Category صحت

اسلام آباد(ایمرا نیوز آن لائن)آج کل کے دور میں جہاں انسان بے شمار پریشانیوں میں گِھرا ہوا ہے تو ان پریشانیوں سے نجات حاصل کے لیے اور جسمانی و دماغی صحت کو بہترین بنانے کے لیے یوگا یا مراقبہ بے حد مفید سمجھا جاتا ہے۔ یوگا ایک ایسی پرسکون ورزش ہے جس سے انسان کی جسمانی و دماغی صحت پر اچھے اور مثبت اثرات مرتب ہوتے ہیں۔کیا آپ یہ بات جانتے ہیں کہ یوگا اور مراقبہ کرنے سے مردوں سے زیادہ خواتین کی صحت پر بہترین نتائج مرتب ہوتے ہیں؟جی ہاں، امریکی ماہرین کی جانب سے ایک تحقیق کی گئی ہے جس کا یہ نتیجہ سامنے آیا ہے کہ مراقبہ اور یوگا کرنا مردوں سے زیادہ خواتین کی صحت کے لیے مؤثر ہوتا ہے۔

براؤن یونیورسٹی کے محققین کے مطابق یوگا یا مراقبہ مردوں کے مزاج کو بہتر کرنے کے لیے بہترین ثابت نہیں ہوتا کیونکہ خواتین میں چیزوں پر دیر تک غور و فکر کرنےکی صلاحیت پائی جاتی ہے جو کہ عموماً مردوں میں نہیں ہوتی۔محققین کی ایک ٹیم نے 12 ہفتوں کے عرصے میں 41 مرد اور 36 خواتین کے ایک گروپ پر نظر ثانی کی اور اس دوران ان سب نے یوگا اور مراقبہ کیا۔12 ہفتوں کے بعد محققین نے یہ نتیجہ اخذ کیا کہ یوگا کرنے سے خواتین کی دماغی حالت اور صحت میں نمایاں مثبت تبدیلیاں سامنے آئیں جب کہ مردوں میں اس حوالے سے کوئی خاص تبدیلی نہیں دیکھی گئی۔

ماہرین کا کہنا ہے کہ اگر خواتین کوئی خوشی حاصل کرنا چاہتی ہیں تو وہ اس بات کو ہمیشہ اپنے ذہن میں رکھتی ہیں جب کہ مرد اس کے برعکس اپنی پریشانیوں پر ٹھیک طرح سے توجہ نہیں دے پاتے اور انہیں نظر انداز کرتے ہیں۔چونکہ مرد اپنے موجودہ لمحات یا زندگی پر زیادہ توجہ مرکوز رکھتے ہیں جس کی وجہ سے یوگا کی مشق ان کے دماغ پر زیادہ اثر انداز نہیں ہوتی۔

امریکہ(ایمرا نیوز آن لائن)امریکی گلوکارہ لیڈی گاگا پرفارمنس کے دوران اسٹیج سے نیچے آگریں۔غیر ملکی میڈیا کے مطابق لیڈی گاگا کا لاس ویگاس میں کنسرٹ جاری تھا کہ اس دوران انہوں نے ایک مداح کو اسٹیج پر مدعو کیا جس نے گلوکارہ کو اٹھانے کی کوشش کی لیکن وہ اس دوران توازن برقرار نہ رکھ سکا اور لیڈی گاگا کو لے کر اسٹیج سے نیچے گر گیا۔اس حوالے سے ٹوئٹر پر پوسٹ کی جانے والی ایک ویڈیو میں دیکھا جاسکتا ہےکہ اسٹیج پر آنے والے شخص نے لیڈی گاگا کو گود میں اٹھایا

اور اچھل کود کرنے کی کوشش کی تاہم اس دوران گلوکارہ اور ان کا مداح دونوں ہی اپنا توازن کھو بیٹھے اور اسٹیج کے کنارے عوام میں جاگرے۔میڈیا رپورٹ کے مطابق واقعے کے بعد گلوکارہ کے کندھے کے پٹھوں میں تکلیف ہوگئی تاہم وہ واقعے کے فوری بعد دوبارہ اسٹیج پر آگئیں۔حادثے سے متعلق بات کرتے ہوئے لیڈی گاگا نے کہا کہ سب کچھ ٹھیک ہے اور یہ پہلی بار نہیں کہ وہ اسٹیج سے گری ہیں۔

جیکب آباد(ایمرا نیوز آن لائن)جیکب آباد کے علاقے ٹُھل کے نجی اسپتال میں مبینہ طور پر آکسیجن نہ ملنے پر 4 نومولود جاں بحق ہو گئے۔نجی اسپتال کی انتظامیہ کے مطابق چاروں نومولود انکیوبیٹر میں تھے، آکسیجن ختم ہونے پر دوسرا آکسیجن سلینڈر لگا رہے تھےکہ بچے انتقال کر گئے۔نومولود بچوں کے انتقال پر ورثاء نجی اسپتال کی انتظامیہ کے خلاف سراپا احتجاج ہو گئے۔

ورثاء کی جانب سے الزام عائد کیا جا رہا ہے کہ ان کے بچے نجی اسپتال کی انتظامیہ کی غفلت کے باعث جان سے چلے گئے لہذا اسپتال انتظامیہ کے خلاف کارروائی کی جائے۔دوسری جانب ڈپٹی کمشنر جیکب آباد نے واقعے کا نوٹس لیتے ہوئے نجی اسپتال کو سیل کر دیا۔ڈپٹی کمشنر نے اسسٹنٹ کمشنر سمیع اللہ سجنرانی کو واقعے کی انکوائری کا حکم دیتے ہوئے دو روز میں واقعے کی رپورٹ طلب کر لی ہے۔

لاہور(ایمرا نیوز آن لائن)نمک کھانے میں ذائقہ بڑھانے کا سب سے اہم جُز سمجھا جاتا ہے، مگر نمک کے کھانے میں استعمال کرنے کے علاوہ کئی فوائد ہیں۔ماہرین کا کہنا ہے کہ قدرتی نمک نمکیات سے مالا مال ہوتا ہے جس میں پوٹاشیم، میگنیشیم اور کیلشیم شامل ہیں جو کہ جلد کے انفیکشن، ناخن کی مضبوطی اور دیگر مسائل کے لیے بے حد فائدے مند ہے۔آئیے ہم آپ کو نمک کو کھانے کے علاوہ استعمال کرنے کے بارے میں بتائیں۔
بالوں میں خشکی:
نمک بالوں کی جلد میں جمی ہوئی خشکی کو ختم کرنے میں نہایت ہی معاون سمجھا جاتا ہے، جب کہ یہ سر کی جلد میں موجود اضافی تیل اور نمی کو جذب کرتا ہے جو کہ سر میں انفیکشن اور خشکی کی وجہ بنتی ہے۔بالوں سے خشکی ختم کرنے کے لیے 2 سے 3 چمچ نمک کو سر پر چھڑکیں اور گیلے ہاتھوں سے سر کا مساج کریں۔ اچھی طرح مساج کرنے کے بعد سر کو ٹھیک طریقے سے دھو لیں۔ ایسا کرنے سے سر کی جلد میں جمی ہوئی خشکی جَلد ختم ہوجاتی ہے۔
دانتوں کی سفیدی:
نمک اور کھانے کا سوڈا دانتوں کی سفیدی کے لیے کرشماتی سمجھا جاتا ہے۔ نمک اور کھانے کا سوڈا دانتوں کے داغ کو ختم کرکے انہیں چمکدار بناتا ہے۔ نمک میں موجود فلورائڈ دانت اور مسوڑں کی صحت کے لیے بے حد مفید ہے۔دانتوں کو چمکدار بنانے کے لیے ایک چمچ نمک لیجیے اس میں 2 چمچے کھانے کا سوڈا شامل کر لیجیے۔ اس آمیزے کو برش پر لگا کر دانتوں کوصاف کیجیے، ایسا کرنے سے دانت چمکدار ہوجاتے ہیں۔
ماؤتھ واش:
نمک میں یہ خاصیت ہوتی ہے کہ یہ جراثیم کو مارتا ہے اور انفیکشن کو ٹھیک کرنے میں بھی مدد دیتا ہے۔ماؤتھ واش تیار کرنے کے لیے آدھا چمچ نمک لیجیے اور اس میں آدھا چمچ ہی کھانے کا سوڈا شامل کر لیجیے۔ اب اسے آدھے گلاس پانی میں گھول لیں اور اسے منہ میں اچھی طرح گھما کر کُلیاں کیجیے۔
چمکدار ناخن:
نمک ناخنوں کو مضبوط اور چمکدار بناتا ہے۔ ناخنوں کو چمکدار بنانے کے لیے ایک چمچ نمک، ایک چمچ کھانے کا سوڈا اور ایک چمچ لیمو کا رس لے لیجیے اب ان تمام چیزوں میں آدھا گلاس نیم گرم پانی شامل کرکے ایک کُھلے پیالے میں نکال لیں۔اب اس پیالے میں ناخنوں کو 10 منٹ تک ڈبو کر رکھیں اور ساتھ ہی کسی نرم برش سے ہلکے ہاتھوں سے ناخنوں کا اسکرب کریں۔ ایسا کرنے کے بعد ہاتھوں پر کوئی لوشن یا کریم لگا لیں ایسا کرنے سے ناخن مضبوط اور چمکدار ہوجاتے ہیں۔
نوٹ: یہ تمام معلومات تحقیق سے حاصل کی گئی ہیں۔ اگر آپ کسی بھی طبی مسئلے یا انفیکشن کا شکار ہیں اس کے استعمال سے قبل اپنے معالج سے ضرور مشورہ کریں۔

لاہور(ایمرا نیوز آن لائن) گرینڈ ہیلتھ الائنس کی ہڑتال پر وزیر صحت ڈاکٹر یاسمین راشد برہم نظر آئی کہتی ہیں ینگ ڈاکٹرز کو شرم آنی چاہیے مریضوں سے ظلم کررہے ہیں ۔ ا ن کا مزید کہنا تھا کہ ینگ ڈاکٹرز پہلے ایم ٹی آئی ایکٹ پڑھ تو لیں، پھر فیصلہ کریں۔

وزیر صحت ڈاکٹر یاسمین راشد نے لاہور نیوز سے گفتگو کرتے ہوئے کہا کہ ہسپتالوں کی نجکاری نہیں کی جا رہی سسٹم بہتر بنارہے ہیں ،ینگ ڈاکٹرز کی ہڑتال کے پیچھے کچھ اور حکمت عملی ہے۔ انہوں نے بتایا کہ ہسپتالوں میں کام چل رہا ہے ،مریضوں کا چیک اپ بھی کیا جارہا ہے۔ ایم ٹی آئی ایکٹ کے خلاف گرینڈ ہیلتھ الائنس کی ہٹ دھرمی جاری ۔ گرینڈ ہیلتھ الائنس کی ہسپتالوں میں کام چھوڑ ہڑتال بدستور جاری ہے ۔ہسپتالوں کے چار شعبہ جات میں ہڑتال ساتویں روز میں داخل ۔ مریض ، چیک اپ ، لیب ٹیسٹ اور ادویات سے محروم ہیں ۔

لاہور(ایمرا نیوز آن لائن)ینگ ڈاکٹرز کی ڈھٹائی ، گرینڈ ہیلتھ الائنس مریضوں کو پریشان کرنے سے باز نہ آئے۔ جنرل ہسپتال کے باہر ایم ٹی آئی ایکٹ کے خلاف احتجاج جاری ۔ مسیحاؤں نے سڑک بند کر دی، مریضوں کے ساتھ عام شہریوں کو شدید مشکلات کا سامنا ہے ۔ ٹریفک کی میلوں لمبی لائنیں لگ گئیں۔ چونگی امرسدھو ، بینک سٹاپ ، نشتر کالونی تک گاڑیاں بمپر ٹو بمپر ۔ ماڈل ٹاؤن ، کلمہ چوک اور اطراف کی سڑکوں پر بھی گاڑیوں کی لمبی قطاریں لگ گئی ۔

دوسری جانب میو ہسپتال میں ڈاکٹرز کی ہڑتال ناکام ہے، مریضوں کا علاج معالجہ جاری ہے۔ ایم ایس ڈاکٹر طاہر خلیل کہتے ہیں صبح سے اب تک 3500 سے زائد مریضوں کو چیک کیا جا چکا ہے ۔ میوہسپتال میں علاج کیلئے آنے والے مریض اورلواحقین مطمئن ہے کہتے ہیں ہسپتال میں علاج معالجہ جاری ہے،سینئرڈاکٹرزبھی موجودہیں ،تمام ٹیسٹ بھی ہورہےہیں ۔

چترال(ایمرا نیوز آن لائن)چترال میں راغلشت کے مقام پر مسافر گاڑی کھائی میں گرنے سے 9 افراد جاں بحق اور کئی زخمی ہو گئے۔

ریسکیو 1122 کے مطابق حادثے کا شکار ہونے والی گاڑی چترال سے بونی کی طرف جا رہی تھی کہ راغلشت کے مقام پر گھائی میں جا گری۔

ریسکیو 1122 کے مطابق حادثے میں 9 مسافر جاں بحق اور 8 زخمی ہوئے، زخمیوں کو ڈی ایچ کیو اسپتال چترال منتقل کر دیا گیا ہے۔

کراچی (ایمرا نیوز آن لائن) جیسا کے ہم سب جانتے ہی ہیں کہ کیلا غذائیت سے بھرپور پھل سمجھا جاتا ہے جو نہ صرف کھانے میں بھی مزیدار ہوتا ہے بلکہ کیلے میں پروٹین ، فائبر، وٹامن بی6 اور پوٹاشیم بھی وافر مقدار میں پایا جاتا ہے۔مگر آج ہم کیلے کے فوائد کے حوالے سے بات نہیں کر رہے، ہم آپ کو کیلے کے چھلکوں کے فوائد کے بارے میں بتائیں گے جو کہ عام طور پر کوڑے دان میں پھینکے جاتے ہیں۔

ماہرین کے مطابق کیلے کے چھلکے بال، جِلد، دانت کی خوبصورتی کو بڑھانے کے علاوہ صحت کے لیے بھی بے حد مفید سمجھے جاتے ہیں۔کیلوں کے چھلکوں کے بے شمار فائدے ہیں جن کو جاننے کے بعد آپ اسے کبھی بھی پھینکنا پسند نہیں کریں گے۔

کیلے کا چھلکا مچھر یا کسی چیز کے کاٹنے کے بعد خارش اور جلن کو ختم کرنے کے لیے نہایت ہی مفید سمجھا جاتا ہے۔ اگر آپ کو کسی کیڑے نے کاٹ لیا ہے تو فوری طور پر متاثرہ جگہ پر کیلے کا چھلکا رگڑ لیں اس سے آپ کو جلد ہی آرام آجائے گا۔

دانت کو چمکدار اور سفید بنانے کے لیے لوگ بے شمار پیسوں کو ضائع کرکے ٹریٹمنٹ کرواتے ہیں۔ کیلے کے چھلکے میں پوٹاشیم وافر مقدار میں پایا جاتا ہے یہی وجہ ہے کہ یہ دانتوں کو چمکدار بنانے میں مدد دیتا ہے۔روزانہ کیلے کے چھلکوں کو دانتوں پر رگڑنے سے دو ہفتے میں ہی آپ کو حیرت انگیز نتائج حاصل ہو سکتے ہیں۔

کیلے کے چھلکوں میں اینٹی آکسیڈینٹ پائے جاتے ہیں جو کہ جلد کے لیے بے حد مفید ہیں۔ اگر آپ اپنے چہرے کی جھُریاں کم کرنا چاہتے ہیں تو کیلے کا چھلکا لیجیےاور اسے اُس جگہ پر ملیں جہاں جھریاں زیادہ ہوں کچھ دیر تک اس کا مساج کریں اور آدھے گھنٹے بعد منہ دھو لیں۔

ایسا کرنے سے چہرے کی جھریاں کافی حد تک کم ہو جائیں گی۔اگر آپ کیلے کے چھلکوں کو کھائیں گے تو اس میں موجود فائبر آپ کے جسم میں موجود کولیسٹرول کی مقدار کو بڑھنے نہیں دے گا اور یہ دل کی صحت کے لیے بھی بے حد مفید ہے۔ کیلے کے چھلکوں کو کھانے سے آپ کے جسم میں موجود کولیسٹرول دل کی رگوں میں نہیں جمے گا۔

لاہور(ایمرا نیوز آن لائن) نیوز) ینگ ڈاکٹرز کی ہٹ دھرمی چوتھے روز بھی جاری۔ ایم آئی ٹی ایکٹ کیخلاف گرینڈ ہیلتھ الائنس کا احتجاج جاری۔ شہر کے سات بڑےہسپتالوں کی اوپی ڈی اور آپریشن تھیٹرز میں کام بند۔ سروسز،جناح ،پی آئی سی،گنگارام، جنرل،چلڈرن اور میوہسپتال شامل۔

مریض اور ان کے لواحقین شدید اذیت اور کرب میں مبتلا ۔ چلڈرن ہسپتال میں علاج کی سہولت نہ ملنے پر مریضوں کے لواحقین نے اوپی ڈی کے باہر احتجاج کیا ۔ لواحقین نے مریضوں کو علاج دو اور ٹھیکیداری بند کرو کے نعرے لگائے ۔

لندن(ایمرا نیوز آن لائن نیوز)ایک تحقیق میں یہ بات سامنے آئی ہے کہ کتا پالنا آپ کے لیے واقعی فائدہ مند ہوسکتا ہے کیونکہ اس سے جلد مرنے کے خدشات کم ہوجاتے ہیں۔ڈاکٹر کارولائن کرامر نے ایک تحقیقی مقالہ پیش کیا جو کہ جرنل آف دی امریکن ہرٹ ایسوسی ایشن میں شائع ہوا جس میں انہوں نے بتایا ہے کہ کتا پالنا انسان کو جلد مرنے کے خطرات سے بچاتا ہے۔

اس تحقیق میں لگ بھگ 40 لاکھ لوگ شامل تھے جن کا تعلق امریکا، کینیڈا، اسکینڈیناوا، نیوزی لینڈ، آسٹریلیا، اور برطانیہ سے تھا۔یونیورسٹی آف ٹورونٹو کے اسسٹنٹ پروفیسر ڈاکٹر کارولائن کرامر کا کہنا ہے کہ اگر کوئی شخص کسی بھی وجہ سے موت کا شکار ہوتا ہے تو کتا پالنے سے اس کے جلد مرنے کے خدشات 24 فیصد کم ہوجاتے ہیں۔

جب کہ وہ شخص جنہیں پہلے ہی اسٹروک یا دل کا دورہ پڑ چکا ہے یہ ان کے لیے بھی بے حد فائدہ مند ہے۔ انہوں نے بتایا کہ کتا پالنے سے دل کے امراض کے باعث مرنے کے خطرات بھی 31 فیصد تک کم ہوسکتے ہیں۔اس کے علاوہ اس حوالے سے ایک اور تحقیق بھی کی گئی جس میں 336,000 سے زائد سوئیڈش مرد اور خواتین شامل تھے جو کہ ’سرکولیشن‘ میں شائع کی گئی تھی۔

اس تحقیق سے یہ بات واضح ہوئی ہے کہ جو لوگ دل کے امراض میں مبتلا ہیں اور وہ کتے کے مالک بھی ہیں تو ان کی صحت زیادہ اچھی ہے ۔سینٹرز فار ڈیسیز کنٹرول پری ونشن کے مطابق کتا انسان کے اندار دباؤ اور ڈپریشن سے نجات کا سبب بنتا ہے جب کہ یہ انسان کو سکون بھی پہنچاتا ہے۔

ڈاکٹر مارتھا گلاٹی کا کہنا ہے جو لوگ اپنے کتے کے ساتھ رہتے ہیں ان لوگوں میں دل کے امراض کے خطرات کم ہوتے ہیں جب کہ وہ لوگ جو بغیر کتے کے رہتے ہیں ان میں دل کے امراض ہونے کے خدشات ہوتے ہیں۔انہوں نے بتایا کہ وہ لوگ جو کہ دل کا دورہ پڑنے کے بعد بچ جاتے ہیں اور وہ کتے کے مالک بھی ہیں تو ان میں 33 فیصد تک موت کے خطرات کم ہوجاتے ہیں۔

علاوہ ازیں ماہرین کا کہنا ہے کہ کتا پالنے سے انسان کے جسم میں کولیسٹرول کی مقدار اور خون کی روانی بھی بہتر ہوجاتی ہے، کتے کے مالک ہونے کی وجہ سے آپ کا جسم تقریباً 30 منٹ ورزش کرتا ہے جس سے صحت بہتر ہوجاتی ہے۔