Category انٹرنیشنل

ترکی (میڈیا 92نیوز) آج ہونے والے ووٹنگ کے دوران 5 کروڑ سے زائد افراد اپنا حق رائے دہی استعمال کریں گے۔ انقرہ: ترکی میں صدارتی اور پارلیمانی انتخابات کے لیے ووٹنگ کا وقت شروع ہوگیا۔
ترکی کے مقامی وقت کے مطابق پولنگ صبح 8 بجے شروع ہوئی جو شام 5 بجے تک بلاتعطل جاری رہے گی اور پاکستان وقت کے مطابق شام 7 بجے تک ووٹنگ کا عمل جاری رہے گا۔مجموعی طور پر 6 کروڑ رجسٹرڈ ووٹرز اپنا حق رائے دہی استعمال کریں گے جس میں 5 کروڑ 60 لاکھ مقامی شہری اور تقریباً ساڑھے 30 لاکھ بیرون ملک مقیم شہری پہلے ہی اپنا حق رائے دہی استعمال کرچکے ہیں۔ ترکی کی تاریخ میں پہلی مرتبہ صدارتی اور پارلیمانی انتخابات ایک ساتھ ہورہے ہیں جس کے لیے عوام امیدواروں کا چناو¿ کر رہے ہیں۔صدارتی انتخاب کے لیے رجب طیب اردوان سمیت 6 امیدوار میدان میں ہیں جن میں محرم اِنجے، میرل ایکسینر، سلاحیتن دیمارتس، تیمل، دوگو پرینسک شامل ہیں۔ رجب طیب اردوان کی جیت کے واضح امکانات ہیں جب کہ حزب اختلاف کے رہنما محرم اِنجے انھیں مشکل میں ڈال سکتے ہیں۔2016 کی ناکام فوجی بغاوت اور صدارتی اختیارات میں اضافے کی ترامیم کے بعد الیکشن کی اہمیت مزید بڑھ گئی ہے تاہم فوج اور اعلیٰ عدلیہ میں تقرریوں سمیت اہم اختیارات نئے صدر کو ترکی کا مضبوط ترین سربراہ بنا دیں گی۔ صدارتی انتخابات میں کسی امیدوار کا 50 فیصد سے زائد ووٹ لینا ضروری ہے اگر کوئی ایک امیدوار یہ ہدف حاصل نہ کر سکا تو پھر زیادہ ووٹ حاصل کرنے والے دو امیدواروں میں ایک بار پھر 8 جولائی کو مقابلہ ہوگا۔

ریاض(میڈیا 92نیوز) سعودی خواتین کے لیے بڑی خبر سعودی عرب میں رات 12 بجتے ہی خواتین کی ڈرائیونگ پرعائد پابندی ختم ہوگئی۔سعودی عرب میں کل رات 12 بجے 28 سال بعد خواتین کے ڈرائیونگ کرنے پرعائد پابندی ختم ہوگئی جس کے بعد سعودی خواتین کو طویل انتظار کے بعد تنہا گاڑی چلانے کی اجازت مل گئی۔ پابندی ختم ہوتے ہی سعودی عرب کے دارالحکومت ریاض اور دیگر شہروں میں بہت سی خواتین گاڑی لے کر سڑکوں پر نکل آئیں جب کہ کچھ خواتین نے دوران ڈرائیونگ عربی میوزک بھی سنا۔سعودی عرب کے ارب پتی شہزادے الولید بن طلال کا سعودی خواتین کی ڈرائیونگ پرعائد پابندی کے خاتمے پر کہنا ہے ”یہ ایک عظیم کامیابی ہے“انہوں نے مزید کہا ان کی بیٹی ریم طلال نے بھی اپنی بچیوں کو پچھلی سیٹ پر بٹھاکر گاڑی چلائی۔ جب کہ اس دوران وہ خود بھی گاڑی میں موجود تھےانہوں نے کہا اب خواتین کو ان کی آزادی مل گئی ہے۔ گاڑی چلانے پر انہوں نے اپنی بیٹی کی تالیاں بجاکر شاندار انداز میں حوصلہ افزائی کی۔ یاد رہے ریم طلال پہلی سعودی شہزادی ہیں جنہوں نے کارچلائی۔

واشنگٹن (ایمرا نیوز)سوشل میڈیا پر مہاجر بچوں کو سرحد پر قتل کرنے کے الفاظ استعمال کئے جانے پرامریکی خاتون کو نوکری سے معطل کرکے رخصت پر بھیج دیا گیا ہے۔اوریگن ڈپارٹمنٹ آف ٹراسپورٹیشن (او ڈوٹ)کی ملازمہ لوری میک ایلن نامی خاتون نے سماجی رابطے کی ویب سائٹ فیس بک پر لکھا تھا کہ میرا ذاتی خیال ہے کہ انہیں ان تمام کو سرحد پر ہی گولی مار دینی چاہئے اور اس عمل کو اچھا کہنا چاہیے، اس سے ہم محنتی امریکیوں کے ٹیکسوں میں کروڑوں ڈالرز بچیں گے۔میک ایلن کے غیر انسانی اظہار خیال پر فوری ردعمل سامنے آیا اور ہزاروں افراد نے خاتون کو شدید تنقید کا نشانہ بنایا ، سیکڑوں ناراض افراد نے خاتون کے خلاف اس کے ادارے سے رابطہ کرکے اسے نوکری سے نکالنے کا مطالبہ کیا۔میک ایلن تنقید برداشت نہ کرسکی اور اپنے تمام سماجی رابطے کے اکاونٹس بند کردئیے۔بعد ازاں اوڈوٹ نے اعلان کیا کہ ایجنسی اس معاملے کی تحقیقات کر رہی ہے اور خاتون ملازمہ کو مزید نوٹس تک کیلئے معطل کردیا گیا ہے۔

واشنگٹن: (ایمرا نیوز)اسٹیل اور المونیم مصنوعات کے بعد امریکی صدر نے یورپی کاروں پر 20 فیصد اضافی ٹیکس عائد کرنے کی دھمکی دے دی۔امریکی صدر ڈونلڈ ٹرمپ نے یورپی یونین میں تیار ہونے والی گاڑیوں کی امریکا درآمد پر 20فیصد اضافی ٹیرف عائد کرنے سے خبردار کیا ہے۔صدر ٹرمپ کا کہنا ہے کہ یہ کاریں امریکا میں بھی بنائی جاسکتی ہیں۔ امریکی اضافی ٹیرف کے جواب میں کینیڈا، یورپی یونین، ترکی اور میکسیکو امریکی مصنوعات پر اضافی ٹیرف عائد کر چکی ہیں یا کرنے کا اعلان کرچکی ہیں۔

واشنگٹن(ایمرا نیوز) امریکی محکمہ خارجہ کے ترجمان کا کہنا ہے کہ پاکستانی دفتر خارجہ نے امریکی جیل میں قید عافیہ صدیقی سے مبینہ بدسلوکی سے متعلق رابطہ کیا ہے۔واشنگٹن سے جاری ایک بیان میں ترجمان محکمہ خارجہ نے کہا کہ ڈاکٹر عافیہ صدیقی سے بدسلوکی کے الزامات سے متعلق پاکستان کا سرکاری پیغام ملا ہے۔ترجمان کا کہنا تھا کہ سزا یافتہ مجرموں کے ساتھ امریکا میں عالمی انسانی حقوق کی پاسداری کی جاتی ہے اور تمام قیدیوں سے امریکی آئین اور قانون کے مطابق برتا ﺅکیا جاتا ہے۔دو روز قبل دفتر خارجہ کے ترجمان ڈاکٹر محمد فیصل نے ہفتہ وار بریفنگ کے دوران کہا تھا کہ ٹیکساس جیل میں قید عافیہ صدیقی کے ساتھ مبینہ بدسلوکی کی رپورٹس کا معاملہ متعلقہ حکام کے ساتھ اٹھاتے ہوئے ان سے تحقیقات کا مطالبہ کیا گیا ہے۔واضح رہے کہ گزشتہ ماہ سوشل میڈیا پر امریکی جیل میں قید ڈاکٹر عافیہ صدیقی کی موت سے متعلق خبریں بھی گردش کر رہی تھیں، تاہم ٹیکساس میں تعینات پاکستانی قونصل جنرل عائشہ فاروقی کی ڈاکٹر عافیہ صدیقی سے جیل میں ملاقات کے بعد یہ افواہیں دم توڑ گئیں تھیں۔پاکستان خاتون ڈاکٹر عافیہ صدیقی ایک سائنسدان ہیں، جن پر افغانستان میں امریکی فوجیوں پر حملے کا الزام ہے۔مارچ 2003 میں دہشت گرد تنظیم القاعدہ کے اہم کمانڈر اور نائن الیون حملوں کے مبینہ ماسٹر مائنڈ خالد شیخ محمد کی گرفتاری کے بعد ڈاکٹر عافیہ صدیقی اپنے تین بچوں کے ہمراہ کراچی سے لاپتہ ہوگئی تھیں۔عافیہ صدیقی کی گمشدگی کے معاملے میں نیا موڑ اس وقت آیا، جب امریکا نے 5 سال بعد یعنی 2008 میں انہیں افغان صوبے غزنی سے گرفتار کرنے کا دعوی کیا۔عدالتی دستاویزات میں دعوی کیا گیا تھا کہ عافیہ صدیقی کے پاس سے 2 کلو سوڈیم سائینائیڈ، کیمیائی ہتھیاروں کی دستاویزات اور دیگر چیزیں برآمد ہوئی تھیں، جن سے پتہ چلتا تھا کہ وہ امریکی فوجیوں پر حملوں کی منصوبہ بندی کررہی تھیں۔دوسری جانب جب عافیہ صدیقی سے امریکی فوجی اور ایف بی آئی افسران نے پوچھ گچھ کی تو انہوں نے مبینہ طور پر ایک رائفل اٹھا کر ان پر فائرنگ کر دی لیکن جوابی فائرنگ میں وہ زخمی ہوگئیں۔بعدازاں عافیہ صدیقی کو امریکا منتقل کر دیا گیا، ان پر مقدمہ چلا اور 2010 میں ان پر اقدام قتل کی فرد جرم عائد کرنے کے بعد 86 برس قید کی سزا سنا دی گئی۔

سرینگر (ایمرا نیوز) مقبوضہ کشمیر میں بھارتی فوجیوں نے جمعہ کے روز ظالمانہ کارروائیوں کے دوران ضلع اسلام آباد میں پانچ افراد کو شہید جبکہ خاتون سمیت درجنوں افراد کوزخمی کر دیا۔کشمیر میڈیاسروس کے مطابق قابض فوجیوں نے ضلع اسلام آباد کے علاقے سری گفوارہ میں محاصرے اور تلاشی کی کارروائی کے دوران ایک گھر پر اندھا دھند فائرنگ کر دی جسکے نتیجے میں 4 نوجوان داؤ داحمد صوفی، ماجد منظور ڈار، محمد اشرف ایتو اور عادل رحمان بٹ شہید جبکہ مکان کو تباہ کر دیا۔حملے گھرکا مالک محمد یوسف راتھر بھی شہید ہوئے جبکہ انکی اہلیہ حفیظہ بیگم شدید زخمی ہو گئیں۔ قبل ازیں اسی علاقے میں ایک حملے میں بھارتی پولیس کا ایک اہلکار ہلاک جبکہ دو فوجی زخمی ہو گئے تھے۔دریں اثنا بھارتی فوج کے آپریشن اور شہریوں کے قتل کی خبر پھیلتے ہی سری گفوارہ میں زبردست احتجاجی مظاہرے پھوٹ پڑے ۔ بھارتی فورسز کے اہلکاروں نے مظاہرین کو منتشر کرنے کیلئے پیلٹ اور آنسو گیس کے گولوں کا بے دریغ استعمال کیا ۔ فورسز اہلکاروں اور مظاہرین کے درمیان شدید جھڑپیں ہوئیں جس دوران درجنوں افراد زخمی ہو

گئے۔ قابض انتظامیہ نے لوگوں کو تازہ ترین صورتحال کے بارے میں ایک دوسرے کو معلومات کی فراہمی سے روکنے کیلئے اسلام آباد، پلوامہ اور سرینگر کے اضلاع میں موبائل فون اور انٹرنیٹ سروسز معطل کر دیں۔نوجوانوں کے قتل کے خلاف پلوامہ قبضے میں بھی زبردست مظاہرے کیے گئے ۔ بھارتی فورسز کے اہلکاروں نے مظاہرین کو منتشر کرنے کیلئے پیلٹ چلائے اور آنسو گیس کے گولے داغے۔ نوجوانوں کے قتل کیخلاف پلوامہ قصبے میں مکمل ہڑتال بھی کی گئی اور دکانیں، کاروباری مراکز اور تعلیمی ادارے بند رہے جبکہ سڑکوں پر ٹریفک معطل تھی۔نوجوانوں کی شہادت پر سرینگر کے علاقوں حیدر پورہ، مائسمہ، نوا کدل، شالہ ٹینگ، زینہ کوٹ اور نوہٹہ میں نماز جمعہ کے فوراً بعد زبردست مظاہرے کیے گئے ۔ شہید ہونے والے ایک نوجوان داؤد احمد صوفی کا تعلق سرینگر کے علاقے زینہ کوٹ سے تھاجہاں بڑی تعداد میں لوگوں نے شہید کے گھر کے باہر جمع ہو گئے اور آزادی کے حق میں اور بھارت کے خلاف فلک شگاف نعرے لگائے۔ آخری اطلاعات تک احتجاجی نوجوانوں اور علاقے میں تعینات بھارتی فورسز کے اہلکاروں کے درمیان جھڑپوں کا سلسلہ جاری تھا۔

دُبئی(میڈیا 92نیوز) ایک پاکستانی خاتون کو نوکری دینے کے بہانے جاب انٹرویو کے لیے دفتر میں بُلا کر زبردستی چُومنے اور گلے لگانے والا جنسی بھیڑیا پولیس کے ہاتھوں گرفتار ہو کر عدالت کے کٹہرے میں کھڑاہو گیا۔ تفصیلات کے مطابق خاتون متحدہ عرب امارات میں نوکری کی تلاش میں تھی اس مقصدکے لیے اُس نے کئی کمپنیوں میں آن لائن درخواست بھی بھیجی تھی۔اسی دوران ایک 43 سالہ پاکستانی بزنس مین کی جانب سے اُسے مئی 2018ء میں انٹرویو کے لیے کال آئی۔ وہ اپنی منگیتر کے ساتھ ملزم کی کمپنی میں اور اُس سے ملاقات کی۔ ملزمہ کا ویزہ ختم ہونے کے قریب تھا جس کے باعث اُسے دُبئی چھوڑ کر نیا ویزہ لے کر دوبارہ سے آنا تھا۔ جس وجہ سے خاتون متحدہ عرب امارت سے وطن واپس آ گئی۔ اس دوران ملزم نے اُسے جاب انٹرویو کے لیے متحدہ عرب امارات بُلوایا۔انٹرویو کی غرض سے وہ جیسے ہی ملزم کے دفتر میں داخل ہوئی‘ اُس نے اُسے زبردستی گلے لگا کر کئی بار چُوما۔ ہم وطن پاکستانی بزنس مین کے اس ہوس بھرے طرز عمل سے خاتون خوفزدہ ہو گئی‘ اُس نے ملزم کو پرے دھکیلا اور دوڑ کر واش رُوم میں گھُس کر اندر سے دروازہ بند کر لیا اور دُبئی میں موجود اپنے منگیتر کو کال کی۔ خاتون کا منگیتر اس گھٹیا حرکت کے بارے میں سُن کر فوراً کمپنی پہنچا اور اُس نے خاتون کو واش رُوم سے باہر نکلا۔خاتون نے اس واقعے کی اطلاع فوری طور پر پولیس کو دی جس نے پاکستانی بزنس مین کو گرفتار کر لیا۔ استغاثہ کی جانب سے ملزم پر اپنی ہم وطن خاتون کو جنسی زیادتی کا نشانہ بنانے کی کوشش کا الزام عائد کیا گیا ہے۔ جبکہ ملزم نے اپنے خلاف عائد کئے گئے الزامات کی حقیقت کو تسلیم کرنے سے انکار کر دیا ہے۔ عدالت میں ملزم کے ایک رشتہ دار نے ججز کو بیان دیا کہ مُدعیہ نے ملزم کو بلیک میل کر کے اُس سے کہا کہ اگر ملزم اُسے پچاس ہزار اماراتی درہم اور دو عدد موبائل فون دے دے تو پھر وہ اُس کے خلاف کیس واپس لے لے گی۔اس بات پر مُدعیہ کا کہنا تھا کہ اُس نے کیس ختم کرانے کے بدلے ملزم سے کسی قسم کی رقم یا چیک کا مطالبہ نہیں کیا۔ مقدمے کا فیصلہ اگلے ہفتے متوقع ہے۔

ٹیکساس(میڈیا 92نیوز) امریکی صدر ڈونلڈ ٹرمپ کی اہلیہ میلانیا ٹرمپ نے امریکا میں غیر قانونی تارکین وطن سے علیحدہ کیے گئے بچوں سے ملاقات کی اس دوران زیب تن کیے جیکٹ نے سوشل میڈیا پر نئی بحث چھیڑ دی۔بین الاقوامی خبر رساں ادارے کے مطابق امریکی صدر ڈونلڈ ٹرمپ کی اہلیہ میلانیا ٹرمپ نے اچانک غیر قانونی طور پر امریکا میں مقیم والدین سے علیحدہ کیے گئے بچوں سے کیمپ میں جا کر ملاقات کی انہوں نے کچھ وقت بچوں کے ساتھ گزارا۔ ان کیمپوں میں تقریباً 2،300 بچے موجود ہیں۔ ان بچوں کا زیادہ تر تعلق وسطی اور جنوبی امریکی ممالک سے ہیں جن کے والدین اپنے ممالک سے غیر قانونی طور پر امریکا میں داخل ہوئے تھے۔امریکی صدر ڈونلڈ ٹرمپ نے میکسیکو سے امریکا داخل ہونے والے تارکین وطن کے حوالے سے قوانین سخت کر دیئے تھے جس کے تحت غیر قانونی تارکین وطن کو ان کے شیر خوار بچوں تک سے علیحدہ کردیا گیا تھا۔ تاہم میلانیا ٹرمپ نے سب سے پہلے اس غیر انسانی رویئے کی مذمت کرتے ہوئے بچوں کی اپنے والدین سے علیحدگی کو نہایت افسوسناک صورت حال قرار دیا تھا۔معصوم بچوں کی اپنے والدین سے علیحدگی کی دلخراش وڈیوز اور تصاویر پر سوشل میڈیا میں یہ معاملہ زور پکڑ گیا جس پر امریکی صدر نے بچوں کی علیحدگی کے معاملے پر کانگریس کو قانون سازی کا کہا جس کے بعد ڈونلڈ ٹرمپ نے گزشتہ روز تارکین وطن کو ان کے بچوں کے ساتھ رکھنے سے متعلق ایگزیکٹیو آرڈر پر دستخط کردیئے۔ اس صدارتی حکم کے نفاذ کے بعد تارکین وطن والدین کو ان کے بچوں کے ہمراہ رکھا جائے گا۔میلانیا کے لباس پر تحریر الفاظ کیا خفیہ پیغام ہیں؟ میلانیا ٹرمپ اپنے ملبوسات اور بالوں کے اسٹائل کے باعث عمومی طور پر میڈیا میں مقبولیت حاصل کرتی رہتی ہیں۔ تارکین وطن کے کیمپ کے دورے پر بھی سابق ماڈل نے مشہور فیشن ڈیزائنر ’زارا‘ کی تیار کردہ سبز رنگ کی جیکٹ زیب تن کر رکھی تھی جس کی پشت پرI REALLY DON’T CARE, DO ’یعنی‘مجھے کسی کی پروا نہیں،کیا آپ کو ہے؟’تحریر تھا۔میلانیا ٹرمپ کی جیکٹ نے سوشل میڈیا پر نئی بحث چھیڑ دی۔ عمومی طور پر لوگوں کا خیال تھا کہ یہ ایک پیغام تھا جو کہ میلانیا کے بارے میں پھیلائے جانے والی افواہوں کا جواب تھا۔ کچھ کا کہنا تھا کہ یہ خاص تارکین وطن سے متعلق میلانیا کی رائے پر تنقید کرنے والوں کے لیے ایک اظہار تھا تاہم میلانیا کے ترجمان نے ان باتوں کی تردید کرتے ہوئے کہا کہ جیکٹ پر درج الفاظ کے پیچھے کوئی خفیہ پیغام نہیں ہے۔ میڈیا کو جیکٹ کے بجائے دورے کے مندرجات پر توجہ مرکوز رکھنی چاہیئے۔

رانچی(میڈیا 92نیوز) بھارت میں انسانی اسمگلنگ کے خلاف کام کرنے والے این جی او کی پانچ خواتین کو ’اسٹریٹ تھیٹر‘ کرتے ہوئے نامعلوم مسلح افراد نے اغوا کر کے زیادتی کا نشانہ بنا ڈالا۔ بھارت کی ریاست جھاڑکھنڈ کے ضلع کُھنٹی میں موٹر سائیکل سوار مسلح افراد نے اسلحے کے زور پر فلاحی تنظیم آشا کرن کے لیے کام کرنے والی پانچ خواتین کو اِغوا کرکے اجتماعی زیادتی کا نشانہ بناڈالا۔ خواتین کو اس وقت اغواء کیا گیا جب وہ ایک مصروف علاقے میں انسانی اسمگلنگ کے خلاف عوام میں شعور اجاگر کرنے کے لیے اسٹریٹ تھیٹر کر رہی تھیں۔مقامی پولیس افسر راجیش پرشاد کا کہنا تھا کہ خواتین سے زیادتی کا واقعہ گزشتہ روز ہوا ہے جب کہ انہوں نے ایف آئی آر آج درج کرائی ہے۔ اغوا کی گئی خواتین کا تعلق عیسائی مشنری تنظیم سے تھا، گو کہ مغویوں کو 3 گھنٹے بعد ہی چھوڑ دیا گیا تھا لیکن ملزمان نے خواتین سے زیادتی کی وڈیو بھی بنائی۔پولیس کا کہنا ہے کہ یہ علاقہ علیحدگی پسند مسلح جنگجوؤں کے زیر اثر ہے جو سنگین جرائم میں ملوث ہیں اور عین ممکن ہے کہ اس واقعے میں بھی یہی گروہ ملوث ہو۔ پولیس نے ایف آئی آر درج کرکے ملزمان کی گرفتاری کے لئے کارروائی کا آغاز کردیا ہے۔

کراچی ( ایمرا نیوز) آپ یہ تو جانتے ہی ہوں گے کہ 1990 میں جب بینظیر بھٹو پاکستان کی وزیر اعظم تھیں، اور ان کے ہاں بیٹی پیدا ہوئی تو وہ اپنے دور حکومت کے دوران ماں بننے والی پہلی وزیر اعظم تھیں اور اب نیو زی لینڈ کی وزیر اعظم جیسِنڈا آرڈن کے ہاں 21 جون 2018 کو ایک بیٹی پیدا ہوئی ہے۔ ماں اور بچی دونوں صحت مند ہیں۔ 37 برس کی جیسنڈا آرڈن چھ ہفتے کی چھٹی لیں گی جس دوران نائب وزیر اعظم ونسٹن پیٹرز ان کے فرائض انجام دیں گے تاہم انہوں نے کہا کہ اس دوران بھی حکومت کی قیادت وہ خود ہی کریں گی اور روزانہ کابینہ کے دستاویزات کا جائزہ لیں گی۔ اس اعلیٰ عہدے پر فرائض انجام دیتے ہوئے ماں بننے والی، بینظیر بھٹو کے بعد وہ صرف دوسری خاتون ہیں اور دلچسپ بات یہ ہے کہ 21 جون کو بینظیر بھٹو کی سالگرہ بھی ہے تو جہاں ایک طرف لوگ ٹوئٹر پر نیو زیلینڈ کی وزیر اعظم کو مبارک باد دے رہے ہیں وہیں دوسری طرف #HappyBirthdaySMBB بھی ٹرینڈ کر رہا ہے۔