Category جرائم

شیخوپورہ (ایمرا نیوز)شیخوپورہ میں 8 افراد کو سوتے ہوئے کلہاڑیوں کے وار سے قتل کر دیا گیا۔پولیس کے مطابق شیخوپورہ کے نواحی گاؤں ہیچڑ میں 8 افراد کو مختلف مقامات پر کلہاڑی کے وار کرکے اس وقت قتل کیا گیا جب وہ سو رہے تھے۔
پولیس کا کہنا ہے کہ ملزم کو آلہ قتل سمیت گرفتار کر لیا گیا ہے، گرفتار شخص بظاہر ذہنی معذور دکھائی دیتا ہے۔ڈی پی او فیصل مختار کا اس حوالے سے کہنا ہے کہ ملزم نے سارے قتل رات 3 بجےکے بعدکیے جب سارا گاؤں سو رہا تھا۔
وزیراعلیٰ پنجاب چوہدری پرویز الٰہی نے شیخوپورہ میں 8 افراد کے قتل کا نوٹس لیتے ہوئے پولیس حکام سے تحقیقاتی رپورٹ طلب کر لی ہے۔
چوہدری پرویز الٰہی کا کہنا ہے کہ لواحقین کو انصاف کی فراہمی ہر صورت یقینی بنائی جائے۔
قتل ہونے والوں میں اسد، فیصل، شیروز، دلاور اور اسد شامل ہیں، تمام افراد گلیوں یا ڈیروں پر سوئے ہوئے تھے، پولیس نے موقع پر پہنچ کر علاقے کا محاصرہ کر لیا ہے۔
ڈی پی او شیخوپورہ فیصل مختار نے کہا ہے کہ ملزم کو آلہ قتل سمیت گرفتار کر لیا گیا ہے، گرفتار شخص بظاہر ذہنی معذور دکھائی دیتا ہے۔

کراچی (ایمر ا نیوز)پاکستان تحریک انصاف کیلئے بیرون ممالک سے غیرقانونی طور پر رقوم کی پاکستان منتقلی کے مقدمے میں نامزد پی ٹی آئی عہدیدار اور سابق وزیراعظم عمران خان کے فرنٹ مین طارق شفیع کی گرفتاری کیلئے کوششیں کرنے والی ایف آئی اے کی ٹیم نے جمعہ کی صبح سرچ وارنٹ کے ساتھ ان کے گھر کی تلاشی لی۔
چھاپہ مارنے والی ایف آئی اے اسٹیٹ بینک سرکل کی ٹیم گزشتہ روز سے ہی مسلسل طارق شفیع کی رہائش گاہ کے باہر موجود تھی، ایف آئی اے حکام کو شبہ تھا کہ وہ گھر میں ہی موجود تھے۔
ایف آئی اے کی ٹیم جمعرات کی دوپہر کے ڈی اے اسکیم ون میں طارق شفیع کی رہائش گاہ پہنچی تھی، اہل خانہ نے طارق شفیع کی رہائش گاہ پر عدم موجودگی کا بتایا۔
اسٹیٹ بینک سرکل کراچی میں 5 اکتوبر کو درج ایف آئی آر میں نامزد مرکزی ملزم کی گرفتاری کے لیے کوششیں کر رہا ہے، مقدمے میں سید عارف مسعود نقوی اور محمد رفیع لاکھانی بھی نامزد ملزم ہیں جب کہ رقوم کی غیر قانونی منتقلی میں شامل ملکی اور غیر ملکی کمپنیوں کو بھی ایف آئی آر میں شامل کیا گیا ہے۔
ایف آئی اے ٹیم کی جانب سے عدالت سے سرچ وارنٹ حاصل کرنے کے بعد گھر کی سرچنگ کی گئی تاہم طارق شفیع گھر میں موجود نہیں تھے۔
ایف آئی آر کے مطابق امن فاؤنڈیشن کےنام سے ملنے والی بیرونی لگ بھگ 9 ارب روپے کی امدادی رقم ملزمان نے ذاتی اکاؤنٹ میں منتقل کرکے خردبرد کی یا خیراتی مقصد کیلئے حاصل کی گئی رقم دیگر مقاصد کےاستعمال کی گئی۔
یہ امدادی رقم بیرون ملک سے طارق شفیع کے کراچی میں واقع بینک اکاؤنٹ میں ٹرانسفر کی گئی جو بعد میں پی ٹی آئی کے اسلام آباد میں بینک اکاؤنٹ میں منتقل کی گئی۔
عارف نقوی کی گرفتاری کے بعد سیشن جج نے ایف آئی اے کو تفتیش کی اجازت دی تھی۔
ایف آئی اے حکام کے مطابق اس غیر معمولی خوردبرد کی کڑیاں سابق وزیراعظم عمران خان سے جڑی نظر آتی ہیں۔

اسلام آباد (ایمرا نیوز)گزشتہ ماہ اپنے شوہر کے ہاتھوں بے دردی سے قتل ہونے والی کینیڈین شہری سارہ انعام کے خاندان نے مبینہ قاتل کے خلاف عدالتی ٹرائل مکمل ہونے تک دارالحکومت میں ہی رہنے کا فیصلہ کرلیا۔ایک رپورٹ کے مطابق اس بات اور فیصلے کی تصدیق مقتولہ سارہ کے والد انعام الرحمٰن نے گزشتہ روز کی۔
سارہ انعام کے والد اور دو بھائیوں نے قریبی رشتہ داروں کے ہمراہ بدھ کے روز اسلام آباد میں ایک نیوز کانفرنس کی، اس پریس کانفرنس میں ان کے ساتھ امریکا میں رجسٹرڈ این جی او ہیلپنگ ہارٹ کیئرنگ سول کے بانی بھی موجود تھے۔
پریس کانفرنس سے خطاب کرتے ہوئے انعام الرحمٰن نے کہا کہ سارہ کا شوہر ایک شکاری اور بھتہ خور ہے جس نے اپنے مذموم مقاصد کے لیے میری بیٹی کو پھنسایا۔انہوں نے مزید کہا کہ معروف صحافی ایاز امیر کے صاحبزادے شاہنواز امیر نے سارہ انعام کو شادی کے لیے راضی کیا اور بعد میں اس سے پیسے بٹورنے لگا۔
ان کا کہنا تھا کہ شاہنواز امیر اس سے رقم کا مطالبہ کرتا رہا، اسے ذہنی تشدد کا نشانہ بنایا اور بعد میں اسے بے دردی کے ساتھ وحشیانہ طریقے سے قتل کر دیا۔انہوں نے بتایا کہ سارہ انعام کینیڈا میں کام کرتی تھی اور یو ایس ایڈ سے بھی منسلک تھی۔
انعام الرحمٰن نے بتایا کہ وہ ابوظبی کی وزارت خزانہ میں بطور کنسلٹنٹ کام کر رہی تھی، تقریباً 8 سے 10 ہفتے قبل سارہ نے انہیں بتایا کہ وہ کسی کے ساتھ رابطے میں ہے اور اس سے شادی کرنا چاہتی ہے، انہوں نے بتایا کہ جولائی کے آخری ہفتے میں اس کی شادی کی خبر سن کر اہل خانہ دنگ رہ گئے۔
والد نے بتایا کہ جب اہل خانہ کو پتا چلا کہ سارہ جس شخص سے شادی کرنا چاہتی ہے وہ ایاز امیر کا بیٹا ہے تو اس بات پر اہل خانہ نے اطمینان محسوس کیا جب کہ بعد میں شاہنواز امیر کی والدہ نے فیملی سے فون پر بات بھی کی اور سارہ انعام کی تعریف کی۔
انہوں نے بتایا کہ سارہ انعام ابوظبی میں قیام پذیر تھی اور شاہنواز امیر پاکستان میں رہتا تھا، انہوں نے شاہنواز امیر سے کئی مرتبہ فون پر بات چیت کی تو اس دوران وہ کافی اچھا شخص محسوس ہوا۔
مقتولہ کے والد نے کہا کہ بعد ازاں شاہنواز امیر نے سارہ سے رقم کا مطالبہ کرنا شروع کیا اور ہمارا خاندان بتدریج اس نتیجے پر پہنچا کہ وہ ایک بھتہ خور ہے، انہوں نے کہا کہ ہمیں نہیں معلوم کہ ملزم نے سارہ سے کتنی رقم بٹوری کیونکہ سارہ کے اکاؤنٹس ابوظبی میں تھے۔
ان کا کہنا تھا کہ سارہ ایک یا 2 مرتبہ پاکستان آئی لیکن اہل خانہ کو اس کا علم نہیں تھا، شاہنواز امیر نے اسے پھنسایا اور بعد میں اسے قتل کر دیا اور یہ سب منصوبہ بندی کے تحت کیا گیا۔

انہوں نے کہا کہ انعام الرحمٰن نے مزید کہا کہ فارم ہاؤس میں صرف 3 لوگ تھے اور آئندہ روز اس کی لاش وہاں سے ملی۔

اسلام آباد(ایمرا نیوز) صدر مملکت نے سزائے موت پانے والے 5 مجرموں کی رحم کی اپیلیں مسترد کردیں۔صدر مملکت کی جانب سے جن پانچ مجرموں کی رحم کی اپیلیں مسترد کی گئی ہیں ان میں محمد شعبان، محمد عمران، محمد افضل، محمد اکبر اور محمد اصغر شامل ہیں، ان تمام مجرموں کے خلاف سفاکانہ جرائم کے الزامات ثابت ہوئے۔
ایوان صدر کے مطابق محمد شعبان کو 3 سالہ بچی سے زیادتی اور قتل کےجرم میں سزائے موت سنائی گئی تھی اور محمد عمران نے گھریلو جھگڑے کے بعد بیوی اور دو بیٹیوں کو ٹوکے سے قتل کیا تھا جب کہ محمد افضل کو والدین اور 6 بہن بھائیوں کو قتل کرنے پر سزائے موت سنائی گئی تھی۔
ایوان صدر کے مطابق محمد اکبر اور محمد اصغر نے 2 افراد کو معمولی جھگڑے پر قتل کیا تھا۔
ایوان صدر کا کہنا ہےکہ صدر مملکت نے آئین کے آرٹیکل 45 کے تحت ان اپیلوں کو مسترد کیا، صدر کسی بھی عدالت، ٹریبونل یا دیگر اتھارٹی کی دی گئی سزائیں معاف، معطل یا کم کرنے کا اختیار رکھتے ہیں۔

کراچی (ایمرا نیوز)سندھ ہائی کورٹ نے منی لانڈرنگ کے الزامات کی انکوائری میں ٹک ٹاکر حریم شاہ کی 7 روز کی حفاظتی ضمانت منظور کرلی۔
رپورٹ کے مطابق جسٹس محمد کریم خان آغا کی سربراہی میں دو رکنی بینچ نے درخواست گزار کو 25 ہزار روپے کے ضمانتی مچلکے جمع کرانے کی ہدایت کی اور واضح کیا کہ اگر وہ مقررہ وقت میں انکوائری افسر کے سامنے پیش نہ ہوئیں تو ضمانت ضبط کر لی جائے گی۔
حریم شاہ کے نام سے معروف فضا حسین نے اپنے وکیل کے ذریعے درخواست ضمانت دائر کی تھی.
درخواست میں کہا گیا کہ وفاقی تحقیقاتی ایجنسی نے جنوری میں انہیں نوٹس بھیجا تھا اور فروری میں سندھ ہائی کورٹ نے ایف آئی اے کو ان کے خلاف کوئی جبری کارروائی نہ کرنے جبکہ درخواست گزار کو انکوائری میں شامل ہونے کی ہدایت کی تھی لیکن وہ پاکستان پہنچ کر انکوائری میں شامل نہیں ہو سکیں۔
وکیل نے مزید کہا کہ حریم شاہ نے اپنے وکیل کے ذریعے اسی طرح کے ریلیف کے لیے گزشتہ ہفتے دوبارہ سندھ ہائی کورٹ سے رجوع کیا تھا لیکن ان کی درخواست خارج کردی گئی۔
وکیل نے دلائل دیتے ہوئے کہا کہ اب درخواست گزار ملک واپس آچکی ہیں، کمرہ عدالت میں بھی حاضر ہیں اور انکوائری میں شامل ہونے کو تیار ہیں، انہوں نے انکوائری میں شامل ہونے کے لیے محدود مدت کے لیے قانونی تحفظ کی استدعا کی۔
چنانچہ کیس کی تفصیلات میں جائے بغیر بینچ نے ان کی ایک ہفتے کے لیے حفاظتی ضمانت منظور کرلی۔

لاہور (ایمرا نیوز) وزیراعلیٰ پنجاب چودھری پرویز الٰہی نے کہا ہے کہ ماڈل ٹاؤن کیس میں انصاف کے تقاضے پورے کئے جائیں گے۔ متاثرین کو ہر صورت میں انصاف مہیا کیاجائے گا۔
وزیراعلیٰ پنجاب کی زیر صدارت اعلی سطح اجلاس ہوا، اجلاس میں سابق وفاقی وزیر مونس الٰہی، صوبائی وزیر راجہ بشارت اور صوبائی معاون خصوصی عامر سعید راں بھی موجود تھے۔ اجلاس میں ایڈووکیٹ جنرل احمد اویس،سیکرٹری قانون او ردیگر نے بھی شرکت کی۔ اجلاس میں سانحہ ماڈل ٹاؤن کیس کاجائزہ لیاگیا۔
اس موقع پر پرویز الٰہی نے کہا کہ ماڈل ٹاؤن کیس میں انصاف کے تقاضے پورے کئے جائیں گے۔ سانحہ ماڈل ٹاؤن کے متاثرین کو ہر صورت میں انصاف مہیا کیاجائے گا۔سانحہ ماڈل ٹاؤن میں مظلوم خاندانوں کو انصاف فراہم کرنا حکومت کی ذمہ داری ہے۔سانحہ کے ذمہ داروں کو ہر صورت انصاف فراہم کیاجائے گا۔
انہوں نے کہا کہ سانحہ ماڈل ٹاؤن میں انصاف کی ذمہ داری پوری کرکے اللہ تعالیٰ اور عوام کے سامنے سرخروہوں گے۔متاثرین سانحہ ماڈل ٹاؤن کی معاونت کے لئے تمام تر اقدامات بروئے کار لائیں گےسانحہ ماڈل ٹاؤن کے بعد سب سے پہلے وہاں پہنچے اور ان کی دادرسی کی۔

کراچی(ایمرا نیوز) ناردرن بائی پاس کے قریب مقابلے میں ہلاک ہونے والے دہشتگرد کوئٹہ دھماکے کے ماسٹر مائنڈ نکلے۔
ذرائع کے مطابق پولیس مقابلے میں مارے جانے والے دہشتگرد مطلوب ترین تھے اور وہ 2021 میں کوئٹہ میں ہوٹل پر ہونے والے دھماکے کے ماسٹر مائنڈ تھے۔
ذرائع کا بتانا ہےکہ دہشتگردوں سے ملنے والا سی 4 ایکسپلوزو بھاری مقدار میں ہے اور اس مواد سے 5 خودکش جیکٹس بنائی جاسکتی تھیں۔
ذرائع کے مطابق دہشتگردوں سےگاڑی کےنیچےآئی ای ڈی لگانے والےمقناطیس بھی ملے ہیں جو 5کلو گرام تک کی آئی ای ڈی کا وزن اٹھا سکتے تھے۔
ذرائع نے بتایا کہ حساس ادارے اور سی ٹی ڈی رات ساڑھے تین بجے موقع پر پہنچے، علاقے کا گھیراؤ کرکے مقابلہ صبح تک چلتا رہا، صبح 7 بجے کے قریب مددگار اور پھر تقریباً 8 بجے ایس ایچ او پہنچا۔

کراچی (ایمرا نیوز)کراچی میں سپر ہائی وے پر پولیس مقابلے کے دوران زخمی حالت میں گرفتار ہونے والے کالعدم تنظیم کے دونوں زخمی دہشتگرد دوران علاج ہلاک ہو گئے۔
ڈی آئی جی سی ٹی ڈی آصف اعجاز شیخ کے مطابق سی ٹی ڈی سندھ اورحساس اداروں نے سپر ہائی وے پر تیسر ٹاؤن کے قریب کارروائی کی، کارروائی کے دوران کالعدم تنظیم سے تعلق رکھنے والے 2 دہشتگرد اور 4 پولیس اہلکار زخمی ہوئے۔
آصف اعجاز شیخ نے بتایا کہ زخمی پولیس اہلکاروں اور دہشتگردوں کو علاج کے لیے کراچی کے نجی اسپتال منتقل کیا گیا تاہم دونوں دہشتگرد اسپتال میں دوران علاج دم توڑ گئے۔
ڈی آئی جی سی ٹی ڈی کا کہنا ہے کہ مارے گئے دہشتگردوں سے اسلحہ اور دھماکا خیز مواد بھی برآمد ہوا، ہلاک دہشتگرد بڑی کارروائیوں کے ماسٹر مائنڈ اور ٹارگٹ لسٹ میں تھے۔
انچارج سی ٹی ڈی راجہ عمر خطاب نے اس حوالے سے بتایا کہ دہشتگرد ایک گھر میں تین چار دن سے رہ رہے تھے، دہشتگرد مطلوب تھے ان کا پروفائل بعد میں شیئر کیا جائے گا۔

اسلام آباد(ایمرا نیوز) مردان میں خودکش حملہ آور ٹارگٹ تک پہنچے سے قبل ہی دھماکے سے ہلاک ہوگیا، واقعہ جمعہ کی نماز سے قبل پیش آیا۔
مردان کے تھانہ چورہ کی حدود میں کھیتوں میں خودکش حملہ آور ٹارگٹ سے پہلے دھماکے سے ہلاک ہوگیا، دھماکے کے بعد کھیت سے ایک شخص کے جسم کے اعضا ملے جس کے بعد پولیس نے واقعے کی تحقیقات شروع کردی ہیں۔
پولیس اور سی ٹی ڈی ٹیموں نے جائے وقوع سے شواہد جمع کرلیے۔ ریجنل پولیس آفیسر محمد علی خان نے جائے وقوعہ کا دورہ کیا۔ دھماکے کے حوالے سے معلومات حاصل کیں۔
واقعے پر ڈی آئی جی مردان محمد علی گنڈاپور نے کہا ہے کہ دھماکے سے خودکش بمبار ہلاک ہوا، دھماکا پولیس تھانہ چورہ کے نزدیک کھیتوں میں ہوا ہے، ریجن میں سیکورٹی ہائی الرٹ کردی گئی ہے۔
پولیس کے مطابق واقعے میں مزید کوئی جانی نقصان نہیں ہوا، واقعے کی جدید سائنس خطوط پر تحقیقات کی جارہی ہیں۔

بلوچستان کے شہر کوہلو میں ایک دکان میں ہونے والے دھماکے میں بارہ افراد زخمی ہوگئے ۔پولیس کے مطابق کوہلو میں دکان میں ہونے والے دھماکے کے نتیجے میں 12 افراد زخمی ہوئے جنہیں ڈی ایچ کیو اسپتال منتقل کر دیا گیا ہے۔
پولیس حکام کا کہنا ہے کہ دھماکے کی نوعیت کا پتا لگایا جا رہا ہے اور واقعے کی جگہ کو سیل کر کے شواہد اکٹھے کیے جا رہے ہیں۔ بم ڈسپوزل اسکواڈ کا کہنا ہے کہ دھماکے کی جگہ کو سیل کر دیا گیا ہے۔