Category صحت

واشنگٹن(میڈیا پاکستان) اس سے قبل ناشتہ چھوڑدینے کے انتہائی مضر اثرات سامنے آتے رہے ہیں۔ اب تازہ خبر یہ ہے کہ ناشتہ ترک کرنے سے دل کے امراض کا خطرہ بھی بڑھ جاتا ہے۔اگر کوئی ناشتہ چھوڑنے کو اپنا معمول بنالے تو اس سے دل کی شریانیں سخت اور تنگ ہوجاتی ہیں کیونکہ ان کے اندر پلاک جمع ہونا شروع ہوجاتا ہے۔امریکن جرنل آف کارڈیالوجی میں شائع ہونے والی حالیہ تحقیق سے معلوم ہوا ہے کہ اچھی طرح ناشتہ کرنا دل کے لیے بہت ضروری ہے اور اس سے وزن برقرار اور کولیسٹرول قابو میں رہتا ہے۔ یہ پہلی تحقیق ہے جو ظاہر کرتی ہے کہ کس طرح ناشتہ چھوڑنا دل کی شریانوں کو اس قدر متاثر کرتا ہے کہ وہ دل کے امراض کی وجہ بن جاتی ہیں اور ایک مرض ایتھروسکلیروسس کو جنم دیتی ہیں جس میں شریانیں سخت ہوتی جاتی ہیں۔
ماؤنٹ سینائی اسپتال برائے قلب اور امریکن جرنل آف کارڈیالوجی کی ایڈیٹر ویلنٹائن فوسٹر کہتی ہیں کہ ناشتے کو نظر انداز کرنے کی عادت ’مکمل طور پر منفی طرزِ زندگی کی وجہ بنتی ہے۔ ہماری نئی تحقیق بتاتی ہے کہ یہ عادت دل کے امراض کو کس طرح جنم دیتی ہے۔‘
اس سروے میں ایسے مرد و خواتین کو شامل کیا گیا جو ہر قسم کے قلبی عارضے سے پاک تھے۔ ان سے غذا، روزانہ کیلوریز اور خصوصاً ناشتے کے بارے میں پوچھا گیا۔ پھر انہیں تین گروہوں میں تقسیم کیا گیا۔ پہلا گروہ صبح باقاعدہ ناشتہ نہیں کرتا تھا اورناشتے کی صرف پانچ فیصد کیلوریز ہی معدے میں اتارتا تھا یعنی ایسے افراد ایک کپ کافی، چائے یا جوس وغیرہ پیتے تھے۔ دوسرے گروہ والے ناشتے کی صرف 20 فیصد کیلوریز استعمال کرتے تھے جن میں کم غذائیت والا ناشتہ شامل ہے۔ 4000 شرکا میں سے صرف 3 فیصد اپنی توانائی کا 70 فیصد ناشتے میں لے رہے تھے جبکہ 27 فیصد باقاعدہ اور درست ناشتہ لے رہے تھے۔
اگر موازنہ کیا جائے تو بھرپور ناشتہ کرنے والوں کے مقابلے میں ناشتہ چھوڑدینے یا کم غذائیت والے ناشتہ استعمال کرنے والوں میں شریانوں کی سختی زیادہ نوٹ کی گئی۔ اس کے علاوہ ناشتے سے بھاگنے والے افراد میں دل کی بیماری سے قبل کچھ بایومارکر بھی دیکھے گئے جو مستقبل میں کسی بڑی قلبی بیماری کی وجہ بن سکتے ہیں۔
ایک اور خطرناک بات یہ ہے کہ ناشتہ ترک کرنے والے شرکا میں کولیسٹرول بلند، خون کی چکنائی زیادہ ، کمر کا گھیر بڑا اور باڈی ماس انڈیکس (بی ایم آئی) بھی خطرناک تھا۔ صبح نہار منہ ان کے خون میں شکر کی مقدار بھی اوپر کی طرف جارہی تھی۔
ماہرین نے یہ بھی کہا کہ ناشتہ چھوڑنا زندگی میں توازن اور نظم و ضبط کو بھی نقصان پہنچاتا ہے۔ ایسے لوگ الم غلم کچھ نہ کچھ کھاتے رہتے ہیں اور مزید بیمار بھی رہتے ہیں۔

آئیووا(میڈیا پاکستان)امریکہ میں ایک مطالعہ کیا گیا ہے جس سے ظاہر ہوتا ہے کہ جن بچوں کے کمروں میں ویڈیو گیم اور ٹی وی موجود رہتے ہیں، بچے دیر تک انہیں استعمال کرتے ہیں جس کا اثر ان کی پڑھائی پر ہوتا ہے اور وہ آگے چل کر موٹاپے کا شکار ہوسکتے ہیں۔آئیووا اسٹیٹ یونیورسٹی کے نفسیات دانوں نے اپنی نوعیت کا ایک منفرد سروے کیا ہے جس میں ٹی وی اور ویڈیو گیم بچوں کے سونے کے کمرے میں رکھنے کے تباہ کن اثرات کا جائزہ پیش کیا ہے۔
اس رپورٹ کے مرکزی مصنف ڈگلس جینٹائل کہتے ہیں کہ ٹی وی اور ویڈیو گیم کی جگہ بدلنے سے بہت فرق پڑتا ہے۔ اس سے بچے پڑھنے، کھیل کود اور دیگر باتیں سیکھنے میں اپنا وقت کم لگاتے ہیں اور بس انہی دو چیزوں میں گم رہتے ہیں۔ اس طرح ٹی وی اور گیمز کی لت لگ جاتی ہے، تعلیم پر برا اثر پڑتا ہے اور وہ سست ہوکر موٹے ہونے لگتے ہیں۔ماہرین نے اس عادت کو چھ ماہ سے لے کر دو سال تک نوٹ کیا ہے۔ اس کے علاوہ ٹی وی اور ویڈیو گیمز پر زیادہ وقت گزارنے والے بچے زیادہ پرتشدد اور جوشیلے اور ماردھاڑ کرنے والے بھی ہوسکتے ہیں۔ ٹی وی بچوں کے کمرے میں رکھنے سے 24 گھنٹے ان کی دسترس میں رہتا ہے۔ اب یہاں والدین کو چاہیے کہ وہ اس پر گہری نظر رکھیں اور ٹی وی ان کے کمرے سے نکال باہر کریں۔
ٹی وی دیکھنے سے بچے کتابیں پڑھنے سے رہ جاتے ہیں اور بچے ہرہفتے اوسطاً 60 گھنٹے ٹی وی دیکھتے ہیں جو ایک ہولناک صورتحال ہے۔ اس سے بچے کھیلنے، نئی چیزیں سیکھنے اور اپنی صلاحیت استعمال کرنے سے گریز کرتے ہیں اور اسی کے نتیجے میں ان کی تعلیم متاثر ہوتی ہے۔
ماہرین نے نوٹ کیا کہ بچوں میں ٹی وی اور گیمز کھیلنے کا دورانیہ جیسے جیسے بڑھتا جاتا ہے، ویسے ویسے وہ موٹاپے اور چڑچڑے پن کا شکار بھی ہوتے جاتے ہیں۔ اسی لیے ماہرین نے ان اشیا تک بچوں کی رسائی مشکل بنانے کی تجویز پیش کی ہے۔

نیویارک(میڈیا پاکستان) ہارٹ اٹیک میں ابتدائی طبی امداد اور خون کو پتلا کرنے کےلیے اسپرین کا استعمال عام ہے لیکن اس کے کچھ حیران کن فائدے اور بھی ہیں جو بہت کم لوگ جانتے ہیں۔نیویارک میں کی گئی ایک تحقیق سے پتا چلا ہے کہ اسپرین کیل مہاسے اور جلد کے کھردرے پن کو دور کرتی جبکہ جلد کی اوپری سطح پر موجود مردہ خلیات (ڈیڈ سیلز) کا خاتمہ بھی کرتی ہے۔ اسپرین کی گولیوں کا سفوف (پاؤڈر) بناکر کھال پرلگانے سے جلد کو کئی امراض سے بچایا جاسکتا ہے۔
اپنی نمی کی خصوصیات کے باعث اسپرین کو فیس واش کے علاوہ بالوں کی خشکی ختم کرنے کےلیے بھی استعمال کیا جاسکتا ہے۔ اس مقصد کےلیے آپ اسپرین کے پاؤڈر کو شیمپو میں شامل کرکے استعمال کرسکتے ہیں تاکہ بالوں کی خشکی ختم کی جاسکے۔ اگر اسپرین کا سفوف سر پر لگایا جائے تو یہ کھوپڑی کی بے جان جلد کو طاقتور بنا کرخشکی بننے کا عمل روکنے میں بھی معاون ثابت ہوتی ہے۔
اس کے علاوہ اسپرین کیڑے مکوڑوں کے کاٹنے سے ہونے والی سوزش، سوجن اور تکلیف سے چھٹکارا پانے میں بھی مفید ہے۔ شہد کی مکھی یا کسی کیڑے کے ڈنک سے ہونے والی سوجن پر اسپرین کے سفوف پر مشتمل لیپ مل دیا جائے تو چند منٹوں میں ہی سوجن اور تکلیف دور ہوجاتی ہے۔ 2 گولی اسپرین کو ایک چمچہ نیم گرم پانی میں ڈال کر ایک چمچہ شہد کے ساتھ ملائیے اور اس آمیزے کو متاثرہ حصے پر لگا کر 10 منٹ تک چھوڑ دیجیے۔ اس عمل کے نتیجے میں سوجن اور درد کا خاتمہ ہوجائے گا۔
بال توڑ سے ہونے والی بے چینی اور تکلیف سے افاقہ حاصل کرنے کےلیے بھی اسپرین انتہائی موزوں ہے۔ اسپرین کی 2 سے 3 گولیوں اور ایک چمچہ شہد کو نیم گرم پانی میں شامل کرکے پیسٹ تیار کیجیے اور اسے بال توڑ والی جگہ پر لگائیے؛ اس سے سوزش کا خاتمہ ہوتا ہے جب کہ یہ آمیزہ جلد کی بیرونی سطح پر موجود مردہ خلیوں کو ہٹانے میں بھی کارگرثابت ہوتا ہے۔
آکسفورڈ یونیورسٹی میں کی گئی ایک تحقیق سے معلوم ہوا ہے کہ اسپرین کا روزانہ استعمال کینسر سے بچاتا ہے۔ تاہم اس کے ضمنی اثرات (سائیڈ ایفیکٹس) بھی ہوتے ہیں۔ مثلاً اسپرین کے بے دریغ استعمال اور روزانہ نہار منہ پانی کے ساتھ لینے سے معدے میں سوزش جبکہک کبھی کبھی الٹی اور سر میں مسلسل درد جیسی شکایات ہوسکتی ہیں۔

واشنگٹن(میڈیا پاکستان) ایبٹ کمپنی نے 24 گھنٹے خون میں شکر کی کمی بیشی نوٹ کرنے والا ایک ایسا آلہ تیار کیا ہے جو جلد سے منسلک ہوکر ہمہ وقت خون میں شکر کی مقدار نوٹ کرتا رہتا ہے اور اس کےلیے بار بار انگلیوں کو چھید کر خون بہانے کی ضرورت نہیں ہوتی۔
اسے فری اسٹائل لبرے کا نام دیا گیا ہے جو مسلسل خون میں شکر کی کمی بیشی نوٹ کرتا رہتا ہے اور بدھ کے بعد سے امریکی فوڈ اینڈ ڈرگ اتھارٹی (ایف ڈی اے) نے اس انقلابی آلے کی فروخت کی اجازت دیدی ہے۔ جلد سے چپکنے والے آلے میں ایک چھوٹا سینسر لگا ہے جسے بازو کے اوپری حصے کی پشت پر چپکایا جاسکتا ہے اور اس کے بعد یہ اپنا کام شروع کردیتا ہے۔
اس کا پورا نام فری اسٹائل لبرے فلیش گلوکوز مانیٹرنگ سسٹم رکھا گیا ہے جو اب 41 ممالک میں فروخت کےلیے پیش کیا جارہا ہے۔ اس سینسر کےلیے انگلیوں کو چھیدنا ضروری نہیں جس کی تفصیلات ایک دستی آلے کے اسکرین پر نمودار ہونا شروع ہوجاتی ہیں۔ اس کے علاوہ ہفتے بھر خون میں شکر کے اتار چڑھاؤ، پیٹرن اور کمی پیشی کا بھی خیال رکھا جاسکتا ہے۔ پھر اس کی مدد سے انسولین کی درست مقدار کا جائزہ بھی لیا جاسکتا ہے۔
فی الحال امریکہ میں بچوں پر اس کے استعمال کی اجازت نہیں دی گئی ہے۔ اس آلے میں استعمال ہونے والے ریڈر کی قیمت 70 ڈالر کے لگ بھگ ہے جبکہ 14 دن کام کرنے والے سینسر کی قیمت 69 ڈالر یا پاکستانی 7 ہزار روپے ہیں اور امریکہ میں یہ سینسر صرف 10 روز کام کرے گا۔ اس طرح دونوں کی قیمت 14 ہزار ہوئی تاہم سینسر کے لیے ماہانہ 28 ہزار مزید خرچ کرنا ہوں گے۔
اس قیمت پر ایبٹ کے سینئر وائس پریذیڈنٹ جیرڈ واڈکن نے رائے دیتے ہوئے کہا کہ کمپنی نے اس گلوکو میٹر کی قیمت کم سے کم رکھی ہے۔

کراچی(میڈیا پاکستان) خشک جلد کو طب کی زبان میں ایک جسمانی مرض کے طور پر بھی لیا جاتا ہے جسے زیروسِس کہتے ہیں۔سردیوں کی آمد آمد ہے اور ہر خاص وعام جلد کی خشکی کی شکایت کرتا ہے، ذیل میں جلد کی خشکی دور کرنے اور جلد کو دائمی طور پر تروتازہ رکھنے کے بہترین ، کم خرچ اور آسان گھریلو ٹوٹکے بیان کئے جارہے ہیں جو مہنگی کریموں کا بہترین متبادل ہیں اور ہم ان کے استعمال کی سائنسی و تحقیقی وجوہ بھی بیان کررہے ہیں۔
سورج مکھی کے بیج کا تیل
2013 میں کئے گئے ایک مطالعے سے ثابت ہوا ہے کہ سورج مکھی کے تیل کا باقاعدہ استعمال آپ کی جلد کی نمی برقرار رکھتا ہے۔ اسے جب شرکا کے بازوؤں پر لگایا گیا تو کافی دیر تک ان کی نمی برقرار رہی ۔ تاہم دیگر تیلوں میں اس طرح کی تاثیرنہیں دیکھی گئی ۔
ناریل کا تیل
کھوپرے کا تیل ایک قدرتی موئسچرائزر ہے۔ 2014 میں کی گئی ایک تحقیق سے معلوم ہوا کہ ناریل کا تیل عین پیٹرولیم جیلی کی طرح مؤثر ہے اور کچھ ہی عرصے میں لائپڈز (چکنائیاں) بڑھا کر جلد کو نرم و ملائم بناتا ہے۔
سال 2016 میں کی گئی تحقیق کے مطابق اس تیل میں سیرشدہ (سیچوریٹڈ) چکنائیاں ہوتی ہے جو جلد کے خشک حصوں میں سما کر اسے ہموار اور ملائم کرتے ہیں۔
اوٹ میل کا غسل
دلیے یا اوٹ میل کے پاؤڈر پانی میں ڈال کر نہانے سے خشک جلد سے نجات مل جاتی ہے۔ 2015 کے ایک مطالعے سے انکشاف ہوا ہے کہ ایک جانب تو اوٹ میل میں اینٹی آکسیڈنٹس خواص ہیں تو یہ جلد کی سوزش بھی کم کرتا ہے۔ اوٹ میل کو پانی میں ملاکر اس سے ہاتھ ، پیر، جلد اور بازو کو نتھار کر بھی خشکی سے محفوظ رہا جاسکتا ہے۔
دودھ کا استعمال
متعدد تحقیقات سے ثابت ہوا ہے کہ دودھ پینے سے جلد کی خشکی دھیرے دھیرے رفع ہوجاتی ہے۔ چکنائی والے دودھ میں فاسفولائپڈز ہوتےہیں اور اس سے جلد نمدار رہتی ہے۔
شہد
شہد جادوئی خواص رکھتا ہے اور کئی تحقیقات سے ثابت ہوا ہے کہ جلد کے کئی امراض میں شہد ایک بہترین شفایاب ٹانک سے کم نہیں۔ پاکستان میں بھی تحقیق ہوئی ہے کہ شہد زخموں کو مندمل کرنے اور جراثیم سے پاک رکھنے میں اپنا ثانی نہیں رکھتا ۔ رات کے وقت جلد پر شہد لگانے کے کچھ دیر بعد نیم گرم پانی سےچہرہ دھونے سے چہرے کی خشکی ختم ہوجاتی ہے۔
ایلو ویرا
ایلوویرا یا گھیگوار پاکستان میں عام ملتا ہے۔ طبی خواص سے مالامال ایلوویرا دنیا بھر میں جلد کی مصنوعات میں استعمال ہوتا ہے۔
رات کو سوتے وقت ایلوویرا جیل کو ہاتھ اور پیروں پر لگائیں اور موزے ، دستانے پہن کر سوجائیں ۔ اب صبح اٹھ کر نیم گرم پانی سے دھولیجیے۔ تین روز میں ہی واضح فرق دکھائی دے گا۔ جلد کی جھلسن اور بے رونقی کو بھی ایلوویرا سے درست کیا جاسکتا ہے۔

(میڈیا پاکستان)مرد ہوں یا خواتین، دونوں اپنے بالوں کے معاملے میں بہت جذباتی ہوتے ہیں اور ہمیشہ اسی پریشانی میں مبتلا رہتے ہیں کہ کہیں ان کے بالوں کو کوئی نقصان نہ پہنچے لیکن یہ بھی حقیقت ہے کہ بالوں کی جتنی دیکھ بھال کی جائے وہ ٹوٹتے بھی اسی رفتار سے ہیں۔لیکن اگر احتیاط کی جائے اور چند باتوں کا خیال رکھا جائے تو بالوں کے ٹوٹنے کی رفتار میں کمی لائی جاسکتی ہے اور گنج پن کے خطرے سے چھٹکارا حاصل کیا جاسکتا ہے۔
بالوں کو زیادہ نہ دھوئیں
ملازمت پیشہ افراد اپنے بالوں کو عام لوگوں کے مقابلے میں زیادہ دھوتے ہیں کیونکہ دھول مٹی کے باعث بال جلدی خراب ہوجاتے ہیں جب کہ یہ افراد بالوں کی نشوونما کےلیے سب سے ضروری چیز یعنی تیل کا استعمال یا تو کرتے ہی نہیں یا پھر بہت کم مقدار میں کرتے ہیں، لہٰذا بالوں کو باربار دھونے کے باعث جڑوں میں موجود تھوڑا بہت تیل بھی نکل جاتا ہے جو بالوں کےلیے انتہائی نقصان دہ ثابت ہوتا ہے اور بال جھڑنا شروع ہوجاتے ہیں۔ دوسری جانب کیمیکلز ملی مصنوعات جیسے شیمپو وغیرہ کا زیادہ استعمال بھی بالوں کےلیے مضر ہے لہٰذا بالوں کو باربار دھونے سے گریز کریں اور ہفتے میں صرف دو بار بالوں کو دھوئیں۔
بالوں کےبڑھنے کا انتظار کریں پھر ترشوائیں
خواتین کے مقابلے میں مرد حضرات زیادہ بڑھے ہوئے بال پسند نہیں کرتے اور جیسے ہی بال ذرا سے بڑھتے ہیں، فوراً سیلون کا رخ کرتے ہیں اور انہیں چھوٹے کرالیتے ہیں، جبکہ کچھ مرد تو مہینے میں دو بار بال کٹواتے ہیں۔ تاہم ماہرین کا کہنا ہے کہ بالوں کو کٹوانے کا انحصار ان کی اقسام پر ہوتا ہے۔ کچھ بال قدرتی طور پر ہلکے ہوتے ہیں اور کم رفتار سے بڑھتے ہیں جبکہ کچھ بال موٹے ہوتے ہیں اور ان کے بڑھنے کی رفتار تیز ہوتی ہے۔ لہٰذا بالوں کو اس وقت کٹوائیں جب وہ تھوڑے زیادہ بڑے ہوجائیں، ورنہ بالوں کو نقصان پہنچ سکتا ہے۔
بالوں کو تولیے سے خشک نہ کریں
مرد و خواتین نہانے کے بعد اکثر اپنے بالوں کو تولیے سے خشک کرتے ہیں لیکن یہ غلط طریقہ ہے۔ بالوں کو تولیے سے خشک کرنے پر بال دوگنی رفتار سے ٹوٹتے ہیں۔ نہانے کے بعد کنڈیشنر استعمال کرنے والوں کےلیے تو یہ طریقہ اور بھی خطرناک ہے کیونکہ گیلے بالوں کو تولیے سے خشک کرنے پر بالوں کی جڑوں میں شدید رگڑ پیدا ہوتی ہے اور بالوں کے کنارے متاثر ہوتے ہیں۔ اگر غلطی سے آپ نے اپنے بالوں کو تولیے سے رگڑ ہی لیا ہے تو ہلکا سا پانی بالوں میں لگائیں۔ اس کے علاوہ گیلے بالوں میں کنگھی کرنے سے بھی گریز کریں، اس سے بھی بال ٹوٹتے ہیں۔
بالوں میں رنگ (ڈائی) کرنا
موجودہ دور میں بالوں میں مختلف کلر کرنا فیشن بن گیا ہے لیکن یہ شوق بہت مہنگا ہے۔ اگر کسی اچھے سیلون سے بالوں میں رنگ کروایا جائے تو اچھی خاصی رقم خرچ ہوجاتی ہے لہٰذا نوجوان سیلون کے بجائے گھر پر خود ہی کلر کرنے کو ترجیح دیتے ہیں لیکن یہ طریقہ انتہائی غلط ہے کیونکہ ماہرین کے مقابلے میں عام افراد کلر کرنے کی تکنیک اور اس کے نقصانات و فوائد سے مکمل طور پر آگاہ نہیں ہوتے لہٰذا اپنے بالوں کو خود کلر کرنا بہت بڑا خطرہ ہوتا ہے، جب کہ ڈائی میں موجود کیمیکلز بھی بالوں کو شدید نقصان پہنچاتے ہیں، اس صورتحال میں کسی اچھے سیلون جائیں اور ماہرین کے مشورے سے بالوں کو کلر کروائیں۔
بالوں کی بہت زیادہ اسٹائلنگ نہ کریں
مرد حضرات، خاص طور پر نوجوان بالوں کی اسٹائلنگ کے معاملے میں بہت حساس ہوتے ہیں اور بالوں کو مختلف اسٹائل دینے کےلیے جیل اور موز وغیرہ کثرت سے استعمال کرتے ہیں۔ بہتر ہے کہ بالوں کی اسٹائلنگ کم کریں اور سادہ انداز اختیار کریں اور اپنے چہرے کے حساب سے بال بنائیں کیونکہ اگر آپ بالوں سے محروم ہوگئے تو کوئی بھی اسٹائل بنانے کے قابل نہیں رہیں گے لہٰذا اس صورتحال سے بچنے کےلیے پہلے ہی احتیاط کرلیں۔

چلی(میڈیا پاکستان) دل کے شدید دورے یا ہارٹ فیل کے بعد دل کے پٹھے کمزور ہوجاتے ہیں اور اب ایک نئی تحقیق سے انکشاف ہوا ہے کہ آنول نال سے اخذ کردہ خلیاتِ ساق (اسٹیم سیلز) سے دل کے پٹھوں کو مضبوط بنایا جاسکتا ہے اور مریض کی زندگی کو بڑھانا ممکن ہے۔چلی میں ڈاکٹر جارگے بارٹلوچی اور ان کے ساتھیوں نے پیدائشی بچوں سے جڑی آنول نال سے پہلے خلیاتِ ساق (اسٹیم سیل) نکالے۔ یہ انتہائی اہم اور بنیادی خلیات ہوتے ہیں جو کسی بھی عضو کے خلیات میں ڈھلنے کی صلاحیت رکھتے ہیں۔ اب ان خلیات کو انجکشن میں بھر کر دل کے دورے کے شکار مریضوں کے جسم میں داخل کیا گیا ۔ اس کے علاوہ مریضوں کو ایک گروپ کو فرضی دوا (پلیسیبو) کے ٹیکے لگائے گئے۔
اس سروے میں 18 سے 75 برس تک کے 30 مریض شامل تھے۔ ایک گروپ میں صحت مند ماؤں کی آنول نال سے نکالے گئے اسٹیم سیل داخل کئے گئے۔ ڈاکٹر بارٹلوچی کے مطابق ایک سال کے اندر اندر ان مریضوں کا دل بہتر ہوگیا، خون بہتر طور پر پمپ کرنے لگا اور ان کی زندگی بہتر ہوتی گئی۔
جبکہ مریضوں پر اس کے کوئی منفی اثرات سامنے نہیں آئے اور کسی قسم کی جلن اور سوزش محسوس نہیں کی گئی۔ ماہرین نے اس طریقہ علاج کو محفوظ اور قابلِ عمل قرار دیا ہے ۔ ڈاکٹروں کے مطابق اس سے دل کے والو بہتر ہوئے اور دل بہتر انداز میں خون پمپ کرنے لگا۔
اپنی رپورٹ میں ڈاکٹر جارگے بارٹلوچی نے لکھا ہے کہ اگرچہ نتائج حوصلہ افزا ہیں لیکن اسے مزید انسانوں پر آزمانے کی ضرورت ہے۔ اس طرح کی اسٹیم سیل تھراپی ہارٹ فیل کے بعد بچ جانے والے مریضوں کےلیے انتہائی مفید ثابت ہوسکتی ہے۔ اس صورتحال میں مریضوں کے دل میں وینٹریکل اسسٹ آلات اور شدید بیماری میں دل کی تبدیلی کی جاتی ہے۔
واضح رہے کہ ہارٹ فیل کے مریضوں کی نصف تعداد اگلے پانچ سال میں لقمہ اجل بن جاتی ہے جبکہ مشکل سے 30 فیصد مریض ہی 10 برس تک پورے کرسکتے ہیں۔

پیرس(میڈیا پاکستان) ماہرین کے مطابق کافی کے بہت سے فوائد کی فہرست میں ایک نیا اضافہ ہوا ہے جس کے تحت اب کافی پینے سے ہیپاٹائٹس سی اور ایچ آئی وی (ایڈز) کے مریضوں کو بہت فائدہ ہوتا ہے اور وہ قبل از وقت موت سے بھی دور رہ سکتے ہیں۔اس سے قبل درجنوں اہم مطالعات اور تحقیقات سے ثابت ہوا ہے کہ کافی کئی امراض سے بچاتی ہے لیکن اب نئی تحقیق کی رو سے روزانہ کافی کے تین کپ پینے سے ہیپاٹائٹس سی اور ایچ آئی وی کے مریضوں کو زندگی بڑھانے میں مدد مل سکتی ہے۔ یہ تحقیق فرانس میں کی گئی ہے۔پیرس کی دیکارتے یونیورسٹی اور ایک مقامی اسپتال کے ماہرین نے ڈاکٹر ڈومینیک سامن شیرون کی نگرانی میں یہ سروے کیا جس کی تفصیلات جرنل آف ہیپاٹولوجی میں شائع ہوئی ہیں۔ تحقیق سے معلوم ہوا کہ جن افراد میں ایچ آئی وی (ایڈز) کا مرض ہو ان میں ہیپاٹائٹس سی (ایچ سی وی) سے متاثر ہونے کا خطرہ ازخود بڑھ جاتا ہے جو جگر کو شدید متاثر کرتا ہے۔ تاہم ایچ سی وی کےلیے مؤثر علاج موجود ہے۔
ڈاکٹر سامن کے مطابق ایچ سی وی سے تندرست ہونے کے باوجود بھی ایچ آئی وی سے متاثر ہونے اور موت کا خطرہ بڑھ جاتا ہے۔ اس طرح سرطان، دل کے امراض اور دیگر بیماریاں بھی آگھیرتی ہیں۔ لیکن یہاں کافی پینے سے بہت سے طبی فوائد حاصل ہوتے ہیں۔
سروے میں 1028 ایسے افراد کا جائزہ لیا گیا جو ان دونوں امراض یعنی ایچ آئی وی اور ایچ سی وی کے شکار تھے۔ ان مریضوں کا پانچ سال تک جائزہ لیا گیا اور درمیان میں سوالنامے بھروائے جاتے رہے۔ پانچ برس میں 77 افراد اس دنیا سے رخصت ہوگئے جو کینسر، ایڈز یا کسی اور وجہ سے مرے تھے کیونکہ ایچ سی وی جگر کے کینسر کی وجہ بھی بنتا ہے۔ ان میں سے تقریباً 26 فیصد افراد نے روزانہ کم ازکم تین کپ کافی پینے کا اعتراف کیا تو معلوم ہوا کہ اس سے موت کا خطرہ 50 فیصد تک کم ہوگیا۔ البتہ اس کی وجہ اب تک نامعلوم ہے۔
کافی میں موجود مرکبات میں پولی فینولز بھی شامل ہیں جو جلد اور سوزش کم کرتے ہیں اور جگر کی حفاظت کرتےہیں۔ تحقیق کے بعد ماہرین نے کہا ہے کہ روزانہ تین کپ کافی پینے سے ایچ آئی وی اور ایچ سی وی انفیکشن میں کمی ہوتی ہے اور اس کا اثر طویل عمر کی صورت میں برآمد ہوتا ہے۔

نیویارک(میڈیا پاکستان)امریکی ماہرین نے خبردار کیا ہے کہ اگر آپ بہت زیادہ آلودگی والی جگہ پر رہتے ہیں تو اس سے گردے کی جان لیوا بیماریاں لاحق ہونے کا خطرہ بڑھ جاتا ہے۔اس تحقیق کے لیے امریکی سوسائٹی برائے نیفرولوجی نے 8 سال سے زائد عرصے تک 25 لاکھ افراد کا جائزہ لیا ہے اور اس کے بعد یہ نتائج اخذ کئے ہیں۔ اس سے قبل ثابت ہو چکا ہے کہ فضائی آلودگی امراضِ قلب، کینسر اور دیگر امراض کی وجہ بن رہی ہے۔
اس تحقیقی جائزے میں ایک عرصے تک ان لوگوں کو بغور نوٹ کیا گیا جو آلودگی والے علاقوں کے قریب رہتے ہیں اور یوں فضائی آلودگی سے ہونے والے امراض کی فہرست میں ایک نئی بیماری شامل ہو گئی ہے۔
رپورٹ میں کہا گیا ہے فضائی آلودگی کے باعث گرد، دھویں اور غبار کی معمولی مقدار بھی خون میں شامل ہو جاتی ہے جو خون صاف کرنے والے گردوں کو دھیرے دھیرے نقصان پہنچاتے ہیں۔ اس ضمن میں 2004 میں ایک مطالعہ شروع کیا گیا جس میں 25 لاکھ افراد کو ساڑھے 8 سال تک جانچا گیا۔ مطالعے میں فضائی آلودگی والے علاقوں میں ان کی رہائش گاہ اور ان کے گردوں کی صحت کا قریبی جائزہ لیا گیا۔ اسی دوران ای پی اے اور ناسا کے مرتب کردہ فضائی آلودگی کے معیارات کو بھی نوٹ کیا گیا۔
ماہرین نے جائزہ لیا کہ فضائی آلودگی ہرسال امراضِ گردہ کے 44,793 نئے کیسز کی وجہ بن رہی ہے جس میں سے 2,438 کیسز میں گردے مکمل طور پر فیل ہو رہے ہیں۔ خود امریکا جیسے ترقی یافتہ ملک میں کئی علاقے خوفناک فضائی آلودگی کا شکار ہیں جہاں لوگ گردے کی بیماریوں میں مبتلا ہو رہے ہیں۔
امریکا میں جنوبی کیلیفورنیا، مڈ ویسٹ اور نارتھ ایسٹ میں فضائی آلودگی اپنے عروج پر ہے اور وہاں لوگ امراضِ گردہ کے شکار ہو رہے ہیں۔
اس رپورٹ کے مرکزی مصنف ڈاکٹر زائد ال علی نے کہا ہے کہ یہ اپنی نوعیت کا پہلا سروے ہے۔ اگرچہ فضائی آلودگی اور انسانوں میں گردوں کے امراض کے درمیان معلومات کی کمی ہے لیکن ہم نے دریافت کیا ہے کہ فضائی آلودگی واضح طور پر گردوں کو متاثر کرتی ہے۔
ماہرین کا اصرار ہے کہ اگر فضائی آلودگی کی مقدار کم بھی ہو تب بھی یہ گردوں کو شدید متاثر کر سکتی ہے۔

ٹورنٹو، کینیڈا(میڈیا پاکستان) ہفتے میں 5 دن صرف 30 منٹ روزانہ پیدل چلنے سے قبل ازوقت موت کو بہت حد تک ٹالا جاسکتا ہے اور ایک بہت بڑے مطالعے کے بعد یہ تنیجہ اخذ کیا گیا ہے۔اس مطالعے یا سروے کےلیے دنیا کے 17 ممالک کے 130,000 سے زائد افراد کا ایک طویل عرصے تک جائزہ لیا گیا ہے۔ اس مطالعے میں ورزش، چہل قدمی اور اموات کے درمیان تعلق تلاش کرنے کی کوشش کی گئی ہے۔ مطالعے کے آغاز میں شرکا سے ان کی معاشی سماجی کیفیت، بیماریوں، طرزِ زندگی اور غذا کی معلومات حاصل کی گئی ہیں۔ سب سے بڑھ کر ان سے ورزش کے متعلق سوالات کیے گئے تھے۔
ان شرکا سے تین سال کے اندر تک امراضِ قلب و بلڈ پریشر اور سات برس کے اندر اموات کا جائزہ لیا گیا۔ یہ تحقیق کینیڈا کی مک ماسٹر یونیورسٹی کے اسکاٹ لیئر اور ان کے ساتھیوں نے کی ہے۔ انہوں نے اس طویل تحقیق کے بعد کہا ہے کہ اگر آپ ہفتے میں صرف 150 منٹ تک کوئی جسمانی مشقت، جاگنگ یا چہل قدمی کرتے ہیں تو اس سے کئی امراض دور ہوتے ہیں اور عمر بڑھتی ہے جس سے قبل ازوقت موت کا خطرہ 28 فیصد تک کم ہوجاتا ہے۔
آپ جتنے زیادہ سرگرم رہیں گے آپ کی صحت اتنی ہی بہتر رہے گی تاہم جو افراد ایک ہفتے میں بارہ گھنٹے تک چلتے ہیں ان میں وقت سے قبل موت کا خدشہ 36 فیصد تک کم ہوجاتا ہے۔
ماہرین نے کہا ہے کہ ضروری نہیں کہ روزانہ دوڑاجائے، تیراکی کی جائے یا جم کا رخ کیا جائے بلکہ گھریلو جھاڑ پونچھ، ویکیوم کلیننگ، فرش صاف کرنے اور کام کے مقام پر پیدل جانے سے بھی عین یہی فوائد حاصل ہوسکتے ہیں۔ پروفیسر اسکاٹ لیئر کے مطابق لنچ کے بعد چہل قدمی اور کام کی جگہ پیدل جانے کے فوائد بھی یکساں ہوتے ہیں۔ اسی بنا پر عالمی ادارہ صحت (ڈبلیوایچ او) نے 18 سے 64 سال کے افراد کو مشورہ دیا ہے کہ وہ اپنی طویل عمری اور بیماریوں سے بچنے کےلیے ہفتے میں کم ازکم 150 منٹ چہل قدمی ضرور کریں۔