Category صحت

کراچی(میڈیا پاکستان) اگر آپ بار بار بیمار پڑتے ہیں تو اس کی خاص وجوہ میں روزمرہ کی عادات بھی ہیں جو آپ کو بار بار بیمار کرنے کا سبب بنتی ہیں۔طبی ماہرین کی اکثریت اس بات پر یقین رکھتی ہے کہ جراثیم ہر جگہ موجود ہوتے ہیں خصوصاً گھروں کے فرش اور باتھ روم کے کموڈ میں ان کی بہتات ہوتی ہے جو انتہائی مضر صحت بات ہے۔ جراثیم سے محفوظ رہنے کےلیے کچھ عادات کوترک کرنے کی ضرورت ہے تاکہ آپ صحت مند زندگی گزار سکیں۔
بیت الخلا میں موبائل استعمال کرنے کی عادت
آج کل بیت الخلا میں موبائل فون کا استعمال ایک عام سے عادت بنتی جارہی ہے اور ایسا کرنے والے افراد ایک خوفناک غلطی کے مرتکب ہوتے ہیں۔ میٹروپولیٹن یونیورسٹی کے ڈاکٹر پال میتیول کا کہنا ہے کہ ٹوائلٹ استعمال کرتے ہوئے موبائل فون کو چھونا ایک بدترین عمل ہے جس سے اجتناب لازمی ہے۔ کموڈ، واش بیسن اور باتھ روم کی چیزوں پر جراثیم کی ایک قسم ’’ای کولائی‘‘ پائی جاتی ہے جو انفیکشن اوربیماری کی ابتدائی وجہ بنتا ہے۔ اس لیے باتھ روم میں موبائل کا استعمال نہ کیا جائے تاکہ ہیضے سے بچاجاسکے۔
ہینڈ بیگ اور پرس کی صفائی نہ کرنا
ہینڈ بیگ اور پرس ہماری روزمرہ زندگی میں استعمال ہونے والی ضروری اشیاء میں شامل ہیں اور ان کا ہمارے ہاتھوں سے گہرا بھی تعلق ہے۔ عموماً خواتین ہینڈ بیگز کو جگہ جگہ رکھتی ہیں جہاں موجود جراثیم بیگ سے چپک جاتے ہیں اور پھر یہ بیگ ہاتھوں میں آجاتا ہے جس سے بیماری لگنے کے خدشات بھی بڑھ جاتے ہیں۔ پانی سے کپڑے کو گیلا کرکے پرس اور ہینڈبیگ کی صفائی کو معمول بنانے سے بیماری کی ابتدائی وجوہ سے بچا جاسکتا ہے۔
گھروں میں جوتے پہننے کی عادت
ایک تحقیق کے مطابق ہر وقت جوتے پہن کر رہنے والے تقریباً 40 فیصد لوگ ہیضے کی وجہ بننے والے جراثیم کی ایک قسم کا شکار ہوتے ہیں۔ ڈاکٹر میتیول کا کہنا ہے کہ لوگوں کو گھرمیں داخل ہوتے ہی اپنے جوتے، چپلیں یا سینڈلیں وغیرہ دروازے ہی پر اتار دینے چاہئیں جب کہ سفر کے دوران اپنے اضافی جوتوں کوکپڑے کے بیگ میں پیک کرکے رکھنا چاہیے۔
ٹی وی ریموٹ
عموماً گھروں کی صفائی کے دوران ریموٹ کنٹرول کی صفائی کو نظرانداز کردیا جاتا ہے۔ ریموٹ کنٹرول کی صفائی کو غیر ضروری نہ سمجھیے کیونکہ اکثر گھروں میں ایک سے زائد افراد ریموٹ کنٹرول استعمال کرتے ہیں جس سے جراثیم لگنے کے خدشات بڑھ جاتے ہیں۔ گیلے کپڑے کے ساتھ ریموٹ کو صاف کرنے سے جراثیم کو کنٹرول کیا جاسکتا ہے۔

لندن(میڈیا پاکستان) یہ خبر مرد حضرات میں میٹھے کی عادت چھڑانے میں معاون ثابت ہوسکتی ہے کہ زیادہ مقدار میں شکر کھانے سے جگر پر منفی اثرات مرتب ہوتے ہیں۔ حیرت انگیز بات یہ ہے کہ بالکل صحت مند مرد بھی اس مرض کا شکار ہوسکتے ہیں۔
برطانوی ماہرین نے ایک مطالعے کے بعد انکشاف کیا ہے کہ شکر سے بھرپور کھانے سے خون اور جگر میں چربی کا اضافہ ہوجاتا ہے جو آگے چل کر کئی امراض کی وجہ بن سکتا ہے۔ برطانیہ میں یونیورسٹی آف سرے کے پروفیسر بروس گریفن نے کہا ہے کہ شکر کی بے تحاشہ مقدار استحالے (میٹابولزم) کو متاثر کرتی ہے ، جگر پر منفی اثر ڈالتی ہے اور دل کے امراض کی وجہ بھی بن سکتی ہے۔
دیگر ماہرین کا خیال ہے کہ شکر کی زائد مقدار سے جگر کے میٹابولزم پر بوجھ بڑھ جاتا ہے۔ اس کے لیے گریفن اور ان کی ٹیم نے درمیانی عمر کے ایسے لوگوں کو منتخب کیا جن میں سے 11 کے جگر میں زائد چکنائی اور بقیہ 14 افرد کے جگر میں کم چربی موجود تھی۔ جگر میں چربی کی مقدار کو الٹراساؤنڈ اور دیگر ٹیسٹ سے معلوم کیا جاتا ہے۔
جگر میں زائد چربی کی اس کیفیت کو نان الکوحلک فیٹی لیور ڈیزیز (این اے ایف ایل ڈی) کہا جاتا ہے۔ یہ موٹاپے کی وجہ سے ہوتی ہے، جگر کو تباہ کرسکتی ہے اور دیگر کئی امراض کی وجہ بن سکتی ہے۔ تجربے کے طور پر ماہرین نے مردوں کے ایک گروہ کو تین ماہ تک زائد چینی یعنی 650 کیلوریز کے برابر شکر کھانے کو کہا جبکہ بقیہ افراد کو اسی عرصے میں کم چینی یعنی 140 کیلوریز کے برابر شکر یا اس سے بنی اشیا کھانے کو دی گئیں۔
اب ان میں سے جن افراد نے زیادہ شکر کھائی تھی ان کے جگر پر دیگر کے مقابلے میں چربی کی مقدار بڑھی ہوئی تھی۔ جگر کی یہ چربی خون میں بھی شامل ہوجاتی ہے جو دل کے امراض اور فالج کی وجہ بن سکتی ہے۔
اس بنا پر ماہرین نے کہا ہے کہ صحت مند مرد بھی اپنی خوراک میں شکر کو کم سے کم کردیں ورنہ ایک وقت کے بعد ان کا جگر اس سے متاثر ہوسکتا ہے۔

(میڈیا پاکستان)برصغیراور ایشیا میں عام استعمال ہونے والی ہلدی کے فوائد ہر روز سامنے آرہے ہیں اور اب کئی تحقیقات سے اسے جادوئی شے قرار دیا جاچکا ہے۔ مصدقہ معلومات اور تحقیق سے معلوم ہوا ہے کہ ہلدی اپنے اندر انقلابی طبی خواص رکھتی ہے۔ تو پہلے ہلدی کی چائے کےفوائد پڑھئے اور اس کے بعد چائے تیار کرنے کی ترکیب جانتے ہیں۔
جوڑوں اور گٹھیا کے درد میں مفید
2017 میں کی گئی تحقیق سے معلوم ہوا کہ امریکہ میں جوڑوں اور گٹھیا کے درد سے متاثرہ افراد ہلدی کی چائے پیتے ہیں اور اس سے انہیں افاقہ ہے۔ ہلدی میں موجود کئی اہم کیمیکل ہڈیوں کے درد اور جوڑوں کی سوزش کم کرتے ہیں۔
جسم کے دفاعی نظام کی بہتری
ہلدی میں موجود سرکیومن میں اینٹی وائرل، اینٹی انفلیمٹری اور اور اینٹی آکسیڈنٹس خواص موجود ہوتے ہیں۔ اس کے علاوہ یہ بیکٹیریا کو ختم کرنے کی زبردست صلاحیت رکھتی ہے۔ یہ امنیاتی نظام کو درست رکھتی ہے اور کینسر سمیت کئی بیماریوں کو آپ سے دور رکھتی ہے۔
دل کے امراض کو دور رکھے
ہم جانتے ہیں کہ سرکیومن نامی کیمیکل ہلدی میں عام پایا جاتا ہے اور بہت سے خواص رکھتا ہے۔ یہ ایک جانب تو اندرونی سوزش و جلن کو کم کرتا ہے تو دوسری جانب اس میں اینٹی آکسیڈنٹس موجود ہوتے ہیں۔ اس ضمن میں 2012 میں ایک سروے کیا گیا اور دل کے مریضوں کو بائی پاس سے قبل تین دن قبل اور پانچ دن بعد روزانہ چار گرام سرکیومن دیا گیا تو اس سے دل کے دورے کے خطرات 17 فیصد تک کم دیکھے گئے۔
کینسر میں مفید
اس وقت دنیا بھر میں کینسر کے درجنوں علاج دریافت ہوچکے ہیں جن کی اپنی اپنی افادیت اور خامیاں ہیں۔ سرکیومن خلیات میں گڑ بڑ اور تبدیلی کو روکتا ہے اور اس طرح کینسرکا تدارک کرتا ہے۔ اس کے علاوہ ان گنت مطالعات سے ثابت ہوچکا ہے کہ سرکیومن کینسر کے خلیات پھیلنے اورسرطانی رسولیوں کی افزائش روکتا ہے۔ اب تک 2000 سے زائد تحقیقی مقالے صرف سرکیومن اور سرطان پر شائع ہوچکے ہیں اور ماہرین اس کے سرطان کے خلاف تحقیق کو جاننے کی کوشش کررہے ہیں تاہم اب تک کی تحقیقات بتاتی ہے کہ ہلدی کا یہ اہم عنصر کینسر کے خلاف مؤثر ہے۔
ہاضمے کو بہتر بنائے
ہلدی ہاضمے کے پورے عمل کو بہتر بنا کرمعدے کے درد اور بوویل سنڈروم سے بچاتی ہے۔ 2012 میں کی گئی ایک تحقیق سے معلوم ہوا کہ ہلدی کھانے کے عمل کو تیزی سے ہضم کرنے میں مدد فراہم کرتی ہے۔
الزائیمر میں بھی مفید
اپنے زبردست خواص کی بنا پر ہلدی میں موجود سرکیومِن دماغی اور اعصابی امراض سے بچاتی ہے۔ دماغ میں خلیات کی ٹوٹ پھوٹ اور ان کے انحطاط کو روکتی ہے ۔ اس لیے ضروری ہے کہ کھانوں میں ہلدی کی مقدار کو بڑھایا جائے۔ ایک اور بات ثابت ہوچکی ہے کہ ہلدی دماغ کے ان پروٹین کو تبدیل ہونے سے بچاتی ہیں جو الزائیمر اور دیگر بیماریوں کی وجہ بنتے ہیں۔
ہلدی جگر کی محافظ
سرکیومن کا جادوئی کیمیکل جگر کو مختلف بیماریوں سے بچاتا ہے۔ اس کے علاوہ پیشاب کی تھیلی کو تندرست رکھتا ہے جس سے پتھری پیدا نہیں ہوتی۔ جگر ہمارے جسم کی ایک پیچیدہ مشین ہے اور سرکیومن اس کی حفاظت کرتا ہے۔
ذیابیطس میں مفید
روایتی ادویات میں گزشتہ ہزاروں برس سے ہلدی استعمال ہورہی ہیں جو ذیابیطس کنٹرول کرنے کے کام آتی ہیں۔ جانوروں اور انسانوں پر کیے گئے کئی مطالعات سے معلوم ہوا ہے کہ ہلدی کا اہم ترین جزو سرکیومن ذیابیطس کے خلاف مؤثر ہے۔
پھیپھڑوں کا محافظ
سرکیومن پھیپھڑوں کو صحت مند رکھتا ہے۔ 2017 کے ایک مطالعے سے معلوم ہوا ہے کہ اگرچہ معلومات تھوڑی ہیں لیکن سرکیومن، دمے ، سانس کے امراض، سسٹک فائبروسس، اور پھیپھڑوں کے دیگر امراض کے علاج میں مفید ثابو ہوا ہے۔
ہلدی کی چائے کیسے تیار کی جائے
تازہ ہلدی کا پاؤڈر لیجئے۔ اس کے علاوہ بازار سے ہلدی کی چائے کا سفوف بھی ملتا ہے جس میں سرکیومن کی زائد مقدار کا دعویٰ کیا جاتا ہے۔
پہلے چار کپ پانی ابال لیجئے۔
ہلدی کا پیسٹ یا پاؤڈر ایک سے دو چمچ اس میں شامل کیجئے۔ دس منٹ تک اسے پانی میں ابال لیجئے اور اسے پانچ منٹ تک ٹھنڈا ہونے دیجئے۔
اس کے علاوہ آپ دودھ ، اور شہد بھی ملاسکتے ہیں۔ لیکن ماہرین کہتے ہیں کہ چائے میں کریم، گاڑھا دودھ، اور گھی ایک چمچ ملانے سے سرکیومن جسم میں اچھی طرح جذب ہوجاتی ہے۔ چائے تیار ہے اور استعمال کیجئے۔

بوسٹن(میڈیا پاکستان) حادثات اور فائرنگ کے واقعات میں زخموں کو فوری طور پر بند کرکے خون کا زیاں روکنا سب سے اہم ہوتا ہے۔ اب ماہرین نے گوند بھرا ایک انجکشن بنایا ہے جو صرف ایک منٹ میں گہرے زخم روک سکتا ہے خواہ وہ بیرونی جلد پر ہوں یا پھیپھڑے کی گہرائی میں موجود ہوں۔حادثات اور فائرنگ کے واقعات میں پھیپھڑوں کا زخم بھرنے کےلیے آپریشن کرکے ٹانکے لگائے جاتے ہیں جس میں بہت وقت لگتا ہے۔ اس دوران مریض سانس کی تنگی سے زندگی کی بازی ہار سکتا ہے لیکن اب ایک خاص گوند سے فوری طور پر پھیپھڑوں کے گہرے زخموں کو بند کرنا ممکن ہوگیا ہے ۔
جراحی والی اس گوند کو ’’میٹرو‘‘ کا نام دیا گیا ہے جو بہت جلد ٹانکوں اور اسٹیپل کی جگہ لے کر زخموں کو بند کرسکے گی۔ اپنا کام کرنے کے بعد اس کا بچا ہوا حصہ ازخود تحلیل ہو کر ختم ہوجاتا ہے۔
امریکہ میں نارتھ ایسٹرن یونیورسٹی کے نسیم انابی نے یونیورسٹی آف سڈنی کے تعاون سے یہ انقلابی ایجاد کی ہے۔ یہ جیلی کی طرح ایک گوند ہے جسے زخم پر لگا کر جب الٹراوائلٹ شعاعیں ڈالی جائیں تو یہ فوراً خشک ہوکر زخم بند کردیتی ہے۔ اسے قدرتی لچک دار پروٹین سے بنایا گیا ہے جو روشنی سے حساس ہوکر سخت ہوجاتا ہے اور زخم بند کردیتا ہے۔
اس گوند میں ازخود ختم ہونے والے اینزائم بھی شامل ہیں جو اس بات کا تعین کرتے ہیں کہ زخم پر گوند کتنی مدت تک رہے گی یعنی چند گھنٹوں سے چند ماہ تک کا دورانیہ ہوسکتا ہے جس کا انحصار خود زخم پر ہوتا ہے۔ یہ گوند اتنی لچک دار ہے کہ عین زخم کے مقام کےلحاظ سے سکڑتی پھیلتی رہتی ہے ۔ اس طرح پھیپھڑے اور دل کے زخموں پر اسے آسانی سے چپکایا جاسکتا ہے کیونکہ دونوں اعضا تیزی سے سکڑتے اور پھیلتے رہتے ہیں۔
سائنسدانوں کی ٹیم نے پہلے اسے چوہوں کی رگوں اور پھیپھڑوں پر آزمایا اور اس کے بعد خنزیر کے پھیپھڑوں کے زخم بھرے گئے۔ اب اگلے مرحلے پر اس گوند کو انسانوں پر آزمایا جائے گا۔

کراچی(میڈیا پاکستان) ہری مرچ کے بغیرچٹخارے دار کھانوں کا تصور ہی نہیں کیا جاسکتا یہ کھانے کو تومزیدار بناتی ہے ساتھ ہی انسانی صحت کے لیے بھی بہترین ہے۔
ناک کی سوزش سے بچاؤ:
پروٹین کی خصوصیات سے بھرپور سبز مرچ شریانوں میں خون کے بہاؤ کو بہتر بنانے کے ساتھ ساتھ ناک کی سوزش اور زکام سے محفوظ رکھتی ہے۔
درد سے نجات:
سبزمرچی کو بطور پین کیلر(دردختم کرنے والی دوائی) کے طورپر بھی استعمال کیا جاسکتا ہے۔
ذیابیطس :
وہ افراد جو ذیابیطس کا شکار ہیں ان کے لیے ہری مرچ کسی نعمت سے کم نہیں۔اس میں قدرتی طور پر ایسی خصوصیات موجود ہوتی ہیں جو خون میں شوگر کی مقدار کو متوازی رکھتی ہیں۔
فولاد سے بھرپور :
ہری مرچ آئرن کا قدرتی مجموعہ ہے۔ ایسے افراد جن میں آئرن کی کمی ہوتی ہے وہ اسے باقاعدگی سے استعمال کرکے کمی کو پورا کرسکتے ہیں جب کہ یہ نظر کو بہتر بنانے کے لیے بھی مفید ہے۔
جلد کے انفیکشن:
ہری مرچ کی جراثیم کش(اینٹی بیکٹیریل)خصوصیات کی بھرمار ہوتی ہے جسے جلد کے انفیکشن کے علاج طور پر استعمال کیا جاسکتا ہے۔
خون کا نکلنا:
اگر آپ ہری مرچ زیادہ کھاتے ہیں تو زخم لگنے کی صورت میں یہ خون کے رساؤ کو روکتی ہے اور اس سے زخم بھی جلدی بھر جاتا ہے کہ کیونکہ قدرتی طور پر اس میں وٹامن kموجود ہے۔
ہڈیوں و دانتوں کی مضبوطی:
ہری مرچ میں وٹامن اے کی بڑی مقدار پائی جاتی ہے جو ہڈیوں اور دانتوں کو مضبوط بناتی ہے۔

کراچی(میڈیا پاکستان) لہسن اور دودھ ایک دوسرے سے بالکل مختلف غذائی اشیا ہیں جنہیں ایک ساتھ استعمال کرنے کے بارے میں آج تک کسی نے سوچا بھی نہ ہوگا لیکن ان دونوں کو ایک ساتھ استعمال کرنے کے بیش بہا فائدے ہیں۔دودھ ایک مکمل قدرتی غذا ہے جو ہرعمرکے افراد کے لیے موزوں ہے، دودھ میں کیلشئم کے علاوہ مختلف وٹامنزاورپروٹین پائے جاتے ہیں جو انسانی جسم کو صحت مند رکھتے ہیں، جب کہ لہسن کو اس کے غذائی فائدوں کی وجہ سے کھانوں کے علاوہ مختلف ادویات بنانے کے لیے بھی استعمال کیاجاتا ہے، تاہم اگران دونوں اجزا کو ایک ساتھ ملا کراستعمال کیا جائے تو ان کے فائدے دُگنے ہوجاتے ہیں۔
دمہ کے مریضوں کے لیے فائدے مند:
آدھا لیٹر دودھ میں 250 ملی لیٹر (ایک پاؤ) پانی ملائیں اور اسے ایک ساس پین میں پکائیں اب اس میں 10 جوے لہسن کے شامل کریں اور مکس کریں جب یہ مکسچر آدھا رہ جائے تو اس میں 2 سے 3 چمچ چینی ملائیں اس مکسچر کو روزانہ رات کو سوتے وقت پئیں یہ مکسچر دمہ کے مریضوں کے لیے بہت فائدے مند ہے۔
کھانسی کے لیے فائدے مند:
لہسن کھانسی میں بے حد فائدے پہنچاتا ہے، لہسن اور دودھ کےاس مکسچر میں تھوڑی سی ہلدی یا شہد ملاکر کھانسی کے مریض کو دیں، اس سے یقیناً فائدہ ہوگا اور کھانسی میں آرام آئے گا۔
کولیسٹرول سے نجات:
کولیسٹرول آج کل ہردوسرے انسان کا مسئلہ ہے، کولیسٹرول میں زیادتی کی وجہ سے اکثراوقات ہارٹ اٹیک کا خطرہ بڑھ جاتا ہے، کولیسٹرول کے مریض لہسن اوردودھ کے مکسچرکو ایک ہفتے تک روزانہ استعمال کریں یہ کولیسٹرول میں کمی کرکے جسم کو نقصان پہنچانے والی چربی کو ختم کرتا ہے۔
بدہضمی:
لہسن میں قدرت نے کئی خفیہ فائدے چھپا کررکھے ہیں جن سےانسان ناواقف ہے، ان ہی میں ایک بدہضمی کو ختم کرنا ہے، لہسن اور دودھ کے مکسچر کو بدہضمی کی صورت میں استعمال کریں، یہ مشروب کھانا ہضم کرنے والا جوس بناتا ہے جس کی وجہ سے کھانا جلدی ہضم ہوجاتا ہے۔
پھیپھڑوں کی بیماری میں موزوں:
لہسن اور دودھ سینے اور پھیپھڑوں کی بہت سی بیماریوں میں فائدے مند ہے، لہسن میں موجود نیومرس سلفرعنصر پھیپھڑوں اور سینے کے انفیکشن میں بہت آرام پہنچاتا ہے، ایک گرام لہسن، 240 ملی لیٹر دودھ اورایک لیٹرپانی کوابالیں جب یہ مکسچرایک چوتھائی رہ جائے تو اسے دن میں 3 بار پئیں، تاہم اس مکسچر کو استعمال کرنے سے پہلے ایک باراپنے معالج سے ضرور مشورہ کرلیں۔
دل کی امراض میں مفید:
دل کے امراض میں مبتلا مریضوں کے لیے بھی دودھ اور لہسن بہت مفید ہے، تاہم دل کے مریض بالائی نکلا (اسکیمڈ) دودھ استعمال کریں۔

کراچی(میڈیا پاکستان) آلو اور ہلدی ایسی چیزیں ہیں جس کے بغیر ہر باورچی خانہ ادھورا سمجھاجاتا ہے یہ دونوں اشیا ناصرف کھانوں کی شان بڑھاتی ہیں بلکہ کئی دوسرے فائدے بھی دیتی ہیں ایسا ہی ایک فائدہ خواتین کے حسن میں نکھار بھی ہے ۔
آلو صرف کھانے کے لیے نہیں بلکہ چہرے کی جلد کو چمکدار بنانے، چہرے سے داغ دھبے صاف کرنے اور رنگت نکھارنے کے لیے بھی استعمال ہوتا ہے، یہاں آلو اور ہلدی کا بہت ہی آسان ماسک بنانے کا طریقہ بتایا جارہا ہے جو رنگت نکھارنے کے ساتھ چہرے کے سانولے پن کوکم کرکے رنگت گوری کرنے میں نہایت اہم کردارادا کرتا ہے۔
بازار میں ہلدی سے بنےمصنوعی فیس پیک کئی ناموں سے باآسانی ملتے ہیں جب کہ یہ فیس پیک بنانے والی کمپنیوں کا دعویٰ ہوتا ہے کہ ان میں کسی قسم کا کوئی کیمیکل موجود نہیں لیکن یہ پوری طرح ٹھیک نہیں ہے، بازار سے ملنے والی اشیا چہرے کی جلد کو نقصان پہنچانے کے ساتھ کافی مہنگی بھی ہوتی ہیں تاہم گھر پر صرف آلو اور ہلدی سے بنایا گیا یہ فیس پیک کسی بھی قسم کے مضراثرات سے بالکل پاک ہوتاہے۔
سب سے پہلے کچے آلو کا گودا لیں اوراس میں تھوڑا سا ہلدی پاؤڈر ملائیں، پاؤڈر کی جگہ اگر آپ ہلدی کی جڑ سے رس نکال کر آلو کے گودے میں ملاتے ہیں تو یہ کافی فائدے مند ہوتا ہے تاہم اگر یہ ممکن نہیں تو کوئی بات نہیں پاؤڈر ہی لے لیں۔
اب اسے اچھی طرح مکس کریں اور چہرے اور گلے پرلگائیں اس فیس پیک کو تقریباً 30 منٹ تک لگارہنے دیں اور سادے پانی سے دھولیں، اس فیس پیک کا اثر فوراً ہوتا ہے اورجلد صاف ہوکر چمکدار ہوجاتی ہے جب کہ اسے مسلسل استعمال کرنے سے رنگت میں بھی نکھار پیدا ہوتا ہے۔

کراچی(میڈیا پاکستان) وزن میں زیادتی اور موٹاپے کا شکار افراد اکثراپنے وزن میں کمی کرنے اور اپنی کمر اور پیٹ کو گھٹانے کےلیے کئی جتن کرتے نظر آتے ہیں جن میں سرفہرست ڈائٹنگ کرنا ہے۔ تاہم اب ان افراد کےلیے خوشخبری ہے کہ بغیر ڈائٹنگ کے بھی وزن میں کمی کرکے اسمارٹ ہونا نہایت آسان ہے۔وزن کم کرنے اور ’’اسمارٹ‘‘ ہونے کےلیے ضروری ہے کہ آپ صحت بخش غذا کھائیے، خوش ہو کر کھانا کھائیے، چھوٹے نوالے لیجیے، ہر نوالے کو خوب اچھی طرح چبا کر کھائیے اور، سب سے بڑھ کر، جب پیٹ بھرنے کا احساس ہو تو کھانا چھوڑ دیجیے یعنی ذائقے کا مزا لینے کےلیے اپنی بھوک سے زیادہ ہر گز نہ کھائیے۔ یہ خلاصہ ہے اس تحقیق کا جو کچھ عرصہ پہلے کی گئی ہے۔
خواتین کے ساتھ مرد حضرات بھی موٹاپے کے باعث سخت پریشان نظرآتے ہیں اور موٹاپے میں کمی کرنے کے ساتھ اسمارٹ اور دبلا نظر آنے کےلیے دن رات کوششیں کرتے ہیں، جن میں ورزش کرنا اور ڈائٹنگ کرنا وغیرہ شامل ہے۔ تاہم ڈائٹنگ کے بعد وزن تو کم ہوجاتا ہے لیکن جسم مناسب غذا نہ ملنے کے باعث کمزوری کا شکار ہوجاتا ہے اور بعض واقعات میں ڈائٹنگ چھوڑنے کے بعد وزن میں ایک بار پھر تیزی سے اضافہ ہوجاتا ہے جو دوہری پریشانی کا سبب بنتا ہے۔ لیکن اب موٹے افراد کےلیے خوشخبری ہے کہ ڈائٹنگ کیے بغیر بھی وزن میں کمی لائی جاسکتی ہے اور آئیڈیل، متناسب اور خوبصورت جسم حاصل کیا جاسکتا ہے۔
حال ہی میں ہونے والی تحقیق کے مطابق وہ افراد جو ایک وقت میں صرف ایک کام پر توجہ مرکوز رکھتے ہیں وہ اپنے اہداف کو پانے میں کامیاب ہوجاتے ہیں جن میں وزن میں کمی اور اسمارٹ کمر بھی شامل ہے۔ انٹرنیشنل جنرل آف بیہیورل میڈیسن میں شائع ہونے والی ایک تحقیق کے مطابق 47 سال تک کی عمر کے 400 مرد و خواتین کے وزن میں کمی کرنے والے اسباب جاننے کےلیے ایک تجربہ کیا گیا۔ ان تمام افراد نے اس تجربے کےلیے اپنی خدمات رضاکارانہ طور پر پیش کی تھیں۔ماہرین نے ان افراد کا وزن کیا، خاص طور پران کے پیٹ اور جسم کے نچلے حصے کے وزن پر خصوصی نظر رکھی گئی اور پھر انہیں 15 سوالات پر مشتمل سوالنامہ دیا گیا جو ان کی روزمرہ کی عادات جیسے کہ سگریٹ نوشی اور ان کی مجموعی ذہنیت کی درجہ بندی سے متعلق تھا۔ بعد ازاں ان افراد کی غذا، معمولات اورسگریٹ نوشی سمیت تمام عادات کو کنٹرول کیا گیا اور انہیں بری عادتوں سے بچاتے ہوئے صحت بخش غذا دی گئی۔ کھانا کھاتے ہوئے اس بات کا خاص خیال رکھا گیا کہ یہ ذائقے سے بھرپور ہو اور لوگ اسے کھاتے وقت ہر نوالے کا بھرپور مزہ لیں۔ یہی اس تحقیق کا سب سے اہم نکتہ تھا جس کی وجہ سے موٹے افراد کے وزن میں خاطر خواہ کمی آئی۔
اس تجربے میں ایک اور بات کا خیال رکھا گیا کہ کھانا کھاتے وقت تمام افراد خود کو بھرنے کےلیے نہیں بلکہ سکون سے کھائیں اور پیٹ بھرنے کے بعد زیادہ کھانے سے اجتناب برتیں۔ یہ طریقہ بھی وزن کم کرنے میں بہت مددگار ہوتا ہے۔ اس تجربے کے مثبت نتائج آئے اور وہ افراد جنہوں نےاپنے کھانے کی عادات کو تبدیل کیا تھا ان کے جسم کے درمیانی حصے میں چربی کم ہوئی جبکہ پیٹ اور کمر کا گھیر بھی بہت کم ہوگیا۔

کراچی(میڈیا پاکستان) گلاب کو عموماً خوبصورتی کے استعارے کے طور پر استعمال کیا جاتا ہے لیکن اس کے فائدے بھی کچھ کم حیرت انگیز نہیں جن سے اکثر لوگ ناواقف ہیں۔گلاب کی پتیوں کو نچوڑ کر عرق نکالا جاتا ہے جسے پانی میں شامل کرکے ایک محلول تیار کیا جاتا ہے جو ’’عرقِ گلاب‘‘ (روز واٹر) کہلاتا ہے۔ عرقِ گلاب انسانی جلد کے لیے بے حد مفید ہے کیونکہ یہ جلد کو نرم رکھتا ہے اور خشکی دور کر کے جلد کی نمی برقرار رکھتا ہے۔اپنی اینٹی آکسیڈنٹ خصوصیات کی بناء پر عرقِ گلاب جلد کے خلیات کو توانا اور صحت مند بنانے میں کارآمد ثابت ہوتا ہے اور جلد کے ٹشوز کی افزائش میں معاون بنتا ہے جب کہ اس محلول کو باقاعدگی سے استعمال کر کے جلد پر پڑنے والی جھریوں کا خاتمہ بھی ممکن ہے۔
عرق گلاب بالوں کی متعدد بیماریوں سے محفوظ رکھتا ہے۔ روکھے بالوں اور سر میں خشکی سے چھٹکارا پانے کےلیے عرق گلاب کا استعمال کیا جاسکتا ہے۔
آشوب چشم کا علاج بھی عرق گلاب سے ہوتا ہے۔ اس کے چند قطرے نہ صرف آنکھوں کی جلن کو دور کرتے ہیں بلکہ گرد وغبار کو بھی نکال باہر کرتے ہیں جبکہ آنکھوں کے گرد پڑنے والے سیاہ حلقوں کو بھی عرقِ گلاب کے استعمال سے دور کیا جاسکتا ہے۔
رنگ گورا کرنے والی کریموں میں عرق گلاب کے چند قطرے ڈال کر روزانہ جلد پر لگایا جائے تو اس کے مثبت اثرات مرتب ہوتے ہیں جن میں جلد پر نمی کا برقرار رہنا سرفہرست ہے۔
چہرے کو تروتازہ رکھنے کےلیے عرق گلاب لگانے سے جلد کی اوپری سطح پر موجود مردہ خلیوں (ڈیڈ سیلز) کا خاتمہ ہوتا ہے اور جراثیم سے نجات حاصل ہوتی ہے۔
اگر آپ چہرے پر کیل مہاسوں سے پریشان ہیں تو اِن کا حل بھی عرق گلاب کی صورت میں موجود ہے۔ لیموں کا رس اور عرق گلاب کی مساوی مقداریں آپس میں ملا کر چہرے پر روزانہ آدھے سے ایک گھنٹے تک لگائے رکھنے سے کیل مہاسوں کا خاتمہ کیا جاسکتا ہے۔ وقت پورا ہونے کے بعد چہرے کو تازہ پانی سے دھو لیجیے۔ یہ عمل جاری رکھنے سے نہ صرف چہرے پر موجود کیل مہاسے ختم ہوجائیں گے بلکہ آئندہ بھی ان کے نمودار ہونے کا امکان نہیں رہے گا۔

(میڈیا پاکستان)ویسے تو کیلے کھانے کے فائدوں سے سب ہی واقف ہوں گے لیکن کیلے کے چھلکے بھی کسی صورت غیر اہم نہیں کیونکہ ان میں قدرتی طور پر بہت سی طبی خصوصیات پنہاں ہیں۔کیلے کے چھلکے کے چند دلچسپ اور مفید استعمال ملاحظہ کریں:
دانت چمکائیں
آپ دانتوں کے پیلے پن سے پریشان ہیں تو فکر نہ کریں، بس ایک کیلے کا چھلکا لیں اور چمچے سے چھلکے کا سفید گودا الگ کرکے اسے پیس لیں۔ اب اس پیسٹ کو دن میں کم ازکم دو بار ضرور لگائیں۔ یہ عمل 15 دن تک جاری رکھنے سے دانتوں کا پیلا پن دور اور چمک پیدا ہوگی۔ کیلےکےچھلکے میں موجود پوٹاشیم، میگنیشیم اور مینگنیز دانتوں پر جمے پيلے پن کو دور کرنے میں مدد کرتا ہے۔
اس خبرکو بھی پڑھیں: اسپرین کے مزید حیرت انگیز فائدے سامنے آگئے
مسے ختم
جلد پر مسوں کی موجودگی دیکھنے میں بدنما لگتی ہے جس سے بعض اوقات شخصیت پرمنفی اثرات مرتب ہوتے ہیں لیکن اب آپ گھر بیٹھے ان سے بہ آسانی چھٹکارا پاسکتے ہیں اور اس کےلیے کسی سرجری کی ضرورت بھی نہیں پڑتی۔ روزانہ کیلے کے چھلکے کو مسوں پر رگڑاجائے اور رات بھر ایسے ہی چھوڑدیا جائے تو جلد پرموجود مسے ختم ہوجاتے ہیں اور مستقبل میں مسوں کو نمودار ہونے سے روکتے ہیں۔
وزن گھٹائیں
بڑھتے وزن سے آپ کو فکرمندی لاحق ہے تو اب اطمینان رکھیں کہ قدرت نے کیلے کے چھلکے میں وزن گھٹانے کا علاج رکھا ہے۔ دوپہر کے کھانے کے بعد دو عدد کیلے کے چھلکوں کے اندرونی حصے میں موجود سفید گودے کو نکال کر چھلکے کو پیس کر کھالیں اور رات کے کھانے سے پرہیز کریں۔ ایک مہینے تک یہ عمل جاری رکھنے سے حیران کن نتائج سامنے آئیں گے اورکم از کم 5 پاونڈ تک وزن میں کمی آئے گی۔
خارش، سوزش، داد سے نجات
کیلا انسانی جلد کی صحت کےلیے بہترین ہے۔ جلد پر خارش اور سوزش سے نجات حاصل کرنے کےلیے کیلے کا چھلکا استعمال کیا جاسکتا ہے۔ خارش اور سوزش سے متاثرہ حصے پرکیلے کا چھلکا مسلنے سے افاقہ ہوگا جب کہ جلد کے کسی حصے پر داد کی جلن پر کیلے کا چھلکا رگڑنے سے راحت محسوس ہوتی ہے۔
درد کا علاج
سر میں درد ہویا ایڑی میں، دوا کھانے کی ضرورت نہیں۔ بس کیلے کے چھلکے کا پیسٹ متاثرہ جگہ پرلگائیں اور درد کو دور بھگائیں۔ چھلکے میں موجود میگنیشیم شریانوں میں سرایت کرکے درد کو روکنے میں مددگار ثابت ہوتا ہے۔