Category جرائم

مانگا منڈی:کنگن پور میں قوالی کی محفل میں فرمائش پوری نہ کرنے پر فائرنگ سے قوال زخمی،ریسکیو1122کے عملے نے زخمی کو ہسپتال منتقل کردیا۔تفصیلات کے مطابق قصور کے نواحی گائوںکنگن پور میں قوالی کی محفل میں 36سالہ وقار جو کہ قوالیاں گا رہا تھا کو ایک شخص نے قوالی کی فرمائش کردی فرمائش پوری نہ کرنے پر ملزم نے فائرنگ سے اسے زخمی کردیا،واقع کی اطلاع پر ریسکیو1122کا عملہ موقع پر پہنچ گیا اور زخمی کو ڈسٹرکٹ ہسپتال قصور منتقل کردیا۔مقامی پولیس مصروف کاروائی ہے۔

فیصل آباد:ایڈیشنل ڈسٹرکٹ اینڈ سیشن جج نے تھانہ چک جھمرہ کے مقدمہ قتل کا فیصلہ سناتے ہوئے مجرم کو عمرقید اور 5لاکھ روپے جرمانہ کی سزا کا حکم سنا دیا عدم ادائیگی جرمانہ کی صورت میں مزید قید سخت بھگتنا ہوگی۔استغاثہ کے مطابق تھانہ چک جھمرہ کے علاقہ میں عداوت کی بناء پر ملزم یٰسین نے فائرنگ کرکے مخالف نوجوان عنصر کو موت کے گھاٹ اتار دیا تھا جس پر پولیس نے مقدمہ درج کرنے کے بعد چالان مکمل کرکے عدالت بھجوایا توفاضل جج نے دوران سماعت جرم ثابت ہونے پر مجرم یٰسین کوعمر قید اور پانچ لاکھ روپے جرمانہ کی سزا کا حکم سنا دیا۔

پشاور:آئی جی خیبر پختون خوا معظم جاہ انصاری نے بتایا ہے کہ پشاور کی پولیس لائنز کی مسجد میں دھماکا خودکش تھا، خودکش حملہ آور کا سر اور کچھ اعضاء ملے ہیں۔آئی جی خیبر پختون خوا نے نجی ٹی وی کو انٹرویو دیتے ہوئے کہا کہ پشاور کی پولیس لائنز کی مسجد میں ہوئے خود کش دھماکے میں حملہ آور کے سیمپل ڈی این اے ٹیسٹنگ و فارنزک کے لیے بھیجوا دیے ہیں، سی سی ٹی وی فوٹیج سے دھماکے کی وجوہات کا تعین کر رہے ہیں۔انہوں نے کہا کہ انٹیلی جنس کی بنیاد پر آپریشنز ہونے چاہئیں، دہشت گردوں کا کنٹرول کسی علاقے پر اس طرح نہیں ہے جس طرح 10، 12 سال پہلے تھا۔ یہاں سے کوئی دہشت گرد بھاگ کر افغانستان میں پناہ لے تو معاہدے کے مطابق افغان حکومت کو اسے ہمارے حوالے کرنا چاہیے۔

لنڈی کوتل:مسلح افراد تاجر سے تین لاکھ امریکی ڈالر چھین کر باآسانی فرار ہو گئے۔صوبہ خیبر پختونخوا کے علاقے خیبر میں لنڈی کوتل بائی پاس روڈ پر راہزنی کی واردات میں نامعلوم مسلح افراد نے تاجر سے 3 لاکھ امریکی ڈالر چھین لیے اور واردات کے بعد فرار ہو گئے۔ایڈیشنل ایس ایچ او فضل الرحمن کے مطابق تاجر عبداللہ طورخم سے پشاور جا رہا تھا کہ لنڈی کوتل بائی پاس روڈ پر مسلح افراد نے لوٹ مار کی کارروائی کی اور تاجر سے 3 لاکھ امریکی ڈالر چھین کر فرار ہو گئے۔بعد ازاں پولیس نے علاقے کی ناکا بندی کرکے ملزمان کی تلاش شروع کردی ہے۔

نوشکی:نوشکی کلی بدل کاریز میں زرعی ٹیوب ویلوں کے ٹرانسفارمرز کے کوئل چوری ہوگئے ۔ تفصیلات کے مطابق نوشکی کے علاقہ بدل کاریز میں ملک احمد بڑیچ ، عبدالرشید بڑیچ، محمد یونس بڑیچ کے زرعی ٹیوب ویلوں کے بجلی ٹرانسفارمرز کے کوئل کو نامعلوم چوروں نے اتار کر لے گئے ، جب کہ دوسری جانب نوشکی میں زرعی ٹیوب ویلوں کے کوئل چوری ہونے کے دیگر واردات بھی رونما ہوچکے ہیں ۔ کلی بدل کاریز کے رہائشیوں نے پولیس اور انتظامیہ سے پرزور اپیل کی ہے کہ وہ چوروں کو فوری گرفتار کریں بصورت دیگر بدل کاریز کراس پر آرسی ڈی شاہراہ کو بلاک کیا جائے گا۔

تمبو:صدر پولیس ڈیرہ مرادجمالی نے بروقت کارروائی کرتے ہوئے قتل کے مقدمے میں نامزد دو ملزمان گرفتار کرلیا پولیس کے مطابق ڈپٹی انسپکٹر جنرل نصیرآباد رینج عبدالحئی عامربلوچ ایس ایس پی نصیرآباد میر حسین احمد لہڑی کی ہدایت پر ڈی ایس پی گلاب خان شیخ ایس ایچ او پولیس تھانہ صدر ڈیرہ مراد جمالی انسپکٹر محمد شمن سولنگی نے سب انسپکٹر بشیر احمد کھوسہ، اے ایس آئی عبد الطیف ڈومکی، ہیڈ کانسٹیبل صاحبداد، ہیڈ کانسٹیبل حضور بخش، ہیڈ کانسٹیبل صادق علی پر مشتمل ٹیم کے ہمراہ کاروائی کرتے ہوئے مقدمہ فرد نمبر 08/2023 بجرم 302c .324.34 میں نامزد ملزمان نثار احمد اور پیر بخش ہیجوانی جمالی کو آ لا ہے قتل ٹی ٹی پسٹلز کے ساتھ گرفتار کر کے مزید تفتیش شروع کردی ہے۔

فیصل آباد:جھنگ روڈ پر گلفشاں کالونی میں میٹر کی تار لگاتے ہوئے کرنٹ لگنے سے فیسکو ملازم کی حالت غیر ہو گئی، ریسکیو1122 کی ٹیم نے بروقت کارروائی کرتے ہوئے ملازم کو طبی امداد فراہم کرتے ہوئے ہسپتال منتقل کر دیا۔ بتایا جاتا ہے کہ شاداب کالونی کا رہائشی فیسکو لائن مین 28 سالہ مجاہد ولد اکرام گلفشاں کالونی مکی مسجد کے قریب گھر میں مین لائن سے بجلی کی میٹر کی تاریں لگا رہا تھا کہ اچانک کرنٹ لگنے سے بے ہوش ہو کر گر پڑا، واقعہ کی اطلاع ملتے ہی ریسکیو ٹیم نے موقع پر پہنچ کر مذکورہ لائن مین کو طبی امداد فراہم کرتے ہوئے ہسپتال منتقل کر دیا۔

بھکر : بھکر میں تیز رفتار بس سامنے آنے والی کار پر چڑھ گئی جس کے نتیجے میں 4 افراد موقع پر دم توڑ گئے۔تفصیلات کے مطابق حادثہ بھکر کے ایم ایم روڈ چاندنی چوک کے قریب پیش آیا، راولپنڈی سے کوئٹہ جانے والی تیز رفتار مسافر بس اوور ٹیک کے دوران سامنے آنے والی کار پر چڑھ گئی۔حادثے کے نتیجے میں کار میں سوار 4 افراد جاں بحق ہو گئے جبکہ بس ڈرائیور موقع سے فرار ہو گیا ، پولیس اور ریسکیو ٹیموں نے کار کو کاٹ کر جاں بحق افراد کی لاشیں نکا لیں۔

پشاور: تھانہ پولیس لائنز کی مسجد کے اندر خود کش دھماکے کے نتیجے میں اب تک امام مسجد اور اہلکاروں سمیت 28 افراد شہید ہوگئے۔
ابتدائی اطلاعات کے مطابق دھماکا عین ظہر کی نماز کے وقت ہوا جس کی نوعیت کا معلوم کیا جا رہا ہے، دھماکے کے بعد پولیس اور دیگر قانون نافذ کرنے والے اداروں نے علاقے کو گھیرے میں لے لیا۔ بم ڈسپوزل اسکواڈ کی جانب سے شواہد اکٹھے کیے جا رہے ہیں۔
دھماکے کے بعد پشاور کے تمام اسپتالوں میں ایمرجنسی نافذ کر دی گئی، زخمیوں اور لاشوں کو لیڈی ریڈنگ اسپتال منتقل کر دیا گیا۔ لیڈی ریڈنگ اسپتال پشاور میں زخمیوں کو خون دینے کے لیے اپیل کی گئی ہے۔
لیڈی ریڈنگ اسپتال کے ترجمان محمد عاصم نے تصدیق کی ہے کہ دھماکے میں 18 افراد شہید ہوگئے ہیں جبکہ ایل آر ایچ میں زخمیوں کی تعداد 65 ہوگئی۔ اسپتال لائے گئے زخمیوں میں 10 کی آپریشن تھیٹرز میں سرجری جاری ہے جبکہ 15 زخمیوں کی حالت تشویشناک ہے۔
کمشنر پشاور نے تصدیق کی ہے کہ دھماکے میں شہید افراد کی تعداد 28 تک پہنچ گئی ہے۔

پولیس کے مطابق خدشہ ہے کہ حملے میں بھاری دھماکا خیز مواد استعمال کیا گیا جس کی شدت کے باعث مسجد سے متصل کینٹین کی چھت بھی گر گئی، ملبہ ہٹانے کے لیے کرین منگوائی گئی ہے۔ مسجد کے عقب میں سی ٹی ڈی کا دفتر بھی موجود ہے۔

جی ٹی روڈ کو بالا حصار کے قریب ہر قسم کی ٹریفک کے لیے بند کر دیا گیا ہے۔

حملہ آور نمازیوں کے ساتھ ساتھ تھانے کے مرکزی دروازے سے داخل ہوکر تین سے چار حفاظتی لائن عبور کرکے مسجد میں داخل ہوا۔ دھماکے کے بعد تھانہ پولیس لائن کے مرکزی دروازے کو بند کر دیا گیا ہے۔

تھانے کے باہر میڈیا سے گفتگو میں رہنما جماعت اسلامی عنایت اللہ نے بتایا کہ دھماکے کے نتیجے میں گرنے والے ملبے کے نیچے سے لوگوں کی آوازیں آرہی ہیں، سی سی پی او اور کمشنر سے کہا ہے کہ لوگوں کو جلد سے جلد نکالا جائے۔

لاہور : مانگا منڈی کے علاقے میں واقع ایک نجی ٹرانسپورٹ آفس میں ڈکیتی کی مسلح واردات کے نتیجہ میں تین نامعلوم ڈاکو کمپنی کے منیجر ساجد سے پانچ لاکھ روپے نقدی لوٹ کر فرار ہو گئے۔ تھانہ مانگا منڈی پولیس نے کمپنی منیجر ساجد کی درخواست پر نامعلوم ڈاکوئوں کے خلاف مقدمہ درج کر لیا ہے، پولیس کے مطابق تینوں ڈاکو ایک ہی موٹر سائیکل پر سوار ہو کر آئے اور دفتر میں داخل ہوتے ہی اسلحہ لہرانا شروع کر دیا، کمپنی کے منیجر کو گن پوائنٹ پر یرغمال بنا کر اس کی جیب سے پانچ لاکھ روپے نقدی لوٹ کر آسانی سے فرار ہو گئے۔