Category کالم

تحریر: مرزا اشتیاق بیگ
تحریک انصاف کے چیئرمین عمران خان چارٹرڈ طیارے میںعمرے کی ادائیگی کے بعد وطن واپس پہنچ چکے ہیں تاہم اُن کے دو روزہ عمرے کو پاکستان کی تاریخ کا مہنگا ترین عمرہ قرار دیا جارہا ہے جسے الیکٹرونک، پرنٹ اور سوشل میڈیا پر بھی مسلسل تنقید کا نشانہ بنایا گیا جس کا سبب اُن کے قریبی دوست زلفی بخاری تھے جن کا نام بلیک لسٹ میں شامل ہونے کے باعث امیگریشن حکام نے اُنہیں عمران خان کے ساتھ عمرے پر جانے سے روک دیا تھا لیکن عمران خان کئی گھنٹے تک نورخان ایئربیس پر زلفی بخاری کو ساتھ لے جانے پر اصرار کرتے رہے۔ ہونا تو یہ چاہئے تھا کہ عمران خان قانون پر عملدرآمد کرتے ہوئے زلفی بخاری کو اپنے ساتھ نہ لے جاتے مگر انہوں نے ایسا کرنا اپنی توہین سمجھا اور اعلیٰ حکام سے رابطہ کرکے اپنے دوست کا نام ایگزٹ کنٹرول لسٹ سے نکالنے کا مطالبہ کیا جس کے بعد وزارت داخلہ کی جانب سے فوری طور پر نوٹیفکیشن جاری کیا گیا اور زلفی بخاری کو عمران خان کے ساتھ عمرے پر جانے کی اجازت دے دی گئی جس سے عوام میں یہ تاثر ابھرا کہ عمران خان ابھی ملک کے وزیراعظم نہیں بنے مگر انہوں نے ابھی سے فون پر احکامات جاری کرنے شروع کردیئے ہیں۔ بعد ازاں واقعہ کی خبریں میڈیا پر ’’بریکنگ نیوز‘‘ کے طور پر آنے کے بعد نگراں وزیراعظم ناصر الملک نے فوری نوٹس لیتے ہوئے

زلفی بخاری کا نام بلیک لسٹ سے نکالے جانے پر وزارت داخلہ سے رپورٹ طلب کی۔ واضح ہو کہ زلفی بخاری پاکستان میں نیب اور قانون نافذ کرنے والے اداروں کو تحقیقات کے سلسلے میں مطلوب ہیں۔ زلفی بخاری پر آف شور کمپنی رکھنے کا الزام ہے جو پانامہ لیکس میں منظرعام پر آئی تھی جس کے بعد نیب کی درخواست پر زلفی بخاری کا نام بلیک لسٹ میں ڈال کر اُن کے خلاف تحقیقات کا فیصلہ کیا گیا۔ اس سلسلے میں نیب، زلفی بخاری کو کئی نوٹسز جاری کرچکا ہے مگر وہ کبھی نیب کے سامنے پیش نہیں ہوئے۔ یہ بات قابل ذکر ہے کہ عام طور پر اگر کسی شخص کا نام ایگزٹ کنٹرول لسٹ (ECL) یا بلیک لسٹ سے نکالنا مطلوب ہوتا ہے تو وضع کردہ قوانین کے مطابق اس کیلئے عدالت سے اجازت درکار ہوتی ہے۔
گوکہ زلفی بخاری تحریک انصاف میں کوئی عہدہ نہیں رکھتے مگر ماضی قریب میں ان کا نام اکثر و بیشتر مختلف حوالوں سے سامنے آتا رہا ہے، چاہے عمران خان کی دوسری اہلیہ ریحام خان کو طلاق دلانے کے معاملات ہوں یا موجودہ اہلیہ بشریٰ بی بی سے نکاح کا معاملہ ہو، زلفی بخاری ہر جگہ پیش پیش رہتے ہیں جبکہ ریحام خان نے اپنی حالیہ کتاب میں بھی زلفی بخاری پر سنگین نوعیت کے الزامات لگائے ہیں۔ عمران خان پر تنقید کی بڑی وجہ اُن کا چارٹرڈ طیارے میں عمرے کیلئے سعودی عرب جانا تھا۔ یہ طیارہ پہلے اسلام آباد سے لاہور گیا جہاں سے عمران خان کے اہل خانہ کو لے کر اسلام آباد واپس آیا اور پھر عمران خان فیملی کے ہمراہ عمرے کی ادائیگی کے بعد چارٹرڈ طیارے میں ہی وطن واپس آئے۔ اس طرح عمران خان کے دو روزہ عمرے پر چارٹرڈ طیارے کی مد میں کروڑوں روپے کے اخراجات آئے جو انہوں نے خود ادا نہیں کئے جس پر سابق وزیر دفاع خواجہ آصف نے اُنہیں تنقید کا نشانہ بناتے ہوئے طنزیہ کہا کہ ’’عمران خان، عمرہ تو اپنی جیب سے کرلیتے۔‘‘ پی ٹی آئی رہنما فیصل واوڈا کے مطابق عمران خان کے عمرے کیلئے استعمال ہونے والا چیلنجر 604 نامی 10 نشستی چارٹرڈ طیارہ انتخابی مہم کیلئے چارٹرڈ کیا گیا تھا جس کا کرایہ 8 لاکھ روپے فی گھنٹہ ہے اور یہ طیارہ پی ٹی آئی رہنما علیم خان کی ملکیت ہے۔
مذکورہ بالا ان وجوہات اور ان پر ہونے والی تنقید کی بنا پر سعودی سرزمین پر قدم رکھنے سے پہلے ہی عمران خان کا یہ دورہ متنازع ہوچکا تھا تاہم عمرے کی ادائیگی کیلئے جب عمران خان مدینہ منورہ پہنچے تو جہاز کی سیڑھیوں سے جوتوں کے بغیر اترنے کی تصاویر اور ویڈیوز نے ہر شخص کو حیرت زدہ کردیا۔ عمران خان کے اس انداز پر میڈیا اور سوشل میڈیا پر مختلف تبصرے کئے گئے اور یہ خیال بھی ظاہر کیا گیا کہ عمران خان نے یہ سب کچھ اپنی بیوی کے مشورے پر کیا جنہوں نے عمران خان کو مشورہ دیا تھا کہ اگر وہ مدینہ کی سرزمین پر ننگے پیر اتریں گے تو وزیراعظم بننے کی اُن کی منتیں اور دعائیں قبول ہوں گی۔‘‘
عمران خان کے عمرے کی خاص بات اُن کا مکہ مکرمہ میں اُس عمارت میں قیام تھا جہاں شاہی خاندان کے سرکاری مہمانوں کو ٹھہرایا جاتا ہے جبکہ عمرے کیلئے عمران خان پروٹوکول کے ساتھ الیکٹرک کار میں مسجد الحرام آئے اور سعی کے دوران بھی پروٹوکول اُن کے ہمراہ تھا جس کی تصاویر اور ویڈیوز پی ٹی آئی کا سوشل میڈیا سیل انٹرنیٹ پر وائرل کرتا رہا۔ قابل ذکر بات یہ ہے کہ عمران خان جو اپنی تقریروں میں وی آئی پی کلچر کے خلاف اور کفایت شعاری کے حق میں پرچار کرتے رہتے ہیں، وہ چاہتے تو شیڈول فلائٹ سے سفر کرکے عمرے کی ادائیگی کا فریضہ انجام دے کر کروڑوں روپے بچاسکتے تھے مگر شاید وہ مہنگے ترین چارٹرڈ طیارے میں عمرے کی ادائیگی اور شاہی مہمان کی حیثیت سے پروٹوکول لے کر پاکستان میں یہ تاثر دینا چاہتے تھے کہ وہ Inwaiting وزیراعظم ہیں، اب نواز شریف فیورٹ نہیں رہے بلکہ نواز شریف کی جگہ انہوں نے لے لی ہے اور آئندہ وزیراعظم بننے کیلئے اُنہیں شاہی خاندان کی مکمل اشیرباد حاصل ہے۔ ایسی اطلاعات ہیں کہ سعودی عرب میں قیام کے دوران عمران خان نے شاہی خاندان کی شخصیات سے ملنے کی سر توڑ کوششیں کیں مگر تمام تر کوششوں کے باوجود وہ سعودی شاہی خاندان کی کسی اہم شخصیت سے ملنے میں ناکام رہے۔ عمران خان کو یہ نہیں بھولنا چاہئے کہ وہ گزشتہ 5 برسوں میں سادگی، وی آئی پی اور سفارشی کلچر پر جو بیانیہ دیتے آئے ہیں اور مخالفین کی شاہانہ زندگی اور امارت کو تنقید کا نشانہ بناتے رہے ہیں تو آج اُنہیں بھی پرآسائش چارٹرڈ طیارے میں عمرہ کرنے کا کوئی حق نہیں پہنچتا تھا کیونکہ وہ اپنے بیانیے پر قوم کو جوابدہ ہیں اور قوم اُن سے اُن کے بیانیے کا جواب مانگ رہی ہے۔
بشکریہ: جنگ نیوز

تحریر: یاسر پیر زادہ
بہت مرتبہ سوچا کہ میں بھی اوروں کی طرح اِس عید پر مبارک باد کا ایک پیغام لوگوں کو بھیج دوں مگر پھر لکھ کر کاٹ دیا۔ چند برس پہلے جب طالبان کے خونی دور میں عید آئی تو میں نے اپنے محترم استاد کو ایسا ہی ایک بنا بنایا پیغام بھیجا کہ آپ کو خوشیوں بھری عید مبارک ہو، انہوں نے جواب دیا بیٹا جب اپنے وطن میں روز دھماکے ہو رہے ہوں، ماؤں کے کڑیل جوان بیٹوں کی لاشیں گھر آ رہی ہوں، بیٹیوں کے سہاگ اجڑ رہے ہوں اور ہمارے فوجی اور سپاہی جنگ میں شہید کئے جا رہے ہوں تو پھر ایسے میں کیسی عید اور کون سی عید۔ بالکل درست بات کہی تھی انہوں نے۔ خدا کا شکر ہے وہ دور ختم ہوا، اب پچھلے دو چار برسوں سے ہم نارمل عید مناتے ہیں، کہیں سے کوئی دھماکے کی خبر نہیں آتی، کسی مسجد میں نماز پڑھتے ہوئے خوف محسوس نہیں ہوتا اور کسی بازار میں خریداری کرتے ہوئے یہ دھڑکا نہیں لگا رہتا کہ کچھ ہو نہ جائے۔ لیکن شاید ہم بدقسمت لوگ ہیں، خوشی ہمیں راس نہیں آتی۔ دہشت گردی تو دھیرے دھیرے کم ہوئی مگر اب اِس معاشرے میں ایسی نفرت سرایت کر چکی ہے کہ خوف آتا ہے۔ سوچتا ہوں کن لوگوں میں جی رہے ہیں ہم۔ اٹھارہ سال کی لڑکی جو ایک بس سروس میں بطور میزبان ملازمت کرتی تھی اسے ایک سیکورٹی گارڈ محض اس لئے قتل کر دیتا ہے کہ وہ اُس سے شادی سے انکار کرتی ہے، ایک لمحے میں

وہ خبیث اُس لڑکی کو گولی مار دیتا ہے اور وہ غریب وہیں تڑپ تڑپ کر جان دے دیتی ہے۔ کہاں کی عید اور کیسی عید۔ میں نے جب اُس لڑکی کے قتل کی ویڈیو دیکھی تو سر سے پیر تک لرز گیا، دوسری مرتبہ وہ کلپ دیکھنے کی مجھے ہمت نہیں ہوئی۔ ایک سیکورٹی گارڈ فیصل آباد کے ایک بس ٹرمینل میں ڈیوٹی ختم ہونے کے بعد لڑکی کو روکتا ہے، دونوں میں چند لمحوں کے لئے تکرار ہوتی ہے، زبردستی وہ لڑکی کا ہاتھ پکڑنے کی کوشش کرتا ہے، لڑکی اپنا ہاتھ چھڑواتی ہے، جواب میں گارڈ اپنی بندوق سے اس پر فائر کرتا ہے، لڑکی گر جاتی ہے، چند ثانیوں کے لئے بے بسی سے تڑپتی ہے اور پھر وہیں سیڑھیوں پر مر جاتی ہے۔ لوگ آ جا رہے ہیں، زندگی رواں دواں ہے، ہم عید منا چکے ہیں، گارڈ گرفتار ہو چکا ہے، اخبارات میں خبر لگ چکی ہے، سوشل میڈیا پر قتل کا کلپ وائرل ہو چکا ہے اور ہم سب اپنے اپنے موبائل فون پر وہ کلپ دیکھ کر افسوس کا اظہار بھی کرچکے ہیں لیکن کیا فائدہ! اٹھارہ سال کی وہ لڑکی جو اپنے گھر کی واحد کفیل تھی، ایک بھرے پُرے بس ٹرمینل پر ایک چیونٹی کی طرح مسل دی گئی، قصور اُس کا صرف اتنا تھا کہ وہ اپنے گھر سے باہر نوکری کرنے نکلی تھی، مجبور ی یہ تھی کہ اُس کے پاس اور کوئی آپشن نہیں تھا، وہ کسی ایسے گھرانے میں پیدا نہیں ہوئی تھی جہاں اُس کا باپ اسے شہزادیوں کی طرح پالتا، اپنی بچی کے پلک جھپکنے سے پہلے اُس کی ہر خواہش پوری کرتا، اسے اعلیٰ کالج میں داخل کرواتا، امرا کی طرح شادی کی شاپنگ کے لئے لامحدود رقم کا کریڈٹ کارڈ اپنی بیٹی کے پرس میں ڈال دیتا یا پھر جہیز میں اسے پلاٹ اور گاڑی دیتا۔ بدقسمتی سے اِس بچی کو ایسا باپ نہیں ملا تھا جو اس کے لئے یہ سب کچھ کر پاتا۔ وہ اُن لاکھوں کروڑوں بچیوں میں سے ایک تھی جو اِس سفاک معاشرے میں روز جیتی روز مرتی ہیں۔ وہ اُن میں سے تھی جنہیں کبھی یہ پتہ ہی نہیں چل سکتا کہ باپ کا لاڈ کیا ہوتا ہے۔ نہ جانے کن مصیبتوں سے اُس نے پندرہ بیس ہزار کی یہ نوکری لی ہوگی، اُس کا خیال ہوگا کہ ایسی جگہوں پر سیکورٹی گارڈ تحفظ کے ضامن ہوتے ہیں، اس بیچاری کو کیا معلوم کہ سیکورٹی گارڈ کا کام اب سیکورٹی نہیں رہا، مرتے وقت وہ یہی سوچتی ہوگی کہ اِس گارڈ کا کام تو میری حفاظت کرنا تھا مگراسی نے مجھے گولی مار دی!
ایسی خبروں کی تکلیف کم کرنے کے لئے ہم ایسے سہل پسند دانشوروں کے پاس دو نسخے ہیں۔ پہلا، فوراً گوگل کرکے بھارت کے اعداد و شمار کھنگالیں اور معلوم کریں وہاں ایسے کتنے قتل ہوتے ہیں اور پھر اُن سے اپنا موازنہ کرکے اطمینان کا سانس لیں، اس سے بھی بات نہ بنے تو مغرب میں جا گھسیں اور اُن کی خرابیاں گنوانی شروع کردیں اور لوگوں کو بتائیں کہ امریکہ میں ایسے کتنے قتل ہوتے ہیں، یورپ میں کتنی کم سن بچیوں کے ریپ ہوتے ہیں اور برطانیہ میں راہ چلتے ایسی کتنی وارداتیں ہوتی ہیں، ہمیں اپنے مطلب کے نمبر مل جائیں گے اور ہم سکون کا سانس لیں گے کہ پاکستان ابھی ان سب سے بہتر ہے۔ اس طریقے سے کام نہ چلے تو دوسرا نسخہ تو بالکل ہی آسان ہے، سفاک ہو جائیں، ایسی خبروں کو نظر انداز کر دیں زندگی سکون میں آ جائے گی۔ ہم میں سے جو لوگ کبوتر کی طرح آنکھیں بند رکھنا چاہتے ہیں وہ بے شک یہ نسخے آزمائیں، مگر درندوں کے اس معاشرے میں یہ نسخے زیادہ دیر تک کارگر نہیں رہیں گے۔ نفرت اور زہر کے جو بیج ہم نے اپنی سوسائٹی میں بو دیئے ہیں اس کے مزید ثمرات ابھی ہم نے سمیٹنے ہیں۔ ہم اس معاشرے میں زندہ ہیں جہاں ملک کی بہترین جامعہ سے فارغ التحصیل ہونے والا نوجوان اپنی ماں کی عمر کے برابر خاتون کے بارے میں، جسے چند گھنٹوں کے لئے اغوا کیا گیا تھا، ٹویٹ کرتا ہے کہ اس عورت کے لئے جنسی تشدد ہی بہترین علاج ہے۔ ہم اس معاشرے میں جی رہے ہیں جہاں سوشل میڈیا پر ایک مخصوص طبقے کے پڑھے لکھے جیالے ایک بوڑھی بیمار ماں کی بیماری کا مذاق اڑاتے ہیں، سفاکانہ طعنے دیتے ہیں اور پھبتیاں کستے ہیں۔ ہم کہتے تھے ہمارا کلچر بہت خوبصورت ہے۔ سیاسی مخالفت جتنی بھی ہو، ہم ماؤں بہنوں کی تکریم میں فرق نہیں آنے دیتے کہ مائیں بہنیں تو سب کی سانجھی ہوتی ہیں۔ ہم نے سنا تھا کسی سیاسی مخالف کے گھر اگر دشمن خاندان کی عورت جا کر اسے بھائی کہہ دیتی تو اُس ’’بہن‘‘ کی بات ٹالنا ممکن نہ رہتا۔ کہاں گیا وہ کلچر اور کہاں گئیں وہ روایات۔ اس قدر نفرت اس قدر زہر ہم میں کہاں سے آ گیا؟؟؟ ہمارے ایک صحافی دوست نے عید کے روز اپنی بچیوں کی تصویر ٹویٹ کی تو نیچے ایک خاتون نے تبصرہ کیا کہ’’ اپنے بچوں کی تصاویر یہاں شیئر نہ کریں، لوگ سفاک ہیں، وہ آپ کا مذاق اڑائیں گے خاص طور سے اگر انہیں آپ کا نظریہ اُن کی پسندیدہ پارٹی کے حوالے سے پسند نہ آیا، اتنی پیاری بچیوں کو ان جانوروں کی نظروں سے دور رکھیں۔‘‘ بالکل درست کہا ان خاتون نے۔ یہ کہاں آ گئے ہیں ہم، یہ کیا ہو گیا ہے ہمیں، یہ کون سی درندگی ہم میں چھپی ہوئی تھی جو اب سوشل میڈیا پر باہر آ گئی ہے؟؟؟
یہ زہر، یہ نفرت، یہ درندگی شاید ہم میں پہلے بھی تھی مگر اتنی ،جتنی کسی بھی انسانی معاشرے میں ہو سکتی ہے، البتہ گزشتہ سات آٹھ برسوں میں اسے ایک مخصوص انداز میں پروان چڑھایا گیا ہے، ذاتی تعلقات اور دوستیاں اب بے معنی ہو چکی ہیں، شرم، دید، لحاظ اب پرانی بات ہوئی، اپنے مفادات کے تحفظ کے لئے ہم کسی بھی حد تک جا سکتے ہیں، یہاں کسی کو اس بات کی پروا نہیں کہ نفرت اور زہر کے جو بیج وہ بو رہا ہے اس کی زد میں ایک دن وہ خود بھی آئے گا۔ جو لوگ اس کا حل تعلیم میں تجویز کرتے ہیں ان سے درخواست ہے کہ نفرت سے بھرے سوشل میڈیا اکاؤنٹس کے پیچھے ایک نظر ڈالیں تو معلوم ہوگا کہ یہ وہ لوگ ہیں جو اعلیٰ تعلیم یافتہ ہیں اور غیرملکی جامعات کی ڈگریوں سے لدے پھندے ہیں، کسی کی ڈی پی پر آپ کو دین سے محبت کا اظہار ملے گا تو کوئی خود کو Proud Pakistaniکہہ رہا ہوگا۔اِن میں اور اُس اَن پڑھ سیکورٹی گارڈ میں کوئی فرق نہیں۔
بشکریہ: جنگ نیوز

رمضان المبارک کا آخری عشرہ چل رہا ہے ، رمضان المبارک کا مقدس مہینہ تیزی سے پلک جھپکتے 24روز گزرچکا ہے زندہ دلان شہر بھی اب خالی ہونا شروع ہوگیا دیگر اضلاع سے آنےوالے سرکاری ملازمین افسران وشہری اپنے گھروں کو واپس جانے کی تیاریوں میں لگے ہوئے ہیں۔رمضان المبارک کے مہینے میں شیطان کو تو باندھ دیا جاتا ہے مگر اس کے بہکاوئے میں آنےوالے آزاد ہوتے ہیں۔ محکمہ ریونیو سمیت پنجاب لینڈ ریکارڈ اتھارٹی میں بھی عیدی مہم زور شورسے جاری ہے۔ عوام الناس کی کھال اور بال دونوں کھینچے جارہے ہیں۔ صوبائی دارالحکومت سمیت صوبے بھر کی سینکڑوں تحصیلوں میں اندھا دھند بنیادوں پر اراضی ریکارڈ سنٹرز پر تعینات کالی بھیڑیں رشوت وصولی اکٹھی کرنے میں مصروف عمل ہیں اور ایمانداری سے کام کرنے والے ملازمین خاموشی سے چپ سادھے یہ تماشا دیکھ رہے ہیں کیونکہ ان کے سامنے جو یہ کام کررہے ہیں وہ کوئی اور نہیں ان کے کولیک ہیں۔ پنجاب لینڈ ریکارڈ اتھارٹی میں سابق ڈی جی پی ایل آر کی معطلی نے جیسے پی ایل آر اے انتظامیہ میں جان ہی ختم کردی ہوں۔ ڈری سہمی انتظامیہ وجود میں آئی ہے۔ جس کے پاس تمام شکایات تسلسل سے آرہی ہیں مگر وہ کچھ نہیں کرپارہی۔ پی ایل آر اے کے ایس او پی اور بورڈ آف ریونیو کے رولز کی بجائے کرپٹ اہلکار اپنے تخلیق کردہ قانون ضابطہ کے تحت کام کررہے ہیں۔ صوبے بھرکے اراضی ریکارڈ سنٹر میں ایک چیز نمایاں طور پر دیکھی ہے کہ جو کام آج کے دن ہوسکتے ہیں اس کو جان بوجھ کر کل اور پھر پرسوں پر ڈالا جارہا ہے۔ منٹوں، گھنٹوں والا کام ہرگز نہ ہے کسی بھی انتقال وراثت کا آپ جائزہ لیں تو معلوم ہوجائے گا کہ خواری کی سب سے بڑی پریکٹس کس کو کہتے ہیں مرنے والا تو بچارا مرجاتا ہے مگر اراضی ریکارڈ سنٹر کے اتنے چکر لگوائے جاتے ہیں کہ وارثان بھی مرنے والے ہوجاتے ہیں بھائی عیدی جو اکٹھی کرنی ہے ۔ اراضی ریکارڈ سنٹر سٹاف کی نگرانی کےلئے پنجاب لینڈ ریکارڈ اتھارٹی میں کتنے ہی فورم بنائے گی ہیں مگر سب کی کارکردگی اپنی پرکشش تنخواہوں کی وصولی کے علاوہ کچھ نہیں ہے یعنی کے صفر بٹا صفر ہے۔ ایک اور بات مانیٹرنگ کرکون رہا ہے جتنے بھی آفیسرز کو اراضی ریکارڈ سنٹر کی مانیٹرنگ پرلگایا گیا ہے وہ فرد بدر کا صحیح معنوں میں تعین نہیں کرسکتے کہ فرد بدر کس بنیاد پر بنائی جانی ہے، لہٰذا میری درخواست ہے پنجاب لینڈ ریکارڈ اتھارٹی کی انتظامیہ سے کہ خدارا اپنا مذاق مت اڑائیں یہ کام ڈائریکٹر آپریشنل کی ذمہ داری ہے اورباقاعدہ ایک ایسی ٹیم ہو جس میں ایک اے ڈی ایل آر، ایک ایل آر او ،ایک سروس سنٹرانچارج اور پٹوار کورس پر عبورحاصل کرنے والا شخص پرمشتمل افراد اس ٹیم کا حصہ ہوجوکہ آن میرٹ کسی بھی دوستی ناطے کو بالائے طاق رکھتے ہوئے انسکپشن کریں اور اراضی ریکارڈ سنٹر میں تعینات سٹاف کا فیصلہ درست کیا جاسکے۔ باقی آپ چاہے1لاکھ بندے بھرتی کرلیں زبانی اورکاغذی کارروائیوں سے آگے کچھ نہیں کرسکتے ہیں ممبر ٹیکسز پنجاب کے چند سٹیمپ انسپکٹرز کو دیکھ لیں پورے پنجاب میں کیسے کام کررہے ہیں موازنہ ہوجائے گا۔ بورڈ آف ریونیو انتظامیہ کو بھی ہوش آچکا ہے کہ ہمارے ساتھ کیا ہاتھ کیا گیا تھا اورکیسے بورڈ آف ریونیو جیسے ٹائی ٹینک ادارے کو لاوارث اوراختیارات سے عاری کردیا گیا مگر موجودہ سینئر ممبر اور انتظامیہ نے بگڑے ہوئے معاملات کو سدھارنے کی ٹھان لی ہے۔ خبر ہے کہ اے ڈی ایل آر کی ٹرانسفر پوسٹنگ دوبارہ ڈائریکٹر لینڈ ریکارڈ کے پاس آنے کی اطلاعات ہیں وہ تمام تراختیارات جوکہ بورڈ آف ریونیو کے پاس ہونے چاہیے تھے وہ شاید دوبارہ واپس آجائیں کیونکہ اب بورڈ آف ریونیو کی انتظامیہ بھی متحرک ہوچکی ہے ۔پی ایل آر اے میں چھٹے بورڈ آف اجلاس ایجنڈا کی حالت تو آپ دیکھ ہی چکے ہیں اگر ہم سابقہ پانچ اجلاس ایجنڈا میٹنگ کا اس کےساتھ موازنہ کریں تو یہ سب سے کمزورایجنڈا میٹنگ تھی جس کو سرے سے ہی رد کردیا گیا۔ خبر ہے کہ ایل او ایس آرگنائزشن میں بھرتی ہونے والی علی سعید اصغر خود کو لاہور ڈویلپمنٹ اتھارٹی کا ملازم ظاہر کررہا ہے اور پنجاب لینڈ ریکارڈ اتھارٹی نے آرگنائزیشن کے بھرتی کردہ پرائیویٹ افراد کو بطور ایڈیشنل ڈائریکٹر ایڈمن لگارکھا ہے جوکہ خلاف قانون اور انتہائی سنگین غلطی میں شمار ہوتا ہے تنخواہوں کی مد میں اب تک لاکھوں رپوے کی وصولی واپس کی ذمہ داری بھی موجودہ ڈی جی پی ایل آر اے پر آجائےگی۔ اس حوالے سے مزید انفارمیشن انتظامیہ کو مل جائےگی۔ خاتون ایل آر او رضیہ ملک کو اسسٹنٹ ڈائریکٹر کوآرڈینیشن کے اضافی عہدے کے تحت پرکشش تنخواہ ،وسیع تر اختیارات اور گاڑی دئیے جانے کی اطلاعات بھی موصول ہوئی ہیں۔۔ فیلڈ میں کام نہ کرنے کی وجوہات زبان زدعام ہیں کہ ہم کہیں گئے تو شکایت ہوگی ریونیو ایکسپرٹ کی کمی کے باعث جہاں انتظامیہ کو شدید مشکلات کا سامنا ہے وہاں لینڈ ریونیو ایکٹ کو نہ سمجھنے والوں کی کثیر تعداد اراضی ریکارڈ سنٹر پر تعینات ہوکر عوام الناس کو بھی خوار کررہی ہے اور اپنے آپ کوبھی الجھائے بیٹھی ہے جاوید بھٹی جیسے ناتجربہ کار اور پٹوار کی نصاب سے ناواقف شخص کو جہاں لینڈ ریونیو ایکسپرٹ کا لقب دے کر پرکشش سیلری سے سالا سال سے نوازا جارہا ہے ،وہاں انتظامیہ پر ماتم کرنے کو ہی دل کرتا ہے ۔ ریونیو ریکارڈ کی درستگی،قوانین ضوابط کے مطابق رپورٹ کرنے اور مسئلے کو صحیح معنوں میں سلجھانے میں بھی صاحب قاصر نظر آتے ہیں۔ اس طرح کے جنازے اٹھانے سے انتظامیہ کو پرہیزکرنا ہوگا بصورت دیگر ایسے بندوں کو کنٹریکٹ پر رکھنے والو ںکے خلاف بھی تحقیقات عمل میں لائی جاسکتی ہے سنٹروں میں اندھا دھند عیدی اکٹھی کی جارہی ہے جس کو رشوت کم اور عیدی زیادہ کہا جارہا ہے اس فارموے کو سلام اور عید سے قبل تمام دوستوں کو میری جانب سے عید مبارک۔

تحریر: ارشاد بھٹی
دل جلانے، خون کے آنسو رلانے والے ’’ٹوٹے‘‘ پھر سے حاضرِ خدمت، پہلے بات وکی لیکس، ڈان لیکس، پاناما لیکس کے بعد ہو چکیں ریحام لیکس کی، سوا تین سو دنوں کی ازدواجی زندگی ،600صفحات کی کتاب ،کمال ہو گیا، کتاب کے پیچھے کون، انتخابات کے قریب ہی کیوں سامنے آئی، فائدہ کس کو، یہ سب بھی سامنے آ جائیگا، اب ڈھکی چھپی باتوں کا دور گزر گیا، لیکن بقول سینئر صحافی جاوید چوہدری، جو عورت شاہ رخ خان کے ساتھ چند سیکنڈ کے اشتہار کیلئے لاکھوں پاپڑ بیل جائے، جو لندن سے پاکستان آئے تو منزل عمران خان یا شہباز شریف، جو نفسیاتی مرض ’’بائی پولر‘‘ کی مریضہ، جو مقابلے باز ایسی کہ عمران خان کے کتے کے مقابلے میں لندن سے اپنا کتا لے آئے، جو چوری چھپے عمران خان کے موبائل کی تلاشیاں لیتی ملے (اس پر غصے میں آکر عمران خان کئی بار اپنا موبائل دیوار پر مار کر توڑ چکے)، جو بنا پوچھے پارٹی میٹنگز میں بیٹھ جائے، بات بات پر پارٹی خواتین کو بے عزت کر دے، زبردستی جلسوں، جلوسوں میں پہنچ جائے، کے پی وزراء کو ڈائریکٹ احکامات دینا شروع کر دے، جو عثمان ڈار کی جیب سے ٹویٹر کے ایک ملین فالورز خرید لے، جو فیصل واڈا سے فلم کیلئے پیسے مانگ لے، جو جاتے جاتے عمران خان کا بلیک بیری چوری کر کے لے جائے، جو بار بار وعدہ کرے کہ ازدواجی زندگی پر کبھی کچھ

نہیں بولوں گی اور ہر بار وعدہ توڑ دے، جسے اپنی عزت کا خیال نہ سابقہ خاوند کا احترام، اس خاتون یا اس کی کتاب پر کیا بات کرنی، ہاں یہ ضرور کہنا کہ یہ کیسی عورت جس نے عورت ہو کر (وسیم اکرم کی بیوی) فوت ہو چکی عورت کو بھی نہ بخشا۔
156کمپنیوں میں سرکاری پیسے کا شاہانہ استعمال تو سب کے سامنے، چہیتے افسروں سے دامادِ اعلیٰ تک نوازشات کا بھی سب کو ہی پتا، لہٰذا بات کرتے ہیں شہباز شریف اور چیف جسٹس کے مکالمے کے اُس لمحے کی جب خادم ِ اعلیٰ نے 4سو کروڑ خرچ کر کے ایک بوند صاف پانی نہ پہنچا سکنے پر فرمایا ’’میں بھی انسان، اپنی کمی کوتاہی تسلیم کرتا ہوں‘‘ سجان اللہ۔ چھوٹے میاں صاحب کی ایک کمی، کوتاہی قوم کو پڑی 4ارب کی، کوئی مہذب ملک یا معاشرہ ہوتا تو اس کمی کوتاہی کے بعد وہ ہوتا کہ اگلے سو سال تک کسی کو ایسی کمی کوتاہی کی ہمت نہ ہوتی مگر یہ پاکستان، حوصلہ رکھیں، یہاں ایسی کمیاں کوتاہیاں آگے بھی ہوں گی۔ خواجہ آصف نااہل سے اہل ہو چکے اور یار لوگ خوشی کے شادیانے بجا رہے کہ خواجہ آصف نے تو اہل ہونا ہی تھا کیونکہ اُنہوں نے اپنا اقامہ، نوکری اور کمائی سب کچھ ڈیکلیئر کر رکھا تھا مطلب یہ تو جرم ہی نہیں کہ پاکستان کا وزیرخارجہ یو اے ای کی الیکٹرو مکینیکل کمپنی میں بحیثیت ’’ہنرمند مزدور‘‘ یوں کل وقتی ملازم کہ چھ دن کام کرنا، سال میں مہینہ چھٹی اور ایک بونس، سبحان اللہ۔
دوست رؤف کلاسرا کی تحقیق کہ گزشتہ سال پنجاب حکومت نے اپنے مقررہ بجٹ سے ایک ارب 36کروڑ اضافی خرچے اور وہ بھی یوں کہ شہباز شریف جو کبھی پیپلز پارٹی کو مخاطب کر کے کہا کرتے تھے کہ تم نے عوامی اور سرکاری پیسے سے ہیلی کاپٹر خرید لئے، مجھ پر۔ میں موٹر سائیکل، سائیکل پر سفر کر لوں گا، مگر ہیلی کاپٹر نہیں خریدوں گا، مگر نہ صرف ہیلی کاپٹر خریدا بلکہ ایک کروڑ روپے لگا دیئے اس کی مرمت پر، یہی نہیں اس اضافی بجٹ میں وزیراعلیٰ دفتر سمیت مختلف محکموں کیلئے 84کروڑ 43لاکھ کی گاڑیاں لے لیں، شہباز شریف کے دوروں پر لگے 38کروڑ، جاتی امرا کی سیکورٹی بہتر بنانے کیلئے خرچ ہوئے ڈیڑھ کروڑ، وزیراعلیٰ اور کابینہ ممبران نے وفاقی حکومت کا جو ہیلی کاپٹر استعمال کیا، اس کا کرایہ دیا 12کروڑ 16لاکھ، وی آئی پی ڈیوٹی پر مامور سیکورٹی اہلکاروں کو اعزازیہ دیا 3کروڑ، صحت کے منصوبوں کی تشہیر کیلئے مختص فنڈ کے علاوہ مزید لگے 42کروڑ، گورنر پنجاب رفیق رجوانہ نے علاج کروایا 52لاکھ کا اور وزیراعلیٰ پنجاب نے اپنے چیف پائلٹ کو 1 کروڑ دے کر کہا کہ جاؤ بیرون ملک ٹریننگ کر آؤ، یہ بھی رؤف کلاسرا کی ریسرچ کہ گزشتہ دو سالوں میں قومی اسمبلی ممبران نے جعلی حاضریاں لگا کر ایک کروڑ 80لاکھ بٹور لئے، یاد رہے کہ قومی اسمبلی ممبر کو ایک سیشن کے ملیں 5ہزار، یہاں سوچنے کی یہ بات کہ جو رہنما جعلی حاضریاں لگا کر 5ہزار نہیں چھوڑتے، ان کے حوالے ہم نے ملک کیا ہوا۔
ویسے تو دس سالہ اقتدار کے آخری دن شہباز شریف سے یہ سن کر تسلی ہو چکی تھی کہ ’’اگر اب لوڈشیڈنگ ہوئی تو میں ذمہ دار نہیں‘‘، لیکن نواز شریف نے یہ فرما کر تو ٹھنڈ ہی ڈال دی کہ ’’لوڈ شیڈنگ کی ذمہ دار نگراں حکومت‘‘ ہوسکتا ہے کہ کسی دن نواز شریف یہ بھی کہہ دیں گے کہ پاناما سے اقامہ تک سب کیا دھر ا بھی انہی نگرانوں کا، حد ہی ہوگئی، باقی چھوٹے میاں صاحب کے بجلی کے حوالے سے دعوے اور اصل صورتحال دیکھ کر یاد آیا کہ کہیں سردیوں میں شہباز شریف جیسے کسی سیانے میزبان کے گھر مہمان آگیا، رات کو جب مہمان کہہ بیٹھا کہ ’’جو رضائی مجھے دی گئی وہ اتنی چھوٹی کہ منہ پرلوں تو پاؤں ننگے، پاؤں پر لوں تو منہ ننگا‘‘ تو میزبان بولا ’’آپ رضائی منہ پر لے کر لیٹو، مسئلہ حل کرتا ہوں‘‘ مہمان رضائی منہ پر ڈال کر لیٹا تو میزبان نے اس کے دونوں پاؤں پر دو چار چھڑیاں رسید کر دیں، مہمان نے گھبرا کر ٹانگیں دہری کر کے پاؤں رضائی کے اندر کر لئے، میزبان بولا ’’لو بھائی میں نے تمہارا مسئلہ حل کر دیا، اب تم جانو اور رضائی جانے‘‘، شہباز شریف صاحب شکریہ آپ نے تو بجلی کا مسئلہ حل کر دیا تھا، اب لوڈشیڈنگ جانے اور قوم۔
ملاحظہ ہو ترجیحات کا فقدان، ایک طرف لاہور کی اورنج ٹرین کیلئے چین سے قرضہ لیا گیا 162ارب اور اس پر سالانہ سود 10ارب، اب ٹرین کے 14ارب سالانہ ٹکٹ خسارے کو شمار نہ کریں تو بھی سود ملا کر قرضہ بنا 172ارب، اب دوسری طرف پورے پنجاب کی تعلیم، صحت، پانی کی فراہمی، ویمن ڈیویلپمنٹ اور سماجی تحفظ کا بجٹ 168ارب 48کروڑ، مطلب پورے صوبے کی صحت، تعلیم، پانی، خواتین کی ترقی اور سماجی تحفظ کا بجٹ صرف لاہور کی 27کلو میٹر والی اورنج ٹرین سےبھی کم ۔
ویسے تو میرے محبوب قائد ڈیکلیئر صادق و امین نہیں، لیکن حضرت علی ؓکے اس قول کو سامنے رکھتے ہوئے کہ ’’یہ نہ دیکھو کون کہہ رہا، یہ دیکھو کیا کہہ رہا‘‘، چند باتیں میاں صاحب کی اس پریس کانفرنس پر جس میں سال بھر ’’مجھے کیوں نکالا‘‘ کی بتی کے پیچھے لگا کر اچانک قوم کو یہ خوشخبری سنادی کہ ’’مجھے پتا، مجھے کیوں نکالا ‘‘لیکن بات آگے بڑھانے سے پہلے یہ بتا دوں کہ میرے بغاوتی، انقلابی اور مزاحتمی قائد کا 3بار وزیراعظم بن کر، 37سالہ سیاست کے بعد اور68سال کا ہو کر بھی سیاسی ویژن کا حال یہ کہ پریس کانفرنس میں ایک طرف بیٹھے پرویز رشید اور دوسری طرف براجمان مشاہد حسین، یعنی ایک طرف پرویز مشرف دور میں جیلیں کاٹنے اور ماریں کھانے والا پرویز رشید جبکہ دوسری طرف پرویز مشرف کا ساتھی مشاہد حسین اور جب میاں صاحب پرویز مشرف کو کوس رہے تھے تو ساتھ ساتھ مشاہد حسین کی تعریفیں بھی کر رہے تھے، بہرحال پریس کانفرنس میں ’’مجھے کیوں نکالا‘‘ کی پہلی وجہ میاں صاحب نے بتائی کہ ’’میں نے خارجہ پالیسی کو نئے رخ پر استوار کرنے کی کوشش کی‘‘ حقیقت یہ کہ میاں صاحب نے 4سال ملک کا وزیر خارجہ ہی نہ لگایا اور اوپر سے ان چار سالوں میں سوا ارب کے 100دوروں کے بعد قوم کو ملی عالمی تنہائی، ’’مجھے کیوں نکالا‘‘ کی دوسری وجہ یہ کہ ’’میں نے پرویز مشرف کے خلاف غداری کا مقدمہ بنایا‘‘حقیقت یہ کہ اس پھسپھسے مقدمے کے غبارے سے تو ہوا اسی دن نکل گئی تھی جس روز میاں صاحب نے انہیں باہر جانے دیا اور پھر دو سال تک واپس لانے کی جعلی سی کوشش بھی نہ کی، مجھے کیوں نکالا کی تیسری وجہ یہ کہ ’’میں نے سر جھکا کر نوکری نہیں کی‘‘ حقیقت یہ کہ دھرنوں پر مشاہد اللہ کے انٹرویو کے بعد انہیں سرجھکا کر فارغ کیا اور سر جھکا کر نوکری کی، ڈان لیکس کے بعد طارق فاطمی اور پرویز رشید کو سرجھکا کر فارغ کیا اور سرجھکا کر نوکری کی، پرویز مشرف کو سرجھکا کر جانے دیا اور نااہلی تک سرجھکا کر نوکری کی اور تو اور بقول میاں صاحب جب دھرنوں کے دوران انہیں ایک خفیہ ایجنسی کے سربراہ نے پیغام بجھوایا کہ ’’مستعفی ہو جاؤ یا لمبی چھٹی پر چلے جاؤ‘‘ اگر ایسا ہوا تب بھی میاں صاحب نے اپنے ماتحت ایجنسی کے سربراہ کو اس گستاخی پر برطرف کرنے کی بجائے سرجھکا کر نوکری کرنے کو ہی ترجیح دی، میاں صاحب نے اپنی پریس کانفرنس میں آگے فرمایا ’’کاش لیاقت علی خان اور ذوالفقار بھٹو کی روح سے کوئی پوچھ سکتا کہ ان کے ساتھ کیا ہوا، میاں صاحب پہلی بات تو یہ کہ بھٹو صاحب کو پھانسی آپ کے پیرومرشد ضیاء الحق نے دی اور اگر بھٹو صاحب کو پھانسی نہ ہوتی، یا ضیاء الحق کا مارشل لاء نہ لگتا تو آج آپ اتفاق فونڈری میں بیٹھے کاروبار کر رہے ہوتے جہاں تک بات ہے لیاقت علی خان کی روح کی تو کاش کسی روز قائداعظم کی روح سے بھی یہ پوچھ لیں کہ جو حال پاکستان کا ہو چکا، اس پر وہ کیا محسوس کر رہے، لیکن میاں صاحب آپ چھوڑیں ان باتوں کو، آپ ووٹ کو عزت دو کی آڑ میں اپنا کام جاری رکھیں۔

تحریر: حسن نثار
…..مبارک ہو…..ن لیگ کی ترقی بری طرح ’’لیک‘‘ کرگئی ہے یعنی نیو اسلام آباد ایئرپورٹ کی چھتیں ایک بارش برداشت نہ کرسکیں اور جگہ جگہ سے بری طرح لیک کرنے لگیں۔خاکروب اپنی تمام تر کوششوں کے باوجود پانی خشک کرنے میںناکام رہے۔اربوں روپے کے اس منصوبہ میں گھٹیا میٹریل اور گھٹیا کارکردگی کا اس سے بہتر ثبوت اور کیاہوسکتا ہے؟ ’’اک واری فیر شیر‘‘مبارک ہو….. میں نے اپنی گنہگا رآنکھوں سے ایک مقامی ٹی وی چینل کی سکرین پر یہ روح پرور نظارہ دیکھا کہ رمضان بازاروں میں میئر لاہور مبشر جاوید گلی سڑی گھٹیا سبزیا ںاور پھل اٹھااٹھا کر پھینک رہے ہیں۔ میئر پر اک عجیب وحشت طاری تھی جو مجھے بہت پسند آئی۔ برکت مارکیٹ، مکہ کالونی اور غالب مارکیٹ سے باب ِ پاکستان کے رمضان بازار تک بدنیتی، بددیانتی اور سفاکی کے شہکار تھے یا ہمارے حقیقی اجتماعی چہرے کے اشتہار تھے جس نے لارڈ میئر لاہور کرنل (ر) مبشر کو غصہ، جھنجھلاہٹ، بے بسی میں مبتلا کردیا۔ روزہ دار، روزہ داروں کوکیا بیچ رہےتھے؟ اور یہ بھی ہم ہی ہیں جو گراں فروشی کو گناہ نہیں سمجھتے، باٹ بھی اصل سے کم وزن کے ہوتے ہیں اور تول میں بھی ڈنڈی ماری جاتی ہےکیونکہ ہم نہیں جانتے کہ مارکیٹ کانام ’’برکت مارکیٹ‘‘رکھ دینے سے برکت نصیب نہیں ہوتی۔ حصول برکت کے لئے اپنے اندر کےسانپ

بچھو مارنا پڑتے ہیں۔ گناہ وثواب کی حقیقی روح کو سمجھنا پڑتا ہے لیکن اپنی تو دنیا ہی نرالی ہے۔مبارک ہو….. چربی کی تہوں میں لپٹے ہوئے ان نام نہاد لیڈروں سے بیش قیمت سرکاری گاڑیاں واپس منگوائی جارہی ہیں جن کے نہ پیٹ بھرتے ہیں نہ گھر نہ بینک نہ نیتیں۔ عوام کی کھال اتارنے کے بعد بھی ناجائز مال مفت کی ہوس کم نہیں پڑتی کہ ’’دل بے رحم ‘‘ بھی نہیں، ان کے جمہوری اور نوری سینوں میں تو دلوں کی جگہ تجوریاں نصب ہوتی ہیں۔ سپریم کورٹ کا حکم ہے کہ سرکاری گاڑیوں پر انتخابی مہم نہیں چلانے دیںگے۔ پوچھا گیا ’’شہبازشریف کو بلٹ پروف گاڑی کس قانون کےتحت دی گئی؟‘‘ یہ سوال بھی اٹھایا گیا کہ مولانا فضل الرحمٰن کو بلٹ پروف گاڑی کے ساتھ ڈبل کیبن بھی دی گئی حالانکہ ان کے پاس تو بہت دولت ہے،اپنی سیکورٹی کا انتظام خود کیوں نہیں کرتے؟ گاڑیاںواپس نہ کرنے والوںکو روزانہ ایک لاکھ، ہفتہ بعد دو لاکھ جرمانہ ہوگا۔ ایف بی آر افسروں سے لگژری گاڑیاں واپس لینے اور ’’نیب‘‘ کوتحقیقات کا حکم بھی دیا گیا….. ’’قدم قدم پر لوٹ پڑی تھی اور چوروں کو چھوٹ بڑی تھی‘‘مجھے سو فیصد یقین ہے کہ سقوط کے بعد وحشی تاتاریوں نے اس بے رحمی سے اہل بغداد کوبھی نہیں لوٹا ہوگا جس بے رحمی سے بے شرم اشرافیہ ملکی وسائل کو لوٹتی ہے اور کیا آپ جانتے ہیں کہ جب یہ قسمیں کھا کھاکر کہتے ہیں کہ…. ’’ہم نےکرپشن نہیںکی‘‘توبخدا یہ درست کہہ رہے ہوتےہیںکیونکہ یہ کرپشن کو کرپشن سمجھتے ہی نہیں، یہ حرام کا مال حرام نہیں اپنا حق یا خراج سمجھ کر وصول کرتے ہیں تو ظاہر ہے ’’کرپشن‘‘کہاں سے آگئی؟جیسے کئی محکموںمیں رشوت کو ’’سپیڈ منی‘‘کہہ کر حلال کرلیا جاتا ہے اور کہتے یہ ہیں کہ ہم رشوت نہیں، بروقت کام کردینے کا انعام وصولتے ہیں۔مبارک ہو…..آواز یہ بھی سنائی دیتی ہے کہ چک شہزاد اسلام آباد کے محلات کو بل ڈوز کیوں نہ کردیاجائے۔ وجہ یہ کہ چک شہزاد کا CONCEPT توبالکل ہی مختلف تھا۔ یہاں اسلام آباد کے لئے تازہ سبزیاں پھل اگائے جانے تھے، زیادہ سے زیادہ فارم ہائوسز کی گنجائش تھی لیکن چک شہزاد کےشہزادوں نے اصل آئیڈیا روند کرمحلات کھڑے کرلئے لیکن مبارک ہو کہ اس طرف بھی کسی کادھیان تو گیا۔مبارک ہواس تاریخ ساز، تاریخ شکن جملہ پر بھی کہ الحمد للہ ’’یہ ٹیلی فونوں پر فیصلے کرنے والی عدلیہ نہیں‘‘ اور مبارک ہو اس پر بھی کہ جمہوریت کے نام پر جیبیں کترنے والے کٹہروں کی زینت بنے ہوئے ہیں۔ اصغر خان کیس زور و شور سے جاری ہے اورجعلی معززین باری باری ایکسپوز ہوچکے جس پر ایاز امیر کے کالم کا یہ جملہ نہیں بھولتا کہ اسی کیس نے توراتوں رات جاوید ہاشمی کو ’’مخدوم‘‘ بنایا تھا….. یہ سب خادم مخدوم ایک ہی غلیظ تھیلی کے چٹے بٹے ہیں۔اور اس پربھی مبارک ہو کہ عزت مآب چیف جسٹس نے خدیجہ پرحملہ کے ملزم کی بریت کا ازخود نوٹس لےلیا۔ ہائی کورٹ نے ملزم شاہ حسین کو بری کرنے کا حکم دیا تھا۔مبارکبادیں تو بہت ہیں لیکن میں دودھ کا جلا ہوں جو چھاچھ کو بھی پھونکیں مارنے پر مجبور ہے….. میں سانپوں کاڈسا ہوا ہوں اس لئے رسیوں سے بھی ڈرتا ہوں اور سوچتا ہوں کہ یہ سارے سلسلے رستے میں ہی نہ رہ جائیں کیونکہ آوے کا آوا جس بری طرح بگڑ چکا ہے، اسے ٹھیک کرنے….. ٹریک سے پوری طرح اترچکی “70”بوگیوں پر مشتمل اس ٹرین کو دوبارہ ٹریک پر لانے کے لئے ہر پیغام بہت ’’لائوڈ اینڈکلیئر‘‘ ہونا ضروری ہے۔محتاط تیزرفتاری کے ساتھ سزائیں اس طرح کہ علامتی جلاد تین تین شفٹوں میں کام کرتے نظر آئیں۔ غلاظت اس قدر ہے کہ بدبو کا احساس بھی مرچکا۔اس گندگی کی صفائی دھلائی کسی ڈبل یا ٹرپل ایکشن ڈٹرجنٹ سے ختم نہیں ہوگی، اسے تیزاب سے غسل دینا ہوگا۔بہت کچھ مبارک ہو….. لیکن کیا کروں کہ سانپ کا ڈسا اور دودھ کا جلا اچھی طرح جانتا ہوں کہ مرض اس بری طرح بگڑ چکا کہ بہت ہی ہیوی قسم کی ڈوز درکار ہوگی۔ اشرافیہ سے عوام تک کام بہت لمبا، بہت مشکل اوربہت پیچیدہ ہے لیکن ناممکن ہرگز نہیں۔

تحریر: حامد میر
انتخابات میں ’’خلائی مخلوق‘‘ کی مداخلت کے بارے میں مشہور زمانہ اصغر خان کیس تیزی کے ساتھ اپنے منطقی انجام کی طرف بڑھ رہا ہے ۔کوئی ملزم عدالت کے بار بار بلانے پر آئے یا نہ آئے لیکن اصغر خان کیس میں سپریم کورٹ کی طرف سے چھ سال قبل سنائے جانے والےفیصلے پر عملدرآمد اب زیادہ دور نہیں ۔بدھ کی صبح سپریم کورٹ آف پاکستان کے چیف جسٹس کی عدالت میں معمول سے زیادہ رش تھا ۔جن سیاست دانوں کو طلب کیا گیا تھا ان میں سے صرف جاوید ہاشمی ذاتی حیثیت میں کمرہ عدالت میں موجود تھے ۔عابدہ حسین اور سراج الحق کے وکلاء نے انکی نمائندگی کی۔نواز شریف کا نام بار بار پکارا گیا ۔اٹارنی جنرل اشتراوصاف علی نے بتایا کہ وہ احتساب عدالت میں ہیں تو چیف جسٹس نے کہا کہ نواز شریف اپنے وکیل کے ذریعہ نمائندگی کر سکتے ہیں ہم صرف ان کا موقف جاننا چاہتے ہیں کہ انہوں نے آئی ایس آئی سے پیسے لئے تھے یا نہیں ۔اس موقع پر اعتزاز احسن نے کہا کہ خورشید شاہ کوبھی نوٹس جاری کیا گیا ہے حالانکہ ان کا اصغر خان کیس میں نام ہی نہیں ہے ۔چیف جسٹس نے اٹارنی جنرل سے کہا کہ 2012ء میں جاری کئے گئے سپریم کورٹ کے فیصلے میں جن لوگوں کے نام ہیں وہ پڑھ کر سنائیں۔نام پڑھے جانے لگے پہلا نام نواز شریف کا تھا اور ساتھ میں آوازآئی 35لاکھ۔
دوسرا نام لیفٹیننٹ جنرل (ر)

رفاقت 56لاکھ۔ یہ رقم موصوف نے میڈیا میں تقسیم کرنے کیلئے لی تھی۔ تیسرانام جماعت اسلامی 50لاکھ۔چیف جسٹس نے کہا کہ جماعت اسلامی کی طرف سے کون آیا ؟ ایک وکیل نے کہا کہ وہ سراج الحق صاحب کی نمائندگی کر رہے ہیں۔ عابدہ حسین کے نام کے آگے دس لاکھ لکھا تھا ان کی نمائندگی وسیم سجاد کر رہے تھے ۔پھر ایک نام بولا گیا جتوئی 50لاکھ۔چیف جسٹس نے پوچھا یہ کون سے جتوئی ہیں۔ اشتراوصاف نے بتایا غلام مصطفیٰ جتوئی دنیا میں نہیں رہے۔ پھر نام آیا جام صادق 50لاکھ۔چیف جسٹس نے کہا فوت ہو چکے ۔اگلا نام جونیجو 25لاکھ۔چیف جسٹس نے کہا فوت ہو گئے۔الطاف حسن قریشی 5لاکھ۔ ایک وکیل نے بتایا قریشی صاحب کچھ دیر میں یہاں پہنچ جائیں گے۔ پیر پگاڑا 20لاکھ۔چیف جسٹس نے خود ہی کہا فوت ہو گئے۔مولانا صلاح الدین 3لاکھ۔اٹارنی جنرل نے بتایا دنیا میں نہیں رہے ۔
اکبر بگٹی کے داماد ہمایوں مری کے نام کے آگے 15لاکھ لکھے تھے ۔ اٹارنی جنرل نے بتایا یہ پاکستان میں نہیں ہوتے ۔ایک نام بولا گیا جمالی 40لاکھ ۔چیف جسٹس نے پوچھا یہ کون سے جمالی ہیں ۔بتایا گیا یہ ظفر اللہ جمالی ہیں ۔ چیف جسٹس نے کہا انہیں نوٹس دیں اور تین دن میں جواب حاصل کریں۔اگلا نام تھا کاکڑ 10لاکھ۔بتایا گیا یہ سرور کاکڑ تھے اب دنیا میں نہیں رہے۔ ایک نام آیا کے بلوچ 5لاکھ ۔ اٹارنی جنرل نے بتایا یہ کوئی اور قادر بلوچ ہیں جنرل قادر بلوچ نہیں ۔جام یوسف ساڑھے سات لاکھ ۔بتایا گیا جام صاحب فوت ہو گئے۔ پھر ایک نام بولا گیا بزنجو 5لاکھ ۔چیف جسٹس نے کہا یہ کون سے بزنجو ہیں ۔بتایا گیا یہ حاصل بزنجو ہیں ۔چیف جسٹس نے بڑی حیرانگی سے کہا ’’اچھا جی ‘‘ یہ وہ نام تھے جو اسددرانی نے اپنے پہلے حلفیہ بیان میں ظاہر کئے تھے ۔ عدالت کے فیصلے میں ایک اور فہرست ملٹری انٹیلی جینس کے بریگیڈیئر حامد سعید اختر نے بھی پیش کی تھی۔اس فہرست میں عبدالحفیظ پیرزادہ کے نام کے آگے 30لاکھ روپے درج تھے اور وہ دنیا میں نہیں رہے ۔مظفر حسین شاہ نے دو مرتبہ 30لاکھ روپے لئے ۔چیف جسٹس نے کہا کہ انہیں بھی نوٹس دیں۔ارباب غلام رحیم نے 20لاکھ لئے۔انہیں بھی نوٹس جاری کرنے کا حکم ہوا ۔ہفت روزہ تکبیر کے بانی صلاح الدین کے نام کے آگے 30لاکھ درج تھے ۔بتایا گیا فوت ہوگئے ۔یوسف ہارون کے نام کے آگے 5لاکھ درج تھے ۔یہ بھی فوت ہو گئے ۔آگے چل کر اٹارنی جنرل نے وہ فہرست پڑھنی شروع کی جو یونس حبیب نے دفعہ 161کے بیان میں پیش کی تھی ۔
اس فہرست میں جنرل اسلم بیگ نے 140ملین لئے۔ جام صادق نے 70ملین، ایم کیو ایم کے الطاف حسین نے 20ملین اور جاوید ہاشمی نے یوسف میمن کے ذریعہ 50لاکھ لئے ۔جاویدہاشمی نے عدالت کو بتایا کہ وہ ماضی میں اس الزام کی انکوائری بھگت چکے ہیں اور ایف آئی اے ان پر کچھ بھی ثابت نہ کر سکی ۔چیف جسٹس نے کہا کہ آپ نے خود عدالت میں پیش ہو کر اچھی مثال قائم کی ہے ہمارا مقصد صرف قانون کی بالادستی ہے کسی کی تضحیک نہیں ۔ آگے چل کر نام آیا امتیاز شیخ 12ملین۔یہ رقم امتیاز شیخ نے جام صادق کیلئے لی تھی ۔اجمل خان کے نام کے آگے 14لاکھ درج تھے ۔عدالت کو بتایا گیا اجمل خان فوت ہو گئے ۔آگے چل کر نواز شریف کے نام کے سامنے ایک جگہ 35لاکھ ایک جگہ 25لاکھ درج تھا ۔اعتزاز احسن نے تبصرہ کیا نواز شریف کا نام تین جگہ آیا ہے ۔ایک دفعہ اسددرانی کی فہرست میں اور دو دفعہ یونس حبیب کی فہرست میں۔ چیف جسٹس نے کہا کہ نواز شریف خود آئیں یا وکیل کو بھیجیں لیکن اپنا موقف ضرور دیں کل کو یہ نہ کہیں انہیں سنا نہیں گیا۔ اسددرانی کی دی گئی ایک اور فہرست میںملک غلام مصطفیٰ کھر کے نام کے آگے 20لاکھ ۔ سرور چیمہ کے نام کے آگے 5لاکھ اور معراج خالد کے نام کے آگے دو لاکھ درج تھے ۔حکم ہوا کھر صاحب کو بھی بلائیں۔چیمہ صاحب اور ملک صاحب فوت ہو چکے ۔لیاقت جتوئی نے دس لاکھ اور آفاق احمد نے 5لاکھ لئے ۔انہیں بھی نوٹس جاری کر دیا گیا ۔جام مشہود نے بھی معمولی رقوم لیں انہیں بھی نوٹس جاری ہو گیا۔ جنرل اسلم بیگ کو چیف جسٹس نے کہا کہ آپ کا معاملہ اور اسد درانی کا معاملہ جی ایچ کیو کے پاس جائے گا اور آپ کے بارے میں آرمی ایکٹ کے تحت کارروائی ہو گی سیاست دانوں کے خلاف ایف آئی اے انکوائری کریگی۔ تمام نام پڑھے گئے خورشید شاہ کا نام کہیں نہیں تھا انہیں غلطی سے نوٹس جاری ہوا اس کے باوجود انہوں نے وکیل بھیج دیا لیکن جن کے نام عدالتی فیصلے میں موجود ہیں اور وہ نوٹس کے باوجود پیش نہیں ہو رہے انہیں جان لینا چاہئے کہ عدالت سے دامن چھڑانے کا ایک ہی طریقہ ہے کہ آپ یہ دنیا چھوڑ دیں ۔اگر آپ پاکستان میں موجود ہیں تو اپنا دفاع ضرور کریں ورنہ آپ مجرم قرار دیئے جائیں گے ۔اصغر خان کیس میں عدالتی فیصلہ واضح طور پر کہتا ہے کہ الیکشن قوانین کے مطابق خفیہ رقوم لینا اور ان کو ظاہر نہ کرنا سنگین دھوکہ دہی ہے ۔مسلح افواج کا کوئی بھی افسر اپنے اعلیٰ حکام کا کوئی ایسا حکم ماننے کا پابند نہیں جو اس کے حلف کی خلاف ورزی پر مبنی ہو ۔اصغر خان کیس میں عدالتی فیصلے پر عملدرآمد ہو گیا تو انتخابات میں ’’خلائی مخلوق‘‘ کی مداخلت کا راستہ کافی حد تک بند ہو جائے گا۔ عدالت میں سابق آرمی چیف اسلم بیگ کی حالت قابل ترس تھی وہ رش کی وجہ سے کھڑے تھے۔ انہیں بابر اعوان نے اپنی نشست دی ایف آئی اے جن افراد کے خلاف انکوائری کر رہی ہے ان کا تعلق مسلم لیگ (ن)، مسلم لیگ فنکشنل، تحریک انصاف اور پیپلز پارٹی سے ہے ۔اس حمام میں سب ہی ننگے ہیں یہ سب جماعتیں انتخابات میں دھاندلی کی شکایت کرتی رہی ہیں دھاندلی کا راستہ روکنے کا وقت آیا ہے تو دامن بچانے کی کوشش ہو رہی ہے ۔اصغر خان کیس کے فیصلے میں واضح طور پر لکھا گیا ہے کہ اپنے فرائض کی ادائیگی کے دوران مسلح افواج کے جوانوں کو دیکھنا چاہئے کہ آئین برقرار ہے اور اسے منسوخ یا سبوتاژ تو نہیں کیا جا رہا۔
سیاست میں مداخلت آئین کی خلاف ورزی ہے۔ پاکستان کا ہر محب وطن شہری یہ چاہتا ہے کہ اصغر خان کیس کے فیصلے پر عملدرآمد ہو جو یہ نہیں چاہتا وہ جمہوریت کا ایک نام نہاد علمبردار کہلائے گا ۔

انسانی تاریخ کا شروع سے یہ المیہ رہا ہے کہ ہم ایک برائی کو ختم کرتے ہیں تو اس سے بڑی ایک اور برائی کی راہ بھی ہموار کردیتے ہیں، حرف آخر فیصلہ اورکسی برائی کو جڑ سے اکھاڑنے کی طاقت شاید ہم میں نہیں ہے یا پھر اس مادر پدر آزاد معاشرے میں ایسا کرنا ہی نہیں چاہتے ہیں۔قومی اخبارات میں خبریں چھپ رہی حقائق چیخ چیخ کر نوٹس کا مطالبہ کررہے ٹی وی چینل اندر کی تمام کہانی ناصرف سنارہے ہیں بلکہ واضع ثبوتوں کے ساتھ دکھا بھی رہے ہیں مگر محکمہ ریونیو کی ڈسٹرکٹ ایڈمنسٹریشن لاہور نے اس معاملے میں مسلسل اور مکمل خاموشی اختیارکررھی ہے ۔ شاید اس لیے کہ اب نگران سیٹ اپ آجائے گا،نئے چہرے آئیں گے اورخود ہی شہر لاہور کے مسائل کے حل کا ازالہ کریں گے بہ حیثیت محکمہ ریونیو کی بیٹ رپورٹر مجھے اس محکمے کی جانب سے بڑی عزت دی گئی۔ محکمہ ریونیو کے بہت سارے انتظامی افسران کے ساتھ اچھے اور بہترین تعلقات بھی بنے اس محکمے سے بہت زیادہ پیاربھی ملا اس کالم کو لکھنے سے پہلے سوچا کہ یار بعض دفعہ سچائی اور سچ بولنا بڑا بھی سمجھا جاتا ہے بعض دفعہ صاف گوی آپ کیلئے نفرت اور آپ کی شخصیت پر تعلقات کی خرابی کا موجب بھی بنتی ہے مگر رمضان المبارک کے اس بابرکت مہینے میں مجھے میں یہ ہمت بھی آئی ہے اور پوری ذمہ داری سے لکھنے کی کوشش بھی کررہا ہوں تو سنیے جناب ضلع لاہور میں50روپے والا اشٹام پیپرز سرعام جعلی بک رہا ہے، عدالت عالیہ کے احکامات کے باوجود پٹوارخانوں میں پرائیویٹ عملہ سوفیصد سرکاری ریکارڈ پر قابض ہوچکا ہے۔ ہربنس پورہ میں وفاقی حکومت کی سینکڑوں کنال سرکاری اراضی پر سرعام تعمیرات کی جارہی ہے۔مقامی لینڈ مافیا اتنی دیدہ دلیری سے کام کررہا ہے جیسے ڈپٹی کمشنر لاہور کی ہدایت ہوکہ سرکاری زمین پر تعمیرات کروا۔ اسسٹنٹ کمشنر شالیمار علی اکبر بھنڈر کے اس بیان سے ہی اندازہ ہوجاتا ہے کہ وہ کتنے بہترین ایڈمنسٹریٹر آفیسر ہے جن کا کہنا ہے کہ ہربنس پورہ میں تعمیرات روٹین کا حصہ ہے یہ روزانہ کی بنیاد پر جاری وساری ہے۔ تو محترم بھنڈر صاحب آپ کی ایسی سیٹ پر عاصم سلیم اور عبداللہ خرم نیازی بھی تعینات رہے ہیں اور آپ زرا ان کی بھی کارکردگی چیک کرلیں بلکہ ڈپٹی کمشنر اور کمشنر لاہور عبداللہ خان سنبل بھی اس بات کا موازانہ کروالیں۔ جوہر ٹاؤن میں ایل ڈی اے کا سرکاری رقبہ اجودھیا پور میں فروخت کیا گیا خسرہ نمبر551,552ہے مگر آپ کے انتظامی افسران صرف3ماہ سے انکوائری کرنے میں مصروف ہے اور سرکاری اراضی بیچنے والے سٹلیمنٹ کے پٹواری کو غیر قانونی طورپر نیا موضع ساہواڑی انعام کے طورپر الاٹ کردیا گیا۔ اس بات پر زیادہ خوشی ہوئی کیونکہ چور،لٹیرے اور بری شہرت کے حامل ریونیو سٹاف کی ترقی تو بنتی ہے نا۔۔۔ایڈیشنل ڈپٹی کمشنر لاہور کے آفس میں پرچہ رجسٹری کی بابت ایک تفصیلی رپورٹ مرتب کی جاتی تھی۔ اسسٹنٹ کمشنر صاحبان کو اس حوالے سے کچھ نہ کچھ محنت کرکے شرمندگی سے بچنے کیلئے بھاگ دوڑ کرنی پڑتی تھی جوکہ موجودہ حالات میں بند کردی گئی ہے اور اسسٹنٹ کمشنرز صاحبان بھی دفتر قانگو برانچ میں جمع ہونے والی کاغذی اور فرضی رپورٹس پر انحصار کررہے ہیں۔ موجودہ ایڈیشنل ڈپٹی کمشنر لاہور طاہرفاروق مجھے اس لحاظ سے انتہائی پسند ہیں کہ وہ چھوٹے اہلکار سے لیکر بڑے اانتظامی افسران کو بھی عزت دیتے ہیں خوش اخلاقی سے مالا مال اور غوروفکر سے ہر بات کوسنتے ہیں۔ کوشش کرتے ہیں کہ یہ کام ڈسپلن اور قانون کے دائرہ کار میں ہو۔ مگر مجھے لگتا ہے کہ ان پر کافی بوجھ ڈالا گیا ہے انتظامی معاملات میں انکو اس بات کی بھی آگاہی ہوچکی ہے کہ کیسے گڑھی شاہو میں تعینات پٹواری قانگو نے ایک فرضی رپورٹ کے ساتھ جائیداد ہتھیانے میں معاونت کی اور وہ پکڑے گئے اور وہ معطل ہوئے محکمہ ریونیو کی تاریخ میں طاہر فاروق وہ پہلے آفسر ہوں گے جنہوں نے ریونیو سٹاف کی ٹرانسفر پوسٹنگ میں نہ تو کوئی دلچسپی لی اور نہ ان کوسزائیں سنائی، ضلع لاہور کا تمام ریونیو سٹاف انکو ایک مہربان اوررحم دل آفیسر کے نام سے یاد کرتا ہے مگر حضور جان کی امان پاؤں تو عرض ہے کہ تمام سٹاف ایک جیسا نہیں ہوتا ان میں ایسی کالی بھیڑیں اور کرپٹ عناصر بھی چھپے ہوئے ہیں جوکہ ریونیو ریکارڈ میں دن رات کی بنیاد پر ٹمپرنگ کرنے ، جعلی اوراق پیسٹ کرنے غیر مالک کو مالک بنانے اور سرکاری اراضی کو جمنبدیوں اور مثل حقیقت میں گول کرنے میں کامیاب ہوچکے ہیں اور پریکٹس کو جاری کیے ہوئے ہیں۔ میں سمجھتا ہوں کہ عبداللہ خان سنبل، سمیر احمد، طاہر فاروق اور راؤ امتیاز جیسے افسران اور ضلع لاہور کے حاکم کی عدم دستیابی یا عدم دلچسپی سے مختلف عناصر ناصرف حکومتی سطح پر زمینوں پر قبضے کرتے ہوئے نقصان پہنچارہے ہیں بلکہ جعلی اشٹام پیپرزکی فروخت، سرعام رشوت وصولی کی شکایت میں ملوث پرائیویٹ عملہ اور چند پٹواری حکومتی خزانے اور برائے راست ضلع لاہورکی عوام کو بھی شدید نقصان سے دوچار کررہے ہیں ۔محکمہ ریونیو جعلسازوں اور ایسے ریونیو سٹاف پر اگر بروقت کارروائی نہ کی گئی تو وہ عوام الناس کیلئے مستقل وبال جان بن جائیں گے ان خامیو ں کا نوٹس نہ لیا گیا تو اس کا نتیجہ انتہائی بھیانک سامن�آئے گا کیونکہ دیدہ دلیری سے کام کرنے والے پٹواری دوسروں کو بھی اپنے طرح کام کی پریکٹس چلانے کی ترغیب دے رہے ہیں۔ سرکاری زمینوں کی بندر بانٹ اوران کو بیچنے والوں کو تحفظ فراہم کیاجارہا ہے جوکہ ایک بہت خطرناک روایت بن رہی ہے اس لیے مہربانی فرمائیں اور جاتے جاتے ایسے بولڈ سٹیپ پر کارروائی ضرور کریں جس سے تاریخ میں ایسے عناصر ،لینڈ مافیا اور جعلسازوں کیلئے نشان عبرت نمایاں پر دیکھا جاسکے۔

ساڈا حق ایتھے رکھ ،گزشتہ چند دنوں قبل یہ نعرہ پنجاب لینڈ ریکارڈ اتھارٹی میں کام کرنے والے تمام ملازمین کی جانب سے یکجا ایک موقف کے ساتھ گونجا، فتح جھنگ سنگھ میں اے ڈی ایل اور سروس سنٹر آفیشل کی گرفتاری ایک بہانہ بنی، جبکہ ٹھنڈے فرش پر بٹھا کر تذلیل کی جانے والی فوٹو نے بھی اپنا کام دکھایا اور چنگاڑی کے اوپر جلتی کا کام کیا، پھر کیا تھا صوبے بھر کی اراضی ریکارڈ سنٹر پر کہ کر بند کردئیے گئے کہ محکمہ اینٹی کرپشن کی بے جا مداخلت، اختیارات سے تجاوز اور غنڈہ گردی جیسی پالیسی نامنظورنامنظورپر جیسے نعرے بھی بلند کیے گئے اور دیکھا دیکھی چند گھنٹوں میں فیصلہ کن معرکہ مارا گیا اور لاہور ڈویژن سمیت پنجاب کے مختلف اضلاع سے اراضی ریکارڈ سنٹر کے تمام ملازمین ایک جگہ پر اکٹھے ہوگئے۔ اگر میں کہوں کہ یہ تمام واقعات جو وقفے وقفے سے رونما ہوئے ہیں یہ قدرت کی جانب سے ہوئے ہیں رب کائنات کی پاک ذات بے شک جسے چاہے عزت دے اور جسے چاہے ذلت دے چند چیزیں لکھی جاچکی تھی اور آسمانوں پر جب طے پاگیا تھا عرش والے نے جو فیصلہ کرلیا تھا فرش والے بس اس فیصلے کی زد میں آگئے۔ صوبے بھر کے ڈی سی اوز، بیوروکریسی، تمام سرکاری محکموں کے افسران اس بات پر حیران ہوچکے ہیں کہ اچانک یہ سب کچھ کیسے ہوگیا کیسے چیف جسٹس آف پاکستان ثاقب نثار نے خاتون اے ڈی ایل آر کی درخواست پر نوٹس لے لیا، کیسے خاتون اے ڈی ایل آر میں اتنی جرات پیدا ہوگئی کہ وہ اپنی نوکری کو داﺅ پر لگاکر چیف جسٹس کے روبرو پیش ہوگئی اور کیسے بھری عدالت میں ڈی جی پی ایل آر اے کو معطل کردیا گیا، میرے پڑھنے والے قارئین پی ایل آر اے کی انتظامیہ صوبے بھر کے اراضی ریکارڈ سنٹرز کے سٹاف اور بورڈ آف ریونیو کے تمام ملازمین اور میری بات سے اتفاق ضرور کریں گے۔ میں نے چند ماہ قبل ایک کالم لکھا تھا ”انتقام یا انصاف“ جب مقبول احمد دھاوالا سابقہ ڈپٹی پروجیکٹ ڈائریکٹر کی آڑ میں رشوت وصول کرنے کے الزام میں پہلے گرفتار کروایا گیا اس کے ساتھ چھ سے سات ملازمین کو بھی گرفتار کروایا گیا پھر ان ے ہاتھ کھڑے کرکے تمام قومی اخبارات میں تصاویر چھپائی گئی ان کو محکمہ اینٹی کرپشن میں مارا پیٹا گیا تب میں لکھا تھا کہ خدا کی لاٹھی بڑی بے آواز ہوتی ہے کب کہاں کس وقت اور کیسے برس پڑے کچھ معلوم نہیں ہوتا، تو دوستوں کیا پنجاب لینڈ ریکارڈ اتھارٹی کے ملازمین میں اتنی ہمت تھی کہ وہ ہڑتال کرتے نہیں بالکل نہیں تھی اب خدا کی لاٹھی اور قدرت نے جو لکھا تھا وہ ہوکر رہنا تھا وہی ہوا ارم شہزادی اے ڈی ایل آر اچانک چیف جسٹس کے سامنے پیش ہوگئی اس وقت جب مختلف اے ڈی ایل آر زیر عتاب اور نوکریوں سے فارغ ہوچکے تھے ۔ چیف جسٹس نے نوٹس لیا اور ڈی جی پی ایل آر اے کوطلب کرلیا یہ ایک چنگاڑی جل چکی تھی اور اینٹی کرپشن کی جانب سے گرفتار شدہ ملازمین کی تصاویر نے شعلہ بھڑکا دیا اور پھر ایک ہجوم اکٹھا ہوا اور اس ہجوم نے اپنی ہڑتال کا رخ تبدیل کیا اور اپنے حقوق کےلئے ڈرے سہمے بزدل اور حالات سے ستائے ہوئے بے بس لاچار انسانوں کو بھی جاگتے دیکھا آواز بلند ہوچکی تھی مطالبات اپنے حقوق کےلئے سامنے رکھ دئیے گئے انتظامیہ کی جانب سے کبھی شفیق گجر، کبھی عثمان احمد، کبھی کرنل ثاقب تو کبھی کامران حفیظ اور دیگر پرانے حالات کو قابو کرنے کے ماہر ا فراد پرمشتمل کمیٹی بھی اس ہجوم کو کنٹرول کرنے کےلئے متحرک ہوئے مگر خدا کی کرنی کچھ اور تھی مجھے یاد پڑتا ہے کہ مجھے اس ہجوم سے ان477نکالے جانے والے ملازمین کی آہ پکار اور ان بے گناہ ملازمین کی بے بسی چیخ وپکار بھی سنائی دے رہی تھی۔ تاہم قبل از وقت کچھ کہنا مقصود نہ تھا مشیروں اور سفیروں نے ڈی جی پنجاب لینڈ ریکارڈ اتھارٹی کو جو مشورے اورباتیں بتائی یقینا وہ غصہ چڑھانے اور حالات کو مزید خراب کرنے کی جانب تھی کیونکہ وہ ہجوم سے جوباتیں کررہے تھے اور ان کا جوانداز تھا وہ خاصا رعب دار اورچڑھائی کرنے والا تھا خیر اگلے روز بروز ہفتہ چیف جسٹس کی عدالت میں پیش ہوئے مجھے کسی نے بتایا کہ آپ کو بھی عدالت میں بلایا گیا ہے آپ کی خبروں کی روشنی میں بھی پوچھا جانا ہے خیر میں تو چیف جسٹس کی عدالت میں جانے کےلئے بے تاب تھا صبح10بجے عدالت کے اندرداخل ہوا کیا دیکھا کہ عدالت عالیہ میں براجمان ایک ایسا انسان جس پر اللہ تعالیٰ کی صفات بھی تھی یعنی انصاف کرنے والا ہمدردی کرنے والا کمزور کا سہارا بننے والا، میں کیا کہوں مجھے ابھی تک یقین نہیں ہورہا تھا کہ میںنے کیا دیکھا چیف جسٹس ثاقب نثار کے چلنے کا سٹائل بولنے کا طریقے اور بروقت انصاف کی فراہمی آپ یقین مانیں میں10بجے سے شام5بجے تک مسلسل کھڑا ہوکر عدالت میں مختلف کیسرز سنتا رہا نہ بھوک لگ رہی تھی نہ پیاس دل کررہا تھا کہ بس چیف جسٹس کو دیکھتا رہوں سنتا رہوں ۔اللہ تعالیٰ کی ذاب پاک نے کیا ہمت جرات ذہانت اور دانشمندی دے رکھی تھی جوکہ قابل تعریف ہیں خیر ساڑھے پانچ بجے کیپٹن ظفر اقبال ڈی جی پی ایل آر بھی پیش ہوئے کیس کی سماعت ہوئی اورڈی جی پی ایل آر کو معطل کردیا گیا باہرکھڑے سینکڑوں وہ ملازمین جن کو نکالا گیا تھا وہ اس انتظار میں تھے کہ ڈی جی پی ایل آر جیسے ہی باہر آئیں ان کی گاڑی کا گھیراﺅ کیا جائے خیر یہ سب کچھ تو نہ ہوا بلکہ باہرکھڑے ملازمین مٹھائی بانٹتے ہوئے دکھائی دئیے۔ ملازمین خوشی سے بھنگڑے بھی ڈالتے رہے ۔کافی ایسی دلچسپ صورتحال بھی دیکھی جو اس کالم میں لکھنے سے قاصر ہوں بات ذرا لمی ہوجائےگی۔ بات کو مزید مختصر کرتے ہیں چیف جسٹس کی عدالت میں ایک بات تو واضع دیکھ لی کہ چیف جسٹس کو لاکھوں روپے تنخواہیں لینے والے قیمتی گاڑیاں سنبھالنے والے قومی خزانے پر بیرون ممالک میں سیر سپاٹے کرنے والے اور نوازشات ہی نوازشات حاصل کرنے والے ملازمین پسند نہیں ہیں اور پی ایل آر اے میں لاکھوں روپے ماہانہ تنخواہ لینے اور اوپر کی نیک کمائی کا حصہ وصول کرنے والوں کی بھی ایک فہرست ہے جو آئندہ ایک دو روز میں شائع کروں گا ۔ خیر میں ایک اپنی دل کی بات بھی کرنا چاہتا ہوں جوکہ میری اپنی سوچ اور اپنی ذاتی رائے ہے جس سے کسی کو اختلاف بھی ہوسکتا ہے ۔کیپٹن ظفر اقبال ایک مضبوط اعصاب کے مالک اور انتظامی معاملات میں انتہائی سخت گیر جانے جاتے ہیں ، اور پنجاب لینڈ ریکارڈ اتھارٹی میں موجود ایسے کرپٹ عناصر کے خلاف بھی سینہ پلائی دیوار بنے ہوئے تھے جن کی بری شہرت اور حرکات سے عوام الناس بھی تنگ تھی اور ایسے عناصر کے خلاف بے تحاشہ کارروائیاں بھی کی گئی مگر انسان جب برسر اقتدار ہوتا ہے تو وہ صحیح کام کرتے کرتے چند ایسی غلطیاں بھی کرڈالتا ہے جس سے اس کی پکڑ ہوجاتی ہے۔ ایسا ہرگز نہیں ہونا چاہیے تھا کاش ڈی جی پی ایل آر نے نرمی سے سوچتے اور جس وقت یہ معاملہ گڑ بڑ ہورہا تھا اور جن مشیروں کے کہنے پر وہ سخت رویہ اپنائے ہوئے تھے ایسا نہ کرتے ٹرانسفر پوسٹنگ ایک روٹین کا حصہ ہے اگر ٹرانسفر ہوتی تو جناب کسی نہ کسی ضلع کے ڈپٹی کمشنر ہی لگتے مگر موجودہ حالات میں چیف جسٹس کے احکامات کے بعد کافی ساری مشکلات پیدا ہوچکی ہیں ۔ اللہ تعالیٰ کیپٹن ظفر اقبال کو صبر عطا کرے میں آج بھی اس بات پر زور دوں گا کہ میری جب بھی مختصر سی ملاقات ڈی جی پی ایل آر اے سے ہوئی تو وہ ایک ایک ہی موقف کے ساتھ کھڑے رہتے تھے کہ عامر مجھے اس محکمے کی کالی بھیڑوں کی نشاندہی کرو میں نے کرپٹ عناصر کو اس محکمے سے پاک کرنا ہے مگر شائد قدرت نے ان کو مزید مہلت نہ دی۔ دوسری جانب ایک اور اطلاع بھی ملی ہے کہ موجودہ انتظامیہ کی جانب سے عدالت عالیہ میں پش ہونے والے ملازمین کا احتساب کرنے اور ان کے گرد تنگ دائرہ کرنے پر مزید غصے سے انتظامیہ کا ایک شدید ردعمل بھی سامنے آرہا ہے جس کی زد میں کئی بے گناہ بھی آنے والے ہیں مگر ایک بات میں پھر کہوں گا کہ خدا کی لاٹھی کہیں پھر نہ حرکت میں آجائے اور اپنے آپ کو سپر پاور سمجھنے والے کسی ایسی جگہ نہ پہنچ جائیں جہاں کا انہوں نے کبھی تصور بھی نہ کیا ہو۔ موجودہ حالات میں گرمی کی بجائے نرمی جذبات کی بجائے سمجھداری اختلافات کی بجائے رضا مندی کے ساتھ کام کرنے کی ضرورت ہے ۔ آج شب معراج کی رات ہے تمام مسلمان اپنے گناہو ںکوتاہیوں خطاﺅں کی بخشش کےلئے رب کائنات کے سامنے سجدہ ریز ہیں میں اپنی طرف سے بھی ایسے تمام دوستوں جو مجھے پسند کرتے ہیں اور جونہیں پسند کرتے ہیں سے معافی کا طلب گار ہوں اللہ تعالیٰ کی پاک ذات ہم سب کے حامی ناصر ہو۔

تحریر:نعیم بخش تارڑ
اسسٹنٹ ڈائریکٹر لینڈ ریکارڈتحصیل لاہور کینٹ
میں اپنے آفس میں روزمرہ کے کاموں میں مشغول تھا۔ ایک دم سے دروازہ کھلتا ہے تو نظر کے سامنے ایک پرانے دوست کا چہرہ نظر آتا ہے۔ آتے ساتھ وہی جملہ کہ کبھی دنیا میں بھی دیکھ لیا کرو۔ پہلے کتابوں میں مصروف رہتے تھے اور اب اس آفس کی جان نہیں چھوڑتے ہو۔ کیا رکھا ہے اتنی محنت اور ایمانداری میں سوائے ٹینشن، بھوک اور زندگی گزارنے کی جنگ کی سوا۔ مجھے دیکھو ایک سال میں اس سرکاری نوکری سے کیا کچھ نہیں بنا لیا ہے۔ گاڑی، عالیشان گھر اور زندگی کی تمام رنگینوں سے روز دل کو بہلاتا ہوں۔ میں نے گھنٹی بجا کر ملازم کو چائے لانے کا بولا اور ساتھ دماغ میں ماضی کی پرانی باتیں مجھے دس سال پیچھے پنجاب یونیورسٹی میں لے گئیں جہاں پر ہاسٹل کے روم سے لے کر کینٹین ، باہر فروٹ شاپ اور کالج کے گراونڈ میں ملکی حالات ، سسٹم کی خرابی اور کرپشن پر اتنی بحث ہوتی تھی کہ گھڑی کی رفتار بھی بہت تیز لگتی تھی کہ کب رات کے دو بج جاتے تھے اور پورا کیمپس نیند کی آغوش میں چلا جاتا تھا۔ لیکن ادھر سسٹم کا رونا جاری ہوتا تھااور اس بحث میں سب سے زیادہ باتیںکرنے والا یہی آفسر ہوتا تھا۔ جو کہتا تھا کہ ہم اس سسٹم کو ٹھیک کر دیں گے اپنے اپنے لیول پر حقیقی تبدیلی لے آئیں گے۔ ملک کا نظام تو ہم بدل نہیں سکیں گے لیکن جس ڈیپارٹمنٹ میں بھی گئے اس آفس کی حد تک فلاح انسانیت کے علمبردار ہوں گئے۔ غریبوں اور بے سہارا لوگوں کو ہمارے دروازے پر روکنے والا کوئی نہیں ہو گا۔ سچ اور ایمانداری کی عمدہمثالیں قائم کر یں گے۔لیکن انسان اتنی جلدی بدل جاتا ہے یہ خیال اس وقت کبھی پیدا ہی نہیں ہوا تھا۔ ضرورتیں بدلتی ہیں یا انسان دوسروں کو دیکھ کر رنگ پکٹر لیتا ہے۔اپنی اسٹوڈنٹس لائف میں ایمانداری کی باتیں وقتی ابال ہوتا ہے اور وہ فطری کرپٹ تھے یا اس نظام نے ان کو کرپٹ کر دیا۔ اپنی سٹوڈنٹ لائف میں انسانیت کی خدمت کے جذبے سے بھرپور آج اتنے سفاک، ظالم اور کرپٹ کیوں ہو گئے ہیں؟ کیا ان کو موقع ملنے کی کمی تھی یا ایمان کی کمزوری ان کو اس راستے پر لے آئی ہے۔ اللہ تعالی کی ذات پر یقین کم ہو گیا ہے یا کرپٹ لوگوں کی تقلید میں خود کو اس دلدل میں پھنسا بیٹھے ہیں۔مظلوم بے سہارا لوگوں نظر نہیں آتے یا نوٹوںکی چمک نے ان کی آنکھوں کی بینائی خرید لی ہے۔ دکھی لوگوں کی آواز کانوں تک پہنچتی نہیں ہے یا بنیک بیلنس کے چکر میں اے ٹی ایم مشین کی گرج نے قوت سماعت کمزور کر دی ہے۔ اپنے ملک کے لیے کچھ کرنے کا جذبہ نہیں رہا ہے یا بہتی گنگا میں ہاتھ دھونے کی روش کا شکار ہو گئے ہیں۔ ذہن بدل گئے ہیں یا ان کی یاداشت کمزور ہوگی ہے۔ بڑے بڑے دعوے کرنےوالے جیسے ہی اکیڈمی سے ٹریننگ لے کر نکلتے ہیں تو اتنی چھوٹی چھوٹی باتیں کرنے پر کیوں تل جاتے ہیں۔ بڑی کرسی پر بیٹھنے کے بعد اتنے پست قد کیوں ہو جاتے ہیں تنخواہ لینے کے باوجود کیوں خرچ لینے کی عادت اپنا لیتے ہیں انسانوں کو گلے لگانے والے ہاتھ تک ملانے سے کیوں عاری ہو جاتے ہیں جتنا سوچتا ہوں اتنا الجھتا جاتا ہوں۔لیکن جب چند اور دوستوں کی طرف نظر جاتی ہے تو دل میں سکون کی لہر اٹھتی ہے کہ سارے نہیں بدلتے۔ چند سر پھیرے اسی ڈگر پر قائم ہیں جو وہ سٹوڈنٹ لائف میں سوچا کرتے تھے۔ جن کے دروازوں پر کوئی چوکیدار نہیں ہوتا ہے جن کو نہ تو کسی انسان سے خطرہ ہے اور نہ اس کرپٹ نظام کے انسان نما حیوانوں سے جو جہاں جاتے ہیں مظلوم اور دکھی عوام کے لئیے خوشی کا سبب بنتے ہیں۔ جو بڑے بڑے عہدوں پر پہنچنے کے باوجود ایک سادہسی زندگی گزار رہے ہیں۔ جن کا آج بھی یقین اللہ تعالی کی ذات پر پہلے سے بھی کہیں زیادہ مضبوط ہو چکا ہے جنہوں نے اپنی زندی کی ڈور اللہ تعالی کے ہاتھ میں دے رکھی ہے جو سینہ تان کر اس ظلم کے نظام کے آگے کھڑے ہو جاتے ہیں جو کیرئیر کی پرواہ کیے بغیر بڑے افسروں کو بھی سر ہلا کر غلط کام پر انکار کر دیتے ہیں ان کو دیکھ کر دل میں امید کی شمع روشن ہوتی ہے کہ یہ نظام بدلے گا۔ برائی ختم ہو گی۔ انصاف ملے گا۔کرپشن خود دور بھاگے گئی۔ لوگوں کا اعتماد بحال ہوگا۔ ملک میں حقیقی تبدیلی آئے گئی۔ آئیے عہدکریں ہمیں اپنے اپنے حصے کی شمع روشن کر کے رکھنی ہے۔ آئیے اندھیرے میں اپنا اپنا چراغ جلائے رکھتے ہیں شاید ہمیںدیکھ کر کوئی اور بھی اپنا چراغ روشن کر لے۔ بجھے ہوئے چراغ دیکھ کر ہمیں اپنے چراغ بجھانے نہیں ہیں بلکہ ان کو اور شدت سے جلانا ہے تا کہ ان کی روشنی دور تک پھیل سکے۔

تحریر: عامر بٹ
ڈی جی پنجاب لینڈ ریکارڈ اتھارٹی کیپٹن ظفر اقبال کی ہدایت پر صوبے بھر کے اراضی ریکارڈ سنٹرز میں ایکسپریس کاﺅنٹر لگائے جارہے ہیں جن کا مقصد ان شہریوں کو بروقت اور ارجنٹ سروس مہیا کرنا ہے جولائن میں کھڑے نہیں ہوسکتے جو ٹوکن پریکٹس کو قبول نہیں کرتے اور جو تھوڑا سا بھی انتظار نہیں کرپاتے بزنس مین، سرمایہ دار، نمبردار، سیہ زادے، سیاست دان، بیوروکریٹس، احتسابی اداروں کے افسران میڈیا سے تعلق رکھنے والے سینئر جرنلسٹ سمیت ان گنت کیٹگری سے وابستہ افراد اراضی ریکارڈ سنٹرز میں دی جانے والی سروس اور پریکٹس سے نالاں نظر آرہے ہیں، لہذا اس پر تنقید برائے تنقید مناسب نہیں ہے اور ایکسپریس کاﺅنٹر کی اس سروس میں نہ تو کوئی بدنیتی ہے اور نہ ہی کوئی چالاکی ہے بلکہ خائص نیک نیتی اور عوامی مطالبے کو سامنے رکھ کر یہ فیصلہ کیا گیا ہے جوکہ انتہائی خوش آئند اقدام ہے مگر محترم سر چند ایسے سوالات ایسے قوانین اور ایسی باتیں بھی سامنے آرہی ہیں جن کا ازالہ نہ کیا گیا تو یہ ساری محنت، پلاننگ اور اقدام ناصرف دھرنے کا دھرا رہ جائے گا بلکہ الٹا نیک نامی کی بجائے بدنامی کا سامنا کرنا پڑے گا تو میں اب سیدھا مدعا پر آتا ہوں وہ یہ ہے کہ پرچہ رجسٹری قانون کے مطابق رجسٹری کی پاسنگ کے دوران500روپے عوام سے قبل از وقت انتقال کی تصدیق شدہ کاپی کے وصول کیے جارہے ہیں تو رجسٹری کی پاسنگ کے بعد دوبارہ ارجنٹ سروس کی صورت میں 5000روپے کی وصولی ڈبل ڈبل فیس کے زمرے میں آئےگی یہ ایسے ہی ہے جیسے انسان اوور ٹائم یا سائیڈ بزنس سے لاکھوں کمائے اور اجاڑے اس کو دکھ نہیں ہوتا جتنا اس کو اپنی ماہانہ سیلری کی مد میں ملنے والی رقم میں کمی پیشی سے ہوتا ہے کیونکہ وہ پہلے والا500اس کو چھبن ضرور کرے گا۔اس طرح جومنشور آج بھی ہماری ویب سائیڈ اراضی ریکارڈ، سنٹرز اورجگہ جگہ اشتہارات کے زمرے میں چسپاں یا آویزاں کیے گئے ہیں جس میں (LRIMS)کا بھی ذکر ہے جس میں 30منٹ میں فرد ملکیت اور 50منٹ میں اراضی کا انتقال اندراج کرنے کا دعوی کیا گیا اس میں بھی ترمیم کرلیں تاکہ لوگ اس ایجنڈا کاپی کا مذاق نہ اڑے اور سچائی پر مبنی پریکٹس کو تسلیم کرئے جبکہ مزید اطلاعات ملی ہیں کہ فرد1500اور انتقال فیس ارجنٹ سروس کی صورت میں وصول کی جائے گی۔ جو ہم ٹیکس وصولی تصور کریں گے اس طرح کے ٹیکس یا فیس کو لیکشن کےلئے باقاعدہ پنجاب اسمبلی میں سمری بھجواکر منظوری لی جاتی ہے باقاعدہ قانون سازی بنائی جاتی ہے تاکہ بعدازاں کوئی اس کو چیلنج نہ کرسکے جبکہ ایک ایگزیکٹو آرڈر کے تحت فیس وصولی کرنے والے اقدام کوکسی بھی کورٹ یا عدالت عالیہ میں باآسانی چیلنج کیا جاسکتا ہے اور آج کل معزز جج صاحبان ایسے کسی بھی اقدام کو نظر انداز نہیں کررہے ہیں بلکہ سوموٹو ایکشن لیتے ہوئے جواب دہی کررہے ہیں۔ مجھے اس حوالے سے یہ بھی خدشہ ہے کہ ایکسپریس کاﺅنٹر پر وکلاءحضرات قابض ہوجائیں گے اور روٹین کی فیس میں ہی ایکسریس کاﺅنٹر استعمال کریں گے جس کے سامنے آپ کا عملہ اپنے خاص بندوں کو مشورہ بھی دے گا کہ کسی وکیل صاحب کو لے آﺅ اور ارجنٹ سروس کو روٹین میں استعمال کرو جس سے ایکسپریس کاﺅنٹر کاسارا مقصد اور حیثیت خود بخود ختم ہوجائے گی کیونکہ فیروزوالا اراضی ریکارڈ سنٹر میں بھی ایک وکیل صاحب نے اپنا کاﺅنٹر لگاکر اراضی ریکارڈ سنٹر سے سروس حاصل کی اور اعلان کیا کہ اب وکلاءکا الگ کاﺅنٹر ہوگا اور ہم الگ سے سروس حاصل کریں گے اگر ایسا ہوا تو عام آدمی بھی جذباتی ہوجائے گا اور وہ بھی اپنے حقوق کےلئے میدان میں آئے گا۔ ایک اور اہم پوائنٹ بھی ذہن میں آیا کہ اگرکوئی ارجنٹ سروس لینے کےلئے اراضی ریکارڈ سنٹر آتا ہے اور وہ5000 روپے کی فیس جمع کرواکر فوری سروس لینا چاہتا ہے تو آگے سے اس کا کھاتہ بلاک ،لنک ڈاﺅن ہوا ہو، کھیوٹ ایشو پرابلم ہو، پرانا حکم امتناعی چلا آرہا ہو،ریکارڈ کی درستگی مطلوب ہو تو پھر اس کو انتظار کی سولی پر لٹکانا اور اسے کل ٹائم دے کر بلوانے سے ناصرف عوام میں مزید غصے کا سبب بنے گا بلکہ اس صاف شفاف اور نیک نامی پر بنے اقدام کو پروپیگنڈے کے ذریعے سینہ بہ سینہ اس کی ایسی تشہیر کی جائے گی کہ انتظامیہ کو اپنے اس فیصلے پر نظر ثانی کرنا پڑجائے گی۔ یہ چند سوالات تو وہ ہیں جو راہ چلتے میرے زہن میں آئے ہیں اور میں نے آپ کے گوش گزاردئیے ہیں اگر اس اقدام پر آپ باقاعدہ رائے سازی کرواتے ہیں تو ایسی ایسی قانونی اور مثبت رائے آپ کو مل سکتی ہے جس کی روشنی میں اگرآپ پاسنگ کریں تو وہ زیادہ مضبوط اور مربوط ثابت ہوگی۔