Category جرائم

لاہور(ایمرا نیوز)لاہور پولیس کی کرائم انویسٹی گیشن ایجنسی(سی آئی اے) نے مبینہ طور پر جرائم پیشہ افراد اور بینک ملازمین کے ایک بڑے ریکیٹ کا پردہ فاش کیا ہے جو بینک کلائنٹس کے اکاؤنٹس کی خفیہ تفصیلات ڈاکوؤں کے گروہ کو فراہم کرتے تھے۔
رپورٹ کے مطابق مجرموں کے ریکیٹ میں ایک بینک کے سابق منیجر سمیت 10 مشتبہ ڈاکو اور پانچ بینک ملازمین شامل ہیں۔
اس نیٹ ورک کا پتہ اس وقت لگا جب اس کے پانچ مسلح افراد نے چند ہفتے قبل ڈیفنس کے علاقے میں ایک امیر خاندان کے گھر میں زبردستی گھس کر 25 لاکھ روپے سے زائد مالیت کی نقدی، طلائی زیورات، ہیرے، اے ٹی ایم کارڈ، موبائل فون اور دیگر قیمتی سامان لوٹ لیا۔
سی آئی اے کی جانب سے شروع کی گئی تحقیقات کے دوران یہ بات سامنے آئی کہ ڈاکوؤں نے اس خاندان کو متعلقہ بینک کے ملازمین کی جانب سے اکاؤنٹس کی تفصیلات افشا کیے جانے کے بعد نشانہ بنایا۔
ایک پولیس اہلکار نے بتایا کہ خاندان کے کچھ افراد کینیڈا میں آباد ہیں اور ان کے بینک میں اکاؤنٹس ہیں جہاں سے ان کی خفیہ معلومات مجرموں تک پہنچائی گئیں، بینک کے ملازمین نے مبینہ ڈاکوؤں کو اکاؤنٹ ہولڈرز کی تفصیلات، نام، موبائل فون نمبر اور دیگر تفصیلات فراہم کی تھیں، اس کے علاوہ انہوں نے بینک میں جمع کی گئی بھاری رقم بھی فراہم کی تھی۔
مجرموں کے طریقہ واردات کی تفصیلات بتاتے ہوئے اہلکار نے کہا کہ انہوں نے لیک ہونے والی معلومات کے ذریعے اکاؤنٹ ہولڈرز کے گھر کا پتا لگایا، کال کی اور خاندان سے ’پارسل‘ لینے کو کہا، گھر کا ایک فرد جیسے ہی گھر سے باہر نکلا اور دیے گئے پتے پر پہنچا تو مشتبہ مسلح افراد نے اسے یرغمال بنا لیا، واپس گھر لے گئے اور پورے خاندان کو لوٹ لیا۔
پولیس اہلکار نے مزید کہا کہ کامیاب ڈکیتی کے بعد ملزمان نے خاندان کو مزید بھاری رقم سے بھی محروم کر دیا جبکہ ان اکاؤنٹ ہولڈرز کے موبائل فون نمبرز اور موبائل فونز پر ایک ایپلی کیشن اپ لوڈ کی جو انہوں نے ڈکیتی کے دوران چھین لیے تھے۔
ان کے پاس اکاؤنٹ ہولڈرز کی ماؤں کے نام کے علاوہ بینک کو کارروائی شروع کرنے کے لیے درکار دیگر ضروری معلومات سمیت اکاؤنٹ کی تمام متعلقہ تفصیلات پہلے سے موجود تھیں لہٰذا مشتبہ افراد نے اے ٹی ایم کی رقم کی حد میں اضافہ کر دیا اور بعد میں 35 لاکھ روپے کی رقم واپس لے لی۔
پولیس اہلکار نے بتایا کہ مشتبہ افراد آن لائن بینکنگ سسٹم میں اتنے ماہر تھے کہ انہوں نے چوری شدہ موبائل فونز پر ایپ اپ لوڈ کرنے کے چند گھنٹوں کے اندر کام مکمل کر لیا۔
متاثرہ خاندان کے افراد سے حاصل کی گئی معلومات سے واضح ہوتا ہے کہ انہوں نے لوٹ مار کے فوراً بعد بینک سے رابطہ کیا تھا اور اس سے کہا تھا کہ وہ ان تمام اکاؤنٹس کو بلاک کر دیں جو وہ بینک میں چلا رہے تھے لیکن احتیاطی اقدامات کرنے میں بہت دیر ہو چکی تھی کیونکہ مشتبہ افراد پہلے ہی اے ٹی ایم سے رقم نکال چکے تھے۔
پولیس ذرائع نے بتایا کہ پوچھ گچھ کے دوران ملزمان نے پولیس کو بتایا کہ بینک حکام انہیں جو معلومات فراہم کرتے تھے، اس کی بدولت انہوں نے مختلف بینکوں کے کئی کھاتا داروں کو موبائل فون پر آن لائن ایپس کا استعمال کرتے ہوئے رقم سے محروم کر دیا۔
انہوں نے سی آئی اے پولیس کو بتایا کہ اے ٹی ایم کے استعمال کے حوالے سے سب سے اہم معلومات اکاؤنٹ ہولڈرز کی والدہ کے نام کے علاوہ دیگر مطلوبہ معلومات ہوتی ہیں جو انہیں مل گئیں، ملزمان نے یہ بھی انکشاف کیا کہ وہ بینک حکام/ملازمین کی ملی بھگت سے بے نظیر انکم سپورٹ پروگرام کے کھاتے داروں کو بھی رقم سے محروم کرتے تھے۔
حال ہی میں پولیس اہلکار نے کہا کہ اسی نیٹ ورک نے اکاؤنٹ ہولڈرز سے بڑی رقوم منتقل کیں جن میں 32 لاکھ سے 10 لاکھ روپے تک کی رقوم شامل ہیں۔
جیسے ہی سی آئی اے نے ڈاکوؤں کے 10 رکنی گروہ کا سراغ لگا کر اسے گرفتار کیا، وفاقی تحقیقاتی ادارے (ایف آئی اے) نے ملزمان کی تحویل کے لیے ایجنسی سے رابطہ کیا، گرفتار ملزمان میں پانچ ڈاکو شامل ہیں جو ڈکیتی کی وارداتوں میں براہ راست ملوث تھے۔
اہلکار کا کہنا تھا کہ سی آئی اے نے تحقیقات کا دائرہ کار بڑھا دیا ہے اور وہ بعد میں ملزمان کو ایف آئی اے کے حوالے کرنے کا فیصلہ کرے گی کیونکہ اس اہم کیس پر ابھی بہت کام کرنا باقی ہے۔
ایک سوال کے جواب میں انہوں نے کہا کہ سی آئی اے کی ٹیمیں اب بھی مجرموں کی مدد کرنے والے ایک سابق بینک منیجر اور دیگر ملازمین کا سراغ لگانے کی کوشش کر رہی ہیں۔

ملتان(ایمرا نیوز) نشتر اسپتال کی انتظامیہ نے مشیر وزیراعلیٰ پنجاب طارق گجر کو چھت پر لے جانے والے سکیورٹی گارڈز کو ہی تبدیل کر دیا۔
اسپتال ذرائع کے مطابق انتظامیہ نے 8 سکیورٹی گارڈز تبدیل کر دیا ہے، گارڈز مشیر وزیر اعلیٰ پنجاب کے دورے کے موقع پر چھت کو جانے والے دروازوں پر تعینات تھے۔
ذرائع نے نشتر اسپتال انتظامیہ کے اجلاس کی اندرونی کہانی بناتے ہوئے کہا کہ اجلاس میں کہا گیا مشیر وزیراعلیٰ پنجاب طارق گجر کو چھت پر لے جانے کی ضرورت کیا تھی، مشیر وزیراعلیٰ کو چھت پر جانے سے روکنے کا کام سکیورٹی گارڈز کا تھا۔
یاد رہے کہ دو روز قبل نشتر اسپتال کے سرد خانے کی چھت اور صحن کی ویڈیو سامنے آئی تھی جس میں درجنوں لاوارث لاشیں گل سڑ رہی تھیں۔
ویڈیو منظر عام پر آنے کے بعد وزیراعلیٰ پنجاب چوہدری پرویز الٰہی نے واقعے کا نوٹس لیا تھا جبکہ وزیراعلیٰ پنجاب کے مشیر طاہر گجر نے نشتر اسپتال کا دورہ بھی کیا تھا۔
طارق گجر کا کہنا تھاکہ بدھ کو دن 2 بجے نشتر اسپتال کا دورہ کیا تو مجھے ایک شخص نے کہا اگر نیک کام کرنا ہے تو سرد خانے چلیں، میں نے سرد خانہ کھولنے کا کہا تو نہیں کھول رہے تھے جس پر میں نے کہا اگر نہیں کھولا گیا تو ابھی ایف آئی آر کٹواتا ہوں۔
ان کا کہنا تھاکہ سرد خانہ کھلوایا تو وہاں بہت ساری لاشیں تھیں، اندازےکے مطابق 200 لاشیں سرد خانے میں تھیں، لاشوں پرایک کپڑا تک نہیں تھا، اپنی 50 سالہ عمر میں پہلی بار ایسا دیکھا۔
مشیر وزیراعلیٰ کا کہنا تھاکہ اسپتال کی چھت پر لاشوں کو گدھ اور کیڑے کھا رہے تھے جبکہ چھت پر 3 تازہ لاشیں تھیں اور پرانی 35 لاشیں تھیں جنہیں گنتی کیا اور ویڈیو بنوائی۔

مستونگ (ایمرا نیوز)مستونگ میں گاڑی سڑک کنارے نصب باروری سرنگ سے ٹکرا گئی، دھماکے سے 3 افراد جاں بحق ہوگئے ،بلوچستان کے ضلع مستونگ کے علاقے کابو میں پک اپ گاڑی سڑک کنارے نصب باروری سرنگ سے ٹکرا گئی دھماکے کے نتیجے میں تین افراد جاں بحق جبکہ 6 زخمی ہوگئے ۔
وزیر اعلیٰ بلوچستان عبدالقدوس بزنجو اور مشیرداخلہ ضیاء لانگو نے ڈپٹی کمشنر مستونگ سے بم دھماکے کی رپورٹ طلب کرلی۔
اسسٹنٹ کمشنر دشت فریدہ ترین نے بتا یا کہ مستونگ کے علاقے کابو میں گزشتہ شب ٹیوب ویل پر کام کرنے والے عمران نامی شخص کو قتل کرکے لاش ویرانے میں پھینک دی گئی تھی ۔
مقتول کے ورثا اور رشتہ دار اطلاع ملنے پر لاش اٹھانے کابو گئے، جب یہ لوگ لاش اٹھا کر واپس آرہے تھے تو ان کی پک اپ گاڑی سڑک کنارے نصب بارودی سرنگ سے ٹکرا گئی جس کے نتیجے میں ہونے والے دھماکے میں تین افراد غوث بخش ،گہور خان اور محمد رفیق جاں بحق جبکہ چھ افراد زخمی ہوگئے ۔
زخمیوں میں تین افراد کی حالت نازک بتائی جاتی ہے جنہیں کوئٹہ منتقل کردیا گیا، اسسٹنٹ کمشنر دشت فریدہ ترین نے بتایا کہ علاقے میں مائنز کی موجودگی کے خطرات کے باعث مشکلات کا سامنا ہے۔

نئی دہلی (ایمرا نیوز)بھارت میں سیکڑوں ہندو انتہا پسندوں کی جانب سے مسجد پر دھاوا بولا گیا اور مسلمانوں کو جان سے مارنے کی دھمکیاں دی گئیں۔
بھارتی میڈیا کے مطابق ہندو انتہا پسندوں کی جانب سے مسجد پرحملے کا واقعہ گروگرم شہر میں پیش آیا جہاں 200 کے قریب ہندو انتہا پسندوں نے نماز کی ادائیگی کے دوران ہلہ بولا۔
میڈیا رپورٹس کے مطابق دو روز قبل پیش آنے والے واقعے کا مقدمہ درج کر لیا گیا ہے تاہم تاحال کسی شخص کی گرفتاری عمل میں نہیں آ سکی ہے۔
درج ایف آئی آر میں بتایا گیا ہے کہ مسلمان گروگرم شہر کی مسجد میں عشا کی نماز ادا کر رہے تھے کہ اچانک 200 کے قریب ہندو انتہا پسندوں نے حملہ کر دیا اور نماز ادا کرنے والے مسلمانوں کو مارا پیٹا، مسجد کے ہال کو تالا لگا کر انہیں جان سے مارنے اور گاؤں سے نکالنے کی دھمکیاں بھی دیں۔
یاد رہے کہ بھارت میں اس سے قبل بھی کئی بار مساجد پر حملوں کی خبریں سامنے آ چکی ہیں اور کئی بین الاقوامی ادارے بھی اپنی رپورٹس میں تشویش کا اظہار کر چکے ہیں کہ بھارت میں ہندو انتہا پسندی عروج پر پہنچ چکی ہے۔

سوات (ایمرا نیوز)خیبر پختونخوا کے ضلع سوات میں اسکول وین پر حملے اور اس کے نتیجے میں ڈرائیور کے جاں بحق ہونے کے واقعہ کے خلاف گزشتہ روز شروع کیا گیا احتجاجی دھرنا تاحال جاری ہے جب کہ مظاہرین نے میت کو سپرد خاک کرنے سے بھی انکار کر دیا ہے۔
حملے کے دوران فائرنگ کی نتیجے میں نجی اسکول کی سوزوکی گاڑی کا ڈرائیور محمد حسین موقع پر جاں بحق ہوگیا، واقعے میں تیسری جماعت کے طالب علم منون ولد سیف اللہ کو 3 گولیاں لگی تھیں جو زیر علاج ہے۔
ریسکیو 1122 حکام کے مطابق چارباغ تحصیل کے علاقے گلی باغ میں وین طلبا کواسکول لے جا رہی تھی کہ موٹر سائیکل پر سوار نامعلوم حملہ آوروں نے فائرنگ کر دی، حملے میں ڈرائیور موقع پر ہی جاں بحق ہو گیا جب کہ 2 طالب علموں کو زخمی حالت میں ہسپتال منتقل کر دیا گیا۔
مقامی لوگوں نے اس حملے کا الزام کالعدم تحریک طالبان پاکستان پر عائد کیا تاہم گروپ نے ذمہ داری قبول کرنے سے انکار کیا ہے جب کہ کسی اور تنظیم نے بھی تاحال حملے کی ذمہ داری قبول نہیں کی ہے۔
واقعہ کے خلاف سوات میں احتجاجی مظاہروں کا سلسہ شروع ہوا جو تاحال جاری ہے جب کہ ضلعی انتظامیہ نے مظاہرین سے مذاکرات کیے اور انہیں احتجاج ختم کرانے کی کوشش کی لیکن وہ میں ناکام رہی۔

کراچی(ایمرا نیوز) رینجرز نے رکشے میں بٹھاکر شہریوں کو لوٹنے والے گروہ کے 3 ملزمان کو گرفتار کرلیا۔
ترجمان رینجرز کے مطابق رینجرز اور پولیس نے انٹیلی جنس معلومات کی بنیاد پر مشترکہ کارروائیاں کرتے ہوئے سہراب گوٹھ اور حسین ہزارہ گوٹھ سے ڈکیت گروہ کے 3 ملزمان کو گرفتار کیا جن میں سرغنہ سکندر علی عرف سکو، محمد رفیق عرف گوشو گوپانگ اور امجد علی دائیو شامل ہیں۔
ترجمان کے مطابق ملزمان کے قبضے سے لوٹی ہوئی رقم ایک لاکھ روپے، 2 عدد رکشہ اور موٹر سائیکل برآمد کی گئی ہے۔
ترجمان کے مطابق ابتدائی تفتیش کے دوران ملزمان نے اعتراف کیا کہ وہ کراچی سہراب گوٹھ میں واقع پنجاب بس اڈا، الآصف اسکوائر، واٹر پمپ چورنگی، صدر، شاہراہ فیصل اور دوسرے علاقوں میں مسافروں کو اپنے رکشوں میں بٹھا کر نقدی اورقیمتی سامان لوٹ لیتے تھے۔
ملزمان نے بتایا کیا کہ وہ اب تک تقریباً 45 سے 50 لاکھ روپے کی رقم اور مسروقہ سامان مسافروں سے لوٹ چکے ہیں۔

سوات (ایمر ا نیوز)سوات میں اسکول وین پر فائرنگ سے ڈرائیور جاں بحق اور 2 طالبعلم زخمی ہو گئے۔
پولیس کے مطابق فائرنگ کا واقعہ چارباغ کے علاقے گلی باغ میں پیش آیا جہاں نامعلوم افراد کی جانب سے وین پر فائرنگ کی گئی۔
پولیس کے مطابق اسکول وین پر فائرنگ سے ڈرائیور جاں بحق اور 2 طالبعلم زخمی ہوئے، زخمی طالبعلموں کو طبی امداد کے لیے اسپتال منتقل کر دیا گیا ہے۔
پولیس کا کہنا ہے کہ علاقے کا محاصرہ کر کے ملزمان کی تلاش کے لیے سرچ آپریشن شروع کر دیا گیا ہے۔
یاد رہے کہ آج سے ٹھیک 10 سال قبل 9 اکتوبر 2012 کو ہی سوات میں اسکول وین پر فائرنگ میں ملالہ یوسفزئی کو زخمی کر دیا گیاتھا۔

کراچی (ایمرا نیوز)کراچی وسطی کے علاقے نارتھ ناظم آباد میں پولیس مقابلے کے دوران فائرنگ سے راہ گیر خاتون زخمی ہوگئی جبکہ ان کی گود میں موجود 9 ماہ کی بچی جاں بحق ہوگئی۔
پولیس کے مطابق واقعہ نارتھ ناظم آباد میں فائیو اسٹار چورنگی کے قریب پیش آیا جہاں مسلح ملزمان شہریوں سے لوٹ مار کر رہے تھے کہ اس دوران اطلاع ملتے ہی پولیس پہنچی تو ملزمان نے فائرنگ شروع کردی۔
پولیس نے بتایاکہ اس دوران جوابی فائرنگ بھی کی گئی تاہم ملزمان کی فائرنگ سے راہ گیر 24 سالہ خاتون حنا راشد شدید زخمی ہوئیں جبکہ ان کے گود میں موجود ان کی 9 ماہ کی بچی انابیہ راشد جاں بحق ہوگئی۔
پولیس کے مطابق دونوں کو فوری طور پر عباسی شہید اسپتال منتقل کیا گیا جہاں ڈاکٹروں نے بچی کی موت کی تصدیق کردی۔

گلگت(ایمرا نیوز)جی بی کے سینئر وزیر کرنل ریٹائرڈ عبیداللہ بیگ اغوا کاروں سے کامیاب مذاکرات کے بعد اپنے گھر پہنچ گئے۔
پاکستان تحریک انصاف سے تعلق رکھنے والے کرنل ریٹائرڈ عبیداللہ بیگ کو اسلام آباد سے گلگت جاتے ہوئے بابو سر سے اغوا کیا گیا تھا اور ان کی بازیابی کے لیے مذاکرات جاری تھے۔
سابق ترجمان گلگت بلتستان حکومت فیض اللہ فراق کا کہنا تھا کہ میری عبیداللہ بیگ سے بات ہوئی ہے، صوبائی وزیر کی رہائی کے لیے مذاکرات ہو رہے ہیں جس میں علمائے کرام اور عمائدین بھی شامل ہیں۔
تاہم اب اطلاعات ہیں کہ جی بی کے سینئر وزیر عبید اللہ بیگ آج صبح واپس اپنے گھر پہنچ گئے ہیں۔
کرنل عبیداللہ بیگ کی بازیابی اغوا کاروں سے کامیاب مذاکرات کے نتیجے میں ہوئی اور وہ آج صبح 10 بجے واپس اپنے گھر پہنچے۔

لاہور(ایمرا نیوز) سرکاری زمینوں پر قبضے کے الزامات پر اینٹی کرپشن پنجاب نے سابق اسپیکر پنجاب اسمبلی دوست محمد مزاری کو طلب کر لیا۔ترجمان اینٹی کرپشن پنجاب کے مطابق دوست مزاری کو سرکاری زمینوں پر قبضے کے الزامات پر طلب کیا گیا ہے، زاہد مزاری، شیر محمد مزاری اور معظم مزاری کو بھی طلب کیا ہے۔
ترجمان اینٹی کرپشن کا کہنا ہے کہ دوست محمد مزاری کے خلاف جعلی کاغذات کے ذریعےسرکاری زمینوں پرقبضےکےالزامات ہیں، اینٹی کرپشن پنجاب سرکاری زمینوں پرقابضین کیس میں انکوائری کررہاہے۔
دوست محمد مزاری اور دیگر کو 11 اکتوبر کو لاہور ہیڈ کوارٹرز میں طلب کیا گیا ہے، دوست مزاری کو ڈائریکٹر ویجیلینس ہیڈ کوارٹرز کے آفس میں دوپہر ایک بجے حاضر ہونے کا نوٹس بھیجا گیا ہے۔
ترجمان اینٹی کرپشن کے مطابق اسسٹنٹ کمشنر روجھان، تحصیلدار اور حلقہ پٹواری کو بھی ریکارڈ سمیت طلب کیا گیا ہے۔