Category صحت

لاہور (میڈیا پاکستان) دور جدید میں بڑھا ہوا پیٹ ایک المیہ ہے۔ جس نے ہر مرد و عورت کو پریشان کر رکھا ہے۔ اگرچہ بڑھے ہوئے پیٹ کے حامل افراد بہت سے ٹوٹکے تو آزماتے ہیں لیکن وہ بہت کم ہی کامیاب ہو پاتے ہیں۔ ہم آپ کو آج چند ایسے مشروبات کے بارے میں بتائیں گے جن کا استعمال کر کے آپ اس مصیبت سے جان چھڑا سکتے ہیں۔ یہ مشروبات کم کیلوریز پر مشتمل ہوتے ہیں لیکن پیٹ کو تیزی کے ساتھ یا مختصر وقت میں کم کرنے میں انتہائی مددگار ثابت ہوتے ہیں۔
برف والا پانی
برف والے ٹھنڈے پانی کے استعمال سے آپ کے جسم میں موجود زیادہ سے زیادہ کیلوریز کا خاتمہ ممکن ہے۔ یہ پانی آپ کے میٹابولک نظام کو تیز کردیتا ہے۔ لیکن اپنے مطلوبہ نتائج کے حصول کے لیے آپ کو روزانہ کم سے کم 16 اونس ٹھنڈا پانی پینا ہوگا۔
سبز اور کالی چائے
سبز چائے کا استعمال ایسے افراد کے لیے انتہائی مفید ثابت ہوتا ہے جو اپنا وزن کم کرنا چاہتے ہیں۔ یہ چائے جسم میں موجود کیلوریز کو جلاتی ہے اور میٹابولک نظام کو تیز کرتی ہے۔ سبز چائے دوسرے مشروبات کی نسبت 43 فیصد زیادہ کیلوریز جلانے کی صلاحیت رکھتی ہے اور یہی خصوصیات کالی چائے میں بھی موجود ہوتی ہیں۔ اگر آپ پیٹ کم کرنا چاہتے ہیں تو یہ چائے آپ کے لیے بہترین ہے۔
سبزیوں کا جوس
سبزیوں کا استعمال صحت کے لیے انتہائی فائدہ مند ہوتا ہے ۔اس لیے انہیں اپنی خوراک کا حصہ ضرور بنائیں لیکن اگر سبزیوں کا رس پیا جائے تو یہ نہ صرف دل و دماغ کو فرحت و تازگی بخشتا ہے بلکہ کیلوریز جلانے میں موثر بھی ثابت ہوتا ہے۔ جس کے بعد آپ کا پیٹ کم ہوسکتا ہے۔
تربوز کا جوس
تربوز کا جوس جسم میں نمی کو قائم رکھنے کے حوالے سے ایک بہترین مشروب ہے۔ یہ مشروب انتہائی کم کیلوریز اور بہت زیادہ پانی پر مشتمل ہوتا ہے۔ اس کے علاوہ یہ پٹھوں کو مضبوط بنانے کے ساتھ ساتھ پیٹ کی چربی کو کم بھی کرتا ہے۔ اس لیے پیٹ کم کرنے کے حوالے سے یہ مشروب ایک بہترین انتخاب ثابت ہوسکتا ہے۔
ناریل پانی
ناریل کا پانی الیکٹرو لائٹس (electrolytes) سے بھرپور ہوتا ہے اور یہاں فہرست میں موجود تمام مشروبات سے زیادہ الیکٹرو لائٹس ناریل پانی میں پائے جاتے ہیں اور یہ مادہ جسم میں نمی کو برقرار رکھتا ہے۔ ناریل پانی کو بغیر مصنوعی فلیور اور چینی کے پینا چاہیے۔ یہ توانائی میں اضافہ کرنے کے ساتھ ساتھ میٹابولزم کے عمل کو تیز کرتا ہے۔
غذائی مشروبات
غذائی مشروبات انسان پر مثبت اثر ڈالتے ہیں اور صحت بخش ہوتے ہیں۔ غذائی مشروبات کے استعمال سے آپ وزن کم کرسکتے ہیں اور اس کے لیے ایک گلاس پینا ہی کافی ہوتا ہے کیونکہ یہ طویل وقت تک توانائی فراہم کرسکتے ہیں لیکن یہ خصوصیات تمام غذائی مشروبات میں موجود نہیں ہوتی اس لیے ڈاکٹر کے مشورے کے بغیر استعمال نہ کریں اور اس بات کی تصدیق کرلیں کہ کونسا غذائی مشروب آپ کے لیے بہتر ہے۔
سکم ملک
یہ ایک ایسا دودھ جس میں کریم موجود نہیں ہوتی۔ اس دودھ کا استعمال جسم میں موجود چربی کو کم کرتا ہے۔ ماہرین غذائیات کے مطابق ایسے افراد جو ڈیری مصنوعات استعمال نہیں کرتے ان کی اضافی چربی ایسے لوگوں کے مقابلے 70 فیصد کم ہوتی ہے جوان مصنوعات کا استعمال کرتے ہیں۔اگر آپ اس دودھ سے مطلوبہ نتائچ حاصل کرنا چاہتے ہیں تو روزانہ ایک گلاس ضرورپئیں۔

لندن(میڈیا پاکستان) روزانہ بند گوبھی، شاخ گوبھی (بروکولی) اور ایک سبزی اسپراؤٹ کھانے سے دل کی حفاظت سے لے کر ہڈیوں تک کی حفاظت کی جاسکتی ہے۔پہلے شاخ گوبھی کا ذکر ہوجائے جسے بروکولی کہا جاتا ہے۔ ماہرین نے اسے ’’سپر فوڈ‘‘ قرار دیا ہے کیونکہ یہ امراضِ قلب، کی اقسام کے کینسر اور ٹائپ ٹو ذیابیطس سے بچاتی ہے۔ ماہرین کے مطابق شاخ گوبھی میں موجود اہم اجزا جسم میں اچھی طرح جذب ہوجاتے ہیں اور جگر میں جمع ہوتے رہتے ہیں اس کے بعد وہ خون میں شامل ہوکر اپنی اینٹی آکسیڈنٹس خواص کی بنا پر جلن اور دیگر امراض کو روکتے ہیں اور اسی بنا پر یہ کینسر اور دیگر امراض کو ختم کرسکتے ہیں۔ شاخ گوبھی میں موجود فلے وینوئڈز جادو کا سا اثر رکھتے ہیں۔
دوسری جانب شاخ گوبھی گٹھیا اور جوڑوں کے درد کو دور کرنے کی حیرت انگیز صلاحیت رکھتی ہے۔ اب تازہ خبر یہ ہے کہ گوبھی اور شاخ گوبھی دوپہر میں ایک سے دو کپ کھانے سے آنتوں اور ہاضمے پر گہرا اثر مرتب ہوتا ہے۔ اس کے علاوہ آنتوں میں سے رساؤ بڑی حد تک کم ہوجاتا ہے جس کے ذریعے جراثیم اور دیگر زہر جسم میں داخل نہیں ہوپاتے اور یوں انسان خود کئی بیماریوں سے محفوظ رہتا ہے۔
امریکہ میں آنتوں کے ممتاز ماہر ڈاکٹر گیری پرڈیو کہتے ہیں کہ اگر آپ کی آنتیں اور معدہ درست ہیں تو آپ کینسر سے لے کر دل کے امراض تک سے محفوظ رہ سکتے ہیں اور دونوں طرح کی گوبھی اور سبزیوں کے ریشے (اسپراؤٹ) اس کا بہترین علاج ہیں۔ اس ضمن میں چوہوں پر تجربات کیے گئے ہیں اور ان کے بہت حوصلہ افزا نتائج برآمد ہوئے ہیں۔

لاہور (میڈیا پاکستان) کلونجی ایک قسم کی گھاس کابیج ہے۔اس کا پودا سونف سے مشابہ، خودرو اور چالیس سینٹی میٹر بلند ہوتا ہے۔ پھول زردی مائل،بیجوں کا رنگ سیاہ اور شکل پیاز کے بیجوں سے ملتی ہے ۔یہی وجہ ہے کہ بعض لوگ انہیں پیاز کا ہی بیج سمجھتے ہیں۔ کلونجی کے بیجوں کی تاثیر سات سال تک قائم رہتی ہے۔ صحیح کلونجی کی پہچان یہ ہے کہ اگر اسے سفید کاغذ میں لپیٹ کر رکھیں تو اس پر چکنائی کے داغ دھبے لگ جاتے ہیں۔ کلونجی کے بیج خوشبو دار اور ذائقے کے لئے بھی استعمال کئے جاتے ہیں ۔ اچار اور چٹنی میں پڑے ہوئے چھوٹے چھوٹے تکونے سیاہ بیج کلونجی ہی کے ہوتے ہیں جو اپنے اندر بے شمار فوائد رکھتے ہیں۔ یہ سریع الاثر یعنی بہت جلد اثر کرنے والے ہوتے ہیں۔اطبائے قدیم کلونجی اور اس کے بیجوں کے استعمال سے خوف واقف تھے۔ تاریخ میں رومی ان کا استعمال کرتے تھے۔قدیم یونانی اور عرب حکماء نے کلونجی کو روم ہی سے حاصل کیا اور پھر یہ پوری دنیا میں کاشت اور استعمال ہونے لگی ۔ کلونجی گرم اور سرد دونوں طرح کے امراض میں مفید ہے۔کلونجی نظام ہضم کی اصلاح کے لئے اکسیر کا درجہ رکھتی ہے۔ وہ لوگ جن کو کھانے کے بعد پیٹ میں بھاری پن، گیس یا ریاح سے بھر جانے اور اپھارے کی شکایت محسوس ہوتی ہے وہ کلونجی کا سفوف تین گرام کھانے کے بعد استعمال کریں تو نہ صرف یہ شکایت جاتی رہے گی بلکہ معدے کی اصلاح بھی ہوگی۔
کلونجی کو سر کے کے ساتھ ملا کرکھانے سے پیٹ کے کیڑے مر جاتے ہیں ۔ جب زکام ہونے لگے تو کلونجی کو بھون کر باریک پیس لیں اور کپڑے کی پوٹلی بنا کر بار بار سونگھیں اس سے زکام دور ہو جاتا ہےاگر چھینکیں آرہی ہوں تو کلونجی بھون کر باریک پیس کر روغن زیتون میں ملا کر اس کے تین چار قطرے ناک میں ٹپکانے سے چھینکیں جاتی رہیں گی۔
کلونجی کا جوشاندہ شہد میں ملا کر پینے سے گردے اور مثانے کی پتھری بھی خارج ہوجاتی ہے۔ اگر دانتوں میں ٹھنڈا پانی لگنے کی شکایت ہو تو کلونجی کو سرکے میں جوش دے کر کلیاں کرنے سے فائدہ ہوتا ہے۔چہرے کی رنگت میں نکھار اور جلد صاف کرنے کے لئے کلونجی کو باریک پیس کر گھی میں ملا کر چہرے پر لیپ کرنے سے فائدہ ہوتا ہے۔ ا گر روغن زیتون میں ملا کراستعمال کیا جائے تو او ر زیادہ فائدہ ہوتا ہے ۔آج کل نوجوان لڑکیوں میں کیل، دانوں اور مہاسوں کی شکایات عام ہیں۔ اس کے لئے کلونجی باریک پیس کر، سرکے میں ملا کر سونے سے پہلے چہرے پر لیپ کریں اور صبح دھولیا کریں۔ چند دنوں میں بڑے اچھے اثرات سامنے آئیں گے اس طرح لیپ کرنے سے نہ صرف چہرے کی رنگت صاف و شفاف ہوگی اور مہاسے ختم ہوں گے بلکہ جلد میں نکھار بھی آجائے گا۔ جلدی امراض میں کلونجی کا استعمال عام ہے۔ جلد پر زخم ہونے کی صورت میں کلونجی کو توے پر بھون کر روغن مہندی میں ملا کر لگانے سے نہ صرف زخم مندمل ہو جاتے ہیں بلکہ نشان دھبے بھی چلے جاتے ہیں۔ نبی اکرم ؐ کاارشاد ہے ’’کلونجی استعمال کیا کرو کیونکہ اس میں موت کے سوا ہر بیماری کیلئے شفا ہے‘‘۔

کراچی(میڈیا پاکستان) ڈھیلی اور ڈھلکی ہوئی جلد بدصورت نظر آتی ہے جس کا شخصیت پر منفی اثر پڑتا ہے۔ اگر آپ بھی اس سے پریشان ہیں تو فکر کی کوئی بات نہیں کیونکہ گھربیٹھے آسان نسخے سے جلد کو جوان اور تنا ہوا بناسکتے ہیں۔
عموماً بڑھتی عمر کے ساتھ جلد ڈھیلی ہوجاتی ہے اور اس پر جھریاں پڑجاتی ہیں لیکن بعض اوقات جوانی میں بھی جلد ڈھلکن شروع ہوجاتی ہے۔ گھریلو نسخے کے ذریعے اس مسئلے سے جان چھڑائی جاسکتی ہے۔
ایووکاڈو اور خشک میوہ جات
خشک میوہ جات میں وٹامن ای کی کثیر مقدار پائی جاتی ہے جو کولاجن (collagen) کی غیر ضروری افزائش کو روکنے میں مددگار ثابت ہوتا ہے۔ واضح رہے کہ کولا جن ہماری کھال میں بھی وافر موجود ہوتا ہے اور اس کی زیادتی کھال کے موٹے ہونے اور لٹک جانے پر منتج ہوسکتی ہے۔ ایووکاڈو (ناشپاتی کی شکل کے رس دار پھل) کو پیس کر اس میں زیتون کا تیل اور خشک میوہ جات شامل کرکے تیارکردہ آمیزے کی متاثرہ جلد پر مالش کرنے سے ڈھیلا پن ختم اور جلد مضبوط ہوتی ہے۔
لیموں
لیموں کا شمار دنیا کے مفید ترین پھلوں میں ہوتا ہے جس میں وٹامن سی کی خاصی مقدار ہوتی ہے جبکہ یہ بھی کولاجن بڑھاوا دینے والے مادوں کو توڑ کر جلد کو جوان بناتا ہے جب کہ لیموں جھریوں کے خاتمہ کے لیے بھی کارآمد ہے۔ کٹے ہوئے لیموں کوچہرے پر مسلنے کے بعد 5 سے 10 منٹ چھوڑ دیا جائے اور پھر ٹھنڈے پانی سے منہ دھویا جائے تو جلد پر سے چکنائی ختم ہوجاتی ہے لیکن نمی برقرار رہتی ہے۔
کیلا
ایک کیلا کچل کر چہرے پر لگائیں اور 20 منٹ تک اسے چھوڑ دیں۔ پھر ٹھنڈے پانی سے منہ دھو لیں۔ یہ عمل بڑھتے ہوئے کولاجن کو روکنے میں کارگر ہے۔ کیلے کو بطور ماسک بھی استعمال کیا جاسکتا ہے ۔ کچلے ہوئے کیلے میں ایک چوتھائی کپ کم چکنائی والی کریم اور ایک وٹامن ای کیپسول شامل کرکے پیسٹ بنالیں جسے چہرے پر ماسک کی صورت میں استعمال کرسکتے ہیں۔
کھیرا اور ایلوویرا (گھیکوار)
جڑی بوٹیوں کی دنیا میں ایلوویرا (گھیکوار) کو ایک خاص اہمیت حاصل ہے۔ چہرے کے حسن میں نکھار لانے کیلئے لوگ صدیوں سے گھیکوار استعمال کرتے آرہے ہیں۔ ایک عدد کھیرے کو کچل کر دو چمچے گھیکوار کا رس شامل کرکے چہرے پر ماسک لگالیں اور 30 منٹ تک سوکھنے کےلیے چھوڑدیں۔ پھر گرم پانی کے ساتھ منہ دھولیں۔ اس عمل سے جلد چست ہوگی اور جھریاں ختم ہوں گی جب کہ جلد کا لٹکنا بھی بند ہوجائے گا۔

کراچی(میڈیا پاکستان) عام طور پر سفید چینی کو صحت کے لیے مضر جانا جاتا ہے لیکن اس کے عکس اس کے کچھ حیرت انگیز فائدے اورکمالات ہیں جو شاید بہت کم لوگ جانتے ہیں۔
زخم بھرنا:
ایک تحقیق میں یہ بات سامنے آئی ہے کہ زخموں پر چینی کے دانے چھڑکنے سے زخم جلدی بھر جاتے ہیں۔ جب اینٹی بایوٹکس اورعلاج کے دوسرے طریقوں سے افاقہ نہ ہوتو چینی کا استعمال مددگار ثابت ہوسکتا ہے۔
خشک ہونٹ:
اپنی انگلی کو پانی سے بھگوئیں اور پھر چینی میں ڈال کر اسے ہونٹوں پر آرام سے رگڑ لیں۔ ایسا کرنے سے ہونٹوں کی خشکی ختم ہوجائے گی اور جلد ملائم بن جائے گی۔
یہ بھی پڑھیں: بار بار بیمار کرنے والی عادتیں
فیشل اسکرب:
ایک چمچہ چینی ، ایک چمچہ چاول کا آٹا اور ایک چمچہ دودھ کو ملا کر تیار کردہ آمیزہ کو تھوڑا تھوڑا کرکے چہرے پر لگائیں،پانچ منٹ تک مالش کرنے کے بعد سوکھنے کے لیے چھوڑ دیں پھر ٹھنڈے پانی سے منہ دھو لیں تو چہرہ صاف ستھرا اور جلد ملائم ہوجائے گی۔ یہ عمل کیل مہاسے نکالنے کے لیے کارآمد ہے۔
بسکٹس کو تازہ رکھیے:
اگر آپ بسکٹس کو زیادہ دیر تک تازہ رکھنا چاہتے ہیں تو چینی کا استعمال کریں۔ جس جگہ آپ نے کھلے بسکٹس رکھے ہیں اس کے ساتھ چینی کے ٹکڑے رکھ دیں۔ ایسا کرنے سے بسکٹس نرم نہیں ہوں گے ۔
ہاتھ کی صفائی:
اگر آپ کے ہاتھ پر انجن آئل لگ گیا ہے تو فکر کی کوئی بات نہیں،بس چینی کو کسی بھی آئل میں شامل کریں اور پھر اسے ہاتھوں پر رگڑنے سے انجن آئل سے ہونے والی چکناہٹ ختم ہوجائے گی۔
گھاس کے نشان:
چینی کو کپڑوں پرلگے داغ یا نشانوں کو دور کرنے کے لیے بھی استعمال کیا جاسکتا ہے۔ چینی کے دانوں کو کپڑے پر لگے گھاس کے نشان پر ڈال دیں اور ایک گھنٹے تک ایسے ہی چھوڑ دیں،پھرحیران کن نتیجہ پائیں۔
سوجن ختم:
کیڑے مکوڑوں کے کاٹنے سے ہونے والی سوجن کا علاج بھی چینی سے ممکن ہے۔ چینی کے ٹکرے کو متاثرہ حصہ پر لگانے سے سوجن ختم ہوجاتی ہے۔
پھولوں کی تازگی:
پھولوں کو تازہ رکھنا ہے تو بس 3چمچے چینی اور2چمچے سرکے کو پانی میں شامل کریں اور اس آمیزے میں پھولوں کی شاخ ڈال دیں ۔ چینی شاخ کے لیے فائدہ مند ہے جب کہ سرکا جراثیم سے محفوظ رکھنے کا کام کرتا ہے۔

(میڈیا پاکستان)قوت بخش مشروبات (انرجی ڈرنکس) کے حد سے زیادہ استعمال سے ایک شخص برین ہیمرج کا شکار ہوگیا جس کے بعد ڈاکٹرز کو اس کی کھوپڑی کا کچھ حصہ آپریشن کرکے نکالنا پڑا۔میڈیا رپورٹس کے مطابق بری آنا نامی خاتون نے سماجی رابطوں کی ویب سائٹ پراپنے شوہر آسٹن کی کہانی بیان کی جسے انرجی ڈرنکس کی لت لگ گئی تھی، وہ کام کے دوران اورسفر کرتے ہوئے تواتر کے ساتھ انرجی ڈرنکس پینے لگا تھا جو بعدازاں دماغ کی بیماری کا سبب بنا اور اسے اپنے سر کے ایک حصے سے محروم ہونا پڑا۔بری آنا نے سوشل میڈیا پراپنی اوراپنے شوہرکی تصویر پوسٹ کی جس میں ان کے شوہر کے سرکا اگلا حصہ غائب تھا اوراس تصویر کی وضاحت کرتے ہوئے بری آنا نے انکشاف کیا کہ آسٹن نے جب زیادہ وقت دفتر میں گزارنا شروع کیا تو خود کو چاک و چوبند رکھنے کی غرض سے انرجی ڈرنکس کا استعمال بڑھا دیا اور آہستہ آہستہ اسے اس کی لت لگ گئی۔
انہوں نے مزید بتایا کہ انرجی ڈرنکس کی زیادتی کی وجہ سے آسٹن کو برین ہیمرج ہوا اور ڈاکٹرز نے اس کی زندگی بچانے کے لیے سر کا آپریشن کیا جو 5 گھنٹے تک جاری رہا اور اس دوران ڈاکٹرز کو آسٹن کی کھوپڑی کا کچھ حصہ نکالنا پڑا۔
انھوں نے کہا کہ ابتداء میں وہ بیماری کی وجہ سے سے لاعلم تھیں لیکن ڈاکٹرز نے آسٹن کے برین ہیمرج کا ذمہ دار انرجی ڈرنکس کو قرار دیا۔
واضح رہے کہ بری آنا کی جانب سے اپنے شوہرکے ساتھ سوشل میڈیا پرجاری کی گئی تصویرکو کچھ دیر بعد سوشل میڈیا سے ہٹادیا گیا اور اس جوڑے نے درخواست کی ہے کہ انٹرویو کے لیے ان سے رابطہ نہ کیا جائے۔

پورٹ لینڈ(میڈیا پاکستان) دانت قدرت کا انمول تحفہ ہیں جو خوبصورتی کے ساتھ ساتھ اچھی صحت کے ضامن بھی ہوتے ہیں۔ کسی بالغ انسان کا دانت ٹوٹ جائے تو تکلیف دہ سرجری کے ذریعے مصنوعی دانت لگانا پڑتا ہے جس پر بھاری اخراجات ہوتے ہیں لیکن اب جدید طریقوں کے بجائے قدرتی طریقے سے اپنے دانت خود اگائے جاسکتے ہیں۔کولمبیا یونیورسٹی کی ایک ٹیم نے ڈاکٹر جیریمی ماؤ کی سربراہی میں طویل تحقیق کے بعد ایک ایسا قدرتی طریقہ دریافت کیا ہے جس میں اسٹیم سیلز کے ذریعے 9 ماہ میں قدرتی طور پر دانت اگانا ممکن ہے۔ واضح رہے کہ اسٹیم سیلز ان خلیوں کو کہتے ہیں جو جسم کے کسی بھی عضو میں موجود خلیات بنانے کی صلاحیت رکھتے ہیں۔
ڈاکٹرجیریمی کے مطابق اسٹیم سیلز نئے دانتوں کی نشوونما میں بھی مدد فراہم کرتے ہیں اور اس قدرتی طریقے کی دریافت کے بعد دانتوں کی سرجری کی ضرورت نہیں پڑے گی۔ اسٹیم سیلزکودانتوں کے ساتھ ملاکر ان میں ٹشوز شامل کرتے ہوئے نئے دانت اگائے جاسکتے ہیں۔ اگر کوئی دانت ٹوٹ جائے تو اس کے نچلے حصے میں موجود خالی مسوڑھے کے اندر اسٹیم سیلز اور ٹشوز کا ملاپ کرنے سے دانت دوبارہ اُگنا شروع ہوجاتا ہے۔ اسٹیم سیلز ان خلیات کو جنم دیتے ہیں جو ٹوٹے ہوئے دانت کو دوبارہ اگانے میں کلیدی حیثیت رکھتے ہیں؛ اور یوں نیا دانت بنانے میں مدد فراہم کرتے ہیں۔یہ طریقہ دانت اگانے کا قدرتی اور آسان عمل ہے تاہم یہ صبر آزما بھی ہے کیونکہ یہ عمل 9 ہفتے لیتا ہے۔ اس قدرتی طریقے سے مصنوعی دانتوں سے چھٹکارا حاصل ہوتا ہے اور بار بار ڈاکٹر کے پاس جانے کی ضرورت نہیں پڑتی۔ یہ قدرتی طریقہ اپنے آپ میں مکمل اور ہر ایک کے لیے ہے یعنی جو چاہے اسے آزما سکتا ہے۔
یہ تحقیق ابھی طبّی آزمائشوں (کلینیکل ٹرائلز) کے ابتدائی مرحلے سے گزر رہی ہے اور اگر کامیاب ثابت ہوگئی تو آنے والے چند برسوں میں مصنوعی دانت لگانے اور بتیسی بنانے والوں کا کاروبار شدید طور پر متاثر ہوسکتا ہے۔

واشنگٹن(میڈیا پاکستان) ماہرین نے خبردار کیا ہے کہ ایک رات کی نیند کی خرابی، دماغی سرکٹ میں تبدیلیاں پیدا کرسکتی ہے اور مستقبل میں یہ الزائیمر اور ڈیمنشیا جیسے امراض کی وجہ بھی بن سکتی ہے۔نیند کی کمی دماغ میں ان پروٹین کو بڑھاتی ہے جو الزائیمر کی وجہ بنتے ہیں۔ واشنگٹن یونیورسٹی کے ماہر ڈیوڈ ہولزمین اور ان کی ٹیم کا کہنا ہے کہ مسلسل نیند کی ’خرابی سے دماغ میں کم ازکم ان دو پروٹین کی مقدار بڑھ جاتی ہے جو الزائیمر کی وجہ قرار دیئے گئے ہیں۔‘
ماہرین کا خیال ہے ادھیڑ عمری میں نیند کی مسلسل کمی زندگی میں آگے چل کر الزائیمر کا خطرہ بڑھا دیتی ہے۔ صرف امریکہ میں ہی اس وقت 50 لاکھ افراد اس مرض کا شکار ہیں جس میں دھیرے دھیرے یادداشت غائب ہوجاتی ہے اور دماغی صلاحیت بھی شدید متاثر ہوتی ہے جبکہ گزشتہ 15 برس میں اس سے اموات میں 55 فیصد اضافہ دیکھا گیا ہے۔
ماہرین اب تک الزائیمر کی اصل وجوہ جاننے کی کوشش کررہے ہیں لیکن اب تک یہ بات ثابت ہوچکی ہےکہ ٹاؤ اور امیلوئڈ بی ٹا نامی دو پروٹین اس بیماری میں بڑھ جاتے ہیں۔ اگرچہ نیند اور الزایئمر کے تعلق سے ہم پہلے بھی واقف تھے لیکن اب دو پروٹین کی صورت میں یہ بات مزید مستحکم ہوچکی ہے۔
اگر صرف ایک رات کی نیند خراب ہوجائےتو دماغ میں امیولوئڈ بی ٹا بڑھ جاتا ہے اور اگر بدقسمتی سے ایک ہفتے کی نیند خراب ہوجائے تو ٹاؤ پروٹین بھی بڑھنا شروع ہوجاتا ہے۔ اگر یہ سلسلہ کئی برس تک جاری رہے تو اس سے دماغ شدید متاثر ہوسکتا ہے اور متعلقہ فرد الزائیمر کے دہانے پر جا پہنچتا ہے۔
اس کےلیے سائنسدانوں نے 35 سے 65 برس تک کے 17 صحت مند افراد کو سروے میں شامل کیا اور ان پر نیند نوٹ کرنے والے آلات دو ہفتے تک لگا کر ان کی نیند کا دورانیہ نوٹ کیا۔ اس کے بعد ایک ڈارک روم میں بھی کھوپڑی پر برقیرے (الیکٹروڈز) لگا کر رضاکاروں کی نیند کا جائزہ لیا گیا۔ اس دوران نصف لوگوں کی نیند کو متاثر کیا گیا۔
کچھ روز بعد جن کی نیند خراب کی گئی تھی، ان کے دماغوں میں مذکورہ بالا دونوں پروٹین کی زیادتی نوٹ کی گئی جو دس فیصد تک تھی۔ تاہم اچھی خبر یہ ہے کہ جیسے ہی آپ کی نیند بہتر ہوتی ہے تو دماغ میں ان مضرپروٹین کی تعداد معمول پر آنا شروع ہوجاتی ہے۔

واشنگٹن(میڈیا پاکستان) سافٹ ڈرنک یا سوڈا اور موٹاپے کے درمیان تعلق پر ہم بہت سی خبریں پہلے ہی دے چکے ہیں لیکن اب ماہرین کہہ رہے ہیں کہ اگر آپ سافٹ ڈرنک کے رسیا ہیں تو ہفتے میں ایک گلاس سافٹ ڈرنک میں کمی سے بھی وزن کم کرنے میں مدد ملتی ہے۔
غذائی ماہرین کا مشورہ ہے کہ اگر آپ اپنا وزن کم کرنے میں سنجیدہ ہیں تو سب سے پہلے سافٹ ڈرنک پر مکمل پابندی یا اس میں کمی سے شروعات کیجئے کیونکہ سافٹ ڈرنک اور موٹاپے کا چولی دامن کا ساتھ ہے۔شکر سے بھرپور مشروبات موٹی کمر کی اہم وجہ ہیں۔ اب ہارورڈ ٹی ایچ چین اسکول آف پبلک ہیلتھ اینڈ میڈیسن اور میکیسکو نیشنل انسٹی ٹیوٹ آف پبلک ہیلتھ نے ایک سروے میں 11 ہزار سے زائد میکسیکن خواتین سے سوالات کئے ہیں جن میں شکر والی اور بغیر شکر کی سافٹ ڈرنکس کے متعلق پوچھا گیا۔ پہلا سروے 2006 اور دوسرا سروے 2008 میں کیا گیا ۔ اس دوران ان کا وزن اور کمر کی موٹائی بھی نوٹ کی گئی ۔
طرزِ زندگی اور کھانے پینے کے معمولات نوٹ کرنے کے بعد ماہرین نے دیکھا کہ جن خواتین نے ہفتے میں ایک گلاس سافٹ ڈرنک کی کمی کی ان کے وزن میں 0.88 پونڈ کمی ہوئی جبکہ اگر کسی خاتون نے فی ہفتہ ایک کین سافٹ ڈرنک زیادہ پی تو اس کے اوسط وزن میں 0.66 پونڈ کا اضافہ دیکھا گیا۔
ماہرین نے اپنے تحقیقی مقالے میں لکھا ہے کہ اگر فاسٹ فوڈ کے ساتھ سافٹ ڈرنک لازمی پی جائے تو اس سے دل اور بلڈ پریشر کے امراض کا خطرہ بھی بڑھ جاتا ہے۔ ماہرین نے اعتراف کیا کہ اس سروے میں چند ہزار خواتین شامل تھیں اور صرف دو سال تک انہیں نوٹ کیا گیا تھا لیکن ہم کہہ سکتے ہیں کہ چینی سے بھرپور سافٹ ڈرنک انسانی وزن بڑھانے میں اہم کردار ادا کرتی ہیں۔
دلچسپ بات یہ ہے کہ اس سروے میں شریک وہ خواتین مزید وزنی ہوگئیں جو پہلے سے ہی موٹاپے کی جانب مائل تھیں۔ واضح رہے کہ یہ خواتین پہلے سے ہی سافٹ ڈرنک باقاعدگی سے پیتی تھیں۔

لاہور(میڈیا پاکستان) پیدائش کے بعد بچے کو دودھ نہ پلانے سے ماں کے کینسر میں مبتلا ہونے کا خطرہ بڑھ جاتا ہے۔لاہور گیریژن یونیورسٹی میں پنجاب فوڈ اتھارٹی کے زیراہتمام آگاہی سیمینار منعقد ہوا جس میں مقررین نے ماں کے دودھ کی افادیت اور پاکستان میں بریسٹ کینسر کی وجوہات پر روشنی ڈالی۔ سیمینار سے خطاب کرتے ہوئے ڈی جی پنجاب فوڈ اتھارٹی نورالامین مینگل نے کہا کہ ماں کے دودھ کا کوئی متبادل نہیں، بچوں کو دودھ نہ پلانے سے ماؤں میں کینسر پھیلنے کی شرح بڑھ رہی ہے۔
ڈی جی فوڈ اتھارٹی نورالامین مینگل نے کہا کہ ماؤں کو بچے کی پیدائش کے فوراً بعد ڈبے کے دودھ کی ترغیب دینا دھوکہ دہی ہے، بچے کی پیدائش کے فوراً بعد دودھ نہ پلانے سے ماں کے جسم میں تبدیلیاں آتی ہیں جو کینسر کا باعث بنتی ہیں، فارمولا ملک کے حوالے سے پنجاب فوڈ اتھارٹی پالیسی وضع کر چکی ہے اور فارمولا ملک بنانے والی کمپنیوں کو مارکیٹنگ کے قواعد و ضوابط کا پابند بنا رہے ہیں۔