات کے جاری کردہ اعدادوشمار کے مطابق ایک ہفتے کے دوران لہسن کی قیمت میں 9 روپے 40 پیسے اضافہ ہوا اور دال مسور ایک روپے مہنگی ہوئی۔

رپورٹ کے مطابق ٹماٹر 12 روپے 89 پیسے فی کلو سستا ہوا اور چکن کی فی کلو قیمت میں 5 روپے 91 پیسے کمی ہوئی جب کہ انڈے 5 روپے 77 پیسے فی درجن سستے ہوئے۔

اس کے علاوہ ایل پی جی کا گھریلو سلنڈر 72 روپے 28 پیسےفی کلو مہنگا ہوا۔

اسلام آباد: آئل اینڈ گیس ریگولیٹری اتھارٹی (اوگرا) نے ری گیسیفائیڈ مائع قدرتی گیس (آر ایل این جی) کی اوسط فروخت قیمت رواں ماہ کے لیے تقریباً 13.22 ڈالر فی ملین برٹش تھرمل یونٹ (ایم ایم بی ٹی یو) مقرر کردی جو گزشتہ ماہ کے 12.91 ڈالر کے مقابلے میں 2.33 فیصد زیادہ ہے۔

رپورٹ کے مطابق ریگولیٹر نے گزشتہ ہفتے اگست کے لیے آر ایل این جی کی فروخت کی قیمت 13.61 ڈالر بتائی تھی جو کہ جولائی کے مقابلے میں تقریبا 5.5 فیصد زیادہ تھی، جس میں سب سے مہنگے اسپاٹ کارگو کی قیمت 20.55 ڈالر فی یونٹ (برینٹ کا 27.87 فیصد) شامل ہے۔

پاکستان اسٹیٹ آئل (پی ایس او) نے اپنے کارگو کو یہ کہتے ہوئے مسترد کردیا کہ اس نے بولی ختم کردی ہے۔

نتیجتاً اوگرا نے ایک دن بعد اپنا نوٹی فکیشن واپس لے لیا اور فروخت کی قیمت منسوخ کر دی تھی۔

جمعرات کو پی ایس او نے بتایا کہ اسے قطر پٹرولیم سے 29 سے 30 اگست کو پہنچنے والے کارگو کے لیے 15.93 ڈالر فی یونٹ (22.13 فیصد برینٹ) کی نظرثانی شدہ بولی موصول ہوئی ہے۔

اس لیے ریگولیٹر نے ایک نیا نوٹی فکیشن جاری کیا اور نظرثانی شدہ اوسط آر ایل این جی کی فروخت کی قیمت 13.22 ڈالر فی یونٹ مقرر کی۔

جولائی میں آر ایل این جی فروخت کی لاگت جون کے مقابلے میں تقریباً 25 فیصد زیادہ تھی۔

دلچسپ بات یہ ہے کہ پاکستان ایل این جی لمیٹڈ (پی ایل ایل) نے تقریباً ایک ہی ڈیلیوری ونڈو (27 سے 28 اگست) کے لیے 10.69 ڈالر فی یونٹ بولی وصول کی تھی، کیونکہ اس نے پی ایس او سے بہت پہلے بین الاقوامی بولی لگائی تھی۔

پی ایس او نے کہا کہ اسے ایک مختصر نوٹس پر اسپاٹ کارگو پر جانا پڑا کیونکہ ایل این جی درآمد کے لیے سوئی ناردرن گیس پائپ لائنز لمیٹڈ (ایس این جی پی ایل) کے سالانہ ترقیاتی منصوبے کے تحت اس کی ضرورت نہیں تھی اور وقت کے ساتھ بین الاقوامی قیمت بڑھ گئی۔

اوگرا کے نوٹی فکیشن نے قطر سے پانچ کارگو کی اوسط درآمد قیمت 9.6 ڈالر فی یونٹ رکھی ہے جبکہ قطر سے آنے والے ایک اسپاٹ کارگو کی قیمت 15.93 ڈالر ہے۔

دوسری جانب پی ایل ایل کا ایک کارگو 8.6 ڈالر فی یونٹ میں آیا جبکہ پانچ دیگر اسپاٹ کارگو 10.5 ڈالر اور 10.83 ڈالر فی یونٹ کے درمیان تھے۔

اس طرح ان تمام 12 کارگو کی اوسط قیمت فروخت اگست کے لیے 13.22 ڈالر فی یونٹ رہی۔

آر ایل این جی ٹیرف کی تقسیم ایل این جی ڈیلیورڈ ایکس شپ (ڈی ای ایس) کی بنیاد پر کی جاتی ہے، اس کے علاوہ پبلک سیکٹر کی کمپنیوں اور ٹرمینل آپریٹرز کی جانب سے عائد کیے گئے کئی اضافی چارجز بھی اس میں شامل ہوتے ہیں۔

اوگرا نے کہا کہ پی ایل ایل کی ڈی ای ایس کی قیمت اوسطاً 10.5 ڈالر فی یونٹ تھی تاہم ان اضافوں کی وجہ سے بڑھ کر 13.22 ڈالر ہو گئی۔

ڈی ای ایس کی قیمت میں اس سال اپریل سے تقریباً 35 فیصد اضافہ ہوا ہے۔

ڈی ای ایس کی قیمت کے علاوہ پی ایس او اور پی ایل ایل بھی بالترتیب 0.6 فیصد اور 0.5 فیصد وصول کر رہے ہیں، جبکہ گیس کمپنیاں ایس ایس جی سی ایل اور ایس این جی پی ایل تقریباً 6.7 فیصد ٹرانسمیشن اور تقسیم کے نقصانات وصول کر رہی ہیں۔

اس کے علاوہ پی ایس او اور پی ایل ایل، ایل این جی کی درآمد پر ڈی ایس ای کی قیمت کا 2.50 فیصد، پی ایس او اور پی ایل ایل کے دیگر درآمد سے متعلقہ اخراجات کے 6 فیصد سے زیادہ اور اینگرو کے لیے تقریباً 41 سینٹ فی یونٹ اور پاکستان گیس پورٹ کے لیے تقریباً 39 سینٹ چارج کر رہے ہیں۔

ملک میں سونے کی فی تولہ قیمت میں ایک ہزار روپے کی کمی واقع ہوئی ہے۔

سندھ صرافہ بازار جیولرز ایسوسی ایشن کے مطابق ایک ہزار روپے کمی کے بعد ملک میں فی تولہ سونے کی قدر ایک لاکھ 9 ہزار 200 روپے ہوگئی ہے۔

10 گرام سونے کی قدر 858 روپے کم ہوکر 93 ہزار 621 روپے ہوگئی ہے۔

ایسوسی ایشن کے مطابق عالمی صرافہ بازار میں سونے کی قدر 35 ڈالر کم ہوکر ایک ہزار 763 ڈالر فی اونس ہے۔