Category انٹرنیشنل

ڈھاکا: بنگلادیشی پولیس نے 20 سال سے نایاب نسل کے شیروں کا شکار کرنے والے چھلاوے کو بالآخر گرفتار کرلیا۔

عالمی خبر رساں ادارے کے مطابق بنگلادیشی پولیس نے 20 سال سے چکمہ دینے والے شیروں کے شکاری کو حراست میں لے لیا۔ ٹائیگر حبیب کے نام سے مشہور شکاری پر 70 شیروں کو ہلاک کرنے کا الزام ہے۔

یونیسکو کی جانب سے عالمی ورثہ قرار دیئے جانے والے سندربن کے جنگلات کے قریبی گاؤں کے رہائشی ٹائیگر حبیب کے نام سے مشہور 50 سالہ شخص 20 سال سے شیروں کا شکار کر رہا ہے تاہم پولیس اسے گرفتار نہیں کر پائی تھی۔

پولیس چیف نے میڈیا سے گفتگو میں نایاب شیروں کے شکاری کی گرفتاری کو بڑی کامیابی قرار دیتے ہوئے کہا کہ چمرنگ کے جنگلات کے بنگال ٹائیگرز کا گوشت اور ہڈیاں بلیک مارکیٹ میں فروخت کی جاتی ہیں۔

بنگلادیشی پولیس کو امید ہے کہ مذکورہ شکاری کی گرفتاری کی مدد سے شیروں کی ہڈی، گوشت اور کھالیں اسمگلنگ کرنے والے گروہ تک پہنچ جائیں گے۔

ممبئی: سرکاری اعداد و شمار کے مطابق بھارت کی معیشت سال 21-2020 میں 7.3 فیصد سکڑی ہے، یہ آزادی کے بعد سے اب تک کی بدترین کساد بازاری ہے کیونکہ کورونا وائرس کے لاک ڈاؤنز کی وجہ سے لاکھوں افراد بے روزگار ہوگئے ہیں۔

فرانسیسی خبر رساں ادارے اے ایف پی کی رپورٹ کے مطابق 1947 کے بعد سے پہلی ‘تکنیکی کساد بازاری’ اور مسلسل 2 سہ ماہیوں میں سکڑنے کے بعد جنوری یا مارچ یعنی مالی سال کی چوتھی سہ ماہی میں ایشیا کی تیسری بڑی معیشت نے 1.6 فیصد نمو کی۔

بنگلور کی عظیم پریم جی یونیورسٹی کی ایک تحقیق کے مطابق گزشتہ برس عالمی وبا کے باعث 23 کروڑ بھارتی شہری غربت کا شکار ہوئے، جس میں غریب ان افراد کو کہا گیا جو یومیہ 375 بھارتی روپے یا 5 ڈالر سے کم پر گزارا کر رہے ہیں۔

سال 2020 کے اختتام پر پابندیوں میں نرمی سے سرگرمیوں کی عارضی بحالی کو آگے بڑھانے میں مدد ملی تھی لیکن اپریل اور مئی میں کورونا کیسز یکدم بڑھنے کی وجہ سے یہ بہت کم عرصے ہی برقرار رہ سکی۔

بھارتی معیشت کی نگرانی کرنے والے سینٹر کے مطابق بھارت میں وبا کی دوسری لہر سے 8 ہفتوں میں ایک لاکھ 60 ہزار افراد لقمہ اجل بنے جس کی وجہ سے مزید لاک ڈاؤنز لگائے گئے اور صرف اپریل میں 73 لاکھ افراد ملازمت سے محروم ہوئے۔

وزیر اعظم نریندر مودی کی حکومت نے وبا کے ردِعمل میں اب تک کسی بڑے محرک اقدامات کے اعلان سے گریز کیا ہے۔

اس کا مطلب اس ملک کے لیے مزید مشکلات ہیں، جہاں 90 فیصد افرادی قوت غیر رسمی سیکٹر میں بغیر کسی سماجی تحفظ کے کام کرتی ہے اور لاکھوں افراد حکومت کے ایمرجنسی راشن پروگرام کے اہل بھی نہیں۔

دوسری جانب حکومت کو بڑھتی ہوئی تنقید کا سامنا ہے جس میں نوبل انعام یافتہ معیشت دان ایستھر ڈوفلو اور ابھیجیت بینرجی نے بھی کمزور گھرانوں کو براہ راست نقد رقم دینے کے بجائے متاثرہ کاروبار کو قرضوں کی فراہمی پر زیادہ توجہ دینے پر حکومت کو تنقید کا نشانہ بنایا۔

ایک حالیہ رپورٹ میں مالیاتی خدمات کی برطانوی کمپنی بارکلے نے بھارت میں وبا کی دوسری لہر کی لاگت 74 ارب ڈالر لگائی ہے جو مجموعی ملکی پیداوار کے 2.4 فیصد کے برابر ہے۔

دوسری جانب بھارت کے مرکزی بینک نے سالانہ معاشی نمو 10.5 فیصد اور عالمی مالیاتی فنڈ نے 12.5 فیصد رہنے کا اندازہ لگایا ہے جو بڑی معیشتوں میں سب سے تیز نمو ہے۔

مسلسل غیر یقینی
کوٹک مہیندرا بینک کی ایک سینئر عہدیدار نے بتایا کہ ‘ہمیں مالی سال 2022 میں جی ڈی پی کی شرح نمو 10 فیصد رہنے کی توقع ہے۔

تاہم انہوں نے خبردار بھی کیا کہ ‘تجزیہ کاروں کو ان امکانات کا بار بار جائزہ لینا پڑے گا کیونکہ یہ ویکسی نیشن کی رفتار اور پابندیوں پر منحصر ہے’۔

انہوں نے کہا کہ رواں برس صورتحال اتنی خراب نہیں جتنی گزشتہ برس ملک گیر لاک ڈاؤن کی وجہ سے ہوئی تھی، لیکن مقامی پابندیوں کی وجہ سے معیشت پر دباؤ ہے اور یہ پابندیاں پورے سال جاری رہنے کا امکان ہے۔

بھارتی معیشت پہلے ہی سست روی کا شکار تھی لیکن عالمی وبا نے کئی برسوں میں حاصل ہونے والے ثمرات پر بھی اثر ڈالا۔

خیال رہے کہ گزشتہ برس 5 کروڑ بھارتی شہریوں کے غربت سے نکلنے کا تخمینہ تھا لیکن اس کے بجائے 20 فیصد غریب ترین گھرانے کاروبار بند ہونے کی وجہ سے اپریل اور مئی کے دوران اپنی مکمل آمدن سے ہی محروم ہوگئے۔

بھارت میں اب تک کورونا وائرس سے 2 کروڑ 80 لاکھ کیسز سامنے آچکے ہیں اور 21 کروڑ 30 لاکھ ویکسینز لگائی جاچکی ہیں۔

بیجنگ: چین نے ملک میں چند سالوں سے نافذ صرف دو بچوں کی پالیسی کا خاتمہ کردیا۔

برطانوی نشریاتی ادارے کے مطابق چینی حکومت نے 10 سال بعد ہونے والی مردم شماری کے بعد دو بچوں کی پالیسی کا خاتمہ کرتے ہوئے جوڑوں کو تین بچوں کی اجازت دے دی۔

میڈیا رپورٹس میں بتایا گیا ہے کہ چینی صدرکی سربراہی میں ہونے والے اہم اجلاس کے بعد حکومت نے صرف دو بچوں کی پالیسی کا خاتمہ کرتے ہوئے جوڑوں کو تین بچے پیدا کرنے کی اجازت دینے کا فیصلہ کیا ہے۔

چین کی جانب سے یہ فیصلہ ملک میں ہونے والی حالیہ مردم شماری کے نتائج کو سامنے رکھ کر کیا گیا ہے جس کے مطابق گزشتہ 10 سال کے دوران چین کی آبادی میں اضافے کی شرح انتہائی کم دیکھی گئی۔

چینی حکومت نے مردم شماری کے نتائج کے بعد ملک میں آبادی کی کمی پر قابو پانے کے لیے فوری طور پر اقدامات کا فیصلہ کیا۔

چین میں ہونے والی مردم شماری کے نتائج مئی کے اوائل میں جاری کیے گئے تھے جس میں بتایا گیا ہےکہ گزشتہ سال چین میں 12 ملین بچے پیدا ہوئے جو 2016 کو سامنے رکھتے ہوئے آبادی میں ایک معنی خیز کمی ہے کیونکہ 2016 میں چین میں 18 ملین بچوں کی پیدائش ہوئی تھی۔

میڈیا رپورٹس میں بتایا گیا ہےکہ چین میں گزشتہ سال 12 ملین بچوں کی پیدائش 1960 کے بعد سے بچوں کی پیدائش کی کم ترین شرح ہے۔

اس سے قبل 2016 میں چینی حکومت نے ایک بچے کی متنازع پالیسی کا خاتمہ کرتے ہوئے دو بچوں کی اجازت دی تھی۔

نائیجریا میں موٹر سائیکل سوار مسلح افراد نے اسلامی بورڈنگ اسکول پر دھاوا بول دیا اور 100 سے زائد بچوں کو اغوا کرکے ساتھ لے گئے۔

عالمی خبر رساں ادارے کے مطابق نائیجریا میں ایک بورڈنگ اسکول میں داخل ہوکر مسلح افراد نے اندھا دھند فائرنگ کردی جس کے نتیجے میں ایک شخص ہلاک اور ایک زخمی ہوگیا جب کہ حملہ آور سو سے زائد بچوں کو اغوا کرکے لے گئے۔

تاحال اغوا ہونے والے بچوں کی تعداد نہیں بتائی گئی ہے۔ اس حوالے سے نائیجریا کے وزارت داخلہ کی جانب سے جاری بیان میں کہا گیا ہے کہ اسکول میں حملے کے وقت 200 بچے رہائش پذیر تھے۔ اغوا ہونے والے بچوں کی تفصیلات جمع کی جارہی ہیں۔
یہ خبر پڑھیں : نائیجیریا میں اسکول پر مسلح افراد کا حملہ، سیکڑوں طالبات اغوا

اسکول کے عملے کے ایک رکن نے نام نہ ظاہر کرنے کی شرط پر اے ایف پی کو بتایا کہ حملہ آور 100 سے زائد بچوں کو اغوا کرکے لے گئے تھے تاہم بعد میں 4 سے 12 سال کے کمزور بچوں کو رہا کردیا گیا تھا۔

اسی طرح ایک عینی شاہد نے رائٹرز کو بتایا کہ 20 سے 25 موٹر سائیکل سوار حملہ آور جدید اسلحے سے لیس تھے جو 150 بچوں کو اغوا کرکے لے گئے جب کہ اسکول میں 300 سے زائد بچے موجود تھے۔

واضح رہے کہ نائیجریا میں مسلح گروہ کی جانب سے تاوان کے لیے اسکول کے بچوں کا اغوا معمول کی بات بن چکی ہے، دسمبر سے تاحال 700 بچوں کو اغوا کیا جا چکا ہے۔ چند روز قبل ہی ایک اسکول سے اغوا ہونے والے 14 بچوں کو 40 دن بعد رہائی ملی ہے۔

برسلز: یورپی یونین نے کہا ہے کہ صرف فائزر، موڈرنا، ایسٹرازینیکا اور جانسن اینڈ جانسن کی کورونا ویکسین لگوانے والوں کو رکن ممالک میں داخلے کی اجازت دی جائے گی۔

عالمی خبر رساں ادارے کے مطابق یورپی یونین نے فیصلہ کیا ہے کہ 27 رکن ممالک اور ریاستوں میں بیرون ملک سے آنے والے صرف ایسے افراد کو اجازت دی جائے گی جنہوں نے موڈرنا، فائزر، ایسٹرازینکا اور جانسن اینڈ جانسن کی ویکسین لگوائی ہوئی ہو۔

اس حوالے سے یورپی یونین کی جانب سے جاری بیان میں کہا گیا ہے کہ یورپی یونین ڈرگ اتھارٹی نے اب تک صرف انہی چاروں کورونا ویکسین کی اجازت دی ہے اس لیے ان کے سوا دوسری ویکسین لگوانے والوں کو رکن ممالک میں داخلے کی اجازت نہیں ہوگی۔
یورپی یونین کے اس فیصلے سے بھارتی، چینی اور روسی ویکسین لگوانے والے افراد رکن ممالک میں داخل نہیں ہوسکیں گے۔ اس سے قبل سعودی عرب نے بھی چین کی کورونا ویکسین لگوانے والوں کی داخلے پر پابندی کا اعلان کیا تھا۔

واضح رہے کہ ایف ڈی اے نے فائزر، میڈورنا، ایسٹرا زینیکا اور جانسن اینڈ جانسن کی کورونا ویکسین کی منظوری دی تھی جب کہ حال ہی میں چین کی کورونا سائنو فارم کی منظوری بھی دی ہے تاہم یورپی یونین کی ڈرگ اتھارٹی نے اب تک چین کی ویکسین کی منظوری نہیں دی ہے۔

پاکستان کی خطے میں امن کی کوششوں کا بھارت بھی معترف ہوگیا۔

بھارتی آرمی چیف جنرل منوج مکنڈ نروانے کا کہنا ہےکہ لائن آف کنٹرول (ایل او سی) پر سیز فائرپاک بھارت تعلقات معمول پر لانے کی جانب پہلا قدم ہے۔

انہوں نے کہا کہ ہم چاہیں گے کہ جنگ بندی جاری رہے۔

بھارتی آرمی چیف کا کہنا تھاکہ فائر بندی سے یقینی طور پر سیکیورٹی کی صورتحال میں بہتری آئی ہے، سرحدی علاقوں میں رہنے والے شہریوں کو فائدہ ہوا ہے۔

خیال رہے کہ رواں سال فروری میں پاکستان اور بھارت کے ڈائریکٹرجنرل ملٹری آپریشنز کا ہاٹ لائن پر رابطہ ہوا تھا۔

پاک فوج کے شعبہ تعلقات عامہ (آئی ایس پی آر) کے مطابق پاک بھارت ڈی جی ایم اوز کی گفتگو اچھے ماحول میں ہوئی اور دونوں افسران نے لائن آف کنٹرول کی صورت حال کا جائزہ لیا۔

آئی ایس پی آر کا بتانا ہےکہ ڈی جی ایم اوز نے دیگر تمام سیکٹرز کی صورتحال کا بھی جائزہ لیا اور بنیادی معاملات و خدشات حل کرنے پر بھی اتفاق کیا۔

برطانوی وزیراعظم بورس جانسن نے منگیتر کیری سائمنڈز سے ویسٹ منسٹر کیتھیڈرل میں خفیہ طور پر منعقدہ ایک تقریب میں شادی کرلی۔

بی بی سی کی رپورٹ میں متعدد اخباروں کی رپورٹس کا حوالہ دیتے ہوئے کہا گیا کہ 55 سالہ بورس جانسن نے خود سے 24 سال کم عمر 33 سالہ کیری سائمنڈز سے گزشتہ روز قریبی دوستوں اور رشتے داروں کی موجودگی میں تیسری شادی کی۔

تاہم ابھی تک برطانوی وزیراعظم بورس جانسن کی جانب سے تیسری شادی کے حوالے سے کوئی بیان سامنے نہیں آیا۔

خیال رہے کہ بورس جانسن برطانیہ کی لگ بھگ 200 سالہ تاریخ میں وزارت عظمیٰ کے عہدے پر براجمان رہتے ہوئے شادی کرنے والے پہلے وزیراعظم ہیں۔

کیری سائمنڈز برطانوی وزیر اعظم سے 24 سال کم عمر ہیں—فائل فوٹو: اے ایف پی
ان سے قبل 1822 میں رابرٹ بینکس جینکنس نے وزیراعظم کے عہدے پر براجمان رہتے ہوئے شادی کی تھی۔

دی میل آن سنڈے کی رپورٹ کے مطابق بورس جانسن کی شادی کی تقریب میں شارٹ نوٹس پر 30 لوگوں کو شرکت کی دعوت دی گئی تھی۔

یہاں یہ بات مدنظر رہے کہ برطانیہ میں نافذ کورونا وائرس کی پابندیوں کے تحت زیادہ سے زیادہ 30 مہمان تقریب میں شرکت کرسکتے ہیں۔

دی میل آن سنڈے کی رپورٹ میں کہا گیا کہ بورس جانسن کی شادی فادر ڈینیئل ہمفریز نے کروائی اور تقریب میں چرچ کے عہدیداران کی مختصر تعداد بھی شریک تھی۔

کیری سائمنڈز اور بورس جانسن کے 2018 سے تعلقات ہیں—فائل فوٹو: رائٹرز
دوسری جانب دی سن کی رپورٹ کے مطابق ڈاؤننگ اسٹریٹ کے سینئر اہلکاروں کو بھی برطانوی وزیراعظم کی شادی کا علم نہیں تھا۔

رپورٹ میں مزید کہا گیا کہ ویسٹ منسٹر کیتھیڈرل میں موجود عوام کو برطانوی وقت کے مطابق دوپہر ڈیڑھ بجے چرچ چھوڑ دینے کے لیے کہا گیا تھا۔

عوام کو چرچ چھوڑنے کے لیے دیے گئے وقت کے تقریباً آدھے گھنٹے بعد 33 سالہ کیری سائمنڈز سفید رنگ کا لباس زیب تن کیے ایک لیموزین میں ویسٹ منسٹر کیتھیڈرل پہنچی تھیں۔

رپورٹ میں مزید کہا گیا کہ گزشتہ شب موسیقاروں کو 10 ڈاؤننگ اسٹریٹ سے نکلتے ہوئے دیکھا گیا تھا۔

خیال رہے کہ 24 مئی کو برطانوی اخبار ’دی گارجین‘ نے اپنی رپورٹ میں ایک اور برطانوی اخبار کا حوالہ دیتے ہوئے بتایا تھا کہ وزیر اعظم ہاؤس کے قریبی ذرائع کے مطابق بورس جانسن جولائی 2022 میں شادی کرنے کا ارادہ رکھتے ہیں۔

جوڑے کے ہاں اپریل 2020 میں بیٹے کی پیدائش ہوئی تھی اور دونوں کے درمیان 2018 سے تعلقات تھے اور بچے کی پیدائش سے قبل دونوں نے منگنی بھی کی تھی۔

بورس جانسن برطانوی تاریخ کے وہ پہلے وزیر اعظم بھی ہیں، جو شادی کیے بغیر ہی وزیر اعظم ہاؤس میں گرل فرینڈ کے ساتھ مقیم تھے اور ان کے ہاں بچے کی پیدائش بھی ہوئی تھی۔

بورس جانسن سے قبل 2010 میں ڈیوڈ کیمرون وہ پہلے وزیر اعظم بنے تھے، جن کے ہاں وزارت عظمیٰ کے دوران بچے کی پیدائش ہوئی تھی تاہم وہ شادی شدہ تھے۔

بورس جانسن کے کیری سائمنڈز سے ہونے والے بچے کے علاوہ بھی 4 بچے ہیں اور انہوں نے پہلے دو شادیاں بھی کی تھیں جو طلاق پر ختم ہوئی تھیں۔

انہوں نے پہلی شادی اطالوی نژاد برطانوی خاتون الجرا موسٹن سے 1987 میں کی تھی لیکن دونوں کی شادی محض 6 سال کے اندر 1993 میں طلاق پر ختم ہوئی تھی۔

پہلی شادی ناکام ہونے کے چند ہی ہفتے بعد انہوں نے پاک و ہند نژاد برطانوی نسل کی خاتون مرینا ویلر سے 1993 میں شادی کی تھی اور جوڑے کے ہاں شادی کے ابتدائی 6 ماہ میں ہی پہلے بچے کی پیدائش ہوئی تھی۔

مرینا ویلر اور بورس جانسن کی شادی 25 سال تک قائم رہی تھی اور دونوں کے ہاں 4 بچے پیدا ہوئے، تاہم 2018 میں دونوں نے علیحدگی اختیار کرلی تھی اور ان کی طلاق کا معاملہ عدالت میں زیر سماعت ہے۔

خیال کیا جا رہا ہے کہ اگلے سال تک بورس جانسن کی دوسری طلاق بھی مکمل ہوجائے گی۔

اتر پردیش: بھارت میں کورونا سے ہلاک ہونے والے مریض کی لاش کو پل سے دریا میں پھینکنے کی ویڈیو وائرل ہونے پر پولیس نے دو افراد کو حراست میں لے لیا ہے۔

سماجی رابطے کی ویب سائٹ پر ایک ویڈیو وائرل ہوئی ہے جس میں دو افراد کو کورونا سے ہلاک ہونے والے مریض کی پلاسٹک میں لپٹی لاش کو دریا میں پھینکتے ہوئے دیکھا جا سکتا ہے۔

لاش دریا میں پھینکنے والوں میں سے ایک نے پی پی ای لباس بھی پہن رکھا ہوتا ہے جو عمومی طور پر اسپتال کا عملہ پہنتا ہے۔ ویڈیو وائرل ہونے پر پولیس حرکت میں آگئی اور تحقیقات کا آغاز کردیا۔

ابتدائی تحقیقات سے پتہ چلا کہ یہ لاش ریاست اترپردیش کے علاقے شہرت گڑھ کے رہائشی پریم ناتھ مشرا کی ہے جو کورونا کے باعث 25 مئی کو ضلعی اسپتال میں داخل ہوا تھا اور 28 مئی کو موت واقع ہوگئی تھی۔

واضح رہے کہ بھارت میں رواں ماہ کے آغاز میں کورونا کے مریضوں کی 50 سے زائد لاشیں دریائے گنگا میں تیرتی ہوئی آئی ہیں جس سے علاقے میں خوف و ہراس پھیل گیا تھا۔

ویت نام میں کورونا وائرس کی نئی مہلک قسم سامنے آگئی ہے۔

غیر ملکی میڈیا کے مطابق ویت نام میں کورونا وائرس کی نئی قسم کےکیسز کی تصدیق بھی ہوئی ہے۔

ماہرین کے مطابق یہ نئی قسم بھارت اور برطانیہ میں کورونا کی اقسام کے ملنے سے وجود میں آئی، یہ قسم زیادہ خطرناک اور آسانی سے پھیلنے والی ہے۔

خبر ایجنسی کے مطابق نئی قسم سے کورونا وائرس کے پھیلاؤ میں تیزی آرہی ہے جس کے بعد ویت نام کےکاروباری مرکزہوچی من سٹی میں دو ہفتوں کی سماجی پابندیاں نافذ کردی گئی ہیں۔

نئی پابندیوں کا اطلاق کل سے ہوگا اور شہر میں 10 سے زائد افراد کے اجتماع پر پابندی ہوگی۔

افغانستان کے صوبے کاپیسا میں شادی کی تقریب کے دوران گھر پرمارٹر شیل گرنے سے 10شہری جاں بحق جب کہ 8 افراد زخمی ہوگئے۔

افغان سیکیورٹی حکام کے مطابق گھر پر مارٹر شیل گرنے کا واقعہ ضلع تگاب میں ہفتے کی شام ہواجہاں طالبان اور افغان سیکیورٹی فورسز کی جھڑپیں جاری ہیں۔

دوسری جانب صوبائی پولیس نے مارٹر حملے کا الزام طالبان پرعائد کیا ہے جب کہ طالبان ترجمان نے الزامات کی تردید کردی ہے۔

ترجمان طالبان کا کہنا ہے کہ علاقے میں مارٹر شیل افغان سیکیورٹی فورسز کی جانب سے مارا گیا۔