Category صحت

لاہور(وقت نیو ز آن لائن) حکومت پنجاب نے تمام ہیئر ڈریسر اور بیوٹی پارلرز کو آگاہ کیا ہے کہ وہ 30جون تک ہیپاٹائٹس ایکٹ ک تقاضے پورے کرتے ہوئے ہیپاٹائٹس اینڈ انفیکیشن کنٹرول پروگرام محکمہ پرائمری اینڈ سیکنڈری ہیلتھ کیئر سے لائسنس بنوا لیں اور نمایاں طور پر آویزاں کریں۔ یکم جولائی سے پڑتال ہو گی اور لائسنس نہ رکھنے والے ہیئر ڈریرسز اور بیوٹیشنز کیخلاف قانونی کارروائی عمل میں لائی جائیگی۔

فیصل آباد(ایمرا نیوز آن لائن) محکمہ صحت نے ایڈاک بنیادوں پر بھرتی ہونے والے ڈاکٹروں کے لئے دوبارہ امتحان دینے کی شرط ختم کر دی ہے۔ نوٹیفیکیشن کے مطابق ڈاکٹرز کو ملازمت جاری رکھنے کے لئے دوبارہ امتحان دینے کی ضرورت نہیں پڑے گی۔ کارکردگی کو مدنظر رکھتے ہوئے محکمانہ طریقے سے ایڈہاک ملازمت کی مدت پوری ہونے پر ملازمت جاری رکھنے کی اجازت دی جا سکے گی۔

لاہور(ایمرا نیوز آن لائن)حکومت پنجاب نے کنگ ایڈورڈ میڈیکل یونیورسٹی کے پروفیسر آف کارڈیالوجی پروفیسر ڈاکٹر ثاقب شفیع شیخ کو پنجاب انسٹیٹیوف آف کارڈیالوجی کا ایگزیکٹو ڈائریکٹر مقرر کر دیا ہے ان کی تعیناتی تین سال یا ریٹائرمنٹ تک ہو گی۔

(ایمرا نیوز آن لائن)
ہر چیز کو استعمال کرنے کےکچھ طریقے ہوتے ہیں اور بعض اوقات ان طریقوں کو مدنظر نہ رکھا جائے تو فائدہ بخش چیز بھی نقصان کا باعث بن جاتی ہے۔

اسی طرح سیب کا سرکہ وزن گھٹانے، دماغی حالت کو بہتر بنانے اور دل کے لیے بہت مفید ہے، یوں کہا جائے کہ سیب کے سرکے کا استعمال خود کو صحت مند رکھنے کا ایک نسخہ ہے تاہم اگر اسے صحیح طریقے سے استعمال نہ کیا جائے تو یہ ہماری صحت کے لیے نقصان دہ بھی ثابت ہوسکتا ہے۔ اپنی روز مرہ کی زندگی میں سیب کے سرکے کو استعمال کرنے والے ان باتوں کا ضرور خیال رکھیں۔

سیب کے سرکے کا استعمال کرنے کا صحیح طریقہ یہ ہے کہ اسے پانی میں ملا کر پیا جائے، کیونکہ سیب کے سرکے کو خالص استعمال کرنے سے معدے میں تیزابیت اور گلے کے لیے شدید نقصاندہ ہو سکتا ہے۔ اگر آپ سیب کے سرکے کو کھانے کے بعد استعمال کرتے ہیں تو اب اپنی اس عادت کو تبدیل کرلیجیئے۔

سیب کے سرکے کو کھانے سے 20 منٹ پہلے خالی پیٹ استعمال کیا جائے تو یہ بہت معاون ثابت ہوگا جس سے نظام ہاضمہ بھی درست رہتا ہے۔ سیب کا سرکہ جہاں ہمارے جسم کی اندرونی صحت کو بہتر کرتا اسی طرح یہ چہرے پر لگایا جائے تو اس سے جلد خوبصورت اور تر و تازہ رہتی ہے لیکن تیزابی تاثیر رکھنے والے اس نسخے کو براہ راست چہرے پر لگایا جائے تو یہ چہرے کی جلد کی خرابی کا باعث بن سکتا ہے۔

اس لیے سیب کے سرکے کا استعمال کرنے والوں مشورہ دیا جاتا ہے کہ وہ اسے براہ راست چہرے پر لگانے کے بجائے پانی میں حل کر کے لگائیں، اس عمل سے نقصان سے بچاجاسکتا ہے۔

(ایمرا نیوز آن لائن)
پشاور: ضلع بنوں سے 18 ماہ کے بچے میں پولیو وائرس کی تصدیق ہوگئی۔

وقت نیوز کے مطابق خیبرپختونخوا کے ضلع بنوں میں پولیوسے متاثرہ 18 ماہ کے بچے کا نیا کیس رپورٹ ہوا۔ پشاورقومی ادارہ صحت اسلام آباد نے متاثرہ بچے میں پولیووائرس کی تصدیق بھی کردی۔ اس کیس کے بعد ضلع بنوں میں رپورٹ ہونے والے کیسزکی تعداد 6 ہوگئی۔ متاثرہ بچے کا تعلق گاؤں خان ٹاؤن، یونین کونسل بائزن خیل سے ہے۔

واضح رہے کہ خیبرپختونخوا میں رواں سال مجموعی طور پر پولیو سے متاثرہ 14 کیسز رپورٹ ہوئے۔

ٹیکساس (ایمرا نیوز آن لائن) زخموں کے علاج اور خون کے رساؤ کو روکنے کے لیے ایک اچھی خبر سامنے آئی ہے جس کے تحت کیکڑے کے خول اور نینوذرات (پارٹیکلز) پر مشتمل ایک (ڈریسنگ) پٹی بنائی گئی ہے جو خون کے بہاؤ کو روکتی ہے اور اس طرح مریض کی جان بچ سکتی ہے۔

کیکڑے کی جلد کے خول میں پائی جانے والی ایک معدن کائٹوسان اور نامیاتی مرکب سے تیارکردہ نینو مادوں سے بنی یہ پٹی خون کے بہاؤ کو فوری طور پر روکتی ہے ۔ زیادہ خون بہنے سے دنیا بھر میں ہر روز لوگ موت کے شکار ہوتے ہیں اور اس طرح یہ نئی ڈریسنگ مریضوں کی جان بچاسکتی ہے۔

کائٹوسان سے نینوفائبر یا ریشے بنائے گئے ہیں اور اسے ایک شکروالے ہائیڈروجل میں رکھا گیا ہے ۔ دلچسپ امر یہ ہے کہ ہائیڈروجل سات روز کے اندر گھل کر ختم ہوجاتا ہے اور پٹی کو بار بار ہٹانے کی ضرورت نہیں پڑتی۔ یہاں تک کہ جنگ اور حادثوں میں شدید زخمی ہونے والے افراد بھی اس سے مستفید ہوسکتے ہیں۔

ازخود گھل کر ختم ہوجانے والی یہ انقلابی پٹی ٹیکساس اے اینڈ ایم یونیورسٹی کے ماہرین نے بنائی ہے۔ یہ عام پٹی کی طرح لچکدار ہے اور اسے ہر قسم کے زخموں پر لگایا جاسکتا ہے۔ اس وقت بازار میں دستیاب تمام حیاتی انجذاب (بایوآبزروبینٹ) پٹیوں کے مقابلے میں یہ بہترین کارکردگی کا حامل ہے۔

اگرچہ کائٹوسین کو کسی مرہم پٹی میں استعمال کرنا ایک چیلنج تھا اور اس کے لیے ماہرین نے ایک مچان نما نینواسٹرکچر بنایا جو بہتر انداز میں پھیلتا ہے اور خون کے بہاؤ کو بند کرنے کے ساتھ ساتھ زخم کو تیزی سے مندمل بھی کرتا ہے۔

پہلے مرحلے میں شکر کے سالمات سے بنے ہائیڈروجل بنائے گئے جن میں کائٹوسین کے مالیکیول پیوست ہوگئے اور اس کے بعد جادوئی پٹی تیار ہوگئی ۔ دیگر ماہرین نے اس ایجاد کو نہایت اہم قرار دیتے ہوئے اسے جلد از جلد عام تجارتی فروخت کے لیے پیش کرنے پر زور دیا ہے۔

لاہور(ایمرا نیوز آن لائن)محکمہ سپیشلائزڈ ہیلتھ کیئر اینڈ میڈیکل ایجوکیشن کے زیر انتظام ٹیچنگ ہسپتالوں کی انتظامیہ ادویات کو خریدنے اور ان کے ذخیرہ کرنے کے حوالے سے کمپیوٹرائزڈ میڈیسن انوینٹری سسٹم کے استعمال سے گریز کرنے لگے۔ ہسپتال میں خریدی گئی ادویات کو میڈیکل سٹورز سے وارڈز تک منتقلی کا نظام تاحال مینوئل طریقے سے چلایا جا رہا ہے۔ کمپیوٹرائزڈ نظام

کے استعمال نہ ہونے کی وجہ سے بڑی تعداد میں ادویات بغیر استعمال کے زائد المیعاد ہو جاتی ہیں۔ محکمہ سپیشلائزڈ ہیلتھ کیئر اینڈ میڈیکل ایجوکیشن تمام ٹیچنگ ہسپتالوں کے ایم ایس میڈیسن انوینٹری سسٹم کے تحت ادویات کی تقسیم کے نظام کو اپنانے کی سخت ہدایات جاری کر دی ہیں۔ ہدایات میں کہا گیا ہے کہ میڈیسن انوینٹری سسٹم پر ہسپتالوں کی انتظامیہ مکمل طور پر عمل درآمد نہیں کر رہی

اور اس سسٹم کو اپ ڈیٹ نہیں کیا جا رہا ہے جس کی وجہ سے آن لائن سسٹم میں ریکارڈ ظاہر ہوتا ہے کہ ادویات کی ایک خاصی تعداد زائد المعیاد ہو جاتی ہیں۔ تمام ہسپتالوں کے ایم ایس ذاتی طور پر ادویات کے سٹاک کے نظام کی مانیٹرنگ کے ذمہ دار ہوں گے۔ پنجاب انفارمیشن ٹیکنالوجی بورڈ اور محکمہ سپیشلائزڈ ہیلتھ کیئر اینڈ میڈیکل ایجوکیشن کے حکام کے ساتھ مل کر تمام ہسپتالوں کی

فزیکل تصدیق کریں گے اگر اس دوران کوئی کوتاہی پائی گئی تو اس کی ذمہ داری متعلقہ ہسپتال کے ایم ایس پر ڈالی جائے گی۔ پنجاب انفارمیشن ٹیکنالوجی بورڈ ہر ایم ایس کو اس آن لائن سسٹم کے لوگن پاس ورڈ فراہم کرے گا۔

سوئزرلینڈ(ایمرا نیوز آن لائن)
اوپر موجود تصویر میں آپ جو دوا دیکھ رہے ہیں وہ اس جسامت میں دنیا کی قیمتی ترین شے سے بھی قیمتی ہے، اس دوا کا نام ’زولجینسما‘ ہے جو ایک خاص جینیاتی مرض کا خاتمہ کرسکتی ہے اور ایک خوراک کی قیمت 20 لاکھ ڈالر سے زیادہ ہے جس کی قیمت پاکستانی روپوں میں قیمت 30 کروڑ سے زائد ہے۔

زولجینسما کو نووارٹس کمپنی نے بنایا ہے جو ایک خاص مرض ’اسپائنل مسکیولر ایٹروفی‘ یا ایس ایم اے کا علاج ہے اور صرف امریکا میں ہی ہر سال 400 بچے اس کیفیت کے ساتھ پیدا ہوتے ہیں۔ ایک گھنٹے تک اس کی ایک خوراک بچے کے جسم میں داخل کی جاتی ہے اور دوسال سے کم عمر بچے کو دی جاتی ہے۔ کمپنی کے مطابق یہ دوا اگلے ماہ کی ابتدا میں فروخت کے لیے پیش کی جاسکے گی۔ امریکی ادویاتی ادارے پہلے ہی دوا کی منظوری دے چکے ہیں۔

یہ دوا جین تھراپی پر مبنی ہے جو موروثی مرض اسپائنل مسکیولر ایٹروفی کا شافی علاج ہے۔ ایک خراب جین کی وجہ سے یہ مرض بچے پر اثر انداز ہوتا ہے جس سے عضلات، پٹھے کمزور ہوجاتے ہیں اور بچہ سانس لینے اور کھانے تک کا محتاج ہوجاتا ہے۔
ایس ایم اے بیماری کی تین اقسام ہیں اور یہ دوا ان تینوں کا علاج ہے۔ کمپنی کے مطابق اس دوا کی قیمت اگلے پانچ سال میں قسطوں کی صورت میں ادا کی جاسکتی ہے۔ اس مرض کی ایک دوا اسپنرازا ہے جسے بایوجین نامی کمپنی نے بنایا ہے۔ پہلے مرحلے ایک سال میں اس کے لیے 7 لاکھ پچاس ہزار ڈالر ادا کرنا ہوں گے جبکہ اگلے ہر سال ساڑھے تین لاکھ ڈالر فی ادا کرنا ہوں گے۔

ایس ایم کی بیماری میں متاثرہ جین ریڑھ کی ہڈی پر حملہ آور ہوتا ہے اور 90 فیصد مریض بچے دو سال کے اندر ہی فوت ہوجاتے ہیں جبکہ کم شدت کی مرض میں مبتلا ہونے والے بچے دھیرے دھیرے متاثر ہوتے ہیں اور کئی عشروں تک مفلوج اور اپاہج ہوکر زندگی گزارتے ہیں۔

زولجینسما دوا میں اس خراب شدہ جین کی صحت مند کاپی موجود ہے جو بچے کے بدن میں جاکر اسے جان لیوا مرض سے بچاتی ہے۔

اسلام آباد(ایمرا نیوزآن لائن)
وفاقی حکومت نے امراض قلب، بلڈپریشر اور دیگر ادویات کی قیمتوں میں 75فیصد اضافہ واپس لے لیا ہے،78 ادویات کی قیمتوں میں کمی کر دی ہے، ، ادویات کی نئی قیمتیں متعین ، نوٹیفکیشن بھی جاری کر دیا گیا،ہارڈ شپ کیسز کے تحت ادویات کی قیمتوں میں 75فیصد اضافہ اور ہارڈ شپ کیسز کے تحت 50سے75فیصد ادویات پر 9فیصد اضافہ

بھی واپس لے لیا گیا ہے، ادویات کی نئی قیمتیں متعین کر دی گئی ہیں اور اس ضمن میں نوٹیفکیشن بھی جاری کر دیا گیا ہے۔ ہفتہ کو وزارت صحت کی جانب سے جاری نوٹیفکیشن کے مطابق بلڈپریشر، مرگی، دل اور جلدی امراض کی ادویات اور ایمرجنسی ادویات کی قیمتوں میں اضافہ واپس لے لیا گیا ہے۔ حکومت نے جان بچانے والی ادویات

میں اضافہ بھی واپس لیتے ہوئے پرانی قیمتیں برقرار رکھنے کا نوٹیفکیشن جاری کر دیا ہے جس کے بعد 78ادویات کی قیمتوں میں کمی ہو گئی ہے ۔ واضح رہے کہ اس سے پہلے گزشتہ ماہ ادویات ساز کمپنیوں نے ازخود ہی ادویات کی قیمتوں میں سینکڑوں گنا اضافہ کر دیا تھا اور جان بچانے والی ادویات

بھی شدید مہنگی ہو گئی تھیں جس کے بعد یہ موقف اختیار کیا گیا تھا کہ ادویات کی قیمتوں میں آخری بار اضافہ 2001میں کیا گیا تھا اور اب اس کے بعد اضافہ کیا گیا ہے۔

لندن(میڈیا 92 نیوز آن لائن): ایک سائنسی سروے سے معلوم ہوا ہے کہ جو طلبا و طالبات اعلیٰ تعلیم حاصل کرتےہیں وہ دیگر کے مقابلے میں صحت مند رہتے ہیں اور ان میں دل کے امراض اور فالج کا خطرہ بھی کم ہوجاتا ہے، یعنی ہر 3.6 اضافی سال تعلیم کے بدلے طالب علموں کے باڈی ماس انڈیکس (بی ایم آئی) میں ایک یونٹ کی کمی ہوتی ہے۔

مطالعے سے یہ بھی معلوم ہوا ہے کہ عین پڑھائی کی مدت میں طلبا و طالبات بلند فشارِ خون (بلڈ پریشر) سے بھی محفوظ رہتے ہیں جو لامحالہ امراضِ قلب، فالج اور دیگر بیماریوں کو جنم دیتا ہے۔

برطانیہ کی چار ممتاز جامعات نے یہ تفصیلی سروے کیا ہے جن میں آکسفورڈ، کیمبرج، یونیورسٹی آف برسٹل اور امپیریل کالج لندن شامل ہیں۔ اگرچہ اس میں جسمانی وزن، تمباکو نوشی اور دیگر عوامل کو بھی شامل کیا گیا تھا تاہم ماہرین نے نتیجتاً کہا ہے کہ ہر اضافی ساڑھے تین سال کی تعلیم دل کی بیماریوں کے خطرے کو کم کرتی ہے۔
ذیادہ تعلیم ، بہتر شعور

واضح رہے کہ اعلیٰ تعلیم یافتہ افراد اپنی صحت اور دیگر طرز زندگی کا زیادہ شعور رکھتے ہیں اور وہ کم کم بیمار ہوتے ہیں لیکن اس تحقیق میں دیگر عوامل بھی دیکھے گئے ہیں۔

اس تحقیق میں 20 ہزار طلبا و طالبات کے علاوہ دیگر 10 لاکھ افراد کا بھی مطالعہ کیا گیا ہے۔ ماہرین نے ان کے ڈی این اے کے ایک مقام سنگل نیو کلیوٹائڈ پولی پارفزم (ایس این پی) پر بھی غور کیا ہے جو تمباکو نوشی، بی ایم آئی اور بلڈ پریشر کے لیے ایک بایو مارکر کے طور پر بھی استعمال ہوتا ہے۔ ماہرین نے یہ جینیاتی تعلق بھی تعلیم یافتہ لوگوں میں بطورِ خاص نوٹ کیا ہے۔

ماہرین نے بتایا کہ اعلیٰ تعلیم یافتہ طلبا و طالبات کی 40 فیصد تعداد کم بی ایم آئی، مناسب بلڈ پریشر اور تمباکو نوشی کی جانب رغبت نہ رکھتے ہوئے دل کے امراض اور فالج سے محفوظ رہتی ہے۔

اگرچہ اعلیٰ تعلیم اور اس کا شعور بھی اپنی جگہ اہمیت رکھتا ہے لیکن اس رپورٹ میں زور دے کر کہا گیا ہے کہ عام ان پڑھ افراد بھی باقاعدہ ورزش، تمباکو نوشی سے اجتناب اور خوراک کا خیال رکھتے ہوئے ان بیماریوں سے دور رہ سکتے ہیں۔ اگر اس پر عمل کرلیا جائے تو 80 فیصد تک ان بیماریوں سے بچا جاسکتا ہے۔