Category کالم

(میڈیا 92نیوز)

گزشتہ ہفتے سپریم کورٹ لاہور رجسٹری میں ڈیجیٹل فرانزک ریسرچ اینڈ سروس کے ڈائریکٹر کوکب جمال نے پی کے ایل آئی سے متعلق 43صفحات اور 20ہزار دستاویزات پر مشتمل فرانزک آڈٹ رپورٹ عدالت عظمیٰ میں جمع کرائی۔ عدالت عظمیٰ کے سامنے پی کے ایل آئی کے بارے میں بے شمار بے ضابطگیاں سامنے لائی گئی ہیں ۔ ایک ہی کمپنی کو مختلف ٹھیکے دیئےگئے۔ پنجاب کے سابق وزیر اعلیٰ شہباز شریف جو ہر وقت میرٹ کا راگ درباری پچھلے تیس برس سے الاپ رہے تھے کہ ان کی حکومت نے ہر کام میرٹ پر کیا اس کی قلعی اس رپورٹ کے بعد کھل گئی ہے۔ اس ادارے کی فرانزک رپورٹ نے لوگوں کی آنکھیں کھول دی ہیں۔ پاکستان کڈنی اینڈ لیورٹرانسپلانٹ انسٹی ٹیوٹ سے متعلق چیف جسٹس میاں ثاقب نثار نے ازخود نوٹس کی سماعت کرتے ہوئے سخت برہمی کا اظہار کیا ہے اور ادارے کے سربراہ کا نام ای سی ایل میں ڈالنے کا حکم دیا ہے۔ 20 ارب 60 کروڑ روپے خرچ ہوئے اوراس ادارے کے تعمیراتی اور دیگر کام کرنے والی کمپنیوں کو ایڈوانس اربوں روپے کی ادائیگیاں کی گئیں۔ مثلاً ایک کمپنی کو 12ارب 13کروڑ اور دوسری کمپنی کو 16ارب 84کروڑ روپے ایڈوانس دے دیئے گئے۔ کام شروع نہیں ہواتھا اور پیسے ایڈوانس مل گئے۔ اس پر تبصرہ کریںگے تو پھر برا منائیں گے۔ دوسری جانب اس ملک میں بعض ٹھیکیداروں کو کام کرنے کے بعد بھی برس ہا برس تک پیسے نہیں ملتے۔ مگر یہاںتو اس ادارے کے پیچھےشہباز شریف کا ہاتھ تھا۔ انفراسٹرکچر ڈویلپمنٹ اتھارٹی قائم کرکے ایک بیوروکریٹ کو اس کا سربراہ بنایا گیا جس کی اٹھتے بیٹھتے میاں صاحب تعریف کرتے رہے ہیں۔اب تک سرکاری خزانے سے 30ارب روپے خرچ ہو چکے ہیں۔ 10کروڑ روپے ماہانہ تنخواہیں جا رہی ہیں۔ لاکھوں روپے کا ماہانہ پٹرول اور ڈیزل خرچ ہو رہا ہے، گاڑیوں کی دیکھ بھال پر ماہانہ لاکھوں روپے خرچ ہو رہے ہیں۔ غریب ملک اور شاہ خرچیاں آسمانوں پر۔ الیکشن 21ارب روپے میں ہواہے اور یہ ادارہ اس سے بھی زیادہ پیسوں کا بناہے۔
ہم نے جب شروع میں آج سے تین برس قبل اس منصوبے کی مخالفت کی تھی تو اس اسپتال سے جن کی دال روٹی بلکہ مرغن غذائیں چلتی تھیں اور اب بھی چل رہی ہیں انہوں نے ہماری بات سے اختلاف کیا تھا بلکہ مخالفت کی تھی۔ آج خود چیف جسٹس میاں ثاقب نثار نے ازخود نوٹس لے کر اس ادارے کے خلاف جب فرانزک آڈٹ کرایا تو بے شمار مالی بے ضابطگیاں سامنے آئی ہیں۔ ہم نے تب بھی لکھا تھا کہ20 ارب روپے صرف ایک ادارے پر خرچ کرنے کی بجائے یہ 20ارب پنجاب کے ان تمام ٹیچنگ اسپتالوں کے جگر اور گردوں کے شعبہ جات کو دیئے جانے چاہئیں جو اس وقت کڈنی اور لیور ٹرانسپلانٹ کر رہے ہیں تاکہ وہ اپ گریڈ ہو سکیں۔ سوال یہ پیدا ہوتا ہے کہ ایک سرکاری اسپتال کس طرح اپنے اخراجات خود اٹھائےگا؟ یہ سفید ہاتھی ہے۔ آپ دیکھ لیجئے گا کہ جلد ہی اس کے حالات بھی دیگر سرکاری اسپتالوں جیسے ہو جائیں گے، کبھی پرائیویٹ لیبارٹریوں سے ٹیسٹ کرائیں گے کبھی کچھ اور۔ چیف جسٹس میاں ثاقب نثار نے سوشل میڈیا پر اس کیس کے حوالے سے چلنی والی مہم کوفوری طور پر ختم کرنے کا حکم دیا ہے اور کہا کہ آئندہ اگر اس حوالے سے کوئی مہم چلائی گئی تو وہ سخت ایکشن لیں گے۔ دکھ اور افسوس کی بات یہ ہے کہ مسلم لیگ (ن) کی حکومت نےپنجاب میں بے شمار ایسے کام کئے ہیں جس سے غریب عوام سے زبردستی حاصل کی گئی اربوں روپے کے ٹیکس کی رقم کو شاہانہ انداز میں خرچ کیا گیا ہے۔ اس اسپتال کی خاطر پیپرا کے رولز کو نظر انداز کردیا گیا۔ صد افسوس کام کرنے والی کمپنی کا ایک مالک اسپتال کے بورڈ کاممبر بھی ہے۔ ظاہر ہے اس کے مفادات کس طرف ہوں گے۔ پھر کہنا ہے کہ ہر کام میرٹ پر کیا ہے، سراسر غلط اور جھوٹ ہے۔ اب تک ڈیڑھ ارب روپے اشتہارات پر خرچ ہو چکے ہیں۔ کیا کسی سرکاری اسپتال کو بھی اشتہار بازی کی ضرورت ہوتی ہے۔ اب تک مختلف رپورٹوں کے مطابق 30ارب روپے اس ادارے پر خرچ ہو چکے ہیں اور کڈنی ٹرانسپلانٹ صرف چھ کے قریب ہو ئے ہیں۔ غربت کا رونا رونے والی مسلم لیگ (ن) کی سابق حکومت نے پنجاب میں 56کمپنیاں بنا کر وہ لوٹ مار کی کہ تاریخ میں اس کی مثال نہیں ملتی۔ یہ تو بھلا ہو کہ چیف جسٹس میاں ثاقب نثار کا جنہوں نے ان 56کمپنیوں کے خلاف بھی ازخود نوٹس لے لیا۔ ان کمپنیوں میں کام کرنے والے اور اہم پوسٹوں پر کام کرنے والے بیوروکریٹس اور دیگر افراد پہلے سے سرکاری ملازمتوں میں گریڈ 17سے گریڈ 20 تک میں کام کر رہے تھے۔ پھر اپنے محکموں سے لمبی رخصت لے کر خود مختلف کمپنیاں بنا کر اس میں شامل ہوگئے۔ مثلاً ایک نامور بیوروکریٹ جو کہ آشیانہ ہائوسنگ اسکیم فراڈ کیس میں آج کل نیب کی جیل میں ہے وہ خود اسکیل 19 کا افسر تھا اور قائد اعظم تھرمل پاور کمپنی میں 19لاکھ 74 ہزار 152 روپے ماہانہ تنخواہ لے رہا تھا۔ ایک گریڈ 17 کا افسر ایک اور کمپنی سے 5لاکھ 52ہزار 422 روپے ماہانہ تنخواہ لے رہا تھا۔ ایک پوری فہرست ہے اگر یہاں پر لکھیں تو کالم ختم ہو جائے۔ ان کمپنیوں میں کام کر نے والے افسروں کی کم از کم تنخواہ چار لاکھ روپے اور زیادہ سے زیادہ بیس لاکھ روپے تھی اور تقریباً یہ سب سرکاری ملازمت کر رہے تھے۔ اس کو کہتے ہیں بچے سقے کا نظام۔ ہمارے علم میں ہے کہ ن لیگ کی حکومت میں پنجاب میں جتنی سرکاری تقریبات، میٹنگیں اور کانفرنسز منعقد ہوئیں ان کے تمام کھانے اور پرتکلف چائے کے تمام انتظامات لاہور کے ایک فائیوا سٹار ہوٹل سے ہوتے تھے۔ بلکہ عام میٹنگوں کے لئے کیک، پیسٹری، سینڈوچ تک بھی اس ہوٹل سے تیار ہو کر جاتے تھے۔ کاش نئی حکومت اسلام آباد اور لاہور کے فائیو اسٹارز ہوٹلوں کے بل چیک کرے تو ششدر رہ جائے گی کہ کس بے دردی سے عوام کے ٹیکسوں کے پیسے کو اڑایا گیا۔ ہم نے خود پی پی کی حکومت میں ایک سابق وفاقی وزیر کے لئے روزانہ اسلام آباد کے فائیو اسٹار ہوٹل سے کھانا آتے دیکھا ہے، اب دیکھنا ہے کہ عمران خان کی حکومت سادگی اپناتی ہے یا وہ بھی صرف نعروں کی حد تک رہتی ہے۔ قومی اور صوبائی اسمبلیوں کے ممبران کے سالانہ اخراجات اربوں تک پہنچ چکے ہیں اور عوام غریب سے غریب تر ہوتے جا رہے ہیں۔
اب دیکھنا ہے کہ کون کتنا پروٹوکول لیتاہے؟ اور کون اپنی بات کا پاس رکھتا ہے؟کیا وی آئی پی کلچر ختم ہو جائے گا؟ کیا بیس بیس گاڑیوں کا پروٹوکول ختم ہو جائےگا؟ آج کل بڑا سکون ہے نہ کوئی وی آئی پی موومنٹ ہے اور نہ ٹریفک بند کیا جا رہا ہے۔
نئی حکومت سے لوگوں کو توقعات بہت زیادہ ہیں۔ اندرونی اور بیرونی گندی سیاست بھی بہت زیادہ ہے۔ ریشہ دوانیاں بھی ہیں، سازشیں بھی ہیں، مسائل بھی ہیں اور ہر طرف سے دبائو بھی۔ عمران خان کاحکومت کرنا کوئی آسان نہیں، اپوزیشن ٹف ٹائم دینا چاہتی ہے، کیا کچھ ہوگا ابھی کچھ کہنا قبل از وقت ہے۔
پچھلے ہفتے چیف جسٹس میاں ثاقب نثار نے مینٹل اسپتال کو اپ گریڈ کرنے کے حوالے سے قائم کمیٹی کے ممبران اور چیئرمین کمیٹی پروفیسرسعد بشیر ملک سے ایک طویل میٹنگ کی جس میں یہ فیصلہ کیا گیا کہ ملک میں قائم تمام سرکاری ذہنی علاج گاہوں کو اپ گریڈ کیا جائےگا۔ چیف جسٹس میاں ثاقب نثار نے مینٹل اسپتال کو اپ گریڈ کرنے والی کمیٹی کے ممبران کوبتایا کہ پشاور میں قائم مینٹل اسپتال کا میں نے جب دورہ کیا تو مجھے بتایا گیا کہ پچھلے 32سالوں سے گریڈ 17 کاکبھی افسر یہاں نہیں آیا، یہاں کے حالات انتہائی ابتر ہیں۔ سندھ میں مینٹل اسپتال کراچی کی بجائے حیدر آباد میں ہےکیا عجیب صورتحال ہے ان دونوں اسپتالوں کاکوئی پرسان حال نہیں۔ (جاری ہے)(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(میڈیا 92نیوز)
اگرچہ گزشتہ رات یہ خبر دوپہر کے اخبار کی طرح پھیلا دی گئی تھی کہ ’’علیم خان کو وزیر اعلیٰ پنجاب بنانے کا فیصلہ کر لیا گیا ہے ‘‘مگر صبح جب آنکھ کھلی تو یہ خبر بھی افواہ کے زمرے میں ڈھل چکی تھی ۔جس کاغذ پر فیصلہ لکھا جانا تھا وہ ابھی تک سفید تھا ۔قرطاس ِ فہرست پراُسی طرح پہلا نام سبطین خان کا درج تھا۔یعنی وہی اب تک سب سے آگے ہیں ۔ اُس کے بعد یاسمین راشد کا نام جگمگا رہا ہے ۔ابھی تک فواد چوہدری بھی فہرست سے باہر نہیں ہوئے۔امیدواروں کی پوٹلیاں کھول کر دیکھیں توکسی امیدوار کے پاس کوئی خبر نہیں تھی ۔میڈیاکے خیال میں آج رات تک معلوم ہوجائے گا کہ تخت ِ لاہور پر کون جلوہ نشیں ہوتا ہے مگر میرے نزدیک کل شام یعنی پانچ اگست شام چھ بجے سے پہلے یہ فیصلہ نہیں سنایا جا سکتا۔ ابھی اِس میں کئی مشکل مقام باقی ہیں ۔سنا ہے کہ علیم خان چاہتے ہیں کہ وزیر اعلیٰ عارضی طور پربنا یا جائے کہ جب وہ نیب کے مقدمات سے فارغ ہوجائیں تو انہیں وزیر اعلیٰ بنا دیا جائے مگر عمران خان ایسا نہیں سوچ رہے وہ کسی ایسے شخص کو پنجاب کا چیف منسٹر بنانا چاہتے ہیں جوہر طرح کے مفادات سے بلند تر ہو کر پنجاب میں کام کرے۔ جس کے دامن پر کوئی داغ نہ ہو ۔ خاص طور پر مالی کرپشن کا کوئی داغ ۔داغ تو یاسمین راشد کے دامن پر بھی کوئی نہیں ہے ۔بہر حال پنجاب کوکرپشن سے پاک کرنے کا پہلا ذمہ دار وزیر اعلیٰ پنجاب ہی ہوگا ۔اس معیار پر مکمل طور پرتو ابھی تک صرف سبطین خان ہی پورا اتر رہے ہیں۔ فواد چوہدری بھی یہ کام احسن انداز میں سر انجام دے سکتے ہیں ۔سبطین خان پر اعتراض کرنے والے کہہ رہے ہیں کہ وزیر اعظم کا تعلق بھی میانوالی سے ہے اور وزیر اعلیٰ بھی میانوالی کا بنا دیا جائے یہ اچھی بات نہیں ۔دونوں ’’خان ‘‘ ہیں ۔حیرت ہے جب نواز شریف وزیر اعظم اور شہباز شریف وزیر اعلیٰ ہوتے تھے اُس وقت تو کسی کے دماغ میں یہ بات نہیں آئی تھی کہ ایک بھائی وزیر اعظم اور دوسرا بھائی وزیر اعلیٰ اوردونوں ’’شریف‘‘ بھی تھے ۔
اِس میں بھی کوئی شک نہیں کہ علیم خان بھی بڑے با صلاحیت آدمی ہیں ۔پی ٹی آئی کواُن کی صلاحیتوں سے بھی بھرپور فائدہ اٹھانا چاہئے۔ تعمیراتی کام میں اُن کا کوئی ثانی نہیں ۔میرے خیال میں پی ٹی آئی کی حکومت نے جو پچاس لاکھ مکانات تعمیر کرنے ہیں اُن کی ذمہ داری علیم خان کو دی جانی چاہئے ۔مجھے یقین ہے کہ وہ اس ٹارگٹ کو وقت سے پہلے پوراکرنے کی ہمت رکھتے ہیں۔فوری طور پر بڑے بڑے شہروں میں ایک لاکھ فلیٹ بنائے جا سکتے ہیں۔یقیناََ حکومت کو یہ کام بھی پہلے سو دنوں میں ہی شروع کرنا ہے ۔کیونکہ جیسے ہی یہ کام شروع ہوگا لوگوں کو روزگار ملنا شروع ہوجائے گا ۔ایک کروڑ لوگوں کو روزگار فراہم کرنے کا ٹارگٹ بھی کوئی آسان ٹارگٹ نہیں ہے ۔ پی ٹی آئی کی لیڈر شپ کو عہدوں سے زیادہ ٹارگٹ پر توجہ مرکوز رکھنی چاہئے ۔
شاہ محمود قریشی اسپیکر قومی اسمبلی بننے پر راضی تو ہوگئے ہیں مگر دبے لفظوں میں انہوں نے کہا ہے کہ میں نے اِ س یقین کے ساتھ یہ عہدہ قبول کیاہے کہ وزیر اعلیٰ پنجاب یاسمین راشد کو بنایا جائے گااگر یاسمین راشد کو وزیر اعلیٰ بنایا گیا تو وہ پاکستان کی تاریخ میں پہلی ایسی چیف منسٹر ہونگی جو خواتین کی مخصوص نشستوں پر اسمبلی میں آئیں ۔
وزیر خارجہ خسرو بختیار بنائے جارہے ہیں ۔ ان کا تعلق بھی میانوالی سے ہے مگر اُس میانوالی کو ’’میانوالی قریشیاں ‘‘ کہتے ہیں ۔یعنی کرنے والے یہ اعتراض بھی کر سکتے ہیں کہ وزیر اعظم اور وزیر اعلیٰ پنجاب کے بعد وزیر خارجہ بھی میانوالی کا ہے ۔میں نصرت جاوید کی رائے کا بہت احترام کرتا ہوں وہ سمجھتے ہیں کہ خوبرو وخوش گفتار مخدوم خسرو بختیار عمران خان کیلئے ایک اور مراد سعید ثابت ہونگے ۔نئے پاکستان کیلئے حسن نثار ،مظہر برلاس اور انوار حسین حقی کی خدمات بھی قابل تحسین ہیں۔ اُن کی صلاحیتوں سے بھی فائدہ اٹھانا چاہئے۔ ملتان سے احمد حسن ڈہیڑ اور لیہ سے عبدالمجید خان کو بھی حکومت میں شامل کیا جائے ۔عبدالمجیدخان کی وزارت سے توپھر وہی مسئلہ پیدا ہوجائے گاکیونکہ ایم این اے تو وہ لیہ سے بنے ہیں مگر ہیں میانوالی کے ۔ ہائے میانوالی۔ شاہ محمود قریشی کےا سپیکر بن جانے کے بعد ضروری ہے کہ ملتان سے بھی کسی کو منسٹر بنایا جائے اور اس کےلئے احمدحسن ڈہیڑ سے بہتر اور کوئی نہیں ہو سکتا۔
وزیر داخلہ پرویز خٹک بنیں گے ۔انہیں بہت زیادہ محنت کرنا ہو گی کیونکہ جہاں جہاں تبدیلیوں کی زیادہ اور جلد ضرورت ہے وہ تمام محکمےوزارتِ داخلہ کے ہیں ۔کرپشن کے خاتمے کیلئے اس وزارت کا کلید ی کردار ہے ۔یقیناً یہ وزارت پرویز خٹک کےلئے پھولوں کا تاج نہیں کانٹوں کی سیج ہے۔ ایک اور شخصیت کی طرف بھی عمران خان کی توجہ مبذول کرنا چاہوں گا ۔یہ گلریز افضل چن ہیں ۔ بہت با صلاحیت ہیں ۔اپنے بھائی ندیم افضل چن کو پیپلز پارٹی سے نکال کر یہی پی ٹی آئی میں لائے ہیں ۔یہ بھی پی ٹی آئی کی حکومت کیلئے اثاثہ ثابت ہوسکتے ہیں ۔میانوالی سے امجد علی خان اور عطااللہ شادی خیل کو بھی حکومت میں شامل کیا جانا چاہئے ۔یہ دونوں شخصیات نئے پاکستان کی تشکیل میں اہم کردار ادا کر سکتی ہیں ۔ خاص طور پر امجد علی خان نے ایک انٹرو یو دیا تھا کہ نئے پاکستان کے خدو خال کیسے ہونگے ۔میں نے اس وقت سوچا تھا کہ اگر نئے پاکستان کے خواب کو تعبیر مل گئی تو ہم کتنے خوش قسمت ہونگے ۔
ایک سوال یہ بھی گردش کر رہا ہے کہ صدر مملکت کون ہوگا۔ جاوید ہاشمی اگر نون کے فریب میں نہ آتے تو یقیناً ممنون حسین کے بعد وہی صدر پاکستان ہوتے مگراپنی قسمت آدمی اپنے اعمال سے بناتا ہے ۔جسٹس ریٹائرڈ وجیہہ الدین کا بھی کسی زمانے میں پی ٹی آئی میں بہت احترام کیا جاتا تھا اگر انہوں نے بھی عمران خان کی لیڈر شپ سے ٹکرانے کی کوشش نہ کی ہوتی تو وہ بھی صدر پاکستان ہو سکتے تھے ۔ سنا ہے اس وقت صدر پاکستان کےلئے میر بلخ شیر مزاری ، میر ظفر اللہ خان جمالی کے نام لئے جارہے ہیں۔(بشکریہ جنگ لاہور)

!بالآخر ہمارے کپتان عمران خان کی اُمید بر آئی اور میدان مارا بھی تو ایسی ناہموار پچ (Uneven Playing Field) پر جس پر مدمخالف اُمیدواروں کا ٹھہرنا مشکل ہو گیا اور تھرڈ ایمپائر کرتا بھی کیا جب نہ صرف اسکور کی گنتی نظر سے اوجھل ہو گئی بلکہ نتائج کی ترسیل کا نظام بھی معطل ہو گیا ۔ ہمیشہ کی طرح اس بار بھی دھاندلی دھاندلی کا شور اتنا مچا ہے کہ جیتنے والے کھسیانے ہوئے جاتے ہیں اور ہارنے والے صدمے سے بے حال۔ ایک معلق قومی اسمبلی میں کھینچ کھانچ کے تحریکِ انصاف کو آزاد اراکین کے ریوڑ اور منحنی جماعتوں کی مدد سے 172کے ہندسے تک پہنچانے کے جو جتن کیے جا رہے ہیں اور کیسے کیسے لوگوں کو ہانک ہانک کر جمع کیا جا رہا ہے، ایسے بھان متی کے کنبے کے ہوتے ہوئے بھلائی، سچائی اور صفائی کے تبدیلی کے ایجنڈے کے لئے کیا اخلاقی جواز بچ رہتا ہے۔ عمران خان کی حکومت ابھی بنی نہیں، اور اپوزیشن نے متحد ہو کر ’’صاف و شفاف انتخابات کے انعقاد‘‘ کے لئے ایک وسیع ترین محاذ بنا لیا ہے۔ جبکہ ابھی تک بنی گالہ میں منتظر وزیراعظم اعداد جمع کر رہے ہیں اور اب تک وہ پنجاب، پختون خوا کے وزرائے اعلیٰ اور اپنی کابینہ کے ناموں کو حتمی شکل دینے میں جانے کن کن مشکلات سے دوچار ہیں۔ ان کی خوش قسمتی ہے کہ پارلیمانی نظام کو بچائے رکھنے کی سوچ نے اپوزیشن کو وہ راہ لینے سے روک دیا ہے جو خود عمران خان نے گزشتہ پارلیمنٹ کے خلاف مسلسل دھرنوں کی صورت اختیار کی تھی۔ معلق قومی اسمبلی میں ایک اقلیتی یا بمشکل اکثریتی حکومت کبھی بھی کسی مسئلے پر لڑھک سکتی ہے۔ اور قانون سازی کے لئے موجودہ سینیٹ کے ہوتے ہوئے پی ٹی آئی حکومت کے لئے کسی طرح کا بل منظور کروانا ناممکن ہوگا، تاآنکہ اپوزیشن کی دو بڑی جماعتیں مہربانی کرنے کے لئے تیار ہوں۔ بُرا ہو اس بدزبانی کا جس سے کسی بھی مخالف لیڈر کی پگڑی محفوظ نہ رہی۔ اب معافی تلافی سے بھڑکے ہوئے جذبات ٹھنڈے پڑ سکیں گے یا نہیں، ابھی کچھ کہنا قبل از وقت ہے۔
عمران خان کو داد دینی چاہئے کہ اُنھوں نے 2008 کے انتخابات کے بعد سے کرپشن اور پرانی دو جماعتوں کی ناکارہ باریوں کے خلاف ایک نہ تھکنے والی مسلسل مہم چلائی اور نئی پود کو ’’اسٹیٹس کو‘‘ کے خلاف ’’تبدیلی‘‘ کے لئے متحرک کیا۔ اس مہم میں اُنھوں نے ہر طرح کے حربے بغیر کسی حد و حساب کے استعمال کیے۔ اُنہیں اس سے غرض نہیں تھی کہ جمہوری عبور پٹری سے اُترتا ہے یا پھر اپنی حیثیت کھو بیٹھتا ہے۔ 2013 کے انتخابات میں اچھی خاصی عوامی حمایت حاصل کرنے کے باوجود وہ فقط خیبرپختون خوا میں حکومت بنا سکے تھے۔ پھر وہ کرپشن مخالف مہم کے ساتھ ساتھ دھاندلی کے ٹرالر پر چڑھ گئے۔ ابھی دھرنے سے فارغ ہوئے ہی تھے کہ پردئہ غیب سے پانامہ کا دھماکہ کیا ہوا کہ اُن کے کرپشن مخالف محاذ کو زبردست مہمیز مل گئی۔ پھر کیا تھا، ابھی سابق وزیراعظم نواز شریف دھرنے کے ہاتھوں اپنے اقتدار کی ڈھیلی ہوئی چولوں کو پھر سے تگڑا کر کے کھڑا ہوا ہی چاہتے تھے کہ پانامہ کے بم نے اُن کے اوسان خطا کر دیئے۔ پھر ’’ووٹ کو عزت دو‘‘ کا نعرہ خوب چلا کہ انصاف کی سبک رفتار قوتوں نے احتساب کا فریضہ عین انتخابات سے پہلے انجام دے کر ’’مجھے کیوں نکالا‘‘ کا بُرا بھلا جواب فراہم کر دیا۔ اب عمران خان کے سب سے بڑے حریف کے میدان سے باہر ہونے سے، کپتان کے لئے پنجاب میں میدان خالی تھا اور نواز شریف کے جانشین شہباز شریف مردِ میدان ثابت نہ ہوئے۔ اوپر سے مسلم لیگ ن کی ایسی منجھائی کی گئی کہ اسے جان کے لالے پڑ گئے۔ پھر کیا تھا؟ ہر طرف ’’اب کی بار عمران خان‘‘ کے ڈنکے بجنے لگ گئے اور لوگوں کی ایک اچھی خاصی تعداد بھی پرانے لیڈروں کو آزمانے کے بعد انہیں باری دینے پہ مائل نظر آئی۔ حالانکہ اس بار شرح ووٹنگ پچھلی بار سے کم تھی اور عمران خان کی سونامی 2013 کی سطح سے کچھ ہی پھیلی ہوگی، انتخابی نتائج نے اُن کے حامیوں کو بھی ششدر کر دیا۔ تحریکِ انصاف کے حق میں عوامی لہر اگر 14.95 فیصد بڑھی اور اُن کا ووٹوں میں تناسب تقریباً دوگنا ہو کر 31.87فیصد یعنی 16,884,266 ہو گیا (یعنی تقریبا 90 لاکھ ووٹوں کا اضافہ) تو مسلم لیگ ن کی عوامی حمایت میں 8.37 فیصد کمی ہوئی اور اس کے ووٹ پچھلے انتخابات کے مقابلے میں تقریبا 20 لاکھ کم ہو کر 24.40فیصد یعنی 12,930,117 رہ گئے۔ غالبا، کوئی بھی آزاد مبصر تحریکِ انصاف کی ایسی زبردست کامیابی کو سمجھنے سے قاصر ہے یا پھر سر پکڑ کر ہی بیٹھ سکتا ہے۔ لگتا ہے کہ مسالہ ذرا زیادہ ہی لگ گیا۔ اس سے بہتر تھا کہ کسی مخلوط حکومت کے لئے جگہ چھوڑ دی جاتی۔ گو کہ اس کے بنا چارہ نہیں یا پھر عدم استحکام کے بھنور میں پھنسی کپتان کی کشتی ہچکولے کھاتی رہے گی۔ بظاہر ایسا ہی لگتا ہے، لیکن عمران خان کے مخلوط حصہ دار یا پاسدار بہت تگڑے ہیں اور خیر سے احتساب کا دائرہ کافی پھیلتا جا رہا ہے۔ شہباز شریف کے لئے بھی اور آصف زرداری کے لئے بھی۔ لیکن اس سے بگاڑ بڑھے گا، معاملات سنوریں گے نہیں۔
بھلے اپوزیشن اپنی انتخابی شکایات پہ کیسا ہی غل مچائے جو اس کا جمہوری و قانونی حق ہے، اسے سوچنا ہوگا کہ آخر یہ کیا چاہتی ہے؟ کیا جمہوری عبور جو دس برس پہلے شروع ہوا، اسے پٹری سے اُتار دیا جائے؟ اس کا نقصان آج تحریکِ انصاف کو ہو گا تو اس کے منفی مضمرات سے اپوزیشن بھی کیسے محفوظ رہ سکے گی۔ اس نئی پارلیمنٹ میں تمام تر کمی بیشی، تطہیر یا اضافے کے باوجود تمام جماعتوں کو حاصل عوامی مینڈیٹ موجود ہیں۔ یہ آپس میں ٹکرائیں گے تو جمہوریت ہی کمزورہوگی ۔ یہ عمران خان کی حکومت کے مفاد میں ہوگا کہ وہ اپوزیشن کے تحفظات دور کرنے کے لئے کھلے دل کا مظاہرہ کریں جیسا کہ خان صاحب نے اپنی اکلوتی تقریر میں کہا ہے۔ پارلیمنٹ ایک تحقیقاتی کمیٹی بنا سکتی ہے جو ہر طرح کی شکایت دور کرنے میں بااختیار ہو۔ پی ٹی آئی حکومت کو جو معاشی، سیاسی اور انتظامی چیلنجز درپیش ہیں اُن کا سامنا کرنا فقط ایک پارٹی کے بس میں نہیں۔ ملک کو جو سنگین بحران آج درپیش ہے اس کا سامنا کرنے کے لئے ساری پارلیمنٹ کو متحد ہونا پڑے گا۔ اور یہ کام اداراتی بحران اور اداراتی عدم توازن کو دور کیے بنا ہونے کا نہیں۔ مرکز اور صوبوں میں حکومتوں کے قیام کے ساتھ ہی متعلقہ منتخب اداروں کو اپنے اپنے دائرے میں بیٹھنا ہوگا اور ستر سال پرانے عارضوں کے علاج کے لئے کوئی متفقہ راہ نکالنی ہوگی۔ اگر ایسا نہ ہوا تو سیاسی بحران حد سے گزر کر معاشی و اداراتی بحرانوں کو ایسی ضرب لگائے گا کہ کسی کے بس میں نہیں رہے گا کہ اصلاحِ احوال کیسے کی جائے؟ لیکن اگر عمران خان اور اُن کے مددگاروں نے اپوزیشن کے ساتھ ناروا سلوک کیا۔
میڈیا کو دبائے رکھا اور آئینی دائرے سے ہٹ کر اداروں کی مداخلت کو بڑھایا تو سمجھیے کہ ہم ایک بڑے ہی خوفناک بحران کو بھڑکانے جا رہے ہیں۔ اس ملک کی تمام سیاسی قوتوں، اداروں اور دانش مندوں کو اپنے اپنے بند دروازوں اور متحارب دماغوں کو کھولنا ہوگا۔ وگرنہ، پھر نہ کہنا کہ دیر ہو گئی۔ عمران خان وزیراعظم ہونے کو ہیں۔ اب یہ اُن کی ذمہ داری ہے کہ وہ ملک کو ایک اور تصادم کی طرف لے جاتے ہیں یا پھر سب لوگوں کو ساتھ لے کر موجودہ بحران کو قابو میں لانے کا جتن کرتے ہیں۔ یہ فقط فتح کے ڈونگرے برسانے کا وقت نہیں، سوچنے سمجھنے اور معاملہ فہمی کا ہے۔ وگرنہ دُعائے خیر کے لئے ہاتھ اُٹھائے جائیں۔
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(میڈیا 92نیوز)
ڈاکٹر عادل نجم بھلے آدمی ہیں، ہمارے لڑکپن میں پی ٹی وی پر میزبانی کیا کرتے تھے، پھر ایک طویل عرصے کے لئے نہ جانے کہاں غائب ہو گئے، کئی برس بعد ایک دن اچانک پتہ چلا کہ لمز کے وی سی چُن لئے گئے ہیں، وہاں سے فراغت کے بعد ملک سے باہر چلے گئے، آج کل بوسٹن میں رہتے ہیں، تدریس و تحقیق سے وابستہ ہیں، ماحولیاتی آلودگی سے بھی خاص دلچسپی ہے آئے روز اس سے متعلق بین الاقوامی کانفرنسیں بھگتاتے رہتے ہیں اور ٹویٹر پر اپنی تصویریں اپ لوڈ کرکے ہم ایسوں کا دل جلاتے رہتے ہیں۔ڈاکٹر صاحب پاکستانی نوجوانوں کے بارے میں بیک وقت پُر امید اور فکر مند رہتے ہیں، حال ہی میں انہوں نے یو این ڈی پی کے تعاون سے ایک رپورٹ مرتب کی ہے جو خاصے کی چیز ہے، رپورٹ کا خلاصہ یہ ہے کہ پاکستان میں اس وقت 64%آبادی 30سال سے کم عمر ہے جن میں سے 29%ایسے ہیں جن کی عمر 15سے 29سال کے درمیان ہے، ان کے بارے میں ڈاکٹر صاحب نے چشم کشا اعداد و شمار اکٹھے کئے ہیں جنہیں بیان کرنا یہاں ممکن نہیں، اس کے لئے آپ کو ویب سائٹ پر رپورٹ کا حقائق نامہ (Fact Sheet) پڑھنا پڑے گا، مختصر بات یہ ہے کہ اگلی تین دہائیوں تک یہ نوجوان پاکستان کے مستقبل کا تعین کریں گے۔ عادل نجم کی رپورٹ پڑھ کر رجائیت کا احساس ہوتا ہے، یوں لگتا ہے جیسے ڈاکٹر صاحب نے اِن نوجوانوں سے کچھ زیادہ ہی امیدیں وابستہ کر لی ہیں مگر حقیقت میں ایسا نہیں ہے، ڈاکٹر صاحب پُرامید ضرور ہیں مگر خوش فہم نہیں۔ اِس رپورٹ کو مرتب کرنے کے دوران ڈاکٹر صاحب ملک کے طول وعرض میں گھومے اور ہر خطے اور ہر طبقے کے نوجوان سے باتیں کیں، ایک دلچسپ بات انہوں نے بتائی کہ نوجوانوں کے جس گروپ میں بھی انہوں نے سوال پوچھا کہ آپ کی زندہ آئیڈیل شخصیت کون ہے تو نوجوانوں کے پاس اپنے باپ کے علاوہ بتانے کے لئے کوئی نام ہی نہیں تھا۔ گویا ہم نے اپنے معاشرے میں جو کالک ملی ہے اُس کے نتیجے میں ہر نیک نام شخص کو قابل نفرت بنادیا ہے، اب ہمارے نوجوانوں کے پاس کوئی رول ماڈل ہی نہیں جس کی وہ تقلید کر سکیں۔ یہی وجہ ہے کہ میں ڈاکٹر صاحب جتنا پُرامید بھی نہیں رہا، ہم ایسے ملک میں رہ رہے ہیں جہاں 15سال کی عمر تک جب بچہ میٹرک کرتا ہے تو معاشرتی علوم کی کتابوں کو رٹہ لگا کر دنیا کے بارے میں اپنا ایک مخصوص نقطہ نظر اپنا چکا ہوتا ہے، چنانچہ اُس کی ذہن سازی یوں ہوتی ہے کہ….ہم ایک عظیم قوم ہیں …..عالمی طاقتوں کو ہمارا وجود کھٹکتا ہے ….کسی نے آنکھ اٹھا کر بھی ہماری طرف دیکھا تو ہم سر کاٹ دیں گے (حقیقت میں ساتویں آٹھویں کے بچے سر کاٹنے والی اصطلاحات بے دریغ استعمال کرتے ہیں)….. گویا جو نسل ہم نے تیار کر چکے ہیں وہ نفرت کے بیانئے کے زیر اثر پروان چڑھی ہے، ان بچوں کا تنقیدی شعور نہ ہونے کے برابر ہے اور اِن کے ذہنوں میں ایک ایسی دنیا کا تصور ہے جو اُن کے عظیم الشان ماضی سے حسد کرتے ہوئے اُن کے ساتھ ناانصافی کرتی ہے۔ یہ وہ نسل ہے جس کے ہاتھ میں پاکستان کے اگلے تیس برس ہوں گے۔ اِس نسل کے نوجوانوں کے لئے آج پانچ مفت مشورے پیش خدمت ہیں:
پہلا مشورہ یہ ہے کہ جو کچھ آپ کو اسکول میں پڑھایا گیا ہے اسے فراموش کردیں۔ اس کا مطلب یہ نہیں کہ جمع تفریق کرنا بھول جائیں یا انگریزی گرامر یا صرف و نحو بھلا دیں (ایسا میٹرک پاس نوجوان جو صرف و نحو کا مطلب جانتا ہو مجھ سے ہزار روپے انعام لے سکتا ہے)، مراد یہ ہے کہ اسکول میں تاریخ اور معاشرتی علوم کے نام پر آپ کو جو رٹایا گیا ہے اسے بھول کر کسی غیر ملکی طالب علم کی طرح اپنی تاریخ کو بغیر کوئی رعایت دئیے ذہن میں وہ تمام سوالات جمع کریں جن کا جواب نصابی کتابوں میں نہیں اور پھر ان کا جواب تلاش کرنے کی کوشش کریں۔ یقیناً یہ ایک مشکل کام ہوگا مگر اِس کا آسان حل یہ ہے کہ ہر قسم کی کتابیں پڑھیں، ہر قسم کا نقطہ نظر جاننے کی کوشش کریں، سوچیں کہ دنیا ہماری طرح کیوں نہیں سوچتی، ہر وہ سوال اٹھائیں جو اسکول میں ذہن میں آتا تھا مگر شرمندگی کی وجہ سے نہ پوچھ پائے، اگر کتابیں پڑھنا مشکل لگے تو اخبارات پڑھیں، ادارئیے پڑھیں، ایک آدھ انگریزی جریدے پر نظر دوڑا لیں، کچھ نہ کچھ ایسا ضرور پڑھیں جو اسکول میں نہیں پڑھایا گیا۔ جب آپ پڑھنے کی عادت اپنالیں گے تو پھر سوال اٹھے گا کہ کون سی کتاب حقائق پر مبنی ہے، کس کا نقطہ نظر صحیح ہے اور کس تاریخ دان کی بات حقیقت کے قریب ہے، یہ مرحلہ تنقیدی فکر اپنانے کا ہوگا اور یہی دوسرا مشورہ ہے۔ تنقیدی فکر کی کوئی تربیت ہمیں نہیں دی جاتی، ہمیں علم ہی نہیں کہ یہ کس چڑیا کا نام ہے، اسکولوں کی بات چھوڑیں یہاں تو بڑے بڑے پی ایچ ڈی صاحبان اِس سے محروم ہیں۔ تنقیدی فکر دراصل سوچ کے اس طریقہ کار کو کہتے ہیں جس کے تحت آپ اپنے تعصبات کو پرے پھینک کر فقط حقائق کی چھانٹی کر کے سچ تک پہنچنے کی کوشش کرتے ہیں۔ اِس کا بنیادی اصول یہ ہے کہ آپ دوسروں کی جگہ خود کو رکھ کر سوچیں، یعنی اگر آپ پنجابی ہیں تو سندھی بن کر سوچیں، اگر سندھی ہیں تو پنجابی بن کر سوچیں، اگر مرد ہیں تو عورت بن کر سوچیں۔ دوسرا اصول یہ ہے کہ تمام بُت توڑ کر سوچیں، یعنی ذہن میں پہلے سے بٹھائی گئی باتوں کی پروا کئے بغیر سوچیں اور بے رحم ہو کر صرف حقائق تلاش کریں چاہے اُس کی زد میں آپ کے اپنائے ہوئے رومانوی نظریات ہی کیوں نہ آجائیں۔ جس دن آپ یہ کام سیکھ لیں گے، آپ پر حیرت انگیز انکشافات ہوں گے، آزمائش شرط ہے۔
تیسرا مشورہ یہ ہے کہ اپنا world viewدرست کریں۔ ساری دنیا ہماری دشمن نہیں اور ہم کوئی ایسے اہم بھی نہیں کہ دنیا کی طاقتیں ہمارے خلاف متحد ہو جائیں، اِس زمین پر صرف ہمارا ہی ماضی شاندار نہیں رہا بلکہ یورپ اور ایشیا کے دیگر ممالک کے پاس بھی عالیشان تاریخ ہے ۔
لہٰذا اِس فریب سے نکلیں کہ امریکہ اور یورپ کی ترقی ہماری مرہون منت ہے، اور اگر ایسا ہے بھی تو آج اپنی ذلت و ناکامی کے ذمہ دار ہم خود ہیں نہ کہ کوئی صیہونی سازش! کیا یہ امریکہ اور یورپ کی ذمہ داری ہے کہ وہ ابن سینا، فارابی اور جابر بن حیان کے علم سے استفادہ کرنے کی رائلٹی ہمیں ادا کرے؟ اگر نہیں تو پھر ہمیں دنیا سے متعلق اپنے نفرت بھرے بیانئے کو درست کرنے کی ضرورت ہے۔
چوتھا مشورہ اِس ساری بحث سے ہٹ کر ہے کہ نوجوان اپنے اندر کوئی ایسا ہنر پیدا کریں جس کی معاشرے میں مانگ ہو مگر ہنرمند افراد کم ہوں۔ مثال کے طور پر ہمارے ہاں پیرامیڈک سٹاف کم ہے اِس کے باوجود کتنے لڑکے ایسے ہیں جن کی زبانی آپ نے یہ سنا ہو کہ وہ میل نرس بننا چاہتے ہیں جبکہ اِس کی نوکری بھی آسانی سے مل جاتی ہے؟ اسی طرح آج کل ہر کم تعلیم یافتہ شخص ڈرائیور بن جاتا ہے کیونکہ یہ کام آسان ہے یہی وجہ ہے کہ ڈرائیور کو نوکری ملنا اب مشکل ہوگئی ہے، اس کے برعکس لوگ باروچی کا کام نہیں سیکھتے جبکہ مارکیٹ میں اِس کی مانگ زیادہ ہے۔ سو، اپنی تعلیمی قابلیت کے لحاظ سے نوجوان اُس ہنر کا تعین کرسکتے ہیں جس کی معاشرے میں مانگ ہو اور پھر وہ اُس میں کمال حاصل کر کے اپنی زندگی کو بدل سکتے ہیں، یہ کوئی راکٹ سائنس نہیں۔
نوجوانوں کے لئے آخری مشورہ…. محبت کریں۔ انسانوں میں خامیاں ہوتی ہیں، انسانوں کو اُن کی خامیوں سمیت قبول کریں اور اُن سے محبت کریں، اگر آپ کو کسی شخص میں کوئی برائی نظر آتی ہے تو آپ اُس برائی کو اپنائے بغیر بھی اُس شخص سے محبت کرسکتے ہیں بالکل اسی طرح جیسے آپ کی اپنی ذات میں خرابیاں ہوں گی مگر اس کے باوجود آپ خود سے محبت کرتے ہیں، یہی اصول دوسرے انسانوں کے لئے بھی اپنائیں۔ ہمارے معاشرے کو اِس محبت کی اشد ضرورت ہے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(میڈیا 92نیوز)
سب سے پہلے تو آپ سب کا شکریہ کہ عمران خان کی ماہرین سے مشاورت اور کچھ سیکھنے کی تجویز کی۔ ہم نوائی کی ۔
پاکستان کے عوام اب بے چین ہورہے ہیں کہ حکومت سازی میں اتنی تاخیر کیوں ہورہی ہے۔ یہ تو طے ہے کہ پاکستان کے غریب اور بے بس عوام کسی ایک شخصیت کو نجات دہندہ سمجھ کر ووٹ دیتے ہیں۔ اس لہر میں کھمبے بھی جیت جاتے ہیں۔ بعض ایسے افراد بھی پارلیمنٹ میں پہنچ جاتے ہیں جنہیں کوئی کونسلر بھی منتخب نہ کرنا چاہے۔ یہ سب پارلیمانی نظام کی قباحتیں ہیں ۔حکومت بنانا مشکل پھر ٹیم بنانا اس سے بھی دُشوار۔
پارلیمانی نظام ان مہذّب ملکوںمیں توقابل عمل ہوگیا ہے۔ جہاں عوام کے بنیادی مسائل حل ہوچکے ہیں۔ مقامی حکومتوں کا بہت ہی مستحکم سلسلہ ہے۔ حکمرانی کا ایک نظام ہے۔ احتساب کا بھی سخت معمول ہے۔ مگر یہ منزل انہیں صدیوں بعد حاصل ہوئی ہے۔ چرچ اور بادشاہت کی لڑائیاں ہوئیں۔ تحریک احیائے علوم چل چکی۔ حکومت کے پاس سیٹیں کم ہوں ۔ بجٹ منظور کرانے میں ناکام ہوجائے تو دوبارہ الیکشن ہوجاتے ہیں۔ ہمارے ہاں تو ابھی سب کچھ اُدھورا ہے۔ مقامی حکومتیں بے اختیار ہیں۔تعلیم کی شرح بہت کم ہے۔ جاگیرداروں۔ سرداروں۔ زمینداروں کا غلبہ ہے۔ شہروں میں مافیائوں نے کنٹرول سنبھالا ہوا ہے۔ اس لئے پارلیمنٹ یرغمال بن جاتی ہے۔ چند ایم این اے اِدھراُدھر ہوجائیں تو حکومت ڈولنے لگتی ہے۔صدارتی نظام میں آپ جس قابل۔ ذہین اور تجربہ کار شخص کو وزارت سونپنا چاہیں۔ دے سکتے ہیں۔ ایم این اے ہونا شرط نہیں ہوتا۔
ایسے غریب اور کم تعلیم والے ملکوں میں صدارتی نظام بہتر رہتا ہے۔ مسلم ملکوں میں ملائشیا۔ اور ترکی میں کسی قدر جمہوریت ہے اور ترقی بھی ہورہی ہے۔ وہاں پابندیاں ہیں۔ میڈیا آزاد نہیں ہے ۔ ترکی میں اردوان کو وزیر اعظم سے پھر صدارت کی طرف جانا پڑا۔ چین میں بھی پارلیمانی نظام نہیں چل رہا۔ دیکھیں کس قدر ترقی کررہا ہے۔ اس پہلو پر ہمیں غور کرنا چاہئے۔ اب محض گنتی پوری کرنے کے لئے کتنے دن ضائع ہورہے ہیں۔ عمران خان حکومت بنانے میں کامیاب تو ہوجائیں گے۔ پہلے ظفر اللہ جمالی بھی ایک ووٹ کی اکثریت سے وزیر اعظم بن سکے تھے۔ مگر اس کے لئے مشرف صاحب کو نیب زدہ ارکان پر مبنی پیٹریاٹ بنانا پڑی تھی۔
پارلیمانی نظام کی ہیئت آپ کو اپنے نظریات قربان کرنے پر مجبور کرتی ہے۔ بہت سے نظریاتی مخالفین کو گلے لگانا پڑتا ہے۔ اصول تڑپ رہے ہوتے ہیں۔ سچائیاں زخم زخم ہوجاتی ہیں۔’’ کہیں کا اینٹ کہیں کا روڑا۔ بھان متی نے کنبہ جوڑا‘‘ کے مصداق ٹیم بنتی ہے۔ جو کبھی ہم آہنگ نہیں ہوتی۔
دوسری طرف عوام اس تشویش میں بھی مبتلا ہیں کہ بھانت بھانت کی بولیاں بولنے والی۔ ایک دوسرے کی جان کے در پے۔ سڑکوں پر گھسیٹنے کے عزائم رکھنے والی پارٹیاں کیسے متحد ہورہی ہیں۔
ہے یوں تو میرے رقیبوں میں اختلاف بہت
مرے خلاف مگر اتحاد کتنا ہے
مرتضیٰ برلاس صاحب کا یہ شعر شکیل جاذب نے فیس بک پر پوسٹ کیا ہے۔ ماضی میں ہم دیکھتے آرہے ہیں کہ 1977میں بھی بھٹو صاحب کے خلاف یہ سب پارٹیاں اسی طرح جمع ہوئی تھیں۔ بھٹو صاحب کا دوسرا دَور حکومت شروع ہونا تھا۔ان کے پاس دو تہائی اکثریت بھی تھی۔ لیکن وہ ناکام رہے۔ اس وقت تو نادیدہ قوتیں اپوزیشن کے ساتھ تھیں۔ اب تو الزام یہی ہے کہ خلائی مخلوق عمران خان کو لے کر آئی ہے۔ عام طور پر اتحاد اس مخلوق کی وجہ سے ہوتا ہے۔ یا پھر ڈالر۔ درہم۔ جنوبی ایشیائی روپیہ اس کا محرّک بنتا ہے کیونکہ نظریات میں تو کوئی فرق نہیں ہے۔ عمران خان نہ اسلامی نظام لارہے ہیں نہ سوشلزم۔ یہ پارٹیاں بھی اسلامی نظام لانا چاہتی ہیں نہ سوشلزم۔ خارجہ پالیسی پر بھی کوئی اختلاف نہیں ہے۔ فرق ہے تو صرف سرکاری خزانے میں لوٹ مار کا ۔ اپنے منظور نظر افراد۔ رشتے دار۔ دامادوں۔ سمدھیوں ۔ بھائیوں کو گورنری۔ وزارتیں۔ کارپوریشنوں کی سربراہی دلوانے کا۔
اس صورتِ حال میں عمران خان پر جلد از جلد کچھ بڑے کام کرنے کا دبائو بڑھ جائے گا۔ جن سے عوام کو فوری راحت مل سکے۔ مہنگائی کم ہوسکے۔ روزگار کے مواقع فراہم ہوسکیں۔ ایک طرف ان کی ٹیم بھی ہم آہنگ نہیں ہوگی۔بیورو کریسی بھی پوری طرح ساتھ نہیں دے گی۔ دوسری طرف اپوزیشن بھی مضبوط اور جارح ہوگی ۔ عمران خان کو یہ ترجیح تو حاصل ہے کہ اب پی ٹی آئی چاروں صوبوں میں موجود ہے۔ اس مثبت ترجیح سے فائدہ اٹھانا چاہئے۔ عمران خان کو ذاتی قربانیاں بھی دینا ہوں گی۔ بنی گالہ کی رہائش گاہ میں بھی کوئی یونیورسٹی بنادیں۔ خود کسی چھوٹے بنگلے میں منتقل ہوں۔ وزیر اعظم کا خصوصی طیارہ استعمال نہ کریں۔ عام کمرشل فلائٹس سے سفر کریں۔ وزراء بھی اکانومی سے سفر کریں۔ وزیرا عظم اور وزراء کے لائو لشکر محدود کریں۔ کلرکوں مزدوروں چپراسیوں کی تنخواہوں میں اضافہ کریں۔ ایک تولہ سونے کی قیمت کے برابر۔ تب ہی وہ کچھ آبرومندانہ زندگی گزار سکتے ہیں۔
ایک قانون اگر نافذ کردیں تو بہت بڑی تبدیلی آسکتی ہے کہ تمام وزراء ۔ سیکرٹریوں اور دوسرے افسروں کی اولاد سرکاری اسکولوں۔ کالجوں یونیورسٹیوں میں پڑھے گی۔ اس سے سرکاری اسکولوں کی کارکردگی بہتر ہوگی۔ سرکاری اسکولوں کے اساتذہ کی عزت میں اضافہ ہوگا۔تعلیم سب سے زیادہ توجہ چاہتی ہے۔ دوسرے عام شہریوں کے لئے اچھی آرام دہ پبلک ٹرانسپورٹ کا انتظام پہلے دو تین ماہ میں ہی بڑی بسیں لاہور ۔ کراچی۔ ملتان۔ پشاور۔ اسلام آباد۔ حیدر آباد۔ کوئٹہ۔ سیالکوٹ اور دوسرے شہروں میں اُتاردیں۔ ٹرانسپورٹ مافیا کی اجارہ داری ختم کریں۔
وقت کم ہے۔ کام بہت ہیں۔ آپ نوجوان لگتے ہیں ماشاء اللہ۔ لیکن گزشتہ چار دہائیوں میں اس تخت پر بیٹھنے والے آپ کی نسبت کم عمر میں مسند نشین ہوئے تھے۔ ذوالفقار علی بھٹو 43سال۔ جنرل ضیا53۔ محمد خان جونیجو 53۔ بے نظیر بھٹو 35۔ نواز شریف41۔ جمالی58۔ اور آپ کو یہ مسند 65سال کی عمر میں مل رہی ہے۔ آپ کے ہم عصر حکمران بھارت میں مودی 68سالہ ہیں۔افغانستان میں اشرف غنی 69سالہ۔ چین میں شی 65سالہ۔ اس خطّے میں دوسرے حکمران آپ کے ہم عمر ہی ہیں۔ اس لئے ان سے معاملہ فہمی میں آپ کو مشکلات نہیں ہوںگی۔
مجھے 21اپریل 1972یاد آرہی ہے۔ عبوری آئین منظور ہوگیا تھا۔ صدر بھٹو نے پنڈی کے ریس کورس گرائونڈ میں 3لاکھ پاکستانیوں کے سامنے حلف اٹھایا تھا۔ چیف جسٹس آف پاکستان جسٹس حمود الرحمان نے حلف لیا تھا۔ اس سے عوام میں ایک نیا جوش ولولہ پیدا ہوا تھا۔
اب سن رہے ہیں کہ بڑے بڑے اداکار۔ کھلاڑی حلف برداری میں آئیں گے۔ مگر یہ سب مردوں تک کیوں محدود ہے۔میری سفارش ہوگی کہ کترینہ کیف کو بھی بلائیں۔ ثانیہ مرزا ۔ ارون دھتی رائے اور کسی کشمیری لیڈر کو بھی۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
آج صبح ایک کالم نظر سے گزرا جس کی ابتدائی سطور تھیں ’’میرا دعویٰ ہے کہ میں سچا ہوں، جبکہ مجھ سے اختلاف کرنے والے کا خیال ہے کہ وہ سچا ہے، کیسے جانیں کہ کون سچا ہے۔ نواز شریف کو برا بھلا کہنے والے بھی یہی سمجھتے ہیں کہ وہ سچے ہیں کہ ایک طاقتور شخص کو للکارتے ہیں۔ دوسری طرف اسٹیبلشمنٹ کے خلاف بولنے والے دعویٰ کرتے ہیں کہ اصل بہادری تو طاقتور ترین کے خلاف بات کرنا ہے۔ نواز شریف حکومت نہ کسی کا بھلا کر سکتی تھی اور نہ کسی کو نقصان پہنچا سکتی تھی اور نہ ہی کسی کے لئے جزا کا بندوبست کر سکتی تھی۔ وہ تو خود بے بس اور شکنجے میں کسے ہوئے تھے۔ ‘‘
یہ سطور ممتاز تجزیہ نگار اور کالم نویس سہیل وڑائچ کی ہیں، جو ان چند لکھنے والوں اور تجزیہ نگاروں میں سے ہیں جو مجھے ہر حال میں اور ہر دور میں اچھے لگتے رہے ہیں۔ اس لئے کہ وہ سچ بولتے اور سچ لکھتے ہیں۔ سچ کیا ہے؟ اپنے ضمیر کے مطابق لکھنا سچ ہے اور جھوٹ کیا ہے جو ڈکٹیشن لے کر لکھا جائے۔ سہیل وڑائچ سچ لکھنے اور بولنے والوں میں سے ہے کہ وہ اپنے ضمیر کا قیدی ہے۔ اس کے بہت سے کالم ایسے ہیں جن سے مجھے اتفاق نہیں تھا بلکہ سراسر اختلاف تھا مگر اس کے باوجود وہ کالم پڑھ کر یا ٹی وی پر اس کا تجزیہ سن کر مجھے اپنے منہ میں کڑواہٹ کبھی محسوس نہیں ہوئی۔ ایک تو اس لئے کہ میں جانتا ہوں کہ وہ جو کچھ کہہ رہا ہے، نیک نیتی سے کہہ رہا ہے اور دوسرے اس لئے کہ وہ اختلاف کرتا ہے، افترا پردازی نہیں کرتا اور گالی نہیں دیتا۔ عام زندگی میں بھی میں نے سہیل وڑائچ ایسے مہذب لوگ کم کم ہی دیکھے ہیں، وہ چھوٹوں بڑوں سب کو عزت دیتا ہے، اتنی شہرت کے باوجود اس کا دماغ ان اینکرز کی طرح خراب نہیں ہوا جو جھوٹی اور لغو قسم کی عارضی شہرت کے نتیجے میں اپنی چھ انچ چھاتی چوڑی کر کے چلتے ہیں اور چونکہ ان کے سروں پر طاقتور ترین ہاتھ ہوتے ہیں چنانچہ وہ جس کی چاہیں کردار کشی کریں، گالم گلوچ کریں، ان کو روکنے والا کوئی نہیں ہوتا۔ وہ تو اپنی ہی برادری کے سینئر موسٹ ساتھی کا بھی لحاظ نہیں کرتے جب انہیں اس کی پگڑی اچھالنے کا اشارہ مل جاتا ہے۔ ایسے سینئر کہلانے اور اس حوالے سے دفتروں میں سینیارٹی کی بنیاد پر ترقی کے دعویدار افراد کے بارے میں منیر نیازی کہا کرتے تھے کہ یہ سینئر نہیں ہیں، آپ انہیں زیادہ سے زیادہ ’’خبر کہنہ مشق‘‘ کہہ سکتے ہیں، تمام سینئر جن میں، میں خود بھی شامل ہوں، اس گستاخی کے لئے معذرت، مگر میری مجبوری یہ ہے کہ زیادہ دیر تک منہ بسورنے والی تحریر میرے بس میں نہیں۔ مجھے اگر کوئی فقرہ سوجھ جائے یا کسی کا مزیدار جملہ یاد آ جائے، تو میں اپنے قارئین کو اس سے محروم نہیں رکھ سکتا خواہ اس کی زد میں، میں خود بھی کیوں نہ آ رہا ہوں۔ مظہر الاسلام نے ایک دفعہ لکھا تھا کہ عطا کو اگر کوئی جملہ سوجھ جائے تو وہ جملہ ضائع نہیں کرتا، بندہ ضائع کر دیتا ہے۔
برا ہو میری منتشر خیالی کا کہ آج میرا ارادہ سہیل وڑائچ کے کالموں کے مجموعے ’’پارٹی از اوور‘‘ کے بارے میں اظہار خیال کا تھا مگر میں ادھر ادھر کی ہانکتا رہا۔ دراصل گزشتہ کچھ عرصے کے دوران میں نے اوپر تلے سہیل وڑائچ کے سیاسی علامتی یا نیم علامتی کالم پڑھے تو مجھے لگا کہ میں محض اخبار میں شائع ہونے والا کوئی کالم نہیں پڑھ رہا بلکہ کوئی ادبی شہ پارہ پڑھ رہا ہوں۔ یہ کالم کیا تھے، بیک وقت دل میں ٹھنڈک اور دل میں چبھن پیدا کرنے والی طلسماتی تحریر کی خاصیت رکھتے تھے۔ مجھے یہ تو علم تھا کہ سہیل بہت پڑھا لکھا شخص ہے لیکن چونکہ دوستوں کی محفل میں قہقہے لگانے والا یہ شخص اپنی علمیت کا رعب کبھی نہیں ڈالتا تھا مگر جن کالموں کی طرف میں اشارہ کر رہا ہوں، ان میں عالمی ادب اور عالمی منظر نامے اتنے موثر اور اتنے خوبصورت انداز میں نظر آئے کہ مجھے لگا سہیل وڑائچ مجھے اور کچھ دوسرے کالم نگاروں کو مخاطب کر کے کہہ رہا ہے کہ ’’بچُّو ‘‘ اس طرح لکھتے ہیں کالم۔ میرے خیال میں ہم سب جانتے ہیں کہ شاعری ہو یا نثر، اگر اس میں علمیت موقع بے موقع ٹھونسی جائے تو یہ حرکت خلاف ِ وضع فطری فعل کے زمرے میں آتی ہے۔ سالن مزے کا تب بنتا ہے جب اس میں مسالارچا بسا ہو، اس کے اوپر تیرتا نظر نہ آئے۔ سہیل وڑائچ کے کالموں میں علمیت اوپر اوپر تیرتی نظر نہیں آتی بلکہ ان میں رچی بسی دکھائی دیتی ہے چنانچہ میں نے جب یہ لذیذ کالم پڑھنا شروع کئے تو میرے سینے میں غیر محسوس طریقے سے علم کے چراغ بھی روشن ہوتے محسوس ہوئے۔ ایسی تحریر لکھنا کسی ہماشما کا کام نہیں بلکہ اس کے پیچھے برسوں کا مطالعہ اور تکنیک میں مہارت درکار ہوتی ہے۔ ابھی میں نے لفظ ’’برسوں‘‘ لکھا ہے، کئی برسوں کی جگہ ’’سالوں‘‘ لکھ دیتے ہیں حالانکہ ہر کالم کا کریڈٹ سالوں کو دینا قطعاً ضروری نہیں ہوتا۔ بہرحال چلتے چلتے میں ایک ’’پھڑ‘‘ مارنا چاہتا ہوں اور وہ یہ کہ میں سہیل وڑائچ سے اصرار کرتا رہا کہ یہ کالم کتابی صورت میں سامنے آنا چاہئیں کہ یہ ایک علمی، ادبی اور صحافتی امانت ہے جو حقداروں تک ضرور پہنچنا چاہئے۔ انہوں نے مجھ سے اتفاق کیا قارئین سے درخواست ہے کہ اس پر میرا شکریہ ادا کریں۔
آخر میں ایک بات، میں یہ کتاب ابھی پڑھ رہا ہوں، لیکن جتنی ابھی تک پڑھی ہے ان میں مختلف اسالیب کے کالم نظر سے گزرے۔ یہ کتاب ایک سنسنی کی طرح ہے اور یہ سنسنی ایک صاحب ضمیر نے ترتیب دی ہے۔ میں اس کے ہر سرسے لطف اندوز ہو رہا ہوں۔ آپ بھی ہوں۔ (بشکریہ جنگ لاہور)
(کالم نگار کے نام کے ساتھ ایس ایم ایس اور وٹس ایپ رائے دیں۔00923004647998)

(ایمرا نیوز)
پاکستان میں اِنتخابات کے بعد حکومت کی تشکیل سمیت مستقبل قریب میں رونما ہونے والی تمام ممکنہ سیاسی تبدیلیوں پر اَندرون ملک قیاس آرائیوں کا جاری رہنا فطری بات ہے۔ لیکن اِس معاملے میں بے چینی اور تذبذب سرحد کے اُس پار بھی کچھ کم نہیں۔ ہندوستانی نیوز میڈیا پر اِن دنوں اُٹھایا جانے والا سب سے بڑا سوال یہ ہے کہ عمران خان کے پردھان منتری بن جانے کی صورت میں پاکستان اور ہندوستان کے درمیان دو طرفہ تعلقات کیسے رہیں گے۔
بھارت میں پرنٹ کی طرح الیکٹرانک نیوز میڈیا بھی اَپنے حجم اور وسعت کے لحاظ سے دُنیا میں صف اوّل کی نیوز انڈسٹری میںشمار ہوتا ہے۔ شاید اِسی لئے بہت سے بھارتی شہریوںنے اَپنے ملک کے ساتھ ساتھ یورپ اور شمالی امریکہ میں بھی نیوز میڈیا میں شہرت حاصل کی۔ لیکن عجیب بات یہ کہ ہندوستانی صحافی، تجزیہ کار اور خاص طور پر اینکرز پیشہ ورانہ شہرت رکھنے کے باوجود پاکستان سے متعلق مباحثوں میں کچھ کہتے یا سنتے ہوئے ضرورت سے زیادہ جذباتی اور جارحانہ سا انداز اپنا لیتے ہیں۔ اگرچہ یہ معمہ اَبھی تک حل نہیں ہوسکا ہے کہ آیا بھارتی اینکرز یہ انداز پروگرام کی ریٹنگ بڑھانے کے لئے اِختیارکرتے ہیں یا پاکستان دشمنی میں؛ لیکن اِن سے بات کرنے کے دوران سمجھ بوجھ رکھنے والے پاکستانی صحافی و تجزیہ کار بھی شاید غصے میں
آکر فون بند کرنے یا پھر اِنہی کے انداز میں جواب دینے پر مجبور ہوسکتے ہیں۔ بھارتی اینکرز پر یہ خاص کیفیت عموما ًدونوں ملکوں میں کشیدگی بڑھنے پر طاری ہوتی ہے۔اِن دنوں بھی عمران خان کے وزیر اعظم بن جانے کے روشن امکانات ہندوستان سے دوطرفہ تعلقات سے متعلق بھارتی خدشات کو غیر ضروری طور پر ہوا دے رہے ہیں ۔ بس اِس بار فرق یہ ہے کہ ماضی کے بر عکس فی الحال کسی پاکستانی تجزیہ کار سے یہ بھارتی اینکرزسوال پوچھ لینے کے بعد کسی حد تک جواب سن لینے کی مہربانی ضرور فرمانے لگے ہیں لیکن ضروری نہیں کہ یہ سلسلہ مستقبل قریب میں بھی اِسی طرح ٹھیک ٹھیک چلتا رہے ۔
پولنگ والے دِن معروف ہندوستانی اینکر سدھیر چوہدری اپنے چینل پر ریحام خان سے براہ راست گفتگو کے دَوران کپتان سے متعلق سوالات پوچھ کر پاک بھارت تعلقات کے مستقبل کا اندازہ لگانے کی کوشش کرتے رہے۔ بعد اَزاں اُ نہوں نے راقم سے سوال کیا کہ کیا عمران خان بحیثیت پاکستانی وزیر اعظم، ہندوستان کے دوست ثابت ہوسکیںگے ؟ اب مجھے اِس سوال کا جواب دینا تھا لیکن پہلے میں اِس معاملے پر اپنا ذاتی نقطہ نظر تفصیل سے بیان کرتا چلوں۔
عمران خان بحیثیت کرکٹر دوستوں کی طرح میرے بھی پسندیدہ ترین کھلاڑی رہے ہیں ۔ اِسکول کے دَور سے ہی کپتان کے کرکٹنگ سینس (Cricketing Sense) ، اِن کا رَن اَپ (Run-up) اور اِن کی دلکشی پر ہر میچ اور سیریز کے دوران خوب غور و خوض ہواکرتاتھا۔ پھر سال 1992کے ورلڈکپ میں کامیابی کے بعد اَسپتال کی تعمیر کے لئے اِن کی کوششوں کی خبریں سننے کو ملتی رہیں۔ اندازہ ہوا کہ کپتان کے ہندوستان میں اُس وقت تعلقات پر بلاشبہ نیاز اے نائیک جیسا ٹریک ٹو ڈپلومیسی کا ماہر شخص بھی حیران ہونے سے زیادہ رشک میں مبتلا ہوسکتاتھا ۔ دلیپ کمار سے لیکر عامر خان تک شاید ہی کوئی بڑا بالی وڈ اداکار عمران خان کے خاص حلقہ احباب میں شامل نہ ہو۔ سنیل گو اسکر، نوجوٹ سِدّھو اور کپل دیو جیسے بھارتی کھلاڑیوں سے اِن کے تعلقات بہت پرانے ہیں۔کپتان کی جانب سے اِن تینوں حضرات کو تقریب حلف برداری میں شرکت کی دعوت دانشمندانہ قدم ہے۔
عمران خان کے اسپتال کی تعمیر کے لئے بالی وڈ اداکاروں اور اداکارائوں کی دلچسپی زیادہ تر پاکستانیوں کے لئے حیران کن تھی۔ لیکن یہ عمر ان خان کا ہی کمال تھا کہ ہندوستان اور ہندوستانیوں سے اتنے قریبی اور گہرے تعلقات رکھے رہنے کے باوجود پاکستان میں کسی بھی شخص نے اِن کی حب الوطنی پر کبھی اُنگلی نہیں اٹھائی۔یہ سچ ہے کہ جہاں تک حب الوطنی کا معاملہ ہے ، بلاشبہ آج بھی اُن کی شخصیت کسی بھی قسم کے شکوک و شبہات سے بالا تر ہے۔
ہندوستان سے کپتان کی قربت کا تیسرا پہلو بیان کرنے میں عمومی طور پر زبان اور اندازِ بیان میں کمال مہارت ضروری ہے۔ لہذا سدھیر چوہدری کے مذکورہ سوال کا جواب دیتے ہوئے جب میں اِس پہلو تک پہنچا تو سدھیر نے اَپنی روایتی سمجھ داری کے ساتھ اَگلا سوال پوچھ کر گفتگو آسان کردی ۔ یوں میری جانب سے کسی حد تک واضح ہوگیا کہ عمران خان کے پردھان منتری ہوتے ہوئے ہندوستان سے تعلقات میں بہتری کے بہت سے دروازے کھل سکتے ہیں۔
اِس وقت نئی حکومت کی تشکیل ملک میں آگے بڑھتے ہوئے سیاسی عمل کا اَ ہم ترین مرحلہ ہے۔ لیکن انتہائی متوقع وزیر اعظم ہوتے ہوئے اُمید ہے کہ عمران خان اِن دنوں بھی اپنے مشیروں سے چند بنیادی اور حساس معاملات میں مستقل صلاح و مشورے کررہے ہوں گے۔ اِن میں توانائی، ترقیات، تعلیم اور صحت سے متعلق بنیادی سہولتوں کے ساتھ ساتھ خارجہ پالیسی ایک اِنتہائی اَہم شعبہ ہے۔ خاص طور پر دہشت گردی اور انتہا پسندی کے تناظر میں نئی اور موثرخارجہ پالیسی پاکستان کی اوّلین ضرورت ہے۔ ہندوستان سے سفارتی معاملات کا بھی کم از کم اِس حد تک سازگار ہونا ضروری ہے کہ سرحدوں پر امن کے ساتھ ساتھ دو طرفہ تجارت میں بہتری اور سرحد کے دونوں جانب شہریوں کی آمد رفت کم خرچ اور آسان ہوسکے ۔دو طرفہ بات چیت میں کشمیرکے معاملے کو شامل کروالینا بھی اگرچہ ایک بڑا کام ہوگا لیکن بااثر ہندوستانی شخصیات سے عمران کے دیرینہ تعلقات اور ہندوستان میں اِن کے اثرورسوخ اِن معاملات کویقیناََآسان بناسکتے ہیں ۔ اِن کے لئے ٹریک ٹو پالیسی کی بحالی اوراِس کا فروغ بھی ماضی کے کسی بھی ہندوستانی و پاکستانی حکمران یا ڈپلومیٹ کے مقابلے میں کہیں زیادہ آسان ہوسکتا ہے۔ کپتان بلا شبہ برصغیر کی واحد شخصیت ہیں جن پر سرحد کے دونوں جانب لوگ اندھا اعتبار کرتے ہیں۔
انتخابات کے بعد کپتان کا قوم سے پہلا براہ راست خطاب ہر خاص و عام میں سراہا گیا اور آج بھی گلی کوچوں میں اِس کا چرچہ ہے۔ اِس خطاب میں بھی کپتان نے کم و بیش یہی بات دہرائی تھی کہ وہ ہندوستان سے سب سے زیادہ قریب رہنے والے پاکستانی ہیں۔البتہ جہاں تک کپتان اور ہندوستان کے درمیان تعلقات کے تیسرے پہلو کا تعلق ہے، تو سدھیر چوہدری کو ہکلاتے ہوئے بیان کی گئی بات ایک زمانے میں انور مقصود صاحب نے زبان پر عبور کے سبب انتہائی مہارت کے ساتھ بیان کردی تھی۔ ہندوستان کے دورے پر جانے والی پاکستانی کرکٹ ٹیم کو دعا دیتے ہوئے اُنہوں نے کچھ یوں کہا کہ،’’خدا عمران کی ٹیم کی زینت کو ہمیشہ اپنی امان میں رکھے، آمین۔‘‘(بشکریہ جنگ لاہور)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
پاکستان کی سیاسی حکمرانی کی چادر پر چہرہ تو نیا ہے اور نئی توقعات بیدار کررہا ہے لیکن جس عمارت پر یہ پردہ ڈالا گیا ہے وہ تو پرانی ہی ہے۔ اسے گرانا تو آسان نہیں ہے۔ اور یہ سوال بھی سر اٹھاتا ہے کہ کہیں اس عمارت کی شکستگی کو چھپانے کے لئے تو اس پر یہ غلاف نہیں چڑھایا جارہا۔ پھر یہ بھی کہ اس غلاف کے چاک سے پرانی عمارت کے وہ ستون جھانک رہے ہیں جو بہت مضبوط ہیں اور غلافی ہتھوڑوں سے انہیں منہدم نہیں کیا جاسکتا۔ بہر کیف ، جسے وہ تبدیلی کہتے ہیں اس کی آمد آمد ہے۔ انتظار ہےکہ نئی حکومت بنے گی۔ وعدے وفا ہوں گے۔ بنے گا نیا پاکستان ۔ لیکن وہ پاکستان نیا کیسے ہوگا کہ جب اس کی تعمیر میں پرانے پاکستان کی کسی گرتی ہوئی دیوار کی کئی اینٹیں بھی استعمال کی جارہی ہیں۔ وہ دکھائی دے رہا ہے آپ کو کہ جہاں تحریک انصاف کی نئی، اجلی اینٹوں میں متحدہ قومی موومنٹ کی بدرنگی اینٹ کا پیوند لگا ہے۔ اور کتنی ہی اینٹیں تو ایسی ہیں کہ جنہیں آپ آزاد کہیں۔ جہاں جگہ خالی ہو انہیں ٹھونس دیا جائے۔
اس تعمیر اور دیوار کے استعارے سے آگے بڑھ کر ہم دیکھیں تو وہ دروازہ تو ابھی تک نہیں کھلا کہ جس میں داخل ہو کر ہم نئے پاکستان میں داخل ہوسکیں یا سادہ لفظوں میں ایک نئی حکومت کی عملداری کا آغاز ہو۔ انتخابات کے دن کوگزرے تو اب دس دن ہورہے ہیں
اور ابھی تک اسکور بورڈ کے سارے خانے بھرے نہیں گئے۔ جس طرح 25جولائی سے پہلے کے ہفتوں اور مہینوں کی کارگزاریوں نے ایک اودھم مچا رکھا تھا اسی طرح انتخابات کے دن کے بعد ایک ایک دن نے اس تذبذب اور بے یقینی کا سامان فراہم کیا ہے کہ جس کی کوئی گنجائش ہونا نہیں چاہئے۔ یہ تو بس دو تین کا کام ہےکہ سارے نتائج سامنے آجائیں اور نئی بننے والی حکومت کے خدوخال سب کو دکھائی دینے لگیں۔ عمران خان کی تحریک انصاف نے تو ہمیشہ تیز رفتاری کا تاثر دیا ہے۔ ان کا پیغام ہمیشہ یہ رہا ہے کہ اتنے دن میں ہم یہ کردیں گے اور آپ دیکھتے رہ جائیں گے۔ 100دن کا بھی ایک پروگرام دیا جاچکا ہے۔ یہ سچ ہے کہ اب نئی حکومت کے قیام میں جو دیر ہورہی ہے اس میں تحریک انصاف کا کوئی قصور نہیں ہے۔ ہاں، اس وقفے کی اسے بھی اس لئے ضرورت پڑگئی کہ تمام انتظامات کے باوجود، قومی اور پنجاب اسمبلیوں میں وہ واضح اکثریت حاصل نہ کرسکی۔ سو اب اسے بارہویں ، تیرہویں اور آپ گنتے جائیے کہ کتنے اور کھلاڑیوں کی ضرورت پڑگئی ہے۔ گویا میدان میں اترنے سے پہلے ہی سیاسی کھیل کے کئی ایسے دائو پیچ انہیں سیکھنا پڑرہے ہیں کہ جن کو وہ ہمیشہ ’’فائول‘‘ کہتے آئے تھے۔ آپ کو بھی یاد ہوگا کہ حالیہ انتخابی مہم میں عمران خاں زور دے کر یہ کہتے رہے کہ تحریک انصاف میں آزاد امیدواروں کے لئے کوئی جگہ نہیں ہے کیوں کہ تحریک انصاف ایک نظریہ ہے اور لوگ سوچ سمجھ کر اس نظریے کو ووٹ دیں۔ اب ہم یہ ڈرامہ دیکھ رہے ہیں کہ جہانگیر ترین کیسے اپنا جال لہرا کر آزاد امیدواروں کی تتلیاں پکڑ رہے ہیں۔ سوشل میڈیا میں ایسی کئی تصویریں گشت کررہی ہیں کہ فلاں امیدوار کیسے جہانگیر ترین کے ذاتی جہاز میں سوار ہے اور پھر پارٹی کا مفلر لٹکائے ، عمران خاں کی خدمت میں حاضری دے رہا ہے۔ ایک تو ایسے منتخب آزاد امیدوار نے پارٹی میں شرکت کی ہے کہ جس نے تحریک انصاف کے امیدوار کو ہرایا تھا۔ آپ کہیں گے کہ سیاست تو ہے ہی اقتدار کا کھیل اور جو کچھ تحریک انصاف یا اس کی مخالف جماعتوں کا اتحاد کررہاہے وہ جائز ہے۔ لیکن مجھے اسلم اظہر کی برسوں پہلے کہی گئی یہ بات یاد آرہی ہے کہ کیا ہم اکیسویں صدی میں ننگے پائوں داخل ہوں گے؟ تو کیا تحریک انصاف نئے پاکستان میں سمجھوتے کی چادر اوڑھ کر داخل ہوگی؟
جو کچھ بھی ہو، موجودہ صورت حال اطمینان بخش بالکل نہیں۔ ایک تو یہ کہ تحریک انصاف کی تمام مخالف جماعتیں انتخابات میں دھاندلی کا شور مچارہی ہیں۔ احتجاج کے امکانات بھی ہیں۔ اپوزیشن کا اتحاد ہر محاذ پر تحریک انصاف کا مقابلہ کرنے کی تیاری کررہا ہے۔ امید تو یہ کی جانی چاہئے تھی کہ انتخابات کے نتائج بپھرے ہوئے جذبات کو ٹھنڈا کرنے میں مدد دیں گے۔ ماردھاڑ کے باب کا خاتمہ ہوگا۔ سیاسی درجہ حرارت میں کمی واقع ہوگی۔ اور یہ سب اس لئے اہم ہے کہ اب ہمیںٹھنڈے دل سے پوری صورت حال کا جائزہ لینے کی ضرورت ہے۔ یہ سمجھنا ہے کہ ہم نے ان انتخابات میں کیا کھویا ہے اور کیا پایا ہے۔ انتخابی مہم کی گرما گرمی اور سمجھ میں نہ آنے والے اقدامات نے غور فکر اور سنجیدہ گفتگو کو بہت مشکل بنادیا تھا۔ افسوس کہ وہی ماحول ابھی تک قائم ہے۔ ووٹوں کی گنتی میں جو خلل پڑا اس نے انتخابات کے دامن کو کسی حد تک داغدارکردیا ہے۔ کئی ایسےشکوک پیدا ہوگئےہیں کہ جو کسی عدالت کے فیصلے سے رد نہیں کئے جاسکتے۔ اب دیکھنا یہ ہے کہ کب ہمیں یہ مہلت ملے گی کہ ہم پاکستان کے موجودہ بحران کا معروضی تجزیہ کرسکیں۔
سب سے بڑا سوال یہ ہے کہ کیا ان انتخابات کے نتیجے میں پاکستان کی جمہوریت مضبوط ہوئی ہے یا اب اس کا مستقبل تابناک دکھائی نہیں دے رہا؟ یہ تو ہم جانتے ہیں کہ جمہوریت محض انتخابات کا نام نہیں ہے۔ لیکن اگر انتخابات شفاف اور منصفانہ نہ ہوں تو پھر ملک یا معاشرہ جمہوریت کی نعمتوں سے محروم ہی رہتا ہے۔ میں ان خدشات سے واقف ہوں کہ جس کا اظہار کئی مبصروں نے نجی محفلوں میں یا بین السطور بیانات میں کیا ہے۔ گزشتہ دنوں ہم نے کئی قومی اداروں کی کارکردگی کو دیکھاہے اور ہم نہیں جانتے کہ جمہوریت کے ساتھ ساتھ ا ن اداروں کے مستقبل پر بھی ان انتخابات کا کیا اثر پڑے گا۔ کتنا اقتدار کس کے پاس ہے اور کتنا رہے گا ابھی واضح نہیں۔ عمران خاں اگر پورے اعتماد کے ساتھ حکومت بنالیتے ہیں تو یہ تو الگ بات ہے کہ وہ اپنے وعدے کب اور کیسے پورےکریں گے۔ یہ بھی دیکھنا ہے کہ کیا جمہوری آزادیوں اور طور طریقوں کو بھی فروغ ملے گا اور ہم بے خوف ہو کر اپنی بات کہہ سکیں گے۔ اپنے مسائل کو اجاگر کرسکیں گے۔ ابھی تک تو عمران خاں نے اپنے کسی بیان میں یہ اشارہ نہیں دیا کہ وہ فکر اور اظہار کی آزادی کو جمہوریت کی بنیاد سمجھتے ہیں اور وہ ان حدود سے واقف ہیں جوآئین نے تمام قومی اداروں پر نافذ کی ہیں۔ لیکن ہمیں امید کرنا چاہئے کہ ان کی حلف برداری کے بعد ایک نئی جمہوری حکومت قائم ہوسکے گی۔ اور پھر شاید اس بحث کی بھی ضرورت نہیں رہے گی کہ جمہوریت آخر ہے کس چڑیا کا نام!(بشکریہ جنگ لاہور)
(کالم نگار کے نام کے ساتھ ایس ایم ایس اور وٹس ایپ رائے دیں۔00923004647998)

(ایمرا نیوز)
گزشتہ کالم میں کچھ ’’آوارہ‘‘ ای میلز کو مدنظر رکھتے ہوئے میں نے یہ لکھا بلکہ سوال اٹھایا تھا کہ ’’الیکشن کمیشن کا آر ٹی ایس (رزلٹس ٹرانسمیشن سسٹم) الیکشن کی رات 11 بجے فیل کیوں ہوا؟ موضوع اتنا نازک تھاکہ ہچکچاتے اورنہ چاہتےہوئے بھی میں نے ای میلزکی سمری ری پروڈیوس کردی تاکہ اگر اس دھوکہ بازی پر کچھ نہیں بھی ہو رہا تومتعلقہ افراد، ادارے اس طرف متوجہ تو ہوںکیونکہ اگر واقعی ایساہوا تو یہ ملک، قوم، جمہوریت کے خلاف مکروہ ترین سازش ہے۔ اپنی طرف سے میں نے صرف اتنا اضافہ کیا تھا کہ شکست خوردہ عناصر حتمی احتساب سے بچنے کے لئے کسی بھی حد تک جاسکتے ہیں۔الحمد للہ اگلےہی روزیعنی 3اگست کے مختلف اخبارات کی یہ خبریں شہ سرخیوں کی شکل میں میرے سامنے ہیںکہ…..’’انتخابی نتائج: کمپیوٹر بند ہونے کی تحقیقات کا فیصلہ‘‘’’آر ٹی ایس‘‘ کی ناکامی کی تحقیقات کے لئے ماہرین پر مشتمل کمیٹی قائم کی جائے۔ کابینہ ڈویژن کو الیکشن کمیشن کا خط‘‘ادھر سابق سیکرٹری الیکشن کمیشن کنور دلشاد نے بھی یہ کہہ دیا ہے کہ ’’الیکشن کمیشن کی ساکھ خراب کرنے کے لئے RTS فلاپ کیا گیا‘‘ میں کنور صاحب کے اس بیان میںیہ ترمیم چاہتا ہوں کہ حضور! الیکشن کمیشن نہیں بلکہ خود الیکشن کی ساکھ پر سوالیہ نشان لگانے کے لئے پرانے وارداتیوں نے یہ سازش اورواردات کی ہے تاکہ عوام دشمنوں کےیہ مختلف گروہ اورگینگز اکٹھے ہو کر عوام سے اپنی عبرت ناک شکست کا انتقام لے کرملک کو عدم استحکام کا شکارکرسکیں کیونکہ استحکام ان کے وارے میں نہیں۔تاریخ گواہ ہے،ہمارے حالات گواہ ہیں، ملکی اقتصادیات گواہ ہے کہ ان شکست خوردہ عناصر نے ملک و قوم کاحشرنشر کرنے کےعلاوہ آج تک کچھ نہیں کیا اور آج عوام سے دھتکارے جانےکے بعد یہ سب عوام کے نام پر عوام ہی کے خلاف صف بستہ وصف آرا ہو رہے ہیں۔ جمہور خور جمہوریت کی آڑ میں پھر سے عوام کا شکار کرنے کے لئے تیارہورہے ہیں۔ اک تصویر میرے سامنے ہے، تفصیل کچھ اس طرح…..درمیان میں انگریزی مارکہ ٹھنڈی میٹھی ماسی مصیبتےایک طرف کڑاکے شاہ جوہرمشین کا پرزہ بننے میں مہارت رکھتا ہے۔اس پرزے کے ساتھ گول ٹوپی پہنے ہمارے ایک پیارے پرانے یونیورسٹی فیلو جن کی جماعت کے بارے عوام میں یہ جملہ ہمیشہ پاپولر رہا ’’ایک دو سیٹ پھربھی ڈھیٹ‘‘ماسی مصیبتے کے پیچھے محاورتاً نہیں حقیقتاً وہ جو ضیاءالحق کامارشل لائی دودھ پی کرجوان ہوا اور ’’ماں کی دعا جنت کی ہوا‘‘ کی چلتی پھرتی تصویر ہے۔یہ توآزمائی، کھائی دیگ کے چنددانے ہیں جنہیں چکھتے ہی فوڈ پوائزننگ ہو جائے۔ ایسوں کے اکٹھ دیکھ کر ہی ’’کبوتر با کبوتر باز باباز‘‘ جیسے مصرعے اور ’’بھینسیں بھینسوں کی بہنیں ہوتی ہیں‘‘ جیسے محاورےوجود میں آئے ہوںگے۔میںہفتہ دس دن پہلے بھی کہہ چکا، لکھ چکا کہ گندگی توگند ہی ڈالے گی۔ کارپوریشن کی ٹرالیو ں سے خوشبو تو آنے سے رہی لیکن پیپلزپارٹی اور باقیوں میں تھوڑا سا فرق ہے جسے بلاول کے نام سے جاناجاتا ہے توپلیز! اس تازہ دم نوجوان پررحم کرو۔ بلاول کی احمقانہ لانچنگ پہلے ہی اس کا پینڈامشکل کرچکی جسےاس نے انتخابی مہم کے دوران ذرا آسان کیا تو اب ان کے ساتھ اسے کھڑا کرکے کس بات کا انتقام لینا ہے؟ ان چلےہوئے کارتوسوں کےساتھ بلاول کوبریکٹ کرنا اس کے سیاسی اسقاط کے برابرہوگا….. شاید اسی لئے بلاول گیا بھی نہیں۔افواہیں تو کب سے عروج پر ہیں کہ جاتی امرا کاچی گویرا، گوالمنڈی کا مائوزے تنگ، ہوم میڈ انقلابی اور تازہ تازہ نظریاتی تابڑ توڑ کسی نئے NRO کے لئے جوڑ توڑ میں مصروف ہے یعنی ’’آغازبھی رسوائی انجام بھی رسوائی‘‘ اخباری اطلاع کے مطابق ایک بار پھر پاناما پہلوان کی رہائی وغیرہ کےلئے اِدھر اُدھر سے دبائوکی کوششیں جاری ہیں اور اس بار نئی بات یہ کہ ’’پلی بارگیننگ‘‘ کی بھی آفر ہے یعنی عظیم قائد ’’مال مسروقہ‘‘ میں سے کچھ یازیادہ دینے کے لئے بھی راضی ہے۔ سعودی سفیر کی عمران سے ملاقات کے بعد بھی ان افواہوںکوتقویت ملی لیکن ساتھ ہی عمران کایہ جواب بھی گردش میں ہےکہ’’آپ نے شاہی خاندان سے تو لوٹ مار کامال واپس لیا پاکستانی ملزموں سے رعایت کیوں؟‘‘بزدل باغی کو کوئی نیا NRO (کوئی نیا نام بھی دیا جاسکتا ہے) ملنے کے نتیجہ میں ملکی اداروں کی ساکھ اور امیج میں کتنا اضافہ ہوگا؟ اس سے متعلق میں کچھ بھی کہنے کی پوزیشن میں نہیں ہوں لیکن یہ بات پور ےاعتماد سے کہہ سکتا ہوں کہ پیپلزپارٹی ن لیگ اینڈ کمپنی کا حصہ بنی تو اس کے سیاسی تابوت (بحوالہ خصوصی پنجاب) میں یہ آخری کیل بلکہ لکڑی نہیں فولاد کاکِلّا ثابت ہوگا۔ ممکن ہے کوئی وقتی ریلیف بلکہ جزوقتی ریلیف تو مل جائے لیکن ’’پین کلر‘‘ کااثر ختم ہوتے ہی درد ناقابل برداشت ہوگا اور اس کے لانگ ٹرم سیاسی نقصان کا تو اندازہ لگانا بھی ممکن نہیں۔ بلاول کووہ غنچہ نہ بنائیں جو بن کھلے مرجھاجاتاہے۔ میرا رب اس قوم کو ’’پیشہ ور جمہوری جلادوں‘‘ کی ’’اےپی سی‘‘ کے عذاب سے محفوظ رکھے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)

ایک پاکستانی کی حیثیت سے لب پہ آتی ہے دعا بن کے تمنا میری کہ خدایا میرا وطن بھی دنیا کی ترقی یافتہ مہذب اقوام جیسا ہو جائے۔ جہاں علم و دانش اور شعور کی سربلندی ہو، حریت ِفکر اور آزادیٔ اظہار پر سوائے ضمیر اور انسانی وقار کے کوئی قدغن نہ ہو۔ دھونس، دھاندلی اور جبر کا کہیں کوئی سایہ نہ ہو ترقی، خوشحالی اور انسان نوازی کی مسابقت ہو، حسرت بھری تمنا ہے کہ ’’میری زبانِ قلم سے کسی کا دل نہ دکھے، کسی کو شکوہ نہ ہو زیرِ آسماں مجھ سے‘‘ مگر افسوس میرا یہ وژن 70سالوں سے ادھورا خواب ہے کبھی اے حقیقت منتظر نظر آلباسِ مجاز میں۔
وژن اور Reality میں تفاوت یا Difference اگرچہ گزشتہ پانچ ہزار سال سے ہے لیکن اسے پاٹنا اہل نظر کی ہمیشہ تمنا رہی ہے۔ جتنے بھی وژنری انسان آئے ہیں حقائق کی تلخیوں پر قابو پانے کی کاوشیں کرتے چلے گئے ہیں کہیں کامیابیاں بھی نصیب ہوئی ہیں لیکن زیادہ تر وہ اگلی نسلوں پر یہ بھاری ذمہ داری ڈال گئے کہ حیوانیت کے بالمقابل انسانیت کی جدوجہد کا سفر رکنا نہیں چاہئے۔ متحدہ ہندوستان میں ایک عام آدمی کی حیثیت سے مجھے یہ گمان گزرا کہ شاید میری محرومیوں کا باعث ہمسائیگی میں بسنے والے ہندو ہیں لہٰذا میں نے کوشش کر کے مذہب کے نام پر ملک کا بٹوارہ کروا لیا لیکن مابعد معلوم ہوا کہ ’’وہی میری کم نصیبی وہی تیری بے نیازی میرے کام کچھ نہ آیا یہ کمالِ نے نوازی‘‘ ایک ظلم و زیادتی سے نکل کر اس سے زیادہ خوفناک پنجہ استبداد میں پھنس گیا ہوں۔ اب نہ پائے ماندن نہ جائے رفتن والی کیفیت دامن گیر ہے لیکن کیا کروں یہی حقیقت ہے اور اسی کا نام دنیا ہے۔ اپنی سی جدوجہد کر رہا ہوں بارہا مایوسی بھی دامن گیر ہوتی ہے لیکن پھر طفل تسلیاں دیتے ہوئے خود کو سنبھالتا ہوں کہ ’’مصیبت کا پہاڑ آخر اک دن کٹ ہی جائے گا مجھے سر مار کر تیشے سے مر جانا نہیں آتا۔ ہر نئے الیکشن میں یہ حسرت بھری تمنا کرتا ہوں کہ اب کے تبدیلی آرہی ہے میری تقدیر بدلنے والی ہے مگر بعد ازاں یہی کہنا پڑتا ہے کہ ’’محبت کر کے بھی دیکھا ہے محبت میں بھی دھوکہ ہے‘‘ اور یہ کہ ’’ان حسرتوں سے کہہ دو کہیں اور جا بسیں؟…. رہزن کو رہنما سمجھ کر کچھ دیر ساتھ چلتا ہوں مگر پھر احساس ہوتا ہے کہ طریق کوہ کن میں بھی وہی حیلے ہیں پرویزی‘‘۔
آج ہمارا یہ عام آدمی کس قدر غمناک، مایوس اور دکھی ہے غیر ماریں تو انسان اپنوں کو پکارتا ہے جب اپنے مار مار کر قیمہ بنا رہے ہوں تو انسان کس کو پکارے؟ کس کے نام کی دہائی دے؟ پروردگار تیری دنیا میں کس قدر دھوکا ہے اک چہرے پہ سو چہرے سجا لیتے ہیں لوگ۔ چرب زبانی میں کیا سحر ہوتا ہے کہ جس نے مذہب کا مطالعہ کیا ہے وہ سمجھ جائے گا کہ کیسی بڑی ہستی بھی اس کے زیرِ اثر آ جاتی رہی ہے۔ سات دہائیوں سے شروع ہو کر کتنی بار ہم اس کے ڈنک سے ڈسے جا چکے ہیں مگر ’’ہوئی نہ عام جہاں میں کبھی حکومت ِعشق، سبب یہ ہے کہ محبت زمانہ ساز نہیں‘‘۔ سچ تو یہ ہے کہ یہ دنیا دل والوں کی نہیں لٹھ والوں کی ہے۔ اہل نظر یہاں جتنی چاہے نئی بستیاں آباد کرلیں مگر ان پر کنٹرول ہمیشہ قبضہ گروپوں کا ہی رہے گا۔ بدل کر بھیس زمانے میں پھر سے آتے ہیں اگرچہ پیر ہے آدم جواں ہیں لات و منات۔
کیا لچھے دار باتیں ہیں کہ ہم ہیں سچائی اور عدل و انصاف کے علمبردار قوم کی عزت ہم سے ہے باقی سب گویا چور ڈکیٹ ہیں یا ملک دشمن ہیں۔ ’’جنہیں ہم ووٹ کی طاقت سے شکست دینا چاہتے ہیں‘‘۔ حالیہ مشق میں اس طاقت کا مظاہرہ ہم نے خوب کیا ہے۔ جس طرح اکبر کونئی تہذیب کی اثر آفرینی سے اندرونی خدشات تھے کہ بظاہر تو کوئی نقصان نہیں دکھتا، مذاہب رہتے ہیں قائم فقط ایمان جاتا ہے۔ یہاں بھی بظاہر ہر چیز 6بجے تک نارمل اور smoothہی لگ رہی تھی جو کچھ ہوا چھ بجے کے بعد ہی ہوا۔ انتخابات سے پہلے، ایک پارٹی قیادت کے خلاف جس طرح پے در پے یکطرفہ فیصلے صادر ہو رہے تھے، دھاندلی کے الزامات کو اس پس منظر میں ملاحظہ کر لیا جائے تو الیکشن اور سلیکشن کے فرق کو واضح کرنے کے لیے مزید دلائل کی ضرورت نہیں رہتی ہے۔ درویش نے اپنی زندگی میں اس نوع کی’’شفافیت‘‘ نہیں دیکھی کس قدر سمجھ داری سے کام لیا گیا ہے۔
بھڑکتے جذبات تو وہی تقاضا کرتے تھے جو مولانا حقیقت فرما رہے تھے لیکن اصل حقیقتیں وہ ہوتی ہیں جو شعور کے تابع ہوں ’’پختہ تر ہوئی ہے اگر مصلحت اندیش ہو عقل‘‘۔ بجائے جوش میں آکر ہر چیز ملیامیٹ کروانے کے کیا موزوں یہی نہیں ہے کہ حکمت و دانش کی پارلیمانی راہ اپناتے ہوئے جبری تنگناؤں کو جمہوری کشاد دلائی جائے کیونکہ عاشقی صبر طلب اور تمنا بے تاب ہے۔
وفاداری اگر ملک و قوم کے ساتھ ہے تو پھر بھلائی اسی میں ہے کہ جو بچے ہیں سنگ سمیٹ لو کڑوے گھونٹ پی کر انتخابی و پارلیمانی پراسس کو آگے بڑھنے دو، آزادیٔ اظہار پر جو قدغنیں لگ چکی ہیں وہ اسی ارتقا کی نمو سے جھڑیں گی۔ کڑوا پھل بھی پک کر اپنے وزن سے آپ گر پڑے گا بعض اوقات آپ تیل اور تیل کی دھار کو دیکھنے سے بڑھ کر زیادہ چھلانگیں نہیں مار سکتے۔ آندھی آئے تو لازم نہیں کہ آپ گردوغبار گلے میں پھینکیں۔ حوصلے کے ساتھ استقامت دکھائیں، قیادت کو اسیری سے نکالنے کے لیے انقرہ سے ریاض تک اپنے دوستوں کو بیچ میں لائیں، ہر سیاہ رات کی ایک سحر ہوتی ہے یہ سیاہی بھی لامتناہی نہیں ہے۔ مت بھولیں کہ اس سیاہی کو اپنی طرف کھینچنے میں اپنا اشتیاق بھی کم نہیں رہا ہے۔ گڈ گورننس کی باتیں کرتے ہوئے طرزِ حکمرانی میں جمہوری حوالوں سے اپنی خامیاں قابلِ ملاحظہ ہیں رہتی کسر ناقابلِ عمل بیانیے میں موجود ہر دو سوچوں کی کنفیوژن نے پیدا کر رکھی تھی۔ بیج کیسا ہی خالص ہو سنگلاخ زمین میں آبیاری کیسے ہو سکتی تھی۔ زمین کی تیاری میں مواقع ملنے پر خود آپ نے کب کیا کاوش کی۔ یہ بھی پیش نظر رہے کہ جمہوری سوچ کے حوالے سے ہماری ڈیڑھ ہزار سالہ تاریخ خاصی بنجر واقع ہوئی ہے۔
نئے پاکستان والوں پر بھی یہ واضح رہے کہ اقتدار کی راہوں پر چلنا سنبھل کے یہاں جو بھی آیا گیا ہاتھ مل کے۔ جو کرو گے وہی بھرو گے جو آج بیجو گے وہی کل کاٹو گے۔ جسے آج پھولوں کی سیج سمجھ کر خوش ہو رہے ہو اس کے کانٹوں کا بستر بننے میں بہت زیادہ ماہ و سال نہیں لگتے۔ اہل جنون کے ہاتھوں میں پتیوں کی جگہ پتھروں کے آنے میں طویل مدت درکار نہیں ہو گی۔ خیالی جنت کے متلاشی دماغوں میں پہلے ہی روشنی کم اور حرارت زیادہ ہے ’’مجھے خوف آتشِ گل سے ہے کہ کہیں چمن کو جلا نہ دے‘‘ کچھ مدت بعد یہی لوگ پوچھیں گے کہ کہاں ہیں ایک کروڑ نوکریاں؟ کہاں ہیں لاکھوں بے گھروں کے گھر؟ کہاں ہے ہیلتھ پالیسی؟ کہاں ہے ہیومن ڈویلپمنٹ کا پروگرام؟ کہاں ہیں گڈ گورننس کے بلند بانگ دعوے؟ جو چیز جتنی بلندی سے گرتی ہے اتنی ہی زیادہ چھلنی بھی ہوتی ہے۔ اسی لیے سیانے کہتے ہیں پہلے تولو پھر بولو۔ سچائی اور حقیقت بیانی سے کام لو۔ اُس چیز کا دعویٰ مت کرو جو کر نہیں سکتے ہو دوسری بات اپنے پلے باندھ لیں کہ اپنے سیاسی مخالفین کے لیے مصالحت کی وہی پالیسی اپنائیں جس کی کل کو اپنے لیے توقع رکھتے ہیں۔(بشکریہ جنگ لاہور)