Category کالم

(ایمرا نیوز)
بالآخر انتخابات اختتام کو پہنچے اور نتائج تقریباً وہی آئے جن کی سب توقع کررہے تھے لیکن انتخابی مہم کے دوران جس بات سے مجھ سمیت ہر پاکستانی کو دکھ پہنچا وہ معاشرے میں بڑھتی ہوئی تشدد پسندی اور غیر انسانی سلوک تھا۔ حالیہ الیکشن میں یہ دیکھ کر ہر ذی شعور پاکستانی صدمے سے دوچار ہوا کہ انتخابی مہم کے دوران جانوروں کو بھی سیاسی انتقام اور تشدد کا نشانہ بنایا گیا جس کی شروعات پی ٹی آئی سربراہ عمران خان کی جانب سے مخالف جماعت کے لوگوں کو ’’گدھے‘‘ کے القاب سے نوازنے سے ہوئی جس کے بعد پی ٹی آئی کارکنوں نے کراچی میں ایک گدھے پر ’’نواز‘‘ لکھ کر اُسے انتہائی بہیمانہ تشدد کا نشانہ بنایا جس کے نتیجے میں گدھے کےجسم کی ہڈیاں اور ٹانگیں ٹوٹ گئیں لیکن اس پر بھی جب انہیں تسکین نہیں ہوئی تو گدھے کو گاڑی سے کچل دیا گیا۔ بعد ازاں جانوروں کے حقوق کیلئے کام کرنے والی عائشہ چندریگر فائونڈیشن (ACF) کے رضاکار اطلاع ملنے پر جب جائے وقوع پر پہنچے تو انہوں نے دیکھا کہ ایک بے زبان جانور کے جسم سے خون جاری تھا اور وہ اپنی زندگی کی آخری سانسیں لے رہا تھا۔ رضاکاروں کی گدھے کی جان بچانے کی کوششیں بارآور ثابت نہ ہوئیں اور وہ زخموں کی تاب نہ لاتے ہوئے اگلے روز مرگیا۔ اُس وقت تک سوشل میڈیا پر گدھے کے وحشیانہ قتل کی ویڈیو وائرل ہوچکی تھی جسے ’’ہیرو‘‘ کا نام دیا گیا تھا۔ ’’ہیرو‘‘ کی موت کے کچھ دنوں بعد ایک اور گدھا شدید زخمی حالت میں عائشہ فائونڈیشن لایا گیا جس کی کھوپڑی پر تیز دھار آلے کے گہرے نشانات تھے اور اس کی ایک آنکھ ضائع ہوچکی تھی۔ بات صرف گدھے پر تشدد تک محدود نہیں رہی بلکہ الیکشن سے کچھ دن قبل پشاور میں ایک اور واقعہ میں قومی وطن پارٹی کے کارکنوں نے ایک کتے کو تحریک انصاف کے جھنڈے میں لپیٹ کر گولیاں مارکر ہلاک کردیا۔ سوشل میڈیا پر یہ ویڈیو وائرل ہونے کے بعد عوام کا سخت ترین ردعمل سامنے آیا اور عوام کے شدید دبائو پر واقعہ میں ملوث دو ملزمان کی گرفتاری عمل میں آئی۔ میں نے جب بے زبان جانوروں پر تشدد کی یہ ویڈیوز دیکھیں تو شدید صدمے سے دوچار ہوا اور واقعہ کی سفاکی کئی روز تک میرے ذہن سے محو نہیں ہوئی اور میں سوچنے لگا کہ آخر ان بے زبان جانوروں کا کیا قصور تھا جنہیں اپنی مخالفانہ تسکین کیلئے سیاسی انتقام کی بھینٹ چڑھا دیا گیا۔
سیاست میں عدم برداشت اور جانوروں پر تشدد کا یہ پہلا واقعہ نہیں بلکہ قیام پاکستان سے کچھ عرصے قبل تحریک آزادی مہم کے دوران بھی اس طرح کا ایک واقعہ پیش آیا تھا جس میں شرکاء کو محظوظ کرنے کیلئے ایک کتے کو مہاتما گاندھی کا لباس پہنایا گیا تھا۔ قائداعظم کو جب اس واقعہ کا علم ہوا تو انہوں نے اس کا برا منایا اور آئندہ سختی سے ایسی حرکت سے باز رہنے کی ہدایت کی۔ قیام پاکستان کے بعد ملکی تاریخ میں جانوروں کو الیکشن میں ملوث کرنے کی ابتدا اس وقت ہوئی جب 1965ء کے انتخابات میں قائداعظمؒ کی بہن فاطمہ جناح کو جنرل ایوب خان کے مقابلے میں دھاندلی کرکے ہرایا گیا۔ بعد ازاں ایوب خان کے بیٹے گوہر ایوب نے اس جیت کا جشن اور قائداعظم کی بہن کو تضحیک کا نشانہ بنانے کیلئے ایک کتیا کے گلے میں لالٹین ڈال کر شہر بھر میں گھمایا۔ بانی پاکستان کی بہن کی اس طرح کی تذلیل پر عوام کے جذبات شدید مجروح ہوئے جبکہ اس اقدام سے فاطمہ جناح بھی بہت دلبرداشتہ ہوئیں اور دو سال بعد اس دنیا سے رخصت ہوگئیں۔
مذہب اسلام نے انسانوں کے ساتھ ہی نہیں بلکہ جانوروں کے ساتھ بھی حسن سلوک کا حکم دیا ہے اور نبی کریم صلی اللہ علیہ وآلہ وسلم نے جانوروں کے ساتھ حسن سلوک کو اجرِ ثواب قرار دیا ہے۔ جانوروں سے نبی کریم صلی اللہ علیہ وآلہ وسلم کی محبت کا اندازہ اس واقعہ سے لگایا جاسکتا ہے کہ ایک دفعہ نبی کریم صلی اللہ علیہ وآلہ وسلم ایک انصاری کے باغ میں تشریف لے گئے تو نبی کریم صلی اللہ علیہ وآلہ وسلم کو دیکھ کر ایک اونٹ رونے لگا اور اس کی آنکھوں سے آنسو رواں ہوگئے۔ یہ دیکھ کر نبی کریم صلی اللہ علیہ وآلہ وسلم جب اُس اونٹ کے پاس گئے اور اس کے سر پر ہاتھ پھیرا تو وہ خاموش ہو گیا۔ اس موقع پر نبی کریمﷺ نے اونٹ کے مالک کو مخاطب کرکے فرمایا کہ ’’جانوروں کے ساتھ سلوک کے معاملے میں اللہ سے ڈرو جس کا اللہ نے تمہیں مالک بنایا ہے، اِس اونٹ نے مجھ سے شکایت کی ہے کہ تم اِسے مارتے اور بھوکا رکھتے ہو۔‘‘ یہ سن کر انصاری نوجوان اپنے کئے پر شرمندہ ہوا اور نبی کریمﷺ سے معافی طلب کرتے ہوئے آئندہ جانوروں کے ساتھ محبت و شفقت سے پیش آنے کا وعدہ کیا۔
موجودہ الیکشن میں جانوروں پر تشدد کی جس طرح ویڈیوز منظرعام پر آئی ہیں، اس سے نہ صرف غیر مسلموں بلکہ مغربی ممالک میں مسلمانوں اور پاکستانیوں کے بارے میں منفی تاثر پیدا ہوا ہے۔ یورپی ممالک میں جانوروں کے حقوق کے حوالے سے قوانین موجود ہیں اور وہاں جانوروں پر تشدد کرنا قابل سزا جرم ہے۔ ضرورت اس بات کی ہے کہ پاکستان میں بھی اس طرح کی قانون سازی کی جائے اور جانوروں پر تشدد کرنا غیر انسانی عمل اور قابل سزا جرم قرار دیا جائے۔گوکہ الیکشن کمیشن نے پارٹی امیدواروں کیلئے قواعد و ضوابط وضع کر رکھے ہیں مگر الیکشن کمیشن پارٹی کارکنوں کی جانب سے جانوروں پر تشدد کے حوالے سے مکمل خاموش ہے۔ زیادہ اچھا ہے کہ الیکشن کمیشن انتخابی ضابطہ اخلاق میں انتخابی مہم میں جانوروں کی نمائش اور اُن پر تشدد کے حوالے سے بھی قوانین وضع کرے اور خلاف ورزی پر پارٹی کے خلاف کارروائی کی جائے۔
21 ویں صدی میں انسان نے ترقی کی معراج کو پالیا ہے مگر وہ اس ترقی کے باوجود انسانیت سے اتنا گرگیا ہے کہ حیوانیت پر اترآیا ہے۔ یہ امر باعث اطمینان ہے کہ کتے کو گولی مارنے والے ملزمان کو گرفتار کرلیا گیا ہے اور امید ہے کہ انہیں قانون کے مطابق سخت سے سخت سزا دی جائے گی مگر گدھے پر تشدد کرنے اور اس کی موت کا سبب بننے والے پی ٹی آئی کارکنوں کی نہ کوئی گرفتاری عمل میں آئی اور نہ ہی ان کے خلاف مقدمہ درج کیا گیا۔ انصاف کا تقاضا ہے کہ اس گھنائونے جرم میں ملوث مجرمان کو جلد از جلد گرفتار کرکے عبرتناک سزا دی جائے تاکہ آئندہ کوئی سیاسی انتقام کے طور پر جانوروں کے ساتھ اس طرح کا بہیمانہ سلوک نہ کرسکے۔(بشکریہ 92نیوز)

(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
تبدیلی آگئی ہے اور الیکشن کے ابتدائی نتائج آتے ہی آگئی۔ سب سے بڑی تبدیلی پی ٹی آئی اور مسلم لیگ (ن) کے ہاں واقع ہوئی۔ گزشتہ پانچ سال پی ٹی آئی،دھاندلی دھاندلی کا شور مچاتی رہی تو مسلم لیگ(ن) اصرار کرتی رہی کہ انتخابات صاف اور شفاف منعقد ہوئے، اب مسلم لیگ(ن) دھاندلی کا شور مچاتی رہے گی تو پی ٹی آئی ثابت کرتی رہے گی کہ انتخابات صاف بھی تھے اور شفاف بھی۔
تبدیلی آگئی مگر۔۔۔
گزشتہ پانچ سال پی ٹی آئی دھرنوں اور فساد کے لئے بہانے ڈھونڈتی رہی اور مسلم لیگ(ن) پارلیمنٹ کے اندر مسائل حل کرنے پر زور دیتی رہی جبکہ اب مسلم لیگ(ن) پارلیمنٹ کو جعلی قرار د ے کراس سے باہر اودھم مچانے کی کوشش کرتی رہے گی۔ گزشتہ پانچ سال پی ٹی آئی کے لوگ گالم گلوچ سے کام لے کر ماحول خراب کرتے اور مسلم لیگ(ن) کی قیادت صبر سے کام لیتی رہی جبکہ اب پی ٹی آئی والے نصیحتیں کرتے رہیں گے اورمسلم لیگی وہی گالیاں یاد کریں گے جو پی ٹی آئی نے ایجاد کی ہیں۔ گزشتہ پانچ سال عمران خان پارلیمنٹ پر لعنت بھیجتے رہے جبکہ مولانا فضل الرحمان تہتر کے آئین کے تناظر میں پارلیمنٹ کے عزت و احترام کا درس دیتے رہے، اب عمران خان صاحب، مولانا فضل الرحمان بن جائیں گے جبکہ مولانا فضل الرحمان قرآن وسنت کی روشنی میں پارلیمنٹ کو بوگس قرار دے کر اس پر لعنت بھیجتے رہیں گے۔ گزشتہ پانچ سال محمود اچکزئی صاحب عمران خان کے دھرنوں کی مذمت کرتے ہوئے انہیں پارلیمنٹ میں آنے کا درس دیتے رہے جبکہ اب وہ دھرنے دیں گے اور عمران خان صاحب انہیں آئین اور پارلیمنٹ کے احترام کا درس دیتے نظر آئیںگے۔ گزشتہ پانچ سال اسفندیارولی خان صاحب سسٹم گرانے کے لئے سرگرم عمل عمران خان کے مقابلے میں سسٹم کے ساتھ کھڑے تھے لیکن اب وہ نئی اسمبلیوں سے جان چھڑانے والی قوتوں کی اگلی صف میں ہوں گے ۔گزشتہ پانچ سال میں عہدوں کے حصول کے لئے مسلم لیگ(ن) کے پارٹی رہنما اور کارندے اسلام آباد کے فائیواسٹار ہوٹلوں میں نظر آتے تھے اور اب پی ٹی آئی والے وہاں قابض ہوں گے۔
تبدیلی آگئی مگر۔۔۔
عہدوں کے جو سودے پہلے کوہسار مارکیٹ اور جناح سپر میں ہوا کرتے تھے، اب ان کے ساتھ ساتھ فائیو اسٹار ہوٹلوں میں بھی ہونے لگیں گے۔ گزشتہ پانچ سال میاں نوازشریف تک پہنچنے کے لئے مسلم لیگ(ن) کے ایم این ایز فواد حسن فواد کی خوشامدیں کرتے نظر آتے تھے اور اب پی ٹی آئی کے ایم این ایز عمران خان تک پہنچنے کے لئے عون چوہدری، فواد چوہدری، نعیم الحق اور زلفی بخاری کی قدم بوسی کرتے رہیں گے۔ پچھلے پانچ سالوں میں اسحاق ڈار آئی ایم ایف کے پاس جانے کے دلائل دیا کرتے جبکہ پی ٹی آئی والے مذاق اڑاتے رہتے تھے اب اسد عمر وہی تاویلیں پیش کرتے جبکہ اپوزیشن والے مذاق اڑاتے رہیں گے۔ پچھلے پانچ سال مسلم لیگ(ن) والے میڈیا کے رویے کا رونا روتے رہے تو اب پی ٹی آئی یہ ذمہ داری سنبھال لے گی۔ پچھلے پانچ سال مسلم لیگی یہ عذر پیش کرتے رہے کہ عدلیہ ان کی حکومت کو کام کرنے نہیں دے رہی اور اب یہ فریادیں پی ٹی آئی کی طرف سے سننے کو ملیں گی۔ پچھلے پانچ سال مسلم لیگی، طاقتور اداروں کے مقابلے میں اپنی بے بسی کا رونا روتے اور پی ٹی آئی والے مذاق اڑاتے رہے جبکہ اب پی ٹی آئی مسلم لیگ (ن) بن جائے گی۔ سب سے بڑی تبدیلی یہ آئی کہ اب عمران خان، نوازشریف بن جائیں گے، فواد چوہدری ،مریم اورنگزیب بن جائیں گے، اسد عمر، اسحاق ڈار بن جائیں گے۔ شیریںمزاری، خرم دستگیر بن جائیں گی۔ پرویز خٹک، احسن اقبال بن جائیں گے۔ علی محمد خان ،طلال چوہدری بن جائیں گے اور مراد سعید عابد شیر بن جائیں گے۔
تبدیلی آگئی مگر۔۔۔
تبدیلی نہیں آئی توعوام اور پاکستان کی حالت میں نہیں آئی۔ پاکستان کے مسائل جوں کے توں رہیں گے اور عوام کی بدحالی جوں کی توں رہے گی۔ پاکستان کو حسب سابق معاشی بحران کا سامنا رہے گا۔ پڑوسیوں کے ساتھ تعلقات حسب سابق کشیدہ رہیں گے۔ سول ملٹری تعلقات جیسے تھے، ویسے ہی رہیں گے۔ عدالتوں میں بدستور انصاف فروخت ہوتا رہے گا۔ دہشت گردی اور انتہاپسندی کا مسئلہ جوں کا توں رہے گا۔ پاکستان کا عالمی امیج جیسا تھا، ویسا رہے گا۔ وجہ صاف ظاہر ہے کہ ان حوالوں سے کوئی تبدیلی نہیں آئی۔ کل جس طرح پیپلز پارٹی اور مسلم لیگ سرمایہ داروں اور جاگیرداروں کے قبضے میں تھیں، اسی طرح آج تحریک انصاف، انہی سرمایہ داروں اور جاگیرداروں کے قبضے میں آگئی ہے۔ یہ جہانگیر ترین، یہ شاہ محمود قریشی اور یہ خسروبختیار وغیرہ کل دوسری پارٹیوں کے جھنڈے تلے حکمران تھے اور اب پی ٹی آئی کے جھنڈے تلے حکمران ہوں گے۔ جتنا اختیار وزیر اعظم شاہد خاقان عباسی کے پاس تھا، اتنا اختیار وزیراعظم عمران خان کے پاس بھی ہوگا۔ جتنی وزیرداخلہ احسن اقبال کی چلتی تھی، اتنی ہی عمران خان کی کابینہ کے وزیرداخلہ کی بھی چلے گی۔ خارجہ پالیسی میں جو اختیار میاں نوازشریف کے وزیر خارجہ کو حاصل تھا، اتنا ہی اختیار عمران خان کے وزیرخارجہ کو بھی حاصل ہوگابلکہ غالب امکان یہ ہے کہ وزیرخارجہ بھی وہی ہوگا جو میاں نوازشریف کی ٹیم کا حصہ تھا۔(بشکریہ 92نیوز)

(ایمرا نیوز)
جب بھی مذہبی سیاست کی باسی کڑھی میںاُبال آتا ہے تو چارسو اسلامی نظام کے نفاذ کی باتیں ہونے لگتی ہیں۔حکام ہوں یا عوام،ہر گزرتے دن کیساتھ یہ خیال سب کو چٹکیاں کاٹتا ہے کہ 1400سال پرانے اس دور کا احیاء ہو جہاں قانون کی نظر میں سب برابر ہوں۔ یہی وجہ ہے کہ تحریک انصاف کے چیئرمین عمران خان نے بھی انتخابی نتائج کے بعد اپنی ابتدائی تقریر میں ریاست مدینہ کی مثال دی۔ یہ محض اتفاق ہی ہے کہ عمران خان کی جانب سے پاکستان کو ریاست مدینہ بنانے کا عزم ظاہر کرنے کے چند روز بعد ہی تحریک انصاف کے پرچم میں لپٹے ایک کتے کو نہایت بیدردی سے قتل کرنے کی ویڈیو وائرل ہوئی اور خیبر پختونخوا پولیس نے 12گھنٹے میں اس بے زبان جانور کا خون ناحق کرنیوالوں کو گرفتار کرلیا ۔بعض دوستوں نے اس واقعہ کو حضرت عمر فاروق ؓکے اس قول سے تشبیہ دی کہ دریائے فرات کے کنارے کوئی کتا بھی بھوکا پیاسا مر گیا تو اس کا حساب کتاب ہو گا ۔سر تسلیم خم ،نئے پاکستان میں کتوں کو انصاف ملنا شروع ہو گیا مگر تکلف برطرف،انسانوں کو کب اور کیسے ،کن نرخناموں پر انصاف میسر آئیگا ؟ایک کتے کی ہلاکت پر تو قانون فوراً حرکت میں آگیا اور قاتل پکڑے گئے مگر اس ملک میں مارے جا رہے بے گناہ انسانوں کی بھی کوئی قدر و قیمت ہے یا نہیں ؟مردان یونیورسٹی میں نہایت بیدردی اور سفاکیت سے قتل کیئے گئے مشال خان کے قاتل باعزت بری ہو گئے ،نقیب اللہ محسود کے قاتل رائو انوار کی ضمانت ہو گئی ،عابد باکسر جیسے کرائے کے قاتل آزاد پھرتے ہیں ،کتنے ہی نوجوان یوں لاپتہ ہوئے گویا زمین کھا گئی یا آسمان نگل گیا اور کوئی ان کا پرسان حال نہیں،انسانوں کی مسخ شدہ لاشیں ملتی ہیں مگر قانون کے کانوں پر جوں تک نہیں رینگتی؟وطن عزیز میں لاقانونیت کا عالم دیکھ کر دل سے ہوک سی اٹھتی ہے کہ یہ تو جنگل سے بھی بدتر سما ں ہے کہ جنگل کا بھی کوئی قانون اور ضابطہ ہوتا ہے ،یہ تو اندھیر نگری ہے حضور ! اندھیر نگری۔
عمران خان کو ابھی وزارت عظمیٰ کی کرسی پر متمکن ہونا ہے ،میرا گلہ ان سے نہیں بلکہ قوم کا درد رکھنے والے وہ سب منصف اور رہبر اس مرثیہ خوانی اور نوحہ گری کے مخاطب ہیں جو گاہے گاہے لوگوں کو عدل فاروقی ؓکے خواب دکھاتے اور نظام مصطفیﷺ کے نام پر حکومت کرتے رہے ہیں۔ حقیقت تو یہ ہے کہ عدل و انصاف کے اعتبار سے ہمارے ملک کا شمار عصر حاضر کے بدترین ممالک میں ہوتا ہے۔آپ قصور کی معصوم بچی زینب انصاری کی مثال لے لیں۔یہ پاکستان کا ایسا ہائی پروفائل کیس ہے جس کی ماضی سے کوئی نظیر نہیں ملتی ۔ پوری ریاستی مشینری نے زیادتی کے بعد قتل ہونے والی زینب کو انصاف فراہم کرنے کیلئے ایڑی چوٹی کا زور لگایا یہ بچی رواں سال کے آغاز میں جنوری کے پہلے عشرے میں اغوا ہوئی ،میڈیا اور سول سوسائٹی کی فعالیت کے باعث قانون حرکت میں آیا اور اسی مہینے کے آخری عشرے میں 23جنوری کو زینب کا قاتل علی عمران نقشبندی پکڑا گیا ۔ڈی این اے سے تصدیق ہو گئی کہ اسی سفاک قاتل نے زینب اور دیگر بچیوں کو اپنی ہوس کا نشانہ بنایا ،ملزم نے اپنے جرائم کا اعتراف بھی کر لیا ۔سپریم کورٹ اور ہائیکورٹ کی مداخلت کے باعث یہ مقدمہ عام عدالت کے بجائے انسداد دہشتگردی کی عدالت میں چلایا گیا ،پولیس نے فوری طور پر چالان پیش کر دیا ،عدالت نے ایک ماہ سے بھی کم مدت میں اس مقدمے کا فیصلہ کرکے ریکارڈ قائم کر دیا ،مجرم کو جلد ٹھکانے لگانے کیلئے اسے وکلاء فراہم کرکے ہائیکورٹ میں اپیل دائر کر دی گئی تاکہ قانونی تقاضے جلد پورے ہوں ۔ہائیکورٹ نے اپیل خارج کر دی تو سابقہ رفتار سے مقدمے کو آگے بڑھاتے ہوئے سپریم کورٹ میں اپیل دائر کردی گئی 12جون کو جسٹس آصف سعید کھوسہ کی سربراہی میں اپیل کی سماعت کرنے والے بنچ نے سزا کو برقرار رکھا ۔اب اگلا مرحلہ تھا صدرمملکت کی جانب سے رحم کی اپیل مسترد کئے جانے کا ۔تادم تحریر ایوان صدر سے رحم کی اس اپیل کا فیصلہ نہیں کیا گیا۔ یوں پاکستان کی عدالتی تاریخ کے اس انتہائی ہائی پروفائل کیس میں بھی 8ماہ گزرنے کے باوجود مجرم کو تختہ دار پر نہیں لٹکایا جا سکا۔
اس ملک میں زینب جیسی بچیاں بلاناغہ کسی درندے کی ہوس کا نشانہ بنتی ہیں ،چونکہ ان سب کی قسمت زینب جیسی نہیںہوتی اس لئے ان کے مقدمے کو ہائی پروفائل کیس کا درجہ نہیں مل پاتا۔پہلے مرحلے پر ایف آئی آر درج نہیں ہوتی،یہ مرحلہ شوق طے ہوجائے تو ملزم نہیں پکڑے جاتے،رشوت دیکر یہ کام بھی کروالیا جائے تو ٹرائل کورٹ سے فیصلہ ہونے میں کئی سال لگ جاتے ہیں ۔کبھی وکیل صاحب چھٹی پر ہوتے ہیں ،کبھی جج صاحب نہیں آتے ،کبھی مقدمات کی طویل فہرست کے باعث باری نہیںآتی اور اگلی تاریخ دیدی جاتی ہے ،پیشیاں بھگت بھگت کر ورثاکی کمر دہری ہو جاتی ہے۔ خداخدا کرکے ملزم کو سزا ہو جائے تو ہائیکورٹ سے ضمانت ہو جاتی ہے ، ایک بار پھر پیشیوں کا لامتناہی سلسلہ شروع ہوتا ہے ،ملزم مہنگا وکیل کرکے چھوٹ جاتا ہے ،انصاف کے حصول کیلئے دھکے کھانے والے اپنا گھر بیچ کر سپریم کورٹ میں اپیل دائر کرتے ہیں تو سیاسی مقدمات کی بھرمار کے باعث ان کی شنوائی نہیں ہوتی ۔اگر کوئی مدعی دھن کا پکا ہو ،قسمت ساتھ دے تو بھی مجرم کو کیفر کردار تک پہنچانے میں 20,25سال لگ جاتے ہیں ۔گاہے سوچتا ہوں اس قدر چھلنیاں لگانے اور عدل و انصاف کے ایک سے زائد مواقع فراہم کرنے کے بعد بھی بے گناہ جیلوں میں سڑتے رہتے ہیں اور گناہ گار باعزت بری ہو جاتے ہیں تو ٹرائل کورٹ سے فیصلے کے بعد اپیل در اپیل کے نام پر انصاف میں تاخیر کا کیا جواز بنتا ہے؟کیوں نہ ٹرائل کورٹ کو اس قدر مضبوط ،آزاد،غیر جانبداراور باختیار بنا دیا جائے کہ غلطی کا احتمال باقی نہ رہے اور پھر اس فیصلے کے بعد اپیل کا محض ایک ہی فورم ہو خواہ وہ ہائیکورٹ کی صورت میں ہو یا سپریم کورٹ کی صورت میں۔
کبھی سوچتا ہوںعدل و انصاف کی کرسی پر بیٹھے منصفوں اور قانون سازا داروں میں براجمان عوامی نمائندوں کو اس ناانصافی کا اِدراک کیوں نہیں ہوتا اور وہ روز محشر کیا منہ دکھائینگے ؟سیاسی بحث و تمحیص ہوتی رہے گی،ڈیم بنتے رہیں گے ،روزگار کے معاملات بھی بتدریج حل ہو جائینگے ،کیا ایسا ممکن ہے عوام کی مسیحائی کا دم بھرنے والے سب بااثر لوگ خواہ ان کا تعلق کسی بھی شعبے سے ہے ،خواہ وہ کسی بھی سوچ یا نظریات کے حامل ہوں ،خواہ ان کا تعلق کسی بھی سیاسی جماعت سے ہو یا بظاہر وہ غیر سیاسی مگر نہایت طاقتور اور باختیار ہی کیوں نہ ہوں ،کیا وہ اس ایک نکتے پر اکھٹے نہیں ہو سکتے کہ فوری طور پر نظام عدل کی اصلاح کی جائے؟ریاست مدینہ ،خلافت راشدہ اور عدل فاروقی ؓ تو بہت اعلیٰ و ارفعٰ مثالیں ہیں ،ممکن ہو توعدل جہانگیری ہی کی کوئی صورت نکال لی جائے تاکہ جب کوئی سائل زنجیر عدل ہلائے تو فوری انصاف پائے ؟بصورت دیگر،اگر ظلم یونہی عمران علی اور رائو انوار جیسے بچے جنتا رہا اور عدل کی کوکھ بانجھ رہی تو اس اندھیر نگری میں بھیڑیئے ہی باقی رہ جائیں گے ۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
برادر محترم سہیل وڑائچ کے کالموں کا مجموعہ ’پارٹی از اوور‘ نظر نواز ہوا۔ کالم پڑھ رکھے تھے۔ دوبارہ سے پڑھے۔ اور اتفاق دیکھیے، کتابی صورت میں دانش کے یہ موتی عین ان دنوں میں پڑھے جب ملک بھر میں ایک نئی ضیافت کی چاندنی بچھائی جا رہی تھی، شمع دانوں میں روشنی کا اہتمام کیا جا رہا تھا، کالم فیض عام کی مدح کے ساز سُر کئے جا رہے تھے۔ بلوچستان کے صادق اور ڈیرہ اسماعیل خان کے امین مل کر باسٹھ تریسٹھ کی تال پر نرت کی مشق کر رہے تھے۔ لودھراں کے بہترین گرہ گیر اپنے ذرائع آمدن سے عین مطابقت رکھنے والے اثاثہ اڑن کھٹولوں میں دور دیس کے نایاب میوہ جات بھر کے چک لالہ کی روح پرور فضاؤں میں پرواز کرتے بنی گالہ کے بالمقابل ایستادہ سرائے سیرینا کے کمروں میں ذخیرہ کر رہے تھے۔ چرخ نیلی فام نے یہ انقلاب ان گنت مرتبہ دیکھ رکھا ہے۔ اک جیسا انجام تھا اپنا ہر طغیانی میں، نہ اپنی ہار نئی ہے نہ ان کی جیت نئی۔ آپ چونک کیوں رہے ہیں؟ فیض احمد فیض کے مصرع میں ہار اور جیت کی ترتیب بدل گئی؟ عزیزان محترم، آپریشن ردوبدل میں تھوڑی بہت اونچ نیچ تو روا ہوتی ہے۔ اسے اہل حسن کی ادا سمجھئے۔ اور ہماری استواری پر نظر کیجئے۔ تبدیلی تو آ گئی لیکن ’نہ ہوا کہ ہم بدلتے یہ لباس سوگواراں‘۔
برادرم سہیل وڑائچ کے اس مجموعے میں قطب کی لاٹھ تو بائیس جون 2017 کا وہی معرکہ آرا کالم ہے جسے مئی 2013ء میں منتخب ہونے والی حکومت کا نالہ جرس کہنا چاہئے۔ پاکستان کی صحافتی تاریخ میں کم تحریریں ہوں گی جنہیں اس طور پر تاریخ کی تشکیل میں حصہ دار قرار دیا جائے گا۔ کچھ مثالیں عرض کیے دیتا ہوں۔ ایک تو 6 مئی 1949 کا وہ اداریہ تھا جسے مغربی پاکستان کے 16اخبارات نے مشترکہ طور پہ شائع کیا، یہ اداریہ اس ملک میں سول ملٹری گزٹ نامی اخبار کا نہیں، آزاد صحافت کا کتبہ قرار پایا۔ اپریل 1953 میں حمید نظامی نے ایک اداریے میں خواجہ ناظم الدین سے استعفیٰ کا مطالبہ کیا تھا۔ نوابزادہ لیاقت علی کے قتل سے سیاست کی فصیل میں جو نقب لگائی گئی تھی، اس اداریے نے گویا وہ دیوار ہی گرا دی۔ آڈٹ اینڈ اکاؤنٹس برانچ کا بابو غلام محمد جیت گیا، پارلیمان کی تائید غیر موثر رہی۔
ایک اداریہ 18اپریل 1959 کو قدرت اللہ شہاب نے بھی لکھا تھا۔ عنوان تھا ’نیا ورق‘۔ ہمارے ساتھ یہ سانحہ بارہا گزرا کہ نیا ورق الٹتے ہیں تو ’گزشتہ سے پیوستہ‘کی اطلاع ملتی ہے۔ ہم اجل دیدہ نئے پاکستان کی کرچیاں جمع کرتے ہیں تو پرانے پاکستان کے کھنڈرات کا آسیب ہمارے ساتھ چلتا ہے۔ پاکستان دو لخت ہوا تو منو بھائی نے ایک کالم میں پاکستان کے بچوں کو مخاطب کیا تھا، ’آؤ بچو شکل دکھائیں تم کو یحیی خان کی‘۔ سپریم کورٹ میں بھٹو صاحب کی اپیل پر فیصلہ آنا تھا تو الطاف گوہر اور میر علی احمد تالپور نے دو مضامین بزبان انگریزی لکھے تھے جنہیں اہتمام سے اردو اخبارات میں شائع کرایا گیا۔ 1979ء سے 1983ء تک اخبارات پر پہرہ تھا۔ یہی ایک خبر حقیقی تھی چنانچہ اشاعت سے محروم تھی۔ محمد خاں جونیجو کی سادہ لوحی تھی کہ سادگی کے فوائد بیان کرتے کرتے اداروں کو سوزوکی گاڑیوں میں بٹھانے کا اعلان بھی کر دیا۔ اس پر لیفٹیننٹ جنرل (ریٹائرڈ) اعجاز عظیم کی ایک دندناتی ہوئی تحریر Stop General Bashing کے تحکمانہ عنوان سے شائع ہوئی۔ اگرچہ جنرل صاحب بعد ازاں اس تحریر کا سیاق سباق بیان کرنے سے صاف انکار کرتے تھے لیکن دراصل یہ اس روایت کی ابتدا تھی جسے اب نجی ٹیلی وژن کی اصطلاح میں دفاعی تجزیہ کاری کہا جاتا ہے۔ 1986ء میں ہفت روزہ ٹائم کا ایک شمارہ پاکستان کے بک اسٹالز تک نہیں پہنچا، چنانچہ ہمیں بالکل خبر نہیں کہ دنیا کے چھ امیر ترین افراد میں پاکستان سے بھی کوئی نام تھا یا نہیں، اتفاق سے ٹائم کے اس شمارے کی کچھ تفصیل نجم سیٹھی سے دریافت کی جا سکتی ہے جن کی اہلیہ حالیہ انتخاب میں رینالہ خورد سے آزاد حیثیت میں منتخب ہوئی ہیں۔ چھ اگست 1990 کی شام غلام اسحاق خان نے بے نظیر کی منتخب حکومت برطرف کی تو عزیز صدیقی مرحوم نے ایک اداریہ لکھا تھا، ’سسی فس کی آزمائش‘، عزیز صدیقی کو رخصت ہوئے بیس برس ہونے کو آئے، کئی انقلاب آئے، پشت پہ بھاری چٹان اٹھائے پہاڑ پر چڑھتے رہنے کی آزمائش ہنوز سسی فس کا مقدر ہے۔
نومبر 1996 میں عارف نظامی نے اخبار میں خبر دی کہ آج بے نظیر حکومت ختم ہو جائے گی۔ یہ خبر بذات خود صحافتی تاریخ میں محیر العقول استثنیٰ کی حیثیت رکھتی ہے لیکن ہمارے ملک میں عدالت نہیں، کچہری کا چلن ہے، یہاں پارلیمنٹ نہیں، نوٹنکی کی روایت ہے۔ اٹھاون ٹو (بی) ہو یا 184(3)… آشنا درد سے ہونا تھا کسی طور ہمیں۔ بارہ اکتوبر کے مطلع تاباں سے پرویز مشرف کا نور ظہور ہوا تو ہم نے ڈھول، تاشے، مجیرے، کھڑتال اور پکھاوج کی مدد سے اعلیٰ صحافتی اقدار کی سمفنی پیش کی۔ نام لینے سے کیا حاصل، بتی جلا کے دیکھ لیں، وہ سب یہیں پہ ہیں۔ کہا جاتا ہے کہ جن پیشوں میں سود و زیاں کا حجم بہت زیادہ ہو وہاں دریاؤں کی روانی جرائم کے ندی نالوں سے فروغ پاتی ہے۔ مثلا فلم، کھیل، سیاست، ہم نے اس میں صحافت کو بھی شامل کر دیا، ویو پوائنٹ والے مظہر علی خان کہتے تھے کہ پیسہ کمانے کے بہت سے ذرائع ہیں، صحافت کا ان میں شمار نہیں ہوتا۔ مظہر علی خان کی رائے سے خواہی نخواہی اختلاف کی صورت نکلتی ہے۔ ہم نے اس ملک میں صحافت کو عوام کے خلاف جرم کا درجہ دے دیا ہے۔ جرم کی اصطلاح چلی آئی تو اس کی کچھ تشریح بھی ہو جائے۔
سہیل وڑائچ کے 22جون 2017والے کالم کا آخری پیراگراف پھر سے پڑھ لیجیے، لکھا ہے، ’ایک جمہوریت پسند کی حیثیت سے اور ایک محب وطن پاکستانی کے طور پر میری خواہش ہے کہ ملک میں آئین اور قانون کی حکمرانی جاری رہے‘اور پھر خبردار کیا ہے کہ جو ارادے باندھے جا رہے ہیں ان میں پاکستان ایک نئے بحران کا شکار ہو جائیگا۔ درویش بے نشان نے بھی دس اپریل 2018 کو اسی اخبار میں کچھ عرض معروض کی تھی، عنوان تھا، پارٹی از ناٹ اوور۔ واللہ مجھے سہیل وڑائچ کے کالم میں دی گئی خبر کی تصدیق پر کوئی ملال نہیں، وہ بڑے صحافی ہیں، باخبر ہیں اور یہ ان کی ذمہ داری ہے کہ جو جانتے ہیں، اسے پڑھنے والوں تک پہنچائیں۔ میرا دکھ تو یہ ہے کہ تیس برس کی خامہ فرسائی میں میرا ایک بھی تجزیہ درست کیوں ثابت نہیں ہوتا۔ افتاد طبع کی اصلاح تو خیر اب کیا ہو گی، لیکن خود سے سوال تو کرنا چاہئے کہ میں تجزیہ کار کے طور پر ناکام کیوں ہوا؟ اپنا دفاع مقصود نہیں لیکن عرض ہے کہ تجزیہ تاریخی تناظر، زمینی حقائق، آئینی حدود و قیود، اخلاقی جواز، قابل تصدیق شواہد اور ملکی قانون کی مدد سے مستقبل کی نقشہ بندی کا کام ہے۔ انسانی معاشرے میں جرم کا امکان تو بہرصورت موجود رہتا ہے لیکن جوہری طور پر غیرقانونی فعل ہونے کے باعث جرم کو کسی تجزیے کے جائز جزو کے طور پر قبول نہیں کیا جا سکتا۔جرم وہ ناگہانی حادثہ ہے جو خواب کی چادر کو تار تار کر دیتا ہے۔ کشت امید میں بوئی فصلیں روند دیتا ہے۔ نقشے بدل دیتا ہے۔ معمولات کو درہم برہم کر دیتا ہے۔ آس کے سرمایہ کاروں کو دیوالیہ کر دیتا ہے۔ سازش، حادثات، آفات اور جرائم کی بنیاد پر قومیں تعمیر نہیں ہوتیں اور نہ ان اجزا سے مستقبل کی تصویر بنائی جا سکتی ہے۔ سہیل وڑائچ نے صحیح خبر دی۔ درویش بے نشاں نے بھی عذر خواہی کی اپنی سی کوشش کر دیکھی۔ وہ بھی شمع کے ہواخواہ ہیں، ہمیں بھی خوشبوئے خوش کناراں کی آس بندھی ہے، مشکل مگر یہ ہے کہ جرم کا تجزیہ ممکن نہیں۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
’’نیا پاکستان‘‘ اب عمران خاں کا خواب ہی نہیں یہ پاکستانی قوم کا خواب بن گیا ہے۔ یہ ظہور پذیر ملکی عوامی سیاسی حقیقت گائوں گوٹھ اور گلی محلے میں حالات حاضرہ کی گفتگو میں واضح طور پر پڑھی جا سکتی ہے۔بلاشبہ خاں اعظم کا خطاب تیزی سے قومی امنگ میں ڈھل گیا اور اب یقین عامہ کی شکل اختیار کر رہا ہے ۔ حتیٰ کہ پی پی کے کلاسیکل جیالے اور ن لیگ کے بڑے بڑے ناجائز بینی فشریز ، بدلتے عوامی رویے سے متاثر ہوتے نظر آرہے ہیں۔ علمائے اسٹیٹس کو میں سے کوئی پڑھ سکے تو پڑھ لے اپنی راہ ورائے درست کرنے کے لئے اور ان محسنوں کی بھلائی کے لئے، جن کی’’ ناقابل یقین مہربانیاں‘‘ عوام پر ڈھائے جانے والے مظالم اور کتنی ہی شکل میں استحصال مسلسل کو سمجھنے اور پڑھنے میں ان علماء کے لئے رکاوٹ بنی رہیں۔ وہ پڑھ سکیں یا نہیں، اب ان کے ساتھ کج بحثی بہت نچلی سطح پر ہی مطلوب ہے ، جس کے لئے حکمران جماعت کو بہت چھوٹاسا ابلاغی جتھہ درکار ہے ۔ یہ شپ فقط اس لئے دینا ضروری ہے کہ ضرورت سے زیادہ متحد اپوزیشن کے پاس اسٹیٹس کو کے دفاع اور عازمین نیا پاکستان پر حملہ آور ہونے کا سب سے بڑا حربہ یہ ہی ہو گا کہ قومی سوچ کا نیا بنتا عمل، پالیسی و فیصلہ سازی اور عملی اقدامات میں نہ ڈھل پائے۔ سو اسے روکا جائے جس کے لئے وہ بڑی مکاری سے ایک کے بعد دوسرا اور ایک سے بڑھ کر ایک غیر مطلوب موضوع بحث کو قومی مکالمہ کی شکل دینے اور اسے میڈیا کے ایجنڈے میں گھسانے کی کوشش کریں گے۔ یعنی آلودہ سیاسی ابلاغ سے اتنی آلودگی پیدا کی جائے کہ ملکی اور عوامی ہوتی قومی تازہ ذہنی بڑھتے بڑھتے دشمن کے مطلوب نہ آ جائے۔
سو، اسٹیٹس کو کی تازہ دم طاقت متحدہ اپوزیشن کو تحریک انصاف، جو حکمران جماعت بننا چاہتی ہے اوپر کی سطًح پر سمجھ کر پیچھے کی سطح پر بیٹھنے کا اہتمام کرے۔ اپنی بڑی توانائی عوام الناس کو ڈلیور کرنے پر خرچ کرے۔ وگرنہ متحدہ اپوزیشن کی اولین ترجیح اس کے سوا کچھ نہ ہو گی کہ قومی اور عالمی قبولیت حاصل کرنے والے انتخابی نتائج کو مشکوک و متنازعہ بنا کر اس چھتری تلے رہ کر اسٹیٹس کو کا دفاع کرے۔ اس طرح کہ ملک میں جاری و ساری عین آئینی و قانونی احتسابی عمل کے نکلتے نتائج (بلکہ عبرت اور المیوں کو پاکستانی سماجی سیاسی پسماندگی کے زور سے لیاری کے میدان میں پٹی کے باسی سیاسی سوچ کو سیاسی صدمے میں ڈھال کر عوامی بڑھتے شعور اور اس کے نتیجے ،عام شہری کے آئینی حقوق جیسے حصول تعلیم، صحت و صفائی وغیرہ کے حصول میں رکاوٹ ڈالی جائے کہ کہیں ’’نئے پاکستان‘‘ کا خواب شرمندہ تعبیرہونے ان کی سیاسی دکانداری نہ ٹھپ ہو جائے ۔
یہ تو حل ہے کہ پی ٹی آئی اور اس کی حکومت بدترین جمہوریتوں کے حیران کن بینی فشریز سابقہ حکمرانوں اور حال ’’متحدہ اپوزیشن ‘‘ کے ابتدائی حملے جس کی تیاری اندر خانہ سرگرمی سے جاری ہے سے کیسے بچے ؟
دوسرا اور اہم ترین سوال یہ ہے کہ ’’نئے پاکستان‘‘ کی منزل کی جانب عمران خان اور ان کی کابینہ کے حلف اٹھاتے ہی ابتدائی اقدامات کیا کرنے ہیں ؟
لمبی چوڑی وضاحتوں، یقین دہانیوں اور ترغیبات کی بجائے عمران حکومت جلد سے جلد ’’ملک میں قانون کا مکمل اور قانون کا (سب شہریوںپر ) یکساں اطلاق‘‘ کو عمران حکومت نئے پاکستان کا قومی بیانیہ بنالے اور اپنے پہلے دور حکومت میں اس کی تکمیل کو یقینی بنادے۔ اس کا باقاعدہ روڈ میپ تیار کیا جائے اور مراحل کو فیصد میں اس طرح بانٹ دیا جائے کہ آئین پاکستان کی کون کون سی آرٹیکل جامد ہے ۔ حکمرانی میں اس کی خلاف ورزی کیسے ہوتی رہی۔ ٹیکس کی وصولی عوام الناس سے یقینی اور ارب پتیوں اور بھاری بھر آمدن والوں سے محال جیسی آئین کی بے رحمانہ خلاف ورزیوں کو ترجیحات دیتے ہوئے ختم کرنے کی باقاعدہ Documentedمنصوبہ بندی کی جائے اور اسے عام کرکے کارروائی کا آغاز مرحلہ بہ مرحلہ کیا جائے۔
کڑا بااعتبار اور مسلسل احتساب اسلامی جمہوریہ پاکستان کے آئین کا لازمہ ہے عمران حکومت اس لحاظ سے انتہائی خوش قسمت ہے کہ ایسے احتساب کا عمل خود عمران کی جہاد جیسی کاوشوں کے نتیجے میں اسٹیٹس کو کے انتہا پر پہنچ جانے پر پہلے ہی شروع ہو چکا ہے ۔ آنے والی حکومت نے اسے اپنی تین متذکرہ صلاحیتوں (کڑے، بااعتبار اور مسلسل ) کے ساتھ فریکوئینسی اور کوالٹی کو بتدریج بڑھانا ہے۔ یہ جتنا غیر جانبدار اور کڑا ہوا ، عمران حکومت کی زیربحث امکانی طاقتور متحدہ اپوزیشن کو کمزور اور خود پی ٹی آئی میں حساس انتخابی عمل کے دوران پیدا ہونے والی آلودگی کو ختم کر دے گا ۔اس طرح کہ جو پارٹی میں قابل احتساب ہیں، وہ بذریعہ قانون انصاف پائیں گے اور جو قابل اصلاح ہیں ان کی اصلاح ہوجائے گی۔ یوں پارٹی شفاف ہو کر مستحکم ہوتی جائے گی۔ عمران خان نے بطور حکمران نئے پاکستان کے خواب کو یقینی بنانے کیلئے پارلیمان، نیب(جو کہ آئینی ادارہ ہے) اور بالائی سطح کے دوسرے تحقیقاتی اداروں کے استحکام اور ڈلیوری پر بےحد چوکس رہنا ہے اور ان کے جلد جلد پرفارمنس آڈٹ کا عملاً اور قابل پیمائش اہتمام اپنی گورننس کے خصوصی فیچر کے طور پر کرنا ہے۔پاکستان بھر کے عام لوگوں، خصوصاً غرباء کی بستیوں، دور دراز کے دیہات اور انتہائی مفلوک الحال طبقے کی سماجی ترقی کے آغاز کو اولین ترجیح دیتے ہوئے پہلے ایک سے دو ماہ میں، صوبا ئی حکومتوں کے اشتراک و اعتماد سے ’’نئے پاکستان‘‘ کے سفر کے پہلے قدم کے طور پرNational Social Development (نیس ڈیپ) کا اعلان، مکمل روڈ میپ کے ساتھ کردیا جائے ۔ اس پروگرام میں سکول ایج کے بےسکول بچوں کی رجسٹریشن اور انکے والدین سے پروگرام کے رابطے کا میکنزم، ان کی سکولنگ اور دوسری لرننگ کے قومی ادارے کے قیام کی ڈاکومینٹیشن کا کام مکمل کیا جائے۔پینے کے صاف پانی کی غرباء میں مفت اور فی الحال متوسط طبقے میں سستی ترین تقسیم کا ملک گیر منصوبہ تمام عملیات کے ساتھ تیار کر لیا جائے اور اسے یقینی بنانے کے لئے صوبائی حکومتوں کی کارکردگی کو اس منصوبے پر عملدرآمد کی پیمائش سے سرکاری طور پر جوڑدیا جائے تاکہ تمام صوبائی حکومتوں پر یہ عوامی دبائو آئندہ انتخابات تک برقرار رہے۔ ملک بھر میں امن عامہ کو مطلوب درجے پر لانے کے لئے پولیس اصلاحات کا اعلان پہلے تین ماہ میں ہوجانا چاہئے۔ پولیس اور عوام کو قریب لانے اور عوام میں اس کے روایتی زاویہ نگاہ کو بدلنے کے لئے انقلابی نوعیت کے اقدامات کرنے پڑیں گے جس میں سے ایک یہ ہو کہ ذمہ دار سول سوسائٹی کی طرف سے پولیس کے فرائض کی ادائیگی کی ’’مانیٹرنگ اینڈ رپورٹ بیک‘‘ کا کوئی میکنزم بنایا جائے۔
انرجی بحران کو کم کرتے کرتے ختم کرنے کے لئے پاکستان اور بیرونی ملک پاکستان ماہرین کی دو، تین روزہ کانفرنس کا فوری اہتمام ہو جس میں ماہرین شرکاء اپنی تجاویز لے کر آئیں اور باہم مشاورت سے انہیں زیر بحث لاتے ہوئے کانفرنس کی سفارشات تیار کریں جس کی روشنی میں نیشنل انرجی پالیسی تیار کی جائے۔ انشاء اللہ، نئے پاکستان کے خواب کو شرمندہ تعبیر کرنے کے لئے ’’آئین نو‘‘دامے درمے سخنے ذمہ داران اور قارئین کے لئے وقف رہے گا۔(بشکریہ جنگ لاہور)

(ایمرا نیوز)
شاید 1981میں مجھے پہلی دفعہ ایک سرکاری وفد کی حیثیت سے تاشقند جانے کا موقع ملا۔ اب تو ازبکستان آزاد ملک ہے لیکن اس دور میں یہUSSRیعنی روس کا حصہ تھا۔ روس پر کمیونزم مسلط تھا اور دنیا روس کے حلقہ اثر اور امریکہ کے حلقہ اثر میں تقسیم ہوچکی تھی۔ کمیونزم اور سرمایہ دارانہ جمہوریت میں سخت لگتی تھی اور دونوں میں نفرت عروج پر تھی۔ کمیونسٹ روس میں آزادی اظہار بلکہ آزادی افکار پر کڑی پابندیاں تھیں، اختلاف رائے کی اجازت نہیں تھی، ذاتی ملکیت کا تصور ہی موجود نہیں تھا اور زندگی کی بنیادی ضروریات مہیا کرنا ریاست کی ذمہ داری تھی۔ اسی لئے جمہوری ممالک کے مفکرین کہتے تھے کہ روس ایسا ملک ہے جس میں لوگوں کو پنجروں میں بند رکھا جاتا ہے اور خوراک مہیا کردی جاتی ہے۔ ملک پر فقط ایک پارٹی کی حکومت تھی اور ایک ہی اخبار چھپتا تھا جسے آپ سرکاری گزٹ کہہ سکتے ہیں۔ میں تاشقند میں ہفتہ بھر رہا ہر طرف روسی صدر کے قدآدم پورٹریٹ اور بڑی بڑی تصویریں نظر آتی تھیں اور لوگوں کے چہروں پر خوف وہراس دیکھا جاسکتا تھا۔ روسی حکومت بیرون ملک سے آنے والے وفود کے ساتھ ایک اپنا بندہ وابستہ کردیتی تھی تاکہ گفتگو میں سہولت رہے کیونکہ وہاں صرف روسی اور مقامی زبانیں بولی جاتی تھیں جبکہ باہر سے آنے والے عام طور پر انگریزی بولتے تھے۔ میرے ساتھ تاشقند یونیورسٹی کی ایک ایم اے انگریزی کی طالبہ کی ڈیوٹی لگی تاکہ اس کی انگریزی بول چال بہتر ہو اور مجھے سرکاری تقریبات میں گفتگو کی سہولت رہے۔ یہ ساری رام کہانی آپ کو محض ایک واقعہ سنانے کے لئے بیان کی ہے۔ ہوا یوں کہ ایک روز ہم ازبکستان کے سیکرٹریٹ کے باہر ٹہل رہے تھے تو میں نے شرارتاً اس لڑکی سے پوچھا’’تانیہ تم لٹریچر کی ا سٹوڈنٹ ہو، اخبار رسالے پڑھتی ہو، کبھی تمہیں خیال آیا کہ تمہاری حکومت یا حکمران غلط پالیسی پر کاربند ہیں‘‘۔ اس نے نہایت سنجیدگی سے جواب دیا’’نہیں سر ایسا کبھی نہیں ہوا‘‘۔ میں نے پوچھا کیوں؟ جواب ملا ہمارے حکمران غلطی کرہی نہیں سکتے اس لئے اختلاف کا سوال ہی پیدا نہیں ہوتا۔ میں مسکرا کر خاموش ہوگیا اور سوچنے لگا کہ نسل در نسل آزادی افکار، آزادی اظہار اور برین واشنگ کا یہی نتیجہ ہوتا ہے۔ روس کے اردگرد آئرن کرٹن یعنی آہن(لوہے) کی دیواریں کھڑی کردی گئی تھیں حتیٰ کہ باہر سے انفارمیشن بھی روس میں داخل نہیں ہوسکتی تھی۔ گویا کمیونسٹ روس دنیا کے سمندر میں ایک جزیرہ تھا جسے ہر طرف سے آہنی حصار کے اندر بند کردیا گیا تھا کیونکہ حکمران عوام کو وفادار رعایا بنانا چاہتے تھے۔ وفادار بنانے کے لئے آزادی فکر اور آزادی اظہار کو پابند کرنا ناگزیر تھا۔ آزاد میڈیا اور آزاد پریس ذہن میں آزادی افکار کے جراثیم پیدا کرتے ہیں اور تنقیدی فکر سے اندھی وفاداری پر ضرب لگتی ہے، چنانچہ ایسے حکمران جو اندھی وفاداری کی تمنا کرتے ہیں ان کی حکمت عملی کی خشت اول آزاد پریس کا گلا گھونٹنا ہوتی ہے۔(بشکریہ جنگ لاہور)

(میڈیا 92نیوز)
زندگی قدم قدم پر اس شعر کی تصدیق کرتی ہے۔دیکھ اسے دیدۂ تر یہ تو مرا چہرہ ہےسنگ کٹ جاتے ہیں پانی کی جہاں دھار گرےقطرہ قطرہ بھی مسلسل ٹپکتا رہے تو پتھر کی سل کو پیالے میں تبدیل کردیتا ہے۔ ’’قیمے والے نان‘‘ اور ’’بریانی کی پلیٹ‘‘والے ری مائنڈرز کام کر گئے۔کوئی کسر رہ گئی تھی تو عمران خان کی جاندار انتخابی مہم، مہمل بیانئے اور بے تحاشہ بدنامیوں نے پوری کردی اور معاملات جس سمت میں جارہے ہیں، محسوس ہوتا ہے کہ بقول مریم نواز پورا حکمران خاندان حوالہ ٔ اڈیالہ ہو گا اور بہت ممکن ہے اسے ’’جاتی امرا ٹو‘‘ کا خطاب بھی مل جائے۔بقول خاکسار بہت سےبرج، برجیاں اور چوبرجیاں الٹ گئیں لیکن ابھی تک ’’اک ستم اور میری جاں! ابھی جاں باقی ہے‘‘ والی بات ہے۔ عوام کو اگلے لیکشن تک ان بچے کھچوںکو مکمل طور پرقصہ ٔ پارینہ میں تبدیل کرنا ہوگا جو اب بھی دُم کٹی چھپکلی کی دُموں کی طرح پھڑپھڑا رہے ہیں۔ انہیں ابھی تک مکمل طور پر دھتکارے جانے پر یقین نہیں آرہاحالانکہ الیکٹ ایبلز کی داستانیں بھی حلقہ حلقہ بکھری پڑی ہیں لیکن عوامی شعور کی بلندی کا کھیل ابھی ختم نہیں شروع ہوا ہے جو انشاءاللہ آئندہ ایک دو الیکشنز تک پایہ ٔ تکمیل کو پہنچ جائے گا۔ جمہوریت صحیح معنوں میں بے بی سٹیپس لینے کے بعد بھاگنے اورقلانچیں بھرنے لگے

xADVERTISEMENT

Reserve Your Table in Royal Ambience
LalQila Lahore
Book Now
Ad
گی اور ’’شکاری‘‘ اپنے گھوڑے کھینچنے لگیں گے،کمانیں کندھوں پر واپس چلی جائیں گی اور تیر ترکشوں میں۔ یہاں یہ مختصر سی وضاحت ضروری ہے کہ تجربہ کار شکاری صرف بھاگتےہرنوںکا تعاقب اور شکار کرتے ہیں، ہرن چال میں پڑ جائے اور چوکڑیاں بھرنے لگے تو شکاری ٹھنڈی آہیں بھرتے ہوئے یہ سوچ کر شکار کے خیال سے دستبردار ہو جاتا ہے کہ اب وہ رینج سے نکل چکا۔ڈھنگ کے آدمی کو ڈھنگ کی ایک ٹرم مل گئی اور ڈھنگ کے چند کام کر گیا تو سمجھو سچی جمہوریت نے جنم لے لیا اور ہر خطرے سے بے نیاز ہو گئی لیکن ’’جمہوری جلاد‘‘ آخری وقت تک ہاتھ پائوں ماریں گے۔ یہ اور بات کہ ان کا آخری وقت بہت دور نہیںاور یہ قیاس آرائیاں کہ اپوزیشن کی مدد کے بغیر پی ٹی آئی کا تبدیلی ایجنڈا دور کا ڈھول ثابت ہوگا، کم از کم مجھے تو ہضم نہیں ہوتا کیونکہ مجھے جعلساز جمہوریت کے یہ دھتکارے ہوئے سارے کے سارے ڈھول بجتے ہوئے نہیں پھٹتے ہوئے دکھائی دے رہے ہیں۔ میںنے گزشتہ چند ماہ میں مختلف حوالوں سے لکھا؎آج کی رات نہ سونا یارو!آج ہم ساتواں در کھولیں گے7واں در کھلنے کی آواز مجھے تو واضح طور پر سنائی دے رہی ہے۔ آپ لاکھ کہیں میرے کان بج رہے ہیںلیکن میں پسینے میں شرابور شیر کا کیا کروں جسے ایک رات زمین نہیں گدے پر سونا پڑا تو ساتواں آسمان سرپراٹھا لیا، باتھ روم برداشت نہیں، بھنڈی اور آلو گوشت ہضم نہیںتو میںسوچتا ہوں اتنی سہولتیں بھی کتنے فیصد کومیسر ہیں؟ بھیڑ کی ہڈیاں چباتے ہوئے بھیڑیئے کے دانت میں بھیڑ کی ہڈی پھنس جائے یا بھیڑیئے کا دانت ہی ٹوٹ جائے تو میں مرتی ہوئی زخمی بھیڑ کو دیکھوں یا بھیڑیئے کو گود میںاٹھا کر ڈینٹسٹ کے پاس بھاگوں کہ ’’ڈاکٹرصاحب! بھیڑ کی ٹانگ بھنبھوڑتے ہوئے اس معصوم بھیڑیئے کے دانتوں میں بھیڑ کی ہڈی پھنس گئی یا شاید دانت ٹوٹ گیاہے، اسے ایمرجنسی میں لے جایئے‘‘اس ملک میں ہر کسی کی ضرورت کےلئے وافر تھااور وافر ہے لیکن ہم بے حس یہ سبق بھول گئے کہ جس معاشرہ میں مخصوص لوگوں کے پاس ضرورتوں سے بہت زیادہ مال کا ذخیرہ ہو جائے، وہاں لامحدود لوگ بنیادی ضرورتوں سے بھی محروم ہوجاتے ہیںاور یہی پاکستان کا بنیادی اقتصادی المیہ ہے۔بھیڑوںاوربھیڑیوں سے یاد آیا کہ قربانیوںکا موسم سر پر ہے، قربانیوں کے لئے پسندیدہ جانور مہنگے بھی بہت ہیں لیکن….. ’’اللہ کو پیاری ہے قربانی‘‘ اور خاص طور پر ان جانوروں کی قربانی تو بہت ہی احسن اور پسندیدہ ہے جنہیں دیر تک ہم نے خود اپنا پیٹ کاٹ کاٹ کر پالا پوسا ہو، ان کے ناز نخرے اٹھائے ہوں، ان کی آسائش و آرائش کا خیال رکھا ہو، انہیںقدم قدم پر پروٹوکول دیا ہو، خود عدم تحفظ کا شکار رہتے ہوئے بھی ان کی سکیورٹی کو ترجیح دی ہو۔جسے جاگنا ہو وہ جاگ لےجسے بھاگنا ہو وہ بھاگ لےوہ جو خار تھے میں نے چن لئےتو سفید و سرخ گلاب لےیہاں طے ہے سب کا معاوضہ تو شراب لے وہ عذاب لے(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
انتخابات کے نتائج کے بعد تحریک انصاف کے چیئرمین عمران خان نے گزشتہ دنوں تاریخی تقریر کی جس نے مجھ سمیت ملک و بیرون ملک تمام پاکستانیوں کو متاثر کیا اور اس پر سوشل میڈیا میں بے شمار تعریفی پیغامات شیئر کئے گئے۔ ملک کی تعمیر نو اور ترقی کیلئے ہمیں تنقید کے ساتھ ساتھ اچھے اقدامات کو سراہنا بھی چاہئے اور یہی سوچ کر میں نے آج کا کالم لکھنے کا فیصلہ کیاہے۔ یہ بات خوش آئند ہے کہ جمہوری عمل برقرار رکھتے ہوئے 25 جولائی کو ملک میں عام انتخابات ہوئے جس میں اوسطاً 55 فیصد سے زیادہ لوگوں نے حصہ لیا۔ چند افسوسناک واقعات کے علاوہ بالعموم انتخابات پرامن رہے اور تمام سیاسی جماعتوں کو بھرپور انتخابی مہم چلانے کا موقع ملا۔ یورپی یونین آبزرور مشن نے پاکستان میں انتخابات پر اطمینان کا اظہار کیا۔ پولنگ اسٹیشن کے اندر اور باہر سیکورٹی اہلکاروں کی موجودگی کی وجہ سے پولنگ کے دوران نظم و ضبط قائم رہا لیکن پولنگ کے بعد الیکشن نتائج کے دوران کچھ بے ضابطگیاں بھی دیکھنے میں آئیں۔ الیکشن کمیشن نے رزلٹ ٹرانسمیشن سسٹم (RTS)کو بغیر آزمائش استعمال کیا اور سسٹم کے بیٹھ جانے سے نتائج کے اعلان کرنے میں تاخیر ہوئی جبکہ فارم 45 پر انتخابی نتائج کی عدم فراہمی پر پیپلزپارٹی، مسلم لیگ (ن)، متحدہ مجلس عمل، ایم کیو ایم پاکستان اور پاک سرزمین پارٹی سمیت کچھ سیاسی جماعتوں نے الیکشن کی شفافیت پر تحفظات ظاہر کرتے ہوئے ووٹوں کی دوبارہ گنتی کا مطالبہ کیا لیکن خوشی کی بات یہ ہے کہ تمام بڑی سیاسی جماعتوں نے جمہوریت کے تسلسل کیلئے پارلیمنٹ میں بیٹھنے پر اتفاق کیا تاکہ وہ مضبوط اپوزیشن کا کردار ادا کرسکیں جبکہ اکثریتی جماعت پی ٹی آئی حکومت بنانے کیلئے سرگرداں ہے۔
عام انتخابات میں کامیابی حاصل کرنے کے بعد الیکشن کے اگلے روز عمران خان نے نہایت سادگی سے اپنی تقریر میں کہا کہ ان کی 22 سالہ جدوجہد کامیاب ہوئی اور اللہ تعالیٰ نے انہیں نیا پاکستان بنانے کا خواب پورا کرنے کا موقع دیا، ان کی حکومت میں احتساب ان سے شروع ہوگا اور اس کے بعد وزراکا احتساب کیا جائے گا، وہ کسی کو سیاسی انتقام کا نشانہ نہیں بنائیں گے، کسی کو اگر دھاندلی کی شکایت ہے تو وہ اس سے تعاون کریں گے جس کیلئے وہ پورے پاکستان میں حلقے کھلوانے کیلئے تیار ہیں۔ ان کا کہنا تھا کہ وہ پاکستان کو فلاحی ریاست بنانا چاہتے ہیں، وزیراعظم ہائوس کو تعلیمی مقاصد اور تمام گورنر ہائوسز کو عوامی مقاصد کیلئے استعمال کیا جائے گا اور ملک کو سادگی، کفایت شعاری، کرپشن فری اور عوام کی ترقی کیلئے بہترین گورننس سے چلائیں گے۔ انہوں نے بیرون ملک مقیم پاکستانیوں اور سرمایہ کاروں کو ملک میں واپس لانے کے عزم کا اعادہ کیا۔ عمران خان کا کہنا تھا کہ چین اور ایران سے تعلقات مزید بہتر کرینگے، افغانستان سے ایسے تعلقات ہوں کہ ہماری سرحدیں کھلی ہوں، امریکہ سے متوازن تعلقات چاہتے ہیں‘ مشرق وسطیٰ میں جنگیں ختم کرنے میں ثالث کا کردار ادا کرنیکی کوشش کرینگے، پاک بھارت تجارت میں اضافے کے خواہاں ہیں، مسئلہ کشمیر مذاکرات سے حل ہوناچاہئے ،اگر بھارت کی لیڈر شپ تیار ہے تو ہم بھی بات چیت کیلئے تیار ہیں، بھارت ایک قدم آگے بڑھائے، ہم دو قدم بڑھیں گے۔
عمران خان اور ان کی حکومت اگر واقعتا اپنے کہے پر عمل کرتی ہے تو یقینا ًہم سب ایک نئے پاکستان کیلئے پرامید ہیں۔ معاشی فرنٹ پر قوم اور بزنس کمیونٹی کو عمران خان کی حکومت سے بہت زیادہ امیدیں وابستہ ہیں۔ 18 ارب ڈالر کا ریکارڈ کرنٹ اکائونٹ خسارہ ، 31ارب ڈالر کا تجارتی خسارہ، اسٹیٹ بینک کے زرمبادلہ کے ذخائر جو صرف 10 ارب ڈالر تک رہ گئے ہیں، روپے کی قدر میں ریکارڈ کمی اور بیرونی قرضوں کی ادائیگیاں عمران خان کی نئی حکومت کو درپیش وہ چیلنجز ہیں جن سے انہیں ترجیحی بنیادوں پر نمٹنا ہوگا۔ عمران حکومت کے متوقع وزیر خزانہ اسد عمر پہلے ہی اشارہ دے چکے ہیں کہ ان کی حکومت کو قرضوں کے حصول کیلئے آئی ایم ایف کے پاس سخت شرائط پر جانا ہوگا جو حکومت کیلئے غیر مقبول فیصلہ ہوسکتا ہے کیونکہ آئی ایم ایف مالی خسارہ کم کرنے کیلئے حکومتی سبسڈی کا خاتمہ، خسارے میں چلنے والے سرکاری اداروں کی اصلاحات اور نجکاری، ایکسپورٹس بڑھانے کیلئے روپے کی قدر میں مزید کمی، بجلی میں دی جانے والی حکومتی سبسڈی کا خاتمہ اور ترقیاتی کاموں کے بجٹ میں کٹوتی وہ شرائط ہوسکتے ہیں جن سے عمران خان کے سستے مکانات، اسکول اور اسپتال بنانے کے عوام پسند وعدے خطرے میں پڑسکتے ہیں۔ اس کے علاوہ حکومت کی سی پیک منصوبوں کیلئے دی جانے والی مراعات پر بھی آئی ایم ایف اعتراضات کرسکتا ہے جو حکومت کیلئے ایک سخت آزمائش ہوگی۔ امریکہ نے پہلے ہی اعلان کیا ہے کہ وہ پاکستان کے آئی ایم ایف سے لئے جانے والے نئے قرضے سے چینی قرضوں کی ادائیگیاں نہیں ہونے دے گا۔اس کے علاوہ خارجہ امور پر ہمسایہ ممالک سے اچھے تعلقات قائم کرنا بھی آنے والی حکومت کیلئے ایک بہت بڑا چیلنج ہوگا جبکہ گزشتہ حکومت نے 4 سال تک وزیر خارجہ کا تقرر نہ کرکے اہم خارجہ امور کو نظر انداز کیا تھا۔
2008ء سے لیکر 2018ء کے حالیہ الیکشن تک عمران خان نے نوجوانوں اور خواتین میں مقبولیت حاصل کی جس سے پارٹی کے ووٹ بینک میں اضافہ ہواہے۔ عمران خان کا ’’تبدیلی‘‘ کا نعرہ ایک ایسی امید کو ظاہر کرتا ہے جو کسی دوسری بڑی جماعت میں نظر نہیں آتی۔ اس کے علاوہ پی ٹی آئی وہ بڑی جماعت ہے جسے اس سے قبل آزمایا نہیں گیا لہٰذا عوام اس بار پی ٹی آئی کو بھی ایک موقع دینا چاہتےتھے۔ میاں نواز شریف کی تاعمر نااہلی کی سزا اور لمبی قید کے بعد پنجاب میں پی ٹی آئی کیلئے میدان تقریباً خالی تھا۔ شہباز شریف عمران خان کی تبدیلی کے آگے اپنی ترقی کا پرچار کرتے رہے۔عمران خان نے 2008ء میں اس وقت سیاسی جگہ بنائی جب سابق وزیراعظم بے نظیر بھٹو کی شہادت سے ایک سیاسی خلا پیدا ہوگیا جس سے عمران خان اور ان کی جماعت نے فائدہ اٹھایا۔ پنجاب میں بھی پی ٹی آئی نے پیپلزپارٹی کو بڑا نقصان پہنچایا۔ پی پی اور ن لیگ کی فرینڈلی اپوزیشن نے بھی عمران خان کو واحد اپوزیشن لیڈر بن کر ابھرنے کا موقع دیا۔ سندھ میں بلاول بھٹو نے پیپلزپارٹی کو ایک اور زندگی عطا کی اور نہایت کامیاب انتخابی مہم چلائی لیکن بلاول کو پنجاب پہنچتے پہنچتے بہت دیر ہوچکی تھی اور پنجاب میں تبدیلی کا رنگ چوکھا ہوگیا تھا۔ اسی طرح 2013ء کے انتخابات کے بعد ایم کیو ایم میں مسلسل دھڑے بندی نے عمران خان کو کراچی میں پائوں جمانے میں مدد دی لیکن 2013ء میں ایم کیو ایم کی عسکری طاقت اور خوف نے پی ٹی آئی کو مطلوبہ ووٹ حاصل نہیں کرنے دیاتھا۔ کراچی کے عوام جماعت اسلامی کی طرف لوٹ کر نہیں گئے بلکہ انہوں نے 2013ء اور 2018ء کے انتخابات میں پی ٹی آئی کو ایم کیو ایم کے متبادل کے طور پر چنا۔ عمران خان کی جماعت نے مذہبی جماعتوں کے ووٹ بینک کو بھی کافی نقصان پہنچایاہے۔ میرے نزدیک پی ٹی آئی کے کراچی میں جیتنے کی اہم وجہ ایم کیو ایم کی چار دھڑوں میں تقسیم، قیادت کا بحران، ایم کیو ایم کی عسکری طاقت اور خوف کا خاتمہ تھا جس کے باعث پی ٹی آئی نے کراچی میں 2013ء کی نسبت 2018ء میں د گنے ووٹ حاصل کئے جبکہ خیبر پختونخوا میں پرویز خٹک حکومت اپنے 5 سالہ دور میں صحت ، تعلیم اور پولیس کے نظام میں بہتری لائی جسے پی ٹی آئی نے 2018ء کے الیکشن میں اپنی بہتر کارکردگی کے طور پر پیش کیا اور کامیابی حاصل کی۔ اس طرح حالیہ انتخابات میں عمران خان تمام سیاسی جماعتوں کے مضبوط ووٹ بنک پر تبدیلی کانعرہ لگاکر نچلے طبقے سے اپر کلاس تک اپنا مضبوط ووٹ بنک بنانے میں کامیاب رہے۔
عمران خان نے 2013ء کے الیکشن میں دھاندلی کے خلاف جو دھرنے اور احتجاج کی روایت قائم کی تھی، کے پیش نظر 2018ء کے انتخابات کے نتائج پر بھی اگلے انتخابات تک دھاندلی کے الزامات اور احتجاجات کئے جاتے رہیں گے جس کیلئے انہیں اور ان کی حکومت کو تیار رہنا چاہئے۔ عمران خان کے رول ماڈل ملائیشیا کے ڈاکٹر مہاتیر محمد ہیں لیکن یہ کہا جارہا ہے کہ عمران خان پاکستان کے طیب اردوان بننے جارہے ہیں۔ پاکستان معاشی بحران کا شکار ہے۔ عوام اور بزنس کمیونٹی عمران خان کی نئی حکومت سے ضرورت سے زیادہ توقعات لگارہے ہیں۔ متوقع وزیر خزانہ اسد عمر نے اپنی حکومت کے پہلے 100 دن کا معاشی ایجنڈا پیش کیا ہے جس میں ایس ایم ایز اور مینوفیکچرنگ سیکٹر کی بحالی، سستی بجلی و گیس کی فراہمی اور سی پیک ترجیحات ہیں۔وہ جلد ہی آئی بی اے کراچی میں حکومتی ترجیحات اور پالیسی ریفارمز کیلئے اسٹیک ہولڈرز کے ساتھ ایک میٹنگ کررہے ہیں جس میں مجھے بھی مدعو کیا گیا ہے۔ میری دعا ہے کہ آنیوالی حکومت جلد از جلد معاشی بحران پر قابو پاکر ترقی کے راستے پر گامزن ہوسکے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)

کافی عرصےسے ہم مختلف غیرملکی دشمن طاقتوں کی جانب سے نہ ختم ہونے والی مداخلت دیکھ رہے ہیں اس کا مقصدہمیشہ پاکستان کا منفی تاثر برقرار رکھنا ہے اور یہ سب ان کے علاقائی سیاسی مقاصدکیلئےہے۔ ہماری لیڈرشپ اس خفیہ ایجنڈے کو دیکھ سکتی تھی اور اس کا شکار ہونے سے بچ سکتی اور قوم کو مشکلات سے بچا سکتی تھی۔ ہم ان مشکلات میں اس لیے پھنسے ہیں کیونکہ ہر آنےوالی حکومت قوم کیلئے طویل المدتی پالیسیاں بنانے میں ناکام رہیں۔ ہم واشنگٹن کی جانب ایسے دیکھتےرہے جیسے یہ ہمارا آقاہے ۔ لہذا واشنگٹن اب ہمیں کمتر ملک سمجھتا ہے۔ امریکا نے ہمارے خلاف مہم چلائی جو ایف اے ٹی ایف میں ہمارے خلاف امریکا کے رویّے سے واضح ہوئی۔ میں 14سال کا تھاجب بھارت نے 1965ء میں پاکستان پر حملہ کیا اور ہم اس حملے سے براہ راست متاثر ہوئے کیونکہ ہمارا گائوں سرحد کے بالکل قریب تھا۔ میرے خاندان کو دیگر کئی خاندانوں کے ساتھ فوج کی ہدایات کے مطابق گھربارچھوڑنا پڑا ۔ اس کی وجہ بھارتی ائیرفورس اور بری فوج کی جانب سے بھاری شیلنگ تھی۔ میں ایک بچہ ہونےکےباعث حملے کو سمجھنے سے قاصر تھااور گائوں کے بڑے بھی مجھے سمجھانے سے قاصر تھےلیکن یہ سوال خاموش ہوگیا جو بعد میں مجھے سمجھ آیا۔ ہم جنگ ستمبر جیت گئے لیکن بحیثیت قوم استحکام حاصل کر سکے نا ہی ملک میں اتحاد اور رواداری کو پروان چڑھا سکے۔ 71 ء میں ہم نے پاکستان کی خودمختاری پر ایک اور حملہ دیکھا جس میں آدھا ملک رہ گیا ۔ مشرقی پاکستان کی علیحدگی نے ہمیں مزید کمزور کردیا۔میں اس وقت گریجویشن میں تھا اور سمجھ سکتا تھا کہ بھارت ہمیں ختم کرنا چاہتا ہے ، ہم اس صدمے کو سہہ گئے لیکن اس کی وجہ سے قوم پر دبائو بڑھ گیا اور قیادت میں اعتماد کم ہوگیا ۔ سب سے بڑا جھٹکا ملک کی بدترین معاشی صورتحال تھی ، ہم پائیدار اور مستحکم معیشت کھڑی کرنے کےبجائے قرضوں کی دلدل میں دھنستے چلے گئے۔ انہی قرضوں کے نتیجے میںآج ہم 200ارب ڈالرکے مقروض ہیں اور اس کی وجہ سے ہی ہمارے معاشی اور انتظامی مسائل پیدا ہو رہے ہیں۔ بڑھتی مہنگائی،کم ہوتی شرح نمو اور مزید مقامی اور بیرونی قرضوں کی وجہ سے روپے کی قدر مستحکم نہیں ہو رہی ۔ اسی کی وجہ سے مہنگائی بڑھ رہی ہے اور عام آدمی متاثر ہو رہا ہے۔حکومتوں اور معاشی مشیروں کی کارکردگی ہمیشہ قابل رحم رہی۔انہوں نے ہمیشہ پہلے سے موجود قرضوں کی دائیگی کا حل مزید قرضے حاصل کرنے سے نکالا لیکن یہ نہ سوچا کہ قرضوں کی دلدل سے ہمیشہ کیلئے نکلا جائے۔عالمی مالیاتی ادارے بشمول آئی ایم ایف عالمی ایجنڈے پر کام کرتے ہیں اور ان کے خفیہ ایجنڈوں میں سے ایک یہ بھی ہے کہ مقروض ممالک کے مالیاتی معاملات کا بالواسطہ کنٹرو ل حاصل کر لیا جائے اور وہاں اپنی مرضی سے ٹیکس نافذ کیے جائیں۔ ہمارے قومی اثاثے پہلے ہی ان اداروں کے پاس گروی ہیں۔قرضوں کے عوض ہمارے اہم قومی ادارے جناح ائرپورٹ کراچی، فیصل آباد پنڈی بھٹیاںموٹر وے، اسلام آباد پشاور موٹروے ، اسلام آباد لاہور موٹر وے، پاکستان ٹیلی ویژن کارپوریشن اور ریڈیو پاکستان عالمی بینک اور آئی ایم ایف کے پاس گروی رکھے ہوئے ہیں۔ جن کامقصد ملک کو عدم استحکام سے دو چار کرنا ہے اور اب مغرب کی نظریں ہمارے ایٹمی اثاثوں پر ہیں۔ القاعدہ، طالبان اور داعش کا وجود اسی بڑے منصوبے کا حصہ تھا اور بھارت کو اس منصوبے کا حصہ بنایا گیا۔ افغان خفیہ ایجنسی این ڈی ایس بھی بھارتی ایجنسی’’را‘‘ کے ساتھ ہاتھ ملا چکی ہے۔ حالیہ سراٹھاتی ہوئی دہشتگردی کی لہر بھی اسی عالمی ایجنڈے سے جڑی ہوئی ہے۔ نائن الیون کا سب سے زیادہ نقصان پاکستان کو اٹھانا پڑا اور یہ نقصان ابھی تک ہم اٹھا رہے ہیں گو کہ کوئی بھی پاکستانی اس حملے میں ملوث نہیں تھا۔ تحقیقات میں پتا چلا تھا کہ 15لڑکے مشرق وسطیٰ سے تعلق رکھتے تھے جو اس حملے میں ملوث تھے، پھر بھی امریکا کے ان ممالک کے ساتھ پاکستان کی نسبت بہتر تعلقات ہیں۔ یہ معاندانہ اور انتقامی ذہنیت ہے جو پاکستان کو نشانہ بنانے پر تلی ہے۔ ایک دوسرا واقعہ دیکھیے، 22دسمبر2001ء کو ایک القاعدہ دہشتگرد رچرڈ ریڈ یو کے سے امریکا گیا ، اس نے اپنے جوتوں میں دھماکا خیز مواد چھپا رکھا تھا،جب وہ جہاز میں دھماکا نہ کر سکا تومسافروں نے اسے پکڑلیا اور بعد ازاں اسے تین دفعہ عمر قید اور 110سال کی سزا ہوئی، و ہ شخص بھارتی ایجنسی ’’را‘‘ اورسی آئی اے کے ساتھ مضبوط تعلقات رکھتا تھا۔ امریکا اس کےپاکستان کے ساتھ کسی قسم کے تعلق کو ثابت نہ کرسکا۔65ء میں جب بھارت کی دوسری تمام ایجنسیاں ناکام ہوگئیں تو ’’را‘‘ کی تخلیق کے پیچھے انڈیا کا صرف اور صرف یہی ایجنڈا رہا کہ کسی طرح پاکستان کو عدم استحکام سے دوچارکیا جائے۔ یہ تنظیم 250افراد اور4لاکھ ڈالر کے سرمائے سے شروع ہوئی اوراب اس میں ہزاروں اہلکار کام کرتے ہیں اور بجٹ خفیہ رکھا جاتا ہے۔ یہ بات اب پوشیدہ نہیں رہی کہ’’را‘‘ کی تخلیق میں سی آئی اے نے مدد دی اور یہ اب بھی پاکستان میں دہشت گردی کرنے میں اس کی مدد کرتی ہے۔’’را‘‘ نے بلوچستان میں انتشار پیدا کرنے کیلئے بجٹ مختص کر رکھا ہے۔تاکہ پاکستان کو عالمی سطح پر بدنام کیا جائے۔’’را‘‘ نے بنگلہ دیش کی تخلیق میں مرکزی کردارادا کیا۔ اس نے علیحدگی پسند بنگالیوں کو ٹریننگ اور اسلحہ دیا اور مکتی باہنی بنا کر پاکستانی فوج کے خلاف لڑایا۔ یہ تنظیم پروکیسز اوردہشت گرد گروپوں کے ذریعے پاکستان میں خفیہ آپریشن کرتی ہے۔ اب یہ امریکا کو استعمال کرتے ہوئے ایف اے ٹی ایف کے ذریعے پاکستانی معیشت کو مزید نقصان پہنچانا چاہتی ہے۔’’را‘‘ نے سی آئی اے کے ساتھ مل کر پاکستان کا نام بلیک لسٹ میں ڈالنے کیلئے لابی کی، 31جنوری کو بھارت کا سیکرٹری سطح کا ایک وفد ماسکو پہنچا جس نے روس کو ایف اے ٹی ایف میں پاکستان کی حمایت کرنے سے روکا۔بھارتی وزیراعظم نریندر مودی نے بذات خود کئی خلیجی ممالک کو ایف اے ٹی ایف میں پاکستان کی حمایت نہ کرنے کا کہا۔ ایف اے ٹی ایف کے قوانین کے مطابق کسی مسئلے پر کم از کم 3ووٹ خلاف پڑیں تو اسے زیربحث نہیں لایا جا سکتا جبکہ پاکستان کے معاملے میں امریکا نے سعودی عرب اور ترکی پر کافی محنت کی اور بھارت نے چین کے ساتھ بات چیت کی۔ بالآخر بھارت نے چین کے ساتھ یہ ڈیل کرلی کہ مستقبل میں ایف اے ٹی ایف کی رکنیت کے لئے اس کی مدد کی جائے گی۔ اس طرح ان تینوں ممالک کے اعتراضات ختم ہوگئے اور پاکستان کے خلاف پرپوزل کامیاب ہوگیا۔ سادہ الفاظ میں یہ ہماری ناکامی تھی ۔دوست ممالک بھی مدد نہ کرسکے۔ اسی طرح کل بھوشن کے معاملے میں ہم ناکام ہوئے اور نریندر مودی کو جنگی مجرم کے طور پر عالمی عدالت انصاف میں کھڑا نہ کرسکے۔ بدقسمتی سے ہم نے دفاعی پالیسی اختیار کی۔بھارتی رہنمائوں نے بھی منافقت کا کھیل کھیلا اور ’’را‘‘ کے ایجنڈے کو آگے بڑھایا۔ بھارت کی پالیسی مغرب کے وار آن ٹیرر نامی پروپیگنڈے کے ساتھ ملی اور نتیجے کے طور پر پاکستان میں عدم استحکام اور دہشتگردی سے سرمایہ کار ملک سے بھاگ گئے جس سے ہماری معیشت کو ناقابل تلافی نقصان پہنچایا۔ ہمیں سیاسی ، معاشی اور عالمی سطح پر مشکلات صرف اور صرف ایک قومی نقطہ نظر پر نہ ہونے کی وجہ سے درپیش ہیں۔ ہمیں عالمی مالیاتی اداروں کے قرضوں کے علاوہ مشرقی اور مغربی سرحدوں پر دہشت گردی کا بھی سامنا ہے۔ دہشت گردی کی جنگ میں ہم 120ارب ڈالر کا نقصان اٹھا چکے ہیں اور گزشتہ 15سالوں میں 74ہزار افراد لقمہ اجل بن چکے ہیں۔ دہشت گردی کی جنگ میں بالواسطہ اور بلاواسطہ طور پر پاکستان 126 ارب ڈالر کا نقصان اٹھا چکا ہے۔ لاکھوں افغان مہاجرین کی وجہ سے جہاں ملکی معیشت پر بوجھ پڑا وہاں سکیورٹی کے مسائل بھی پیدا ہوئے۔اپنے قیام سے لیکر پاکستان مسلسل مشکلات کا شکار رہا ہے اوربھارت نے ہمیں آج تک تسلیم ہی نہیں کیااور ہمیشہ نقصان پہنچانے کا کوئی موقع ضائع نہیں کیا۔ بحیثیت قوم ہم نے قرضے لئے ، دنیا سے علیحدہ رہے ، سوویت یونین کے خلاف اور دہشت گردی کے خلاف جنگ کا حصہ بنے اور امریکی سی آئی اے کے تیار کردہ دہشت گردو ں کی وجہ سے شدید نقصان اٹھا چکے ہیں۔کیا یہ ختم ہونیوالی مشکلات کبھی ختم ہوجائیں گی؟یا ہر نئی حکومت کے پاس سوائے کشکول لیکر بیرونی قرضے مانگنے کے سوا کوئی آپشن نہیں ہوگا۔26جون 2018ء کو میں نے اپنے آرٹیکل میں لکھا تھا کہ یہ الیکشن آزاد امیدواروں کا ہو گا اور وہی وزیر اعظم کے انتخاب میں کلیدی کردار ادا کریں گےاور اب وہی صورتحال درپیش ہے کہ واضح مینڈیٹ نہ ہونے کی وجہ سے پی ٹی آئی کو آزاد امیدواروں کی مدد درکار ہے۔اس حکومت کو بھی معمول کی مشکلات کے ساتھ آغاز کرنا پڑ رہا ہے اور یہ بھی مسائل کا شکار رہے گی کیونکہ مالیاتی معاملات سے متعلق پالیسیاں آئی ایم ایف اور ورلڈ بینک کے ہاتھوں میں رہیں گی ۔ دیکھئے نئی حکومت کیا تبدیلی لاتی ہے۔(بشکریہ جنگ لاہور)

(ایمرا نیوز)

الیکشن خیریت سے انجام پاگئے مگر حسب روایت ہارنے والوں نے فوراً ہی دھاندلی کا الزام لگا دیا اور یہ تک کہا کہ آج تک اتنی بے ایمانی، دھاندلی کسی الیکشن میں نہیں ہوئی۔بہرحال انتخابات تو ہوگئے اور نتائج سے اندازہ ہوتا ہے کہ عمران خان کی جماعت تحریک انصاف برسر اقتدار آئے گی۔ اقتدار میں آنے سے قبل عمران خان کی خدمت میںکچھ عرض کرنا چاہتاہوں۔
(1)سب سے پہلے ان کو اور ان کے رفقائے کار کو دلی مُبارکباد دیتا ہوں۔ اگر آپ غور سے دیکھیں تو ان کی جدّوجہد بھی قیام پاکستان کے حصول کی جدّوجہد اور میرے رفقائے کار اور میری ملک کو ایٹمی اور میزائل قوّت بنانے کی محنت و مشقت و جدّوجہد سے بہت مماثلت رکھتی ہے۔ سب سے پہلے اُنھوں نے آکسفورڈ یونیورسٹی سے تعلیم حاصل کی پھر کرکٹ کے میدان میں ملک کو پہلا (اور ابھی تک آخری) ورلڈ چیمپئن بنایا۔ شوکت خانم جیسے اعلیٰ اسپتال کی تعمیر کی اور تقریباً 22سال کی اَنتھک لگن و محنت سے اپنی منزل مقصود تک پہنچ گئے۔ میری دلی دُعا ہے کہ اللہ پاک ان کو اور ان کے اہل خانہ کو اور تمام رفقائے کار اور ان کے عزیز و اقارب کو تندرست، خوش و خرم رکھے، حفظ و امان میں رکھے، عمر دراز کرے، ہر شر سے محفوظ رکھے اور فرائض منصبی ایمانداری اور کامیابی سے ادا کرنے میں رہنمائی و سعادت عطا فرمائے۔ آمین۔
جیساکہ بہت سے صحافی و تجزیہ نگار کہہ رہے ہیں عمران خان کو ملک چلانے میں بہت سی مشکلات کا سامنا کرنا پڑے گا مگر اللہ کی رہنمائی شامل رہی اور نیک نیتی سے اُنھوں نے جدّوجہد جاری رکھی تو ان شاء اللہ ضرور کامیاب ہوجائیں گے۔ خوش قسمتی سے ان کے چند ساتھی تجربہ کار اور تعلیم یافتہ ہیں اگر انھوں نے صحیح کارکردگی دکھائی تو یقیناً کامیاب ہوجائینگے۔ اگر کسی کو نوازنا ہے تو خدا کیلئے اعلیٰ اہم عہدوں پر نا بٹھائیں۔جیساکہ ماضی میں ہوا پنجاب 100ملین کا صوبہ ہے صرف لاہور میں درجنوں نہایت اعلیٰ تعلیم یافتہ اور تجربہ کار ڈاکٹر موجود ہیں ان کو نظرانداز کرکے انجینئر کو سربراہ بنایاگیاجواقربا پروری کی بدترین مثال اور عوام دشمنی کی بدترین سے بھی بدترین مثال تھی۔ ان کو اگر ہائی ویز یا موٹر ویز کا ایم ڈی بنا دیتے تو کسی کو اعتراض نہ ہوتا ۔عمران خان کو کچھ لوگ نمائشی کاموں کا مشورہ دیتے رہے ہیں ان میں سے ایک یہ ہے کہ وزیر اعظم ہائوس میں نہ رہو۔ یہ نہایت کم عقلی پر مبنی مشورہ ہے ۔ یہ ملک 22کروڑ کی آبادی کا ہے ایک قابل اعتماد ایٹمی اور میزائل کی قوّت ہے۔ آپ کے پاس ملکی سربراہ آتے رہیں گے ان کو خوش آمدید کہنے کے لئے اور عشائیہ دینے کیلئے حسب منصب پروٹوکول دینا پڑتا ہے۔ آپ دوسرے طریقوں سے کفایت شعاری کرسکتے ہیں۔ پورے محل کو ٹھنڈا کرنے کی ضرورت نہیں جہاں آپ کا قیام اور دفتر وغیرہ ہوں ان کو ٹھنڈا کرلیں۔ 26 ڈگری سینٹی گریڈپر درجہ حرارت رکھیں خرچ بھی کم اور آرام دہ بھی۔ نواز شریف نے بھی یہ اعلان کیا تھا اورایک وزیر صاحب میری چھوٹی بیٹی عائشہ کے چھوٹے سے گھر کے سامنے کھڑے ہوگئے تھے کہ میاں صاحب کے لئے مناسب رہے گا میں نے کہا اگر کفالت ہی کرنی ہے تو وزیر اعظم ہائوس کے پیچھے کچی آبادی ہے وہاں قیام کر لیں۔
اس موقع پر ایک سچا واقعہ بتانا چاہتا ہوں۔ 1990-1985 تک چین معاشی طور پر بہت کمزور تھا اور ہم سے بھی زیادہ پسماندہ لگتا تھا مگر لوگ نہایت محنتی، محب وطن تھے ۔ 1949 میں چین آزاد ہوا تھا اور اسکے فوراً ہی بعد اُنھوں نے دیائویوٹائی نامی اعلیٰ درجے کا مہمانوں کا کمپلیکس (21 بنگلہ) بنا لیا تھا جو کسی بھی 5 اسٹار ہوٹل سے کم نہ تھے اور ساتھ میں کئی اعلیٰ عمارتیں پیپلز گریٹ ہالز کے نام سے تیانَمِن اسکوائر پر بنا لیں۔ ایک مغربی صحافی نے چواین لائی وزیر اعظم سے کہا کہ آپ بے حد غریب ہو، یہ عیاشی کیوں؟ انھوں نے مسکرا کر جواب دیا کہ اگر آپ غریب ہو تو آپ کو فقیر کی شکل اختیار کرنے کی ضرورت نہیں۔ آج وہ گیسٹ ہائوس اور گریٹ ہالز چین کی دولت، ترقی اور عزّت کے آگے معمولی سی چیز بن گئے ہیں۔ ابھی ترکی کے صدر کی مثال آپ کے سامنے ہے انھوں نے کافی بڑی رقم سے ایوان صدر؍شاہی گیسٹ ہائوس کی تعمیر کرائی۔ کچھ لوگوں نے اعتراض کیا تو لاتعداد لوگوں نے حمایت میں بیان دئیے کہ دیکھو ہماری تاریخ کیا ہے ہمارا ماضی دیکھو اور اب صدر کی موجودگی میں ترکی نے جو ترقی کی ہے جو عوام کی سالانہ آمدنی بڑھی ہے (2500 ڈالر سے 11000 ڈالر) وہ دیکھو۔ ہمیں اپنا وقار اور ساکھ قائم کرنی ہے۔
اللہ تعالیٰ نے عمران خان کوعزت دی ہے اور یہ ان کے لئے بہت بڑا امتحان ہے اگر خدانخواستہ وہ سیدھے راستہ سے بہکے تو ماضی کے حکمرانوںکا انجام ضرور یاد رکھیں۔ عمران خان کو علم ہے کہ ملک میں دو ناسور ہیں ایک خراب معیشت یا مالی حیثیت اور دوم نہایت ناقص فرسودہ تعلیمی نظام۔ آپ چاہیں تو اس میں تیسر ی لعنت رشوت خوری کو شامل کرلیں۔ آپ نے پڑھا ہوگا کہ بلوچستان کا سیکرٹری جس کے گھر سے 70 کروڑ سے زیادہ رشوت کی رقم نکلی تھی وہ ضمانت پر رہا کردیا گیا ہے جبکہ غالباً کئی جیب کترے اور سائیکل چور برسوں سے جیل میں سڑ رہے ہونگے۔ تعلیم کے معاملے میں نئی حکومت کی میں مدد کرسکتا ہوں۔ میں نے دنیا کی تین اعلیٰ یونیورسٹیوں سے اعلیٰ تعلیم حاصل کی ہے۔ ٹیکنیکل یونیورسٹی برلن، ٹیکنالوجیکل یونیورسٹی ڈیلفٹ (ہالینڈ) اور یونیورسٹی آف لیوون (بلجیم) نے مجھے اپنی ویب سائٹ پر ممتاز اسکالرز کی فہرست میں ڈالا ہے جن میں نوبل انعام یافتہ سائنسدان بھی شامل ہے۔ میری کارکردگی کسی سے پوشیدہ نہیں، میں نے دو سال میں GIKI بنایا جو ملک کا بہترین ٹیکنیکل انسٹی ٹیوٹ تھا۔ میں اعلیٰ ٹیکنالوجی، سائنس، اعلیٰ تعلیم، بارشی پانی کو جمع کرنے کا نظام اور سب سے بڑی لعنت فرسودہ سول سروس اسٹرکچر ٹھیک کر سکتا ہوں۔ مجھے نا کسی تنخواہ کی ضرورت ہے اور نہ عہدے کی، ملک کی خدمت کو ہمیشہ حاضر ہوں، پہلے خون، پسینہ دے کر ملک کے دفاع کو ناقابل تسخیر بنایا ہے اب جان دے کر اسکی بہتری کے لئے حاضر ہوں۔
(2)اب آئیے اللہ تعالیٰ کے احکامات و انتباہ کے بارے میں کچھ بتاتے ہیں۔ اللہ تعالیٰ نے صاف صاف کئی آیات میں فرمایا ہے کہ ہم جس کو چاہتے ہیں عزّت دیتے ہیں جس کو چاہتے ہیں ذلّت دیتے ہیں جس کو چاہیں ہدایت دیتے ہیں جس کو چاہتے ہیں گمراہ کردیتے ہیں۔عمران خان صاحب یاد رکھیں کہ اللہ کا وعدہ کبھی جھوٹا نہیں ہوتا دیر یا بدیر وہ ضرور پکڑ لیتا ہے۔ اللہ تعالیٰ نے آل ِعمران، سورۃ النساء، سورۃ المائدہ، سورۃ الممتحنہ میں صاف صاف حکم دیا ہے کہ کافروں، عیسائیوں اور یہودیوں کو دوست نا بنانا ورنہ ذلیل و خوار ہوگے۔ بجائے ان لوگوں سے قرضہ لینے کے آپ تارکین وطن سے پرخلوص درخواست کیجئے وہ بہ آسانی 20,15 بلین ڈالر بھیج دینگے اگر آپ نے World Bank, IMF سے قرضہ لیا تو گلے کا پھندہ مزید تنگ کردیا جائے گا۔ درآمد پر کنٹرول کریں اور جو اربوں روپیہ کی دالیں، پان چھالیہ، پیاز، ادرک، ٹماٹر، لہسن، پھل درآمد کئے جاتے ہیں ان کا نعم البدل ملک میں پیدا کروایئے۔ اللہ پاک آپ کو کامیاب کرے۔ آمین
(نوٹ) پچھلے ہفتہ کے کالم میں ثوبیہ خان کی کتب پر تبصرہ کیا تھا اور ڈاکٹر اجمل نیازی اور ضیاء شاہد صاحب اور خالد شریف صاحب، عبدالستار عاصم اور سعید الظفر صاحب کے تبصروں کا ذکر کیا۔ میں جناب ندیم اختر ندیم صاحب کا ذکر کرنا بھول گیا وہ نوائے وقت کے مشہور کالم نگار ہیں اور ثوبیہ خان کے مدرس و ہدایت کار بھی۔ انہوں نے بھی بہت اچھا تبصرہ لکھا ہے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)