Category صحت

لاہور (میڈیا 92 نیوز آن لائن صحت ڈیسک ) جسمانی وزن میں اضافہ اکثر افراد کو پریشان کردیتا ہے اور اکثر اس سے نجات کے لیے ان کے پاس مختلف وجوہات ہوتی ہیں، جیسے صحت کے مسائل یا رشتے ٹوٹنے کا ڈر۔

مگر ایک خاتون نے اپنی ملازمت کے لیے خود کو بدل کر دکھایا۔

2016 میں بریٹینی مے کا وزن 234 کلوگرام ہوچکا تھا اور ان کے لیے زراعت پڑھانے کا کام مشکل ترین ہوگیا تھا کیونکہ وہ طالبعلموں کو باہر لے جانے سے قاصر ہوگئی تھیں۔

اس وقت انہیں احساس ہوا کہ جسمانی وزن بہت زیادہ بڑھ چکا ہے، جس کے بعد انہوں نے خود کو بدلنے کا فیصلہ کیا اور اس کے لیے اپنی ایک دوست سے مدد لی جو اس سے قبل وزن کم کرنے میں کامیاب ہوچکی تھی۔

اور محض 2 سال کے اندر 152 کلو سے زائد وزن کم کرنے میں کامیاب رہیں۔

اس کے لیے بریٹینی نے بس اپنی غذا اور ورزش کے معمولات میں معمولی تبدیلیاں کی جو کہ انتہائی موثر ثابت ہوئیں۔

انہوں نے بتایا ‘میں نے بتدریج اپنی عادات کو بدلنا شروع کیا اور سبزیوں اور پروٹین والی غذاﺅں کا استعمال شروع کردیا’۔

اسی طرح فوری طور پر جم جانے کی بجائے آہستہ آہستہ جسمانی سرگرمیوں کا حصہ بنایا جیسے گاڑی کو کچھ زیادہ دور پارک کرنے لگی یا اسکول کے اندر زیادہ چہل قدمی کرنے لگیں۔
https://www.instagram.com/p/BrRI8NclS5e/?utm_source=ig_web_button_share_sheet

اس طرح بتدریج انہوں نے جم جانا شرع کرکے وہاں کارڈیو ورزشیں کرنا شروع کیں جبکہ پھر اسے دیگر ورک آﺅٹ میں بدل دیا۔

2 سال کے اندر اتنا زیادہ وزن کم کرنے نتیجے میں ان کے جسم کی کھال کافی زیادہ لٹک گئی تھی جس کے نجات کے لیے انہوں نے رواں سال جنوری میں سرجری کے ذریعے اسے نکلوایا اور اس کھال کا وزن ہی 5 کلو سے زیادہ تھا۔

کراچی (ایمرا نیوز آن لائن)
لندن کی چیریٹی تنظیم ری ہیبلی ٹیشن رسپانس نے کراچی کی سندھ میڈیکل کالج ڈاکٹرز ایسوسی ایشن پیشنٹس ویلفیئر سوسائٹی کو مختلف میڈیکل ایکوپمنٹ عطیات میں دیئے ہیں۔
ان میں 19بلڈ پریشر مانیٹرز، دو پیشنٹس ٹرالی، دو آپریشن ٹیبل، پانچ پیشنٹ مانیٹر ٹرالی، تین سی آرم، دو سکشن پمپ، تیرہ مینوئل آپریشن ٹیبل، سات پیشنٹ مانیٹرز، پانچ ڈس ایبلیٹی ایڈز، چار اینتھی سیا ٹرالی، ایک ای ٹی ٹی ٹریڈمل ٹیسٹنگ، چار برتھنگ بیڈز اور ایک پیشنٹ ٹرالی شامل ہیں۔

(ایمرا نیوز آن لائن)
واشنگٹن: تاریک کمرے میں دیر تک ٹی وی دیکھنے اور چلتے ہوئے ٹی وی کے سامنے سوجانے سے وزن بڑھ سکتا ہے اور آخرکار موٹاپے تک لے جاسکتا ہے۔

جرنل آف امریکن میڈیکل ایسوسی ایشن (جے اے ایم اے) انٹرنل میڈیسن میں شائع رپورٹ میں کہا گیا ہے کہ رات کے وقت گھر میں مصنوعی روشنیوں کو کم سے کم رکھنا موٹاپے کو روکنے میں مددگار ثابت ہوسکتا ہے۔ اس سے قبل مرغن غذاؤں اور غیرصحتمند معمولات کو موٹاپے کی وجہ قرار دیا جاتا رہا تھا۔ تاہم اب ’لوورنگ آرٹیفیشل لائٹ ایکسپوژر ایٹ نائٹ‘ یا اے ایل اے این کو موٹاپے کی وجہ قرار دیا جارہا ہے۔

حال ہی میں امریکہ اور دیگر ممالک میں موٹاپےاورگھروں میں مصنوعی روشنی کی شرح ایک ساتھ بڑھتی دیکھی گئی ہے۔ جانوروں پررات کے وقت مصنوعی روشنی کے اثرات کو ماہرین نے باقاعدہ طور پر نوٹ کیا ہے ۔ چوہوں پراس کے اثرات میں قدرتی جسمانی گھڑی متاثر ہوئی اور ان میں موٹاپا بھی دیکھا گیا ہے۔
اس کے علاوہ رات کے وقت مصنوعی روشنی سے لوگوں کے کھانے پینے کے معمولات تبدیل ہوتے ہیں اور اوقات بدل جاتے ہیں۔ اگرچہ انسانوں پر اس کے مطالعے چھوٹے پیمانے پر کئے گئے ہیں جن سے حتمی نتیجہ نہیں نکالا جاسکتا۔ اس ضمن میں جو تحقیق سامنے آئی ہے ان میں انسانوں کے ورزش اورکھانے پینے کی عادت کو زیادہ قریب سے نہیں دیکھا گیا ہے۔

لیکن اس تحقیق کو ڈیل سینڈلر نے آگے بڑھایا ہے جو امریکا میں نیشنل انسٹی ٹیوٹس آف ہیلتھ سے وابستہ ہیں۔ انہوں نے پانچ سال تک 43,722 ایسی خواتین کا مطالعہ کیا جن کی عمریں 35 سے 74 برس تھیں اور ان کا تعلق ملک کی تمام 50 ریاستوں سے تھا۔

مطالعے میں شامل تمام خواتین سے ان کی غذائی عادات، ورزش اور دیگرعوامل کے بارے میں پوچھا گیا تھا۔ رات کے اندھیرے یعنی دیرتک ٹی وی دیکھنے والی خواتین میں موٹاپے کا خطرہ 19 فیصد تک بڑھا ہوا تھا۔ کیونکہ باڈی ماس انڈیکس (بی ایم آئی)، کمر کی چوڑائی اور کولہوں کے مقابلے میں کمر کا تناسب بھی فربہی کو ظاہر کررہا تھا۔

ماہرین نے اس کی وجہ بتاتے ہوئے کہا ہےکہ اس میں ٹی وی ، اسکرین یا پس منظر کی نیلی روشنی بھی اہم کردار ادا کرتی ہے۔

لاہور (ایمرا نیوز آن لائن)

ہمیں اکثر اس بات کا خیال نہیں ہوتا کہ ہم کھڑے ہوکر کھانا کھا رہے ہیں اور نہ ہی ہم کبھی سوچتے ہیں کہ اس سے کیا نقصانات ہوسکتے ہیں لیکن اب کھڑے ہوکے کھانا کھانے والے افراد ہوشیار ہوجائیں اور اپنی اس عادت کو ختم کریں ۔

جرنل آف کنزیومر ریسرچ کی حالیہ تحقیق میں یہ بات سامنے آئی ہے کہ جو افراد کھڑے ہو کے کھانا کھاتے ہیں ان میں جسمانی تناؤ پیدا ہوجاتا ہے اور ساتھ ہی وہ افراد ذائقے کو محسوس کرنے کی صلاحیت سے بھی محروم ہوجاتے ہیں۔

تحقیق سے معلوم ہوا ہے کہ کھانا کھاتے ہوئے انسان کے جسم کی پوزیشن بہت اہمیت کی حامل ہے کہ وہ کس پوزیشن میں کھانا کھا رہا ہے۔

ماہرین کا کہنا ہے کہ سکون سے بیٹھ کر کھانے والے افراد بہ نسبت کھڑ ہوکر کھانے والوں سے ذائقے کو بہتر محسوس کرتے ہیں، کھڑے ہوکے کھانا کھانے سے جسم کے سینسز متاثر ہوتے ہیں جس کی وجہ سے انسان میں جسمانی اور ذہنی تناؤ بھی پیدا ہوجاتا ہے۔

اس ریسرچ میں 350 لوگوں میں سے کچھ کو کھڑے ہوکر کھانا کھلایا گیا جب کہ کچھ افرد کو بیٹھ کر کھانے کو کہا گیا، ریسرچ سے یہ بات سامنے آئی کہ جنہوں نے کھانا کھڑے ہوکے کر کھایا تھا ان کو اس کھانے کا ذائقہ محسوس نہیں ہوا جتنا بیٹھ کے کھانے والوں کو محسوس ہوا۔

ریسرچ میں بتایا گیا ہے کہ جب انسان کھڑے ہوکر کھانا کھاتا ہے تو کشش ثقل کی وجہ سے دل کو خون پورے جسم تک پہچانے میں مشکل ہوتی ہے جس کی وجہ سے انسان کے جسم میں اسٹریس ہارمونس نکلتے ہیں اور اس سے ذائقے کی حس بھی متاثر ہوتی ہے۔

راولپنڈی (ایمرا نیوز آن لائن) وزیرصحت پنجاب ڈاکٹر یاسمین راشد اچانک بے نظیر بھٹو ہسپتال راوالپنڈی پہنچ گئیں۔ وزیر صحت نے ایمرجنسی، آوٹ ڈور، آپریشن تھیٹر و دیگر وارڈز میں جا کر صفائی ستھرائی کے انتظامات اور مریضوں کو فراہم کی جانے والی طبی سہولیات کا جائزہ لیا۔

وزیرصحت ڈاکٹر یاسمین راشد نے بے نظیر بھٹو ہسپتال راولپنڈی کے مختلف وارڈز میں جا کر مریضوں کی عیادت کی، انھوں نے مریضوں کو مہیا کی جانے والی طبی سہولیات بارے دریافت کیا۔ ایمرجنسی، آوٹ ڈور، آپریشن تھیٹر و دیگر وارڈز میں جا کر صفائی ستھرائی کے انتظامات کا بھی جائزہ لیا۔

وزٹ کے دوران ڈاکٹر یاسمین راشد کا کہنا تھا کہ عیدالفطر کے موقع پر سرکاری ہسپتالوں میں ڈاکٹرز و دیگرسٹاف نے بہترین فرائض سرانجام دیئے۔
نئے پاکستان میں سرکاری ہسپتالوں میں بتدریج حالات بہتری کی جانب جا رہے ہیں۔ ڈاکٹرز اپنے فرائض کوپیغمبرانہ پیشہ سمجھ کر ہرآنے والے مریض کو بہترین طبی سہولیات فراہم کریں۔

وزیر صحت پنجاب کا کہنا تھا کہ سرکاری ہسپتال میں آنے والا ہر پاکستانی بہترین علاج و معالجہ کا حق دار ہے، پنجاب کے سرکاری ہسپتالوں کو بہترین علاج گاہیں بنانے کی پوری کوشش کررہے ہیں۔

لاہور (ایمرا نیوز آن لائن)
سروسز ہسپتال کے ایم ایس سروسز کا قانون کی پاسداری کرانے کا انوکھا انداز اپنایا۔ بغیر ہیلمٹ کے حادثہ کا شکار ہونے والے افراد کو ہیلمٹ پہنا کر علاج شروع کرا دیا۔ ایم ایس سروسز ہسپتال ڈاکٹر سلیم چیمہ نے بغیر ہیلمٹ کے حادثہ کا شکار ہونے والے مریضوں کو علامتی سزا دی گئی۔ ایم ایس سروسز ہسپتال کے مطابق عید کے دنوں میں حادثہ کا شکار زیادہ تر موٹر سائیکل سوار ہوئے جو بغیر ہیلمٹ کے تھے ۔ایم ایس سروسز نے مریضوں کی دیکھ بھال کے ساتھ ساتھ ٹریفک حادثات میں ہسپتال میں زیر علاج افراد کو ہیلمٹ کی افادیت جاننے کے لئے دو چار منٹ کے لئے ہیلمٹ پہنایا۔

ساہیوال،لاہور(ایمرا نیوز آن لائن)
ڈسٹرکٹ اینڈ ٹیچنگ ہسپتال ساہیوال کے چلڈرن وارڈ میں انتظامیہ کی مبینہ غفلت کے باعث اے سی خراب ہونے اور شدید گرمی سے 8نومولود جان کی بازی ہار گئے ۔ایڈیشنل سیکرٹری صحت نے صحا فیوں سے گفتگو کے دوران آٹھ بچوں کے جاں بحق ہونے کی تصدیق کردی۔ترجمان وزارت صحت پنجاب نے کہا کہ اے سی بندش کے باعث تین اموات ہوئیں۔خبرمیڈیا پر آئی توڈپٹی کمشنر نے فوری طور پر ہسپتال پہنچ کرایم ایس کے دفتر کا اے سی ہنگامی طورپر چلڈرن وارڈ میں لگوادیا۔صوبائی وزیر صحت ڈاکٹر یاسمین راشد نے میڈیا میں چلنی والی خبر کا نوٹس لے کر ایڈیشنل سیکرٹری صحت رفاقت علی کو ڈی ایچ کیو ٹیچنگ ہسپتال جا کر معاملے کی انکوائری کا حکم دیااور فوری رپورٹ طلب کرلی۔پنجا ب ہیلتھ کیئر کمیشن نے تحقیقات کیلئے تین رکنی کمیٹی تشکیل دے دی

جو حقائق جاننے کے علاوہ ذمہ داران کا تعین کرکے 48گھنٹے میں رپورٹ پیش کر ے گی۔کمیٹی کی سربراہی ایڈیشنل ڈائریکٹر ڈاکٹر شاہد محمودکریں گے جبکہ اس میں دو ڈپٹی ڈائریکٹرزبھی شامل ہیں۔تمام شیر خواربچوں کی اموات گزشتہ 20 گھنٹوں کے دوران ہوئیں۔ لواحقین نے واقعہ کیخلاف شدید احتجاج کرتے ہوئے فیصل آباد روڈ کو ٹریفک کے لیے بند کردیا،انہوں نے کہاکئی مرتبہ ایم ایس آفس کے چکر لگائے ،ڈاکٹروں کو بھی کہا مگر کسی نے بات نہ سنی،ہسپتال انتظامیہ نے پہلے توہم پر دباؤ ڈال کر واقعہ دبانے کی روایتی کوششیں کی، ہمیں بتایا تک نہیں گیا کہ بچوں کی اموات کیسے ہوئیں، زبردستی ہسپتال سے نکالا گیا اور تھانہ فرید ٹاؤن پولیس نے مظاہرین کو مقدمات درج کرنے کی دھمکیاں دیں۔ ایس ایچ او فرید ٹاؤن نے لواحقین کے الزامات کو جھوٹا وار بے بنیادقرار دیدیا۔ایڈیشنل سیکرٹری صحت رفاقت علی نے کہا چلڈرن وارڈ میں اے سی نہ چلنے کے باعث گزشتہ 24گھنٹوں کے دوران 8 بچوں کی اموات ہوئیں،چلڈرن وارڈ کے سٹاف کے بیانات قلم بند کر لئے گئے ہیں،

ذمہ داران کو قرار واقعی سزا دی جائے گی۔ڈپٹی کمشنر ساہیوال زمان وٹو نے سیکرٹری صحت کو واقعہ کی بھجوائی گئی رپورٹ میں کہاورثا کی ایمرجنسی فون کال پر رات ایک بجے ہسپتال کا ہنگامی دورہ کیاتو چلڈرن وارڈ کا اے سی بند تھا جبکہ خالی کمروں کے اے سی چل رہے تھے ، ایم ایس کے دفتر کا اے سی اتروا کر چلڈرن وارڈ میں نصب کرایا۔انہوں نے رپورٹ میں بائیو میڈیکل انجینئر لقمان تابش کو اے سی کی خرابی کا ذمہ دار قرار دے کر معطل کرنے جبکہ غفلت کے مرتکب دیگر عملہ کے خلاف کارروائی کی سفارش کی ہے ۔ ہسپتال انتظامیہ نے واقعہ کی ابتدائی رپورٹ محکمہ صحت کو بھجوا دی جس کے مطابق بچوں کی اموات کسی کی غفلت نہیں مختلف بیماریوں کے باعث ہوئیں،

نرسری وارڈ میں ائیر کولر سسٹم خراب ہوا جس کو فوری طور پر ٹھیک کر لیا گیا۔ترجمان وزارت صحت پنجاب نے کہا چلڈرن وارڈ کے ایئر کنڈیشنرکے بند ہونے اور انتظامیہ کی مبینہ غفلت کے باعث پانچ نومولود بچوں کی ہلاکت کے واقعہ کی مکمل تردید کرتے ہیں۔ایڈیشنل سیکرٹری صحت رفاقت علی کی سربراہی میں تحقیقاتی کمیٹی نے ساہیوال کے دورہ کے بعد مکمل تحقیقات کرکے ابتدائی رپورٹ ڈاکٹر یاسمین راشد کو پیش کردی جس کے مطابق جاں بحق ہونے والے بچوں کی تعدادتین ہے ، دو بچے نجی ہسپتال سے انتہائی نازک حالت میں ڈسٹرکٹ ہیڈ کوارٹرز ہسپتال کی ایمر جنسی میں منتقل کئے گئے اور دونوں کی موت ایمر جنسی وارڈ میں جبکہ ہسپتال میں پہلے سے موجود ایک نومولود بچے کی ہلاکت بچوں کے وارڈ میں ہوئی، تیسرے بچے کی حالت گذشتہ روز سے نازک تھی جسے انتہائی نگہداشت وارڈ میں رکھا گیا تھا۔

گلاسگو (ایمرا نیوز آن لائن) حال ہی میں ماہرین نے ایک تحقیق میں انکشاف کیا ہے کہ اگر روزانہ 150 گرام بلیوبیریاں کھائی جائیں تو دل کے امراض کا خطرہ 15 فیصد تک ٹل سکتا ہے۔ اس کی وجہ یہ بتائی جارہی ہے کہ بلیوبیری کے بعض اجزا خون کی روانی کو بہتر بناتے ہیں اور شریانوں اور رگوں کی سختی دور کرتے ہیں۔

یہ تحقیق یونیورسٹی آف ایسٹ اینجلیا کے ماہرین نے کی ہے جس میں 138 سے زائد فربہ خواتین و حضرات کو روزانہ 150 گرام بلیوبیری کھلائی گئی تھیں۔ اس مطالعے میں شامل افراد کی عمر 50 سے 75 سال کے درمیان تھی۔ اس تمام عرصے میں لوگوں میں کارڈیو میٹابولک سنڈروم یا سی ایم ایس کو نوٹ کیا گیا جس میں ذیابیطس، بلڈ پریشر اور دیگر ایسے عارضوں کو دیکھا جاتا ہے جو دل کی بیماری کی طرف لے جاتے ہیں۔ اس کیفیت میں سب سے پہلے خون کی رگیں متاثر ہوتی ہیں۔

چھ ماہ تک مسلسل بلیو بیری کھلانے کے بعد ماہرین نے نتیجہ اخذ کیا کہ بلیوبیری رگوں کی سختی کم کرتی ہیں اور خون کے بہاؤ کو بڑھاتی ہے جس سے امراض قلب کا خطرہ 12 سے 15 فیصد تک کم ہوجاتا ہے۔
لیکن بلیو بیری کے فوائد یہاں ختم نہیں ہوتے۔ اس سے قبل لندن میں کی گئی تحقیق سے ثابت ہوا ہے کہ بلیو بیری کا باقاعدہ استعمال بچوں میں ذہانت اور دماغی صلاحیت میں 9 فیصد تک اضافہ کرتا ہے۔ اسی مناسبت سے بچوں کو ذہین بنانے میں یہ اہم کردار ادا کرسکتی ہے۔

اس کے علاوہ دیگر کئی تحقیقات سے معلوم ہوا ہے کہ اس میں موجود خاص فلیوینوئڈز بلڈ پریشر کو قابو میں رکھتے ہیں۔ بلیو بیری جلد کو صحتمند رکھتی ہے، ہڈیوں کو مضبوط بناتی ہیں، ذیابیطس میں انتہائی مفید ہےاور اس میں موجود خاص اجزا کئی اقسام کے کینسر کو روکنے میں معاون ثابت ہوئے ہیں۔ اس کے علاوہ بلیوبیری دماغی صحت کے لیے انتہائی اہم کردار ادا کرتی ہیں۔

نیوزی لینڈ (ایمرا نیوز آن لائن) ہونٹوں کے اطراف بخار کے چھالے (کولڈ سور) بار بار تنگ کرتے ہیں اور ان سے جان چھڑانا مشکل ہوجاتا ہے۔ اب ماہرین نے کہا ہے کہ ایک طرح کا شہد ان کے علاج میں اسی طرح مؤثر ہوتا ہے جس طرح مہنگی کریمیں ان کا علاج کرتی ہیں۔

میڈیکل ریسرچ انسٹی ٹیوٹ آف نیوزی لینڈ نے اپنے ملک میں عام پائے جانے والے ایک پھولدار پیڑ کینوکا Kunzea ericoides میں ایک جزو دریافت کیا ہے جو ہونٹوں کے اطراف میں ہونے والے بخار کے چھالے اور ہرپز کا شافعی علاج ثابت ہوسکتا ہے۔ اس وقت بازار میں جتنی بھی کریمیں دریافت ہیں شہد اسی رفتار سے بخار کے چھالوں کو ختم کرتا ہے خواہ وہ ناک پر ہوں یا پھر ہونٹوں کے اطراف پر نمودار ہوتے ہیں۔

مثلاً اسائیکلووِر کریم دودن میں چھالوں کو ختم کرتی ہے لیکن اس کے منفی ضنمی اثرات مرتب ہوتے ہیں۔ اس تناظر میں خاص طبی شہد کا استعمال بہت مفید ثابت ہوسکتا ہے۔ لیکن شہد کے لاتعداد فوائد اور بھی ہیں جن کا شمار مشکل ہے ۔ شہد کا استعمال ہاضمے کو درست کرتا ہے، بہترنیند لاتا ہے، جگر کو زہر سے پاک کرتا ہے اور جسمانی انفیکشن کو ختم کرتا ہے۔

کینوکا درخت سے حاصل شہد طبی مقاصد کے لیے استعمال کیا جاسکتا ہے اور نیوزی لینڈ کے ماہرین نے اس پر مزید تحقیق اور انسانی آزمائشوں پر زور دیا ہے۔ ابتدائی تجربات میں ماہرین نے کینوکا درخت سے حاصل شدہ شہد میں 5 فیصد اسائیکلووِر کریم ملائی اور اسے 952 مریضوں پر آزمایا اور پانچ روز بعد چھالہ بالکل غائب ہوگیا۔ جبکہ دوسری جانب صرف شہد استعمال کرنے والوں میں بھی عین یہی نتائج نمودار ہوئے۔

تحقیق کے اگلے مرحلے میں سائنسداں اس جزو کو تلاش کرنے کی کوشش کریں گے جو بخار کے چھالے کو ختم کرتا ہے۔

(ایمرا نیوز آن لائن)
کراچی: رتو ڈیرو کے بعد شکارپور میں بھی ایچ آئی وی کا انکشاف ہوا ہے۔

ڈائریکٹر جنرل صحت سندھ ڈاکٹر مسعود سولنگی نے کہا ہے کہ گلے میں پھندا لٹکی لاش زرینہ نامی خاتون کی ہے جس کی7مئی کو رتو ڈیرو میں ایچ آئی وی سینٹرمیں تصدیق کی گئی تھی اور 9مئی کوایچ آئی وی ٹریٹمنٹ سینٹر لاڑکانہ میں متوفیہ کو رجسٹرڈ کیا گیا جس کا محکمہ صحت کے ریکارڈ کے مطابق رجسٹریشن نمبر2473ہے۔

زرینہ رند ضلع شکار پور تعلقہ گڑھی یٰسین کے ٹاؤن دکھن کی رہائشی تھی، 3 مئی کو ڈسٹرکٹ ہیڈکواٹر شکارپور میں ابتدائی خون کی اسکریننگ میں ایچ آئی وی پازٹیوکی تصدیق کی گئی تھی جس کے بعد متوفیہ زرینہ کا اس کے اہلخانہ کے خون کے نمونے لیکر صوبائی ریفرل لیبارٹری سندھ ایڈزکنٹرول پروگرام سول اسپتال کراچی بھیجے گئے تھے جہاں اس کو ایچ آئی وی پازٹیوکی تصدیق کی گئی جس کے بعد زرینہ کو لاڑکانہ کے کے ایچ آئی وی سینٹر میں رجسٹرڈکے لیے بھیجا گیا تھا جہاں 9مئی متوفیہ زرینہ کے علاج کیلیے Anti Retro viral تھراپی شروع کردی گئی تھی۔

ڈسٹرکٹ ہیلتھ آفیسرشکار پور ڈاکٹروحید نے متوفیہ زرینہ کو ایچ آئی وی پازٹیوکی تصدیق کرتے ہوئے ایکسپریس کو بتایاکہ اس کا شوہر بہادر رند اوراس کے 4بچوں میں ایچ آئی وی نہیں، بعدازاں زرینہ رندکی پراسرارموت گردن میں دوپٹے سے پھندا لٹکی لاش ایک درخت سے ملی وہ اس وقت خالقی حقیقی سے جاملی تھی۔

متعلقہ پولیس حکام نے 29 مئی کو زرینہ رندکی وجہ موت معلوم کرنے کے لیے متعلقہ اسپتال کے ایم ایل اوکو لیٹرلکھا جس کی کاپی بھی ایکسپریس کو موصول ہوئی ہے۔

معلوم ہوا ہے کہ میرخان رند ولیج گڑھی یاسین دکھن کے رول ہیلتھ سینٹر میں پوسٹ مارٹم کیاگیا جس میں ڈاکٹروں نے ابتدائی طورپر بتایا کہ متوفیہ کے گلے میں چادر اور دوپٹے کی مدد میں پھندا لگاکردرخت سے لٹکایا گیا ہے، ابتدائی میڈیکولیگل رپورٹ میں اس کوStrangulation کہاگیا ہے۔

زرینہ رندکو ایچ آئی وی سینٹرکے حوالے سے ایکسپریس ٹربینون نے ایچ آئی وی ٹریٹمنٹ سینٹر لاڑکانہ کے انچارچ ڈاکٹرہولا رام سے رابطہ کیا انھوں نے بتایاکہ متوفیہ زرینہ رند تعلقہ ہیڈکواٹر اسپتال رتووڈیرومیں قائم سندھ ایڈزکنٹرول پروگرام کے ایچ آئی وی اسکریننگ کیمپ سے7مئی کو لاڑکانہ ٹریٹمنٹ سینٹر بھیجی گئی تھی جہاں ایچ آئی وی کی تصدیق کے بعد بعد 9مئی کوعلاج کے حوالے سے ایچ آئی وی ایڈزکی ادویات فراہم کی گئی تھی جو ایک ماہ کی دی گئی تھی۔

یاد رہے کہ ضلع ڈسٹرکٹ شکار تعقلہ گڑھی یسین اور دکھن گاوں کا فاصلہ 10کلومیٹر ہے۔

شکارپور کے ڈسٹرکٹ ہیلتھ افسرنے ایکسپریس کو بتایا کہ شکارپور میں بھی ایچ آئی وی کے شبے میں عوام کی اسکریننگ شروع کردی گئی ابتدائی طورپرجس کی رپورٹ آئندہ چند دن میں جاری کردی جائیگی، متوفیہ زرینہ بھی شکار کی رہائشی تھی جبکہ لاڑکانہ میں جمعرات کو مزید 15 افراد ایچ آئی وی پازٹیو کی تصدیق کی گئی ان میں11بچے 3خواتین اور ایک مرد شامل ہے۔