Category صحت

لاہور (میڈیا پاکستان) اگر تو چینی زیادہ کھانے کے نتیجے میں ذیابیطس جیسے مرض کا خیال پریشان نہیں کرتا تو یہ جان لیں کہ یہ ایک اور جان لیوا مرض کا باعث سکتا ہے۔جی ہاں زیادہ میٹھا کھانا نہ صرف موٹاپے اور ذیابیطس کا خطرہ بڑھتا ہے بلکہ یہ کینسر کی رسولیوں کا خطرہ بھی چار گنا بڑھا دیتا ہے۔یہ دعویٰ بیلجیئم میں ہونے والی ایک طبی تحقیق میں سامنے آیا۔کیتھولائیک یونیورسٹی کی یہ تحقیق نو سال تک جاری رہی اور برسوں تک لیبارٹری میں کینسر زدہ خلیات کا جائزہ لیا گیا۔نتائج سے معلوم ہوا کہ زیادہ میٹھا کھانا کینسر زدہ خلیات کی تعداد کئی گنا بڑھا دیتا ہے۔عام خلیات آکسیجن کو جسمانی توانائی کے لیے گلوکوز میں بدلتے ہیں مگر کینسر زدہ خلیات چینی سے حاصل کرتے ہیں اور رسولی کی نشوونما کو انتہائی تیز کردیتے ہیں۔آسان الفاظ میں چینی کا بہت زیادہ استعمال کینسر زدہ خلیات کو کینسر کے مرض کی شکل دے دیتا ہے۔تاہم محققین ابھی تک یہ جاننے میں کامیاب نہیں ہوسکے کہ چینی آخر کینسر زدہ خلیات کو ایسا رویہ اختیار کرنے پر کیوں مجبور کردیتی ہے۔اس تحقیق کے نتائج طبی جریدے جرنل نیچر کمیونیکشن میں شائع ہوئے۔اس سے قبل کچھ طبی تحقیق رپورٹس میں زیادہ چینی والی غذاؤں کے استعمال اور لبلبے کے کینسر کے خطرے میں اضافے کی نشاندہی کی گئی تھی۔اس تعلق کی وجہ ممکنہ طور پر یہ ہوتی ہے زیادہ میٹھی غذائیں موٹاپے اور ذیابیطس کا باعث بنتی ہیں اور یہ دونوں لبلے کے افعال پر اثر انداز ہوکر کینسر کا باعث بن سکتے ہیں۔

لاہور (میڈیا پاکستان) کیا کبھی آپ نے محسوس کیا ہے کہ دماغی صلاحیتیں مختلف موسموں میں زیادہ اچھی یا بری کارکردگی دکھاتی ہیں؟ کم از کم طبی سائنس کے مطابق تو ایسا ہوتا ہے۔یہ بات بیلجیئم میں ہونے والی ایک طبی تحقیق میں سامنے آئی۔لائیگی یونیورسٹی کی تحقیق میں بتایا گیا ہے کہ مخصوص دماغی صلاحیتوں پر موسموں کی تبدیلی اثرانداز ہوتی ہے۔تحقیق میں بتایا گیا ہے کہ اگرچہ لوگوں کی دماغی کاموں سے متعلق حقیقی کارکردگی تو موسموں کے ساتھ تبدیل نہیں ہوتی مگر دماغی سرگرمیاں ضرور متاثر ہوتی ہیں۔اس تحقیق کے دوران محققین نے 28 رضاکاروں کے دماغی افعال کا جائزہ تمام موسموں کے دوران کیا اور مختلف ٹاسک کرانے کے دوران دماغی اسکین بھی کیے گئے۔محققین نے دریافت کیا کہ توجہ مرکوز کرنے کی صلاحیت جون میں اپنے عروج پر ہوتی ہے جبکہ دسمبر میں وہ سب سے کم سطح پر ہوتی ہے۔اس کے مقابلے میں کام کی یاداشت خزاں میں عروج پر جبکہ بہار کے موسم میں کم ترین سطح پر ہوتی ہے۔محققین کا کہنا ہے کہ موسموں میں تبدیلی سے دماغی سرگرمیوں کے میکنزم میں آنے والی تبدیلی کی وجہ ابھی واضح نہیں تاہم سابقہ رپورٹس کے مطابق مخصوص موسموں میں دماغی ٹرانسمیٹرز کا لیول زیادہ یا کم ہوتا ہے۔یہ تحقیق طبی جریدے جرنل پروسیڈنگز آف دی نیشنل اکیڈمی آف سائنسز میں شائع ہوئی۔

لاہور (میڈیا پاکستان) نمک دنیا بھر میں سب سے زیادہ استعمال ہونے والی اشیاءمیں سے ایک ہے اور کھانے کا ذائقہ اس کے بغیر اچھا نہیں لگتا۔یہ بہت مہنگا تو نہیں مگر کیا آپ کو معلوم ہے کہ کھانے میں شامل کرنے سے ہٹ کر بھی اسے مختلف طریقوں سے استعمال کرکے زندگی کو آسان بنایا جاسکتا ہے؟جی ہاں واقعی اس کے ایسے متعدد فوائد ہیں جو ہوسکتا ہے آپ کو معلوم بھی نہ ہو۔یہاں آپ نمک کے چند حیران کن طریقہ کار جان سکیں گے۔
مچھروں کے کاٹنے سے ہونے والی جلن سے ریلیف
اگر مچھر کے کاٹنے سے جلن ہورہی ہے تو اپنی انگلی کی پور کو پانی سے نم کریں اور نمک میں ڈبو دیں، اب اس مکسچر کو متاثرہ حصے میں رگڑیں، آپ کو ریلیف محسوس ہونے لگے گا۔
تانبے کی اشیاءکو جگمگائیں
تانبے کے برتنوں کی چمک بحال کرنا چاہتے ہیں؟ تو نمک کو سرکے اور آٹے میں مکس کریں یا اسے لیموں کے عرق میں شامل کرکے برتنوں پر رگڑیں۔
تیل کی چھینٹوں کو روکیں
فرائنگ پین میں کسی چیز جیسے مچھلی کو تلنے سے پہلے کچھ مقدار میں نمک کو چھڑک دیں، اس سے گرم تیل کی چھینٹیں مچھلی کو فرائنگ پین میں ڈالنے پر اچھلیں گی نہیں۔
جوتوں کی بو دور کریں
اگر جوتوں میں بدبو پیدا ہوگئی ہے تو اسے دور کرنے کے لیے کپڑے میں نمک بھر کر لپیٹ لیں، اور کچھ گھنٹوں کے لیے چھوڑ دیں۔ آپ محسوس کریں گے کہ بو غائب ہوگئی ہے۔ اس کے علاوہ آپ جوتوں کے اندر نمک چھڑک دیں اور پھر جوتوں کو ہلائیں، اس کے بعد نمک کو نکال دیں۔
چیونٹیوں سے نجات
چیونٹیوں سے نجات کے لیے نمک اور پانی کو 1:4 کے تناسب سے بوتل میں ملائیں، اس سلوشن کو ہر اس جگہ چھڑک دیں جہاں چیونٹیوں کی بھرمار ہو یا بس نمک ہی متاثرہ حصے پر چھڑک دیں، وہ بھی کارآمد ہوتا ہے۔
سبزیوں اور پھلوں کو براؤن سے بچائیں
پھل اور سبزیاں کٹ جانے کے بعد جلد براؤن ہوجاتی ہیں، اس سے بچنے کے لیے ایک برتن میں کھارا پانی بھر کر پھل یا سبزی کو اس میں ڈبو دیں۔
لہسن اور پیاز کی بو ہاتھوں سے دور کریں
لہسن اور پیاز کاٹنے پر ہاتھوں میں بو بس جاتی ہے، تاہم اس کا حل کافی آسان ہے، اپنے ہاتھوں کو گیلا کریں اور نمک کی کچھ مقدار کو کسی سپاٹ جگہ پر چھڑک کر اپنے ہاتھ اس سے رگڑیں اور پھر دھولیں۔
ائیر فریشنر بنائیں
اس مقصد کے لیے آدھے سے ایک کپ نمک اور بیس سے تیس قطرے کسی خوشبودار تیل یا گلاب کی پتیاں چاہیے ہوں گی۔ اب یہ اشیاءکسی برتن یا جار میں ڈالیں اور چھوڑ دیں، اس سے گھر میں ایک بھینی مہک پھیل جائے گی۔
اچانک بھڑکنے والی آگ کو بجھائیں
یہ طریقہ کار عام طور پر چولہے کے اچانک بھڑکنے سے پیدا ہونے والے شعلوں کے لیے استعمال کیا جاسکتا ہے، ان شعلوں پر نمک چھڑک دیں جس سے آکسیجن کی روانی کٹ جائے گی اور شعلے بجھ جائیں گے۔
استری کی صفائی
اگر استری کے نیچے کوئی کپڑا جل کر چپک گیا ہے تو استری کو تیز ترین درجہ حرارت پر چلائیں اور ایک بھورے پیپر کے ٹکڑے پر نمک چھڑک کر گرم استری اس پر چلائیں۔
سنک کی صفائی
لیموں کے عرق اور نمک کو ملا کر ایک پیسٹ بنائیں اور اس سے اسٹین لیس اسٹٰل کو چمکائیں، یہ پیسٹ کیمیکل کلینرز سے بھی زیادہ بہتر کام کرتا ہے۔

(میڈیا پاکستان)ماہرین کا دعویٰ کےکہ لہسن ایسی قدرتی دوائی ہے جس کے استعمال سے سیکڑوں اقسام کی بیماریاں ختم ہوجاتی ہیں۔انسان قدیم زمانوں سے لہسن کا استعمال کرتا آیا ہے قدیم رومن، مصری، ایرانی،عرب، چائینز اور دنیا کی مختلف اقوام نے لہسن کے فوائد کوتسلیم کیا ہے جب کہ لہسن کو مصالحہ جات کا ’’سردار‘‘ بھی کہا گیا ہے۔
لہسن ایک قدرتی اینٹی بائیوٹک ہے، سردیوں میں اس کے استعمال سے انسان کھانسی، نزلہ اور زکام سے محفوظ رہتا ہے۔ لہسن میں وٹامن سی 15فیصد، وٹامن بی سکس17فیصد، پروٹین1.8فیصد، مینگانیز23فیصد اور فائیبرکی مقدار0.6فیصد ہےجودیگر سبزیوں کےمقابلے میں سب سے زیادہ ہے۔
لہسن کاکھانےمیں استعمال خون کو پتلا کرتا ہے جس سے دل کو خون جسم تک پہنچانے میں آسانی ہوتی ہے اور یہ دل کے امراض کو روکنے اوربند شریانوں کو کھولنےمیں بھی معاون ثابت ہوتاہے جب کہ ہائی بلڈ پریشر کے مریضوں کے لیے لہسن بہترین دوا بھی ہے۔
دل کی شریانیں بند ہونے کی شکایت پر خالی پیٹ لہسن کا استعمال طبیعت بحالی میں جادوئی اثررکھتا ہے جب کہ خالی پیٹ لہسن کااستعمال پیٹ میں موجود بیکٹیریا کو کمزورکردیتا ہے جس سے بیکٹیریا لہسن کی طاقت کے خلاف لڑ نہیں پاتا اورانسان کئی بیماریوں سے محفوظ رہتا ہے۔
اسی طرح اگرجلدی بیماریوں کاسامنا ہے تو خوراک میں لہسن کی مقدار بڑھادیں، لہسن جسم سے زہریلے اور کثیف مادوں کو خارج کرنے میں مدد کرتا ہے اور جلد کو تر وتازہ بناتا ہے۔ قدیم یونانی لہسن کو تھکن سے بچاؤ اور انرجی بڑھانے کے لیے بھی استعمال کرتے تھے۔

لاہور (میڈیا پاکستان) محکمہ سپیشلائزڈ ہیلتھ کیئر کی بلڈنگ کو انتہائی خطر ناک قرار دی گیا ہے اور اب محکمہ ہیلتھ کے تمام دفاتر سول سیکرٹریٹ سے باہر لارنس روڈ پر کرائیے کی عمارت میں اگلے ہفتے سے منتقلی شروع ہوگی۔محکمہ سی اینڈ ڈبلیو نے سول سیکرٹریٹ کے اندر محکمہ سپیلشائزڈ ہیلتھ کیئر کی معارت کو پہلے ہی خطر ناک قرار دے رکھا ہے اور اسے خالی کرنے کا نوٹس جاری کر رکھا ہے۔ اب اس عمارت کی جگہ پر نئی ملٹی فلور عمارت تعمیر کی جائے گی اور محکمہ سپیشلائزڈ ہیلتھ کیئر کے تمام دفاتر لارنس روڈ منتقل کر دیئے جائیں گے۔ محکمہ سپیشلائزڈ ہیلتھ کیئر نے اس ھوالے سے اپنے تمام سیکشن کو نوٹس جاری کر دیا ہے۔

لندن(میڈیا پاکستان) خوبصورت اور پرُکشش نظر آنے کے لیے بالوں کو رنگنے والی خواتین ہوشیار ہوجائیں کیونکہ خضاب کا استعمال چھاتی کے سرطان (بریسٹ کینسر) کا سبب بن سکتا ہے۔
پرنسز گریس اسپتال لندن کے بریسٹ سرجن پروفیسر کیفہ موکبل کے مطابق تحقیق کے دوران یہ بات سامنے آئی ہے کہ جو خواتین سال میں 6 بار سے زائد بالوں کو رنگتی ہیں ان میں سینے کے سرطان کا خدشہ بڑھ جاتا ہے۔ ایسی خواتین جوپابندی سے ہیئر ڈائی کرتی ہیں ان میں بریسٹ کینسر کے خطرات میں 14 فیصد اضافہ ہوجاتا ہے ۔ اس کے برعکس جو خواتین بالوں کو رنگنے کے لیے مہندی اور قدرتی اجزاء سے تیارکردہ رنگوں کا استعمال کرتی ہیں وہ اس جان لیوا مرض سے مکمل محفوظ رہتی ہیں اور بالوں کی صحت پر کوئی منفی اثرات بھی نہیں پڑتے۔
سرجن پروفیسر نے بالوں کو رنگنے کے لیے قدرتی نسخوں کو ترجیح دینے کی تجویز پیش کرتے ہوئے کہا کہ کیمیکلز سے تیار کردہ ہیئرکلرز کا استعمال کم سے کم کریں۔ سال میں صرف 2 سے 6 بار ہیئرڈائی کرنے سے کینسر کے امکانات کو کم کیا جاسکتا ہے۔
پروفیسر کیفہ کا کہنا ہے کہ ہیئرڈائی اور بریسٹ کینسر کا آپس میں تعلق ہے جس پر مزید تحقیق کی ضرورت ہے تاکہ ہیئرڈائی سے ہونے والے نقصانات واضح ہوسکیں۔ انہوں نے مزید کہا کہ بالوں کو رنگنے کے لیے مہندی،ہربل اور قدرتی اجزا کا استعمال مفید ہے اور ان کے کوئی نقصانات بھی نہیں۔

سڈنی(میڈیا پاکستان) نئی تحقیق کے مطابق بادام اور اخروٹ کا استعمال ذیابطیس کے خطرے کو کم کردیتا ہے۔آسٹریلیا کے جارج انسٹی ٹیوٹ فار گلوبل ہیلتھ کے ڈاکٹر جیسن وو کے مطابق 10 مختلف ممالک کے 39,740 بالغ افراد کی تجزیاتی رپوٹ سے حاصل ہونے والے اعداد وشمار کےمطابق لیبارٹری ٹیسٹ نے ثابت کیا کہ وہ افراد جن کے خون میں Linoleic acid اور Arachidonic Acid جو کہ اومیگا 6 فیٹ کا اہم جز ہے پایا گیا ان لوگوں میں ذیابطیس کی ٹائپ ٹو کے پیدا ہونے کا خطرہ دیگر لوگوں کے مقابلے میں 35 فیصد کم پایا گیا۔
ڈاکٹر جیسن وو کاکہنا ہے کہ اپنی خوراک میں معمولی سی تبدیلی دنیا بھرمیں تیزی سے پھیلنے والی بیماری ذیابطیس کی ٹائپ ٹو سے بچاؤ میں مددگار ثابت ہوسکتی ہے۔
ڈاکٹر جیسن کامزیدکہنا تھا کہ Linoleic acid انسانی جسم میں نہیں پایا جاتا اس کو حاصل کرنے کا بہترین ذریعہ صرف خوراک میں سویابین سن فلاور آئل، بادام، کاجو اور اخروٹ کا استعمال ہے جس کو خوراک کا حصہ بنانے سے ذیابطیس کے ٹائپ ٹو سے بچاؤ ممکن ہے۔

لاہور (میڈیا پاکستان) چاول ایسی چیز ہے جسے بہت زیادہ کھایا جاتا ہے اور اکثر اسے ایک سے دو دن بعد بھی گرم کرکے استعمال کیا جاتا ہے تاہم ایسا کرنا صحت کے لیے نقصان دہ ثابت ہوسکتا ہے۔یہ انتباہ برطانیہ کے محکمہ صحت نے جاری کیا۔برطانیہ کی نیشنل ہیلتھ سروس (این ایچ ایس) کے مطابق چاولوں کو دوبارہ گرم کرکے کھانا فوڈ پوائزنگ کا باعث بن سکتا ہے۔اور اہم بات یہ ہے کہ چاول کو دوبارہ گرم کرنا مسئلہ نہیں بلکہ اس غذا کو محفوظ یا ذخیرہ کرنے کا طریقہ اس نقصان کا باعث بن سکتا ہے۔کچے چاولوں میں اکثر مختلف بیکٹریا ہوتے ہیں جو فوڈ پوائزنگ کا باعث بنتے ہیں اور یہ چاول پکنے کے بعد بھی بچ سکتے ہیں۔اگر آپ چاول پکانے کے بعد انہیں کمرے کے درجہ حرارت میں چھوڑ دیتے ہیں تو ان بیکٹریا کی تعداد میں نمایاں اضافہ ہوتا ہے جو دوبارہ گرم کرکے کھانے پر قے یا ہیضے کا خطرہ بڑھاتے ہیں۔چاولوں کو جتنی دیر بھی کمرے کے درجہ حرارت میں چھوڑے جائے گا اتنا ہی یہ بیکٹریا انہیں کھانا غیر محفوظ بناتا رہے گا۔اس کا مطلب ہے کہ یہ ضروری ہے کہ چاول اگر ایک بار کھانے کے بعد کسی اور وقت دوبارہ گرم کرکے استعمال کرنے ہیں تو انہیں فوری طور پر یا ایک گھنٹے کے اندر فریج میں رکھ دیں اور وہاں بھی ایک دن سے زیادہ رکھے چاول استعمال کرنے سے گریز کریں۔اسی طرح تحقیق میں کہا گیا ہے کہ چاولوں کو ایک بار سے زیادہ دوبارہ گرم بھی نہ کریں کیونک وہ بھی نقصان کا باعث بنتا ہے۔

(میڈیا پاکستان) ویسے تو اس وقت دنیا بھر میں انسانوں سے زیادہ موبائل فونز موجود ہیں، اور جس تیز رفتاری سے کمپنیاں انہیں تیار کرکے مارکیٹ میں لا رہی ہیں، اس سے اندازا ہوتا ہے کہ آنے والے چند سال میں اسمارٹ آلات کی تعداد انسان سے تین گنا زیادہ ہوگی۔اب بھی کئی ممالک میں ایک شخص کے پاس ایک سے زائد موبائل موجود ہے، تاہم جب بات کم عمر بچوں کی ہو تو معاملہ کچھ سنگین بن جاتا ہے۔چند سال پہلے تک تو کم عمر بچے صرف والدین کے موبائل فونز اور کمپیوٹر آلات ہی استعمال کرتے تھے، تاہم اب صورتحال تبدیل ہوتی جا رہی ہے۔گزشتہ چند سال سے ترقی یافتہ ممالک سمیت ترقی پذیر اور اب پسماندہ ممالک میں بھی کم عمر بچوں میں اسمارٹ آلات کا استعمال بڑھتا جا رہا ہے، جو بظاہر تو زندگی کو آسان بنا رہا ہے، مگر اس کے کئی منفی نقصانات بھی ہیں۔ایک تازہ رپورٹ کے مطابق صرف امریکا کے ہی 8 سال یا اس سے تھوڑی بڑی عمر کے 42 فیصد بچوں کے پاس اپنے اسمارٹ موبائل اور ڈیوائسز ہیں۔غیر سرکاری تنظیم کامن سینس میڈیا آرگنائیزیشن کی جانب سے کیے جانے والے تازہ سروے سے پتہ چلا کہ امریکا بھر میں کم عمر بچوں میں 2013 کے بعد اسمارٹ موبائل یا دیگر اسمارٹ آلات استعمال کرنے میں دگنا اضافہ ہوا۔سروے کے مطابق 2013 تک 8 سال یا اس سے بڑی عمر کے بچے یومیہ 15 منٹ تک اسمارٹ موبائل یا دیگر ڈیوائسز استعمال کرتے تھے، لیکن اب وہ یومیہ 48 منٹ تک اسمارٹ ڈیوائسز استعمال کر رہے ہیں۔سروے سے پتہ چلا کہ کم عمر بچوں کی جانب سے اسمارٹ موبائل یا دیگر ڈیوائسز خریدنے میں بھی 7 فیصد اضافہ ہوا ہے، اس وقت 42 فیصد بچے اسمارٹ ڈیوائسز کے مالک ہیں۔سروے رپورٹ میں بتایا گیا ہے کہ عام طور پر امریکی بچے یومیہ 30 منٹ تک کتابیں پڑھتے ہیں، جب کہ وہ 48 منٹ تک موبائل ڈیوائسز استعمال کرتےہیں۔اعداد و شمار کے مطابق 8 سال یا اس سے بڑی عمر کے 98 فیصد بچے گھر میں موبائل فون سمیت ٹی وی یا دیگر ڈیوائسز کی اسکرین پر نظریں جمائے رکھتے ہیں۔سروے میں بچوں کی جانب سے اسمارٹ موبائل یا ڈیوائسز کے نقصانات یا فوائد پر روشنی نہیں ڈالی گئی، تاہم کئی ماہرین نے ان اعداد و شمار پر کوئی حیرانی ظاہر نہیں۔ماہرین کا کہنا ہے کہ جدید دور میں گھر سے لے کر اسکول تک، ایئرپورٹ سے لے کر ہوٹل تک اور یہاں تک کھانے کی ٹیبل تک بھی بچے اور جوان اسمارٹ ڈیوائسز کا استعمال کرتے نظر آتے ہیں۔ماہرین کا خیال ہے کہ امریکا میں والدین اسمارٹ موبائل یا ڈیوائسز استعمال کرنے والے اپنے بچوں کی نگرانی بھی کرتے ہیں، جب کہ زیادہ تربچے ان ڈیوائسز پر گیمز کھیلتے رہتے ہیں۔خیال رہے کہ اس سے قبل متعدد بار ماہرین یہ کہہ چکے ہیں کہ کم عمر بچوں کی جانب سے زیادہ وقت تک اسمارٹ ڈیوائسز استعمال کرنا ان کی صحت کے لیے فائدہ مند نہیں۔رواں برس مئی میں امریکا میں ہی ہونے والی ایک تحقیق میں بتایا گیا تھا کہ اگر کوئی بچہ دن بھر میں آدھا گھنٹہ اسمارٹ فون پر گزارتا ہے تو اس عادت سے دیر سے بولنے کا خطرہ 50 فیصد تک بڑھ جاتا ہے۔اس سے قبل اپریل 2016 میں جنوبی کوریا میں ہونے والی ایک تحقیق میں بتایا گیا تھا کہ 7 سے 16 برس کے جو بچے یومیہ 4 گھنٹوں تک اسمارٹ موبائل یا دیگر ڈیوائسز استعمال کرتے ہیں تو ان میں عارضی طور پر بھینگے پن کا خطرہ بہت زیادہ بڑھ جاتا ہے۔

لاہور (میڈیا پاکستان) کیا آپ کو مچھلی کھانا پسند ہے یا نہیں؟ اگر جواب انکار میں ہے تو جان لیں کہ اسے اپنی غذا کا مستقل حصہ بناکر آپ الزائمر اور ڈیمینشیا جیسے دماغی امراض کا خطرہ ٹال سکتے ہیں۔یہ بات ایک طبی تحقیق میں سامنے آئی۔الزائمر سوسائٹی کی تحقیق میں بتایا گیا کہ اومیگا تھری فیٹی ایسڈ دماغ کے لیے فائدہ مند جز ہے اور مچھلی کے ذریعے اسے جسم کا حصہ بنایا جاسکتا ہے۔تحقیق کے مطابق مچھلی میں اومیگا تھری فیٹی ایسڈز کی مقدار کافی زیادہ ہوتی ہے جو کہ ذہن اور دماغی افعال کے لیے اہم ہے۔تحقیق کے مطابق مچھلی کو غذا کا حصہ بنا کر عمر بڑھنے سے آنے والی ذہنی تنزلی کے خطرے کو کم کیا جاسکتا ہے جبکہ دیگر طبی فوائد الگ ہیں۔تحقیق میں بتایا گیا کہ اکثر مچھلیوں میں فاسفورس موجود ہوتا ہے جو کہ دانتوں، ہڈیوں کے لیے اہم ہوتا ہے جبکہ اس میں موجود پوٹاشیم بلڈ پریشر کو صحت مند سطح پر رہنے میں مدد دیتا ہے۔محققین کا کہنا تھا کہ ہفتے میں دو بار مچھلی کا کہنا دماغی صحت کے لیے فائدہ مند ثابت ہوتا ہے۔اس سے قبل گزشتہ سال بھی ایک امریکی طبی تحقیق میں بتایا گیا تھا کہ مچھلی کھانے سے جسم میں اس جینز کی موجودگی کا خطرہ کم ہوتا ہے جو کہ الزائمر کا باعث بنتا ہے اور ہر طرح کا سی فوڈ لوگوں کو یہ فائدہ پہنچا سکتا ہے۔اس تحقیق کے مطابق جو لوگ مچھلی کے تیل کا سپلیمنٹ استعمال کرتے ہیں اور مچھلی نہیں کھاتے، انہیں اس کا کوئی فائدہ نہیں ہوتا۔