Category انٹرنیشنل

کینیڈا میں ہزاروں افراد نے جاں بحق ہونے والے مسلمان خاندان سے اظہار یکجہتی کے لیے مارچ کیا جنہیں ایک شخص نے ٹرک تلے کچل دیا تھا۔

غیرملکی خبررساں ادارے ’رائٹرز‘ کے مطابق کینیڈا کے وزیر اعظم جسٹن ٹروڈو نے مسلمان خاندان کے 4 افراد کی ہلاکت کو دہشت گرد حملہ قرار دیا تھا۔

اونٹاریو اور اس کے جنوب مغربی شہر لندن میں لوگوں نے 7 کلومیٹر مارچ کیا جو جائے واقعہ سے متاثرہ خاندان کے گھر کے پاس مسجد تک تھا۔

اسی جگہ کے قریب ہی حملہ آور نیتھانیئل ویلٹمین کو گرفتار کیا گیا تھا۔

مذکورہ واقعے کے خلاف ہونے والے مارچ میں لوگوں نے پلے کارڈز اٹھا رکھے تھے جس پر ’یہاں نفرت کی کوئی جگہ نہیں‘، ’نفرت کے مقابلے میں محبت‘ جیسے جملے درج تھے۔

اسی طرح کے مارچ کینیڈا کے سب سے زیادہ آبادی والے صوبے اونٹاریو کے دوسرے شہروں میں بھی منعقد کیے گئے۔

متاثرہ خاندان کے ساتھ اظہار یکجہتی کے لیے ایک لمحے کی خاموشی کے بعد مختلف مذاہب کے نمائندوں نے نفرت انگیزی کی مذمت کی اور لندن میں 30 ہزار افراد پر مشتمل مسلم کمیونٹی کی حوصلہ افزائی کی۔

اس حملے کے بعد کینیڈا میں شدید غم و غصہ پھیل گیا ہے۔

اونٹاریو کے شہر لندن کے میئر ایڈ ہولڈر کے مطابق چاروں مقتولین کا تعلق ایک ہی خاندان کی 3 نسلوں سے تھا۔

ان پانچ میں سے 4 افراد موقع پر جاں بحق جبکہ ایک بچہ زخمی اور ہسپتال میں زیر علاج ہے۔

حملے کے فوراً بعد ہی گرفتار کیے گئے 20 سالہ ملزم پر پہلے درجے کے قتل اور قتل کی کوشش کے چار الزامات عائد کیے گئے ہیں جبکہ مسلم برادری کے متعدد رہنماؤں نے عدالتوں سے اس واقعے کو دہشت گردی قرار دینے کا مطالبہ کیا ہے۔

علاوہ ازیں ہاؤس آف کامنز میں خطاب کرتے ہوئے کینیڈا کے وزیراعظم نے کہا تھا کہ یہ قتل کوئی حادثہ نہیں تھا، یہ ایک دہشت گردی کا حملہ تھا، جو ہماری برادریوں میں سے ایک کے دل میں نفرت کا نتیجہ تھا۔

پولیس کے مطابق یہ حملہ اس وقت ہوا جب ایک خاندان کے افراد ایک ساتھ فٹ پاتھ پر چل رہے تھے اور اسی دوران وہ سڑک پار کرنے کا سوچ ہی رہے تھے کہ ایک کالے پک اپ ٹرک نے انہیں کچل دیا۔

سعودی عرب نے اپنے قانون میں اہم تبدیلی کی ہے جس کے بعد اب ملک میں رہنے والی خواتین والد یا کسی مرد سرپرست کی مرضی کے بغیر آزادانہ زندگی گزار سکیں گی۔

خبر رساں ایجنسی اے ایف پی کے مطابق سعودی قانونی حکام نے قانون کے آرٹیکل 169 سے پیراگراف (بی) کو حذف کردیا ہے جس میں کہا گیا تھا کہ ایک بالغ سنگل، طلاق یافتہ یا بیوہ عورت کو اس کے مرد سرپرست کے حوالے کردیا جائے گا۔

اس کے بجائے قانون میں ترمیم کرتے ہوئے کہا گیا ہے کہ ایک بالغ عورت کو یہ حق حاصل ہے کہ وہ اس بات کا انتخاب کرے کہ وہ کہاں رہنا چاہتی ہے، عورت کا سرپرست اس کے بارے میں صرف اس وقت اطلاع کر سکتا ہے کہ جب اس کے پاس کوئی ثبوت ہو کہ مذکورہ خاتون کسی جرم کا ارتکاب کرنے والی ہے۔

گلف نیوز کے مطابق اس میں یہ بھی کہا گیا ہے اگر کسی خاتون کو جیل کی سزا سنائی جاتی ہے تو سزا کی مدت پوری ہونے کے بعد خاتون کو اس کے سرپرست کے حوالے نہیں کیا جائے گا۔

وکیل نائف الم مانسی نے مکہ مکرمہ اخبار سے گفتگو کرتے ہوئے کہا خاندان اب اپنی ان بیٹیوں کے خلاف مقدمہ دائر نہیں کرسکتے ہیں جو تنہا رہنے کا انتخاب کرتے ہیں اور اب عدالتیں اس نوعیت کے مقدمات کو قبول نہیں کریں گی۔

مردانہ سرپرستی کے نظام کا غلط استعمال
سعودی میڈیا نے فروری 2019 میں پہلی بار اطلاع دی تھی کہ سعودی عرب میں اب اس بات کا مطالعہ کیا جا رہا ہے کہ اس کے مردانہ سرپرستی کے نظام کے ساتھ کس طرح غلط استعمال کیا جارہا ہے۔

انگریزی روزنامہ سعودی گیزٹ کے مطابق اس وقت سعودی سرکاری وکیل سعود المجبب نے کہا تھا کہ ان کا دفتر خواتین، بچوں یا والدین کو کو ان افراد سے تحفظ کے لیے تمام کوششیں کریں گے جو غیرمنصفانہ رویے سے سرپرستی کے اختیارات کا غلط استعمال کرتے ہیں۔

2019 میں ہی اگست کے مہینے میں سعودی عرب نے سعودی خواتین کو مرد سرپرست کی منظوری کے بغیر بیرون ملک سفر کرنے کی اجازت دے دی تھی۔

یہ فیصلہ بڑے پیمانے پر اصلاحات کے باوجود خواتین کی جانب سے اپنے سرپرستوں سے بچنے کی کوششوں کے بعد عمل میں آیا ہے۔

سرکاری گزیٹ ام القرا میں شائع ہونے والے ایک حکومتی فیصلے میں کہا گیا کہ اب درخواست جمع کروانے والے کسی بھی سعودی شہری کو پاسپورٹ دیا جائے گا۔

بحرین میں ویکسینیشن کے باوجود قیدی کی کورونا وائرس کے سبب دوران قید موت پر غیر معمولی احتجاج کیا گیا اور بادشاہ حماد بن عیسیٰ الخلیفہ کو موت کا ذمے دار قرار دیا گیا۔

خبر رساں ایجنسی اے پی کے مطابق بدھ کو حسین برکات کی موت پر دیہہ گاؤں کی سڑکوں پر مظاہرین نے احتجاج کیا۔

مظاہرے کی ویڈیوز میں ان لوگوں کو نعرے لگاتے ہوئے دیکھا جا سکتا ہے کہ دوران قید ناقص دیکھ بھال کے سبب حسین کی موت واقع ہوئی جس کا ذمے دار وہ بادشاہ حماد بن عیسیٰ الخلیفہ کو ذمے دار سمجھتے ہیں۔

وزارت داخلہ نے بیان میں کہا کہ 48 سالہ حسین برکات وینٹی لیٹر پر تھے اور ہسپتال میں دم توڑ گئے، انہیں کورونا وائرس سے بچاؤ کے لیے دو نامعلوم ویکسین کے دو ٹیکے لگائے جا چکے تھے۔

بحرین انسٹی ٹیوٹ فار رائٹس اینڈ ڈیموکریسی نے کہا کہ حسین برکات کو چینی ویکسین سائنو فارم لگائی گئی تھی۔

متحدہ عرب امارات کی طرح بحرین کا بھی ویکسینیشن مہم میں زیادہ تر انحصار سائنوفارم پر ہے لیکن اب وہ فائزر کی بائیو ٹیک ویکسین بھی لگا رہے ہیں، متحدہ عرب امارات میں اینٹی باڈی کی کمی شکایات موصول ہونے کے بعد مئی میں اعلان کیا گیا کہ وہ سائنوفرم ویکسین لگنے کے چھ ماہ بعد بوسٹر لگائیں گے۔

بحرین کو وائرس کی اب تک کی سب سے بدترین لہر کا سامنا ہے، وہاں وائرس پر قابو پانے کے لیے کئی ہفتوں کے لاک ڈاؤن کا اعلان کیا گیا ہے جس کے نتیجے میں کیسز میں نمایاں کمی واقع ہوئی ہے۔

16لاکھ آبادی کے حامل جزیرے میں 2 لاکھ 53 ہزار کیسز رپورٹ ہو چکے ہیں اور اب تک ایک ہزار 160 افراد موت کے منہ میں جا چکے ہیں۔

بحرین کی انتظامیہ نے گزشتہ ہفتے اے پی سے گفتگو کرتے ہوئے کہا تھا کہ بحرین میں 90 فیصد نئے کیسز ان لوگوں کی وجہ سے رپورٹ ہو رہے ہیں جنہوں نے اب تک ویکسین نہیں لگائی۔

بحرین انسٹیٹیوٹ فار رائٹس اینڈ ڈیموکریسی کے مطابق حسین برکات اپنی شہریت کھو بیٹھے تھے 2018 میں انہیں مختلف مقدمات میں عمر قید کی سزا سنائی گئی تھی۔

بحرین کے پبلک پراسیکیوشن نے کہا کہ اس وقت مقدمے میں مشہور عسکریت پسند گروپ بھی شامل تھا جس کی شناخت ‘ذوالفقار بریگیڈ’ کے نام سے ہوئی تھی۔

واشنگٹن: روس نے پڑوسی ممالک پر نظر رکھنے کے لیے ایران کو سیٹیلائٹ سسٹم دینے کی تیاریاں شروع کردی ہیں۔

امریکی اخبار واشنگٹن پوسٹ کی رپورٹ کے مطابق روس ایران کو جدیدترین سیٹیلائٹ سسٹم دینے کی تیاری کررہا ہے جس کی مدد سے ایران اپنے پڑوسی ممالک بالخصوص عراق میں قائم امریکی ملٹری بیس، سعودی آئل فیلڈز اور اسرائیلی ملٹری بیس پر گہری نظر رکھ سکے گا۔

مشرق وسطیٰ کے حالات پر نظر رکھنے والے سابق اور موجودہ امریکی حکام کے مطابق روسی ساختہ سیٹیلائٹ (Kanopus-V) میں انتہائی جدید ہائی ریزولوشن کیمراز لگے ہوئے ہیں جس کے استعمال سے ایران کی جاسوسی کی صلاحیتوں میں بے پناہ اضافہ ہوگا جبکہ ممکنہ طور پر اس کی منتقلی ایک مہینے کے اندر ممکن ہے۔

واضح رہے کہ ایرانی کمانڈر 2018 سے متعدد بار سیٹیلائٹ معاہدے کو حتمی شکل دینے کے لیے روس کا دورہ کرچکے ہیں جب کہ چند روز قبل روسی ماہرین نے بھی ایرانی عملے کو تربیت دینے کے لیے ایران کا دورہ کیا تھا۔

پیرس: فرانسیسی صدر ایمانوئیل میکرون کے منہ پر زوردار تھپڑ رسید کرنے والے نوجوان کو 4 ماہ قید کی سزا سنادی گئی۔

فرانسیسی خبر رساں ادارے کے مطابق عدالت نے صدر کو تھپڑ مارنے میں ملوث 28 سالہ نوجوان ڈامین تاریل کو چار ماہ قید اور 14 ماہ کی معطل قید کی سزا سنائی۔

عدالت نے ملزم کو سرکاری ملازمت سے برطرف کرتے ہوئے کسی بھی سرکاری عہدے کے لیے تا حیات نااہل قرار دے دیا اور پانچ سال تک اسلحہ رکھنے پر پابندی لگادی۔
یہ بھی پڑھیں: نوجوان نے سرعام فرانسیسی صدر کو تھپڑ جڑ دیا

ڈامین تاریل قرون وسطی کے دور کی تلوار بازی کا مداح ہے اور اس حوالے سے ایک کلب بھی چلاتا ہے۔ ڈامین نے تھپڑ رسید کرتے ہوئے میکرون کی پالیسیوں کے خلاف نعرے بازی کی تھی۔

ڈامین تاریل نے اقبال جرم کرتے ہوئے کہا کہ یہ حرکت جذبات میں اچانک ہوگئی۔ دوسری جانب استغاثہ نے کہا اسے سوچا سمجھا حملہ قرار دیا۔ اٹارنی جنرل نے کہا کہ دامین دائیں بازو کی انتہا پسند تنظیموں کا رکن ہے۔

کینیڈا کے وزیراعظم جسٹن ٹروڈو نے کہا ہے کہ اگر کوئی سوچتا ہے کہ اس ملک میں نسل پرستی اور نفرت کا وجود نہیں ہے تو ہم متاثرہ خاندانوں کی آنکھوں میں آنکھیں ڈال کر کیسے کہہ سکتے ہیں کہ اسلاموفوبیا حقیقت نہیں ہے۔

غیرملکی خبررساں ادارے ’اے پی‘ کے مطابق کینیڈا کے جنوبی صوبے اونٹاریو میں مسلمان خاندان کے 4 افراد کی ہلاکت پر پارلیمنٹ سے خطاب کے دوران کینیڈا کے وزیراعظم نے کہا کہ مسلمان خاندان کے اوپر کیا گیا دہشت گرد حملہ تھا جس کے متحرکات نفرت پر مبنی تھے جو ہماری برادریوں میں سے ایک کے دل میں نفرت کا نتیجہ تھا۔

انہوں نے مزید کہا کہ اگر کوئی سوچتا ہے کہ اس ملک میں نسل پرستی اور نفرت کا کوئی وجود نہیں ہے تو میں یہ کہنا چاہتا ہوں: ہم ہسپتال میں زیر علاج بچے کو اس حملے کی کس طرح وضاحت دیں گے؟ ہم متاثرہ خاندانوں کی آنکھوں میں آنکھیں ڈال کر کہہ سکتے ہیں کہ اسلامو فوبیا حقیقت نہیں ہے؟۔

کینیڈا کے وزیر اعظم نے کہا کہ کورونا وبا کے دوران طویل وقت کے بعد متعدد کینیڈین تازہ ہوا کے لیے شام کی سیر سے لطف اندوز ہو رہے ہیں۔

جسٹن ٹروڈو نے کہا ، لیکن اس رات مسلمان خاندان کبھی گھر نہیں جا سکا، ان کی زندگیاں ایک وحشیانہ، بزدلانہ اور تشدد پرمبنی رویے کی نذر ہوگئیں۔

انہوں نے مزید کہا کہ یہ قتل کوئی حادثہ نہیں تھا اور بہت سے مسلمان کینیڈین خوفزدہ ہیں۔

جسٹن ٹروڈو نے واضح کیا کہ غلط بیانی اور آن لائن انتہا پسندی اور سیاست میں الزام تراشی کے وقت استعمال ہونے والے الفاظ اثر انداز ہوتے ہیں۔

انہوں نے کہا کہ یہ الفاظ بیج کی مانند کام کرتے ہیں جو بدصورت وسیع رجحان کو بڑھاتے ہیں۔

وزیر اعظم نے کہا کہ اور بعض اوقات وہ اصل تشدد کا باعث بنتے ہیں۔

اس سے قبل کینیڈا کے وزیر اعظم نے سماجی روابط کی ویب سائٹ ٹوئٹر پر کہا کہ وہ لوگ جو افضل کے اہلخانہ کو جانتے ہیں، لندن اور کینیڈا میں موجود مسلم کمیونٹی اور وہ تمام لوگ جو واقعے پر افسردہ اور خوفزدہ ہیں، میں کہنا چاہتا ہوں کہ آپ اکیلےنہیں ہیں۔

انہوں نے مزید کہا کہ پورا ملک آپ سے تعزیت کرتا ہے ہمیشہ آپ کے ساتھ کھڑا ہے۔

منگل کی رات حکام نے کورونا سے متعلق پابندیوں میں نرمی کردی تھی تاکہ متاثرہ خاندان سے اظہار تعزیت کے لیے لوگ جمع ہوسکے۔

کینیڈا کے وزیراعظم اور کینیڈا کی تمام سیاسی جماعتوں کے رہنما نے سیکڑوں سوگواران کے ہمراہ مقامی مسجد کے پاس جمع ہوئے اور جاں بحق ہونے والوں کی یاد میں شمع روشن کیں۔

اس موقع پر کینیڈا کے وزیر اعظم نے مجمع سے خطاب کرتے ہوے کہاکہ ایسے الفاظ نہیں ہیں جو تین نسلوں کے قتل کے غم کو کم کرسکیں۔

انہوں نے کہا کہ یہاں کوئی الفاظ نہیں ہیں جو اس کمیونٹی کے دکھ کو ختم کرسکتے ہوں، ایسی کوئی باتیں نہیں ہیں جو اس چھوٹے بچے کے مستقبل کو ٹھیک کرسکتے ہوں جس کا مستقبل چھین لیا گیا۔

کینیڈا کے وزیر اعظم نے کہا کہ لیکن یہ حقیقت ہے کہ آپ تنہا نہیں ہیں، تمام کینیڈین آپ کے ساتھ کھڑے ہیں‘۔

خیال رہے کہ اس سے قبل کینیڈا کے وزیر اعظم جسٹن ٹروڈو نے مسلمان خاندان کے 4 افراد کی ہلاکت کو دہشت گرد حملہ قرار دیا تھا جنہیں ایک شخص نے ٹرک تلے کچل دیا تھا۔

حملے کے فورا بعد ہی گرفتار کیے گئے 20 سالہ ملزم پر پہلے درجے کے قتل اور قتل کی کوشش کے چار الزامات عائد کیے گئے ہیں جبکہ مسلم برادری کے متعدد رہنماؤں نے عدالتوں سے اس واقعے کو دہشت گردی قرار دینے کا مطالبہ کیا گیا تھا۔

متاثرہ افراد کے نام جاری نہیں کیے گئے البتہ لندن شہر کے میئر ایڈ ہولڈر نے بتایا گیا کہ ان میں ایک 74 سالہ خاتون، ایک 46 سالہ مرد، 44 سالہ خاتون اور ایک 15 سال کی لڑکی شامل ہے جو ایک ہی خاندان کی 3 نسلیں تھیں’۔

جنوبی افریقہ کی ایک عدالت نے مہاتما گاندھی کی پڑپوتی آشیش لتا رام گوبن کو 60 لاکھ رانڈ کے فراڈ کے الزام میں 7 برس قید کی سزا سنادی۔

این ڈی ٹی وی کی رپورٹ کے مطابق 56 سالہ آشیش لتا رام گوبن کو صنعت کار ایس آر مہاراج کے ساتھ دھوکا دہی کا مجرم قرار دیا گیا۔

رپورٹ میں پریس ٹرسٹ آف انڈیا کا حوالہ دیتے ہوئے کہا گیا کہ ایس آر مہاراج نے آشیش لتا کو بھارت سے آنے والے سامان کی کسٹم اور درآمدی ڈیوٹیز کلیئر کرنے کے لیے 62 لاکھ رانڈ (لگ بھگ 3 کروڑ 33 لاکھ بھارتی روپے) دیے تھے اور وہ سامان کبھی آیا ہی نہیں۔

مالی مدد فراہم کرنے پر آشیش لتا سے منافع میں سے ایک حصہ دینے کا وعدہ کیا گیا تھا۔

خیال رہے کہ آشیش لتا سیاسی کارکن ایلا گاندھی اور مرحوم میوا رام گوبند کی بیٹی ہیں۔

ایلا گاندھی منی لال گاندھی کی بیٹی ہیں جو مہاتما گاندھی کے چار بیٹوں میں سے دوسرے نمبر پر تھے۔

جنوبی افریقہ کی اسپیشلائزڈ کمرشل کرائم کورٹ کی جانب سے انہیں مجرم قرار دینے اور سزا کے خلاف اپیل کے حق سے بھی محروم کیا گیا ہے۔

آشیش لتا رام گوبن کے خلاف کیس کا ٹرائل 2015 میں شروع ہوا تھا، اس وقت نیشنل پروسیکیوٹنگ اتھارٹی (این پی اے) کے بریگیڈیئر ہنگوانی ملودزی نے کہا تھا کہ انہوں نے ممکنہ سرمایہ کاروں کو راضی کرنے کے لیے مبینہ طور پر جعلی انوائسز اور دستاویزات فراہم کی تھیں کہ بھارت سے لینن کے 3 کنٹینر بھیجے جارہے ہیں۔

اس وقت لتا رام گوبن کو 50 ہزار رانڈ کے عوض ضمانت پر رہا کیا گیا تھا۔

7 جون کو ہونے والی سماعت میں عدالت کو آگاہ کیا گیا تھا کہ لتا رام گوبن اگست 2015 میں نیو افریقہ الائنس فٹ ویئر ڈسٹری بیوٹرز کے ڈائریکٹر ایس آر مہاراج سے ملی تھیں۔

یہ کمپنی کپڑے، لینن اور جوتے درآمد کرکے تیار اور فروخت کرتی ہے۔

ایس آر مہاراج کی کمپنی منافع میں حصہ دینے کی بنیاد پر دیگر کمپنیوں کو رقم بھی فراہم کرتی ہے۔

آشیش لتا رام گوبن نے ایس آر مہاراج کو بتایا تھا کہ انہوں نے ساؤتھ افریقن گروپ نیٹ کیئر کے 3 کنٹینرز درآمد کیا تھا۔

انڈین ایکسپریس کی رپورٹ کے مطابق این پی اے کی ترجمان نتاشا کارا نے پیر کو بتایا تھا کہ ‘آشیش لتا نے کہا تھا کہ انہیں درآمدی لاگت اور کسٹمز کی ادائیگی میں مالی مشکلات کا سامنا ہے اور انہیں بندرگاہ پر سامان کلیئر کرنے کے لیے رقم کی ضرورت ہے’۔

انہوں نے کہا کہ ‘آشیش لتا نے ایس آر مہاراج کو مشورہ دیا کہ انہیں 62 لاکھ کی ضرورت ہے، انہیں راضی کرنے کے لیے انہوں نے صنعتکار کو سامان کی خریداری کا دستخط شدہ آرڈر بھی دکھایا تھا’۔

ترجمان کے مطابق اسی مہینے کے آخر میں، آشیش لتا نے انہیں بظاہر نیٹ کیئر انوائس بھیجی تھی اور ثبوت کے طور پر ڈیلیوری نوٹ بھیجا تھا کہ سامان پہنچ چکا ہے اور ادائیگی ضروری تھی۔

نتاشا کارا نے کہا تھا کہ آشیش لتا نے انہیں نیٹ کیئر کے بینک اکاؤنٹ سے مزید تصدیق ارسال کی تھی کہ ادائیگی کی جاچکی ہے۔

آشیش لتا رام گوبن کے خاندان اور نیٹ کیئر کے دستاویزات کی وجہ سے ایس آر مہاراج نے انہیں قرض دینے کے لیے ایک تحریری معاہدہ کیا تھا۔

تاہم بعد میں ایس آر مہاراج کو معلوم ہوا کہ دستاویزات نقلی تھیں اور نیٹ کیئر کے آشیش لتا سے کوئی معاملات طے نہیں ہوئے تھے، جس پر انہوں نے آشیش لتا پر مجرمانہ الزامات لگائے۔

آشیش لتا رام گوبن انٹرنیشنل سینٹر فار نان وائلنس نامی این جی او میں پارٹیسیپیٹو ڈیولپمنٹ انیشیٹو کی بانی اور ایگزیکٹو ڈائریکٹر تھیں، جہاں انہوں نے خود کو ماحولیاتی، سماجی اور سیاسی کارکن بتایا تھا۔

پیرس: متنازع بیانات کے باعث شہرت رکھنے والے فرانسیسی صدر ایمانوئیل میکرون کے منہ پر زوردار تھپڑ رسید کرنے والے نوجوان کی شناخت ہوگئی۔

عالمی خبر رساں ادارے کے مطابق گزشتہ روز فرانس کے صدر ایمانوئیل میکرون وبا کے بعد سماجی اور تجارتی سرگرمیوں کی بحالی کا جائزہ لینے ریسٹورینٹس کے مالکان اور طلبا سے ملاقات کے لیے شہر ڈروم پہنچے تھے جہاں ایک نوجوان نے سب کے سامنے صدر کے منہ پر تھپڑ جڑ دیا تھا۔

پولیس نے اچانک کی افتاد پر بوکھلاہٹ کے شکار ایمانوئیل میکرون کو نوجوان سے دور کیا اور دو افراد کو حراست میں لے لیا تھا تاہم تفتیشی ذرائع نے آج گرفتار نوجوان سے متعلق معلومات دی ہیں۔
عالمی خبر رساں ادارے نے تفتیشی ذرائع کے حوالے سے دعویٰ کیا ہے کہ تھپڑ مارنے والا شخص 28 سالہ ڈامین تاریل ہے جو قرون وسطی کے دور کی تلوار بازی کا مداح ہے اور اس حوالے سے ایک کلب بھی چلاتا ہے۔

پولیس کا مزید کہنا ہے کہ تلوار چلانے کی تربیت دینے والے کلب کے مالک ڈامین تاریل کا مجرمانہ ریکارڈ موجود نہیں ہے۔ ڈامین نے تھپڑ رسید کرتے ہوئے میکرون کی پالیسیوں کے خلاف نعرے بازی کی تھی۔

مقامی پراسیکیوٹر کا کہنا ہے کہ ایک سرکاری عہدیدار کے خلاف حملے پر تفتیش جاری ہے۔ فرانس میں کسی سرکاری عہدیدار سے مار پیٹ پر تین سال قید اور 45 ہزار یورو کا جرمانہ ہوسکتا ہے۔

دنیا بھر میں رہائش کے لیے سب سے بہترین شہروں کی سالانہ درجہ بندی(رینکنگ) میں نیوزی لینڈ کا شہر آکلینڈ پہلے نمبر پر آگیا ہے۔

برطانوی تحقیقی ادارے اکنامسٹ انٹیلی جنس یونٹ (ای آئی یو) نے رہائش کے حوالے سے 2021 کے دنیا کے بہترین شہروں کی نئی فہرست جاری کی ہے جس کے مطابق نیوزی لینڈ کا شہر آکلینڈ پہلے نمبر پر ہے جس کے بعد جاپان کا شہر اوساکا دوسرے، آسٹریلیا کا شہر ایڈیلیڈ تیسرے، پھر جاپان کا شہر ٹوکیو چوتھے اور نیوزی لینڈ کا ہی دارالحکومت ویلنگٹن پانچویں نمبر پر موجود ہے۔

اکنامسٹ انٹیلی جنس یونٹ کے سروے میں استحکام ، انفرااسٹرکچر، تعلیم اور شہریوں کی صحت کے مراکز تک رسائی جیسے عوامل کو بنیاد بنا کر 140 شہروں کی درجہ بندی کی گئی ہے تاہم کورونا کی وبا نے اس درجہ بندی میں نمایاں کردار ادا کیا ہے۔

رہائش کے حوالے سے دنیا کے بہترین شہروں کی فہرست میں پہلے پانچ شہر یورپ اور امریکا سے باہر کے ہیں جس کی وجہ یہ ہے کہ کورونا وائرس کی وبا کے دوران متعدد یورپی و امریکی شہروں کی درجہ بندی میں نمایاں کمی آئی ہے۔

رپورٹ کے مطابق وبا کے دوران نیوزی لینڈ میں حکام نے بہترین اقدامات کیے جس کے باعث وہاں معمولات زندگی جلد بحال ہوگئیں اور اسی باعث آکلینڈ اور ویلنگٹن درجہ بندی میں سرفہرست ہیں۔

اس کے برعکس یورپی شہروں میں معمولات زندگی بری طرح متاثر ہوئے اور دیگر ممالک کے شہروں میں بھی پہلی جیسی صورت حال نہیں رہی۔

رپورٹ کے مطابق نئی فہرست میں شام کا دارالحکومت دمشق رہائش کے لحاظ سے دنیا کا سب بد ترین شہر ہے جب کہ پاکستان کا شہرکراچی دمشق سے صرف چھے نمبر ہی آگے ہے۔

کابل: افغانستان میں زیر زمین بچھائی گئی بارودی سرنگوں کو ہٹانے کے کام میں مصروف امریکی این جی او کے کارکنان پر حملے میں 10 ہلاک اور 16 زخمی جب کہ میدان وردک میں ایئرفورس کا ہیلی کاپٹر حادثے میں 3 اہلکار ہلاک ہوگئے۔

عالمی خبر رساں ادارے کے مطابق افغانستان کے صوبے میدان وردک میں افغان ایئر فورس کا ہیلی کاپٹر ایم آئی-17 گر کر تباہ ہونے سے 3 اہلکار ہلاک اور ایک شدید زخمی ہوگیا۔ ہلاک اور زخمی ہونے والوں کی شناخت ظاہر نہیں کی گئی۔

افغان وزارت دفاع کی جانب سے جاری بیان میں کہا گیا ہے کہ ہیلی کاپٹر حادثہ تیکنیکی خرابی کے باعث پیش آیا۔ زخمی اہلکار کو اسپتال منتقل کردیا گیا جہاں اس کی حالت نازک بتائی جا رہی ہے۔
دریں اثناء افغانستان کے صوبے بغلان میں برطانیہ کی خیراتی تنظیم اور امریکا کی غیرمنافع بخش کمپنی ’’ہالو ٹرسٹ‘‘ کے کارکنان بارودی سرنگیں ہٹانے کے کام میں مصروف تھے کہ دہشت گردوں نے حملہ کردیا۔

حملہ آوروں کی فائرنگ میں 10 افراد ہلاک اور 16 زخمی ہوگئے تاحال کسی گروپ نے حملے کی ذمہ داری قبول نہیں کی ہے تاہم افغان حکومت نے طالبان پر ذمہ داری عائد کی ہے جب کہ طالبان نے کابل حکومت کے الزام کو مسترد کرتے ہوئے حملے کی مذمت کی ہے۔