Category کالم

(ایمرا نیوز)

پاکستان کی بنیادوں میں کچھ طبقات ایسے رچ بس گئے ہیں جس کی وجہ سے جمہوریت اس ملک میں پنپ نہیں سکی۔ میں پچھلے مقالوں میں ایک مختلف نظام جمہوریت کے قیام کی طرف اشارہ کرتا رہا ہوں جو اس طرح قائم کی جائے کہ ملک سے بدعنوانی اور نا انصافی کا نام و نشان مٹ جائے اور کسی خاص طبقے کی اجارہ داری قائم نہ رہ سکے بلکہ ملک کے لئے موزوں ترین ماہرین پر مشتمل ایک ٹیکنو کریٹ (technocrat) حکومت قائم کی جاسکے۔ قائد اعظم محمد علی جناح بھی 1947ء میں پاکستان میں رائج برطانوی پارلیمانی نظام جمہوریت کے حق میں نہیں تھے جس کا اندازہ ان کے بقلم خود تحریر کردہ نوٹ سے صاف ظاہر ہوتا ہے جس میں انہوں نے واضح طور پر بیان کیا ہے کہ برطانوی پارلیمانی نظام جمہوریت دنیا کے کسی بھی ملک میں کامیاب نہ ہوسکا سوائے برطانیہ کے جبکہ صدارتی نظام جمہوریت پاکستان کے لئے موزوں ہے۔ ان کی تحریر آکسفورڈ یونیورسٹی پریس (Oxford University Press) کی شایع شدہ ایک کتاب جس کا عنوان ’’جناح بیاض‘‘ (The Jinnah Anthology) ہے اس میں صفحہ نمبر 81 پر شائع ہوچکی ہے اور اس تحریر کی تصدیق میں نے نیشنل ڈیفنس جامعہ سے کرائی تھی۔ سوال یہ ہے کہ ہمارے قائد کو پارلیمانی نظام جمہوریت کے بارے میں تشویش کیوں لاحق تھی؟ انہوں نے بہت سے مواقع پر جو جاگیردارانہ نظام ہمارے ملک میں رائج ہے اس پر اپنے گہرے دکھ

کا اظہار کیا تھا۔ قائد اعظم محمد علی جناح کی وسیع النظری پاکستان کی تاریخ میں آنے والے خطرات کو پہلے ہی بھانپ چکی تھی اور انہوں نے قوم کو بدعنوان جاگیرداروں کے بارے میں خبردار کیا تھا جو آج حکومت کو اپنے مضبوط شکنجے میں جکڑے بیٹھے ہیں۔ قائد اعظم نے ایک تقریر میں اپنی قوم کو مندرجہ ذیل الفاظ میں خبردار کیا تھا: ’’میں جاگیرداروں اور سرمایہ داروں کو خبردار کرنا چاہتا ہوں جو ہمارے خرچ پر ایسے نظام کی بدولت پھل پھول رہے ہیں جو اتنا فرسودہ ہے کہ اس نے ان جاگیرداروں کو اتنا خود غرض بنادیا ہے کہ ان کے ساتھ کسی بھی قسم کا مباحثہ بے معنی ہے۔ عوام کا استحصال ان کے خون میں رچ بس گیا ہے۔ وہ اسلام کا سبق بھول چکے ہیں‘‘۔ (از اقتباس: آل انڈیا مسلم لیگ سیشن، دہلی، 24 اپریل 1943)۔ قائد اعظم قوم پرستی کے نام پر صو بائیت کے شر کے بارے میں بھی بہت فکر مند تھے ۔ ایک تقریر میں انہوں نے بیان کیا ــ ـ”یہ بات قدرتی طور پر مجھے دکھی کر دیتی ہے جب میں پاکستان کے کسی بھی حصے پر صوبائیت کے غلبے کی لعنت دیکھتا ہوں ۔ پاکستان کو اس شر سے پاک ہونا چاہئے۔ اب ہم سب پاکستانی ہیں نہ کہ بلوچی ، پٹھان ، سندھی پنجابی وغیرہ وغیرہ ۔ اور ہمیں اپنے روئیے اور عمل سے بحیثیت پاکستانی قدم ملا کر چلنا چاہئے اور ہمیں اپنی پہچان بطور پاکستانی قدم ملا کر چلنا چاہئے اور ہمیں اپنی پہچان بطور پاکستانی پر فخر ہونا چاہئے اس کے سوا کچھ نہیں (کوئٹہ کی بلدیہ کی جانب سے پیش کردہ تقریر کے جواب میں خطاب 15 جون ، 1948)”
قائد اعظم محمد علی جناح نے اندازہ لگالیا تھا کہ پاکستان میں جمہوریت صرف اسی وقت پنپ سکتی ہے جب زیادہ تر عوام تعلیم یافتہ ہوں۔ کیونکہ صرف اسی طرح عوام بدعنوان سیاستدانوں کے درمیان بے لوث قیادت کو تلاش کرنے کے اہل ہوسکتے ہیں۔ اس لئے پاکستان کی کامیابی کے لئے وہ بار بار تعلیم کی اہمیت پر زور دیتے تھے کہ یہی وہ واحد عنصر جو پاکستان کو کامیابی سے ہمکنار کرسکتا ہے۔ انہوں نے فرمایا تھا: ’’تعلیم کے بغیر مکمل تاریکی ہے اور تعلیم روشنی ہے۔ اس عوام کے لئے تعلیم زندگی اور موت کا سوال ہے۔ دنیا جس برق رفتاری سے آگے بڑھ رہی ہے کہ اگر اس وقت تم نے تعلیم کا دامن نہ تھاما تو نہ صرف پیچھے رہ جائو گے بلکہ ناپید ہوجائو گے۔ نبی پاک ﷺ نے اپنے پیروکاروں کو بھی حکم دیا کہ علم کی جستجو کرو چاہے اس کے لئے تمہیں چین ہی کیوں نہ جانا پڑے۔ یہ حکم اس وقت تھا جب جدیدذرائع نہ تھے تو اب تو مسلمانوں کو اسلام کے سچے پیروکاروں کے طور پر اسلام کی شاندار روایات کو برقرار رکھتے ہوئے علم کے حصول کے لئے تمام دستیاب مواقع استعمال کرنے چاہئیں۔ کوئی بھی وقت یا ذاتی تسلی کی قربانی اس قدر عظیم شمار نہیں ہوگی سوائے اسکے جو کہ تعلیم کی ترقی کے لئےکی جائے۔‘‘ بدقسمتی سے جاگیردارانہ غلبے کے تحت ہمارے ترقیاتی منصوبوں کا سب سے زیادہ نظر انداز شعبہ تعلیم بن گیا ہے اور آج پاکستان کا شمار تعلیم پر خرچ کے لحاظ سے دنیا کے سب سے نچلے ان 10ممالک میں ہوتا ہے جو اپنی جی ڈی پی کا سب سے کم فیصد حصہ تعلیم پر خرچ کرتے ہیں۔ یہ پاکستان کی دو بڑی سیاسی جماعتوں کی سوچی سمجھی سازش ہے جس کا ثبوت اس بات سے ملتا ہے کہ پچھلے 10 سالوں میں تعلیم کا بجٹ صرف جی ڈی پی کا تقریباً 2 فیصد رکھاگیا تاکہ اکثریت لوگ جاہل رہیں اور وہ اس جہالت کا فائدہ اٹھاتے ہوئے ان کو غلام رکھیں اور ان پر حکومت کرکے ان کو لوٹتے رہیں۔
قائد اعظم کی وسیع النظری سے بدعنوانی کا عنصر بھی نہیں چھپا ہوا تھا۔ جہاں انہیں عوام میں تعلیم عام کرنے کی اور جاگیرداری نظام کو ختم کرنے کی فکر تھی وہاں انہیں یہ بھی فکر تھی کہ ناخواندگی اور مضبوط جاگیرداری نظام کی موجودگی میں ملک میں بدعنوانی بھی اپنے عروج پر ہوگی۔ ان کی یہ فکر بجا تھی کیونکہ بدعنوان لیڈروں پر مشتمل متعدد حکومتوں نے عدالتی نظام کو بھرپور طریقے سے پامال کیا اور نیب، ایف آئی اے، پولیس سمیت دیگر ایجنسیوں کو اپنی حفاظت کے لئے استعمال کیا اور تمام ملکی اثاثوں کی لوٹ مار کرکے ملک کو قرض کے گہرے سمندر میں غرق کردیا۔ قائد اعظم نے بدعنوانی کے بارے میں اس طرح متنبہ کیا: ’’بدعنوانی بھارت میں اور بالخصوص مسلمانوں کے درمیان ایک لعنت ہے، خاص طور پر نام نہاد تعلیم یافتہ اور طبقۂ فکر میں۔ بدقسمتی سے یہی طبقہ عقلی طور پر اور اخلاقی طور پر بدعنوان اور خودغرض رہا۔ بے شک یہ بیماری عام ہے، لیکن مسلمانوں کے اس مخصوص طبقے میں یہ بہت زیادہ ہے۔‘‘ (محمد علی جناح کا اصفہانی سے خطاب، 6 مئی1945ء) ایک اندازے کے مطابق ہمارے حکمرانوں کی طرف سے لوٹے ہوئے مال جسے بیرون ملک مختلف ’’فرضی ناموں‘‘ سے جمع کیا گیا ہے کا تخمینہ 500 ارب ڈالر سے بھی زیادہ ہے۔ ہمارے سابق وزیر خزانہ کے مطابق اکیلے ایف بی آر 500 ارب روپیہ سالانہ کی بدعنوانی کی ذمہ دار ہے۔ کراچی میں سرکاری زمین کی ہیرا پھیری میں ایک سیاسی جماعت نے 30,000 شہری پلاٹس غیر قانونی طور پر فروخت کردیے جس کا تخمینہ 60,000 کروڑ روپے (600 ارب روپے) ہے۔ توانائی کے منصوبوں میں میگافراڈ کے ذریعے ہمارے ایک بدعنوان وزیراعظم نے متروک پاور پلانٹس کی تنصیب کراکر بجلی کے نرخوں میں اس قدر اضافہ کیا کہ ہماری صنعتیں اور برآمدات تباہ ہوگئیں، لاکھوں افراد بے روزگار ہوگئے اور بڑے پیمانے پر غربت نے اپنا ڈیرہ جمالیا۔
جس طرح قائد اعظم محمد علی جناح کے مختلف خطابات اور تحریری نوٹ سے صدارتی نظام جمہوریت کے قیام کی حمایت کی تصدیق ہوتی ہے اسی لئے میں بھی اپنے قائد کی خواہش کی حمایت کرتے ہوئے اس صدارتی نظام جمہوریت کی حمایت اپنے گزشتہ کئی مقالوں میں کرچکا ہوں، نظام جمہوریت کی کامیابی کے لئے قومی نظام میں 3 بڑے دھڑوں کو ایک دوسرے سے علیحدہ کام کرنا ہوتا ہے۔
یہ، قانون ساز حصہ (Legistative) یعنی پارلیمنٹ، حکومتی عملی ادارے (Executive) یعنی وزارتوں اور دیگر اداروں پر مشتمل اور تیسرا حصہ عدلیہ (Judiciary) ہیں۔ ایک متحرک جمہوریت کے لیے یہ علیحدگی بہت ضروری ہے جوکہ اس موجودہ پارلیمانی نظام کی موجودگی میں ممکن نہیں کیونکہ حکومتی وزارتوں کا سربراہ ’’وزیراعظم‘‘ پارلیمنٹ کو بھی کنٹرول کرتا ہے جو انتظامیہ کا بھی سربراہ ہوتا ہے اور تمام اہم اداروں اور پولیس، ایف بی آر، ایف آئی اے، ایس ای سی پی کے سربراہان بھی وہی مقرر کرتا ہے۔ نتیجہ یہ ہوتا ہے کہ وہ اپنے ہی سیاسی ساتھیوں کو اہم عہدوں پر مقرر کرتا ہے یہ لوگ پھر وزیراعظم اور ان کے دیگر کابینہ کے ساتھیوں کو بڑی بدعنوانیوں میں پکڑے جانے سے تحفظ فراہم کرتے ہیں۔ صدارتی نظام جمہوریت میں کیونکہ وزیر پارلیمنٹ سے منتخب نہیں ہوتے اس لئے تینوں دھڑے علیحدہ علیحدہ کام کرسکتے ہیں۔
صدارتی حکومت کا ایک بڑا فائدہ یہ ہے کہ صدر مختلف شعبوں میں ملک کے اعلیٰ ترین ماہرین کو براہ راست وفاقی وزراء کے طور پر مقرر کرسکتے ہیں۔ کیونکہ وزراء اس نظام کے تحت پارلیمان سے منتخب نہیں کئے جاتے۔ اس طرح ملک کے وہ ممتاز افراد جو انتخاب لڑنے میں دلچسپی نہ رکھتے ہوں وہ بھی اپنے ماہرانہ تجربہ سے ملک کو فائدہ پہنچاسکتے ہیں۔اس کے علاوہ صدارتی نظام حکومت میں پارلیمنٹ کے اراکین قانون سازی اور اس کے نفاذ تک محدود رہتے ہیں۔ اس طرح بدعنوان سیاست دان جو پارلیمنٹ کے رکن بننے کے لئے کروڑوں روپے اس لالچ میں خرچ کرتے ہیں کہ منتخب ہونے کے بعد کابینہ کا حصہ بن کر بڑے پیمانے پر بدعنوانیاں کرکے اربوں روپیہ کمالیں گے ان کے ایسے ارادوں پر اوس پڑجاتی ہے۔
اس تیز رفتار ترقی کے دور میں جہاں ہر روز نت نئی ایجادات جلوہ گر ہورہی ہوں اور پچھلی ایجادات کی اہمیت کو ماند کرتی جارہی ہوں، جہاں ہر ملک ہر خطہ اس دوڑ میں آگے نکلنے کی کوشش کررہا ہو وہاں تکنیکی مہارت سے آراستہ وزراء کی موجودگی نہایت اہمیت رکھتی ہے۔ ایک مضبوط علمی معیشت کے قیام کےلئے اعلیٰ تکنیکی شعبوں میں صنعتکاری ضروری ہے ۔ جبکہ اس پارلیمانی نظام کے تحت منتخب ہونے والے زیادہ تر سیاست دان بہت کم یا بالکل ہی کوئی سمجھ بوجھ نہیں رکھتے کہ ایک مضبوط علم معیشت قائم کرنے کے لئے کون سے اقدامات اٹھانے کی ضرورت ہے۔ یہی وجہ ہے کہ پاکستان، سات دہائیاں گزر جانے کے باوجود غربت کے چنگل میں پھنسا ہوا ہے۔
مندرجہ بالا حقائق اور بانی پاکستان کے تفکرات سے یہ واضح ہے کہ ایک دیانت دار، قابل اور بربصیرت تکنیکی ماہرین پر مشتمل ایک صدارتی نظام جمہوریت پر مبنی حکومت وقت کی اہم ضرورت ہے اور یہی بہترین موقع ہے جہاں سپریم کورٹ کو اپنی توجہ مرکوز کرنی چاہئے۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)

ذرا غور کریں کہ یہ جھوٹ بولنے سے پہلے آپس میں نوٹس کا تبادلہ بھی نہیں کرتے۔ سمجھ نہیں آتی کوئی شخص انسانوں کو کس حد تک احمق اور بیوقوف سمجھ سکتا ہے۔مریم نواز، نواز شریف اور شہباز شریف کے مندرجہ ذیل بیانات آپ سب نے بھی ٹی وی پر دیکھے ہوں گے لیکن کسی قاری نے ان تینوں کے بیانات یکجا کرکے اس خواہش کے ساتھ بھجوائے ہیں کہ انہیں ایک ساتھ پڑھنے کا امپیکٹ ہی اور ہے جس سے صحیح معنوں میں اندازہ ہوتا ہے کہ معصوم عوام کن کاریگروںکے ہاتھوں میں کھیلتے رہے۔
سب سے پہلے مریم۔’’حسن حسین کے پاس آج جو بھی ہے وہ ان کے والد سے ان کو نہیں آیا۔ وہ کہتے ہیں نا کہ یہ پیسہ کہاں سے آگیا کہ بچے اتنی چھوٹی چھوٹی عمروں میں امیر ہوگئے اور ارب پتی ہوگئے۔ اس ارب پتی دادا کے پوتے ہیں جو 1960۔ 1970میں پاکستان کا امیر ترین انسان تھا۔‘‘نوٹ:کوئی پوچھے کہ امیر ترین نے اس دہائی میں انکم ٹیکس کتنا دیا اور ٹرن اوور کتنا تھا؟اب چلتے ہیں نواز شریف کے خطاب کی طرف۔’’1970تک ’’اتفاق‘‘ کو سٹیل اور انجینئرنگ کی سب سے بڑی صنعت کا مقام مل چکا تھا۔ نیشنلائزیشن سے قبل اتفاق فائونڈری کا منافع ہزاروں یا لاکھوں میں نہیں حضور! کروڑوں میں تھا۔‘‘آخر پر دیکھئے شہباز شریف فرماتے ہیں۔’’میرے خاندان کا 22خاندانوں میں شمار نہیں ہوتا تھا۔ مجھے اس کے اوپر فخر ہے کہ میر ےوالد کا تعلق ایک غریب کسان کے گھرانے سے تھا۔
ہندوستان سے وہ ہجرت کرکے آئے اور 30کی دہائی میں میرے والد صاحب نے لاہور میں اپنے بھائیوں کے ساتھ مزدوری شروع کی اور اس طرح کاروبار میں آئے۔‘‘کوئی پوچھے کہ کاروبار میں تشریف آوری کے بعد پہلے دس سال کا ٹوٹل ٹرن اوور کتنا تھا اور کس کس مد میں کتنا ٹیکس ادا کیا کرتے تھے اور آج بڑے میاں صاحب مرحوم کے بچوں کے مقابلہ پران کے باقی سگے بھائیوں کے بچوں یعنی نواز شہباز کےکزن برادرز کی مالی حیثیت کتنی ہے اور اگرصرف شریف برادران ہی باقیوں سے ہزاروں گنا آگے ہیں تو سوائے ’’سیاست‘‘ کے انہیںکون سے سرخاب کے پر لگے تھے جبکہ یہ تو کاروبار کی بجائے ہول ٹائم سیاست میںبھی مصروف رہے۔ کیا باقی بھائیوں کی ساری اولاد نہلوں پر مشتمل تھی جو آج ان کے سامنے پانی بھی نہیں بھرتے؟میں نے یہ انتہائی بور کردینے والی بات اس لئے چھیڑی ہے کہ ان کا جو جی چاہے کریں لیکن خدارا عوام کو اتنے بھونڈے بے تکے طریقے سے بیوقوف بنانا ترک کردیں۔ ہم بیوقوف بننے کے لئے تیار ہیں لیکن پلیز! یہ ’’کارِ خیر‘‘ ذرا قرینےسلیقے سے سرانجام دیں اور بیانات داغنے سے پہلے آپس میں تبادلہ خیالات ضرور کرلیا کریں۔
سالوں پہلے شہباز صاحب نے ایک کتابچہ سا لکھا جس کا عنوان تھا ’’عزم و ہمت کی داستان‘‘ جس میں اس خاندان کی جدوجہد کی داستان تھی۔ میری لائبریری ’’بیلی پور‘‘ کی ’’ہانسی حویلی‘‘ سے ہمارے شہر والے گھر تک منقسم اور منتشرہے۔ یہ کتابچہ انہی میں کہیں گم ہے جس کی کھوج کا ارادہ ہے۔ اگر کسی قاری کے پاس موجود ہو، مجھے اس کی فوٹو کاپی بھجوادے تاکہ میں مشقت سے بچ جائوں۔ غریب ہونا نہ طعنہ ہے نہ جرم نہ گناہ بلکہ شاید بل گیٹس نے ہی کہا ہے کہ ’’غریب پیدا ہونا جرم نہیں، غریب مرناجرم ہے‘‘ لیکن اس کا یہ مطلب نہیں کہ جرائم کے جال سے غربت پر قابو پایا جائے۔ سیلف میڈ ہونا اللہ کا احسان اور سعی کی نشانی ہے لیکن حقائق مسخ کرنا اور وہ بھی کرتوتوں پر پردے ڈالنے کے لئے، تو یہ کم از کم ’’لیڈروں‘‘ کو زیب نہیںدیتا۔اللہ جانے کیوں شہبازشریف مجھے ہمیشہ نسبتاً زیادہ جینوئن لگے لیکن پنجاب میں ’’ہینڈز اپ‘‘ کرتے ہوئے یہ کیوں کہہ دیاکہ ’’کالے دھندے میں منہ نہیں کالا کرنا چاہتا‘‘ تو کوئی پوچھے حضور! چھانگا مانگا میں ضمیروں کی منڈی بلکہ نیلام گھر کس گھرانے کا ناقابل فراموش کارنامہ ہے؟
کاش آپ اب بھی ترمیم کرلیں اور سرعام یہ اعتراف کریں کہ میں اپنے بڑے بھائی کے نقش قدم پر چلنا پسند نہیں کرتا۔باقی بچے اپنے مولانا فضل الرحمٰن جنہوں نے 14اگست نہ منانے کی ’’دھمکی‘‘ دی ہے تو اس پر لال حویلی کے بیلی شیخ رشید نے بے رحمی سے پرانے زخم کریدتے ہوئے یہ تاریخی سچ بیان کردیا کہ مولانا کے بزرگ تو قیام پاکستان کے ہی خلاف تھے اس لئے آپ کا ’’یوم آزادی‘‘ منانا نہ منانا کوئی معنی نہیں رکھتا۔ واقعی تقریباً 22کروڑ میں سے ایک آدھ نہ بھی منائے تو ’’یوم آزادی‘‘ کو کوئی فرق نہیں پڑے گا۔حکومت نہیں کرنی آئی تو اپوزیشن کرنا ہی سیکھ لو۔ (بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
اوریا مقبول جان
عموماً یکساں نظام تعلیم کے نعرے سے یہ مراد لی جاتی ہے کہ اس ملک کے تمام سکولوں کو ان مغرب زدہ انگلش میڈیم سکولوں کے قالب میں ڈھال دیا جائے جن میں اشرافیہ کے بچے تعلیم حاصل کرتے ہیں۔ ہر سکول معیار اور سہولیات کے اعتبار سے ایچی سن اور گرامر کا ہم پلہ ہوجائے اور ہر بچہ پہلے دن سے ہی ان نرسری نظموں (Rhyms) کو گانا شروع کر دے، ان کامکس کو پڑھنے لگے اور اس لباس کو زیب تن کرنے لگے جو دراصل ایچیسن، گرامر یا کسی بھی انگلش میڈیم سکول نے انگریزوں سے مستعار لیا ہوا ہے۔ اس سے بڑی خودکشی اور کوئی نہ ہوگی۔ حیرت کی بات ہے کہ دنیا کے جغرافیے اور معاشی و سیاسی گروہ بندیوں کو دیکھا جائے تو فرانس، جرمنی، ناروے، سویڈن، ڈنمارک، فن لینڈ، آئس لینڈ، آسٹریا سمیت یورپ کے تیس سے زیادہ ممالک انگلستان کے قریب بھی ہیں اور امریکہ کے حلیف ہونے کی وجہ سے اس سیاسی گروپ میں شامل بھی ہیں جن کا دفاع بھی مشترک ہے اور اقتصادیات و سیاسیات بھی۔ ان میں سے اکثر ممالک اتنے چھوٹے ہیں کہ ان کی آبادی چند لاکھ سے بھی زیادہ نہیں۔ لیکن ان تمام ممالک میں سے کوئی ایک ملک بھی ایسا نہیں جس نے برطانیہ یا امریکہ میں رائج انگریزی ذریعہ تعلیم کو اپنایا ہو۔ سب کے سب نرسری سے لے کر پی ایچ ڈی تک کی تعلیم اپنی زبان میں دیتے ہیں۔ اگر او لیول، اے لیول یا انگریزی ذریعہ تعلیم دنیا کا بہترین ذریعہ تعلیم ہوتا تو تب بھی ہم مان لیتے کہ چلو ہم نے اگر نقل اتاری بھی تو کسی ایسے نظام تعلیم کی جس سے بڑھ کر کوئی اور دوسرا نظام تعلیم دنیا میں موجود نہیں ہے۔ اس وقت اپنے مقام اور مرتبے (Ranking) کے اعتبار سے دنیا میں چالیس نظام ہائے تعلیم کو چنا جاتا ہے۔ ان میں سے کوئی ایک بھی ایسا نہیں جو کسی دوسرے کی زبان میں اپنے بچوں کو تعلیم دیتا ہے۔ آپ حیران ہوں گے کہ رینکنگ کے اعتبار سے بھی دنیا کے نظام ہائے تعلیم میں پہلے نمبر پر جنوبی کوریا، دوسرے نمبر پر جاپان، تیسرے نمبر پر سنگاپور، چوتھے نمبر پر ہانگ کانگ، پانچویں نمبر پر فن لینڈ اور چھٹے نمبر پر انگلینڈ آتا ہے۔ انگلینڈ جس کا نظام تعلیم ہم نے بغیر کسی تبدیلی کے اپنے ملک میں رائج کر رکھا ہے۔ اس کے بعد اگلے سات ممالک، ہالینڈ، آئرلینڈ، پولینڈ، ڈنمارک، جرمنی، روس اور کینیڈا ہیں۔ ان تمام ممالک میں بھی کوئی کسی غیرملکی زبان میں تعلیم نہیں دیتا۔ یہاں تک کہ کینیڈا کا فرانسیسی بولنے والا حصہ فرانسیسی میں تعلیم حاصل کرتا ہے اور انگریزی بولنے والا انگریزی میں۔ ہم ان چند بدقسمت ترین ممالک میں سے ایک ہیں جنہوں نے گزشتہ تیس سال سے انگلش میڈیم کو ایک بھونڈے طریقے سے پروان چڑھانے کی کوشش کی۔ ہم سے پہلے یہ کوشش دیگر تین ممالک نے بھی کی تھی۔سنگاپور والے ، سب کچھ انگریزی میں کرنے کے بعد ہوش میں آئے کہ ہم تو تخلیقی صلاحیتوں سے عاری ہو گئے، واپسی کی سرتوڑ کوشش کر رہے ہیں، ویسے بھی انہوں نے تعلیم ہی نہیں اپنے اردگرد بھی سب کچھ انگریزی میں کرلیاتھا۔ وہ اپنی انگریزی کو سنگلش (Singalish) کہتے ہیں۔ ان کی آبادی میں سے 42 فیصد ایسے ہیں جو ملک سے باہر پیدا ہوئے اور تجارتی مرکز ہونے کی وجہ سے کوئی علاقائی زبان وہاں نہ پنپ سکی۔ لیکن اس کے باوجود بھی جب انہیں اندازہ ہوا کہ انہوں نے اپنی قوم کو صرف انگریزی میں پڑھا کر کس قدر زیادتی کی ہے تو اب وہاں مالے، مینڈرن اور تامل بھی ساتھ ساتھ پڑھائی جا رہی ہے تاکہ واپس لوٹا جا سکے۔ دوسرا ملک سری لنکا اور تیسرا بھارت ہے۔ ان دونوں ممالک کی وزارت تعلیم انگریزی سے نجات کی جانب واپسی کا سفر شروع کر چکے ہیں۔ اس وقت دنیا کی کسی بھی یونیورسٹی یا زبان کی ٹیسٹنگ TESTINGسروس کو بھارت میں امتحان لینے کی اجازت نہیں۔ کوئی برٹش کونسل، آکسفورڈ یا کیمبرج بھارت میں او لیول یا اے لیول کا امتحان نہیں لے سکتی۔ دنیا کا ہر ملک اب اس حقیقت سے واقف ہو چکا ہے کہ ترقی صرف اور صرف اپنی زبان میں ہی تعلیم دینے سے کی جا سکتی ہے۔ پاکستان میں سب سے بڑا ظلم یہ ہوا کہ ہم نے نظام تعلیم تو درآمد کرنا ہی تھا، ساتھ ہی ان کا کلچر، تہذیب اور تاریخ کو بھی اپنے نصاب کا حصہ بنا لیا۔ فزکس، کیمسٹری، بیالوجی وغیرہ اگر انگریزی میں پڑھائے جاتے تو کوئی نقصان نہیں پہنچا سکتے تھے لیکن ان سکولوں میں سوشل سائنسز یعنی معاشرت، تہذیب، حتیٰ کہ تاریخ بھی یورپ کی پڑھائی جانے لگی۔ دنیا کے بدترین حد تک مرعوب اور بے شرم ملک میں بھی اس طرح کی بھونڈی مثال نہیں ملتی۔ ہر کوئی اپنے بچوں کو اپنی تاریخ، اپنا کلچر، اپنی شاعری اور اپنے اساسی نظریات پڑھاتا ہے۔ لیکن ہم تو اپنے بچوں کو گیت بھی وہ گنواتے ہیں جو ایک انگریز کا بچہ برمنگھم یا مانچسٹر میں گاتا ہے۔ شاہ ایران کی حکومت تک ایران اسی طرح کی مرعوبیت کا شکار تھا۔ آیت اللہ خمینی کی حکومت نے یہ فیصلہ کیا کہ ہم اس زبان میں تعلیم دیں گے جو ایران کی ہر جگہ بولے جانے والی زبان ہے۔ فارسی وہاں صرف 45 فیصد کی مادری زبان ہے لیکن پورے ایران میں اسی زبان میں رابطہ ہوسکتا ہے۔ تو فوراً تمام نظام ہائے تعلیم کو فارسی زبان میں کردیا گیا۔ جگہ جگہ دارالترجمہ کھلے۔ ایران جو کبھی تعلیمی نقشے پر موجود نہ تھا وہاں سے اب ہر سال ایک شخص نوبل انعام کے لئے نامزد ہوتا ہے۔ ترکی کی ترقی کا راز ان کا اپنی زبان میں علم حاصل کرنا ہے حالانکہ وہاں یورپ سے الحاق کی ایک جاندار تحریک مسلسل زندہ رہی ہے۔ عموما یہ سوال کیا جاتا ہے کہ کتابیں اور علم اردو زبان میں میسر نہیں ہوتا۔ یہ گلہ بھی جدید ٹیکنالوجی نے دور کردیا ہے۔ دنیا بھر میں کتاب کہیں چھپے، سافٹ ویئر کے ذریعے ترجمہ ہوکر دنیا کی کسی بھی زبان میں دس پندرہ دن میں مارکیٹ میں آ جاتی ہے۔ دنیا کی تاریخ میں دو وقتوں میں حیران کن علمی ترقی ہوئی۔ سب سے پہلے عرب یا مسلمان جن کے دامن میں کوئی علمی خزانہ نہ تھا، سوائے ان سبعہ معلقات)سات قصیدوں( کے جو خانہ کعبہ میں لٹکائے ہوتے تھے۔ ایک جنون پیدا ہوا کہ دنیا کا ہر علم اپنی زبان میں ترجمہ کرنا ہے۔ ھارون الرشید کے زمانے میں ایک مترجم کی تنخواہ تیس ہزار دینار تھی۔ اس کے بعد کی (سات صدیاں) علم کی دنیا میں مسلمانوں کی حکمرانی کی صدیاں تھیں۔ دوسری ترقی انگریزوں نے کی۔ آج سے تین سو سال پہلے انگریزی نام کی کوئی زبان دنیا کے عالمی منظرنامے پر موجود نہ تھی۔ انگریزی میں کوئی علمی کام بھی موجود نہیں تھا۔ وہی مسلمانوں والا جنون کہ ترجمہ کرو اور آج عالم یہ ہے کہ دنیا کی کوئی کتاب اپنی زبان میں ملے نہ ملے، انگریزی میں مل جاتی ہے۔ یہ ہے انگریزی کے عروج کی کہانی۔ لیکن میں اس حقیقت کو کہاں لے جاؤں کہ آج بھی نوبل انعام حاصل کرنے والوں کی بہت بڑی اکثریت انگریزی نہیں جانتی۔ شاعر، ادیب، سائنسدان، موجد، سب کی اکثریت وہ ہے جنہوں نے اپنی زبانوں میں علم حاصل کیا اور اپنی زبان میں تحقیق یا تخلیق کی۔ یہ نظام تعلیم جہاں میرے ملک میں ایک ایسی نسل کو پروان چڑھا رہا ہے جو اپنے ماضی سے برگشتہ، اپنی روایات سے ناآشنا اور اپنے ماحول سے نفرت کرتی ہے، بلکہ المیہ یہ ہے کہ یہ نظام تعلیم ان میں ان ممالک میں بس جانے، وہاں ملازمت کرنے اور ان معاشروں میں زندگی گزارنے کی آرزو پیدا کرتا ہے۔ اس المیے کو برین ڈرین Brain drain کہتے ہیں جو گزشتہ دو دہائیوں سے ہمارے ملک میں جاری ہے۔ ہم اپنے بچوں کو پال پوس کر، تعلیم دلوا کر، ٹوکری میں رکھ کر بیٹھے ہیں کہ کوئی آئے اور ان کو خرید کر اپنے ملک کو بہتر بنائے۔ خیبر پختونخوا میں یکساں نظام تعلیم آیا تو سب انگلش میڈیم کر دیا گیا ، میں نے اعتراض کیا تو جواب ملا کہ اردو میں اس لئے ممکن نہیں تھا کہ باقی ملک میں انگلش میڈیم موجود ہے اور اردو کرنے سے خیبر پختونخوا پیچھے رہ جائے گا۔ لیکن اب تو آپ مرکز میں بھی آگئے ہو۔ اب آپ کا فیصلہ اس ملک کا مقدر بدل بھی سکتا ہے اور بگاڑ بھی سکتا ہے۔(بشکریہ 92روزنامہ لاہور)

ایمرا نیوز
تبدیلی جرات، مستقل مزاجی اور خلوص نیت مانگتی ہے کیونکہ دہائیوں کے رائج نظام، روایات اور انداز کو بدلنا آسان کام نہیں ہوتا۔ تبدیلی کی خواہش صرف اس لیڈر کو زیب دیتی ہے جو بہادر، پرعزم اور مستحکم شخصیت کا مالک ہو ورنہ ہم نے اپنی آنکھوں سے پاکستان کی تاریخ میں کئی سیاستدان اور حکمران آتے جاتے دیکھے ہیں جو تبدیلی اور انقلاب کے وعدے پر ووٹ لے کر برسراقتدار آتے رہے اور پھر روایتی حکمران بن کر جاتے رہے۔ حکمرانوں کو سیکورٹی، بین الاقوامی خطرات، عہدے کے تقاضوں وغیرہ وغیرہ سے ڈرانے والے بہت ہوتے ہیں۔ چنانچہ جو حکمران ان خطرات سے سہم جائیں وہ تبدیلی یا روایت سے انحراف کا خیال ترک کردیتے ہیں اور جو بہادری سے ان کا سامنا کرنے کی صلاحیت رکھتے ہوں وہ کچھ نہ کچھ تبدیلی لانے میں کامیاب ہو جاتے ہیں۔ عمران خان نے انتخابی مہم کے دوران عوام سے وعدہ کیا تھا کہ وہ حکومت میں سادگی اور کفایت شعاری لائیں گے، خود وزیراعظم ہائوس میں نہیں رہیں گے، غیر ضروری پروٹوکول سے اجتناب کریں گے اور شان و شوکت کے دیرینہ کلچر کو بدلیں گے۔ ان وعدوں پر ووٹ لینے اور انتخابات میں سرخرو ہونے کے بعد یہ وعدے قومی امانت بن چکے ہیں اور نئے حکمرانوں کے لئے ان پر عمل لازمی ہو چکا ہے۔ ماضی میں جن حکمرانوں نے اپنے انتخابی وعدوں سے انحراف کیا وہ امانت میں خیانت کے مرتکب ہوئے اور ان کا معاملہ تاریخ کے سپرد ہو چکا ہے۔ عمران خان کے وزیراعظم ہائوس میں رہائش رکھنے کے انکار پر بہت سے کالم لکھے جا چکے ہیں اور کچھ تجزیہ نگاروں نے ایسے ایسے دلائل دیے ہیں کہ قاری ان کی حکومتی معاملات سے عدم واقفیت کی داد دیے بغیر نہیں رہ سکتا۔ اول تو ان وعدوں پر ووٹ لینے کے بعد ان پر عمل نئے حکمرانوں پر فرض بن چکا ہے۔ دوم سمجھنے کی بات فقط اتنی سی ہے کہ لیڈر جو مثال قائم کرتا ہے اس کے اثرات ساری حکومتی مشینری پر مرتب ہوتے ہیں۔ اس وقت وزیراعظم ہائوس کا خرچہ سوا ارب روپے سالانہ سے لے کر ڈیڑھ ارب روپے تک ہے اور اس میں تقریباً ساڑھے پانچ سو ملازمین وزیراعظم کی خدمت پر مامور ہیں۔ اگر عمران خان سادگی کی مثال بن کر یہ خرچہ چند کروڑ روپے تک لانے میں کامیاب ہو جاتا ہے تو سمجھیں اس نے ایک وعدہ پورا کر دکھایا۔ حسن ظن ہمہ وقت منفی سوچ سے محفوظ رکھتا ہے۔ یہ حسن ظن رکھنے میں کیا حرج ہے کہ عمران وزیراعظم ہائوس کی شان و شوکت، مغلیہ انداز حکمرانی، فضول خرچی اور وسائل کے زیاں پر قابو پائے گا اور سادگی کی مثال قائم کرے گا۔ یاد رکھئے قیادت کے ایسے فیصلے ایک ایسی علامت ہوتے ہیں جن کی پیروی وزراء، سرکاری افسران، گورنرز اور صوبائی وزرائے اعلیٰ پر بھی ضروری ہو جاتی ہے۔ اگر نئی حکومت ایثار کر کے ایسا کلچر فروغ دینے میں کامیاب ہو جاتی ہے تو یقین رکھئے کہ اس سے اربوں روپے بچائے جاسکتے ہیں جو تعلیم اور صحت جیسے اہم شعبوں پر صرف کئے جاسکتے ہیں۔ سچی بات یہ ہے کہ ہمارے حکمرانوں کا انداز جس قدر شاہانہ رہا ہے اس کی مثال نہ امریکہ کے صدارتی طرز حکومت میں ملتی ہے نہ یورپی ممالک کی پارلیمانی جمہوریتوں میں۔ ریاست مدینہ کی پیروی تو ہمارے حکمرانوں کے بس کا روگ نہیں وہ اگر قائداعظم جیسی سادگی اور اصول پرستی ہی اپنا لیں تو تبدیلی کا خواب شرمندہ تعبیر ہو جائے گا۔ گورنر جنرل ہائوس کے خرچ پر قائداعظم کڑی نگاہ رکھتے تھے، چند روپوں کی فضول خرچی کا بھی تصور موجود نہیں تھا، بقول اصفہانی قائداعظم راتوں کو غیر ضروری بتیاں خود بجھاتے تھے، اسٹاف اتنا کم کہ آج آپ اس کا تصور بھی نہ کرسکیں۔ کابینہ کی میٹنگ میں صرف سادہ چائے پیش کی جاتی تھی جب قائداعظم کہیں جاتے تو گورنر جنرل کی سرکاری کار کے پیچھے صرف ایک کار ہوتی تھی جس میں سیکورٹی آفیسر ہوتا تھا۔ نہ کوئی ہوٹر، نہ ہٹو بچو، نہ روٹ پر پولیس کی ڈیوٹی اور نہ ہی شان و شوکت کے لئے موٹر سائیکلوں اور کاروں کا کارواں۔ شاید آج کے دور میں سیکورٹی مسائل کے سبب اتنی سادگی ممکن نہ ہو لیکن ماضی کی مانند پچاس ساٹھ کاروں کا کارواں تو ختم کیا جاسکتا ہے اور فضول خرچی کو لگام دی جاسکتی ہے۔ غیر ضروری ملکی و بین الاقوامی دورے، چارٹرڈ جہاز، مہنگے ہوٹلوں میں قیام، لمبے چوڑے وفد، حکومتی وسائل پر شاپنگ وغیرہ کو سادگی کے سانچے میں ڈھال کر خزانے پر غیر ضروری بوجھ بہت کم کیا جاسکتا ہے۔ عمران خان قائداعظم کے پاکستان کا وعدہ کرتے ہیں تو یاد رکھیں کہ قائداعظم کے پاکستان میں گورنر جنرل اور وزیراعظم ہائوس کا خرچہ اتنا کم تھا کہ انسان حیرت میں گم ہو جاتا ہے۔ کیا آپ سوچ سکتے ہیں کہ وزیراعظم ہائوس میں چینی کا ماہانہ کوٹہ مقرر تھا اور جب وہ کوٹہ ختم ہو جاتا تو وزیراعظم کے خاندان اور مہمانوں کو پھیکی چائے ملتی تھی۔ گورنر جنرل قائداعظم نے اپنی جمع پونجی ساری کی ساری وصیت کر کے قومی اداروں کو دے دی اور کچھ حصہ بہن اور بیٹی کے لئے مختص کردیا۔ وزیراعظم لیاقت علی خان نے اپنا دہلی والا قیمتی گھر حکومت پاکستان کو گفٹ کردیا اور جب ان کا انتقال ہوا تو ان کے پاس گھر تھانہ چند ہزار سے زیادہ بینک بیلنس۔ تاریخ اٹھا کے دیکھ لو کہ تاریخ کے صفحات میں کس کا ’’مکان‘‘ او رمقام بلند ہے؟ ان لیڈروں کا جنہوں نے اربوں کے اثاثے بنائے یا ان قائدین کا جنہوں نے سب کچھ قوم پر نچھاور کردیا اور حکمرانی میں ایثار اور سادگی کی مثالیں قائم کیں۔ عمران خان قائداعظم کے پاکستان کی بات کرتے ہیں تو قائداعظم کی تقاریر پڑھ لیں۔ قائداعظم کے پاکستان میں فضول خرچی، شاہانہ شان و شوکت، اقربا پروری، سفارش، میرٹ اور اصول کی خلاف ورزی، بے ایمانی اور وقت کے ضیاع ، سیاسی خرید و فروخت اور دوست نوازی کے لئے کوئی جگہ نہیں تھی۔ قائداعظم کے پاکستان کی بنیاد قانون کی حکمرانی، انسانی مساوات، سادگی و کفایت شعاری، سماجی و معاشی عدل، آزادانہ خارجہ پالیسی، غیر سیاسی ایماندار بیورو کریسی، میرٹ اور منصفانہ اصولوں پر رکھی گئی تھی۔ قائداعظم کے پاکستان میں اسٹیبلشمنٹ نامی کسی شے کا عمل دخل نہیں تھا اور انہوں نے کوئٹہ اسٹاف کالج میں خطاب کے دوران فوجی افسران کو سیاست سے دور رہنے کی تلقین کی تھی۔ اسی حوالے سے یہ لکھنا ضروری ہے کہ ہمارے حکومتی کلچر میں پابندی وقت کا اصول پامال ہو چکا ہے۔ وقت کا زیاں قومی جرم ہے لیکن بدقسمتی سے اسے پروان چڑھانے میں ہمارے قائدین نے اہم کردار سرانجام دیا ہے جو کبھی وقت کی پابندی نہیں کرتے۔ مارچ 1948ء میں قائداعظم اسٹیٹ بینک آف پاکستان کی تقریب میں وقت مقررہ پر پہنچے تو تقریب شروع ہوتے ہی دیکھا کہ اسٹیج پر ان کے ساتھ رکھی گئی وزیراعظم کی کرسی خالی پڑی ہے۔ انہوں نے وہ کرسی اٹھوا دی۔ وزیراعظم لیاقت علی تھوڑی سی تاخیر سے پہنچے تو حاضرین کے ساتھ کھڑے رہے۔ اس سے پابندی وقت کا ایسا پیغام پھیلا جس نے ساری حکومتی مشینری پر اثرات مرتب کئے۔ نیت نیک ہو، قوم کی خدمت اور ذاتی ایثار کا سچا جذبہ موجود ہو، قوت ارادی اور مستقل مزاجی کا وصف حاصل ہو تو حالات کا رخ موڑنا اور تبدیلی لانا ہرگز مشکل نہیں کیونکہ تبدیلی کو عوامی حمایت حاصل ہے اور عوامی حمایت ہی حکمران کی اصلی طاقت ہوتی ہے۔
عمران خان ریاست مدینہ نہ سہی تم ہمیں قائداعظم کا پاکستان ہی دے دو تو تاریخ تمہارا ذکر سنہرے الفاظ میں کرے گی۔(بشکریہ جنگ لاہور)

نعیم بخش تارڑ
اسسٹنٹ ڈائریکٹر لینڈ ریکارڈ تحصیل کینٹ لاہور

آج تک اس ملک پاکستان کا نظام مال بناواور دن ٹپاو کی پالیسی پر مسلسل گامزن ہے۔ انصاف کا ڈھول پیٹنے والے اور تبدیلی کا نعرہ لگانے والے بہت آئے اور اس ملک کی جٹریں پہلے سے بھی کمزور کر کے چلتے بنے۔ عام آدمی کی زندگی میں نہ انصاف آیا اورنہ کوئی تبدیلی کی امید پیدا ہوئی، کیونکہ مسنداقتدار پر بیٹھنے والوں کیلیےیہ کرپشن سے بھرپور نااہل نظام سب سے زیادہ فائدہ مند ثابت ہوا ہے۔ کمزور ادارے اور ذاتی مفاد کو سمیٹنے والے سرکاری افسران نے اس ملک کی غریب عوام کا خون نچوڑنے میں کھل کر ظلم کے اس نظام کا ساتھ دیا ہے۔ ایک اعلی حکومتی عہدادارسے یہ بات سن کر ہوش اڑگے کہ اکر اس ملک میں ہم نےایماندار اور کرپشن سے پاک افسران تعینات کردے تو یہ نظام مفلوج ہوجائے گا، پھر آپ خود سوچ لیں کہ ملک کی اس عوام کے ساتھ کیسا گھناونا کھیل خوشنماپردوں کے پیچھے کھیلا جا رہا ہے۔
اگر تو عمران خان اس نظام کو بدلنا چاہتا ہے تو 100 دن تو دور 30 دن میں اس ملک کا نظام بدلا جا سکتا ہے۔ اس کیلیے نہ تو طوفانی دوروں کی ضرورت ہے اور نہ ہی میڈیا کو دکھانے کیلیے کیسی ضلع کے سربراہ کوOSD بنانا ضروری ہے۔ اگر ہم پنجاب سے شروع کریں تو ایک نیک نیت وزیر اعلی اور 370 بااختیار ایماندار آفیسرز درکار ہیں۔ جوکہ 30 دن کے اندر پورے پنجاب کی کایا پلٹ سکتے ہیں اور عوام کا عتماد اداروں پر بحال کر سکتے ہیں۔
عمران خان صاحب اگر واقعی ظلم کا نظام بدلنا ہےتو کہ ایک ایماندار چیف سیکرٹری لگاو جو بااختیار ہو۔ وہ اپنے نیچے9 ایسے ڈویڑنلز کمشنر لگائے جنہوں نے آج تک ایک روپیہ کی کرپشن بھی نہ کی ہو اور رحم دل بھی ہوں اور 36 ضلعوں میں 36 بااختیار ایماندار ڈپٹی کمشنرز ، پنجاب کی 143 تحصیلوں میں بااختیار ایماندار اسسٹنٹ کمشنرز لگادیں جن کے دروازےپر نہ تو کوئی چوکیدار بیٹھا ہو اور نہ ہی عوام کو ان سے ملنے میں کوئی مشکل در پیش ہو۔ ڈپٹی کمشنر ضلع میں ہر ادارے کا سربراہ خود لگانے میں بااختیار ہو وہ اپنی طرح ایسے ہی محنتی اور ایماندار ضلعی سربراہ چنے تو ایک ضلع میں اوپر سے نیچے تک سارا نظام تبدیل ہوجائےگا۔
اسی طرح پولیس میں ایک بااختیار ایماندار آئی جی اگر اپنے نیچے DIG اور 36 DPOs اور 143 SDPOs ایسے منتخب کرے جنہوں نے نہ تو آج تک کرپشن کی ہو اور نہ ہی ظالم حکمرانوں کا ساتھ دیا ہو اور DPOs ہر تھانے میں ایک فرض شناش اور ایماندار SHO تعینات کرنے میں کلی طور پر بااختیار ہو تو ایسا پولیس کا نظام قائم ہو جس میں MNA اور MPA کا کردار کل طور پر ختم ہو جائےتو رزلٹ چند دن میں حیران کن ہوں گے اور مزید اگر پولیس ملازمین کے ڈیوٹی ٹایم ، ہفتہ وار چھٹی، رہائش اور سہولیات آرمی طرز پر کر دی جائیں تو نتیجہ یکسر بدل سکتا ہے۔
لیکن سوال یہ پیدا ہوتا ہے کہ کوئی واقعی ہی نظام بدلنا چاہتا ہے؟ یا اس موجودہ نظام کو جاری رکھتے ہوئے اس ملک کی غریب عوام کا استحصال جاری رکھنا چاہتا ہے۔اور اپنے ذاتی بنک بیلنس میں اضافہ کرنا چاہتا ہے۔ عمران خان صاحب اگر آپ واقعی ہی نظام بدلنا چاہتے ہیں تو ایماندار افسروں کی لسٹ بناو جو کہ Intelligence کی رپورٹ ،اس ادارے کے ملازمین اور عوام کی رائے پر مبنی ہو ، اور اگر آپ ملک کے تمام اداروں میں ایسے ایماندار بااختیار سربراہ لگانے میں کامیاب ہوگئےتو پھر بے شک آپ اسلام آباد سے نکل کر بنی گالا کی پہاڑیوں پر صبح و شام واک کرنا یا گلف کھیلنا یہ ملک ترقی کی راہ پر اتنا تیری سے دوڑے گا کہ دنیا رشک کی نگاہ سے دیکھے گی۔ اللہ پاک پاکستان کا حامی و ناصر ہو

(ایمرا نیوز)
حسن نثار کے کالے قول سے ہی آغاز کہ ’’ جس معاشرے میں محدود لوگوں کے پاس لامحدود ہووہاں لامحدود لوگوں کے پاس کچھ نہیں ہوتا ‘‘
ایجنڈوں کا قبرستان!
اس پر کیا بات کرنی کہ اگر اپوزیشن کی نظر میں 25جولائی فراڈ تو پھر چند حلقوں کی ری کائونٹنگ کیوں، جہاں جہاں کوئی چانس نظر آرہا وہاں وہاں حکومت سازی، ساجھے داریاں کیوں، اگر 25جولائی فراڈ تو شہباز شریف وزارت ِ عظمیٰ، اپوزیشن لیڈر کے امیدوار کیوں، خورشید شاہ اسپیکر شپ کیلئے کیوں لابنگ کر رہے، باقیوں کو رہنے دیں، پورا الیکشن مسترد کرکے سڑکوں پر آچکے مولانا فضل الرحمٰن اپنے بیٹے کو ڈپٹی اسپیکر کیلئے کیوں کھڑا کر رہے، کیا یہ ممکن کہ بکرے کا سر حلال، دھڑ حرام ہو، اس کا بھی کیا ذکر کرنا کہ جماعت اسلامی وزیراعظم کیلئے مسلم لیگ ن، اسپیکر کیلئے پی پی کوووٹ دے کر بھی کرپشن فری پاکستان کا مشن جاری رکھے گی، اس کا بھی کیا تذکرہ کہ بھٹو کے وارث جن کا الیکشن سلوگن ’’ بی بی کا مشن اپناناہے، پاکستان بچانا ہے‘‘ وہ اب بی بی سیکورٹی رسک ہے والوں سے اتحاد کئے بیٹھے، مطلب وہ بلاول جو انکل نواز شریف کو مودی کا یار کہا کرتے، وہ زرداری صاحب جو ’’مک گیا تیرا شو نواز، گو نواز گو نواز‘‘ کے نعرے مارا کرتے، وہ شہباز شریف جو علی بابا چالیس چوروں کے پیٹ چیرنے، سٹرکوں پر گھسیٹنے کی باتیں کیا کرتے، جو ابھی کل ہی سندھ جا کر ’’مرسوں مرسوں، کم نہ کرسوں‘‘ کہہ رہے تھے، سب ایک ہو چکے، اسے بھی رہنے دیں کہ کل عمران خان جس ایم کیو ایم کو کراچی کی تباہی، تمام خرابیوں کی ذمہ دار کہا کرتے، آج اسی ایم کیو ایم کو ساتھ ملا کر وہ کراچی بچاؤ مہم پر نکلنے والے، اسے بھی چھوڑ دیں کہ کل جو دھاندلی سے متعلق ایک بات سننے کو تیار نہ تھے، آج وہ دھاندلی دھاندلی کر رہے، یعنی پچھلے موڑ پر ڈاکے، اگلے چوک پر چور چور کہہ کر چور کے پیچھے بھاگا جارہا، یہ بھی پھر کبھی کہ کل جو کہا کرتے تھے کہ ہماری معیشت تو مضبوط، مستحکم، ہم تو ایشین ٹائیگر بننے والے، آج وہی کہہ رہے کہ اب دیکھتے ہیں کہ نئی حکومت آئی ایم ایف کے پاس جائے بنا معاشی دلدل سے کیسے نکلے گی اور یہ رونا دھونا بھی کسی اور دن کہ اسحاق ڈار، مفتاح اسماعیل ملک کو کون کون سے ٹیکے لگا گئے، ہمارا کیا کیا گروی رکھا جا چکا، آخری روز لیگی حکومت نے 200ارب نکال کر کہاں لگا دیئے اور الیکشن کمیشن نکما، نااہل یا وہ تمام نا اہل، نکمے جو سالہا سال اقتدار کے بعد ایک الیکشن کمیشن کو پاؤں پر نہ کھڑا کرپائے، یہ سب اور بہت کچھ پھر کبھی، آج بات یہ کرنی کہ خارجہ پالیسی ناکام، سب بارڈرز ایکٹو، داخلی عدم استحکام انتہا پر، تمام ادارے وینٹی لیٹر پر، 10سے 12ارب ڈالر چاہئیں ہنگامی طور پر، ملک چلانے کیلئے، قرضے، قرضوں کا سود الگ۔ایک طرف یہ بربادی، دوسری طرف عمران خان، ان کی نیت پر شک، خلوص پر شبہ نہیں، وہ کچھ کرنا چاہتے ہیں، انہیں مناسب وقت بھی ملنا چاہیے، لیکن یہ بھی سچ کہ خود تجربہ نہیں، ٹیم کمزور، پارٹی میں اختلافات، لڑائیاں الگ، آج کابینہ، وزراء اعلیٰ کے ناموں میں ہی پھنسے یا اگلے مرحلے میں اداروں کے سربراہ مقرر کرنے جیسے چیلنج کا سامنا کرنے والے عمران خان کیلئے یہ سب اتنا مشکل نہ ہوتا اگر وہ پارلیمنٹ پر ’’تین لفظ‘‘ بھیجنے کے بجائے اپوزیشن میں رہ کر شیڈو کابینہ بنا لیتے، انہیں اپنے لوگوں کی قابلیت کا پتا چل جاتا، وہ پبلک اکاؤنٹس کمیٹی کے ممبر بن کر اس کے اجلاسوں میں ہی شریک ہو جاتے تو بیوروکریسی کی ورکنگ کا پتا چل چکا ہوتا، غلط کاریاں، چور بازاریاں، دونمبریاں کیسے ہوتی ہیں، معلوم ہو چکا ہوتا، مگر وہ وقت گزرگیا، اب وقت کچھ کرنے کا، پاکستان تاریخ کے اہم موڑ پر، قوم بے مثل سحرکا شکار، شام سے پہلے 70سالہ مسائل کا حل نکالنے کی خواہش مند، کل کا یہودی ایجنٹ، طالبان خان، پاگل خان، یوٹرن خان، کسی کا مہرہ آج عوامی امیدوں کا مرکز اور کیا ہے جو نہیں ہوسکتا، دنیا کیا نہ کرچکی، اگر کینیڈا اپنے امیگریشن مسائل پر قابو پاسکتا ہے، چین، بھارت، جاپان دنیا میں سب سے زیادہ بجلی پیدا کر سکتے ہیں، انڈونیشیا دہشت گردی کا جن بوتل میں بند کر سکتا ہے، بھوٹان ماحولیات میں دنیا کا بہترین ملک بن سکتا ہے، ترکی، اردن، ملائیشیا سیاحوں کو اپنی طرف متوجہ کر سکتے ہیں، تھائی لینڈایڈز فری ہو سکتا ہے، سنگاپور کرپشن کی جڑیں کاٹ سکتا ہے، ہالینڈ صرف پھولوں سے 11بلین ڈالر سالانہ کما سکتا ہے، سری لنکا پوری دنیا کو ویٹرز، بنگلہ دیش کُک، فلپائن سینٹری ورکرز سپلائی کر سکتا ہے، اسپین پوری دنیا کو زیتون، اورنج، سرکہ فراہم کرکے معیشت کو آسمان تک لے جاسکتا ہے تو ہم کیوں کچھ نہیں کر سکتے، ہم کیوں اپنے مسائل سے چھٹکارا نہیں پاسکتے، ہم صرف چٹنی، اچار، جیم پر ہی فوکس کر لیں، کینو کی انڈسٹری کو ہی آگے بڑھا لیں، لہسن، پیاز،ہلدی کو ہی بہتر بنالیں، ملک کے 10مقامات کو ٹورازم سائٹس ڈکلیئر کر کے دنیا کو متوجہ کر لیں تو کہیں سے کہیں پہنچ جائیں، بس کپتان کی مینجمنٹ، فیصلے ٹھیک ہوں، ٹیم ساتھ دے، سب روندو سیاست کو نظر انداز کردیں، کسی فضول جھگڑے، لاحاصل بحث میں نہ پڑیں، سرجھکا کرچلتے رہیں۔
ایجنڈوں کا قبرستان!
بلاشبہ مسائل ایسے کہ اگر آج معاشی مارشل لا کی ضرورت تو کل آبی مارشل لا لگانا پڑے گا، جس ملک کو 3ڈیموں کی اشد ضرورت، اس ملک میں سالانہ 21ارب کا پانی کھیتوں کی بجائے سمندر کی نذر ہو جائے، بارشوں کا پانی الگ، زیر زمین پانی کا حال یہ کہ پہلے ہر شہری کیلئے 5سے 6ہزا ر کیوبک میٹر پانی تھا، اب ایک ہزار کیوبک میٹر رہ گیا، حکمرانیاں ایسیں کہ دیامر بھاشا ڈیم کا پہلا افتتاح کیا شوکت عزیز نے اکتوبر 2007ء میں، یوسف رضا گیلانی نے دوسرا افتتاح کر دیا اکتوبر 2011میں، نوازشریف آئے تو تیسرا سنگ بنیاد رکھ دیا، مگر جس ڈیم نے 2016میں مکمل ہونا تھا وہ 10سال، اربو ں روپے ضائع ہونے کے بعد بھی ابھی تک مکمل نہ ہو سکا، 395ارب سے لاگت پہنچ چکی 928ارب تک، بلاشبہ ڈیمز چندوں سے نہیں بنتے، مہینوں میں نہیں بنتے، یہ منصوبے کروڑوں، اربوں ڈالر کے خرچے مگر نیت صاف، ارادہ پختہ، مستقل مزاجی ہو توبات بن ہی جاتی ہے، باقی اپنے نام کی تختی لگانے، پھر بھول جانے سے ڈیم کیا ڈیمی بھی نہ بنی اور بن سکے گی۔
کپتان کو یہ بھی یاد رہے کہ پاکستان ایجنڈوں، منشوروں کا قبرستان، جو بھی آیا، ایجنڈے کے ساتھ آیا، مگر کسی کا کوئی ایجنڈا پایۂ تکمیل تک نہ پہنچا، کیوں، اس لئے کہ ایجنڈا پایۂ تکمیل تک پہنچانے کیلئے نہ لائحہ عمل تھا اور نہ ٹیم، لہذا حکمران آتے رہے، منصوبہ بندی کے بنا ملک کھودتے رہے، آج چاروں جانب گڑھے ہی گڑھے، بھٹو کا روٹی، کپڑا، مکان، ضیاء کی چادر چار دیواری کا تحفظ، افغان جہاد، بی بی، میاں کے ایجنڈے، مشرف کا 7نکاتی پروگرام، زرداری حکومت اور تیسری مرتبہ آئے میاں صاحب کے وعدے، دعوے او رعملی صورتحال، سب، سب کے سامنے، یہاں فیصلے کیسے سوچے سمجھے بنا ہوں، ایک مثال حاضر، ایکدن نجانے بیٹھے بٹھائے شوکت عزیزکو کیاسوجھی کہ اے سی سستے، گاڑیا ں لیزپر کر دیں، لوگوں نے دھڑا دھڑ گاڑیاں خریدیں، ہر کمرے میں اے سی لگا لیا، نتیجہ۔۔ پٹر ول، بجلی کا استعمال 3گنا بڑھا، حکومت نے پٹرول پریشر کم کرنے کیلئے سی این جی اسٹیشن لگادیئے، گیس سے بجلی بننے لگی، نتیجہ۔ گیس کا بھٹہ بیٹھا، چولہے بجھے، فیکٹریاں بند ہوئیں، ملک اندھیرے، بے روزگاری میں ڈوبا، اسٹریٹ کرائم بڑھا، پولیس، عدلیہ پر اضافی بوجھ آیا اور لوگ سڑکوں پر آگئے۔
ایجنڈوں کا قبرستان!
کپتان کو یہ بھی یاد رکھنا ہو گا کہ انہیں وہ پاکستان ملا جس میں ویسے تو 10کروڑ پاکستانی غربت کی لکیر سے نیچے، مگر اصل صورتحال یہ کہ 90فیصد بنیادی سہولتوں سے محروم، سندھ قبرستان، کے پی وار زون، پنجاب کے مسائل ایک طرف، نئے صوبے کا پل صراط ہی کافی، بلوچستان کا حال یہ کہ پچھلے ہفتے ایک بڑے نے بتایا کہ چند سال پہلے بلوچستان کے کچھ اضلاع میں جب جلدی بیماریاں، سینے پر بوجھ والے مریضوں کی بھرمار ہوگئی تو ہم نے کھوج لگائی، پتا چلا کہ چولہا افورڈ نہ کر سکنے اور پتھروں پر روٹیاں پکانے والے یہ بھوکے ننگے دواڑھائی ماہ سے اس کھانسی کے سیرپ میں روٹیاں ڈبوڈبوکر کھا رہے جو عالمی ادارہ صحت کی ٹیمیں انہیں وافر مقدار میں مفت دے گئی تھیں، یعنی لوگ کھانسی کے سیرپ کو سالن کی جگہ استعمال کر رہے اور مر رہے تھے، اب بلوچستان کا بجٹ، وہاں کے سرداروں کے ٹھاٹ باٹھ یا یہی دیکھ لیں کہ ایک صوبائی سیکرٹری خزانہ کے گھر سے اتنے پیسے نکلے کہ نوٹ گننے کیلئے مشینیں منگوانا پڑیں، الحمد للہ اب تو ان کی ضمانت بھی ہو چکی، کیا حال کر دیا گیا پاکستان کا، ایک طرف دبئی، انگلینڈ کے مالک، دوسری طرف کھانسی سیرپ سے روٹیاں کھاتی مخلوق، پھر سے حسن نثار کا کالا قول یا دآجائے کہ ’’جس معاشرے میں محدود لوگوں کے پاس لامحدود ہو، وہاں لامحدود لوگوں کے پاس کچھ نہیں ہوتا‘‘۔(بشکریہ جنگ لاہور)

(ایمرا نیوز)

پہلی بات یہ کہ آج کے کالم کا عنوان شاید ساحرلدھیانوی کا مصرعہ ہے، دوسری بات اگر غلط ہو تو تصیح فرمائیے کہ بچپن میں کہیں پڑھا تھا یہ لفظ دنیا، دنایت سے مشتق ہے جس کے معنی ہی ذلت و کمینگی ہیں۔شاید اسی لئے جو لوگ دنیا داری کی حدود سے تجاوز کرتے ہیں انہیں جینوئن عزت نصیب نہیں ہوتی خواہ وہ شہرت، طاقت، دولت کے نصف النہار پر ہی کیوں نہ ہوں ورنہ یہ کیسے ممکن ہے کہ بادشاہوں کے مقبرے تو ویران ہوں لیکن گوشہ نشین فقیروں کے مزاروں پر رونقیں ختم ہی نہ ہوتی ہوں۔میرا ذاتی تجربہ بہت لمبا چوڑا ہے لیکن صرف تین مثالوں پر اکتفا کروں گا۔صرف تین تجربے شیئر کرتا ہوں دنیا کے عظیم ترین فاتحین و سلاطین میں سے ایک مسلمان عالیشان سلطنت عثمانیہ کا فخر ہے لیکن استنبول میں اس کے مزار پر ہم چند دوستوں کے علاوہ کوئی نہ تھا ۔تاج محل میں ممتاز محل جیسی ملکہ عالم اور اس کا شوہر ’’شہنشاہ آفاق شاہ جہاں‘‘ آسودہ خاک ہیں اک دنیا وہاں جاتی ہے لیکن ممتاز محل اور شاہ جہاں کیلئے نہیں، تاج محل دیکھنے کیلئے ، اس لئے فاتحہ خواں خال خال۔ پیرس میں ملٹری جینئس شہنشاہ فرانس نپولین بوناپارٹ کی قبر پر بھی ہم تین چار دوستوں کے سوا اور کوئی نہ تھا حالانکہ وہاں نپولین کا فیورٹ ذاتی گھوڑا ہی سٹف کرکے نہیں رکھا گیا ،نپولین کے زیر استعمال رہنے
والا اسلحہ، یونیفارمز اور واربیڈ(WAR BED)بھی موجود ہے۔ کوئی ویرانی سی ویرانی تھی ۔دوسری طرف لاہور سے دہلی اور اجمیر شریف تک ، پاکپتن سے ملتان اور سندھ تک ’’بڑی رونقیں ہیں فقیروں کے ڈیرے‘‘ کہ دراصل فقر ہی فخر ہے۔حیرت ہے یہ کہانی ملکہ ہندوستان نور جہاں کو زندگی میں ہی سمجھ آ گئی تھی ورنہ وہ یہ کبھی نہ لکھتی’’برمزار ما غریباں نے چراغے نے گلے ‘‘دنیا کو ہیچ سمجھنے والوں کی آرام گاہوں پر نہ کبھی پھول کملاتے دیکھے نہ چراغ بجھتے دیکھے لیکن کسی فانی کو یہ کہانی سمجھ نہیں آتی ۔آج کے جہانگیروںاور نور جہانوں کی آنکھوں سے تو جیسے نور ہی روٹھ چکا، عقل بھی چل بسی ۔کوئی ’’ای سی ایل‘‘ پر، کسی کے ریڈوارنٹ، کچھ انٹرپول کے آگے آگے، یہاں نیب وہاں ایف آئی اے تو یہ سب تجاوزات کا نتیجہ ہے۔ضرورتیں بہت محدود، ہوس زر لامحدود اور حدود سے گزرجانا ہی تو تجاوزات جس کی پاناما سے پارک لین تک کوئی حد نہیں۔برطانیہ کے مقبول ترین اخبار ’’ڈیلی ٹیلیگراف ‘‘ نے انکشاف کیا ہے کہ ملکوں ملکوں شہروں شہروں آصف زرداری کی کھربوں کی جائیدادیں ہیں، پنجاب کے ’’شر‘‘ داری کے بارے میں پہلے بہت کچھ منظر عام پر آچکا تو بندہ سوچتا ہے کہ اتنی دولت کے ساتھ تھوڑی سی جینوئن عزت بھی کمالیتے کہ دولت کی تو ہرگز نہیں ،عزت کی سو فیصد ضمانت ہے کہ اگلی نسلوں کے کام آئے گی، منتقل بھی ہو جائےگی۔لیکن سوال یہ ہے کہ’’ضرورت‘‘ کو کون کیسے DEFINEکرے گا؟ تو کسی خوبصورت شاعر کا جواب حاضر ہے ؎دل میں اب تک جل رہی ہیں آرزو کی دو لوئیںایک وہ اچھی سی لڑکی، ایک وہ چھوٹا سا گھرباقی جتنا پھیلاتے جائو، یہ دنیا سکندر، چنگیز خان اور تیمور کی تلواروں سے بہت لمبی اور ڈھالوں سے بہت چوڑی ہے جو نہ کبھی کسی کی ہوئی نہ ہو گی ورنہ آج بھی فرعون حکمران ہوتے اور بل گیٹس قارون کا منشی ۔کہا، دنیا ایک پل ہے اور پلوں پر گھر نہیں بنتےیہ عشرت کدہ نہیں، ماتم کدہ ہےدنیا اندھوں کے ہاتھی جیسی ہےدنیا اک خس پوش کنواں ہےمال اور جمال کو بے وفائی میں کمال حاصل ہےخواب میں خواب دیکھنے کی مانند ہےدنیا مگرمچھوں سے بھرا دریا، کنارے تک قیام رکھویہاں ایسے رہو جیسے انڈے میں پرندہدنیا بہتا پانی جس میں عکس جتنی مہلت بھی نہیںدنیا ایک ٹرانزٹ …انجام سفر نامعلومبستر مرگ پر دو سو سال کی زندگی بھی ایک ساعت کا 7واں حصہ ضعیف العمر بوڑھا،بینائی سے محروم رعشہ سے کانپ رہا تھا،کسی صالح جوان نے سہارادے کر منزل تک پہنچایا تو بوڑھے نے اسے درازی عمر کی دعا دی تو اس نوجوان نے کہا ’’بابا جی ! میں نے ایسا کیا برا کیا کہ آپ مجھے درازی عمر کی بددعا دے رہے ہیں ‘‘’’یہ دنیا اگر مل بھی جائے تو کیا ہے ؟‘‘(بشکریہ جنگ لاہور)

(ایمرا نیوز)
تاریخ کے پاس سنہرے اوراق بھی ہوتے ہیں اور کچرا کنڈیاں بھی۔ تاریخ سے بہتر کچرا شناس کوئی نہیںہے۔
میں شکر گزار ہوں اپنے کرم فرما قارئین کا جنہوں نے فون۔ ایس ایم ایس اور واٹس ایپ کے ذریعے ترقی کے راستے میں رُکاوٹ پارلیمانی نظام پر اظہار خیال کیا۔ تاریخ گواہ ہے کہ جتنے بڑے ڈیم بنے۔ صدارتی طرز حکومت کے دَور میں بنے۔1973کا متفقہ طور پر منظور شدہ آئین بھی صدارتی دَور میں ہی وجود میں آیا۔ اس پر بات پھر کبھی کریں گے ابھی تو ہمیں پارلیمانی نظام کو ہی مضبوط کرنا ہے۔ کیونکہ عوام نے ووٹ اسی کو دئیے ہیں ۔ ہمیںابتدا سے یہ دعا بھی کرنی ہے کہ پارلیمانی نظام کی مجبوریوں کے باعث اس وقت جو غیر فطری ٹیم بن رہی ہے ۔ اللہ تعالیٰ نیک نیتوں کو بد نیتوں کے شر سے محفوظ رکھے۔ یہ دعائیں ملک بھر کی مسجدوں۔ خانقاہوں۔ گرجا گھروں۔ یونیورسٹیوں۔ کالجوں۔ دینی مدارس۔ کچے گھروں میں کی جارہی ہیں۔تبدیلی تو غریب۔ متوسط طبقہ ہی چاہتا ہے۔ یہ اس کی اشد ضرورت ہے۔ یہ ایم این اے۔ ایم پی اے۔ سینیٹر تو نہیں چاہیں گے۔ نہ ہی ہارنے والے جاگیردار۔ زمیندار۔ سردار۔ کیونکہ تبدیلی آئے گی تو ان کی جائیدادیں چھنیں گی۔ ان کی گاڑیاں ضبط ہوں گی۔ بہت سی مراعات اور منقولہ غیر منقولہ جائیدادیں رکھنے والے اکٹھے ہورہے ہیں۔ ان سب کو خبر ہے کہ یہ آسائشیں ان کی حلال کی کمائی کی نہیں ہیں۔
جیتنے والوں نے اپنا مرکزی نشانہ کرپشن کو بنایا تھا۔ ووٹ کرپشن کے خاتمے اور احتساب کے عزم کو ملا ہے۔ اب تیزی سے اس ہدف کو حاصل کرنا ہوگا،لیکن اس کے ساتھ ساتھ اب قوم میں جذباتی سوچ کی بجائے اقتصادی طرز فکر پیدا کرنا ہوگی۔ ملکی آمدنی میں ان کا بھی حصّہ ہو۔ بے کار بحث مباحثوں میں زندگی کے قیمتی لمحات کے زیاں کی بجائے ایک ایک لمحہ کسی عملی کام میں صرف کریں۔ ایسی اسکیمیں بنائی جائیں کہ وہ لوگ بھی جنہوں نے آپ کو ووٹ نہیں دیئے یہ سوچنے پر مجبور ہوجائیں کہ ان کا فیصلہ غلط تھا۔
’’جمعرات 2اگست کے کالم میں ہم نے گزارش کی تھی کہ ہفتے میں وزیر اعظم ’آن لائن‘ بھی آئیں غریب پاکستانیوں سے فون پر باتیں کریں۔ سوالات کے جوابات دیں۔ بزرگوں۔ مائوں بہنوں بھائیوں کی دعائیں لیں۔‘‘
عمران خان صاحب کی طرف سے یہ اعلان سامنے آیا ہے کہ وہ ہفتے میں ایک روز پاکستانیوں کے سوالات کے جوابات دیا کریں گے۔ میں یہ دعویٰ تو نہیں کرتا کہ میرے کالم سے انہیں یہ حوصلہ ملا ہے کیونکہ ایسی کوئی خوش فہمی نہیں ہے کہ لیڈروں نے اخبارات پڑھنے شروع کردئیے ہیں۔ بہرحال یہ ایک اچھا اقدام ہوگا۔
سابق گورنر سندھ۔ کئی کتابوں کے مصنّف بیرسٹر کمال اظفر کو مریم نواز کی بے جا سزا پر تشویش ہے۔ وہ ایک بیان بھی دے چکے ہیں کہ مریم کے پاس کوئی سرکاری عہدہ نہیں تھا۔ اس لئے وہ نیب کے دائرہ احتساب میں آتی ہی نہیں ہیں۔ انہوں نے سپریم کورٹ کے کچھ گزشتہ فیصلوں سے نظیریں بھی دیں۔ اس ہفتے ان کے ہاں ایک مختصر سی نشست رہی۔ بہت کچھ سیکھنے کو ملا۔ کئی بار وزیر اعلیٰ سندھ رہنے والے تجربہ کار جہاں دیدہ سیاستدان سید قائم علی شاہ بھی تھے۔ اپنے دیرینہ ساتھی صدیق ابو بھائی کے ہمراہ۔جمشید مارکر آنجہانی کے بھائی ایم کے مارکر۔ یہ بزرگ پارسی عالمی افواج کی تاریخ کے ماہر ہیں۔ماہر معاشیات قیصر بنگالی بھی۔ ان کی یہ تشخیص مجھے بہت پسند آئی کہ اس دَور میں جاگیردار۔ صنعت کار۔ سرمایہ دار بہت پیچھے رہ گئے ہیں۔ ٹھیکیدار آگے نکل گئے ہیں۔ میزبان سمیت سب مہمان خواہش ظاہر کررہے تھے کہ نومنتخب حکومت کو کام کا موقع ملنا چاہئے۔ پی ٹی آئی ایک وفاقی سیاسی جماعت بن کر اُبھری ہے۔ یہ خوش آئند ہے۔ قیصر بنگالی کا کہنا تھا کہ پی آئی اے۔اسٹیل مل وغیرہ کی صرف انتظامیہ پرائیویٹ کمپنیوں کو دی جائے لیکن اثاثے ریاست کے پاس ہی رہنے چاہئیں۔ اس طرح ان کا کہنا تھا کہ ہمارے پاس پانی کم ہورہا ہے۔ اس لئے ایسی فصلوں سے گریز کیا جائے جو پانی زیادہ مانگتی ہیں۔ جیسے گنا۔ اور چاول۔ شوگر ملز کو وہ سیاسی صنعت Political Industry کہتے ہیں۔ ہم زیتون کی فصلیں کاشت کریں۔ پانی بھی کم لگے گا اور اس کی ایکسپورٹ بھی بہت ہے۔ کمال اظفر بھی معیشت سے کافی شغف رکھتے ہیں۔ ایشین ڈراما کے مصنّف مرڈال کے ساتھ کام کرنے کا شرف حاصل رہا ہے۔ انہوں نے پنجاب کے ایک گائوں جلپانہ ضلع سرگودھا میں اپنے ایک کلاس فیلو شاہنواز خان کے ہمراہ کچھ بزرگوں سے ملاقات کی کہانی سنائی۔ جن سے انہوں نے پوچھا کہ بھٹو شہید نے آپ کے لئے کونسا بڑا کام کیاجو آپ کی زندگی میں بنیادی تبدیلی لایا۔سفید گھنی داڑھی والے ایک صاحب بصیرت نے کہا کہ روایت یہ تھی کہ جو کچھ کچی مٹی سے بنا ہوا ہے وہ مزارع کا ہوتا تھا۔ اور پختہ اینٹوں سے تعمیر شدہ ۔ وہ جاگیردار کا۔ مزارع اپنے گھر پکے نہیں بناسکتے تھے۔ بھٹو نے اپنی اصلاحات کے ذریعے صدیوں پرانے امتیازی قانون کو ختم کیا۔ سینکڑوں برسوں بعد اب مزارع بھی پکے مکانوں میں رہتے ہیں۔ سید قائم علی شاہ نے پی پی پی کا ہر دَور دیکھا ہے۔ وہ بھی اس حق میں تھے کہ معیشت کی بہتری کو اولیں ترجیح ملنی چاہئے۔ بلاول بھٹو زرداری کی قیادت پی پی پی کو نئے اقتصادی۔ سماجی نظریات کی طرف لے جانے میں کامیاب ہوجائے گی۔
ایسی نشستیں پاکستان کا درد بانٹنے میں بہت معاون رہتی ہیں میں تو گھر آکر ضروری جملے محفوظ بھی کرلیتا ہوں۔
اب جب نئی حکومت کی عملی آزمائش میں چند دن رہ گئے ہیں تو ہمیں نہ صرف اس سے ہمدردی ظاہر کرنی چاہئے بلکہ اس کے ہاتھ بھی مضبوط کرنے چاہئیں۔مجھے یہاں جمعیت علمائے اسلام کے مولانا غلام غوث ہزاروی یاد آتے ہیں جب لوگ کہتے تھے ہمیں ایوب خان کے ہاتھ مضبوط کرنے چاہئیں تو مولانا فرماتے تھے کہ بھائی اس کے پائوں بھی تو مضبوط کرو۔ یہ مرحلہ بہت نازک ہے۔ گزشتہ دس سال جمہوریت کا شور تو بہت رہا ہے۔ لیکن عملاً سرکار غیر فعال تھی۔ بلدیاتی ادارے جو ریاست کے اعضائے رئیسہ میں سے ہیں۔ وہ بے اختیار تھے۔ زیادہ تر محکمے کام نہیں کرتے تھے۔ فرد واحد کے فرامین پر عملدرآمد ہوتا تھا۔ شہروں میں کچرا۔ پینے کے پانی میں مسلسل کمی۔ گندے پانی کا نکاس نہیں ہورہا تھا۔ قوم فرقوں میں تقسیم ہوگئی تھی۔ کلیدی عہدوں پر منظور نظر افراد تھے۔ چپراسی سے لے کر سیکریٹری تک کی تقرری معاوضے کے بعد ہوتی تھی۔ کتنے ہی قابل لوگ ناکارہ کردئیے گئے ۔کتنے اپنی صلاحیتیں ملک کے مفاد میں استعمال کرنے کی بجائے دوسرے ملکوں میں جانے پر مجبور کردیے گئے۔ بہت سے قابل ذہن ایک طرف ہوکر بیٹھ گئے۔ جو غلام بننا برداشت کرسکتے تھے ۔اپنی خود داری گھر چھوڑ کر آسکتے تھے۔ انہوں نے جاہلوں کے سامنے سر تسلیم خم کرلیا۔ اس دس سال کا ورثہ قابل فخر نہیں ہے۔نئی حکومت کو وہ قرضے تو ادا کرنے ہی ہیں جو دوسرے ملکوں سے مختلف حکومتوں نے لئے لیکن آپ کو ان شہیدوں کا قرض بھی ادا کرنا ہے جو مختلف تحریکوں میں آمریت۔ ظالموں۔ جاگیرداروں۔ سرداروں۔ شہری مافیائوں کے خلاف جدو جہد کرتے ہوئے تاریک راہوں میں مارے گئے۔ کچھ غیرت کے نام پر قتل کردئیے گئے۔ لیکن یہ قرض کیسے اُترے گا۔ بہت سے ظالم تو گنتی پوری کرنے کے لئے حکومت کے دست و بازو بن گئے ہیں۔(بشکریہ جنگ لاہور)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)

(ایمرا نیوز)
وزیر اعظم ہندوستان
امید کرتا ہوں کہ آپ خیریت سے ہونگے اس خط میں آپ کے لئے محترم، صاحب کے الفاظ کا استعمال اور آپ کی خیریت معلوم کرنا صحافتی، ثقافتی اور سفارتی مجبوریوں کے علاوہ اور کچھ نہیں ہے ورنہ ان تینوں الفاظ کے لئے آپ انتہائی غیر موزوں شخصیت ہیں، آپ نے بھارت کو اکھنڈ بھارت میں تبدیل کرکے رکھ دیا ہے جہاں اب ہندوئوں کے علاوہ کسی اور مذہب سے تعلق رکھنے والوں کے لئے کوئی جگہ نہیں ہے، آپ کے ملک میں مسلمانوں کے گائے رکھنے، فروخت کرنے اور ذبح کرنے جیسے جھوٹے الزامات لگا کر سر عام قتل کردیا جاتا ہے، سکھوں کے ساتھ زیادتی کا عمل بڑھتا جارہا ہے، کشمیر میں آگ لگا کر آپ کی حکومت وہاں اپنے ہاتھ خون سے رنگ رہی ہے۔ آپ نے کشمیری شہریوں کے ساتھ مذاکرات کے نام پر جو قتل وغارت گری مچائی ہے پوری دنیا اس سے واقف ہے جبکہ مظلوم کشمیری عوام کی عالمی قوانین کے تحت جدوجہد آزادی کی پاکستان کی جانب سے حمایت کا بدلہ آپ نے پاکستانی طالبان نامی دہشت گرد گروپ تیار کرکے اور ان سے پاکستان میں دہشت گردی کروا کر خوب لیا لیکن اس سے آپ کا دل نہیں بھرا تو پھر آپ نے بلوچستان میں کلبھوشن جیسے اپنے ایجنٹوں کے ذریعے دہشت گردی کروا کر اور نام نہاد علیحدگی پسند تحریک چلا کر پاکستان کو نقصان پہنچانے کی سازش کی لیکن دوسری جانب آپ نے منہ پر رام رام اور سر پر ٹوپی سجا کر دنیا کو اپنا اصلی چہرہ ظاہر نہیں ہونے دیا ۔ لیکن پاک فوج اور پاکستان کی قومی سلامتی کے اداروں نے آپ کی یہ دونوں چالیں ناکام بناکر آپ کو پوری دنیا میں رسوا کرکے رکھ دیا ہے۔ پاکستان میںعمران خان کی قیادت میں نئی حکومت قائم ہوئی تو ایک بار پھر آپ نے عمران خان کو فون کرکے الیکشن میں ان کی کامیابی پر مبارکباد پیش کی لیکن اس کے ساتھ اگلے ہی دن پاکستان میں دیامر کے علاقے میں دہشت گردی کا ایک سلسلہ شروع کروادیا گیا، بچیوں کے اسکول جلائے گئے، سینئر جج کی گاڑی پر فائرنگ کی گئی جبکہ قومی اداروں کے خلاف نعرے لگوائے گئے، یہ سب ایک منصوبہ بندی کے تحت کیا گیا تاکہ دیامر میں ہونے والی ترقی کو روکا جاسکے، لیکن اب پاکستانی قوم جان چکی ہے کہ اس دہشت گردی کے پیچھے کس کا ہاتھ ہے اور کیوں ہے، سب جانتے ہیں کہ صرف چند ہفتے قبل چیف جسٹس آف پاکستان جناب ثاقب نثار نے پاکستان کے انتہائی اہم مسئلے یعنی ڈیموں کی تعمیر کے لئے قوم میں اتفاق رائے پیدا کیا اور فوری طور پر دیا مر بھاشا ڈیم کی تعمیر کا اعلان کیا جبکہ اس مسئلے پر فنڈ جمع کرنے کے لئے خصوصی اکائونٹ بھی قائم کیا اور پھر نہ صرف پاکستان بلکہ دنیا بھر میں مقیم پاکستانیوں کی جانب سے اس ڈیم کی تعمیر کے لئے بھاری فنڈز کی فراہمی بھی شروع ہوگئی جو کہ آپ کے یعنی بھارت کے ایجنڈے کے برخلاف تھی لہٰذا فوری طور پر ایک طرف تو عمران خان کو فون کرکے دنیا کو اپنا جمہوریت پسند چہرہ دکھایا جبکہ دوسری جانب دیامر میں اپنے زرخرید ایجنٹوں کے ذریعے دہشت گردی کا ارتکاب شروع کرادیا گیا۔ تاہم پاکستان کے قانون نافذ کرنے والے اداروں نے نہ صرف اس سازش کو ناکام بنایا بلکہ مجرموں کو کیفر کردار تک بھی پہنچا دیا ہے، نریندر مودی صاحب آپ سے بھارت میں مسلمانوں کی حالت زار پر بھی سوال پوچھنے کی جسارت کرنا چاہتا ہوں، آپ کی حکومت کیوں بھارت میں مسلمانوں کی آبادی کو حقیقت سے کم بتانے کی کوشش کرتی ہے؟ دنیا جانتی ہے اور آپ کا اپنا میڈیا بھارت میں مسلمانوں کی آبادی تیس سے پینتیس کروڑ بتاتا ہے لیکن کیوں آپ کی مردم شماری میں مسلمانوں کو صرف پندرہ کروڑ دکھایا جاتا ہے کیا یہ وجہ تو نہیں ہے کہ مسلمانوں کی آبادی کو اگر حقیقی طور پر بتادیا گیا تو پھر آپ کو ان کے حقوق بھی دینے پڑیں گے، آپ ہمیں یہ بھی بتادیں اگر بھارت میں ایک مسلمان گائے کی خریدوفروخت کرے تو اس کی سزا سرعام موت ہے لیکن بھارت دنیا کے ان ممالک میں شامل ہے جو سب سے زیادہ گائے کا چمڑا برآمد کرتے ہیں۔ تو کیا آپ کو معلوم ہے کہ بھارت میں گائے کا چمڑہ حاصل کرنے کے لئے گائیں کہاں ذبح کی جاتی ہیں؟ اور ان ہندو کاروباری شخصیات کے لئے آپ کے قانون میں کیا سزا ہے جو تھوڑے سے نفع کے لئے آپ کی گائو ماتا کو ذبح کرکے ان کی کھالیں دنیا کو بیچ دیتے ہیں؟ جناب نریندر مودی صاحب کیا آپ ہمیں یہ بتا سکتے ہیں آپ کی وزارت اعلیٰ کے زمانے میں گجرات میں ہونے والے مسلم کش فسادات میں ہزاروں بے قصور مسلمانوں کو قتل کیا گیا، پوری دنیا نے آپ کو قاتل ٹھہرایا، آپ کے امریکہ میں داخلے پر پابندی بھی عائد کی گئی لیکن آج تک آپ بھارت کی کسی عدالت میں پیش نہیں ہوئے ان مظلوم مسلمانوں کو انصاف کون دے گا؟ نریندر مودی صاحب آپ کی ہندو انتہاپسند جماعت نے ایودھیا میں قائم صدیوں پرانی بابری مسجد کو ایک جھوٹے الزام جو کہ مسجد کو گرانے کے لئے ہی گھڑا گیا تھا تاکہ مسلمانوں کی اس نشانی کو شہید کیا جاسکے اور بالآخر آپ کی قیادت میں اس مسجد کو شہیدکردیا گیا، نریندر مودی صاحب آپ سے مسلمانوں کی عظیم نشانی علی گڑھ مسلم یونیورسٹی کے حوالے سے بھی سوال ہے کہ اس عظیم یونیورسٹی کو ایک خاص منصوبہ بندی کے تحت نشانہ بنایا جارہا ہے اس یونیورسٹی کے لئے فنڈز جاری نہیں کئے جاتے ،اس جامعہ میں ہندو اساتذہ کو بھرتی کیا جارہا ہے جبکہ مسلمان اساتذہ کی حوصلہ شکنی کی جارہی ہے جبکہ یہاں داخلے کے متمنی مسلمان طلباوطالبات کی حوصلہ شکنی کی جاتی ہے اور ہندو طالب علموں کو بڑی تعداد میں داخلہ دیا جاتا ہے جس کے بعد مسلمانوں میں وہاں بھی تیزی سے احساس محرومی پیدا ہورہا ہے اور آئے دن وہاں مسلمان طلبہ اور اساتذہ بھی احتجاج کرتے نظر آتے ہیں جن کی کوئی سنوائی نہیں ہے، نریندر مودی صاحب آپ کی اطلاع کے لئے عرض ہے کہ مسلمان کو ئی ہندو برادری کی نچلی ذات کی قوم نہیں جنہیں ذلت کے ساتھ زندگی گزارنے کی عادت ہوتی ہے بلکہ مسلمان وہ قوم ہے جس نے ایک ہزار سال ہندوستان پر حکومت کی ہے جمہوریت کی طاقت سے مستقبل میں بھی مسلمان بھارت پر حکمرانی کرسکتے ہیں اور یہی ڈر و خوف آپ اور آپ جیسے انتہا پسندوں پر سوار ہے جس نے آپ جیسوں کو مسلمانوں پر ظلم و بربریت پر مجبور کررکھا ہے جس کی تازہ مثال کشمیر میں دیکھی جاسکتی ہے جہاں آپ کی حکومت اسرائیل کی طرز پر ہندو بستیاں آباد کرنے کی منصوبہ بندی کررہی ہے تاکہ کشمیر میں ہندو ئوں کی اکثریت ثابت کی جاسکے اور مسلمانوں کو اقلیت میں تبدیل کیا جاسکے اور مستقبل میں کبھی بھی اقوام متحدہ کی جانب سے ہونے والی رائے شماری میں مسلمانوں کو کامیاب ہونے سے روکا جاسکے، نریندر مودی صاحب آپ کی حکومت کی اور سازش بھی منظر عام پر آچکی ہے جس میں آپ نے دنیا کے اہم ممالک میں ناکام و نامراد ہمارے ہی ہم وطنوں کو خرید کر پاکستان مخالف پروپیگنڈا کرانے کے لئے استعمال کیا ہے لیکن آپ اس میں بھی ناکام ہونگے ، تو جناب نریندر مودی آپ کی یہ تمام سازشیں پاکستان کا عام شہری بھی جانتا ہے لہٰذا ایسی چالوں سے گریز کریں اور خطے کے دو ارب افراد کی حالت زار پر رحم کریں اور پاکستان کی نئی حکومت کے ساتھ مل کر خطے کے لوگوں کی ترقی کے لئے کام کریں اور یاد رکھیں کشمیر کے مسئلے پر پاکستان کی کوئی حکومت آپ کے ساتھ کسی طرح کا سمجھوتہ کرنے سے قاصر ہے۔ شکریہ۔(بشکریہ 92نیوز)

(ایمرا نیوز)
بھائی جان نئے پاکستان میں خوش آمدید، آج آپ کیسا محسوس کررہے ہیں نئے پاکستان میں؟ جی اچھا محسوس ہو رہا ہے! بھائی جان آپ سے کچھ عرض کرنا چاہتا ہوں، جی بولئے! جیسا کہ آپ جانتے ہیں کہ ووٹ کی طاقت سے نیا پاکستان بن چکا ہے اور اب ہمیں اسے سنوارنے کے لئے آپ کی مدد کی بھی ضرورت ہے۔ آپ نے کس پارٹی کو ووٹ دیا یہ وقت اب گزر چکا۔ اب صرف متحد ہو کر نئے پاکستا ن کو دنیا کا پر امن اور ترقی یافتہ کرپشن فری ملک بنانا ہے۔ جی ضرور جناب!کیوں نہیں۔ آپ حکم کریں۔ جناب حکم نہیں صرف التجا ہے کہ اب آپ ڈرائیونگ کرتے سیٹ بیلٹ ضرور باندھ لیجئے سڑکوں پر صفائی کا خاص خیال رکھیں، گھر کا کچرا ، گندگی دوسروں کے دروازے کے سامنے مت پھینکئے۔ گلی، محلے ، پبلک مقامات پر پان کی پچکاری اور تھوکئے مت، دیوار کی طرف منہ کرکے جو آپ سر عام اپنی طبیعت کھڑے کھڑے ہلکی کرتے رہے ہیں پلیز اب ایسی حرکت مت کیجئے۔ آپ کی اس حرکت سے شہر میں بدبو پھیلتی ہے۔ ماضی میں فرمائی جانے والی یہ حرکت تو اب بالکل نہ فرمائیے۔ وال چاکنگ کے ذریعے قوم کا علاج اور رگوں میں اندھیرے اتارنے والے نام نہاد نیم حکیموں کی حوصلہ شکنی کرنے میں ہماری مدد فرمائیے۔ بھائی جان آپ سے یہ بھی التماس ہے کہ نئے پاکستان میں آپ کے اردگرد جو ننگ دھڑنگ بچے جھونپڑیوں، کوٹھڑیوں ، ورکشاپوں،سڑکوں، فٹ پاتھوں پر اپنے روشن مستقبل سے ناآشنا بھاگے دوڑے پھررہے ہیں ان کے والدین کو قائل کیجئے کہ اب ایسا نہیں چلے گا۔ وہ اپنا اور پیارے پاکستان کا مستقبل روشن کرنے میں ہمارا ساتھ دیں اوراپنے بچوں کو سکول ضرور بھیجیں ۔ ہاں جناب! ایک اور ضروری کام ہے جو ہمیں نئے پاکستان میں کرنا ہے کہ کسی غریب، محتاج، بیمار کی مدد کے لئے حکومت سے توقع رکھنے سے پہلے اپنی حیثیت میں جو ممکن ہو کر گزریں، جناب عالی! نیا پاکستان تو ہم نے اپنے ووٹ کی طاقت سے بنا دیا ہے اب ہمیں اس کی تعمیر و ترقی میں آپ کے کردار اور اخلاص کی اشد ضرورت ہے۔ لوگوں کو حق سچ بولنے پر مائل کیجئے، خود بھی گمراہ ہونے سے بچئے، دوسروں کو بھی بچائیے، انتہا پسندی جیسے جذبات اب ہماری منزل نہیں، یہ ایک بے تکلف انصافی دوست کی الیکشن نتائج آنے کے بعدٹیلی فون کال تھی جو بظاہرطنزو مزاح کے پیرائے میں ہی سنی جاسکتی تھی مگر میرے اس انصافی دوست کا لہجہ بڑا پر عزم تھا جس نے مجھے حیرت اور خوشی کے دونوں جذبات سے آشنا کیا۔ میں نے اپنے انصافی دوست سے کہا کہ جناب نے تو اپنے جذبات کا بڑے اچھے انداز میں اظہار کردیا ، اگر اجازت ہو تو کچھ میں بھی عرض کرتا چلوں، یہ جو لولی لنگڑی جمہوریت، کراچی کی کچرا کنڈی، بند سکولوں کے کمروں اور لاہور کے گندے نالے میں جگہ جگہ ’’بچے‘‘ دے رہی ہے اور آئے دن یہ ’’بچے جمہورے‘‘ پاکستان کے کونے کھدروں سے نکل کر بار بار ہمارا منہ چڑا رہے ہیں اور بڑے بڑے سیاسی کاریگر بھی اس جمہوری گھن چکر سے چکرا گئے ہیں اور ببانگ دہل کہہ رہے ہیں کہ یہ کیسا ’’جمہوری جنم‘‘ ہے کہ ہر ایک حیران و پریشان ہے حتیٰ کے نئے پاکستان کے لیڈر ہمارے بڑے خان صاحب کی حالت بھی ایسی ہے کہ ناجائے رفتن نہ پائے ماندن، مرتا کیا نہ کرتا۔ جان کی امان پائوں تو عرض کروں اب یہ کرپشن نام کی جس بلا کو ختم کرنے کے نعرے پر کپتان کو چند تحفظات کے ساتھ کامیابی ملی ہے تو اس کرپشن کا خاتمہ کیسے کرو گے انصافیو؟ تو وہ بولا جناب سب سے پہلے تو اپنے گھر سے صفائی شروع کریں پھر کرپٹ نظام کو ٹھیک کرنے کے لئے متحد ہو کر عملی اقدام کریں تو یقینا یہ کرپٹ نظام جڑ سے ہی ختم ہو جائے گا۔ انصافی دوست نے کہا یہ جو میں نے آپ سے کہا ہے آپ اس پر عمل کیجئے۔ یہ کوئی کپتان نہیں صرف آپ اور میں ہی کرسکتے ہیں، اکیلا کپتان کچھ نہیں، جب ہم اپنے اردگرد کا ماحول صاف ستھرا کرلیں گے تو پھر کرپشن جیسی گندگی کو صاف کرنا بھی آسان ہو جائے گا۔ میں نے کہا ٹھیک، تمہاری بات سے اتفاق، مگر میرا سوال یہ ہے کہ خان صاحب نے جن لوٹوں کی شکل میں اپنے گرد’’کرپشن فری‘‘ حصار قائم کرلیا ہے وہ اسے کامیاب ہونے دیں گے؟ پھر اس میں نیب کی پیشیاں بھگتنے والے انصافی لیڈروں کی نئے پاکستان میں کہاں گنجائش ہوگی؟ انصافی دوست کا جواب سنیئے، جناب آپ دیکھیں گے کپتان ایسے کسی شخص کو اپنے قریب پھٹکنے نہیں دے گا۔ میں نے کہا اللہ کرے مگر جب کپتان انہیں اپنے قریب پھٹکنے نہیں دے گا تو پھر کپتان کہاں ہوگا؟ جواب ندارد ، خاموشی، پھر میں نے کہا تم نے کبھی تصویریں بولتی دیکھی ہیں یا چہرہ شناسی سے مستقبل کی تصویر کشی کی ہے؟ تو بولا نہیں جناب میں یہ صلاحیت نہیں رکھتا تو پھر غور سے سنو اور دیکھو وہ ویڈیو جس میں اڑن کھٹولے (لودھراں ایکسپریس) پر پرستان سے ’’گلفام‘‘ ڈھونڈ ڈھونڈ کر بنی گالا کو ’’کوہ قاف‘‘ بنانے کی کوشش کرنے والے جہانگیر ترین جو سپریم کورٹ سے تو تاحیات مستند شدہ نااہل ہو چکے مگر ابھی بھی اپنی اہلیت ثابت کرنے پر تلے نظر آرہے ہیں اور جب وہ میڈیا گفتگو کے دوران شاہ محمود قریشی اور یار محمد رند کے درمیان سینڈوچ بنے کھڑے تھے توانہیں منہ بنا کر پیچھے ہٹتے اور شاہ محمود قریشی کو مستقبل کے ارادوں، منصوبوں میں گم سم گہری سوچ میں مبتلا ’’ڈب کھڑبا‘‘ منہ بنائے کھڑے نہیں دیکھا اور کیا تم نے نہیں دیکھا کہ جب جہانگیر ترین نے بلوچستان کی وزارت اعلیٰ کے لئے جام کمال کا نام لیا تو یار محمد رند کیسے وہاں سے کھسک کر چلتے بنے۔ بلوچستان ہائوس اسلام آباد میں مکین سردار اختر مینگل کا اپنے جائز مطالبات کے حق میں ڈٹ جانا اور فواد چودھری کایہ کہنا کے ان کے تمام مطالبات جائز ہیں مگر سردار صاحب کا بنی گالا جانے سے انکار کیا نئے پاکستان کی حقیقی تصویر کشی نہیں کر رہا۔ یہی نوعیت ایم کیو ایم سے تعلقات کی ہے۔ ماضی کے دشمن اقتدار کی خاطر کیسے یک جان دو قالب ہوتے ہیںکوئی خان صاحب سے پوچھے۔ ایم کیو ایم کے نو نکات خان صاحب کے سر پر ہر وقت لٹکتی تلوار ثابت ہوں گے اور کہیں راستے میں ایم کیو ایم والے تمہارے خان کو صاف’’نو‘‘ ہی نہ کہہ دیں، میں نے انصافی دوست سے کہا آخر تمہارا خان کس کس کی پوری کرے گا، پرویز خٹک کو وزیراعلیٰ خیبرپختونخوا نہ بنایاتو نیا عذاب، پنجاب کی وزارت اعلیٰ کا اونٹ کس کروٹ بیٹھے گا ، علیم خان کا مستقبل کیا ہوگا؟اور یہ جو اڑن کھٹولے پر ’’اشٹام فروشوں والی جمہوریت‘‘ لائی جارہی ہے بہت جلد اس کا بٹوارہ ہوگا اور ایک دن آئے گا تمہارا خان زچ ہو جائے گا۔ مجھے بھی نیا پاکستان چاہئے مگر میں بلیک میلروں کے گٹھ جوڑ سے اپنا پراناپاکستان محفوظ کرلوں تو یہی کافی ہے۔ اپنے انصافی دوست کے جذبے کو دیکھتا ہوں توایک سچ یہ بھی کہے دیتا ہوں کہ یہ قوم آج جس جذبے کے ساتھ نئے پاکستان کی بنیادیں پختہ کرنا چاہتی ہے اسے ماند نہ پڑنے دیجئے۔ یہی وہ جذبہ ہے جو پرانے پاکستان کو نئے پاکستان سے جوڑ سکتا ہے جو اس جذبے کو حقیقت کا روپ دے گیا وہی سکندر۔(بشکریہ 92نیوز)
(کالم نگار کے نام کیساتھ ایس ایم ایس اور واٹس ایپ رائےدیں00923004647998)