Category انٹرنیشنل

واشنگٹن صدر ڈونلڈ ٹرمپ نے امریکا اور دنیا بھر کے مسلمانوں کو رمضان کی مبارکباد دیتے ہوئے ان کے لیے نیک خواہشات کا اظہار کیا ہے۔

وائٹ ہاؤس کی جانب سے جاری کیے گئے ڈونلڈ ٹرمپ کے خصوصی پیغام میں کہا گیا کہ ‘رمضان کے مقدس مہینے میں مسلمان عبادت کرتے ہیں، روزے رکھتے ہیں اور عطیات دیتے ہیں’۔

مزید کہا گیا کہ ‘رمضان ہمیں یاد دلاتا ہے کہ کس طرح مسلمان امریکا میں مذہبی ہم آہنگی بڑھا رہے ہیں’۔

ڈونلڈ ٹرمپ کے مطابق ‘ہم خوش قسمت ہیں کہ امریکی آئین مذہبی آزادی کی حوصلہ افزائی اور عقائد کا احترام کرتا ہے، ہمارا آئین مسلمانوں کو رمضان المبارک ان کے عقائد کے مطابق گزارنے کی آزادی دیتا ہے’۔

امریکی صدر کی جانب سے جاری کیے گئے پیغام میں مزید کہا گیا کہ ‘میں اور خاتون اول میلانیا ٹرمپ مسلمانوں کو اس برکتوں بھرے مہینے کی مبارکباد دیتے ہیں’۔

Tweets by CelesteKatzNYC

تاہم اس پیغام کے ساتھ ہی سماجی رابطے کی ویب سائٹ ٹوئٹر پر ڈونلڈ ٹرمپ پر تنقید شروع ہوگئی اور صارفین نے امریکی صدر کے وہ مسلم مخالف بیانات شیئر کرنا شروع کردیئے، جو اس سے قبل 2016 کے صدارتی انتخابات کے دوران وہ دے چکے ہیں۔

کچھ لوگوں کا کہنا تھا کہ ڈونلڈ ٹرمپ کو رمضان کی مبارکباد کا یہ پیغام خود سے جاری کرنا چاہیے تھا۔

Tweets by taragolshan

https://twitter.com/saimsaeed847

دوسری جانب امریکی صدر کا یہ بیان ایک ایسے وقت میں سامنے آیا ہے، جب پیر (14 مئی) کو ٹرمپ انتظامیہ نے باقاعدہ طور پر مقبوضہ بیت المقدس میں اپنا سفارت خانہ کھولا، جس کے نتیجے میں غزہ کی پٹی پر ہونے والے احتجاج کے دوران اسرائیلی فورسز نے نہتے فلسطینیوں پر فائرنگ کردی جس سے معصوم بچوں سمیت 60 سے زائد افراد شہید اور 2700 سے زائد زخمی ہوگئے۔

یہی وجہ ہے کہ ایک ٹوئٹر صارف نے تنقید کرتے ہوئے لکھا کہ ڈونلڈ ٹرمپ اصل میں رمضان المبارک کے موقع پر مسلمانوں کو یہ پیغام دینا چاہتے تھے کہ ‘اس بات کا جشن کہ ہم نے فلسطینیوں کے قتل عام میں مدد کی، امریکا بالکل مت آئیں، نہ تو اسٹوڈنٹ ویزہ پر اور نہ ہی پناہ گزین کے طور پر۔
https://twitter.com/jamesgibney

لندن (ایمرا نیوز) عمران خان کی سابق اہلیہ جمائمہ عمران کے دفاع کے لئے ریحام کے سامنے آگئی ہیں۔ جمائمہ کا کہنا ہے کہ اگرریحام خان کی کتاب برطانیہ میں شائع ہوئی تو وہ اپنے بڑے بیٹے سلیمان عیسیٰ خان کی جانب سے ہتک عزت اور خلوت میں دخل اندازی اور صہیونی لابی کے سازشی نظریوں کے بارے میں خیالات ظاہر کرنے کے الزام میں ہرجانے کا دعویٰ کریں گی اور اس کیلئے فنڈز جمع کریں گی۔ جمائمہ خان نےاپنے ایک ٹوئٹر پیغام میں کہا ہے کہ مجھے ذمہ داری سے بتایا گیا ہے کہ ریحام خان کی کتاب انتہائی ہتک آمیز ہے اور برطانیہ میں چھپنے کے قابل نہیں ہے لیکن اگر وہ برطانیہ میں چھپی تو میں اپنے بیٹے کی، جس کی عمر اس وقت سولہ سال تھی، جانب سے اس کی نجی زندگی میں بے جا مداخلت اور گھسے پٹے صہیونی لابی کے سازشی نظریئے پر عدالت میں جاؤں گی۔ ریحام خان کے ٹوئٹ سے واضح ہوتا ہے کہ اس میں خود ان کے خلاف کچھ نہیں ہے لیکن اس کے بعض حصوں میں ان کے بیٹے سلیمان خان کے خلاف کچھ باتیں ہیں، سلیمان خان اب19سال کا ہوچکا ہے اور وہ بچہ نہیں رہا، اس لئے خود بھی اپنے

طور پر قانونی کارروائی کرنے کا حق رکھتا ہے لیکن اس کی ماں نے اعلان کیا ہے کہ وہ کتاب میں موجود اس کے خلاف مواد پر ہتک عزت کا دعویٰ کرنے کیلئے فنڈ مہیا کریں گی، جمائما نے اپنے چھوٹے بیٹے قاسم کا ذکر نہیں کیا، جس کی عمر اب 16 سال ہے، پی ٹی آئی کے ایک ذریعے نے تصدیق کی ہے کہ کتاب میں جمائما گولڈ سمتھ کے بارے میں کوئی ہتک آمیز بات نہیں ہے۔ غالباً ریحام خان کو یہ اندازہ تھا کہ جمائما ان کیلئے مشکل کھڑی کرسکتی ہیں۔ قانونی ماہرین کا کہنا ہے کہ جتنے لوگوں نے ریحام خان کے خلاف کارروائی کی دھمکی دی ہے، ان میں سے صرف عمران خان کے بیٹے کا دعویٰ سب سے زیادہ مضبوط ہوگا، کیونکہ اس نے اس حوالے سے کوئی بیان جاری نہیں کیا ہے اور16سال سے کم عمر کے دوران خلوت میں مداخلت کے بارے میں اس کا دعویٰ بہت مضبوط ہے۔ یہ معلوم نہیں ہوسکا کہ سلیمان عیسیٰ خان کے بارے میں کیا لکھا گیا ہے لیکن اگر ریحام خان برطانیہ میں یہ کتاب شائع کرنا چاہتی ہیں تو انھیں اس بات کا فیصلہ کرنا پڑے گا کہ وہ سلیمان عیسیٰ خان کے بارے میں کون سی باتیں اس میں رکھنا چاہتی ہیں۔ پاکستان تحریک انصاف کے سربراہ عمران خان کے دوست زلفی بخاری نے اگرچہ ویسٹ لندن میں وکلا کی ایک فرم سوئٹ مین برک اور سنکر کو وسیم اکرم، اعجاز رحمان اور انیلہ خواجہ کی جانب سے ریحام خان کو ہتک عزت کا قانونی نوٹس بھیجنے کی ہدایت کردی ہے لیکن ایسا معلوم ہوتا ہے کہ اس میں بہت سی قانونی پیچیدگیاں ہیں اور اس کا لندن کی عدالت میں پیش کیا جانا اور کامیاب ہونا ناممکن نظر آرہا ہے۔ کیونکہ ہتک عزت سے متعلق خط لیک ہونے کے بعد ہتک عزت کا دعویٰ کمزور پڑگیا ہے، ان تمام دعویداروں نے میڈیا میں خود پر لگائے گئے الزامات مسترد کرتے ہوئے اپنا دفاع کیا ہے، اگر زلفی بخاری ریحام خان کو انگلینڈ کی عدالت میں کھڑا کرنے میں کامیاب ہوگئے تو ایک اندازے کے مطابق اس مقدمے پر تمام 4دعویداروں کے کم وبیش1.5 ملین پونڈ تک خرچ ہوں گےجبکہ ریحام خاں اگر اچھی قانونی فرم کی خدمات حاصل کرتی ہیں تو ان کو اس مقدمے میں اپنے دفاع پر کم وبیش 0.5 ملین تک خرچ کرنا پڑیں گے۔ ریحام خان نے جیو نیوز کو ایک انٹرویو میں بتایا کہ ان کی کتاب میں ایک بلیک بیری کا تفصیل سے ذکر ہے اور تحریک انصاف اسی بلیک بیری سے خوفزدہ ہے۔ انھوں نے کہا کہ گزشتہ سال پی ٹی آئی کی سابق رہنما عائشہ گلالئی نےعمران خان پر نازیبا پیغامات بھیجنے کے الزامات عائد کرتے ہوئے کہا تھا کہ وہ خواتین سے کہتے تھے کہ وہ بلیک بیری استعمال کیا کریں، کیونکہ بلیک بیری کے پیغامات کا پتہ نہیں چلایا جاسکتا اور غالباً پی ٹی آئی اس سے خوفزدہ ہے، اس فون میں موجود معلومات کی وجہ سے وہ خوفزدہ ہیں۔ ریحام خان نے اپنے مخالفین کی مذمت کرتے ہوئے کہا کہ میرے خلاف باتیں کرنے والے کنفیوز ہیں اور انھیں یہ بھی پتہ نہیں کہ ان کی پشت پر کون ہے؟۔ اگر رائیونڈ مافیا ہے تو اسے سامنے آکر میری حمایت کرنی چاہئے، وہ سوشل میڈیا پر الزام تراشی کررہے ہیں، ان کے پاس پرائیویٹ تفتیش کار ہیں اور ان کی پشت پر ایک مافیا موجود ہے، آپ خود دیکھ سکتے ہیں کہ کیا میری پشت پر کوئی مافیا ہے؟۔ وہ لوگ کنفیوز ہیں، کبھی وہ کہتے ہیں کہ کوئی بھارتی تاجر ان کی پشت پر ہے، کبھی وہ حسین حقانی کا نام لیتے ہیں، پھر وہ رائیونڈ مافیا، حنیف عباسی یا شہباز شریف کانام لیتے ہیں، انھیں پہلے یہ فیصلہ کرنا چاہئے کہ میری پشت پر کون ہے؟۔

نئی دلی(ایمرا نیوز)بھارتی صدر رام ناتھ کووندنے روایتی افطار ڈنر ملتوی کر دیا،تفصیلات کے مطابق بھارتی صدر کا کہنا ہے کہ راشترپتی بھون ایک سیکولر علامت ہے ،مذہبی معاملات اور حکومتی معاملات الگ رکھے جائیں بھارتی صدر نے روایتی افطار ڈنر ملتوی کر تے ہوئے کہنا تھا کہ ٹیکس دہندگان کے پیسے کو کسی بھی مذہبی تقریب کیلئے خرچ کرنا مناسب نہیں۔واضح رہے بھارتی صدر نے کرسمس کی تقریب بھی منعقد کی تھی اورصدر راشٹر پتی بھون میں مندر میں پوجا پاٹ ضرور کرتے ہیں۔

سری نگر:(ایمرا نیوز) مقبوضہ کشمیرمیں قابض بھارتی فوج نے سرچ آپریشن کے نام پرمزید 3 نوجوانوں کو شہید کردیا۔

کشمیرمیڈیا سروس کے مطابق مقبوضہ کشمیرمیں بھارتی فوج نے ضلع کپواڑہ کے علاقے مچھل کا محاصرہ کرلیا اورسرچ آپریشن کے دوران 3 نوجوانوں کو شہید کردیا۔ نوجوانوں کی شہادت کی اطلاع ملتے ہی علاقے میں لوگوں کی بڑی تعداد گھروں سے باہرنکل آئی اوربھارتی فوج کے خلاف احتجاج شروع کردیا۔

واضح رہے کہ 2016 میں حریت پسند نوجوان برہان وانی کی بھارتی فوج کے ہاتھوں شہادت کے بعد مقبوضہ وادی میں جدو جہد آزادی کی نئی لہر بیدار ہوئی ہے جسے کچلنے کے لیے بھارتی فوج نے بربریت کا ہولناک سلسلہ شروع کررکھا ہے صرف گزشتہ ماہ 31 افراد کو سرچ آپریشن کے نام پر جب کہ 3 کو دوران حراست شہید کیا جاچکا ہے۔

سیول(ایمرا نیوز)فلپائن کے صدرروڈریگودوتیرتے کو خاتون کا بوسہ لینے پر تنقید کا سامناکرنا پڑگیا ہے ۔فلپائن کے گیبرائیلا گروپ نے اس عمل کو ’’نفرت انگیز‘‘ اور صدر کو’’خواتین مخالف‘‘ قرار دیا ہے ۔صدر نے جس خاتون کا بوسہ لیا تھا اس خاتون نے بعد میں کہا کہ اس میں کوئی ’’بری نیت‘‘ نہیں تھی جبکہ وہ بوسے سے قبل اور اس کے بعد مسلسل ہنستی ہوئی نظر آئیں۔بہر حال یہ پہلا واقعہ نہیں کہ صدر دوتیرتے پر خواتین کے ساتھ ناروا سلوک کے الزامات لگے ہیں۔ تازہ واقعہ اس وقت پیش آیا جب وہ جنوبی کوریا کے دارالحکومت سیول میں فلپائن نژاد کارکنوں سے خطاب کر رہے تھے ۔فلپائن نژاد غیر ملکی ملازمین نے کہا کہ دوتیرتے پسند ہیں کیونکہ انہوں نے فلپائن کی ایک اچھی تصویر پیش کی ہے ۔

(ایمرا نیوز)
فلسطین کے شدید احتجاج کے بعد ارجنٹینا کی نیشنل فٹبال ٹیم نے ورلڈ کپ سے قبل اسرائیل سے کھیلا جانے والے دوستانہ میچ منسوخ کردیا۔ورلڈ کپ کی تیاریوں کے سلسلے میں اسرائیل اور ارجنٹینا کے درمیان 9 جون کو مقبوضہ بیت المقدس کے ٹیڈی اسٹیڈیم میں دوستانہ میچ ہونا تھا، جو ورلڈ کپ سے قبل ارجنٹینا کا آخری وارم اپ میچ تھا۔فلسطین کی جانب سے شدید احتجاج سامنے آنے کے بعد ارجنٹینا کی فٹبال ایسوسی ایشن نے 9 جون کو ہونے والا میچ منسوخ کردیا۔ ارجنٹینا کی اسپورٹس ویب سائٹ ‘مینیٹونو’ کے مطابق قومی فٹبال ٹیم کے کپتان لیونل میسی کی ہدایت پر مقبوضہ بیت المقدس میں اسرائیل کے ساتھ ہونے والا میچ منسوخ کیا گیا ہے۔ یاد رہے کہ اس سے قبل ارجنٹینا میں فلسطینی سفیر حسنی عبدالوحید نے دوستانہ میچ کی شدید مخالفت کی تھی، جن کا کہنا تھا کہ ارجنٹینا اور اسرائیل کے درمیان اگر میچ ہوا تو اسے اسرائیل کے 70 سالہ قیام پر جشن کے مترادف سمجھا جائے گا۔یاد رہے کہ اسرائیل نے 1948 میں فلسطین کی سرزمین پر قبضہ کرلیا تھا جس کے 70 سال مکمل ہوگئے۔ ارجنٹینا میں تعینات فلسطینی سفیر کا کہنا تھا کہ مقبوضہ بیت المقدس میں میچ کا انعقاد ہمارے لیے ناقابل قبول ہے کیوں کہ یہ مقبوضہ علاقہ ہے اور وہاں ایسی ٹیم کو کھیلتا دیکھنا قابل تکلیف ہوگا جس کے حامیوں کی فلسطین اور عرب دنیا میں بڑی تعداد ہے۔ اس سے قبل فلسطینی فٹبال ایسوسی ایشن کے صدر جبریل رجب نے کہا تھا کہ لیونل میسی امن اور پیار کی علامت ہیں، اس لیے ہم نہیں چاہیں گے کہ وہ مقبوضہ علاقے میں کھیلے جانے والے میچ کا حصہ بنیں۔ انہوں نے عرب اور تمام مسلم ممالک میں میسی کے مداحوں سے اپیل کی تھی کہ اگر اسرائیل اور ارجنٹینا کے درمیان میچ ہوا تو میسی اور ارجنٹینا کی شرٹس اور تصاویر کو نذرآتش کردیا جائے۔

کراچی(ایمرا نیوز)اقوام متحدہ کی کونسل برائے انسانی حقوق نے مہاجرین سے ان کے بچوں کو علیحدہ کرنے کی امریکی پالیسی پر شدید تنقید کرتے ہوئے مطالبہ کیا ہےکہ اس پالیسی کو فوری طور پر روکا جائے، میکسیکو سے ملنے والی سرحد پر خاندانوں کی تقسیم تسلیم نہیں کی جا سکتی، حقوق اطفال کی خلاف ورزی ہوگی۔غیرملکی ذرائع ابلاغ کے مطابق کونسل کے ترجمان نے امریکا کی میکسیکو سے ملنے والی سرحد پر بچوں کو والدین سے جدا کرنے کے سلسلے کو فوری طور پر روکنے کا مطالبہ کیا ، بیان کے مطابق خاندانوں کی تقسیم کسی صورت تسلیم نہیں کی جا سکتی اور بچوں کو قید کرنا کسی بھی طرح ان کے مفاد میں نہیں، اقوام متحدہ نے اسے حقوق اطفال کی سنجیدہ خلاف ورزی قرار دیا ہے۔

لندن (ایمرا نیوز) پولیس نے ماں اور اس کے 11 سالہ بچے کو چاقو سے زخمی کرنے والے شخص کی تلاش شروع کردی ہے۔ واقعہ جنوب مغربی لندن میں گزشتہ شب ان کے گھر پر پیش آیا۔ ریحان خان نامی پاکستانی پر الزام ہے کہ اس نے گھریلو جھگڑے پر اپنی بیوی اور بچے کو چاقو سے زخمی کردیا ملزم کے ایک دوست نے ہی حملہ آور کا نام بتایا اور دعویٰ کیا کہ اسے ڈی پورٹیشن کا سامنا ہے۔ مس سلمٰی برطانوی نیشنل ہے اور اس کا اصل تعلق بلجیم سے ہے۔ باور کیا جاتا ہے کہ اس کے چار بچے ہیں جن میں سے خان سے 11 ماہ کا بچہ بھی شامل ہے۔ زخمی خاتون کی ایک سہیلی جس نے اپنا نام صرف ثمینہ بتایا کا کہنا ہے کہ میں نے اس شخص کو انتہائی تیزی سے بھاگتے ہوئے دیکھا میں نے صرف خون دیکھا تھا اس نے سلمٰی کو قتل کرنے کی کوشش کی تھی ۔ اس نے دوسرے بچوں کو زخمی نہیں کیا ۔ دوسرے بچوں نے اس سے کہا کہ وہ ان کی ممی کو قتل نہ کرے۔ خاتون کے پاس اتنا وقت نہیں تھا کہ وہ پینک الارم بجا سکتی۔ لندن میں پر تشدد حملے کا تازہ ترین واقعہ ہے۔ زخمی بچہ موت و زیست کی کشمکش میں مبتلا ہے ماں کی عمر 32سال بتائی جاتی ہے۔

زخمی خاتون کی سہیلی کا کہنا ہے کہ خان کی یوکے ویزا ایپلی کیشن پانچ دن پہلے مسترد کر دی گئی تھی۔ وہ اس گھر میں نہیں رہتا تھا ۔ وہ بیوی پر تشدد کرتا تھا۔ اس نے اپنی برطانوی نیشنل بیوی کی بنیاد پر برطانیہ میں مستقل فیام کے ویزے کیلئے درخواست دی تھی۔خاتون نے رپورٹ کیا تھا کہ وہ اسے باقاعدہ مارتا پیٹتا ہے ۔ عدالت نے اس کی ویزا درخواست کو مسترد کر دیا تھا ۔ میٹ پولیس ترجمان نے کہا کہ مسٹر خان کو ہونسلو اور ائسلورتھ ایریاز میں لوگ خاصا جانتے ہیں اور اس کے نیو ہیم، سلائو اور ہیمرسمتھ فلہام میں بھی روابط ہیں۔ درجنوں پولیس آفیسرز جائے واردات پر جمع تھے۔ گزشتہ رات حملہ آور کی تلاش کے کام میں ہیلی کاپٹر سے بھی مدد لی گئی۔ پڑوسی خاتون کا کہنا ہے کہ اس عورت کے بڑے بیٹے پرائمری سکول ایج کے ہیں جنہوں نے حملہ آور سے کہا کہ وہ ان کی ماں کو قتل نہ کرے۔فرانزک آفیسرز نے جائے واردات سے شواہد جمع کیے۔ خاتون اپنے بچوں کے ساتھ رہاش پذیر تھی۔ ایک اور عینی شاہد کا کہنا ہے کہ اس واقعے میں یوں لگ رہا تھا کہ آپ کوئی ڈرائونی فلم دیکھ رہے ہیں ۔ ایک اور مقامی ریذیڈنٹ نے کہا کہ چینخ و پکار انتہائی تکلیف دہ تھی۔ میں نے دیکھا کہ پولیس نے 10 سیکنڈ میں علاقے میں فینس لگا دی ۔ ملزم ان کی آمد سے پہلے ہی بھاگ گیا تھا۔ جب پولیس اور امدادی ورکر باہر نکلے تو میں نے دیکھا کہ میڈیکس نے ایک بچے کو گود میں اٹھا رکھا تھا۔ پولیس آفیسرز بھی انتہائی پریشان تھے اور ان میں سے ایک تو رو رہا تھا کیونکہ اس نے اندر جو کچھ دیکھا تھا وہ اسے برداشت نہ کر پایا اس کے ساتھی اسے دلاسہ دے رہے تھے۔ گھر کی سفید دیواریں خون سے سرخ ہو گئی تھی تصاویر دہلا دینے والی تھیں۔ گھر کے بیک یارڈ میں پولیس ٹینٹ لگا دیا گیا ہے۔ گھر کی اوپری منزل کی کھڑکیاں کھلی ہوئی ہیں۔بیڈ روم کی لائٹ جل رہی تھی۔ اس ایریا میں 38 سال سے ہائش پذیر 62 سالہ مارٹل کینٹ ویل کا کہنا تھا کہ ایئر ایمبو لینس پرواز کر رہی تھی اور پولیس کی بڑی تعداد موجود تھی۔ ایک اور خاتون کا کہنا تھا کہ یہ لوگ تین چار ماہ قبل ایریا میں آئے تھے ہم اس واقعے کی وجہ سے رات بھر نہیں سو سکے۔ مائوں کیلئے یہ انتہائی دہلا دینے والا واقعہ ہے۔ یہ انتہائی سنگدلی ہے۔ پولیس کا کہنا ہے کہ ہمیں گھر کے مکینوں کی خیریت کی تشویش کی رپورٹس پر طلب کیا گیا تھا۔ سکاٹ لینڈ یارڈ کا کہنا ہے کہ ہم اس واقعے کے اسباب جاننے کیلئے کام کر رہے ہیں ۔ تحقیقات ابھی ابتدائی مرحلے میں ہے ۔خیال ہے اس واقعے میں ملوث پارٹیز ایک دوسرے کو جانتی ہیں۔

تہران: (ایمرا نیوز) ایران نے ایک مرتبہ پھر یورینیم کی افزودگی کی صلاحیت بڑھانے کا فیصلہ کیا ہے۔

برطانوی نشریاتی ادارے بی بی سی کے مطابق ایران کے جوہری ادارے نے اعلان کیا ہے کہ وہ زیادہ مقدار میں افزودگی کا سب سے اہم جُز یورینیم ہیگزا فلورائیڈ بنائے گا اور اس حوالے سے آئی اے ای اے کو جلد مطلع کر دیا جائے گا۔

واضح رہے کہ ایران کی جانب سے یہ اعلان ایک ایسے وقت پر سامنے آیا ہے جب امریکی صدر نے ایران اور 6عالمی طاقتوں کے مابین طے پانے والے معاہدے سے نکلنے کا اعلان کیا تھا۔ صدر ٹرمپ کی جانب سے معاہدہ توڑنے کے بعد یورپی ممالک نے بہت کوشش کی کہ اس معاہدے کو بچایا جا سکے۔

ریاض: (ایمرا نیوز ) سعودی عرب میں خواتین کو ڈرائیونگ کی اجازت ملنے کے بعد پہلی خاتون کو ڈرائیونگ لائسنس جاری کردیا گیا ہے ۔سعودی فرماں روا شاہ سلمان بن عبدالعزیز نے 2017 میں خواتین کی ڈرائیونگ سے متعلق تاریخی فیصلہ سناتے ہوئے خواتین کو ڈرائیونگ کی اجازات دی تھی ٹریفک پولیس ڈیپارٹمنٹ نے عمل درآمد کرتے ہوئے پہلی خاتون کو ڈرائیونگ لائسنس جاری کردیا ہے ۔العربیہ ٹی وی کے مطابق گزشتہ ماہ ٹریفک کے ڈائریکٹر جنرل محمد ال بسامی نے کہا تھا خواتین کو ڈرائیونگ لائسنس جاری ہونے کے بعد وہ ملک میں 24 جون سے باقاعدہ ڈرائیونگ کرسکیں گی ، جب کہ ڈرائیونگ کے لئے خواتین کی عمر 18 سال مقرر کی گئی ہے اور 18 سال یا اس سے زائد عمر کی خواتین کو ہی ڈرائیونگ کی اجازت دی جائے گی۔واضح رہے سعودی عرب میں 1990 سے خواتین کی ڈرائیونگ پر پابندی تھی تاہم یہ پابندی سرکاری طور پر عائد نہیں تھی اور نہ یہ قانون کا حصہ تھی مگر خواتین کو ڈرائیونگ لائسنس جاری نہیں کیا جاتا تھا۔