Category انٹرنیشنل

کینسرکا پھیلاؤ بھی سگریٹ نوشی کی لت چھڑوانے میں ناکام رہا۔

غیر ملکی میڈیا رپورٹس کے مطابق دنیا بھر میں سگریٹ پینے والوں کی تعداد میں تشویشناک حد تک اضافہ ہوگیا۔

اعداد وشمار بتاتے ہیں کہ تمباکونوشی کرنے والوں کی تعداد ریکارڈ ایک ارب 10 کروڑ تک پہنچ گئی ہے اور صرف 2019 میں تمباکو نوشی سے مرنے والوں کی تعداد تقریباً 80 لاکھ تھی۔

شام میں ہونے والے انتخابات کے سرکاری نتائج کے مطابق بشارالاسد چوتھی مرتبہ جنگ زدہ ملک کے صدر منتخب ہوگئے ہیں تاہم مغربی ممالک کا کہنا تھا کہ انتخابات آزادانہ اور شفاف نہیں تھے۔

فرانسیسی خبررساں ادارے اے ایف پی کی رپورٹ کے مطابق متنازع ووٹ نے ایک دہائی سے جاری خانہ جنگی کے دوران دوسری مرتبہ بشارالاسد کی اقتدار پر گرفت مضبوط کردی ہے، خانہ جنگی کے نتیجے میں 3 لاکھ 88 ہزار سے زائد ہلاک، لاکھوں بے گھر اور ملک کا انفرا اسٹرکچر ٹوٹ پھوٹ کا شکار ہے۔

پارلیمانی اسپیکر نے نتائج کا اعلان کیا جس کے مطابق بشارالاسد نے 95.1 فیصد ووٹس لے کر کامیابی حاصل کی۔

ان کے مقابلے سابق وزیر مملکت عبداللہ سلوم عبداللہ اور اپوزیشن کے رکن محمود میرھی نے انتخاب میں حصہ لیا تھا۔

انتخابات کی شام برطانیہ، امریکا، فرانس، جرمنی اور اٹلی نے کہا تھا کہ انتخابات شفاف اور آزادانہ نہیں ہیں اور شام کی منقسم اپوزیشن نے اسے ‘مذاق’ قرار دیا تھا۔

تاہم کچھ کو شبہ تھا کہ 55 سالہ بشارالاسد، جنہوں نے ماہر امراض چشم کی تربیت حاصل کررکھی ہے، کا دوبارہ انتخاب ہوگا۔

سال 2014 میں ہونے والے انتخابات میں انہوں نے 88 فیصد ووٹس حاصل کیے تھے جبکہ اُس انتخاب میں متعدد امیدواروں نے حصہ لیا تھا۔

انتخابی نتیجہ سنائے جانے سے قبل ہزاروں شامی شہری متعدد شہروں کی سڑکوں پر نکل آئے، جو شام کا پرچم لہرارہے تھے اور بشارالاسد کی تصاویر اٹھائے ہوئے تھے۔

مقامی میڈیا کے مطابق جب الیکشن کمیٹی نے اعلان کیا کہ شام کے زیادہ تر صوبوں میں بیلٹ گننے کا عمل مکمل ہوچکا ہے تو جشن شروع ہوگیا۔

شام کے سرکاری خبررساں ادارے صنعا کی رپورٹ کے مطابق صوبہ طرطوس میں شہر کے ساحل پر ہزاروں لوگ بشارالاسد کی موقع جیت کا جشن منانے کے لیے جمع ہوئے۔

ایک شہری نے اے ایف پی سے بات کرتے ہوئے کہا کہ بشارالاسد کی کامیابی کے 2 پیغامات ہیں، پہلا یہ کہ ایک لیڈر نے جنگ جیتی اور اب تعمیر نو کی سربراہی کریں گے، دوسرا غیر ملکیوں کو یہ دکھانا کہ جب لڑائی ختم ہوگی تو سیاسی بات چیت کی سربراہی کون کرے گا۔

ملک کی معیشت ڈانواں ڈول
حکومت کے زیر قبضہ علاقوں میں انتخابات کا انعقاد بدھ کے روز ہوا اور سرکاری میڈیا نے دکھایا کہ پولنگ اسٹیشنز کے باہر عوام کی لمبی قطاریں موجود تھیں جبکہ پولنگ کا عمل 5 گھنٹے جاری رہا۔

ووٹنگ ایسے وقت میں ہوئی کہ جب 2011 سے شروع ہونے والی جنگ اپنی سب سے کم ترین سطح پر ہے لیکن معیشت ڈانواں ڈول ہے۔

شام کی 80 فیصد آبادی خظ غربت سے نیچے زندگی گزار رہی ہے اور ڈالر کے مقابلے میں شامی پاؤنڈ کی کم قدر کی وجہ سے مہنگائی آسمان کو چھو رہی ہے۔

بشارالاسد کی انتخابی مہم کا نعرہ ‘کام کے ذریعے امید’ تھا کہ ملک کو دوبارہ کھڑا کرنے کے لیے زبردست تعمیر نو کی ضرورت ہے اور اس کے لیے اربوں ڈالرز کی فنڈنگ درکار ہے۔

خیال رہے کہ بشار الاسد کے والد حافظ الاسد نے شام پر 30 برس تک حکمرانی کی تھی جن کی موت کے بعد بشارالاسد سال 2000 میں ایک ریفرنڈم کے نتیجے میں صدر منتخب ہوئے تھے۔

شام میں اقوامِ متحدہ کے سفیر کا کہنا تھا کہ انتخابات سلامتی کونسل کی قرار داد 2254 کے تحت درکار سیاسی منتقلی کے مطابق منعقد نہیں ہوئے۔

ان کا کہنا تھا کہ جس چیز کی ضرورت ہے وہ یہ کہ شام کے عوام کی سربراہی میں ان کا اپنا سیاسی حل ہو جس میں اقوامِ متحدہ سہولت کاری فراہم کرے اور بین الاقوامی سفارتکاری کی حمایت ہو۔

دوسری جانب باغیوں کے زیر قبضہ علاقے جہاں 30 لاکھ افراد رہائش پذیر ہیں، لوگوں نے انتخابات کے روز سڑکوں پر نکل کر احتجاج کیا۔

مسلمانوں، یہودیوں اور عیسائیوں کے ایک گروپ نے جرمن دارالحکومت میں بین المذاہب مکالمے کی علامت کے طور پر ایک عمارت کا سنگ بنیاد رکھا ہے جس میں تینوں مذاہب کے افراد عبادت کر سکیں گے۔

خبر رساں ایجنسی رائٹرز کے مطابق اس منصوبے کے بانی غزہ میں اسرائیل کے حملوں پر برلن میں ہونے والے مظاہروں اور ایک ایسے وقت میں جب سیاستدان جرمنی میں یہودی مخالف جذبات کے فروغ کا انتباہ دے رہے ہیں، اس طرح کا اقدام مذاکرات کے لیے امید کی کرن ہے۔

برلن کے میئر مائیکل مولر نے تقریب سے خطاب کرتے ہوئے کہا کہ یہ اہم ہے کہ جرمنی کے دارالحکومت میں ڈرامائی عالمی تنازعات پر بات کی جا سکے اور لوگوں کے پاس اپنے ممالک میں موجود مسائل کو اجاگر اور اپنی رائے کا اظہار کرنے کا ایک پلیٹ فارم موجود ہو گا۔

انہوں نے مزید کہا کہ نفرت اور تشدد، یہود دشمنی اور اسلامو فوبیا، نسل پرستی اور اشتعال انگیزی کی ہمارے معاشرے میں کوئی جگہ نہیں ہے۔

ایک بلند چکور ٹاور کی حامل اس عمارت میں عبادات کے لیے لگ کمرے اور ملاقات کے لیے مشترکہ جگہ شامل ہو گی۔

جرمنی میں یہودیوں اور مسلمانوں کی مرکزی کونسل کے سربراہوں نے اس منصوبے اور مذہبی تبادلے کا خیرمقدم کیا ہے۔

10 سال کی منصوبہ بندی کے بعد شروع ہونے والے تعمیراتی کام کو مکمل ہونے میں چار سال لگیں گے اور اس کی لاگت 4کروڑ 73 لاکھ یوروز لاگت آئے گی، جرمنی کی حکومت کروڑ یورو دے گی، برلن ایک کروڑ 21 لاکھ یورو عطیہ کرے گا جبکہ بقیہ رقم دیگر ممالک سے آنے والے عطیات سمیت دیگر ذرائع سے جمع کی جائے گی۔

یہ مرکز 13ویں صدی کے چرچ کی جگہ پر تعمیر کیا جائے گا جسے 1960 کی دہائی میں کمیونسٹ مشرقی جرمنی کی حکومت نے تباہ کردیا تھا۔

جرمنی میں پروٹسٹنٹ چرچ کے سربراہ ہینرک بیڈفورڈ اسٹروہم نے آر این ڈی میڈیا کو بتایا کہ ‘ہاؤس آف ون’ پروجیکٹ اس وقت ایک اہم پیغام دیتا ہے۔

انہوں نے مزید کہا کہ یہودی مخالف جذبات اور اسلامو فوبیا میں اضافہ ہورہا ہے جو لوگوں کو غلط سمت پر لے جاتے ہیں، وہ نفرت کو ہوا دیتے ہیں اور ممکنہ طور پر تشدد کا باعث بنتے ہیں۔

جینوا: اقوام متحدہ نے غزہ جنگ میں جنگی جرائم کی تحقیقات کے لیے اسرائیل کے خلاف پاکستان کی قرارداد منظور کرلی۔

جینوا میں اقوام متحدہ کی انسانی حقوق کونسل کا اجلاس ہوا جس میں غزہ کے علاقے میں اسرائیلی بمباری کے دوران انسانی حقوق کی خلاف ورزیوں اور جنگی جرائم سے متعلق عالمی تحقیقات کے لیے کمیشن قائم کرنے کی قرارداد کو منظور کرلیا گیا، قراداد میں کہا گیا ہے کہ مستقل آزادانہ تحقیقاتی کمیشن قائم کیا جائے گا جو 11 روز تک جاری رہنے والی اسرائیلی بمباری اور حماس کے میزائل حملوں کے دوران غزہ، مغربی کنارے، مقبوضہ بیت المقدس اور اسرائیل میں مبینہ انسانی حقوق کی خلاف ورزیوں کا جائزہ لیکر رپورٹ مرتب کرے گا۔

اقوام متحدہ کی انسانی حقوق کونسل کے اجلاس میں آزادانہ تحقیقاتی کمیشن کے قیام کی قرارداد اسلامی ممالک کی تنظیم (او آئی سی) کے توسط سے پاکستان کی جانب سے پیش کی گئی تھی جس کے حق میں 24 ووٹ دیے گئے اور مخالفت میں صرف 9 ووٹ آئے جب کہ بھارت سمیت دیگر 14 ممالک نے ووٹنگ میں حصہ نہیں لیا۔

دوسری جانب اسرائیلی نے روائیتی ہٹ دھرمی کا مظاہرہ کرتے ہوئے ایک بار پھر اقوام متحدہ کی قرارداد کو مسترد کرتے ہوئے تعاون نہ کرنے کا اعلان کیا ہے، اسرائیلی وزیراعظم نے اپنے بیان میں کہا کہ یہ شرمناک فیصلہ اقوام متحدہ انسانی حقوق کونسل کی اسرائیل مخالف اقدام کی ایک اور واضح مثال ہے۔

امریکا نے بھی اقوام متحدہ انسانی حقوق کونسل کی تحقیقاتی کمیشن سے متعلق قرارداد کی مخالفت کرتے ہوئے کہا ہے کہ اس اقدام سے خطے میں اب تک امن کے لیے کی جانے والی کوششوں کو خطرات لاحق ہوگئے ہیں۔

اسلام آباد: اقوام متحدہ کی جنرل اسمبلی کے صدر وولکن بوزکر کہنا ہےکہ فلسطین پر بے عملی اقوام متحدہ اور سکیورٹی کونسل کی ساکھ کو نقصان پہنچا رہی ہے۔

اسلام آباد میں نیشنل ڈیفنس یونیورسٹی میں خطاب کرتےہوئے اقوام متحدہ کی جنرل اسمبلی کے صدر وولکن بوزکر نے کہا کہ کورونا ویکسین امیر اور غریب ممالک کی یکساں ضرورت ہے، کورونا کے سدباب کے لیے پاکستان نے جو کیا اس پر خراج تحسین پیش کرتا ہوں، پاکستانی حکومت کے اقدامات کے حوصلہ افزا نتائج آرہے ہیں۔

لندن اور پیرس میں ہزاروں افراد فلسطین پر اسرائیلی جارحیت کیخلاف سڑکوں پر نکل آئے
اسرائیل کے قائم رہنےکا حق تسلیم کیے بغیر خطے میں امن نہیں آسکتا، امریکی صدر
فلسطین کا ذکر کرتے ہوئے انہوں نے کہا کہ اقوام متحدہ جنرل اسمبلی نے پچھلے ہفتے فلسطین کی صورتحال پر میٹنگ بلائی، اس میٹنگ کا مقصد تھاکہ سکیورٹی کونسل کی خاموشی اور ڈیڈلاک کا ازالہ کیا جاسکے، اس اہم معاملے پر بے عملی اقوام متحدہ اور سکیورٹی کونسل کی ساکھ کو نقصان پہنچا رہی ہے، امید ہے سکیورٹی کونسل میں بھی اس اہم اور ضروری مسئلے پر متفقہ آواز سنائی دے گی۔

وولکن بوزکر کا کہنا تھا کہ انسانی حقوق کی کھلی خلاف ورزی میں سیکڑوں فلسطینیوں کی جانیں چلی گئیں، پاکستانی وزیر خارجہ نے فلسطینیوں کےحقوق کے لیے مضبوط مؤقف اور حمایت کا اظہار کیا، اس وقت مذاکرات کی فوری ضرورت ہے تاکہ اسرائیلی قبضے کو ختم کیا جاسکے، دو خود مختار ریاستوں کا قیام عمل لانے کے لیے مذاکرات کی فوری ضرورت ہے، مشرق وسطیٰ میں امن کی بحالی تک یواین جنرل اسمبلی آرام سے نہیں بیٹھےگی۔

انہوں نے مزید کہا کہ مجھے جموں کشمیر کی صورتحال کا بھی بخوبی علم ہے، ادراک ہے ایک عام پاکستانی کشمیر کے حوالے سے کیا محسوس کرتا ہوگا، میں نے ہمیشہ فریقین پر زور دیاکہ زمینی حقائق کو تبدیل نہ کیا جائے، ہمیشہ کہا کہ متنازع علاقے کی حیثیت کو بدلنے سے گریز کیا جائے، تنازع کشمیر بھی اتنا ہی پرانا ہے جتنا کہ مسئلہ فلسطین ہے، بطور صدر جنرل اسمبلی میں انڈیا، پاکستان پر زور دیتا ہوں کہ اس مسئلےکے پر امن حل کے راستے پر چلیں کیونکہ جنوبی ایشیامیں امن و استحکام اور خوشحالی کا دار و مدار پاک بھارت تعلقات کی بحالی پر ہےاس لیے جنوبی ایشیا میں امن واستحکام کے لیےضروری ہے کہ تنازع کشمیر کاحل نکالیں۔

وزیر اعظم عمران خان نے مصر کے صدر عبدالفتح السیسی سے ٹیلی فونک گفتگو کی اور فلسطین کے مقبوضہ علاقوں سے اسرائیلی فورسز کی مکمل واپسی پر زور دیا۔

وزیر اعظم آفس سے جاری بیان کے مطابق ‘عمران خان نے بیت المقدس سمیت مقبوضہ فلسطینی علاقوں سے اسرائیلی افواج کی مکمل واپسی، فلسطینیوں کو ان کا حق خودارادیت دینے سمیت ان کو بنیادی حقوق کی فراہمی اور 1967 سے پہلے کی سرحدوں کے مطابق دو ریاستی حل کے طور پر ایک آزاد، فعال اور خودمختار فلسطینی ریاست کے قیام کی ضرورت پر زور دیا، جس کا دارالحکومت القدس الشریف ہو’۔

عمران خان نے فلسطین میں اسرائیل کی جارحیت بند کرانے کے لیے مصر اور اس کی قیادت کے اہم کردار کو سراہا۔

وزیر اعظم نے بے گناہ فلسطینیوں بالخصوص خواتین اور بچوں کے خلاف اسرائیلی جارحیت اور رمضان المبارک کے دوران مسجد اقصیٰ کی بے حرمتی کی شدید مذمت کرتے ہوئے مسئلہ فلسطین کے فوری اور منصفانہ حل کی اہمیت پر زور دیا۔

انہوں نے غزہ کی موجودہ صورتحال کو فلسطینیوں کے لیے کھلی جیل قرار دیا۔

عمران خان نے مسلم امہ کے درمیان یکجہتی، مسلمانوں اور بالخصوص غیر ملکی قبضے کے شکار مسلمانوں کے حقوق کے تحفظ کے لیے اسلامی تعاون تنظیم (او آئی سی) کے پلیٹ فارم کے ذریعے اجتماعی سوچ اختیار کرنے کی اہمیت پر زور دیا۔

فلسطینی عوام کی آواز اٹھانے کے لیے پاکستان کی حالیہ کوششوں کا ذکر کرتے ہوئے وزیر اعظم عمران خان نے مسئلہ فلسطین کے منصفانہ حل کے لیے پاکستان کی حمایت جاری رکھنے کے عزم کا اعادہ کیا۔

امریکا کی ریاست کیلیفورنیا میں ریلوے مرکز میں ملازم کی فائرنگ کے نتیجے میں 8 افراد ہلاک ہوگئے۔

فرانسیسی خبررساں ادارے ‘اے ایف پی’ کی رپورٹ کے مطابق پولیس نے بتایا کہ یہ واقعہ سان فرانسسکو کے جنوب میں واقع شہر سان ہوزے کے پبلک ٹرانزٹ مینٹیننس یارڈ میں پیش آیا۔

مذکورہ واقعے میں مشتبہ شخص بھی مارا گیا جبکہ دیگر کئی افراد زخمی بھی ہوئے۔

سانتا کلارا کاؤنٹی شیرف ڈپٹی رسل ڈیوس نے صحافیوں کو بتایا کہ کمپاؤنڈ میں دھماکا خیز آلات کی موجودگی کی اطلاعات کے بعد بم اسکواڈ تعینات کیا گیا تھا اور عمارت کے ہر کمرے اور جگہ کو کلیئر کرنے کی کوشش کی جارہی تھی۔

انہوں نے کہا کہ اب تک 8 متاثرین اور ایک مشتبہ شخص کو مردہ قرار دیا گیا ہے، انہوں نے مزید کہا کہ ہلاکتوں کی تعداد میں اضافہ ہوسکتا ہے۔

رسل ڈیوس نے مقامی ویلی ٹرانسپورٹیشن اتھارٹی کا حوالہ دیتے ہوئے بتایا کہ مشتبہ شخص وی ٹی اے کا ملازم ہے۔

رپورٹ کے مطابق علی الصبح 911 کے ذریعے فائرنگ کی متعدد اطلاعات کی تفتیش کے لیے پولیس جائے وقوع پر پہنچی۔

تاہم اس حوالے سے فوری طور پر کوئی تفصیلات نہیں مل سکیں کہ حملہ آور کو پولیس نے مارا یا اس نے خود اپنی جان لی یا اس نے کس قسم کا ہتھیار استعمال کیا تھا۔

وائٹ ہاؤس کی ڈپٹی پریس سیکریٹری کیرن جین نے صحافیوں سے کہا کہ ہم متاثرین اور ان کے اہلخانہ کے دکھ میں برابر کے شریک ہیں۔

انہوں نے کہا کہ ‘جیسا کہ صدر نے کہا ہے کہ یہ واضح ہے ہمیں ملک میں ہتھیاروں کے تشدد کی وبا کا سامنا ہے’۔

ڈپٹی پریس سیکریٹری نے کہا کہ کانگریس سے ہتھیاروں کے کنٹرول سے متعلق اصلاحات کے طویل المدتی مطالبے کو منظور کرنے کا کہا جارہا ہے۔

واقعے کے بعد سان ہوزے کے ریل یارڈ کے قریب گلیوں میں درجنوں گاڑیوں، فائر انجنز کے ساتھ ساتھ ایف بی آئی عہدیداران کی گاڑیوں کی قطاریں لگ گئی تھیں۔

مقامی عہدیداران کے مطابق فائرنگ کا واقعہ مقامی وقت کے مطابق صبح 7 بجے رپورٹ ہوا اور جائے وقوع پر اس وقت یونین اجلاس کے لیے عملے کے 80 افراد موجود تھے۔

میئر سان ہوزے نے کہا کہ کئی لوگوں کو طبی علاج فراہم کیا جارہا ہے۔

انہوں نے ٹوئٹ کی کہ اس ہولناک فائرنگ میں جن لوگوں کی جانیں گئیں ہم ان کے اہلخانہ کے دکھ میں شریک ہیں۔

واقعہ وی ٹی اے یارڈ میں پیش آیا جسے ٹرینیں اسٹور کرنے اور ان کی مرمت کے لیے استعمال کیا جاتا ہے۔

واضح رہے کہ امریکا میں حالیہ عرصے میں شوٹنگ کے متعدد واقعات رونما ہو چکے ہیں۔

اپریل میں امریکی ریاست انڈیانا کے شہر میں ایک مسلح شخص نے مشہور کوریئر کمپنی کے احاطے میں فائرنگ کی تھی جس میں 8 افراد ہلاک ہوئے تھے اور بعد میں حملہ آور نے خود کو بھی گولی مار کر خود کشی کر لی تھی۔

مارچ کے آخر میں جنوبی کیلی فورنیا میں ایک دفتر کی عمارت میں فائرنگ سے بچے سمیت چار افراد ہلاک ہوگئے تھے۔

22 مارچ کو کولوراڈو میں ایک سپر اسٹور میں فائرنگ کے نتیجے میں 10 افراد کی موت واقع ہو گئی تھی۔

کولوراڈو میں فائرنگ سے چند دن قبل ہی جارجیا میں 6 ایشیائی نژاد خواتین سمیت 8 افراد کا قتل کردیا گیا تھا۔

یہ رواں سال انڈیایا میں رونما ہونے والا فائرنگ کا تیسرا واقعہ تھا جہاں اس سے قبل جنوری میں ایک حاملہ خاتون سمیت 5 افراد ہلاک ہو گئے تھے جبکہ مارچ میں ایک بچے سمیت چار افراد کی موت ہوئی تھی۔

فرانسیسی صدر ایمینوئل میکرون نے روانڈا کے دورے کے موقع پر کہا ہے کہ فرانس 1994 میں روانڈا کی نسل کشی میں اپنی ‘ذمے داری’ کو تسلیم کرتا ہے اور ساتھ ہی اس تنازع میں اپنے ملک کے کردار کے لیے ذاتی حیثیت میں معافی مانگی۔

خبر رساں ایجنسی اے ایف پی کے مطابق جمعرات کو انہوں نے یہ بیان کیگالی نسل کشی کی یادگار پر ایک منعقدہ تقریر کے دوران دیا، جہاں اجتماعی قتل عام کے دوران ڈھائی لاکھ افراد کو دفن کیا گیا تھا۔

اپریل 1994 میں شروع ہونے والی 100 روزہ خونریزی کے دوران ہوٹو ملیشیا کے ذریعے تقریبا 8 لاکھ نسلی توتسی اور اعتدال پسند ہوتس مارے دیے گئے تھے، نسل کشی جولائی 1994 میں اس وقت ختم ہوئی جب موجودہ صدر کاگامے کی زیر سربراہی روانڈن پیٹریاٹک فرنٹ (آر پی ایف) یوگنڈا سے ملک میں داخل ہوئے اور ملک کا کنٹرول اپنے ہاتھ میں لے لیا۔

میکرون نے کہا کہ فرانس نے ان لوگوں کی بات نہیں مانی جنہوں نے روانڈا میں ہونے والے قتل عام کے بارے میں خبردار کیا تھا اور اس نسل کشی کے دوران غیرجانبدار رویہ رکھا جو شاید قانوناً درست نہ تھا۔

انہوں نے کہا کہ آج آپ کے ساتھ عاجزی اور احترام کے ساتھ کھڑے ہو کر میں اپنی ذمہ داریوں کو تسلیم کرنے آیا ہوں تاہم انہوں نے واضح کیا کہ اس نسل کشی میں فرانس کا کوئی کردار نہیں تھا۔

میکرون نے کہا کہ فرانس کا فرض ہے کہ وہ سچائی جاننے کے بعد اختیار کی گئی مجرمانہ خاموشی کے دوران اس کی وجہ سے روانڈا کے عوام پر گزرنے والی مشکلات کو تسلیم کرے۔

انہوں نے مزید کہا کہ صرف وہی لوگ جو معاف کر سکتے ہیں جو خوفناک دہشت سے بچ گئے تھے اور معافی بطور تحفہ دینے کی درخواست کی۔

اس موقع پر صدر کاگامے نے فرانسیسی صدر کی تقریر کو سراہتے ہوئے کہا کہ ان کے الفاظ معافی سے کہیں زیادہ قیمتی اور سچائی پر مبنی ہیں۔

گوکہ میکرون نے اپنے پیشرو سے زیادہ عاجزانہ رویہ اختیار کیا لیکن روانڈا میں بہت سے لوگوں کو اس تقریر کے دوران سرکاری معافی کی امید تھی۔

ملک میں نسل کشی سے بچنے والے اہم گروہ ایبوکا نے کہا کہ ہمیں اس تقریر سے مایوسی ہوئی ہے، انہوں نے واضح معافی نہیں مانگی۔

ایسوسی ایشن کے صدر ایگڈے نینکنگا نے کہا کہ میکرون نے معافی دینے کی درخواست نہیں کی بلکہ واقعتاً نسل کشی کی وضاحت کرنے کی کوشش کی کہ یہ سب کیسے ہوا، انہوں نے کیا نہیں کیا، ان کی ذمہ داریاں کیا تھیں، اس سے ظاہر ہوتا ہے کہ وہ ہمیں سمجھتے ہیں۔

میکرون کا یہ دورہ مارچ میں ایک فرانسیسی انکوائری پینل کی اس رپورٹ کے اجرا کے بعد ہوا ہے جس میں کہا گیا ہے کہ نوآبادیاتی رویے نے فرانسیسی عہدے داروں کو اندھا کردیا ہے اور حکومت نے اس قتلِ عام کی پیش گوئی نہ کرنے کی سنجیدہ اور بھاری ذمہ داری قبول کی ہے تاہم اس رپورٹ میں فرانس نے ان ہلاکتوں میں براہ راست ملوث ہونے سے انکار کردیا۔

صدر کاگامے نے کہا کہ روانڈا کے عوام شاید فرانس کے اپنے کردار کو کبھی بھلا نہ سکیں لیکن وہ معاف کر سکتے ہیں۔

میکرون نے اپریل میں سابق صدر فرینکوئس مٹیرینڈ کی روانڈا کے حوالے سے دستاویزات کھولنے پر اتفاق کیا ہے، مٹیرینڈ نسل کشی کے دوران انچارج تھے، اس کے فوراً بعد ہی روانڈا نے اپنی ایک رپورٹ جاری کی تھی جس میں بتایا گیا کہ فرانس کو معلوم تھا کہ نسل کشی کی تیاری کی جارہی ہے اور اسے فعال کرنے کی ذمہ داری قبول کی تھی اور اس نے روانڈا کے اس وقت کے صدر جووینل ہبیریمانا کی حمایت جاری رکھی۔

اس رپورٹ میں کہا گیا کہ فرانسیسی عہدیداروں نے روانڈا کی حکومت کو مسلح کیا، مشورے دیے، تربیت کی، اسلحے سے لیس کیا اور تحفظ فراہم کیا، اس کے بعد فرانس نے کئی سالوں تک اپنے کردار کو چھپانے کی کوشش کی۔

یاد رہے کہ 6 اپریل 1994 کو روانڈ کے اس وقت کے صدر جوینال ہابیاری مانا (ہوتو قبیلے سے تعلق رکھتے تھے) کولے جانا والا جہاز فائرنگ کے نتیجے میں گر کر تباہ ہوا جس کے نتیجے میں جہاز میں سوار تمام افراد ہلاک ہوگئے تھے۔

ہوتو انتہاپسندوں نے توتسی مخالف گروہ روانڈن پیٹریوٹک فرنٹ (آر پی ایف) پر حملے کا الزام عائد کیا تھا تاہم انہوں نے مسترد کردیا تھا۔

7 اپریل 1994 کو ہوتو قبیلے کی جانب سے توتسی افراد کی نسل کشی کا آغاز ہوا جو 100 دن تک جاری رہی اس میں 8 لاکھ سے زائد افراد ہلاک ہوئے تھے۔

4 جولائی کو توتسی قبیلے کی جماعت آر پی ایف کے سپاہیوں نے دارالحکومت کگالی پر قبضہ کرکے 100 دن بعد اس نسل کشی کا خاتمہ کیا تھا۔

سعودی عرب کی فلکیاتی سوسائٹی کے مطابق آج (27 مئی) بروز جمعرات کو سورج خانہ کعبہ کے عین اوپر نظر آیا جسے دیکھ کر دور دراز علاقوں میں رہنے والے افراد قبلے کی درست سمت کا تعین کرسکتے ہیں۔

العربیہ اردو کی رپورٹ کے مطابق سورج رواں سال میں پہلی مرتبہ خانہ کعبہ کے اوپر آیا ہے۔

فلکیاتی سوسائٹی کے مطابق سورج 27 مئی کو سعودی عرب کے مقامی وقت کے مطابق دوپہر 12 بج کر 18 منٹ پر خانہ کعبہ کے اوپر آیا۔

رپورٹ کے مطابق فلکیاتی انجمن کے سربراہ ڈاکٹر ماجد ابو زہرہ نے کہا کہ خانہ کعبہ کے اوپر سورج نظر آنے کا واقعہ اس لیے پیش آتا ہے کیونکہ خانہ کعبہ خط استوا اور مدار السرطان کے درمیان واقع ہے۔

انہوں نے کہا کہ گردش کے دوران مئی کے مہینے میں سورج خط استوا سے مدار السرطان کی طرف منتقل ہوتا ہے اور گردش کرتے ہوئے سورج خانہ کعبہ کے اوپر آ جاتا ہے۔

ماجد ابو زہرہ نے بتایا کہ سورج جس وقت خانہ کعبہ کے اوپر نظر آتا ہے اس وقت وہ انتہائی بلندی پر تقریباً 90 ڈگری پر ہوتا ہے۔

انہوں نے کہا کہ یہ وہ لمحہ ہوتا ہے کہ جس وقت خانہ کعبہ کا سایہ ختم ہوجاتا ہے۔

فلکیاتی سوسائٹی کے سربراہ نے کہا کہ سورج خانہ کعبہ کے اوپر آنے کے دوران عرب ممالک قطب شمالی کے پڑوسی علاقوں افریقہ، یورپ، چین، روس اور مشرقی ایشیا کے لوگ قبلے کی سمت کا تعین کرسکتے ہیں۔

ابو زہرہ نے مزید بتایا کہ قدیم زمانے کے لوگ اسی طریقے سے قبلے کے رخ کا تعین کیا کرتے تھے اور نتیجے کے اعتبار سے یہ طریقہ کار جدید ترین ٹیکنالوجی سے کسی درجے کم نہیں۔

خیال رہے کہ سال 2020 میں 5 مرتبہ چاند، خانہ کعبہ کے اوپر آیا تھا، ​اس سے قبل خانہ کعبہ کے عین اوپر چاند دکھائی دینے کا منظر 2018 میں بھی دیکھا گیا تھا اور اسی سال 12 رمضان کو سورج بھی کعبہ شریف کے اوپر دکھائی دیا تھا۔

امریکا کے محکمہ دفاع نے کہا ہے کہ وہ پاکستان اور خطے میں موجود دیگر ممالک سے ان کی سرزمین پر فوجی اڈے بنانے کے امکانات سمیت مختلف آپشنز پر بات چیت کررہے ہیں لیکن وہ مذاکرات بے نتیجہ رہے۔

کانگریس میں ہونے والی حالیہ سماعت میں امریکی سیکریٹری ہند ۔ بحر الکاہل امور کے لیے اسسٹنٹ سیکریٹری برائے دفاع ڈیوڈ ایف ہیلوے نے سینیٹ کی آرمڈ سروسز کمیٹی کو بتایا تھا کہ ‘پاکستان نے افغانستان میں ہماری فوجی موجودگی برقرار رکھنے کے لیے اپنی فضائی حدود استعمال کرنے کی اجازت اور زمینی رسائی دی’۔

جس کے بعد ترجمان دفتر خارجہ زاہد حفیظ چوہدری نے اسلام آباد میں صحافیوں کو بتایا تھا کہ پاکستان نے امریکی فوج یا فضائیہ کو کوئی اڈہ نہیں دیا اور نہ ہی ایسی کوئی تجویز زیر غور ہے۔

انہوں نے کہا تھا کہ اس حوالے سے جاری قیاس آرائیاں بے بنیاد اور غیر ذمے دارانہ ہیں اور ان سے گریز کیا جانا چاہیے۔

جمعہ (21 مئی) کو ہونے والی سینیٹ کی سماعت جس میں ڈیوڈ ایف ہیلوی نے افغانستان کے لیے فضائی حدود تک رسائی کا دعویٰ کیا تھا کہ اس کے بعد ہفتے کے پہلے کاروباری روز یعنی پیر (24 مئی) کو پینٹاگون کی نیوز بریفنگ میں بھی یہی معاملہ دوبارہ اٹھایا گیا۔

نیوز بریفنگ کے دوران ایک صحافی نے پوچھا کہ ‘افغانستان سے مکمل انخلا کے بعد جو کچھ ہوگا اس حوالے سے کیا امریکا، پاکستان سے اس وقت کچھ چاہ رہا ہے؟ انخلا کے بعد خطے میں دہشت گردی کے خلاف آپریشنز جاری رکھنے کے لیے ممکنہ بیسنگ معاہدوں کے حوالے سے کوئی اپ ڈیٹ ہے؟’

اس سوال کا جواب دیتے ہوئے پینٹاگون کے پریس سیکریٹری جان کربی نے کہا کہ ‘ہمارے انخلا کے بعد بیرون ملک اڈوں کے امکان کے حوالے سے میرے پاس کوئی خاص اپ ڈیٹ نہیں ہے’۔

انہوں نے کہا کہ ‘ یہ سفارتی بات چیت ہے جو جاری ہے اور واضح طور پر مکمل نہیں ہوئی’۔

پریس سیکریٹری کا کہنا تھا کہ دہشت گردی کے خاتمے کی صلاحیت کے لیے ہم قابل اعتبار اور قابل عمل آپشنز اور مواقع تلاش کررہے ہیں اور ایسے بہت سے طریقے ہیں جن سے ایسا ہوسکتا ہے، اوورسیز بیسنگ ان میں سے صرف ایک آپشن ہے، لہذا اس حوالے سے ابھی کوئی رپورٹ موجود نہیں ہے۔

پریس سیکریٹری جان کربی نے عندیہ دیا کہ افغانستان تک رسائی کے لیے امریکا، خطے کے دیگر ممالک سے بھی مشاورت کر رہا ہے۔

انہوں نے کہا کہ میں کسی بھی ملک کے حوالے سے زیادہ تفصیل سے بات نہیں کروں گا۔

اس سے قبل ابتدائی بیان میں جان کربی نے کہا تھا کہ امریکی وزیر دفاع لائیڈ آسٹن نے 24 مئی کو چیف آف آرمی اسٹاف جنرل قمر جاوید باجوہ کو مشترکہ علاقائی مفادات اور مقاصد پر تبادلہ خیال کرنے کے لیے فون پر بات چیت کی تھی۔

انہوں نے مزید کہا تھا کہ گفتگو کے دوران امریکی سیکریٹری دفاع نے افغان امن مذاکرات میں حمایت پر پاکستان کی کوششوں کو سراہا اور پاک-امریکا دو طرفہ تعلقات برقرار رکھنے کی خواہش کا اظہار کیا۔

ایک سوال کے جواب میں ان کا کہنا تھا کہ آرمی چیف جنرل قمر جاوید باجوہ سے بات چیت بہت مفید رہی ہے اور اس میں دونوں ممالک کے مابین تعلقات کو آگے بڑھانے کے لیے دو طرفہ مواقع پر بات چیت کی گئی تھی۔