Category انٹرنیشنل

سعودی عرب میں محرم کے بغیر حج ادا کرنے کی خواہش مند خواتین سے بھی حج کی درخواستیں طلب کرلی ہیں اور تمام عازمین حج کو آن لائن رجسٹریشن کرانے کی ہدایت کی گئی ہے۔

سعودی میڈیا کے مطابق رواں برس حج کے لیے رجسٹریشن کا آغاز ہوگیا ہے جو 23 جون رات 10 بجے تک جاری رہے گا جس کے لیے محرم کے بغیر حج کرنے کی خواہش مند خواتین سے بھی درخواستیں طلب کی گئی ہیں۔

درخواستیں جمع کرانے والوں کو کورونا ویکسین لگوانے اور کسی دوسری بیماری میں مبتلا نہ ہونے کی سند پیش کرنا ہوگی اور صرف ان افراد کو رواں برس حج کرنے کی اجازت دی جائے گی جنہیں حج کیے کم سے کم 5 سال ہوگئے ہوں۔

وزارت حج اور عمرہ کی ویب سائٹ پر جاری بیان میں کہا گیا ہے کہ عازمین حج کو مقدس مقامات تک بسوں کے ذریعے پہنچایا جائے گا اور ہر بس میں 20 سے زائد افراد کو سوار کرنے پر پابندی ہوگی۔

اسی طرح ایک خیمے میں عازمین کی تعداد 4 سے زیادہ نہیں ہوگی اور اس بات کو یقین بنایا جائے گا کہ ہر جگہ 2 عازمین کے درمیان 2.5 میٹر فاصلہ ہو جب کہ عازمین کو مکہ سے باہر اپنا کھانا لے جانے کی اجازت نہیں ہوگی۔

علاوہ ازیں زائرین کو منیٰ میں روزانہ تین وقت کا کھانا فراہم کیا جائے گا اور عرفات میں دو وقت یعنی ناشتہ اور دوپہر کا کھانا دیا جائے گا جب کہ رات کا کھانا مزدلفہ میں ہوگا۔

واضح رہے کہ کورونا وبا کے باعث گزشتہ سال کی طرح غیر ملکی عازمین رواں برس بھی حج ادا نہیں کرسکیں گے، صرف 60 ہزار سعودی شہری یا سعودی عرب میں مقیم غیر ملکی شہری ہی حج کا فریضہ ادا کرسکیں گے۔

بیجنگ: چین نے جی-7 ممالک کو متنبہ کرتے ہوئے کہا ہے کہ وہ دن چلے گئے جب دنیا کی قسمت کا فیصلہ چھوٹے گروپ کے ہاتھ میں تھا۔

عالمی خبر رساں ادارے کے مطابق چین نے دنیا کی سات بڑی معیشتوں کے گروپ جی-7 کے ممالک کے سربراہان کے اجلاس میں کیے گئے فیصلوں کو شدید تنقید کا نشانہ بنایا ہے۔

چین نے روڈ اینڈ بیلٹ منصوبے کا متبادل لانے کی جی-سیون کے منصوبے کو ناممکن، جبری مقشقت کے الزام کو جھوٹا اور سنگیانگ میں انسانی حقوق کی خلاف ورزی کو بہتان قرار دیتے ہوئے کہا کہ دنیا پر چھوٹے گروپ کی حکمرانی نہیں چلتی۔

چین نے واضح طور پر متنبہ کیا ہے کہ وہ دن ختم ہو چکے ہیں جب ’چھوٹے‘ ممالک کے گروپ دنیا کی قسمت کا فیصلہ کیا کرتے تھے۔ ان چھوٹے گروپ کے تراشے گئے نام نہاد اصول نہیں بلکہ اقوام متحدہ کے اصولوں پر مبنی عالمی نظام ہی اصلی بین الاقوامی آرڈر ہے۔

چین کی وزارت خارجہ کی جانب سے جاری بیان میں مزید کہا گیا ہے کہ ممالک کے بڑے یا چھوٹے، مضبوط یا کمزور اور غریب یا امیر ہونے سے فرق نہیں پڑتا۔ تمام ممالک برابر ہیں اور دنیا کے معاملات مٹھی بھر ممالک کے بجائے تمام ممالک کی مشاورت سے چلانے چاہیے۔

واضح رہے کہ جی-7 ممالک کے سربراہان کا اجلاس لندن میں ہوا جہاں چینی صدر شی جن پنگ کے اربوں ڈالر کے روڈ اینڈ بیلٹ منصوبے کا مقابلہ کرنے کے لیے گلوبل انفراسٹریکچر اسکیم پر اتفاق کیا گیا ہے۔

عالمی معیشتوں کے اتحاد جی سیون ممالک نے غریب ممالک میں موسمیاتی تبدیلی کے چیلنجز مثلاً کاربن کے اخراج کو کم کرنے اور گلوبل وارمنگ سے نمٹنے کے لیے سالانہ ایک سو ارب ڈالر کے واجب الادا اخراجات کے وعدے کو پورا کرنے کا عندیہ دیا ہے۔

غیرملکی خبررساں ادارے ’رائٹرز‘ کے مطابق جدید ترین معیشت کے حامل ممالک ایک مرتبہ پھر اس ہدف کو پورا کرنے کا عہد کریں گے۔

جی سیون ممالک کی جانب سے ترقی پذیر ممالک میں انفرا اسٹرکچر منصوبوں کی مالی اعانت کو تیز کرنے اور قابل تجدید اور پائیدار ٹیکنالوجی کی جانب منتقلی کے منصوبے شامل ہیں۔

جنوب مغربی انگلینڈ میں جی سیون سربراہی اجلاس میں رہنماؤں کی جانب سے ایک واضح دباؤ تھا کہ دنیا میں بالخصوص ترقی پذیر ممالک میں چین کے بڑھتے ہوئے اثر و رسوخ کا مقابلہ کرنے کی کوشش تیز کی جائیں۔

انہوں نے بیجنگ کے بیلٹ اینڈ روڈ منصوبے کے مقابلے میں منصوبہ شروع کرنے پر غور کیا لیکن اس ضمن میں تفصیلات فراہم نہیں کی گئیں۔

جی سیون ممالک کے اجلاس میں سامنے آنے والے فیصلوں پر بعض گروپس نے عدم اطمینان کا اظہار کیا ہے۔

برطانیہ کے سماجی ادارے گرین پیس کے مطابق برطانوی وزیر اعظم نے جی سیون کی میزبانی کرکے ’پرانے وعدوں کو ایک مرتبہ پھر یاد‘ دلایا ہے۔

انہوں نے کہا کہ وہ اس پر خاطر خواہ توجہ نہیں دیں گے جب تک جی سیون ممالک رقوم کے ساتھ پیش نہیں ہوتے۔

برطانوی وزیر اعظم بورس جانسن نے ایک بیان میں کہا کہ ہمارے لیے زمین کی حفاظت کرنا سب سے اہم چیز ہے جو ہم بحیثیت قائدین اپنے لوگوں کے لیے کر سکتے ہیں۔

انہوں نے کہا کہ بحیثیت جمہوری ممالک ہماری ذمہ داری ہے کہ ہم ترقی پذیر ممالک کو صاف اور شفاف نظام کے ذریعے صاف نشوونما کے ثمرات سے فائدہ اٹھانے میں مدد کریں۔

بورس جانسن نے کہا کہ جی سیون ممالک کے پاس عالمی سبز صنعتی انقلاب برپا کرنے کا ایک بے مثال موقع ہے جس سے ہماری زندگی تبدیل ہونے کا امکان ہے۔

برطانوی وزیر اعظم کے ترجمان نے اس بات کی تصدیق کی کہ جی سیون کے تمام ممالک اپنا حصہ ڈالیں گے اور کہا کہ انہیں توقع ہے کہ انفرادی ممالک ’وقفے وقفے سے‘ اس میں اضافہ کریں گے۔

چین کے وسطی شہر میں رہائشی علاقے میں گیس لائن پھٹ گئی، جس کے نتیجے میں 12 افراد ہلاک ہوگئے۔

غیر ملکی خبررساں ادارے ’رائٹرز‘ کے مطابق سرکاری میڈیا سی سی ٹی وی کے مطابق گیس پائپ پھٹنے سے 138 افراد زخمی بھی ہوئے۔

صوبہ ہوبی کے شہر شییان میں ہونے والے جان لیوا حادثے کے نتیجے میں فوڈ مارکیٹ کی عمارت گر گئی جس کے بعد ڈیڑھ لاکھ افراد محفوظ مقام پر نقل مکانی کرگئے۔

مقامی میڈیا کے مطابق حادثے میں زخمی ہونے والوں میں 37 افراد کی حالت نازک ہے۔

سی سی ٹی وی کی فوٹیج میں گری ہوئی عمارت کی پہلی منزل کا ملبہ اور بکھرے ہوئے شیشے دیکھے جاسکتے ہیں جہاں دھماکے کے وقت لوگ ناشتہ کر رہے تھے اور سبزی خرید رہے تھے۔

لوگوں کو تباہ شدہ عمارتوں کے درمیان میں ملبے سے بھری گلی میں چلتے ہوئے دیکھا جاسکتا ہے۔

مقامی میڈیا کے مطابق ہسپتالوں میں زیر علاج افراد کے لیے خون عطیہ کرنے کی درخواست کی جارہی ہے۔

اونٹاریو: کینیڈا میں دہشت گرد کے ٹرک حملے میں جاں بحق ہونے والے پاکستانی نژاد مسلمان خاندان کے 4 افراد کی تدفین کردی گئی جس میں اعلیٰ سرکاری حکام سمیت مختلف رنگ و نسل سے تعلق رکھنے والے ہزاروں افراد نے شرکت کی۔

عالمی خبر رساں ادارے کے مطابق کینیڈا میں 20 سالہ دہشت گرد نے گاڑی کے انتظار میں کھڑے مسلمان خاندان کو ٹرک تلے کچل دیا تھا۔ واقعے میں شہید ہونے والے میاں بیوی، بیٹی، اور والدہ کی تدفین کردی گئی۔

میتوں کو کینیڈا کے پرچم میں لپٹے تابوتوں میں اسلامک سینٹر لایا گیا اور قریبی فٹ بال گراؤنڈ میں نماز جنازہ ادا کی گئی جب کہ کینیڈا کے اعلیٰ حکام سمیت مختلف رنگ و نسل سے تعلق رکھنے والے ہزاروں افراد نے آخری رسومات میں شرکت کی اور سوگواروں سے ہمدردی کا اظہار کیا۔

تدفن کے موقع پر موجود کینیڈا میں پاکستان کے سفیر نے میڈیا سے گفتگو میں کہا کہ شہید ہونے والوں کی کینیڈا کے پرچم میں تدفین سے ثابت ہوتا ہے کہ کینیڈا کی پوری قوم دہشت گردی کے شکار خاندان کے ساتھ ہے۔

واضح رہے کہ اونٹاریو میں 8 جون کو 20 سالہ نوجوان نے فٹ پاتھ پر کھڑے مسلم خاندان کو جان بوجھ کر کچل دیا تھا جس کے نتیجے میں 74 اور 44 سال خواتین، 46 سالہ مرد اور 15 سالہ لڑکی شہید ہوگئے تھے جب کہ واحد زندہ بچ جانے والا شدید زخمی 9 سالہ لڑکا اسپتال میں زیر علاج ہے۔

بھارت کی قابض فورسز نے مقبوضہ جموں و کشمیر کے ضلع بارہ مولا میں کارروائی کرکے 3 معصوم شہریوں کو قتل کردیا جبکہ پاکستان نے اس کارروائی پر شدید مذمت کا اظہار کیا ہے۔

دفترخارجہ کے ترجمان زاہد حفیظ چوہدری کی جانب سے جاری بیان میں کہا گیا کہ ‘مقبوضہ جموں و کشمیر کے ضلع بارہ مولا میں بھارتی قابض فورسز کی جانب سے 3 معصوم کشمیریوں کے قتل کی پاکستان شدید مذمت کرتا ہے’۔

انہوں نے کہا کہ ‘کووڈ-19 کی وبا کے باوجود بھارتی قابض فورسز نام نہاد گھیراؤ اور سرچ آپریشز میں کشمیریوں کی ماورائے قانون قتل میں تیزی لا رہی ہیں’۔

بیان میں کہا گیا کہ ‘بھارتی فورسز نے رواں برس اب تک 55 کشمیریوں کو قتل کیا جبکہ کشمیری نوجوانوں کی گرفتاریاں بدستور جارہی ہیں’۔

بیان میں کہا گیا کہ ‘بھارت کو علم ہونا چاہیے کہ کسی قیمت پر بھارتی ظلم کشمیریوں اور ان کی اپنے حق خود ارادیت کو مزید کمزور نہیں کرپائے گا’۔

دفترخارجہ نے کہا کہ پاکستان، مقبوضہ جموں و کشمیر میں بھارتی فورسز کی جانب سے ہونے والی انسانی حقوق کی کھلی اور منظم خلاف ورزیوں کو مسلسل اجاگر کرتا رہا ہے۔

انہوں نے کہا کہ او ایچ سی ایچ آر کی 2018 اور 2019 کی تجویز کے مطابق اقوام متحدہ کا کمیشن آف انکوائری ان خلاف ورزیوں کی تفتیش کرے۔

ترجمان دفترخارجہ نے اپنے بیان میں کہا کہ پاکستان کشمیریوں کی ماورائے عدالت قتل کی عالمی سطح پر تفتیش اور وحشیانہ مظالم کے ذمہ داروں کو انصاف کے کٹہرے میں لا کھڑا کرنے کے مطالبے کو دہراتا ہے جہاں قابض بھارتی فورسز بے گناہ شہریوں کو قتل کر رہی ہے اور کیا جائے۔

‘سوپور میں 3 کشمیری جاں بحق’
خیال رہے کہ کشمیر میڈیا سروس کے مطابق بھارتی فورسز نے مقبوضہ جموں و کشمیر کے ضلع بارہ مولا کے قصبے سوپور کے علاقے آرام پورہ میں کارروائی کرکے 3 افراد کو قتل کردیا۔

رپورٹ کے مطابق بھارتی فورس نامعلوم افراد کے حملے میں پولیس کے دو اہلکاروں کی ہلاکت اور تین کے زخمی ہونے کے بعد علاقے میں کارروائیاں کر رہی ہے۔

بھارتی فورسز کے ہاتھوں جاں بحق ہونے والے 3 افراد کی نماز جنازہ میں ہزاروں افراد نے شرکت کی اور بھارت سے آزادی کے نعرے لگائے۔

اس سے قبل ہزاروں افراد نے بھارتی فورسز کے ہاتھوں معصوم شہریوں کے قتل پر شدید احتجاج کیا۔

سرکاری خبر ایجنسی اے پی پی نے کشمیر میڈیا سروس کی رپورٹ کا حوالا دیتے ہوئے کہا کہ بھارت نے کشمیر یوں کو سرنگوں کرنے کے لیے گزشتہ 73 برس کے دوران بالعموم جبکہ 1989سے بالخصوس ہر وحشیانہ ہتھکنڈا استعمال کیا لیکن وہ اپنے مذموم مقصد میں ناکام رہا۔

رپورٹ میں بتایا گیا کہ بھارتی فوجیوں نے 1989سے ریاستی دہشت گردی کی اپنی کارروائیوں کے دوران 95 ہزار 7 سو 90 کشمیریوں کو شہید جبکہ 8 ہزار سے زائد کو زیر حراست لاپتا کیا۔

اس میں مزید بتایا گیا کہ بھارتی فوجیوں نے گزشتہ 32 برسوں کے دوران ایک لاکھ 10 ہزار 4 سو گھر تباہ جبکہ 11 ہزار 2 سو 25 کے قریب خواتین کی بے حرمتی کی۔

مقبوضہ کشمیر کے حوالے سے رپورٹ میں کہا گیا کہ چوٹہ بازار جیسے قتل عام اور طفیل احمد متو جیسے کم عمر کشمیری لڑکوں کا سفاکانہ قتل مقبوضہ علاقے میں بدترین بھارتی رہاستی دہشت کی واضح مثالیں ہیں۔

دبئی: اسرائیل کی خفیہ ایجنسی ‘موساد’ کے سبکدوش ہونے والے سربراہ یوسی کوہن نے اشارہ دیا ہے کہ تل ابیب، ایران کے جوہری پروگرام اور ایک فوجی سائنسدان کو نشانہ بنانے والے حالیہ حملوں کے پیچھے تھا۔

رپورٹ کے مطابق یوسی کوہن نے اسرائیل کے ‘چینل 12’ کے پروگرام ‘یوودا’ کو انٹرویو دیتے ہوئے اشارہ دیا کہ دیگر ایرانی سائنسدان بھی اسرائیلی حملوں کا نشانہ بن سکتے ہیں۔

یوسی کوہن نے ایران کے جوہری پروگرام میں شامل دیگر سائنس دانوں کو بھی انتباہ دیا کہ انہیں بھی ہدف بنا کر قتل کیا جا سکتا ہے۔

دوسری جانب ویانا میں سفارتکار، عالمی طاقتوں کے ساتھ تہران کے جوہری معاہدے کو ختم کرنے کی شرائط پر بات چیت کرنے کی کوشش کر رہے ہیں۔

اسرائیلی خفیہ ایجنسی کے سبکدوش ہونے والے سربراہ نے کہا کہ اگر سائنسدان اپنا پیشہ تبدیل کرنے پر راضی ہیں اور ہمارے لیے مزید تکلیف کا باعث نہیں بنتے تو یقیناً ہم انہیں ایک راستہ دیں گے۔

حالیہ عرصے میں ایران کے نطنز ایٹمی پلانٹ پر دو حملے ہوئے ہیں لیکن ان حملوں میں ایٹمی پلانٹ محفوظ رہا۔

ایران نے یورینیم کی افزدوگی کے لیے زیر زمین ہال بنایا ہے تاکہ فضائی حملوں سے بچایا جاسکے۔

جولائی 2020 میں ایک پراسرار دھماکے سے نطنز ایٹمی پلانٹ کی سنٹرفیوج اسمبلی کو نقصان پہنچا تھا جس کا الزام ایران نے اسرائیل پر عائد کیا تھا۔

بعد ازاں اسی سال اپریل میں ایک اور دھماکے سے زیر زمین افزودگی ہال کو نقصان پہنچا تھا۔

یوسی کوہن نے ایران کے ایٹمی پلانٹ پر حملوں کی براہ راست ذمہ داری قبول نہیں کی لیکن ان کی جانب سے ایران پر ہونے والے حملوں میں تل ابیب کے فیصلے سے متعلق بیان سے اعتراف جھلک رہا ہے۔

ایک سوال پر انہوں نے جواب دیا کہ جو شخص ان حملوں کا ذمہ دار تھا، اس نے سنٹری فیوجز رکھنے والی جگہ کے لیے ماربل فراہم کیا تھا۔

انہوں نے کہا کہ ایرانی حکام نے وہ ماربل فاؤنڈیشن ایٹمی پلانٹ میں لگایا اور انہیں اندازہ نہیں تھا کہ اس میں وافر مقدار میں دھماکا خیز مواد موجود تھا۔

ایران کے نامور جوہری سائنسدان محسن فخری زادہ کو گزشتہ سال نومبر میں دارالحکومت تہران کے قریب فائرنگ کرکے قتل کرنے کا معاملہ بھی انٹرویو میں زیر بحث آیا۔

امریکی خفیہ ایجنسی اور انٹرنیشنل اٹامک انرجی ایجنسی (آئی اے ای اے) کا ماننا ہے کہ ایران نے جوہری ہتھیار کے لیے مربوط کوششیں 2003 میں ترک کردی تھیں۔

ایران بار بار کہتا آیا ہے کہ اس کا جوہری پروگرام پرامن مقاصد کے لیے ہے۔

اگرچہ آن کیمرا، یوسی کوہن نے ایرانی سائنسدان کو ہلاک کرنے کا دعوی نہیں کیا لیکن ایک حصے میں انہوں نے ’ذاتی طور پر پوری مہم پر دستخط کرنے‘ کے بارے میں بتایا۔

انہوں نے یہ بھی بتایا کہ کس طرح ایک پک اَپ ٹرک پر خودکار طریقے سے چلنے والی مشین گن سے ایرانی سائنسدان کو قتل کیا گیا اور بعد میں وہ گن خود ہی تباہ ہوگئی۔

مقبوضہ بیت المقدس: مغربی کنارے میں اسرائیلی فوج کی فائرنگ کے نتیجے میں 15 سالہ فلسطینی لڑکا شہید ہوگیا۔

عرب میڈیا کے مطابق مغربی کنارے میں جھڑپوں کے دوران اسرائیلی فوج کی فائرنگ کے نتیجے میں 15 سالہ فلسطینی لڑکا محمد سید ہمائل شہید جب کہ مزید 6 فلسطینی زخمی ہوگئے جنہیں اسپتال منتقل کردیا گیا ہے۔ فلسطینی نیوز ایجنسی کی جانب سے جاری تفصیلات میں کہا گیا ہے کہ اسرائیل کی جانب سے نئی غیر قانونی یہودی آبادیاں قائم کرنے کے خلاف احتجاجی مظاہرہ کیا جارہا تھا جس پر اسرائیلی فوج نے فائرنگ کی۔

واضح رہے کہ چند روز قبل بھی اسرائیلی فوج نے بھیس بدل کر فلسطینی انٹیلیجنس کے اہلکاروں کو گرفتار کرنے کی کوشش کی تھی تاہم گرفتاری میں ناکامی پر اسرائیلی فوج نے فائرنگ کرکے 3 فلسطینیوں کو شہید کردیا تھا۔

افغانستان کے دارالحکومت کابل کے مغربی علاقے میں دو بم دھماکوں میں مسافر بسوں کو نشانہ بنایا گیا، جس کے نتیجے میں 7 افراد جاں بحق اور مزید 6 زخمی ہوگئے۔

خبر ایجنسی رائٹرز کی رپورٹ کے مطابق کابل پولیس کے ترجمان بصیر مجاہد کا کہنا تھا کہ دھماکوں میں 6 افراد زخمی بھی ہوئے۔

قبل ازیں رواں ماہ کے اوائل میں افغان دارالحکومت کابل میں اسی طرح کے دھماکے ہوئے تھے جو ہزارہ برادری کے اکثریتی علاقے میں ہوئے تھے۔

ان دھماکوں میں 12 شہری جاں بحق اور درجنوں زخمی ہوئے تھے۔

کابل میں آج ہونے والے بم دھماکوں کی ذمہ داری فوری طور پر کسی گروپ نے تسلیم نہیں کی۔

خیال رہے کہ افغانستان میں امریکا کے مکمل فوجی انخلا کے اعلان کے بعد دھماکوں اور سرکاری فورسز پر حملوں میں اضافہ دیکھا گیا ہے۔

افغانستان کے مختلف علاقوں میں 8 جون کو ہونے والے واقعات میں 150 افغان فوجی ہلاک اور زخمی ہوگئے تھے۔

افغان حکومت کے سینئر عہدیداروں کے مطابق ملک کے 34 میں سے 26 صوبوں میں اس وقت کشیدگی میں اضافہ ہو رہا ہے اور ہلاکتوں میں پریشان کن اضافہ ہوچکا ہے۔

خیال رہے کہ امریکا گزشتہ برس طالبان کے ساتھ ہونے والے معاہدے کے تحت افغانستان سے تمام بیرونی فوجیں واپس بلالے گا اور نئے امریکی صدر نے 11 ستمبر تک فوجی انخلا کا اعلان کیا تھا۔

دوسری جانب افغان حکومت اور طالبان کے درمیان سیاسی مذاکرات بھی طویل عرصے سے تعطل کا شکار ہیں اور دونوں فریقین کے درمیان کشیدگی میں آئے روز اضافہ ہو رہا ہے۔

شہریوں کونشانہ بنانے کے حوالے سے بھی دونوں فریقین ایک دوسرے کو مورد الزام ٹھہراتے ہیں۔

اس سے قبل 6 جون مغربی صوبے بادغیس میں سڑک کنارے نصب بم پھٹنے سے خواتین و بچوں سمیت 11 افراد ہلاک ہوگئے تھے۔

کابل میں 3 جون کو منی بسوں پر حملہ کیا گیا تھا اور دو بم دھماکوں کے نتیجے میں 8 افراد ہلاک اور دیگر 9 افراد زخمی ہوگئے تھے۔

اس سے قبل اسی ہفتے شروع میں بھی منی بسوں کو نشانہ بنایا گیا تھا اور متعدد افراد ہلاک اور زخمی ہوگئے تھے۔

پولیس کے ترجمان فردوس فرامرز کا کہنا تھا کہ پہلا دھماکا کابل کے جنوب مغربی علاقے میں ہوا جہاں آزادی کی اکثریت ہزارہ برادری کی ہے، جو اکثر دہشت گردوں کے حملوں کا نشانہ بنتی ہے۔

ان کا کہنا تھا کہ اس دھماکے میں 4 افراد مارے گئے اور 4 زخمی ہوئے۔

ترجمان نے کہا تھا کہ چند گھنٹوں بعد چند کلومیٹر کے فاصلے پر دوسری بس نشانہ بنی جو ہزارہ برادری کی آبادی کے قریبی علاقہ ہے۔

افغانستان میں اقوام متحدہ کے مشن نے کہا تھا کہ رواں سال کے پہلے 3 ماہ میں دہشت گردی کے واقعات میں ایک ہزار 783 شہری ہلاک یا زخمی ہوئے، جو گزشتہ سال کے اسی عرصے کے مقابلے میں 29 فیصد زائد ہے۔

افغان طالبان نے کہا ہے کہ امریکا سے ہونے والے معاہدے پر عمل کرتے ہوئے ترک افواج بھی افغانستان سے نکل جائیں۔

واضح رہے کہ افعانستان میں ترکی کے پانچ سو سے زائد فوجی موجود ہیں جو افغان سکیورٹی فورسز کی تربیت کے لیے نیٹو مشن کا حصہ ہیں۔

طالبان کے ترجمان سہیل شاہین کا کہنا ہے کہ امریکا کے ساتھ امن ڈیل کے تحت افغانستان میں تعینات تمام غیر ملکی افواج کا انخلا ہو جانا چاہیے۔

قبل ازیں مغربی دفاعی اتحاد نیٹو کے رکن ملک ترکی نے پیشکش کی تھی کہ امریکی اور نیٹو افواج کے واپس جانے کے بعد بھی ترک افواج کابل کے بین الاقوامی ہوائی اڈے کی حفاظت کے لیے افغانستان میں قیام کر سکتی ہیں۔ افغانستان میں تعینات ترک افواج بھی نیٹو مشن کا حصہ ہیں۔ طے شدہ پروگرام کے مطابق تمام غیر ملکی افواج گیارہ ستمبر تک افغانستان سے نکال لی جانا ہیں۔

دوسری طرف افغان طالبان کے ترجمان ذبیح اللہ مجاہد نے ترکی کی اس پیشکش کی ’سختی سے مخالفت‘ کی ہے جس میں اس کا کہنا ہے کہ امریکہ اور نیٹو کی افواج کے انخلا کے بعد کابل کے بین الاقوامی ہوائی کی حفاظت اور اسے چلانے کے لیے اپنے فوجی روک سکتا ہے۔

افغان طالبان کے ترجمان ذبیح اللہ مجاہد نے عرب نیوز سے بات کرتے ہوئے کہا کہ ہم کسی بھی ملک کو اجازت نہیں دیں گے کہ وہ اپنی فوج کو یہاں رکھیں، چاہے وہ امریکہ ہو یا ترکی۔ ہم اس پر متفق نہیں۔ اگر ترکی کی ایسی کوئی نیت ہے تو اسلام امارات (طالبان حکومت کا نام جو وہ اقتدار میں استعمال کرتے تھے) اس کی مخالفت کرے گی، ہم ملک میں کسی بھی غیرملکی فوج کو قبول نہیں کریں گے، چاہے کوئی بھی نام ہو۔ ترکی نیٹو کا رکن ہے۔ وہ یہاں 20 سال تک رہے ہیں اور جنگ کا حصہ رہے ہیں۔ انہیں غلطی نہیں کرنی چاہیے اور اگر وہ افغانستان میں اپنی فوج رکھنا چاہتے ہیں تو بغیر کسی شک کے افغان ان کے ساتھ بھی دیگر حملہ کرنے والوں جیسا سلوک ہی کریں گے۔

طالبان کے قطر میں سیاسی دفتر کے ترجمان ڈاکٹر محمد نعیم کے مطابق اس کی کوئی ضرورت نہیں ہے۔ ہم نے غیرملکی افواج کی موجودگی نہ تو قبول کی اور نہ ہی کریں گے۔

ڈاکٹر محمد نعیم نے بتایا کہ افغانستان کی سکیورٹی کی ذمہ داری صرف افغان کی ہے اور غیرملکی شہریوں کا تحفظ بھی اسلام اور بین الاقوامی قوانین کے تحت اس ملک کی دمہ داری ہے جہاں وہ رہ رہے ہیں۔