Category صحت

کراچی(ایمرا نیوز آن لائن) شہر قائد میں ڈینگی سے متاثرہ مریضوں کی تعداد 10 ہزار سے تجاوز کرگئی۔ترجمان انسداد ڈینگی کنٹرول پروگرام کے مطابق کراچی میں 24 گھنٹوں کے دوران ڈینگی سے 252 افراد متاثر ہوئے جس کے بعد شہر میں اب تک ڈینگی سے متاثرہ افراد کی تعداد 10 ہزار 999 ہوگئی ہے۔

ترجمان نے بتایا کہ سندھ کے دیگر اضلاع میں ڈینگی سے متاثرہ افراد کی تعداد 785 تک جا پہنچی ہے۔ترجمان کا کہنا تھا کہ رواں سال سندھ میں ڈینگی سے انتقال ہونے والوں کی تعداد 32 ہوگئی ہے۔

اسلام آباد(ایمرا نیوز آن لائن) وزیراعظم کی معاون خصوصی برائے اطلاعات فردوس عاشق اعوان نے کہا ہے کہ نوازشریف کی ضمانت کا ان سے نہیں بلکہ عدالت سے پوچھیں۔اسلام آباد ہائیکورٹ میں پیشی کے موقع پر میڈیا نمائندوں سے گفتگو کرتے ہوئے فردوس عاشق اعوان سے ایک صحافی نے سوال کیا کہ کیا آپ سمجھتی ہیں کہ نوازشریف کو میرٹ پرضمانت ملی؟ اس پر معاون خصوصی کا کہنا تھا کہ یہ مجھ سے نہیں بلکہ عدالت سے پوچھیں، میرٹ پر تھی تو نوازشریف کو عدالت نے ضمانت دی، میڈیکل بورڈ کی سفارش پر ہی ان کو ضمانت ملی۔

انہوں نے کہا کہ میڈیکل بورڈ کے ارکان ڈاکٹر ہیں سیاست دان نہیں، ان پر اعتماد کرنا چاہیے اور میں (ن) لیگ کے دعوے کی نہیں بلکہ میڈیکل بورڈ کی حمایت کررہی ہوں۔پرویز مشرف کے ٹرائل سے متعلق سوال پر فردوس عاشق کا کہنا تھا کہ اب پاکستان بدل گیا ہے، اس کو قانون کے مطابق چلنا ہے، ٹرائل آئین وقانون کے مطابق ہی چلے گا۔جے یو آئی (ف) کے آزادی مارچ پر انہوں نے کہا کہ مولانا اب کہتےہیں استعفیٰ نہیں لے سکتے تو اس سے ملتی جلتی بات کریں، ملتی جلتی بات اب یہی ہے کہ اگلے چار سال الیکشن کا انتظار کریں، ہم چاہتے تھے مولانا کا اسٹیمنا بھی چیک ہو جائے۔معاون خصوصی کا کہنا تھا کہ اب مولانا فل ٹاس کو بھی روکنے کی پوزیشن پر آگئے ہیں، مولانا کے کھلاڑی میدان میں تو ہیں لیکن نڈھال ہیں۔

کراچی (ایمرا نیوز آن لائن) ہم میں سے اکثر لوگ بیماری کی تشخیص کے لیے گوگل کا انتخاب کرتے ہیں اور اپنی بیماری کی علامات کو گوگل پر سرچ کر کے اس کی ہدایت پر عمل کرنے کو صحیح سمجھتے ہیں۔اگر آپ بھی ایسا ہی کرتے ہیں تو نئی تحقیق آپ کو اس حوالے سے خبردار کرتی ہے۔نئی تحقیق کے مطابق گوگل پر اپنی بیماری کی علامات سرچ کرنے والے لوگوں میں ہر پانچ میں سے دوافراد کی بیماری کی غلط تشخیص ہوتی ہے۔حال ہی میں تقریباً 2000 امریکی شہریوں پر ایک سروے کیا گیا جس کے بعد یہ بات سامنے آئی ہے کہ وہ لوگ جنہوں نے اپنی صحت کی علامات کو انٹرنیٹ پر سرچ ان میں سے 34 فیصد افراد کو ان کی بیماری کا غلط ادراک ہوا۔

ان لوگوں نے جب اپنی بیماری کو انٹرنیٹ پر سرچ کیا تو اس کے مطابق انہیں کوئی سنگین بیماری لاحق ہوگئی تھی حالانکہ اصل میں انہیں ایسی کوئی سنگین بیماری نہیں تھی۔سروے کے مطابق47 فیصد لوگ ایسے ہیں جنہوں نے اپنی بیماری کی علامات کو انٹرنیٹ پر سرچ کیا اور وہ اس کا نتیجہ دیکھنے کے بعد مزید پریشان ہوگئے۔یہ سروے ’لیٹس گیٹ چیکڈ‘ کی جانب سے ون پول نے کیا جس سے یہ نتیجہ اخذ کیا گیا ہے کہ بیماری کی تشخیص کے لیے 51 فیصد افراد پہلے ایک ماہر ڈاکٹر سے رجوع کرتے ہیں۔دوسری جانب 26 فیصد افراد کے پاس بنیادی معالج کی سہولت میسر نہیں تھی جبکہ ہر 10 میں سے 6 افراد ڈاکٹر کے پاس جانے کو ترجیح نہیں دیتے، ان افرادکے ڈاکٹر کے پاس جانے سے گریز کرنے کی وجہ یہ تھی کہ وہ ان کے اخراجات نہیں اٹھا سکتے جبکہ 37 فیصد افراد کا یہ ماننا تھا کہ وہ ڈاکٹر پر یقین نہیں رکھتے۔

سروے کے مطابق 37 فیصد افراد کا ماننا ہے کہ ان کے پاس معالج کے پاس جانے کا وقت نہیں ہے۔جو افراد ڈاکٹر کے پاس جانے کو ترجیح دیتے ہیں ان میں سے 47 فیصد لوگوں کا یہ ماننا ہے کہ وہ اپنی بیماری کو دیکھتے ہوئے اس کا فیصلہ خود کرتے ہیں کہ اس کا ٹیسٹ ہوسکتا ہے یا نہیں۔لیٹس گیٹ چیکڈ کے میڈیکل ڈائریکٹر رابرٹ مورڈکن کا کہنا تھا کہ اس سروے سے ہمیں یہ معلوم ہوا ہے کہ لوگوں کی ایک بڑی تعداد اپنی بیماری اور اس کی علامات کو سمجھ نہیں پاتے یا تو ان کی بیماری کی تشخیص غلط ہوتی ہے۔انہوں نے مزید کہا کہ اپنے آپ کو آگاہی دینا اچھی بات ہوسکتی ہے، لیکن یہ ضروری ہے کہ آپ اپنی بیماری کے لیے ڈاکٹر کی ہدایت کے مطابق ٹیسٹ ضرور کروائیں۔سروے کے مطابق اکثر لوگوں کو غدود کا مسئلہ رہتا ہے، تاہم جب سروے میں یہ سوال کیا گیا کہ یہ غدود جسم کے کس حصے میں موجود ہوتے ہیں تو ان میں سے صرف 45 فیصد افراد ہی اس بات کا صحیح جواب دے سکے تھے۔

(ایمرا نیوزآن لائن) ہمیں اکثر کسی بھی جگہ وقت سے پہلے یا وقت پر پہنچنے کا کہا جاتا ہے اور ہم اکثر ایسا ہی کرتے ہیں لیکن ایک تحقیق سے ایسی بات سامنے آئی ہے جو کہ تاخیر سے اور وقت پر پہنچنے والے دونوں طرح کے لوگوں کو حیران کرسکتی ہے۔

آکسفورڈ یونیورسٹی کی حالیہ تحقیق سے اس بات کا انکشاف ہوا ہے کہ وہ لوگ جو ہر جگہ ہمیشہ تاخیر سے پہنچتے ہیں وہ لمبی زندگی جینےکے ساتھ ساتھ خوش مزاج بھی ہوتے ہیں۔ماہرین کا کہنا ہے کہ وہ لوگ جو کہیں بھی دیر سے پہنچنے کے عادی ہوتے ہیں ان کا بلڈ پریشر بھی معتدل ہوتا ہے جب کہ ان میں امراض قلب کے امکانات بھی بے حد کم پائے جاتے ہیں۔

ماہرین کا کہنا ہےکہ بنیادی طور پر یہ لوگ وقت پر پہنچنے والے لوگوں کے مقابلے میں زیادہ آرام دہ اور پرسکون ہوتے ہیں اور یہی وجہ ہے کہ ان لوگوں کی دل کی صحت اچھی ہوتی ہے جب کہ ان میں فالج کا خطرہ کم ہوتا ہے اور ایسے لوگوں میں ڈپریشن کے امکانات بھی بے حد کم ہوتے ہیں۔تحقیق کے مطابق زندگی میں پُر امید ہونا انسان کی صحت کو بہتر کرتا ہے جبکہ اس کا تعلق بہتر کار کردگی اور کامیابی سے بھی ہے۔

(ایمرا نیوزآن لائن) ہم سب اس بات سے اچھی طرح باخبر ہیں کہ تمباکو نوشی ناصرف صحت کے لیے مضر ہے بلکہ اس سے امراضِ قلب اور پھیپڑوں کی خطرنات بیماریاں بھی لاحق ہو سکتی ہیں۔

حالیہ تحقیق کے مطابق تمباکو نوشی کرنے والے افراد میں ڈپریشن اور دماغی بیماری (شیزوفرینیا) کے خطرات میں بھی اضافہ ہو جاتا ہے برسٹل یونیورسٹی کے ماہرین کا کہنا ہے کہ تمباکو نوشی کرنے والے افراد میں ذہنی امراض کے خطرات بڑھ جاتے ہیں۔

اس تحقیق میں تقریباً ڈیڑھ لاکھ افراد شامل تھے، ماہرین کا کہنا ہے اکہ بھی یہ بات ثابت نہیں ہوئی کہ تمباکو نوشی ڈپریشن کا باعث بنتی ہے لیکن انہوں نے خبردار کیا ہے کہ تمباکو نوشی کے ڈپریشن کے ساتھ تعلق کے حوالے سے انہیں کافی ثبوت ملے ہیں۔

تحقیق کا نتیجہ جنرل سائیکولوجیکل میڈیسن میں شائع کیا گیا ہے جس میں ایسے لوگوں کے بارے میں بتایا گیا ہے جو تمباکو نوشی کرتے ہیں اور ان میں ڈپریشن کے زیادہ امکانات موجود ہیں۔

ماہرین کا کہنا ہے کہ تحقیق سے حاصل کیے جانے والے ثبوتوں سے یہ بات تو ثابت ہے کہ تمباکو نوشی کی وجہ سے دماغی صحت شدید متاثر ہوتی ہے۔ تحقیق کے مصنف ڈاکٹر رابن ووٹن اور ان کی ٹیم کا خیال ہے کہ سگریٹ میں موجود نیکوٹین دماغ میں ڈوپامائن اور سیروٹونن رسیپٹرز کو روکتی ہے۔

انہوں نے بتایا کہ ڈوپامین ایک قدرتی طور پر پائے جانے والا کیمیکل ہے جو کہ انسان کے جذبات کنٹرول کرتا ہے، اسی کی طرح سیروٹونن کیمیکل ہوتا ہے جسے ‘خوشگوار کیمیکل’ بھی کہا جاتا ہے اور یہ انسان کو خوش کرنے کا باعث بنتا ہے۔ ماہرین نے مزید سائنسدانوں سے مطالبہ بھی کیا گیا ہے کہ تمباکو نوشی کرنے والوں میں ذہنی امراض کے حوالے سے مزید کام کیا جائے۔

ڈاکٹر ووٹن کا کہنا ہے کہ تمباکو نوشی پھیپھڑوں کے کینسر، دل کی بیماری اور ٹائپ 2 ذیابیطس کا باعث بھی بنتی ہے اور اس بات سے تمام لوگ باخبر ہیں۔ اعداد و شمار کے مطابق گزشتہ سال امریکا میں سگریٹ پینے کی عادت سے 4 لاکھ 80 ہزار اور انگلینڈ میں 78 ہزار افراد ہلاک ہوئے۔

(ایمرا نیوزآن لائن) والدین کے لیے بچوں کی تربیت کرنا ایک مشکل مرحلہ ہوتا ہے اور خاص طور پر جب وہ اپنے بچوں کو اعلیٰ تعلیم دینے کے لیے کوشاں ہوتے ہیں اور وہ اس حد تک اس بات کو اپنے سر پر سوار کرلیتے ہیں جس سے ان کو نقصان کا بھی خدشہ ہوتا ہے، ایسا ہی چین میں ہوا جب ایک ماں کو بچے کو پڑھاتے ہوئے دل کا دورہ پڑ گیا۔

چینی میڈیا کے مطابق چین کی 36 سالہ خاتون اپنے 9 برس کے بیٹے کو ریاضی کے سوالات سمجھا رہی تھیں مگر ان کے بیٹے کو یہ سوالات سمجھ نہیں آرہے تھے، خاتون اس وجہ سے بے حد تناؤ کا شکار ہوگئیں اور انہیں دل کا دورہ پڑ گیا۔ اس حوالے سے خاتون نے بتایا کہ ’میں نے اپنے بیٹے کو کئی مرتبہ سوالات سمجھائے مگر اس کو یہ سوال سمجھ نہیں آرہے تھے جس کی وجہ سے مجھے شدید غصہ آگیا، میرا دل اچانک تیزی سےدھڑکنے لگا اور میں سہی سے سانس بھی نہیں لے پا رہی تھی۔‘

خوش قسمتی سے خاتون کو فوراً ہی احساس ہوا کہ ان کے ساتھ کچھ عجیب سا ہورہا ہےتو انہوں نے اپنے شوہر کو فون کیا اور ان کے شوہر نے انہیں اسپتال منتقل کردیا جہاں ڈاکٹروں نے خاتون کو ’مایوکارڈیل انفیکشن‘ کی تشخیص کی جسے عام طور پردل کا دورہ کہا جاتا ہے۔ ڈاکٹرز کا کہنا تھا کہ وہ خوش قسمت ہیں کہ بالکل سہی وقت پر اسپتال میں داخل ہوگئیں کیونکہ اسپتال پہنچنے میں تھوڑی سی تاخیر بھی ان کی موت کا سبب بن سکتی تھی۔

خاتون نے بتایا کہ وہ اپنے بیٹے کو روزانہ پڑھاتی ہیں ، جب ان کے بیٹے کو سمجھ نہیں آتا تو وہ اکثر اس بات سے بے حد پریشان ہوجاتی ہیں لیکن انہوں نے ایسا کبھی بھی نہیں سوچا تھا کہ اس غصے سے ان کی صحت پر اس طرح کے سنگین نتائج برآمد ہوں گے۔ ڈاکٹر ز کا کہنا تھاکہ اکثر یہ نو عمر ماؤں کے ساتھ ہوتا ہے کیونکہ وہ متوازن غذا کا استعمال نہیں کرتیں جس کی وجہ سے جذباتی اور نفسیاتی طور پر انہیں بے حد مشکلات کا سامنا کرنا پڑتا ہے۔

مسلم لیگ ن(میڈٰیا92نیوزآن لائن) کی نائب صدر مریم نواز کا کہنا ہے کہ یہ بڑا مشکل ہے کہ نواز شریف علاج کے لیے باہر جائیں اور میں ان کے ساتھ نہ جاؤں۔

مریم نواز چوہدری شوگر ملز منی لانڈرنگ کیس میں احتساب عدالت میں پیش ہوئیں۔ مریم نواز نے عدالت میں بیان دیا کہ ایسا کیسے ہو سکتا تھا کہ عدالت میں بلایا جائے اور میں نہ آؤں، آج بھی میں والد نواز شریف کو چھوڑ کر آئی ہوں۔

رہنما ن لیگ نے عدالت کو بتایا کہ میاں صاحب کی طبعیت کافی ناساز ہے: مریم نواز کے وکیل امجد پرویز نے عدالت سے استدعا کی کہ ریفرنس دائر ہونے تک حاضری سے استثنیٰ دیا جائے کیونکہ قانون میں اس کی گنجائش موجود ہے۔ عدالت نے نیب کے تفتیشی افسر سے ریفرنس دائر کرنے سے متعلق استفسار کیا اور مریم نواز کے وکیل سے کہا کہ آپ درخواست دائر کریں پھر بعد میں اس پر فیصلہ ہو گا۔عدالت نے نواز شریف کی حاضری سے استثنیٰ کی درخواست مںظور کر لی جب کہ یوسف عباس کے جوڈیشل ریمانڈ میں 14 روز کی مزید توسیع کر دی گئی۔ کیس کی سماعت 22 نومبر تک ملتوی کر دی گئی۔

نیب عدالت سے واپسی پر صحافی کی جانب سے سوال کیا گیا کہ میاں نواز شریف علاج کیلئے کب باہر جا رہے ہیں؟ جس پر مریم نواز نے جواب دیا کہ میاں صاحب کو علاج کے لیے فوری باہر جانا چاہیئے۔ ایگزٹ کنٹرول لسٹ سے نام نکالنے سے متعلق درخواست پر رہنما ن لیگ نے کہا کہ مجھے نہیں پتا، گھر جا کر دیکھوں گی، شہباز شریف اس معاملے کو دیکھ رہے ہیں۔ مریم نواز نے مزید کہا کہ میں ابھی فوری سفر نہیں کر سکتی کیونکہ میرا پاسپورٹ عدالت کے پاس ہے۔

ان کا کہنا تھا کہ مجھے نواز شریف کی صحت سے متعلق بڑی فکر رہتی ہے، 24 گھنٹے ان کے ساتھ ہوتی ہوں اور ان کے معاملات کو خود دیکھ رہی ہوں۔ انہوں نے مزید کہا کہ پاکستان میں دستیاب ہر ممکن علاج کیا گیا لیکن اس کے باوجود ان کی بیماری کی تشخیص نہیں ہو رہی اور ان کے پلیٹیلیٹس پھر 20 ہزار تک پہنچ گئے ہیں۔ مریم نواز نے کہا کہ دنیا میں جہاں بھی ممکن ہو نواز شریف کو علاج کے لیے جانا چاہیے، بڑا مشکل ہے کہ میاں صاحب علاج کے لیے باہر چلے جائیں اور میں نہ جا سکوں۔

ڈیل سے متعلق سوال پر ن لیگ کی نائب صدر نے کہا کہ ڈیل کی باتیں کرنے والوں کو شرم آنی چاہیے، حکومت کی جانب سے بنائے گئے میڈیکل بورڈ نے خود کہا کہ میاں صاحب کو علاج کے لیے باہر جانے کی ضرورت ہے۔ حکومت کی جانب سے مزید ریلیف ملنے سے متعلق سوال پر مریم نواز نے کہا کہ ان شااللہ سچ غالب آ کر رہے گا۔

اسلام آباد(ایمرا نیوزآن لائن) کے نجی اسپتال میں سابق وزیراعظم شاہد خاقان عباسی کے ہرنیا کا آپریشن کر دیا گیا۔

ایل این جی کیس میں گرفتار شاہد خاقان عباسی کو گزشتہ 4 سال سے ہرنیا کی تکلیف تھی اور انہیں 4 نومبر کو اسلام آباد کے نجی اسپتال میں منتقل کیا گیا تھا۔ شاہد خاقان عباسی کا بلڈ پریشر زیادہ ہونے کی وجہ سے 4 نومبر کو آپریشن مؤخر کر دیا گیا تھا۔

محکمہ داخلہ پنجاب کی شاہد خاقان عباسی کو اسپتال منتقل کرنے کی ہدایت ذرائع کے مطابق شاہد خاقان عباسی کے ہرنیا کا آپریشن کر دیا گیا ہے اور انہیں ہوش میں آنے میں مزید 3 سے 4 گھنٹے لگیں گے۔

ذرائع کا بتانا ہے کہ شاہد خاقان عباسی کو آپریشن کے بعد کم از کم 7 دن تک اسپتال رکھا جائے گا اور میڈیکل بورڈ نے شاہد خاقان عباسی کے اسپتال میں مزید قیام سے متعلق حکومت کو آگاہ کر دیا تھا۔

لاہور(ایمرا نیوزآن لائن) ہائیکورٹ نے ینگ ڈاکٹرز کو ہڑتال ختم کرنےکا حکم دے دیا۔

ہڑتال سے متعلق کیس کی سماعت کےدوران ینگ ڈاکٹرز نے کمرہ عدالت میں شورشرابا بھی کیا جس پر پولیس نے انہیں کمرہ عدالت سے باہرنکال دیا۔ کیس کی سماعت کےدوران سیکرٹری ہیلتھ پنجاب نے عدالت کو بتایا کہ ایم ٹی آئی قانون بنانے میں سب کو شامل کیا گیا لیکن ایک مخصوص طبقہ ہے جو ہڑتال کررہا ہے۔

اس موقع پر جسٹس جواد حسن نے ریمارکس دیئے کہ عدالت حکومت کے ساتھ کھڑی ہے،اس وقت ڈینگی،اسموگ اوردیگرمسائل چل رہے ہیں لیکن ڈاکٹر زہڑتال پر ہیں۔ انہوں نے کہا کہ ہڑتال کس طرح کی جاسکتی ہے،آرڈیننس 2 ستمبر کو آیا اس لیے ہڑتال پری میچور ہے۔عدالت نے ینگ ڈاکٹرزکو حکم دیا کہ وہ لکھ کردیں کہ ہڑتال نہیں کریں گے۔

یاد رہے کہ پنجاب میں ایم ٹی آئی ایکٹ کے خلاف گرینڈ ہیلتھ الائنس کی جاری ہڑتال کے باعث بیشتر سرکاری اسپتال کی او پی ڈیز، آپریشن تھیٹرز اور لیبارٹریاں مسلسل 29 ویں روز بھی بند ہیں جب کہ گزشتہ10 روز سے ان ڈور میں بھی ڈاکٹرز، پیرا میڈکس اور نرسز کی ہڑتال جاری ہے ۔ ڈاکٹرز اور عملے کی جانب سے احتجاجی مظاہرے بھی کئے جارہے ہیں جب کہ ہڑتال کی وجہ سے اسپتالوں میں آنے والے مریض پریشان ہیں ۔

(ایمرا نیوزآن لائن) نارنجی کھانے میں مزیدار ہونے کے ساتھ بے حد فائدے مند بھی ہوتی ہے، مگر کیا آپ جانتے ہیں کہ نارنجی کے چھلکے بھی ضائع کرنے کی چیز نہیں ہیں۔

نارنجی کے چھلکوں کو عام طور پر ہم کوڑے دان میں پھینک دیتے ہیں لیکن ان میں پایا جانے والا قدرتی تیل کسی چیز کو صاف کرنے کے لیے بہترین سمجھا جاتا ہےجبکہ اس کی خوشبو سے آس پاس کی فضاء بھی ترو تازہ ہوجاتی ہے۔

فرج کو تروتازہ رکھیے: اکثر فرج میں مسلسل کھانا رکھنے کی وجہ سے بدبو آجاتی ہے۔ فرج کو تروتازہ رکھنے کے لیے نارنجی کے چھلکوں پر نمک چھڑک کر فرج میں رکھ دیں۔ نمک کے اندر یہ خاصیت ہوتی ہے کہ وہ فرج کی نمی اور بدبو کو جذب کرلیتا ہے جب کہ نارنجی کے چھلکے فرج میں ایک خوشبو پیدا کرتے ہیں۔

لکڑی کی چیزوں کی صفائی:نارنجی کے چھلکے لکڑی کی چیزوں کے داغ کو مٹانے اور انہیں چمکدار بنانے کے کام بھی آتے ہیں۔

نارنجی کے چھلکوں کو ایک جار میں بھر دیں اور اتنے چھلکے ڈالیں کے جار آدھا خالی ہو۔ پھر اس جار میں اتنا سرکہ ڈالیں کہ یہ مکمل بھر جائے، اس جار کو کم سے کم دو ہفتے تک ڈھک کر چھوڑ دیں۔ دو ہفتے بعد اس جار میں سے نارنجی کے چھلکے نکال دیں اور اس کو کسی اسپرے بوتل میں ڈال کر استعمال کریں۔

بالوں میں استعمال: نارنجی میں وٹامن سی وافر مقدار میں پایا جاتا ہے جو بالوں کو چمکدار ملائم اور نرم بنانے میں بے حد مفید ہے۔ نارنجی کو چھلکے سمیت بلینڈر میں ڈال کر اچھی طرح بلینڈ کرلیں۔ اب اسے بالوں میں 20 منٹ لگانے کے بعد دھو لیں ایسا کرنے سے بال نرم، ملائم اور چمکدار ہوجاتے ہیں۔