Category انٹرنیشنل

اٹلی میں پولیس کو 18 سالہ پاکستانی لڑکی کی لاش کی تلاش ہے جن کے بارے میں شبہہ ہے کہ ان کے اہل خانہ نے انہیں ارینج میرج سے انکار پر قتل کردیا۔

خبر ایجنسی اے ایف پی کی رپورٹ کے مطابق کیرابنیری پولیس کے لیفٹیننٹ کرنل اسٹیفنو بوو کا کہنا تھا کہ لڑکی کے والدین، ایک چچا اور دو کزنز قتل کے شبہے میں زیر حراست ہیں۔

انہوں نے کہا کہ ‘ان تمام افراد پر شبہہ ہے کہ انہوں نے جرم میں حصہ لیا جبکہ پولیس لاپتہ ہونے والی لڑکی ثمن عباس کو فارم لینڈی تلاش کر رہی ہے۔

پولیس افسر کا کہنا تھا کہ کیرابنیری میں تالاب، نہروں اور گرین ہاوسز میں تلاش کا کام جاری ہے۔

رپورٹ کے مطابق شمالی قصبے نوویلارا میں رہائش پذیر ثمن عباس نے گزشتہ برس اپنے خاندان کے اس منصوبے کے خلاف بغاوت کی تھی جس کے تحت وہ آبائی ملک میں کزن سے شادی کرنا چاہتے تھے۔

وہ گھر سے شیلٹر ہوم منتقل ہوگئیں اور اپنے والدین کے حوالے سے بھی پولیس میں رپورٹ کی لیکن 11 اپریل کو انہیں واپس کردیا گیا۔

پولیس 5 مئی سے انہیں تلاش کر رہی ہے، جب پولیس افسران نے ان کے گھر کا دورہ کیا تو وہاں کوئی موجود نہیں تھا اور تفتیش شروع کردی۔

تفتیش کے دوران پولیس کو معلوم ہوا کہ لڑکی کے والدین ان کے بغیر پاکستان جاچکے ہیں اور سیکیورٹی کیمرے سے حاصل ہونے والی تصاویر سے انہیں حالات کی سنگینی کا خدشہ پیدا ہوا۔

بعدازاں 29 اپریل کو 5 افراد کو گھر سے بیلچے اور ٹوکریوں کے ساتھ جاتے ہوئے دیکھا جاسکتا اور پھر تقریباً ڈھائی گھنٹے کے بعد واپس آتےہیں۔

پولیس نے پانچوں افراد کو خاندان کے ارکان کے طور پر پہچان لیا اور شبہ ظاہر کیا ہے انہوں نے قتل بھی کیا ہے۔

دوسری جانب نویلارا کے ٹاؤن ہال میں درجنواں افراد نے لاپتہ لڑکی کے ساتھ اظہار یک جہتی کے سلسلے میں نکالی گئی ریلی میں حصہ لیا۔

میئر ایلینا کارلیٹی نے مقامی ویب سائٹ پر جاری ویڈیو بیان میں کہا کہ ثمن آج آپ اکیلی نہیں ہیں اور آپ دوبارہ کبھی اکیلی نہیں ہوگی’۔

اقوام متحدہ کی جنرل اسمبلی کے صدروولکان بوزکر کی جانب سے حالیہ دورہ پاکستان کے موقع پر مسئلہ کشمیر کے حوالے سے دیے گئے بیان کو بھارت نے ناقابل قبول قرار دیتے ہوئے سخت تنقید کردی۔

وولکان بوزکر نے حال ہی میں پاکستان کے تین روزہ دورے میں وزیر خارجہ شاہ محمود کے ہمرا پریس کانفرنس میں کہا تھا کہ یہ پاکستان کی ذمہ داری ہے کہ مسئلہ جموں و کشمیر کو اقوام متحدہ کے پلیٹ فارم پر مؤثر انداز میں اٹھائے۔

انہیں اس وقت مزید تنقید کا نشانہ بنایا گیا جب انہوں نے مسئلہ کشمیر کو فلسطین کے برابر قرار دیا جس کے ساتھ زیادہ ہمدردیاں موجود ہیں۔

بھارتی وزارت خارجہ کے ترجمان اریندن باگچی نے اس پریس کانفرنس پراپنے ردعمل میں کہا کہ بھارت نے بوزکر کے بیان کی ‘شدید مخالفت کا اظہار کیا ہے’۔

ان کا کہنا تھا کہ ‘ان کا یہ بیان کہ مسئلہ کو اقوام متحدہ میں شدت کے ساتھ اٹھانا پاکستان کی ذمہ داری ہے،ناقابل قبول ہے اور نہ ہی کسی اور عالمی تنازع سے اس کو تشبیہ دی جاسکتی ہے’۔

بھارتی ترجمان نے کہا کہ ‘جب اقوام متحدہ کی جنرل اسمبلی کے موجودہ صدر گمراہ کن بیانات دیں تو وہ اپنے عہدے کی اچھی خدمت نہیں کر رہے ہیں، ان کا رویہ شرم ناک تھا اور عالمی پلیٹ فارم کے شایان شان نہیں تھا’۔

خیال رہے کہ جنرل اسمبلی کے صدر نے کہا تھا کہ ‘میں خیال میں یہ خاص کر پاکستان کی ڈیوٹی ہے کہ اس مسئلے کو اقوام متحدہ کے پلیٹ فارم پرمضبوطی سے لائے’۔

ان کا کہنا تھا کہ میں اس بات سے متفق ہوں کہ فلسطین اور مسئلہ کشمیر ایک جیسے ہیں۔

انہوں نے تمام فریقین سے جموں و کشمیر کی حیثیت تبدیل کرنے سے گریز کرنے کا مطالبہ کیا تھا اور کہا تھا کہ مسئلے کا حل اقوام متحدہ کے چارٹر اور اقوام متحدہ کی سلامتی کونسل کی قراردادوں کے مطابق جیسا کہ شملہ معاہدے میں بھارت اور پاکستان نے اتفاق کیا تھا انہی پیرائے میں پرامن طور پر نکالاجائے۔

خیال رہے کہ دو روز قبل ہی بھارت کے خارجہ امور کے وزیر سبرامینم جے شنکر کے اسٹینفرڈ یونیورسٹیی کے ہوور انسٹیوٹشن میں گزشتہ روز خطاب کے دوران پاکستان پر سرحد میں دراندازی کا الزام عائد کیا تھا جس کو دفترخارجہ سے مسترد کردیا تھا۔

ترجمان دفتر خارجہ زاہدحفیظ چوہدری نے کہا تھا کہ ‘خطے میں امن و استحکام کے لیے بھارت کا کشمیریوں کے ساتھ ظلم و ستم اور اقوام متحدہ کی سلامتی کونسل کی قرار دادوں، عالمی برادری اور کشمیریوں کے ساتھ کیے گئے اپنے وعدے کے مطابق مسئلہ کشمیر کا مسئلہ حل نہ کرنا خطرے کا باعث ہے۔

انہوں نے کہا تھا کہ یہ کشمیر ہے جو پاکستان اور بھارت کے درمیان مرکزی مسئلہ ہے اور 1947 سے عالمی قوانین کے مطابق حل طلب ہے۔

زاہد حفیظ چوہدری نے کہا تھا کہ ‘بھارت کی جانب سے 5 اگست 2019 کو مقبوضہ کشمیرمیں بین الاقوامی قانون اور امن مخالف یک طرفہ اور غیر قانونی اقدامات کیے گئے’۔

ان کا کہنا تھا کہ ‘بھارت کے جابرانہ قبضے اور ریاستی دہشت گردی کے خلاف تحریک کشمیریوں کی اپنی ہے اور اس وقت تک جاری رہے گی جب تک بھارت اقوام متحدہ کی سلامتی کونسل کی قراردادوں کے مطابق آزادانہ اور غیر جانب دارانہ رائے شماری کے ذریعے مسئلہ کشمیر کا تصفیہ نہیں کرتا’۔

ترجمان دفتر خارجہ کا کہنا تھا کہ بھارت کو باور کرایا جاتا ہے کہ پاکستان پر الزامات عائد کرنے کے بجائے مسئلہ جموں و کشمیر کے تنازع اور دیگر مسائل کے حل کے لیے بامعنی اور نتیجہ خیز مذاکرات کی راہ ہموار کرے۔

سعودی عرب نے کورونا کے پھیلاؤ کو روکنے کے لیے عائد کی گئی سفری پابندیوں میں نرمی کافیصلہ کرتے ہوئے 11 ممالک کو استثنیٰ دے دیا جبکہ پاکستان کو ان ممالک میں شامل نہیں کیا گیا۔

غیرملکی خبر ایجنسیوں کی رپورٹ کے مطابق سعودی عرب نے سفری پابندیاں ہٹانے کے باوجود قرنطینہ کی شرط برقرار رکھی ہے۔

سرکاری نیوز ایجنسی نے وزارت داخلہ کے ذرائع کے حوالے سے کہا کہ سعودی عرب نے جن ممالک سے پابندی ہٹادی ہے، ان میں متحدہ عرب امارات، جرمنی، امریکا، آئرلینڈ، اٹلی، پرتگال، برطانیہ، سویڈن، سوئٹزرلینڈ، فرانس اور جاپان شامل ہیں اور سفری پابندی کا خاتمے کا اطلاق ہفتے کو ہوگا۔

رپورٹ میں بتایا گیا کہ یہ فیصلہ متعلقہ ممالک میں وبا کی صورت حال سے متعلق پبلک ہیلتھ اتھارٹی کی رپورٹ کی بنیاد پر کیا گیا، جس میں ان ممالک میں کورونا کے پھیلاؤ پر قابو پانے میں استحکام دکھایا گیا تھا۔

خیال رہے کہ سعودی عرب نے اسے قبل 3 فروری کو 20 ممالک پر سفری پابندی عائد کردی تھی، جس میں پاکستان بھی شامل تھا تاہم سفارت کاروں، سعودی عرب کے شہریوں، طبی ماہرین اور ان کے اہل خانہ کو استثنیٰ دیا گیا تھا۔

سعودی عرب نے مصر، متحدہ عرب امارات، لبنان، ترکی، برطانیہ، فرانس، جرمنی، آئرلینڈ، اٹلی، پرتگال، سویڈن، سوئٹزرلینڈ، امریکا، ارجنٹینا، برازیل، پاکستان، بھارت، انڈونیشیا، جاپان، پاکستان اور جنوبی افریقہ سے آمد پر پابندی عائد کردی تھی۔

سعودی عرب کے شاہی سفارت خانے کی جانب سے بھی وزارت خارجہ امور کو اس حوالے سے خط لکھا گیا ہے۔

خط میں کہا گیا ہے کہ ‘اگر کوئی مذکورہ ممالک سے سعودی عرب میں داخل ہوتو انہیں 14 روزہ قرنطینہ کرنا ہوگا جس میں دیگر ممالک سے آنے والے لوگ بھی شامل ہیں’۔

انہوں نے لکھا کہ ‘سعودی عرب اور دیگر ممالک کے درمیان سپلائی چین اور شپنگ کے امور متاثر نہیں ہوں گے اور اس کے لیے سعودی وزارت صحت کی جانب سے کیے گئے حفاظتی اقدامات پر عمل کرنا ہوگا’۔

سعودی عرب نے گزشتہ ماہ کورونا وائرس کی تیسری لہر کے باعث پاکستان سمیت کئی ممالک کے لیے سفری پابندیوں میں مزید اضافہ کردیا، جن میں پاکستان کے علاوہ دیگر چار ممالک بھارت، فلپائن، سری لنکا اور انڈونیشیا شامل تھے۔

اسرائیلی فورسز نے فلسطینی سرزمین پر قبضے کے خلاف احتجاج کرنیوالے ایک اور فلسیطنی شہری کو شہید کردیا۔

غیر ملکی میڈیا کے مطابق فلسطینی وزارت صحت نے تصدیق کی ہےکہ گزشتہ روز اسرائیلی فورسز نے مقبوضہ مغربی کنارے پر احتجاج کرنے والے فلسطینی شہریوں پر فائرنگ کی جس کے نتیجے میں ایک شہری شہید ہوگیا۔

فلسطینی وزارت صحت کا بتانا ہےکہ جمعہ کے روز سیکڑوں فلسطینی شہریوں نے اسرائیل کے ناجائز قبضے کے خلاف احتجاج کیا تو اس دوران اسرائیلی فورسز نے فائرنگ کی جس سے 28 سالہ زکریا حمائل شہید ہوگیا۔

واقعے کے بعد اسرائیلی فورسز پر راکٹ فائر کیے گئے جس کے نتیجے میں کسی اسرائیلی فوجی کی ہلاکت کی تصدیق نہیں ہوئی۔

اس سے قبل منگل کے روز بھی اسرائیلی فورسز نے مغربی کنارے پر کارروائی کرتے ہوئے ایک فلسطینی کو شہید کیا تھا۔

واضح رہےکہ غزہ پر جاری اسرائیلی بربریت کے نتیجے میں 240 سے زائد فلسطینی شہری شہید ہوئے جن میں 67 بچے بھی شامل ہیں جب کہ اسرائیلی بمباری سے ہزاروں فلسطین بے گھر بھی ہوگئے۔

نئی دلی: دنیا بھرمیں کورونا کی تباہ کاریاں جاری ہیں، ہلاکتوں کی تعداد 35 لاکھ 37 ہزار سے تجاوز کرگئی، بھارت میں مزید 3 ہزار 617 لوگ موت کے منہ میں چلے گئے۔

بھارت میں کورونا کے وار جاری ہیں، مزید ایک لاکھ 73 ہزار 921 کیس سامنے آگئے۔ وبا سے تین ہزار 617 ہلاکتیں بھی ہوئیں، کورونا سے مجموعی ہلاکتوں کی تعداد 3 لاکھ 22 ہزار سے بھی تجاوز کرگئی۔

وائرس کے پھیلاؤ کو روکنے کیلئے مہاراشٹرا میں لاک ڈاؤن کو 15 جون تک بڑھا دیا گیا۔ دیگر ممالک میں بھی کورونا سے ہلاکتیں جاری ہیں، گزشتہ چوبیس گھنٹے میں برازیل میں کورونا سے 2 ہزار 418 اور امریکا میں 627 افراد دم توڑ گئے۔

اوٹاوا: کینیڈا کے 1978 میں بند ہونے والے ایک بورڈنگ اسکول سے 215 بچوں کی اجتماعی قبر برآمد ہوئی ہے۔

عالمی خبر رساں ادارے کے مطابق کینیڈا کے ایک سابق بورڈنگ اسکول سے اجتماعی قبر برآمد ہوئی ہے جس میں سے 215 بچوں کی باقیات نکالی گئی ہیں۔ یہ اسکول 1978 میں بند ہوگیا تھا اور برآمد ہونے والی باقیات برٹش کولمبیا کے شہر کملوپس کے طلبا کی ہیں۔

یہ اسکول برسوں پرانی مقامی ثقافت کے علمبردار اس علاقے کی اصلی اور قدیم نسل کو جدید ثقافت کے تابع کرانے کے لیے بنایا گیا تھا اور یہاں تعلیم حاصل کرنے والے 500 طلبا ایک ہی قدیم مقامی نسل، ثقافت اور تہذیب سے تعلق رکھتے تھے جنہیں اپنی تہذیب و زبان ترک کرنے پر مجبور کیا جاتا تھا۔

”ملاپس سیکوپیمک فرسٹ نیشن ” کے سربراہ نے اجتماعی قبر کی دریافت کا انکشاف کرتے ہوئے بتایا کہ ماہرین اور کورونر کے دفتر کے ساتھ مل کر بچوں کی اموات کا وقت اور وجوہات جاننے کے لیے تحقیق کر رہے ہیں۔

کینیڈا کے وزیر اعظم جسٹن ٹروڈو نے اس واقعے پر گہرے افسوس کا اظہار کرتے ہوئے کہا کہ یہ ہمارے ملک کی تاریخ کے شرمناک باب کی دردناک یاد دہانی ہے۔

برٹش کولمبیا کے شہر کملوپس میں برادری کے سربراہ روزن کیسیمر نے کہا کہ ابتدائی کھوج میں ایک ناقابل تصور نقصان ہوا ہے جس کا اسکول کے انتظامیہ نے کبھی ذکر نہیں کیا تھا۔

واضح رہے کہ 19 اور 20 ویں صدی کے دوران کینیڈا میں حکومت اور مذہبی حکام کے ذریعے چلائے جانے والے بورڈنگ اسکول میں قدیم مقامی نسل سے تعلق رکھنے والے بچوں کو والدین سے زبردستی علیحدہ رکھ کر نئی زبان اور جدید ثقافت اپنانے پر مجبور کیا جاتا تھا۔

سرینگر: مقبوضہ وادی میں قابض فوج نے فائرنگ کرکے ایک اور کشمیری نوجوان کو شہید کردیا۔

کشمیر میڈیا سروس کے مطابق مقبوضہ کشمیر کے ضلع شوپیاں میں قابض افواج نے ریاستی دہشتگردی کی تازہ کارروائیوں کے دوران فائرنگ کرکے ایک اور نوجوان کو شہید کردیا، بھارتی فوج نے نام نہاد سرچ آپریشن کے دوران اندھا دھند فائرنگ کرکے نوجوان کو شہید کیا جب کہ علاقے میں اب بھی آپریشن جاری ہے۔

اسلام آباد: وزیر خارجہ شاہ محمود قریشی نے کہا ہے کہ پاکستان جنوبی ایشیائی خطے میں امن چاہتا ہے کیونکہ امن کی بنیاد پر پی عوام کو غربت سے نکالا جا سکتا ہے جبکہ پاکستان، عراق دہشتگردی کےخلاف جنگ میں ایک دوسرے کے تجربات سے فائدہ اٹھاسکتے ہیں۔

ریڈیو پاکستان کی رپورٹ کے مطابق عراقی وزیر خارجہ کے ہمراہ مشترکہ پریس کانفرنس سے خطاب کرتے ہوئے شاہ محمود قریشی نے کہا کہ افغان امن عمل کو آگے بڑھنا ہوگا۔

وزیر خارجہ نے عراقی ہم منصب فواد حسین سے بات چیت کے دوران کہا کہ انہوں نے امن عمل میں سہولت کے لیے پاکستان کے کردار سے آگاہ کیا۔

شاہ محمود قریشی نے کہا کہ پاکستان زائرین کے عراق کے دورے کے لیے سہولیات سے متعلق متعدد اقدامات اٹھا رہا ہے۔

اس سے قبل عراقی ہم منصب سے ملاقات کے دوران دونوں وزرائے خارجہ کے مابین دو طرفہ تعلقات، کثیرالجہتی شعبہ جات میں تعاون کے فروغ سمیت باہمی دلچسپی کے اہم علاقائی و عالمی امور پر تبادلہ خیال کیا گیا۔

سرکاری نیوز ایجنسی ‘اے پی پی’ کے مطابق دفتر خارجہ کی جانب سے جاری اعلامیے میں کہا گیا کہ وزیر خارجہ شاہ محمود قریشی نے کہا کہ پاکستان، عراق کے ساتھ دو طرفہ تعلقات کو انتہائی قدر کی نگاہ سے دیکھتا ہے اور دہشتگردی کے خلاف جنگ میں دونوں ممالک ایک دوسرے کے تجربات سے بھرپور فائدہ اٹھاسکتے ہیں۔

دفتر خارجہ کے مطابق ہفتہ کو عراقی دارالحکومت بغداد میں وزیر خارجہ شاہ محمود قریشی اور ان کے عراقی ہم منصب فواد حسین کے مابین اہم ملاقات ہوئی۔

شاہ محمود قریشی نے کہا کہ ہم نے اپنی جغرافیائی سیاسی ترجیحات کو جغرافیائی اقتصادی ترجیحات میں بدل دیا ہے اور دونوں ممالک کے مابین تجارت، سرمایہ کاری، تعلیم، ٹیکنالوجی، انفرااسٹرکچر ڈیولپمنٹ سمیت باہمی دلچسپی کے مختلف شعبوں میں دو طرفہ تعاون کے فروغ کے وسیع مواقع موجود ہیں۔

شاہ محمود قریشی نے کہا کہ پاکستان 22 کروڑ آبادی کی ابھرتی ہوئی مارکیٹ ہے جہاں سرمایہ کاری کے بے شمار مواقع میسر ہیں۔

وزیر خارجہ نے کہا کہ باہمی دلچسپی کے امور پر تفصیلی مشاورت کے لیے مشترکہ وزارتی کمیشن کے نویں اجلاس کے جلد انعقاد کے متمنی ہیں۔

شاہ محمود قریشی نے کہا کہ پاکستان، افغانستان سمیت خطے میں امن کاوشوں کا شراکت دار ہے اور دہشتگردی کے خلاف جنگ میں دونوں ممالک ایک دوسرے کے تجربات سے مستفید ہو سکتے ہیں۔

وزیر خارجہ نے دہشت گردی کے خلاف عراقی عوام کی لازوال قربانیوں کو سراہا۔

وزیر خارجہ مخدوم شاہ محمود قریشی نے عراقی ہم منصب کو فلسطین اور مقبوضہ جموں و کشمیر میں جاری انسانی حقوق کی پامالیوں کے حوالے سے پاکستان کے نکتہ نظر سے آگاہ کیا۔

وزیر خارجہ نے مشرق وسطیٰ میں قیام امن کے لیے مسئلہ فلسطین جبکہ جنوبی ایشیا میں دیر پا امن و استحکام کے لیے مسئلہ کشمیر کے منصفانہ حل کو ناگزیر قرار دیا۔

دونوں وزرائے خارجہ نے کورونا وبا کے پھیلاؤ کو روکنے کے لیے عالمی سطح پر مشترکہ کاوشیں بروئے لانے کی ضرورت پر زور دیا۔

دونوں وزرائے خارجہ نے کورنا وبا کے پھیلاؤ کو روکنے کے لیے عالمی سطح پر مشترکہ کاوشیں بروئے لانے کی ضرورت پر زور دیا۔

خیال رہے کہ پاکستان نے کورونا وبا کے دوران عراقی شہریوں کی معاونت کے لیے طبی سامان پر مشتمل کے 3 جہاز بھجوائے۔

جس پر عراقی وزیر خارجہ فواد حسین نے کورونا وبا کے دوران امدادی سامان کی فراہمی پر وزیر خارجہ اور پاکستانی قیادت کا شکریہ ادا کیا۔

وزیر خارجہ شاہ محمود قریشی عراقی ہم منصب کی دعوت پر تین روزہ دورے پر گزشتہ روز عراق پہنچ گئے تھے۔

بغداد بین الاقوامی ہوائی اڈے پر عراق کے نائب وزیر خارجہ ڈاکٹر صالح التمیمی، پاکستان میں عراقی سفیر حامد لفطہ، عراق میں پاکستان کے نامزد سفیر احمد امجد علی اور عراقی وزارت خارجہ کے سینئر حکام نے وزیر خارجہ شاہ محمود قریشی کا خیر مقدم کیا تھا۔

علاوہ ازیں دفتر خارجہ نے کہا تھا کہ شاہ محمود قریشی کا دورہ گزشتہ چند ماہ کے دوران دونوں جانب سے وزارتوں کی سطح پر ہونے والے دوروں کے پس منظر کے تحت ہو رہا ہے، جو دونوں ممالک کی جانب سے دوطرفہ تعلقات کو فروغ دینے کی اہمیت کو اجاگر کرتا ہے۔

ان کے دورے میں عراقی قیادت کے ساتھ دوطرفہ سیاسی و دفاعی تعاون بڑھانے کے حوالے سے بھی بات چیت ہوگی۔

دفتر خارجہ نے کہا تھا کہ شاہ محمود قریشی کا یہ دورہ عراق، وزیر اعظم عمران خان کے وژن کی روشنی میں مسلم ممالک کے ساتھ اعلیٰ سطح کے روابط کے فروغ کی ایک کڑی ہے اور توقع ہے کہ وزیر خارجہ کے اس دورے سے دونوں ممالک کے درمیان دوطرفہ برادرانہ تعلقات مزید مستحکم ہوں گے۔

جرمنی نے نوآبادیاتی دور میں قبضے کے دوران نمیبیا میں نسل کشی کو باضابطہ طور پر تسلیم کرتے ہوئے مافی مانگ لی ہے اور مالی امداد کا اعلان کیا ہے۔

خبر رساں ایجنسی اے ایف پی کے مطابق 20ویں صدی کے اوائل میں جرمن نوآبادیاتی دور میں ہریرو اور ناما کے ہزاروں افراد کا قتل عام کیا گیا۔

جرمن وزیر خارجہ ہیکو ماس نے جمعہ کو اس قتل عام کا ادراک کرتے ہوئے نمیبیا کو امداد کی پیشکش کی ہے۔

انہوں نے کہا کہ جرمنی کی تاریخی اور اخلاقی ذمے داری کے طور پر ہم نمیبیا اور قتل عام کا نشانہ بننے والے افراد کے اہلخانہ سے معافی کے طلبگار ہیں۔

انہوں نے کہا کہ متاثرہ افراد کے پہنچنے والی اذیت کو تسلیم کرتے ہوئے جرمنی، نمیبیا کے لیے 1.34ارب ڈالر کی امداد کا اعلان کرتا ہے۔

یہ رقم آئندہ 30 سال کے دوران نمیبیا کے انفرااسٹرکچر ، نظام صحت، تربیتی پروگراموں پر صرف کی جائے گی جس سے معاشرے کو فائدہ پہنچے گا۔

جرمن وزیر خارجہ نے اپنے بیان میں مزید کہا کہ ہم آج ان واقعات کو باضابطہ طور پر نسل کشی قرار دیتے ہیں اور نوآبادیاتی دور میں اٹھائے گئے اقدامات پر کسی رعایت کے بغیر بحث ہونی چاہیے۔

نمیبیا کے کی حکومت کے ترجمان نے اے ایف پی سے گفتو کرتے ہوئے کہا کہ جرمنی جانب سے غلطی تسلیم کیا جانا صحیح سمت کی جانب پہلا قدم ہے۔

جمعہ کو جاری کیا گیا بیان جرمنی اور نمیابیا کے درمیان پانچ سالہ مذاکرات اور بات چیت کا نتیجہ ہے جہاں اس سے قبل 1884 سے 1915 تک نمیبیا نوآبادیاتی دور میں جرمنی کے قبضے میں رہا۔

تاریخ دانوں کا کہنا ہے کہ اس وقت جرمن جنوب مغربی افریقہ کے نام سے مشہور علاقے میں ہونے والی اس نسل کشی کو بھلا دیا گیا ہے جبکہ کچھ تاریخ دان اسے 20ویں صدی کی پہلی نسل کشی قرار دیتے ہیں۔

ایک محتاط اندازے کے مطابق 1904 سے 1908 کے درمیان اس علاقے میں رہنے والے 65ہزار سے 80 ہزار افراد کو قتل کردیا گیا تھا اور 20 ہزار میں سے 10ہزار ناما قبیلے کے افراد کو موت کے گھاٹ اتار دیا گیا تھا۔

جرمنی نے اس علاقے پر 1884 سے حکومت کی لیکن پہلی جنگ عظیم میں یہ علاقہ ان کے ہاتھ سے چلا گیا تھا۔

1920 کے بعد یہ علاقہ جنوبی افریقہ انتظامیہ کے زیر انتظام آ گیا تھا اور 1990 تک انہی کے زیر انتظام رہا ، یہاں تک کہ نمیبیا نے آزادی حاصل کر لی۔

اس مسئلے پر نمیبیا اور جرمنی کے درمیان مذاکرات کا آغاز 2015 میں ہوا تھا اور 2018 وہ ڈھانچے واپس کر دیے گئے تھے جنہیں نسلی امتیاز ثابت کرنے کے لیے کیے گئے تجربات میں استعمال کیا گیا تھا۔

واضح رہے کہ یہ پیشرفت ایک ایسے موقع پر سامنے آئی ہے جب گزشتہ روز ایک اور یورپی ملک فرانس میں ہونے والے نسل کشی میں اپنی ذمے داری تسلیم کی تھی۔

7 اپریل 1994 کو ہوتو قبیلے کی جانب سے توتسی افراد کی نسل کشی کا آغاز ہوا جو 100 دن تک جاری رہی اس میں 8 لاکھ سے زائد افراد ہلاک ہوئے تھے۔

4 جولائی کو توتسی قبیلے کی جماعت آر پی ایف کے سپاہیوں نے دارالحکومت کگالی پر قبضہ کرکے 100 دن بعد اس نسل کشی کا خاتمہ کیا تھا۔

وزیر خارجہ شاہ محمود قریشی عراقی ہم منصب کی دعوت پر تین روزہ دورے پر عراق پہنچ گئے۔

دفترخارجہ سے جاری بیان کے مطابق بغداد بین الاقوامی ہوائی اڈے پر عراق کے نائب وزیر خارجہ ڈاکٹر صالح التمیمی، پاکستان میں عراقی سفیر حامد لفطہ، عراق میں پاکستان کے نامزد سفیر احمد امجد علی اور عراقی وزارت خارجہ کے سینئر حکام نے وزیر خارجہ شاہ محمود قریشی کا خیر مقدم کیا۔

وزیر خارجہ اپنے تین روزہ دورہ عراق کے موقع پر عراقی وزیرخارجہ فواد حسین اور عراق کی دیگر اعلیٰ قیادت کے ساتھ ملاقاتیں کریں گے۔

ان ملاقاتوں میں دو طرفہ تعلقات، تجارت، سرمایہ کاری، تعلیم، زراعت، انفارمیشن ٹیکنالوجی اور دفاع سمیت مختلف شعبوں میں دو طرفہ تعاون کے فروغ کے حوالے سے تبادلہ خیال ہو گا۔

دفتر خارجہ کے مطابق شاہ محمود قریشی عراقی قیادت کو مسئلہ فلسطین، مسئلہ کشمیر، افغان امن عمل سمیت اہم علاقائی امور پر پاکستان کے مؤقف سے آگاہ کریں گے، اس دوران پاکستان اور عراق کے مابین، او آئی سی، اقوام متحدہ اور اس کے ذیلی اداروں، کی سطح پر دو طرفہ تعاون پر فروغ بھی زیر بحث آئے گا۔

بیان میں کہا گیا ہے کہ وزیر خارجہ، ہر سال عراق جانے والے ہزاروں پاکستانی زائرین کی سہولت اور بہتر سفری انتظامات کے لیے عراقی قیادت سے بات چیت کریں گے۔

قبل ازیں وزیر خارجہ شاہ محمود قریشی عراقی ہم منصب کی دعوت پر آج صبح عراق کے 3 روزہ سرکاری دورے پر روانہ ہوگئے تھے۔

دفتر خارجہ سے جاری بیان میں کہا گیا تھا کہ وزیر خارجہ، عراقی ہم منصب فواد حسین سے ملاقات میں دوطرفہ تعلقات، کثیرالجہتی اداروں بالخصوص اقوام متحدہ، اس کے ذیلی اداروں اور اسلامی تعاون تنظیم (او آئی سی) میں دوطرفہ تعاون کے فروغ، مسلم امہ کو درپیش چیلنجز سمیت اہم علاقائی و عالمی امور پر تبادلہ خیال کیا جائے گا۔

شاہ محمود قریشی، عراق کے صدر برہام صالح سمیت عراق کی اعلیٰ قیادت سے بھی ملاقات کریں گے۔

دفتر خارجہ نے کہا تھا کہ شاہ محمود قریشی کا دورہ گزشتہ چند ماہ کے دوران دونوں جانب سے وزارتوں کی سطح پر ہونے والے دوروں کے پس منظر کے تحت ہو رہا ہے، جو دونوں ممالک کی جانب سے دوطرفہ تعلقات کو فروغ دینے کی اہمیت کو اجاگر کرتا ہے۔

ان کے دورے میں عراقی قیادت کے ساتھ دوطرفہ سیاسی و دفاعی تعاون بڑھانے کے حوالے سے بھی بات چیت ہوگی۔

دفتر خارجہ نے کہا کہ شاہ محمود قریشی کا یہ دورہ عراق، وزیر اعظم عمران خان کے وژن کی روشنی میں مسلم ممالک کے ساتھ اعلیٰ سطح کے روابط کے فروغ کی ایک کڑی ہے اور توقع ہے کہ وزیر خارجہ کے اس دورے سے دونوں ممالک کے درمیان دوطرفہ برادرانہ تعلقات مزید مستحکم ہوں گے۔