Category کالم

یہاں میوزیم میں ان کی تاریخ بھی محفوظ کی گئی ہے۔ مثال کے طور پر ولیم دی کنکرر 1066ء سے 1087ء تک رچرڈ 1جسے شیر دل کہا جاتا ہے 1189ء سے 1199ء تک ایڈورڈ 1272’1ء سے1307ء تک ہنری 1413’5سے1422تک ہنری 1485’6سے 1501 تک ہنری8 کی بڑی دلچسپ داستانیں ہیں کہ کس طرح اُس نے شادیاں کیں اور چرچ کو بھی زیر نگیں لے آیا یہ 1509ء سے لے کر 1547 تک حکمرانی کرتا رہا۔ کوئین الزبتھ 1558’1سے1603 تک اور چارلس1660’2 سے1685تک حکمران رہے۔ برطانیہ کی موجودہ کوئین الزبتھ 6فروری 1952کو موجودہ منصب پر فائز ہوئی تھیں اور برٹش ہسٹری کے مطابق اُن کا دور طویل ترین ہے ان سے پہلے یہ اعزاز ملکہ وکٹوریہ کو حاصل تھا جو 20جون1837 سے 22جنوری 1901ء تک ملکہ رہیں اس لیے یہاں برطانیہ میں ان کے اس عرصے کو وکٹورین ایرا بولا جا تا ہے۔

یہ درست ہے کہ برطانیہ میں بادشاہت ایک نمائشی عہدہ ہے اور تمام تر اختیارات عوام یا عوام کے منتخب نمائندوں کو بہت پہلے سے حاصل ہو چکے ہیں اور اس کا یا پلٹ کا کوئی ایک دن نہیں تھا بلکہ میگنا کارٹا جو 15جون 1215کو تشکیل پایا اور جسے گریٹ چارٹر آف لبرٹی کہا جاتا ہے سے شروع ہونے والی جدوجہد کی طویل داستان ہے اگرچہ ایڈورڈ 3 کے دور میں 1341ء میں ہاؤس آف کامن تشکیل پاگیا تھا مگر عوام بمقابلہ کنگ یا سویلین بمقابلہ اسٹیبلشمنٹ کی کشمکش تا دیر چلتی رہی اگرچہ جیت بالآخر عوام، جمہوریت اور انسانی عظمت و رفعت کی ہوئی جس کی وجہ سے کنگڈم نے خود کو عوامی طاقت کے سامنے سرنڈر کر دیا۔ کسی نے درست کہا تھا کہ دنیا میں بالآخر پانچ بادشاہ رہ جائیں گے چار تاش کے اور پانچواں برطانیہ کا۔۔۔

درویش کی طرح کئی جمہوری الذہن اشخاص ضرور خیال کرتے ہونگے کہ وہ ملک جو جدید جمہوریت کی جنم بھومی ہے جس کی پارلیمنٹ دنیا بھر کی تمام جمہورتیوں یا پارلیمنٹس کی ماں کہلاتی ہے وہاں نمائشی طور پر بھی بادشاہت کا ادارہ کیوں موجود ہے؟ اس امر کا احساس برطانیہ آکر ہوا۔ جس چیز کی جڑیں گہری ہونگی اس کا اکھڑنا بھی ویسا ہی پیچیدہ ہوگا اور پھر یہاں کے لوگ اپنی اچھی روایات کی اتنی پاسداری کرتے ہیں کہ انہوں نے کبھی باضابطہ تحریر ی آئین کی بھی ضرورت محسوس نہیں کی اور بادشاہت جب عوامی حاکمیت کے سامنے سرنگوں ہوگئی تو اس کا سر کاٹنے کی ضرورت نہیں رہی بلکہ یہ کامن ویلتھ ممالک میں ایک مشترکہ زنجیر کی طرح یکجہتی یا اشتراک کی علامت قرار پائی۔ مادام تساؤ میوزیم میں ہم نے اپنی آنکھوں سے یہ منظر نامہ ملاحظہ کیاکہ عوام میں کسی کے ساتھ تصاویر بنوانے میں اس قدر دلچسپی نہیں تھی جتنی ملکہ یا رائل فیملی کے ساتھ تھی ایک لمبی لائن لگی ہوئی تھی اگر عوام میں اس تاریخی عظمت کے بے ضرر سمبل ادارے کی یہ پذیر ائی نہ ہوتی تو کب کا یہ مٹ چکا ہوتا بلکہ ظالم بادشاہوں کی تو لوگ نشانیاں بھی مٹا دینا چاہتے ہیں ۔

برٹش امپائر دنیا کی وہ عظیم الشان سلطنت تھی جس کی قلمرو براعظم افریقہ، امریکا کے بیشتر خطے 13ریاستیں، کینیڈا، نیوفاؤنڈ لینڈ، سکینڈے نیوین ممالک، ایشیاء کے کئی ممالک، براعظم آسٹریلیا نیوزی لینڈ وغیرہ سب شامل تھے اکلوتی سپر پاور کی حیثیت جس کی حیثیت بلامبالغہ عالمی قیادت و امامت کی تھی آج اگرچہ یہ حیثیت پیمانے بدل کر امریکا کو حاصل ہو چکی ہے جس کے متعلق کہا جاتا ہے کہ اس کی سرحدیں دنیا کے ہر ملک سے ملتی ہیں لیکن اس کے پاس بھی طاقت کا شاید وہ طنطنہ نہیں ہو گا جو برطانوی سلطنت کو صدیوں حاصل رہا اس سب کے باوجود یہ لوگ اپنی ان فتوحات پر نہ اتراتے ہیں اور نہ دنیا کے سامنے قابلِ فخر بنا کر پیش کرتے ہیں بلکہ انسانی آزادیوں کے حوالے سے ان کی مذمت کرتے ہیں۔ سیاحت کرواتے ہوئے انگریز گائیڈ اپنی ایمپائر او ر اپنے آمروں کی زیاتیوں کے حوالے سے کھل کر اظہار خیال کر رہا تھا جبکہ ہم ہر چیز کو تقدس میں لپیٹنے کے لیے کوشاں رہتے ہیں یہی وجہ ہے کہ آج اگر دنیا ان کی تہذہب، نظریات، افکار اور قوانین کو اپنائے ہوئے ہے تو اس کی وجہ انگریزوں سے خدا واسطے کی محبت نہیں ہے اس حوالے سے ضرور غور کیا جانا چاہیے کہ ان کی تہذیب اور افکار و قوانین میں کوئی تو ایسی خاص خوبصورتی اور انسانیت کے لیے بار آور کشش ہے جو دنیا لپک کر اسی کو اپناتی ہے۔

درویش نے اپنی نوعمری میں اپنے بزرگوں کو انگریز حکومت کے فضائل بیان کرتے اور اسے جنوبی ایشیاء کے لیے رحمت قرار دیتے سنا ہے وہ بارہا کہتے کہ انصاف انگریزوں پر ختم تھا ہم نے تو نہ صرف نظام انصاف کا بلکہ آزادی کے بعد ہر ادارے کا بیٹر ا غرق کر کے رکھ دیا ہے۔۔۔۔ یہاں لندن میں ہمیں اس وقت دلچسپ حیرت ہوئی جب ممتاز افسانہ نگار کلکتہ سے ہمارے دوست فہیم اختر صاحب بولے کہ برطانیہ کو ابھی کم از کم مزید ایک سوسال تک جنوبی ایشیاء میں رہنا چاہیے تھا۔جناب فہیم اختر ربع صدی سے یہاں لندن میں مقیم ہیں اسلام اور مسلمانانِ پاک و ہند کے لیے بڑی درد مندی رکھتے ہیں لکھاری ہونے کے ساتھ یہاں کی سماجی سرگرمیوں میں بھی بڑھ چڑھ کر حصہ لیتے ہیں اور کلکتہ میں بھی اپنے لوگوں کے ساتھ خوب جڑے ہوئے ہیں۔ اپنے خوبصورت گھر میں انہوں نے ہمارے لیے پر تکلف دعوت کا اہتمام کیا اور مختلف مقامات کی سیاحت بھی کروائی۔ ان سے ہماری دوستی چند برس قبل استنبول میں ہوئی تھی غالب اور کلکتہ کے حوالے سے ان کی گفتگو دلچسپ تھی۔

بات خوبصورتی کے حوالے سے ہورہی تھی جو قدرتی نظاروں کی صورت یہاں قدم قدم پر موجود ہے رہتی کسر اس پر عزم قوم نے اپنی محنت اور لگن سے نکال دی ہے ۔۔۔ جا بہ جا کمال کی Greenery ہے ہم اپنے ملک میں پالیوشن کا ہر وقت رونا روتے ہیں سٹرک پر چلنا ہو تو رومال ناک پررکھنا پڑتا ہے جبکہ یہاں اتنی شفاف فضا تھی کہ کھلی روڈز اور کھلی بسوں پر بھی کہیں کوئی ایشو محسوس نہیں ہوا۔ بلند و بالا اور دیوہیکل عمارات اس عظمت رفتہ کی تمام کہانیاں کھول کہ بیان کر رہی ہیں جس نے صدیوں تک اس قوم کی عظمت کا سکہ اقوامِ عالم میں بٹھائے یا چلائے رکھا جس کی بنیاد محض فوجی یا عسکری طاقت نہیں بلکہ علمی و فکری ترقی اور تہذیبی عظمت تھے۔ مطالعے کا ذوق پورا کرنے کے لئے ان کی لائبریریاں اور میوزیم جس وقت کا تقاضا کرتے ہیں وہ ہمارے پاس نہیں ہے یہاں کی انڈیا آفس میں جانے کا سوچ رکھا تھا مگر ممکن نہیں ہو سکا اب اگرچہ اس کا نام ’’لائبریری آف کامن ویلتھ ریلشنر آفس‘‘ ہے لیکن ماقبل یہ برطانوی وزارتِ ہند کا ایسا کتب خانہ تھی جس کی بنیاد ایسٹ انڈیا کمپنی نے رکھی تھی اس میں انڈیا سے متعلق انگریز حکمرانوں کی بیشتر دستاویزات محفوظ ہیں۔ خان عبدالولی خان صاحب نے اپنی کتاب Facts are secred یہیں مکمل کی تھی۔۔۔ اس میں انگریزی کے علاوہ جنوبی ایشیاء کی دیگر زبانوں میں بھی بھاری مواد موجود ہے کتابوں کی تعداد لاکھوں میں ہے جن پر پاک و ہند ہر دو ممالک کے دعوے ہیں۔ اس کی وسعت کا اندازہ تنہا اس بات سے لگایا جاسکتا ہے کہ محض جناح صاحب پر اس لائبریری میں دس ہزار فائلیں 18ہزار تصاویر 27ہزار خطوط دو لاکھ اخباری تراشے اور دوسو دستاویزی فلمیں موجود ہیں۔ اسی طرح بشمول گاندھی جی جنوبی ایشیائی قیادت سے متعلق تفاصیل قابلِ ملاحظہ ہیں۔

ہم نے کہیں پڑھ رکھا تھا کہ جنگ عظیم کے دوران جب ہٹلر کی طرف سے لندن پر خوفناک حملے ہو رہے تھے عین اس وقت وزیراعظم برطانیہ سر ونسٹن چرچل کے اعتماد کا یہ عالم تھا کہ وہ پوچھتے کیا ہماری عدالتیں عوام کو انصاف دے رہی ہیں جواب اثبات میں سن کر کہتے کہ اے میری قوم پھر پریشانی کی کوئی بات نہیں Even This Shall passجنگ عظیم سے متعلق ایک اور دلچسپ چیز جو ہم نے پڑھ رکھی تھی اور یہاں میوزیم میں دیکھی وہ یہ کہ سلطنت برطانیہ کو دورانِ جنگ افرادی قوت یا رنگروٹ کی شدید ضرورت پڑ گئی تو اس حوالے سے خوب مہم چلائی گئی اس وقت اس نوع کے جو اشتہار شائع ہوئے ۔

ہم نے میوزیم میں ان کی تصاویر بھی بنائیں ہمارے یہاں لطیفہ ہے کہ محکمہ ریونیو کے لوگ رنگروٹس کی بھرتی کے لیے گھر گھر جاتے تھے ایک پٹواری نے جب کسی میراثی کے لڑکے کو بھرتی کرنا چاہا تو استفسار پر میراثی کو بتایا کہ ملکہء برطانیہ کو جنگ کے لیے آپ کے بیٹے کی ضرورت ہے وہ بولا ملکہ سے کہیے کہ اگر نوبت میراثی کے بیٹے تک آگئی ہے تو بہتر ہے کہ ملکہ صلح کر لے اور جنگ سے دستبردار ہو جائے۔ یہاں میوزیم کے درودیوار پر دلچسپ ہسٹری واقعی محظوظ کرتی ہے۔ میوزیم اور لائبریوں کے علاوہ ہماری تمنا تھی کہ گریٹ برٹرینڈرسلBertrand russell کی یادگار پر پہنچا جائے جو شاید برٹش میوزیم سے زیادہ دورنہ ہو کیونکہ یہ میوزیم ہم نے خاصی تفصیل کے ساتھ ملاحظہ کیا بہت سی تصاویر بھی بنائیں ۔یہاں نوادرات کی تصاویر بنانے پر اس نوع کی کوئی بندش نہ تھی جس کا سامنا ہمیں ترکی میں کرنا پڑا تھا۔ ہر ہر قدم پر اس قوم کی فکریِ آزادی ہمیں قابلِ تحسین لگی ۔ بہرحال یہ برٹش میوزیم جس گلی میں واقع ہے اس کانام ہی گریٹ رسل اسٹریٹ ہے۔ یوکے میں اسٹریٹ کا استعمال شاید پاکستان کی طرح یا اس سے بھی بڑھ کر ہوتا ہے ۔۔۔ یہاں گھومتے ہوئے بارہا یہ احساس ہوتا ہے کہ’’ کعبے سے ان بتوں کو نسبت ہے دور کی‘‘ برطانیہ میں قائد کی مادر علمی لنکنزان جانے کی تمنابھی پوری نہ ہوسکی۔ اپنے دوست علی اسلم گورد اسپوری کے ساتھ کارل مارکس کی ابدی آرام گاہ پر جانے کا پروگرام بھی تھا لیکن ممکن نہ ہو سکا لندن کے بیچز کا نظارہ بھی کرنا تھا مگر وہی بات محبت تو کرتے مگر گھر کام ہے۔(جاری ہے)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
جمہوری نظام کی بنیادیں جس اہم عنصر پر قائم ہوتی ہیں وہ ہے تعلیم۔ جب میں 2001ء میں سائنس و ٹیکنالوجی کا وفاقی وزیر اور بعد میں 2008 ء تک چیئر مین اعلیٰ تعلیمی کمیشن تھا تو مجھے اعلیٰ تعلیم کے شعبے پر توجہ دینے کا موقع ملا ۔میں نے حکومت کو مجبور کیا کہ سائنس کے لئے ترقیاتی بجٹ تقریباََ 6000 فیصد اور اعلیٰ تعلیم کے لئے ترقیاتی بجٹ میں 3500 فیصد اضافہ کیاجائے. اس نےہمیں اعلیٰ تعلیمی شعبے کو وسعت دینے میں خاطر خواہ مدد دی۔ اس بجٹ سے شروع کردہ پروگراموں نے جامعات میں تحقیق کو فروغ دیا اورمعیار کو بہتر بنانے میں مدد ملی.

سال 2000میں پاکستان میں صرف 59 جامعات اور ڈگری دینے والے ادارے تھے. ایسے اداروں میں 2008 ء تک میں 127 اور 2017 ء تک 187سے زائد تک اضافہ ہوا.جامعات میں اندراج تین گنا سے زیادہ بڑھ گیا، 2002 میں صرف 276،000 سے بڑھ کر 2010 ء میں 900،000 طلباء تک ، اور پھر 2017 تک14 لاکھ تک پہنچ گیا ۔ 2003 میں 23- 17سے سال کی عمر کے گروپ کی اعلیٰ تعلیم تک رسائی 2.3 فیصد، 2010ء میں 10٪ اور پھر 2017ء میں 12٪ تک پہنچ گیا۔ اس کے علاوہ تعلیم کے معیار کو بہتر اور قومی ضروریات کے مطابق ڈھالنے کے لئے کئی اقدامات اٹھائے گئے۔ ان اقدامات میں سب سے زیادہ اہم مضبوط فیکلٹی تیار کرنا تھا . حقیقت یہ ہے کہ سال 2003 میں پاکستانی جامعات میں 75 فیصد سے زائد فیکلٹی ممبران پی ایچ ڈی نہیں تھے اسی سے اس وقت تعلیم کی بری حالت کا اندازہ ہو جاتا ہے. لہٰذا تقریباًگیارہ ہزار روشن ترین طالب علموں کو وظائف سے نوازا گیا جن میں سے 5000 وظائف دنیا کی اعلیٰ ترین جامعات سے پی ایچ ڈی کی ڈگری حاصل کرنے کے لئے دئیے گئے تھے. باقی وظائف مقامی پی ایچ ڈی کی سطح پر غیر ممالک کی جامعات میں سینڈوچ پی ایچ ڈی کے پروگراموں کے لئے تھے جس کے تحت مقامی طور پر رجسٹرڈ پی ایچ ڈی کے طالب علموں کو کچھ وقت کسی اہم غیر ملکی تحقیقی جامعہ سے بھی تربیت حاصل کرنا تھا.

تعلیم اور تحقیق میں کیریئرز کو منتخب کرنے کے لئے ہائی اسکول سے گزرنے والے روشن ترین طالب علموں کو اپنی طرف متوجہ کرنے کے لئے، ایک نیا ” ٹینیور ٹریک” (Tenure Track) تقرری کا نظام نافذ کیا گیا جو کہ فیکلٹی ممبروں کی تقرریوں کے لئے ان کی تحقیقی پیداواری صلاحیت کا بین الاقوامی جائزہ لینے کے بعد اہل قرار دیتا ہے ۔ اسی لئے فیکلٹی کے اراکین کی تنخواہوں میں وفاقی وزراء کی تنخواہوں سے کئی گنا اضافہ کیا گیا! اس طرح کے فیکلٹی کے اراکین کی پہلی تشخیص 3 سال کے بعد اعلیٰ ماہرین پر مشتمل بین الاقوامی پینل کی جانب سے کی جاتی ہے جبکہ دوسری تشخیص 6 سال کے بعد ہوتی ہے اور دونوں تشخیصوں کی اطمینان بخش رپورٹ کے بعد ہی انہیں مستقل کر دیا جاتا ہے. بیرون ملک سے پی ایچ ڈی ڈگری لے کرواپس آنے والے طالب علموں کو ان کی واپسی کی تاریخ سے ایک سال پہلے تحقیقی گرانٹس کے لئے درخواست دینے کا موقع دیا جاتاتھا، تاکہ جب وہ واپس آئیں تو فوراً تحقیق شروع کر سکیں. اس کے علاوہ فیکلٹی کو مضبوط بنانے کے لئے بیرون ملک میں کام کرنے والےاعلیٰ درجے کے اہل فیکلٹی ممبران کو بہترین تنخواہ اور آزادانہ تحقیقی فنڈز کے ساتھ پاکستان میں واپس آنے کے لئے کئی نئے پروگرام شروع کیے گئے ۔

کچھ 600 ایسے افراد ان پروگراموں کے تحت پاکستان آئے، ان میں سے نصف مستقل طور پر اور دوسرے نصف بطور عارضی فیکلٹی کے طور پر آئے ۔ تمام سرکاری اور نجی جامعات میں فیکلٹی کے اراکین کے لئے ٹیکس کی شرح 35٪ سے کم کر کے صرف 5٪ تک کر دی گئی ۔ غیر ملکی فیکلٹی ممبران کو مختلف اداروں میں جمع کیا گیا تھا تاکہ تحقیق میں بہتری کے لئے ضروری اجتماعی سہولیات تیار کر سکیں.

یہ اور اس طرح کے دیگر اقدامات کی وجہ سے جامعات کے معیار اوربین الاقوامی درجہ بندی میں اچانک اضافہ ہوا. 1947 سے 2002 کے تک 55 سالہ مدت کے دوران، بین الاقوامی جامعاتی درجہ بندی میں دنیا بھر کی چوٹی کی 500 جامعات کی صف میں پا کستان کی ایک بھی جامعہ شمار نہیں کی جا سکتی تھی. تاہم 2008 تک، پاکستان کی کئی جامعات نے یہ اعزاز حاصل کیا جس میں 273 سائنس کے میدان پر نسٹ (NUST) (اسلام آباد)281 پر یو ای ٹی (UET) (لاہور) اور 223پر جامعہ کراچی تھی ۔ اس کے علاوہ قائد اعظم یونیورسٹی (اسلام آباد) اور مہرا ن انجینئرنگ یونیورسٹی (حیدرآباد) بھی اس صف میں شامل ہوئیں ۔ اسی طرح تحقیقی اشاعتوں میں بھی بھرپور اضافہ ہوا اس کا اندازہ اس طرح لگایا جا سکتا ہے کہ سال 2000 میں 800 اشاعت سالانہ میں اضافہ ہو کر 6،250اشاعت پر پہنچ گیا جو بتدریج بڑھ کر 2011 میں چودہ ہزار تحقیقی اشاعت تک پہنچ گیا۔یہ اضافہ اسقدر تھا کہ بھارت کی آبادی کے لحاظ سے موازنہ کریں تو ان کی سالانہ اشاعت کے اعتبار سے اس کے مدمقابل تھا۔

ان پر بصیرت اقدامات کی بدولت 2000 سے 2008 کے درمیان کی مختصر مدت کے دوران پاکستان میں اعلیٰ تعلیم کے شعبے میں ہوئی پیش رفت نے بھارت میں خطرے کی گھنٹیاں بجا دیں . 23 جولائی، 2006 کو، “بھارتی سائنس کو پاکستان سےخطرہ ” کے عنوان سے، معروف ہندوستانی اخبار روزنامہ ” ہندوستان ٹائمز” میں ایک مضمون شائع ہواجس میں بتا یا گیا تھا کہ پروفیسر سی. این. آر. راؤ (بھارتی وزیر اعظم کی سائنسی مشاورتی کونسل کے چیئرمین) نے بھارتی وزیراعظم من موہن سنگھ کو پاکستان میں اعلیٰ تعلیم کے شعبے میں ہوئی تیز ترین پیشرفت کے کے بارے میں ایک تفصیلی رپورٹ پیش کی ۔

اس شاندار کامیابی کے پیچھے کچھ ٹھوس اقدامات تھے جن کی بدولت اعلیٰ تعلیم کا معیار بین الاقوامی سطح پر قائم کیا گیا تھا ان میں سے ایک اہم اقدام یہ تھا کہ اعلیٰ تعلیمی کمیشن کے پروگراموں کا باقاعدگی سے غیر ملکی ماہرین سے معیار کی برتری کے لئے تجزیہ کرایا جاتا تھا اور اس ضمن میں یو ایس ایڈ (USAID) کی ٹیم برائے تعلیم نے پاکستان کا کئی مرتبہ دورہ کیا اور ملک کے طول و عرض کی تمام جامعات میں اساتذہ، طالب علموں اور منتظمین سے گفتگو کرتے ہوئے ان کی انتہائی تنقیدی نگاہ سے جانچ پڑتال کی اور اس کے بعد ایک رپورٹ ترتیب دی جس کا مختصر اقتباس یہ ہے : “ایچ ای سی کے سب سے زیادہ اہم پہلوؤں میں سے ایک اہم پہلو یہ ہے کہ یہاں ہر شعبے کی سرگرمیوں میں عمدہ اور اعلیٰ معیار پر زور دیا جاتا ہے — معیار پر توجہ مرکوز کرنے میں، ایچ ای سی کی قیادت کا رویہ یہ تھا کہ “معیار مقدار سے کہیں زیادہ اہم ہے”.

پاکستان میں اعلیٰ تعلیم کے نظام کا ایک اور جائزہ سائنس، ٹیکنالوجی اور ترقی پر اقوام متحدہ کے کمیشن کے چیئرمین پروفیسر مائیکل روڈے (Prof.Michael Rode) کی طرف سے بھی کیا گیا تھا. انہوں نے 2008 ء میں لکھا ، از اقتباس : “دنیا بھر میں جب ہم مختلف ممالک میں اعلیٰ تعلیم کی حیثیت پر گفتگو کرتے ہیں تو، اس بات سے تمام لوگ متفق ہوں گے کہ حالیہ برسوں میں بین الاقوامی سطح پر اعلیٰ تعلیم کے شعبے میں تیزی سے شاندار ترقی کی منازل طے کرنے والا ترقی پذیر ملک ، صرف پاکستان ہے. دوسرے ترقی پذیر ممالک میں بھی میں اعلیٰ تعلیم کا شعبہ ہے لیکن اس طرح کی شاندار مثبت ترقی جیسے گزشتہ چھ سالوں میں پاکستان میں ہوئی ہے وہ کہیں نہیں ہوئی “۔

پاکستان نے گزشتہ دہائی میں برق رفتاری سے تعلیم کے شعبے میں ترقی کی ہے، جس سے برملا یہ کہا جا سکتا ہے کہ اگر مضبوط و مستحکم نقطہ نظر اور عزم ہو اور فنڈز د ستیا ب ہوں ،تو معجزات ہوسکتے ہیں. اس طرح کی پیش رفت اعلیٰ معیار کی فیکلٹی ہی میں مضمر ہے ۔ اچھی جامعات خوبصورت عمارتوں سے نہیں بلکہ خوبصورت دماغوں سے وجود میں آتی ہیں ہمیں ایک مضبوط علمی معیشت(Knowledge Economy )کی جانب تیزی سے گامزن ہو نا ہے لیکن افسوس ہمارے ملک کی گزشتہ حکومتوں کی طرف سے قومی معاملات میں تعلیم ہی کو سب سے کم ترجیح دی گئی ہے۔ جب تک ہماری حکومتیں نظریاتی طور پر پر بصیرت نہ ہوں اور تعلیم کو ترجیح نہیں دیں گی تب تک ملک ترقی نہیں کرسکتا۔

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(بشکریہ جنگ لاہور)

(ایمرا نیوز)
بوریت کی انتہا ہو چکی ۔عجیب بدمزہ سا پھیکا پھیکا منظر ہے۔ ن لیگی حکومت جانے کے بعد ان کی قدر و قیمت کا احساس ہو رہا ہے۔ ظالم جاتے جاتے ساری رونقیں بھی لے گئے۔ خدا جانے اس جمہوری تھیٹر کو کس کی نظر لگ گئی کہ اب نہ تخت پوشیاں نہ جلسوں میں وہ تاج پوشیاں، صرف پیشیاں ہی پیشیاں رہ گئیں اور وہ بھی نعروں، جپھیوں، پپیوں اور پھول کی پتیوں کے بغیر ….. ہائے کیسے زمانے آئے کہ جلسوں جلوسوں پر علامتی جنازوں کا گمان گزرتا ہے۔نہ وہ ٹیڑھی میڑھی انگلیاںنہ وہ وکٹری کے جعلی نشاننہ وہ ’’اک واری فیر شیر‘‘ اور “I Love You Too”نہ اقبال کے مصرعوں کی ٹانگیں ٹوٹ رہی ہیں نہ غالب کے شعروں کے ٹخنے چٹخ رہے ہیں اور حبیب جالب بھی مکمل طور پر محفوظ۔ جہاں کان پڑی آواز سنائی نہ دیتی تھی وہاں قبرستان کا سا سکوت بلکہ سناٹا۔ جاتی امروں، ماڈل ٹائونوں کے گھروں کو جانے والی وہ سڑکیں تو بیوہ ہی ہو گئیں کہ بیریئرز ہی تو ان کا سہاگ تھے یا وہ لوگ جو راگ درباری سناتے ان پر سے گزرا کرتے تھے۔منڈی میں مندی ہی نہیں چل رہی بلکہ بھٹہ ہی بیٹھ گیا۔ کہاں وہ چاند چہرہ، ستارہ آنکھیں۔ کہاں گئے میرے وہ طلال، نہال، دانیال، خلال اور زہرہ جمال جن کا خیال تھا کہ جاہ و جلال کو زوال ہی ممکن نہیں کیونکہ آقائوں کی جڑیں بہت مضبوط اور پاتال تک گہری ہیں لیکن اب دیکھو ٹی وی

سکرینیں کیسے بھاں بھاں کر رہی ہیں کہ نہ کوئی لارج نہ میڈیم نہ سمال، سب چنڈال چوکڑیاں دھری کی دھری رہ گئیں۔میں تو یہ سوچ سوچ کر ہلکان پریشان ہوں کہ جب یہ اخباروں میں ’’وزیر اعظم‘‘ عمران خان پڑھتے یا ٹی وی پر سنتے ہوں گے تو ان معصوموں کے نازک دلوں پر کیا گزرتی ہو گی یا شاید یہ لوگ اب کسی اور کی گاڑی کے آگے دھمال ڈالنے کی پریکٹس کر رہے ہوں گے؟کہتے تھے جہاں ’’یوٹرن‘‘ ہو وہاں عمران کی تصویر کافی ہے۔ عمران نے تو ’’یوٹرن لے لیا، اب اپنی سنائو، اپنے ان داتائوں اور قصۂ پارینہ آقائوں کی بتائو کہ وہ کون کون سے ’’رائونڈ ابائوٹ‘‘ کے گرد پھیرے لگا رہے ہیں، چکر کاٹ رہے ہیں کہ جہاں سے چلتے ہیں وہیں پہنچ جاتے ہیں۔لے آئی پھر کہاں پر قسمت تمہیں کہاں سےیہ تو وہی جگہ ہے گزرے تھے ’’تم‘‘ جہاں سے99میں قدرت نے بہت سنگین وارننگ دی تھی لیکن یہ بھلے مانس ’’99‘‘ کے چکر سے نکلے ہی نہیں کہ یہ چکر ہے ہی بہت نحس کہ جو ایک بار اس میں پھنس گیا، کبھی نکلتے نہیں دیکھا۔ سچ پوچھیں تو یہ سب وہ نشانے ہیں جو خود اڑ کر تیر تک پہنچے۔ سیانے ایک آدھ تیر سے بھی بچتے ہیں، یہ وہ نمانے ہیں جو پورے ترکش پر پوری قوت کے ساتھ تشریف فرما ہو کر ریلیکس کرتے ہیں۔ہائے کیا دن تھے جب جاتی امرا کے جنگل (شیر کی رہائش گاہ) کے درختوں کی کسی ٹہنی پر میاں مٹھو چوری کھاتے اور کسی ٹہنی پر بلبل ہزار داستان چہچہاتی۔ اب ہر ٹہنی پر الو اونگھ رہے ہیں یا چمگادڑیں الٹی لٹک کر یوگا کر رہی ہیں۔ سب ڈیزائنرز سوٹ، مگرمچھ کی کھال کے بوٹ، ’’شیر‘‘ وانیاں، واسکٹیں، ساڑھیاں، غرارے شرارے ہینگروں پر ہی لٹکے رہ جاتے ہیں۔’’پاناما‘‘ سے پہلے انہوں نے کبھی سوچا بھی نہ ہو گا کہ تقریباً 22سالہ طویل اقتدار اور اجالے کے بعد آگے اڈیالے ہوں گے، غرور کا نتیجہ مفرور بیٹے، سرکار “WANTED”ڈار بن جائے گا۔ بائیس سالہ اقتدار کسی کو بھی بائولا کر سکتا ہے۔ 81تا 85صوبائی وزیر خزانہ و کھیل، 85تا 90وزیر اعلیٰ پنجاب، 90تا 93وزیر اعظم، پھر 97تا 99وزیر اعظم اور 2013تا 2017پھر وزیر اعظم…. ملک تھا یا ملوکیت؟ جمہوریت تھی یا راجواڑہ؟ برادر خورد بلکہ خردبرد کی بھی سن لیں کہ 4بار وزیر اعلیٰ پنجاب یعنی ڈائریکٹ اقتدار تقریباً 22سال۔ کھیل شروع ہوا 81میں جو آج تک جاری کہ اپوزیشن بھی اقتدار ہی کا دوسرا چہرہ یعنی 35سال سے بھی اوپر اور نتیجہ بلکہ نتائج؟ میرٹ کی موت، کرپشن کلچر، ادارے تباہ، معیشت برباد، اخلاقیات کے جنازے، اقربا پروری بلکہ چمچہ نوازی، اسراف بلکہ عیاشانہ اسلوب حکمرانی، شوقیہ دورے، بیرون ملک ذاتی جائیدادوں اور دولت کے کوہ گراں، خارجہ امور کی آڑ میں ذاتی تعلقات، ہر حلیف کی پشت میں خنجر زنی کی مسلسل پریکٹس، ہر محکمہ میں طفیلیوں کی نقب زنی، تاریخ ساز قرضے اور اپنے ’’لازوال‘‘ و ’’بے مثال‘‘ ہونے کا یقین لیکن افسوس یہ کہ’’سامان سو برس کا تھا پل کی خبر نہ تھی‘‘آگے آگے دیکھئے ہوتا ہے کیا لیکن میں اداس ہوں اور ملک کے سیاسی منظر پہ چھائی اداسی مجھے پریشان کر رہی ہے لیکن اس اداسی اور پریشانی میں PTIکے لئے ایک پیغام ہے کہ ___ کینڈے اور اوقات میں رہو، بدہضمی سے بچو ورنہ….. یہاں تو ان کے نام و نشان بھی باقی نہ رہے جو کہا کرتے تھے___’’ہمارے سروں پر آسمان بھی آ گرے تو ہم اسے اپنے نیزوں پر اٹھا لیں گے‘‘
(بشکریہ جنگ لاہور)

لاہور(ایمرا نیوز)
اُس نے ٹائی لگائی ہوئی تھی، نہ انگریزی سوٹ پہنا ہوا تھا، پورے لباس میں غلامانہ سوچ کی عکاس کوئی چیز نہیں تھی، وہ بالکل سادہ شلوار قمیص پہنے ہوئے ملاقات کے کمرے میں داخل ہوا تو پومپیو کو ذرا جھک کر ملنا پڑا، وہ جھکے ہوئے پومپیو سے ہاتھ ملا کر بیٹھنے لگا تو اُسے ایک اور امریکی کا بتایا گیا، اُس نے اس سے بھی ہاتھ ملایا، وہ پھر بیٹھنے لگا تو اُسے بتایا گیا کہ اور بھی امریکی ہیں، اُس نے ان سے بھی ہاتھ ملایا اور پھر بیٹھ گیا۔ امریکی حیران تھے کہ یہ کیسا پاکستانی وزیر اعظم ہے جس نے جھک کر سلام بھی نہیں کیا، اس نے پینٹ کوٹ بھی نہیں پہنا ہوا، اس کے گلے میں ٹائی بھی نہیں ہے اور سب سے بڑھ کر اس کے ہاتھ میں کوئی پرچی بھی نہیں، یہ بالکل خالی ہاتھ ہے۔ اس حیران کن منظر میں گفتگو کا آغاز ہوا، اُس نے سابق حکمرانوں کی طرح ترلے منتوں سے کام نہیں لیا بلکہ اسی انداز میں گفتگو کی جس طرح غیرت مندی کا تقاضا تھا۔ پومپیو بھی اس کی شخصیت کے سحر میں گرفتار ہو کر مسکراتا رہا، برابری کی سطح پر بات ہوتے ہوئے دیکھ کر بالآخر پومپیو نے اپنے دائیں طرف بیٹھے ہوئے ایک امریکی کو اشارہ کیا تو اس نے صحافیانہ انداز میں جب وزیر اعظم عمران خان سے پوچھا تو عمران خان نے کہا ’’میں سپورٹس مین ہوں اور سپورٹس مین جیت کے جذبے سے میدان میں اترتا ہے اور میں جیتنے کے لئے میدان میں اترا ہوں‘‘۔ جب پاکستانی وزیر اعظم امریکیوں کو یہ جواب دے رہے تھے تو مجھے بار بار یہ خیال آتا رہا کہ وہ تو بنی گالا میں اکثر مجھ سے کہا کرتے تھے کہ ’’میں کبھی ہارنے کے لئے میدان میں نہیں اترا، میں نے کبھی حوصلہ نہیں ہارا کیونکہ جو ٹیم میدان میں جیت کے جذبے سے اترتی ہے وہ زیادہ پُراعتماد ہوتی ہے، اس کا اعتماد اسے جتوا دیتا ہے۔ ‘‘ امریکیوں سے وزیر اعظم سیکرٹریٹ میں ہونے والے مذاکرات میں آرمی چیف بھی موجود تھے ورنہ اس سے پہلے یہ ہوتا تھا کہ امریکی اسلام آباد اور پنڈی میں الگ الگ ملاقاتیں کرتے تھے مگر اس مرتبہ ایسا نہ ہوا۔ اس مرتبہ تو استقبال بھی وزارت خارجہ کے ایک افسر نے کیا اور جو مذاکرات وزارت خارجہ میں بھی ہوئے وہاں بھی مخدوم شاہ محمود قریشی نے پاکستان کا مقدمہ بھرپور انداز میں لڑا، مذاکرات کے تعطل کو ختم کیا، بات چیت کے بند دروازے کھول دیئے۔
امریکیوں کو پاکستان میں استقبال کا منظر بھی عجیب لگا ہو گا، دورئہ پاکستان کے بعد جب پومپیو نئی دہلی پہنچے تو شسما سوراج ہاتھوں میں پھول لئے کھڑی تھیں۔ جی ہاں، دہلی ایئر پورٹ پر بھارتی وزیر خارجہ شسما سوراج خوشامدی لب و لہجہ کے ساتھ ہاتھوں میں پھول لئے کھڑی تھیں۔ اس مرتبہ بھارتی بڑے ناخوش تھے کہ آخر مائیک پومپیو اور جنرل جوزف کیوں اسلام آباد جا رہے ہیں، پہلے دہلی کیوں نہیں آ رہے؟ اسی لئے انہوں نے اپنی وزیر خارجہ کو ایئر پورٹ بھیج دیا مگر اب بھارتی کیا کریں گے، پومپیو تو شاہ محمود قریشی کو امریکہ کے دورے کی دعوت دے گئے ہیں۔ پاکستانی وزیر اعظم کو دنیا کے انیس ملکوں کی طرف سے دورے کی دعوت ہے مگر وہ کہیں نہیں جا رہے، وہ پہلے اس بات کا جائزہ لیں گے کہ پاکستان کو کہاں جانے سے زیادہ فائدہ ہو گا پھر کسی ملک میں جانے کا فیصلہ کریں گے۔

امریکی وفد کے وزیر اعظم آفس آنے سے پہلے وفاقی کابینہ کا اجلاس ہو رہا تھا جس میں ان بڑے سو مگرمچھوں کا ذکر ہوا جنہوں نے پاکستان کو لوٹا، جن کی لوٹ مار کے باعث پاکستانی معیشت کمزور ہوئی، بیرونی دنیا سے پیسے واپس لانے کی باتیں بھی ہوئیں، کابینہ نے اپنا صوابدیدی فنڈ واپس کیا، اس طرح ملکی خزانے میں 80ارب روپیہ آ گیا۔ برسہا برس سے جو ناانصافی ہو رہی تھی اس کے خاتمے کا فیصلہ ہوا، فیصلہ یہ ہے کہ اب پاکستان میں اسکول کی سطح تک یکساں نصاب تعلیم ہو گا، پرائیویٹ اسکولوں کی فیسوں کو لگام دی جائے گی، پرائیویٹ اسکولوں کی فیسوں کے اس بے لگام گھوڑے کو آج تک کسی نے روکا نہیں تھا، چائلڈ لیبر کے خاتمے کا بھی فیصلہ ہوا۔ بی آئی ایس پی کو جاری رکھنے کا فیصلہ ہوا لیکن بہت سی بے ثمر اسکیموں کو ختم کرنے کا فیصلہ ہوا۔

خواتین و حضرات! کابینہ کے ہر اجلاس میں جتنے عمدہ فیصلے ہو رہے ہیں اگر ان پر عمل ہو گیا تو پھر یہ منظر واقعی حیران کن ہو گا۔ اطلاعات کے وفاقی وزیر فواد چوہدری کہتے ہیں کہ ’’اگر ملک ترقی کرے گا تو ہم سب ترقی کریں گے، ملک اوپر جائے گا تو ہم سب اوپر جائیں گے۔ ‘‘ اس بات میں کوئی شک نہیں کہ لوگوں کی ترقی ملکی ترقی سے وابستہ ہے، لوگوں کی خوشحالی ملکی خوشحالی سے وابستہ ہے۔ یہ منظر بھی آپ پہلی مرتبہ دیکھ پائے ہیں کہ جی ایچ کیو میں یومِ دفاع کی تقریب میں شہداء کو خراجِ عقیدت پیش کرنے والی تقریب میں ملک کے وزیر اعظم مہمانِ خصوصی تھے۔ عمران خان سے پہلے یہ اعزاز کسی اور کو حاصل نہیں ہو سکا۔ حوصلہ رکھیں، آپ کے فائدے کے لئے بہت کچھ ہو رہا ہے۔ کسی اگلے کالم میں لکھوں گا کہ امریکیوں اور عربوں کی کیا مجبوریاں ہیں کہ وہ پاکستان کے ساتھ چلنے پر آخر کیوں مجبور ہیں؟ فی الحال اقبالؒ کا یہ مصرع ہی کافی ہے کہ

منزل یہی کٹھن ہے قوموں کی زندگی میں
(بشکریہ جنگ نیوز)

لاہور(ایمرا نیوز)
آج دنیا بھر میں رائج سیکولر اور لبرل نظام تعلیم نے گذشتہ تین صدیوں سے بظاہر ایسے غیر متعصب اور آزاد خیال تاریخ دان اور مورخ پیدا کیے جنہوں نے اسلام اور رسول اکرم ؐکے بارے میں بے شمار تحقیق کی اور ان کی کتابوں سے یوں محسوس ہوتا ہے جیسے انہوں نے اسلام کی بہت بڑی خدمت کی ہو اور وہ سید الانبیاء ﷺ کی ذات سے بہت متاثر تھے۔ یہی وجہ ہے کہ ان مصنفین کی کتابوں کا نہ صرف تمام عالم اسلام میں ترجمہ ہوا بلکہ آج تک ان لوگوں کی کتابوں کے اقتباسات کو اسلام کی حقانیت اور رسول خدا ﷺ کی شخصیت کی ہمہ گیریت کی دلیل کے طور پر پیش کیا جاتا ہے۔ لیکن یہ وہ بد بخت تھے جنہوں نے اس آزاد خیالی اور عدم تعصب کے لبادے میں ایک خطرناک زہر اپنی تحریروں میں اسلام ،قرآن اور رسول مقبول ﷺکی ذات کے بارے میں دانستہ طور پر گھولا ہے۔ ان مصنفین کی اکثریت گذشتہ دو صدیوں کی پیداوار ہے. یہ آکسفورڈ، کیمبرج، سکول آف اورینٹل سٹڈیز لندن اور ایسی ہی دیگر یونیورسٹیوں کے سیکولر ماحول میں بیٹھ کر صرف اور صرف اسلام اور رسول اکرمؐ کی ذات کے خلاف اسلامی تحقیق کے خوبصورت لبادے میں کتابیں لکھتے تھے۔ تعصب کا یہ عالم ہے کہ یہ لوگ ہندو مذہب کو تو اسکی رنگینی کی وجہ سے داد دیتے، بدھ کو انسان دوستی پر، یہودیوں کو دو ہزار سالہ مظلومیت اور نسل کشی پر اور عیسائیت کو حضرت عیسیٰ علیہ السلام کی تعلیمات پر سراہتے نظر آتے ہیں لیکن اسلام کویہ ایک خونخوار اور ظالم مذہب بنا کر پیش کرتے ہیں۔ ان جدید مستشرقین میں اولین نام مار گولیتھ (Margoliouth) کا ہے۔ لندن میں پیدا ہونے والا یہ شخص 1889ء کو آکسفورڈ یونیورسٹی میں آیا اور مرنے سے تین سال پہلے یعنی 1937ء تک وہیں رہا۔ یہ عربی، عبرانی اور ترکی زبان کا ماہر تھا اور آکسفورڈ میں عربی کا پروفیسر تھا۔ اس نے سب پہلے ’’قصیدہ بردہ‘‘ پر مقالہ لکھا جو تحقیق کے اعلی معیار پر تھا اور مسلمانوں کی نظروں میں بہت مقبول ہوا۔اسی شخص کا ایک اور ہم عصر سر ولیم میور (William Muir) تھا۔یہ برطانوی ہند کی سول سروس میں 1865ء میں خارجہ سیکرٹری بھی رہا اور آج کے صوبہ خیبر پختونخواہ کا اس وقت گورنر بھی۔ یہ دونوں مصنفین آج کے جدید یورپ کے مفکرین کے نزدیک اسلام اور مسلمانوں کو سمجھنے کا بنیادی ذریعہ سمجھے جاتے ہیں۔ دونوں کی تحریروں میں جھوٹ اور غلط تاریخی روایات سے اسلام اور سرکار دو عالم ﷺ کی شخصیت کو مسخ کرنے کی بھرپور کوشش کی گئی ہے۔ ولیم میور کی کتاب “The Life of Mohammed” 1857 ء میں منظر عام پر آئی اور مارگولیتھ کی کتاب “Mohammed and the Rise of Islam” 1905ء میں آئی۔ ولیم میور کی کتاب پر سرسیداحمدخان نے جس رد عمل کا اظہار کیا وہ غیرت ایمانی کا نمونہ تھا۔ انہوں نے اس کے جواب میں اپنی کتاب ’’خطبات احمدیہ‘‘ تحریر کی اور اسے لندن سے چھپوایا۔ ولیم میور کی کتاب اور مارگولیتھ کی کتاب دونوں یہ ثابت کرنے کے لیے لکھی گئیں کہ اسلام دراصل ایک چربہ مذہب ہے، اور رسول اکرم ﷺکی ذات (نعوذ باللہ) ایک اعلی سطح کے شاعر اور غیر مرئی طاقتوں کے زیراثر خیالات رکھنے والی تھی اور ان کے قبائلی مزاج نے انہیں جنگجو بنادیا تھا۔ میں وہ تحریر یہاں نہیں لکھ سکتا کہ اس کے لئے دل پر بہت جبر کرنا پڑے گا اور دوسرا یہ بھی کہ شاید آج کے جدید دور میں بھی ایسی تحریر کوئی مسلمان برداشت نہ کرسکے۔ ان دونوں مصنفین نے مسلمانوں کے اصل ماخذ قرآن، حدیث اور تاریخ کے الفاظ تبدیل کرکے اپنی کتابوں میں لکھے اور ایک منصوبے کے تحت ان خیالات کو آگے بڑھایا جو ایک ہزار سال پہلے عیسائی چرچ کے زیر سایہ لکھی جانے والی کتب میں تحریر کیے گئے تھے۔ مارگولیتھ نے تو رسول اکرم ﷺکی ذات پر بہت جھوٹ بولے۔ یہ سب جھوٹ نہ کسی اسلامی تاریخ میں ملتا ہے اور نہ ہی احادیث میں۔ لیکن ان کی کتابوں میں ڈھٹائی سے بولا گیا اور آج پوری دنیا میں یہ کتابیں ماخذ کے طور پر جانی جاتی ہیں۔ مارگولیتھ کی کتاب کے جواب میں ایک عرب عالم ڈاکٹر مصطفی ہدارہ نے ایک طویل مقالہ تحریر کیا جو کتابی صورت میں شایع ہوا۔ لیکن آج آپ یورپ تو دور کی بات ہے، مسلم دنیا کی یونیورسٹیوں کالجوں اور عام لائبریریوں میں جا کر دیکھ لیں آپ کو سرسید کی ’’خطبات احمدیہ‘‘یا مصطفی ہدارہ کی کتاب کہیں نہیں ملے گی۔ جبکہ ان یورپی مفکرین کی کتابیں نظرآئیں گی۔ ان کے بعد ایک طویل فہرست ان تمام مغربی یورپی مصنفین کی ہے جنہوں نے اسلام اور رسول اکرم ؐ کے مداحین بن کر ایسی کتب لکھیں جن میں سرکار دو عالم کی شخصیت کو غیرمحسوس طریقے سے مجروح کرنے، اور ان کا درجہ ایک پیغمبر سے گرا کر مصلح، سیاسی حکمران اور مفکر کے طور پر پیش کیا۔ اسی طرح انہوں نے اسلام کو بھی ایک الہامی دین کی بجائے فتوحات کرنے اور دوسری قوموں پر غلبہ حاصل کرنے اور جنگیں جیتنے کے لیے بنایا گیا ایک مذہب بتایا اور قرآن پاک کو (نعوذباللہ) فوجی حکمت عملی کی ایک خود ساختہ کتاب کے طور پر پیش کیا۔ ان لوگوں میں منٹگمری واٹ، میکس ویبر ، ٹائن بی، ڈاکٹر سپرنگر، گولڈ زہیر اور ول ڈیورانٹ جیسے بڑے نام بھی شامل ہیں۔ یہ سب کے سب آج دنیا کی ہر یونیورسٹی میں پڑھائے جاتے ہیں اور اسلام اور اسلامی تاریخ پر اتھارٹی مانے جاتے ہیں۔ یورپ اور مغرب تو خیر ان سے متاثر ہے کہ ان بیچاروں کے پاس ان کی زبانوں میں اسلام رسول اکرمؐ پر اصل مآخذ کی بنیاد پر لکھی جانے والی کتابوں کا فقدان ہے۔ لیکن پاکستان کا جعلی مفکر، اور محدود علمی استعداد والا دانشور، ادیب اور آج کے دور کا مقبول کالم نگار، جب اسلام پر بحث کرتا ہے تو قرآن و حدیث یا مسلمانوں کی تاریخی کتابوں کے حوالوں کی بجائے انہی لوگوں کے حوالے دیتا ہے اور پھر دلیل یہ دیتا ہے کہ یہ تو وہ لوگ ہیں جنہوں نے اپنوں کو بھی نہیں بخشا، اس لئے یہ زیادہ قابل اعتبار ہیں۔ دنیا کی کسی یونیورسٹی میں چلے جائیں، نصاب کی کوئی کتاب اٹھا لیں، آپکو اگر اسلام، قرآن اور پیغمبر خدا کے بارے میں پڑھنا ہے تو یہی مستشرقین نظر آئیں گے۔ ان تمام لکھاریوں نے مل کر یورپ اور مسلمان سیکولر طبقے کا ایک مزاج بنا دیا ہے۔ ایسا مزاج جس میں ان کو رسول اکرمﷺ کی توہین آزادی اظہار لگتی ہے ،یا پھر ایک معمول کا واقعہ نظر آتی ہے۔ گذشتہ چودہ سو سال سے یہ لوگ ایسا کچھ کرتے آئے ہیں اور مسلمان غیرت ایمانی کا ثبوت دے کر ان کے ناپاک وجود سے دھرتی کو پاک کرتے رہے ہیں۔ مسلمانوں کے اسی رویے کو انہوں نے شدت پسندی سے تعبیر کیا اور اپنے لوگوں کو مسلمانوں کے خلاف اکٹھا کر لیا۔ لیکن ایسا کیا ہوا کہ یورپ نے پہلی دفعہ پسپائی اختیار کی۔ خاکوں کا مقابلہ روک دیا۔ دراصل وہ اپنے ہی بنائے ہوئے ایک قانون کے جال میں آگئے ہیں اور انہیں اندازہ ہو گیا ہے کہ اگر اس قانون کے اطلاق کو توہین رسالت کے معاملے میں عالمی سطح پر معاملہ اٹھایا گیا تو ان کے لیے مسئلہ بن جائے گا۔ گذشتہ ستر سالوں میں ایک معاملے پر بہت زور دیا گیا ہے جسے نفرت کی زبان “Hate speech” کہتے ہیں۔ اسی قانون کی بنیاد پر یہودیوں نے ہولوکاسٹ پر بات کرنے پر پابندی لگوائی اور ہٹلر کی تعریف پر پابندی لگوائی ، اور نفرت کی زبان کے قانون کے اطلاق کا یہ عالم ہے کہ اگر ایک خاص تعداد سوشل میڈیا کی کسی ویب سائٹ یا پیج کے بارے میں یہ رپورٹ کرے کہ اس سے نفرت پھیلتی ہے تو اس کی انتظامیہ اس پر پابندی لگا دیتی ہے ۔ مسلمان اس وقت دنیا میں ایک ارب پچاس کروڑ ہیں۔ اگر ان تمام ستاون ممالک کی حکومتیں اقوام متحدہ کے زیر سایہ بننے والی اسلامی کانفرنس تنظیم میں یہ معاملہ اٹھاتی ہیں اور ایک ارب پچاس کروڑ مسلمانوں کی جانب سے اسے نفرت کی زبان “Hate speech” قرار دے دیا جاتاہے اور یہ معاملہ اقوام متحدہ تک بھی پہنچ جاتا ہے تو اقوام متحدہ کے نزدیک نفرت کی زبان کی بس ایک ہی تعریف ہے کہ وہ ایک کثیر تعداد کے دلوں کو دکھائے یا ان کے جذبات مجروح کرے، اور ایک ارب پچاس کروڑ کم تعداد نہیں ہوتی ۔ یہی وجہ ہے کہ یورپ کی طرف سے پسپائی اختیار کی گئی۔ لیکن پاکستان کی حکومت اور عمران خان کو یہ معاملہ اپنے وعدے کے مطابق اسلامی کانفرنس تنظیم اور اقوام متحدہ میں لے جانا چاہیے۔ اور اقوام متحدہ سے اسے اسکی نفرت کی زبان “Hate speech”کے طور پر “زمرہ بندی” (classify) کروانا چاہیے، اگر ایسا ہو گیا تو پھر یہ پسپائی ایک مستقل پسپائی بن جائے گی ورنہ یہ لوگ پھر سر اٹھا لیں گے۔
بشکریہ روزنامہ 92 نیوز

لاہور(ایمرا نیوز)
یہ میرا ایک پرانا کالم ہے۔ جس میں معمولی سا رد و بدل کر کے دوبارہ شائع کر رہا ہوں کہ آج بھی حسب حال ہے۔ میرے ایک دوست بہت خاص وضع کے آدمی ہیں۔ میں یہ کالم ان کا نام لے کر لکھ سکتا تھا۔ مگر اصل مسئلہ تو ان کے نام ہی کا ہے۔ جس کی وجہ میں یہ کالم لکھ رہا ہوں اب آپ چاہیں گے کہ اس مسئلے کی کچھ تفصیلات بیان کی جائیںتو چلئے میں تھوڑی بہت تفصیل بھی بیان کئے دیتا ہوں۔

ایک دفعہ میں انہیں ملنے ان کے دفتر گیا ۔ ایک کمرے کے باہر تعبیر صدیقی نام کی تختی لگی تھی میں الجھن میں پڑ گیا کیوں کہ ان کا نام تعبیر ہے مگر وہ صدیقی نہیں ہیں۔ سوچا کمرے میں جھانک کر دیکھ لیتا ہوں۔ جھانک کر دیکھا تو موصوف کرسی پر براجمان تھے۔ میں نے پوچھا’’برادر‘‘ یہ تعبیر صدیقی کون ہے؟

بولے میں ہوں۔ میں نے کہا ’’مگر تم صدیقی تو نہیں ہو!کہنے لگے میرا افسر تو صدیقی ہے‘‘

اسی طرح ایک اور دفتر میں ان کی ٹرانسفر ہونے پر میں ملاقات کے لئے ان کے پاس گیا تو پتہ چلا ان دنوں وہ تعبیر نقوی ہیں۔ وجہ دریافت کرنے کی اگرچہ ضرورت نہ تھی لیکن معلوم کیا تو وجہ وہی نکلی جس کا شبہ تھا یعنی جس افسر کے تحت وہ ان دنوں کام کر رہے تھے وہ نقوی تھے۔

ایک دفعہ میں نے انہیں دیکھا کہ پان کی گلوری منہ میں ہے پاجامہ پہنا ہوا ہے اور بات بات پر ’’آداب‘‘ کہتے ہیں۔معلوم ہوا کہ موصوف ان دنوں تعبیر رامپوری کہلاتے ہیں۔

کچھ دنوں بعد ملے تو بات بے بات پر بے تکلفی سے ہاتھ مارتے تھے۔ کڑھے ہوئے کرتے کے ساتھ چوخانے والی دھوتی باندھی ہوئی تھی اردو کی بجائے پنجابی بولتے تھے ۔ یعنی موصوف ان دنوں تعبیر جالندھری تھے!

ایک زمانے میں انہوں نے خشخشی داڑھی رکھ لی ٹخنوں سے اونچی شلوار پہننے لگے ۔ چند دنوں بعد ملاقات ہوئی تو کلین شیو ڈ تھے تھری پیس سوٹ پہنا ہوا تھا۔ ہاتھ میں پائپ تھا۔ میں نے پوچھا برادر آپ کی داڑھی کہاں گئی اس کی ضرورت پڑ گئی تھی کہنے لگے۔ وہ تو افسر کے ساتھ گئی لیکن آپ کو اس کی ضرورت کیوں پڑ گئی خیریت تو ہے؟میں نے کہا ایک ٹیلی ویژن چینل پر تفہیم دین پروگرام میں آپ کو بلانا تھا۔پروڈیوسر سے بات بھی ہو گئی ہے۔ ’’بولے‘‘ کوئی بات نہیں مہینے پندرہ دنوں تک افسر تبدیل ہونے والا ہے تقریباً ڈیڑھ ماہ بعد گھر پر آئے تو چہرے پر ننھی داڑھی اور کاندھے پر رومال تھا کہنے لگے چلو ٹیلی ویژن اسٹیشن چلتے ہیں۔ میں نے کہا جس پروڈیوسر سے بات ہوئی تھی اس کا تبادلہ ہو گیا ہے بولے تو پھر چلو نائی کی دکان پر چلتے ہیں!‘‘

موصوف کا تعلق کسی زمانے میں پی ٹی وی سے بھی تھا۔ ایک دن میں نے کہا تم جس طرح اس حکومت کے پروپیگنڈے میں لگے ہوئے ہو اگلی حکومت تمہیں الٹا ٹانگ دے گی۔ بولے ایسا نہیں ہو گا میں اگلی حکومت سے صرف چوبیس گھنٹے کی مہلت مانگوں گا ان سے کہوں گا کہ آپ نے جو بھی فیصلہ کرنا ہے میرے آئندہ چوبیس گھنٹے کے پروگرام دیکھ کر کریں۔ چنانچہ یہ فیصلہ ان کے حق میں تھا۔!

موصوف سرکاری ملازم ہونے کی وجہ سے اگرچہ کسی سرکاری پارٹی سے باقاعدہ وابستہ نہیں مگر ہر دور میں کسی نہ کسی سیاسی جماعت کے لئے کام ضرور کرتے رہے ہیں اور اسے حسن اتفاق ہی سمجھیں کہ ان کی پسندیدہ سیاسی جماعت برسراقتدار جماعت ہوتی ہے۔ ایک الیکشن کے دوران موصوف ایک سیاسی جماعت کے زبردست مخالف تھے اور مسلسل اس پر نقطہ چینی میں لگے رہتے تھے۔ جبکہ ان کے ایک دوست اس جماعت کے حامی تھے۔ نتائج والے دن یہ دونوں دوست ٹیلی ویژن کے سامنے بیٹھے تھے جس جماعت کے یہ مخالف تھے اس کی جیت کے آثار پیدا ہو گئے جس پر انہوں نے اپنے دوست کے کاندھوں کو مسرت سے جھنجھوڑا اور چلا کر کہا ’’پیارے ہم جیت رہے ہیں،جن دنوں ہمارے یہ دوست ’’روٹی ، کپڑا اور مکان‘‘ کے پرچار ک تھے ، ان دنوں اگر کبھی ان کے دفتر فون کیا جاتا تو بتایا جاتا کہ صاحب کسی کچی آبادی کے معائنے پر گئے ہوئے ہیں جنرل ضیاء الحق کے دور میں فون کیا جاتا تو جواب ملتا’’صاحب نماز پڑھ رہے ہیں‘‘ ان حوالوں سے میرے دوست ایک مثالی بیورو کریٹ ہیں ، موصوف کب کے ریٹائر ہو چکے ہیں، مگر جب کبھی ملتے ہیں اپنی دوران ملازمت کے حوالے سے بتاتے ہیں کہ انہوں نے کتنی بہادری سے وزرائے اعظم اور چیف سیکرٹری صاحبان کے خلافِ قانون حکم ماننے سے انکار کیا، اس پر مجھے بہت ہنسی آئی ہے کیونکہ یہ سب کچھ وہ ’’موقع کے گواہ‘‘ کو بتا رہے ہوتے ہیں گزشتہ روز غریب خانے پر تشریف لائے۔

چائے نوشی کے دوران کہنے لگے یار یہ عمران خان تو کمال کے کام کر رہا ہے، گزشتہ روز اس نے امریکہ کے وزیر خارجہ سے آنکھیں ملائے بغیر وہ سب کچھ کہہ دیا ، جو پاکستانی قوم کی آواز ہے۔ میں یہ سن کر ہنسا اور بولا ’’یار آپ سچ سچ بتائیں! آپ چاہتے کیا ہیں‘‘ بولے تم تو جانتے ہی ہو مجھے ہر اس شخص سے عشق ہے جو پاکستان کے لئے کچھ کرنا چاہتا ہے، میں نے ہنستے ہوئے کہا مجھ سے زیادہ کون جانتا ہے مگر اندر کی بات بتائیں کہ آپ چاہتے کیا ہیں۔ بولے پرائم منسٹر ہائوس میں بیٹھ کر ان کی پالیسیوں کو ٹھوس شکل دینا چاہتا ہوں۔ میں نے کہا بہت اچھی بات ہے آپ ابھی یہاں سے اٹھیں، چائے پھر بھی پی جا سکتی ہے، سیدھا بنی گالہ ہائوس پہنچیں اور عمران خان کو یہی کچھ کہیں جو آپ نے مجھ سے کہا ہے۔ موصوف نے میرا شکریہ ادا کیا اور چائے درمیان میں چھوڑ کر اٹھ بیٹھے۔ مجھے یقین ہے وہ اس وقت بنی گالہ میں کسی گھریلو ملازم کے کوارٹر میں بیٹھے ہوں گے اور اس ستم ظریف ملازم کی باتوں میں آ کر ’’خصوصی مشیر برائے وزیر اعظم‘‘ کے نوٹیفکیشن کا انتظار کر رہے ہوں گے۔

یہ سطور لکھتے ہوئے مجھے خیال آیا کہ یہ کچھ زیادہ نہیں ہو گیا؟ ہو تو گیا ہے لیکن بند ہ بھی تو دیکھیں کیا ہے؟
(بشکریہ جنگ نیوز)

لاہور(ایمرا نیوز)
حیرت ہے کہ مجھے اس پر نہ حیرت ہوتی ہے اور نہ ہی دکھ ہوتا ہے۔ شاید گزرتی عمر نے مجھے اس کا عادی بنا دیا ہے۔ کتابیں پڑھنے اور تحقیق پر عرق ریزی کرنے کا رواج یوں بھی دم توڑ رہا ہے بلکہ آخری ہچکیاں لے رہا ہے۔ نوجوان نسل کمپیوٹر کو ہی پوری کائنات سمجھتی ہے اور سانحہ یہ ہے کہ کمپیوٹر کی دنیا میں دی گئی علمی ویب سائٹس میں اتنی غلط، یکطرفہ اور ’’آزاد‘‘ انفارمیشن بھر دی گئی ہے کہ خود اس کی تصدیق کے لئے تحقیق لازم ہے۔ نام نہاد سوشل میڈیا اسی دنیا کا ایک اہم ستون ہے اور ہماری نگاہوں کے سامنے سوشل میڈیا جھوٹ کا شاہکار بنتا جا رہا ہے۔ بے شمار طلبہ سے ملنے کے بعد احساس ہوتا ہے کہ ان کی علمی کائنات سکڑتی جا رہی ہے۔ انہیں اپنے مضمون کے علاوہ کسی اور مضمون حتیٰ کہ بنیادی انفارمیشن اور اپنے ملک کی تاریخ بارے کچھ بھی علم نہیں۔ کتابیں پڑھنے کا رواج اور مطالعہ کو وسیع کرنے کی روایت ختم ہوتی جا رہی ہے۔ میرے نزدیک یہ صورت ایک سانحے سے کم نہیں۔

ذکر ہو رہا تھا پاکستانیات کا اور میں طلبہ کے ایک گروہ میں بیٹھا تھا۔ تبادلہ خیال سے راز کھلا کہ ہمارے ہونہار طلبہ کو ماشاء اللہ پاکستان اور قائد اعظم کے بارے سنی سنائی باتوں کے علاوہ کچھ بھی علم نہیں۔ طلبہ میں کتب بینی اور مطالعے کا ذوق استاد پیدا کرتا ہے۔ جب استاد ہی ان عادات سے فارغ ہو تو پھر نوجوانوں سے کیا گلہ؟ طالب علموں سے کیا گلہ جب ہمارے نامور دانشور اور بڑے بڑے اخبارات میں لکھنے والے ممتاز لکھاریوں کی تحریریں غلط فہمیاں پھیلاتی ہوں اور بلا تحقیق لکھنے کی چغلی کھاتی ہوں۔ ظاہر ہے کہ بڑے اخبارات میں چھپنے والی تحریر لاکھوں نہ سہی ہزاروں قاریوں کو تو بہرحال متاثر کرتی ہے۔ میرا حسن ظن ہے کہ ابھی تک چھپا ہوا لفظ اہمیت اور تقدس رکھتا ہے لیکن مجھے اندیشہ ہے کہ شاید آئندہ چند دہائیوں میں چھپے ہوئے الفاظ اپنا تقدس بھی کھو بیٹھیں گے۔ غور کریں تو محسوس ہو گا کہ ہم اس ’’کھوٹی‘‘ منزل کی جانب بڑے خلوص سے بڑھ رہے ہیں۔

یہ تو تھا تھوڑے سے درد دل کا اظہار ورنہ مجھے خود اپنی علمی کم مائیگی کا شدت سے احساس ہے۔ سارے کالم پڑھ نہیں سکتا مگر اپنی معلومات میں اضافہ کرنے کے لئے اکثر کالموں سے استفادہ کرتا ہوں۔ ان میں اگر قائد اعظم کے حوالے سے کوئی غیرمستند انفارمیشن یا نقطہ نظر میری طالب علمانہ نگاہ سے گزرے تو بصد ادب اس کی تردید یا وضاحت کی جسارت کرتا ہوں تاکہ ہزاروں قارئین غلط فہمی کا شکار نہ ہوں۔ سمجھنے والے جو مرضی ہے سمجھیں لیکن میں یہ جسارت قومی خدمت کے جذبے کے تحت کرتا ہوں۔

20جولائی کو اچانک محترم جی این مغل صاحب کے کالم پر نظر پڑ گئی تو میں ایک فقرہ پڑھ کر چونک گیا۔ قائد اعظم کی 11اگست 1947ء کی دستور ساز اسمبلی میں تقریر گزشتہ تین دہائیوں سے مشق ستم بنی ہوئی ہے۔ لبرل ازم اور سیکولر ازم کا پرچار کرنے والوں نے قائد اعظم کی سینکڑوں تقاریر میں سے صرف اسی کا انتخاب کیا ہے اور اس کی ایسی ایسی توضیحات کی ہیں کہ میں ان کی ذہانت کی داد دیئے بغیر نہیں رہ سکتا۔ البتہ قائد اعظم کی روح کو ان سے تکلیف ہوتی ہو گی کیونکہ انہوں نے صرف ایک ہی نہیں بلکہ سینکڑوں تقاریر کیں جن کو پڑھے بغیر ان سے انصاف نہیں ہو سکتا۔ ایک تھیوری یہ بھی ہے کہ چند حکومتی حضرات نے اس تقریر کو سنسر کرنے کی جسارت کی۔ میری تحقیق کے مطابق اس تھیوری میں تھوڑی سی جان ہے باقی سب مبالغہ۔ یہ حقیقت ذہن میں رکھیں کہ دستور ساز اسمبلی کی کارروائی سرکاری گزٹ کی صورت میں چھپتی رہتی ہے۔ قائد اعظم کی گیارہ اگست 47ء والی تقریر دستور ساز اسمبلی کی کارروائی میں من و عن چھپی ہوئی ہے۔ بارہ اور تیرہ اگست 1947ء کے اخبارات میں بھی پوری تقریر چھپی ہوئی ہے تو پھر سنسر کس نے کی؟ اس کا مطلب ہے کہ جن چند حضرات نے اس کے چند فقرے سنسر کرنے کا سوچا وہ ناکام ہوئے۔ ہم نے اسے سازش بنا کر بانس پر چڑھا دیا۔

جی این مغل صاحب نے اپنے کالم میں گیارہ اگست کی تقریر کا ذکر کرتے ہوئے قائد اعظم کے حوالے سے لکھا تھا ’’پاکستان کا ریاستی مذہب نہیں ہو گا۔‘‘ بہ امر مجبوری مجھے یہ تقریر ایک بار پھر پڑھنی پڑی۔ سچ یہ ہے کہ قائد اعظم نے کبھی ایسی بات نہیں کی۔ انہوں نے فقط یہ کہا کہ ’’آپ کا جس مذہب سے بھی تعلق ہو، اس کا حکومتی بزنس سے کوئی تعلق نہیں۔‘‘ ان کی تقریر مذہبی آزادی کا پروانہ تھی جو اسلامی حکومتوں کا طرئہ امتیاز رہا ہے نہ کہ سیکولر ازم کا پیغام___ ’’ریاست کا کوئی مذہب نہیں ہو گا‘‘ کا مطلب اور ہے اور یہ کہ ’’حکومت مذہب کی بنا پر شہریوں میں امتیاز نہیں کرے گی‘‘ کا مطلب یکسر مختلف ہے۔ قائد اعظم کے کثرت سے حوالہ بن جانے والے الفاظ ملاحظہ فرمائیں:

“You may belong to any religion or caste or creed __ that has nothing to do with the business of state.”

براہ کرم نوٹ فرما لیں کہ قائد اعظم نے کبھی یہ نہیں کہا کہ پاکستان کا ریاستی مذہب نہیں ہو گا کیونکہ وہ اس سے قبل ایک سو بار سے زیادہ کہہ چکے تھے کہ پاکستان کے آئین، قانون وغیرہ کی بنیاد اسلامی اصولوں پر تعمیر کی جائے گی، قرآن ہمارا آئین ہے، قرآنی اصول آج بھی اُسی طرح قابل عمل ہیں جس طرح 1400سال پہلے تھے، پاکستان اسلام کی تجربہ گاہ ہو گا اور ہم دنیا کو اسلامی آئین و قانون بنا کر دکھائیں گے وغیرہ وغیرہ۔ اس طرح کی بے شمار مختلف مواقع پر کی گئی تقاریر کے بعد وہ کیسے کہہ سکتے تھے کہ پاکستان کا ریاستی مذہب نہیں ہو گا؟ اگر اُن کے ذہن میں ایسا کوئی خیال ہوتا تو وہ قیام پاکستان کے بعد درجن بار یہ بیان نہ دیتے کہ پاکستان کے آئین کی بنیاد اسلامی اصولوں پر استوار کی جائے گی نہ ہی امریکی عوام کے نام اپنے براڈ کاسٹ پیغام میں پاکستان کو پریمئر اسلامی ریاست قرار دیتے۔

اسی طرح کچھ دن قبل میں محترم نفیس صدیقی کے کالم میں یہ الفاظ پڑھ کر ٹھٹک گیا۔ مجھے خدشہ ہوا کہ ان الفاظ سے غلط تاثر کو ہوا ملے گی کیونکہ قائد اعظم کے یوم وفات گیارہ ستمبر 48ء سے بہت سی سازشی تھیوریاں وابستہ ہیں۔

الفاظ ملاحظہ فرمایئے ’’قائد نے کراچی کے ستمبر کے قہر آلود گرم موسم میں ماڑی پور روڈ پر بے بسی کے عالم میں زندگی کے آخری سانس لئے۔ ‘‘ یہ درست ہے کہ قائد اعظم کی ایمبولنس خراب ہو گئی تھی لیکن یہ غلط ہے کہ انہوں نے وہیں زندگی کے آخری سانس لئے۔ مستند تاریخی ریکارڈ کے مطابق قائد اعظم کے معالج کرنل الٰہی بخش کے مشورے پر انہیں کراچی لایا گیا تھا کیونکہ انہوں نے بتا دیا تھا کہ قائد چند دنوں کے مہمان ہیں۔ مستند ریکارڈ کے مطابق قائد اعظم کا طیارہ 11ستمبر کو سوا چار بجے کراچی پہنچا۔ بقول قائد اعظم کے اے ڈی سی کیپٹن نور حسین جو ان کے ساتھ تھے کہ ہم کوئی ایک گھنٹے میں قائد اعظم کو لے کر گورنر جنرل ہائوس پہنچ گئے۔ رات ساڑھے نو بجے ان کی طبیعت زیادہ خراب ہو گئی، بے ہوشی طاری ہو گئی اور ان کے معالجین کرنل الٰہی بخش، ڈاکٹر ریاض علی شاہ اور ڈاکٹر مستری کی موجودگی میں ان کی روح قفس عنصری سے پرواز کر گئی۔ پاکستانی قوم باپ سے اور پاکستان اپنے عظیم ترین لیڈر سے محروم ہو گیا۔ دنیا دارالفنا ہے اور موت کا وقت مقرر ہے۔

اس حوالے سے خواجہ رضی حیدر کی کتاب قائد اعظم کے 72سال اہم ہے۔ عام طور پر مجھے ان معاملات میں حیرت ہوتی ہے نہ صدمہ لیکن واٹس ایپ میں ایک قاری کی رائے پڑھ کر تھوڑا صدمہ ہوا۔ لکھا تھا کہ قائداعظم نے پاکستان کا ترانہ ہندو سے لکھوایا۔ یہ وہی جگن ناتھ آزاد والا شوشہ ہے جس کی متعدد بار تردید کر چکا ہوں کہ قائد اعظم نہ جگن ناتھ کو جانتے تھے نہ کبھی اُس سے ترانہ لکھنے کو کہا اور نہ ہی جگن ناتھ نے پاکستان کا ترانہ لکھا۔ یہ سب جھوٹ اور سفید جھوٹ ہے لیکن اس سے اندازہ کیجئے جھوٹ کتنا طاقتور ہوتا ہے۔
(بشکریہ جنگ نیوز)

لاہور(ایمرا نیوز)
یہ سوال نما عنوان یاعنوان نما سوال انسان کیلئے بنیادی اہمیت کا حامل ہے کہ منصفانہ معاشرہ کیوں ضروری ہے جس کے حصول کی خاطر لوگ زندگیاں وقف کردیتے ہیں اور ضرورت ہو تو انہیں دائو پر بھی لگانے سے گریز نہیں کرتے۔پہلی بات یہ کہ ’’منصفانہ‘‘ کا مطلب ’’مساوات‘‘ ہرگز نہیں کیونکہ شکلوں سےعقلوں تک میں فرق ہوتا ہے۔ خوب صورت پرکشش اور بدصورت بے کشش ہوگا تو مساوات کیسی؟ ایسے ہی کمزور اور طاقت ور ایک سا کیسے ہو سکتا ہے؟ بے ہنر کا کسی فنکار کے ہم پلہ ہونا ممکن نہیں اور کسی سائیں لوک کو سائنسدان کے ساتھ بریکٹ کرنا خود ناانصافی کہلائے گا۔ عرض کرنے کا مطلب یہ ہے کہ ’’منصفانہ‘‘ کو ’’مساوات‘‘ کے ساتھ کنفیوژ نہ کیا جائے۔منصفانہ معاشرہ کامطلب ہے کہ عزت، عزت نفس، اناج، علاج علم کے حصول تک سب کی رسائی ہو اور یہ کثیر الجہت رسائی معاشرہ کے بالائی طبقات کو پیدائشی طور پر حاصل ہوتی ہےاور یہی وجہ ہے کہ وہ باقیوں یعنی محروموں کیلئے ان ضروریات کے حصول کو یقینی بنانا ضروری نہیں سمجھتے، اس کیلئے کوشش نہیں کرتے۔جو طبقات خوشحال، بااثر اور مضبوط ہوں…..ہر ممکن سہولت بلکہ عیاشی انہیں میسر ہو۔ رہن سہن، کھانا پینا اعلیٰ ہو، عمدہ سواریاں میسر ہوں، بچوں کیلئے اچھے سے اچھے تعلیمی ادارے دستیاب ہوں، چھٹیاں بیرون ملک گزار سکیں،
اعلیٰ سے اعلیٰ معالج ان کی دسترس میں ہو، ادارے ان کا استحصال نہ کرسکیں بلکہ قدم قدم پر ان کی معاونت کیلئے موجود ہوں تو انہیں کیا پڑی ہے کہ وہ معاشرہ کے محروم اور مظلوم، پسماندہ افتادگان خاک کیلئے کسی بھی قسم کی عملی یا فکری جدوجہد کر کے اپنی جان جوکھوں میں ڈالیں لیکن…..یہیں سے تباہی کا آغاز ہورہا ہے جس سے بچنے کیلئے کمزوروںکیلئے کچھ کرنا بیحد ضروری ہو جاتا ہے کیونکہ آج کا طاقتور کل کمزور ہوسکتا ہے، آج کا بااثر کل بالکل بے اثر ہوسکتا ہے، آج کا متمول کل غریب ہوسکتا ہے کیونکہ یہی قانون قدرت ہے، رب العالمین انسانوں کیا قوموں کے درمیان بھی دنوں کو پھیرتا رہتا ہے اور زندگی میکرولیول پر کسی بے رحم رولر کوسٹر کی مانند ہے جس میں اوپر نیچے، اونچ نیچ کا کھیل چلتا رہتا ہے اور بنی نوع انسان کی پوری تاریخ اس کی گواہی دیتی ہے۔خود اپنی تاریخ ہی دیکھ لیں۔ کہاں گئے بنو امیہ، کیا ہوا بنو عباس کو، کدھر گئے، سلطنت عثمانیہ، مغلیہ یا صفویہ کے شہزادے شہزادیاں؟ ماضی کے کمی کمین آج کے چوہدری، ماضی کے گمنام آج کے نامور، آج کے کمزور بے اثر کل کے طاقتور اور بااثر تو بزرگ یونہی نہیں کہا کرتے تھے کہ سدا بادشاہی صرف اللہ کی ہے اور سدا کا بادشاہ، بادشاہوں کا بادشاہ یہ چاہتا ہے کہ اس کی یہ مخلوق جو انسان کہلاتی ہے، اپنے خالق کے احکامات پر عمل کرے جو خود اس مخلوق کیلئے بہترین راستہ ہے اور منزل بھی۔ذرا تصور کریں آج آپ ہر لحاظ سے طاقتور ہیں اور اس بات سے بالاتر کہ آپ کے اردگرد کیسی کیسی غیر منصفی ہورہی ہے لیکن اس بات کی کیا ضمانت ہے کہ کل آپ کے پوتے، پڑپوتے یا ان کے پوتے بھی اتنے ہی طاقتور ور ہوں جتنے آج آپ خود ہیں۔ کل جب وہ معاشی، معاشرتی ضعف کی زد میں آئیں گے تو منصفانہ معاشرہ کے قیام کی آپ کی آج کی گئی جدوجہد یا کوشش ان کے کام آئے گی اور منصفانہ معاشرہ انہیں شرف انسانیت سے کبھی محروم نہیں ہونے دے گا۔ دوسرا رویہ یہ بھی ہوسکتا ہے کہ ’’آنکھ اوجھل پہاڑ اوجھل‘‘ یعنی تیسری، پانچویں، ساتویں پشت یا نسل کا کون سوچے تو یہ ایک خود غرضانہ، بے رحمانہ، سفاکانہ سوچ ہوگی کہ اصولاً اپنی ہی نہیں دوسروں کی آئندہ نسلوں پردھیان دینا بھی آپ کی ذمہ داری ہے اور یہ کوئی ’’اولیائی‘‘ نہیں، کمال نہیں بلکہ سیدھی سادی کامن سینس کی بات ہے کہ اگر آپ کا معاشرہ بدترین ماحولیاتی آلودگی کی لپیٹ میں آجائے تو یقین رکھیں آپ اپنے سنٹرل ائیرکنڈیشنڈ گھر یا فارم ہائوس میں بھی اس سے محفوظ نہیں رہ سکیں گے، لا اینڈ آرڈر تباہ حال ہوگا تو آپ اپنے مسلح گارڈز سمیت بھی محفوظ نہیں۔مختصراً یہ کہ عدالتی انصاف سے لیکر اقتصادی انصاف تک ایک منصفانہ معاشرہ کا قیام دراصل خود اپنا اور اپنی نسلوں کا استحکام ہے اور شاید جہاد اکبر اور سب سے بڑی عبادت بھی خصوصاً ان کیلئے جو مسلمان کہلاتے ہیں کہ ہمارے اسلاف نے تو صدیوں پہلے بنی نوع انسان کو پہلی ویلفیئرسٹیٹ کا تحفہ دیا تھا جس کیلئے میں منصفانہ معاشرہ کی اصطلاح استعمال کررہا ہوں جو آج شاید سکینڈے نیوین ملکوں کے سوا پورے مغرب میں بھی موجود نہیں۔”He who provides for this life, But takes no care for future, is wise for a moment, But a fool forever.”Victor Hugoاسی فلسفہ کو کچھ یوں بیان کرتا ہے۔”There is nothing like a dream to creat the future.”پاکستان مستقبل کی جانب اس مشکل سفر کا آغاز کر چکا، خدا ’’مسافروں‘‘ کو ہمت،صبر اور حوصلہ عطا فرمائے۔ آمین
(بشکریہ جنگ نیوز)

لاہور(ایمرا نیوز)
ماضی قریب میں مجھے دو مختلف اہم ٹی وی چینلز سے تعلق رکھنے والی دو نامور خواتین ٹی وی اینکر پرسنز نے الگ الگ ملاقات میں بتایا کہ وہ اسلامی تعلیمات کی روشنی میں سکارف پہننا چاہتی ہیں لیکن متعلقہ ٹی وی چینلز کی انتظامیہ نے انہیں ایسا کرنے سے روکتے ہوئے کہا کہ وہ اپنے اپنے ٹاک شوز کے دوران نہ سر ڈھانپ سکتی ہیں اور نہ ہی سکارف لے کر پروگرام کر سکتی ہیں۔ یعنی اگر نوکری کرنی ہے اور ٹی وی ٹاک شوز کی میزبانی کرنی ہے تو حجاب، سکارف یادوپٹہ نہیں چلے گا۔ ان میں سے ایک خاتون اینکر بہت پریشان دکھائی دیں اور کہنے لگیں میں تو اب میڈیا میں نوکری ہی نہیں کرنا چاہتی اور کوشش ہے کہ درس و تدریس کے شعبہ کو جوائن کر لوں۔ اُن کا کہنا تھا کہ نوکری اُن کی مجبوری ہے کیونکہ انہیں اپنے گھر اور بچوں کے اخراجات کے لیے پیسےکی ضرورت ہے اس لیے جب تک کوئی دوسری نوکری نہیں ملتی مجبوراً میڈیا کی نوکری کرنی پڑے گی۔ نجانے اور کتنی خواتین کو میڈیا اور دوسرے کئی شعبوں میں ان حالات کا سامنا ایک ایسے ملک میں ہے جو اسلام کے نام پر بنا لیکن وہاں اسلامی لباس پہننے پر نوکری پیشہ خواتین کو روکا جاتا ہے۔ ایسا فرانس یا مغرب کے کسی دوسرے ملک میں ہو تو دنیا بھر میں شور مچتا ہے لیکن افسوس کہ اگر پاکستان کے میڈیا میں کام کرنے والی خواتین کو بھی ان حالات کا سامنا ہے تو پھر اسلام کے نام پر بننے والے اس ملک میں اس غیر قانونی، غیر آئینی اور سب سے اہم غیر اسلامی اقدام کے خلاف کون آواز اُٹھائے گا۔ ایسا نہیں کہ میڈیا میں کام کرنے والی ہر خاتون کو ان حالات کا سامنا ہے۔ عموماً میڈیا میں خواتین کو ماڈلز، فیشن اور دیکھنے والوں کو attract کرنے کے لیے شو پیس کے طور پر پیش کیا جاتا ہے جو میری نظر میں خواتین کا بدترین استحصال ہے ، اُن کے ساتھ زیادتی ہے بلکہ اُن کی یہ توہین ہے جس کی حوصلہ شکنی کرنی چاہیے۔ ایسا بھی نہیں کہ میڈیا میں ہر کسی کی ایسی سوچ ہو۔ یہاں ایسی اینکر پرسنز ہیں جنہوں نے خالص اسلامی وجوہات کی بنا پر سر ڈھانپنا شروع کیا اور اُنہیں اُن کی مینجمنٹ نے ایسا کرنے سے نہیں روکا۔ مثال کے طور پر نامور اینکر پرسن مہر عباسی نے جب اپنے شو میں دوپٹہ لینا شروع کیا تو اُنہیں کسی ایسی مشکل کا سامنا نہیں کرنا پڑا۔ مہر عباسی نے اس تبدیلی پر سوشل میڈیا کے ذریعے اپنا یہ پیغام دیا:
’’لوگ پوچھ رہے ہیں میں نے دوپٹہ کیوں لینا شروع کر دیا۔ بہت پڑھنے اور سمجھنے کے بعد یہ فیصلہ کیا ہے، یہ ایک لمبا سفر تھا، مجھ پر کسی نے دوپٹہ مسلط نہیں کیا یہ میری اپنی مرضی ہے، سادہ جواب یہ ہے کہ یہ اللہ کا حکم ہے۔ عورتیں مجھے کہتی ہیں کہ آپ ہمارے لیے فیشن آئیکن ہیں مجھے اس پر الٹا شرمندگی ہوتی تھی۔‘‘

مہر عباسی نے بہت خوبصورت بات کی ’’سادہ جواب یہ ہے کہ یہ اللہ کا حکم ہے‘‘۔ اب جو اللہ کے حکم کی تعمیل کرنا چاہیں اُسے ایسا کرنے سے میڈیا ہی اگر روکے گا تو پھر ایسی خواتین کے حق کے لیے کون آواز اٹھائے گا۔ ایک اور خاتون اینکر پرسن نادیہ مرزا جو سکارف لے کر اپنا ٹاک شو کرتی ہیں اُنہوں نے اپنے ایک حالیہ ٹیوٹ میں لکھا: ــ’’میرا حجاب لینے کا تجربہ یہ کہتا ہے کہ جیسے نماز آپ کو برائیوں سے روکتی ہے ایسے ہی حجاب آپ کو احساس دلاتا ہے کہ اس کی عزت اور حرمت آپ کی ذمہ داری ہے۔‘‘

میں پہلے بھی یہ بات اپنے ایک کالم میں لکھ چکا ہوں کہ ایک بار ایک ٹی وی وہ چینل نے مجھے ایک ٹاک شو دینے کی بات کی تو مجھے کہا کہ آپ کے ساتھ ایک خاتون میزبان کو بھی پروگرام میں رکھا جائے گا۔ میں نے وجہ پوچھی کہ خاتون کیوں تو مجھ سے کہا گیا اس لیے کہ اس سے ریٹنگ بہتر آتی ہے یعنی زیادہ لوگ دیکھتے ہیں۔ میں تو ٹی وی کا صحافی نہیں نہ ہی کبھی مجھے ٹی وی اینکر بننے کا شوق رہا لیکن مجھے یہ بات سن کر بہت دکھ ہوا ۔ ایک بڑے ٹی وی چینل کے اہم ذمہ دار سے میں نے پوچھا کہ آخر کیا وجہ ہے کہ اُن کے چینل میں کوئی ایک بھی خاتون اینکر پرسن یا نیوز ریڈر ایسی نہیں جو سرڈھانپتی ہو، پردہ کرتی ہو یا حجاب لیتی ہو۔ میں نے سوال کیا کہ سر ڈھانپنے والی، پردہ کرنے والی اور حجاب لینے والی کسی خاتون میں اُنہوں نے قابلیت نہیں دیکھی کہ وہ خبریں پڑھے یا کسی پروگرام کی میزبانی کرے۔ ٹی وی چینل کے ذمہ دار نے کہا کہ ہاں آپ ٹھیک بات کر رہے ہیں اور وعدہ بھی کیا کہ تبدیلی لائی جائے گی لیکن اس بات کو کئی ماہ گزر گئے لیکن اُس چینل میں ایسی کوئی تبدیلی نظر نہیں آئی۔پردہ کے بارے میں اسلام کیا کہتا ہے، ہمارے آئین کا کیا منشاء ہے اس کے بارے میں تو کسی کو کوئی شبہ نہیں ہونا چاہیے لیکن میرا سوال اُس نام نہاد سیکولر اور لبرل میڈیا سے ہے جو بے پردگی اور فحاشی کو پھیلانے اور ایسا کرنے والوں کی مرضی اور اُن کے حق کو تسلیم کرنے پر تو زور دیتا ہے اور بنیادی حق سے جوڑتا ہے لیکن اُن خواتین اینکر پرسنز کو یہ حق نہیں دیتا کہ وہ اپنی مرضی اور منشاء کے مطابق حجاب لیں اورسر ڈھانپیں۔ اس معاملہ کو پاکستان براڈکاسٹنگ ایسوسی ایشن، صحافتی تنظیموں، حکومت اور پارلیمنٹ کو اُٹھانا چاہیے تاکہ جو نوکری پیشہ خاتون چاہے اُس کا کسی بھی شعبہ سے تعلق ہو اگر وہ پردہ کرنا چاہتی ہے، سر ڈھانپنا یا حجاب کرنا چاہتی ہے تو اس کا احترام کیا جانا چاہیے۔

(بشکریہ جنگ نیوز)

لاہور(ایمرا نیوز)
قو م خود تبدیل ہوئے بنا سب کچھ بدلنے کی خواہاں، رہنما تدبر نہیں تکبر،دلیل نہیں دھمکی ،منطق نہیں مرضی اور حکمت نہیں زورِ بازو سے سب کچھ بدلنے کے چکر میں ۔

دکھ یہ کہ ممنو ن حسین صدر ِپاکستان ہو کر عدالتی مفرور حسین نواز کو جھپیاں ماریں ، غم یہ کہ آئین، قانون کی اس توہین پر اتنا شور بھی نہ مچے جتنا عمران شاہ کے تھپڑوں پر،دکھ یہ کہ 3بار کے وزیراعظم نواز شریف سوا دو سالوں میں 5فورمز پر سنے جانے کے باوجود 3سوالوں کے جواب نہ دے سکیں ، غم یہ کہ جس کیس کا میاں صاحب خود دفاع نہ کرسکیں ،بڑے بڑے ’’جگادری‘‘ ا بھی تک اس کیس کا دفاع کر رہے ،دکھ یہ کہ عمران شاہ کو سزا ہلکی ملی ، غم یہ کہ سانحہ ٔ بلدیہ ٹاؤن سے سانحہ ٔ ماڈل ٹائون تک ہلکی سزا بھی نہ ہوئی ،دکھ یہ کہ معیشت آئی سی یو میں ،غم یہ کہ مفتاح اسماعیل ،اسحق ڈار بھی مشورے دے رہے ، دکھ یہ کہ مولانا فضل الرحمن الیکشن ، اسمبلیوں کو جعلی سمجھیں ،غم یہ کہ ان کی جماعت انہی جعلی اسمبلیوں کا حصہ ،بیٹا اسی جعلی اسمبلی میں ڈپٹی اسپیکر کا الیکشن ہارا اور مولانا نے خود بھی انہی جعلی ممبران سے ووٹ مانگے ، دکھ یہ کہ کراچی نے ایم کیو ایم کو رد کر کے مینڈیٹ دیا عمران خان کو اور عمران خان نے ہاتھ ملایا ایم کیو ایم سے،غم یہ کہ بحیثیت وزیر حکومت کا حصہ ہو کر خالد مقبول صدیقی کہتے پھریں ’’ یہ الیکشن جعلی ‘‘، دکھ یہ کہ آئی جی سے وزیراعلیٰ پنجاب تک کوئی بھی خاور مانیکا کا دباؤ برداشت نہ کرسکا ،غم یہ کہ وزیراعظم 80فیصد کیس سے ہی لاعلم ، دکھ یہ کہ عمران خان کی سیاسی و بیوروکریٹک تقرریاں انتہائی بُر ی ،غم یہ کہ وہ یہ ماننے کو تیار ہی نہیں۔

دکھ یہ کہ کرپشن میں ڈوبا سندھ عام آدمی کیلئے جہنم بن چکا ،غم یہ کہ چرچے بلاول کے تقریری حسن کے ، دکھ یہ کہ بلوچستان میں با ل صفاپائوڈر والے آٹے کی روٹی بھی اتنی مہنگی کہ 3وقت کھانے والے ایک وقت پر آگئے ،غم یہ کہ سرداروں کے پالتو جانوروں کی خوراکیں دبئی سے آرہیں ، دکھ یہ کہ انصاف کی آس میں غریب کی نسلیں مرمُک جائیں ، غم یہ کہ طبقہ ٔ اشرافیہ کیلئے جیلیں فائیواسٹار،قید خانے رنگین، ملزم عاصم حسین کے علاج باہر ، ملزم شرجیل میمن کی سب جیل میں شہد سے زیتون تیل تک سب کچھ میسر اور مجیدا چکزئی سے مشتاق رئیسانی تک سب آزاد ، دکھ یہ کہ شہباز شریف چیف جسٹس کے سامنے کہہ دیں کہ’’ 4سوکروڑ لگا کر ایک بوند صاف پانی نہ پہنچا سکا‘‘ اور پھر بھی آزاد ،غم یہ کہ صاف پانی منصوبے کی ایک چُنی مُنی کمیٹی کے سربراہ قمر السلام کا سچ بھی جھوٹ ہوا ، دکھ یہ کہ پہلے کاغذوں میں بلاول کی زمین آٹھ روپے مرلہ، شریفوں کا رائے ونڈ اڑھائی روپے مرلہ ،غم یہ کہ اب کپتان کا فضائی سفر55روپے فی کلومیٹر ،دکھ یہ کہ فیاض الحسن چوہان کی حاجی نرگس والی تقریر بے ہودگی ، غم یہ کہ اس بے ہودگی پر سامنے بیٹھے اسلامی جمہوریہ پاکستان کے ’’شاہین ‘‘ قہقہے ماررہے ،تالیاں بجار ہے ۔

دکھ یہ کہ تحریک انصاف حکومت بونگیوں پہ بونگیاں ماررہی ،غم یہ کہ باقاعدہ منصوبہ بندی کے تحت عمران خان کومتنازع بنانے کیلئے اندرون وبیرون ملک سوچوں سے زیادہ سرمایہ کاری ہو چکی ،دکھ یہ کہ کوئی سچ ماننے کو تیار ہی نہیں ،غم یہ کہ ہر جھوٹ من وعن مانا جارہا ،دکھ یہ کہ کوئی پرانا پاکستان چھوڑنے کو تیار نہیں ،غم یہ کہ تعصب ،تمسخرکی عینکیں لگائے ہر کوئی پوچھ رہا کہاں ہے نیاپاکستان ،دکھ یہ کہ اند رسے سب ڈکٹیٹرز ،غم یہ کہ اوپر سے سب جمہوریت پسند ،دکھ یہ کہ اپنی اولادیں ،جائیدادیں باہر ،غم یہ کہ ہماری نسلوں کا مستقبل ان کے ہا تھ میں ،دکھ یہ کہ ملک قرضے کا سود دینے سے بھی قاصر ،غم یہ کہ امریکہ کو سبق سکھانے کی باتیں ہور ہیں ،دکھ یہ کہ ہاتھ خون سے رنگے ہوئے ، غم یہ کہ دعوے پارسائی کے ،دکھ یہ کہ اپنے حقوق کیلئے بھی آواز اُٹھا نہیں سکتے ،غم یہ کہ مسلم اُمہ کی ٹھیکیداری ہورہی ،دکھ یہ کہ سب لٹیروں کے ساتھی ،غم یہ کہ انتظار عادل حکمران کا ، دکھ یہ کہ چند خاندانوں کی نسل درنسل غلامی کی جارہی ،غم یہ کہ سپنے دیکھے جارہے عوامی راج کے اور دکھ یہ کہ آئیڈیل شاہ رخ، ایشوریہ ،غم یہ کہ خواب دیکھے جار ہے آزادیٔ کشمیر کے ۔

دل تو چاہ رہا تھا کہ جعلی دودھ سے جعلی پانی تک ،ہر دو نمبری میں ایک نمبر قوم پر بھی بات کروں مگرپھر بات کہیں سے کہیں نکل جائے گی ،یہ قصے پھر سہی ،آج ذکر رہنماؤں تک ہی موقوف ، اپنے وہ رہنما جن کا ایک مشتر کہ دکھ یہ کہ جمہوریت ، سویلین بالادستی اور پارلیمنٹ کی سپریمسی کے خلاف سازشیں ہور ہیں ،حقیقت ِ حال یہ کہ کرپشن فری پاکستان کی خواہش مند جماعت اسلامی نے وزارتِ عظمیٰ کیلئے ووٹ دیا نواز شریف کو ،اتحادی بنی تحریک انصاف کی ، منصورہ بلا کر کھانا کھلایا زرداری صاحب کو ،مولانا فضل الرحمن مشرف ،پی پی اور ن لیگ سب کے اتحادی ،حلف نامے میں تبدیلی ،فاٹا مرجر کو بنیاد بنا کر مولانا نے جس ن لیگ کو چھوڑا 4ماہ بعد اسی ن لیگ کے امیدوار کی حیثیت سے صدارتی انتخاب لڑا،اچکزئی صاحب کل جس ایم ایم اے کو ’’مُلا ملٹری ا لائنس‘‘ کہتے تھے ، آج اسی ایم ایم اے کے ساتھ کھڑے ہوئے ،آصف زرداری نے ق لیگ کو قاتل لیگ کہا پھر ق لیگ کو شاملِ اقتدار کر کے پرویز الہٰی کو ڈپٹی وزیراعظم بنا دیا ،خود اسپیکر شپ کیلئے ن لیگ سے ووٹ لے لئےمگر وزارت عظمیٰ کیلئے شہباز شریف کو ووٹ نہ دیئے ، ابھی کل ہی زرداری صاحب رائے ونڈ میں فرما رہے تھے ’’مجھے اور نواز شریف کو چھوڑیں ہمارے بچے بلاول ،بختاور اور حسن ،حسین بھی مل کر چلیں گے ، پھر انہی کے منہ سے یہ سنا ’’اس ملک کا سب سے بڑا ناسور نواز شریف ‘‘ انکل نوا زشریف آپ مودی کے یار۔۔۔ بلاول کے درجنوں ایسے بیانات ، ایک الگ کہانی۔ یاد رہے جب معاملہ اقتدار کا ہو ،مفاد مشترکہ ہو تو مل کر این آر او بھی ہوجائے ،میثاقِ جمہوریت بھی کر لیا جائے ، پنجاب اور مرکز میں اکٹھے اقتدار کے مزے بھی لوٹ لئے جائیں ، جمہوریت کی آڑ میںدھرنوں کے دنوں پارلیمنٹ میں ایک ہونے کا ڈرامہ بھی ہو جائے ۔

ذرا ن لیگ کی بھی سن لیں ، دھرنوں کے پیچھے خفیہ ہاتھ ،اس انٹرویو پر مشاہد اللہ فارغ ، خود نواز شریف یہی فرمائیں تو واہ واہ ،ڈان لیکس غلط ، طارق فاطمی ،پرویز رشید قربان ،خود میاں صاحب یہی کہہ دیں تو تالیاں ،قومی اسمبلی میں نواز شریف کہیں ،جناب عالیٰ یہ ہیں وہ ذرائع آمدن کہ جن کی بنیاد پر ہم نے ایون فیلڈ اپارٹمنٹس خریدے،

تب بھی ’’میاں دے نعرے وجن گے ‘‘اور اگر احتساب عدالت میں کہہ دیں ’’ پیسے کہاں سے آئے ،فلیٹس کیسے خریدے گئے ، مجھے تو کچھ پتا ہی نہیں ‘‘ تب بھی نعرے ’’میاں دے ہی وجن گے‘‘ پانامہ پہلا فیصلہ ٹھیک تو دوسرا فیصلہ غلط ،حدیبیہ فیصلہ ٹھیک ، احتساب عدالت کا فیصلہ غلط ، زرداری صاحب کو لاڑکانہ ،لاہور کی سڑکوں پر گھسیٹیں گے ،پیٹ چیر کر لوٹا مال نکالیں گے ،واہ واہ ، واہ واہ ، زرداری صاحب کو رائے ونڈ کھانے کھلانے سے صدارتی انتخاب تک ،ہر معاملے میں منتیں سماجتیں ،واہ واہ ، واہ واہ ۔

ذرا سوچئے ایسے جمہوریت پسندوں کو کسی دشمن یا سازش کی بھلا کیا ضرورت کہ جن کا حال یہ وزیراعظم گیلانی پرویز مشرف سے حلف لیں ،ن لیگ کے وزراء مشرف سے حلف لے لیں ، پی پی گارڈ آف آنر دے ،ن لیگ باہر بھجوائے ،مشرف کیس کی فائل 35دن وزیراعظم عباسی کے میز پر پڑی رہے اور دستخط نہ ہوسکیں لیکن ہر ایک کی تقریر ، بھاشن میں مشرف کی برائیاں اور رونا دھونا یہ کہ آمر کو کیوں واپس نہیں لایا جارہا ، حکومت دونوں پارٹیوں نے کی ،پی پی کو تو چھوڑیں ، وہ تو بے نظیر بھٹو کے قاتل بھی نہ پکڑسکی، حالانکہ زرداری صاحب فرما چکے تھے کہ ’’وہ بی بی کے قاتلوں کو جانتے ہیں ‘‘، ن لیگ بھی 5سال اقتدار میں رہ کر مشرف کو بھجوا سکی ،واپس نہ لا سکی ۔

یقین جانیے جب 5سال پانی و بجلی وزارت کے مزے لوٹ کر بھی کچھ نہ کرنے والے خواجہ آصف آج ڈیم کی اہمیت پر پُر مغز باتیں کریں ، جب 5سال اقتدار میں رہ کر اور ایک سال وزیرداخلہ رہ کر احسن اقبال فرمارہے ہوں کہ ’’ باہر پڑے 2ارب ڈالر کیوں نہیں لائے جارہے‘‘ اورجب 12دنوں کے اقتدار والے عمران خان سے 5دفعہ وزیراعلیٰ رہنے والے شہباز شریف یہ پوچھ رہے ہوں کہ’’ کہاں ہے ریاست مدینہ‘‘ تو یقین ہو جائے کہ سب نمبر گیم کے کھلاڑی ،شکوے، شکایتوں والی مشینیں ، قولی شیر ، باتوں کے دھنی ، زمانہ امن کے ٹیپوسلطان اور نظریۂ ضرورت کے امام ، اور پھر جب تیسرے درجے کے قاتل ریمنڈ ڈیوس کی ’’باعزت واپسی ‘‘ کیلئے سر دھڑ کی بازی لگا نے والی پی پی حکومت کے سرخیل اور رچرڈ ہالبروک کے پیچھے ہاتھ باندھے کھڑے زرداری صاحب کے جانثار رضا ربانی آج عمران خان کو مشورے دیتے ملیں کہ ’’ہم خود مختار قوم ،آپ امریکی وزیرخارجہ سے نہ ملیں ‘‘تویہ یقین بھی آجائے کہ جب تک یہ سب زندہ، سلامت ،انہیں کسی دشمن ، کسی سازش کی کوئی ضرورت نہیں ،یہ خود کفیل ، چشم بددور، باقی رہ گئی ،تبدیلی ،نیا پاکستان ،ریاستِ مدینہ ،اللہ خیر ہی کرے، قوم خود تبدیل ہوئے بنا سب کچھ بدلنے کی خواہاں، رہنما تدبر نہیں تکبر، دلیل نہیں دھمکی ، منطق نہیں مرضی اور حکمت نہیں زورِبازو سے تبدیلی لانے کے چکر میں ۔
(بشکریہ جنگ نیوز)