Category انٹرنیشنل

نیویارک(فارن ڈیسک/میڈیا 92نیوز) فلسطین کے صدر محمود عباس نے مطالبہ کرتے ہوئے کہا ہے کہ فلسطین کے مسئلہ پر امن کانفرنس بلائی جائے۔

اقوام متحدہ کی سلامتی کونسل سے خطاب کرتے ہوئے محمود عباس نے کہا کہ علیحدہ ریاست فلسطینیوں کا حق ہے۔ مشرق وسطیٰ میں قیام امن کیلئے فلسطین کا قیام ضروری ہے۔ اس مسئلے کو امن منصوبے کا حصہ بنایا جائے۔

فلسطینی صدر نے کہا کہ اقوام متحدہ کی مکمل رکنیت کیلئے وہ کوششیں تیز کر دیں گے۔ اے پی پی

نئی دہلی(فارن ڈیسک/میڈیا 92نیوز) کینیڈا کے وزیراعظم جسٹن ٹروڈو نے دورہ بھارت کے دوران میزبان ملک کی جانب سے مسلسل سردمہری کے 3 دن بعد بالآخر وضاحت دیتے ہوئے کہا ہے کہ وہ ایک متحد بھارت کی حمایت کرتے ہیں۔

بھارتی خبر رساں ادارے کے مطابق تین دن کی سرد مہری کے بعد کینیڈا کے وزیراعظم نے اہم وضاحت کردی ہے کہ وہ اور ان کا ملک ایک متحد بھارت کا حامی ہے۔

کینیڈین پریس کی جانب سے ریلیز کی جانے والی ویڈیو میں ٹروڈو نے یہ وضاحت بھی دی ہے کہ وہ اور ان کے تمام وزراء ایک متحد بھارت کے حامی ہیں اور اس پر سختی سے کاربند بھی رہیں گے۔

جسٹن ٹروڈو کا مزید کہنا تھا کہ ان کی حکومت اس بات کی حامی ہے کہ خالصتان تحریک کا معاملہ ڈائیلاگ اور امن وامان کے ساتھ حل کیا جائے۔

سیاسی حلقے خیال کرتے ہیں کہ ٹروڈو کے بیان کی اہمیت، ان کے کچھ وزراء کے سکھوں کی خالصتان تحریک سے مبینہ تعلقات کے بعد بڑھ گئی ہے۔

کینیڈین وزیراعظم جسٹن ٹروڈو دورہ بھارت کے دوران مسلسل نظرانداز

اس اہم معاملے پر کینیڈا کے عوام بھی بھارت اور کینیڈا کے درمیان بگڑتے حالات سے خوفزدہ تھے اور ایک قلم کار نے ٹروڈو سے خالصتان کے معاملے پر اعلانیہ وضاحت دینے کا بھی کہا تھا۔

واضح رہے کہ 17 فروری کو اہلخانہ سمیت 7 روزہ دورے پر بھارت آنے والے کینیڈین وزیراعظم کو بھارت میں مسلسل نظرانداز کیا جارہا تھا۔

کینیڈین وزیراعظم کا ایئرپورٹ پر نہ تو بھارتی ہم منصب نے استقبال کیا اور نہ ہی کوئی سینئر وزیر وہاں پہنچا بلکہ ایک جونیئر بھارتی وزیر نے ان کا استقبال کیا۔

بھارتی وزیراعظم نریندر مودی عام طور پر مہمان ہم منصبوں کی آمد کے موقع پر خود ان کا استقبال کرنے ایئرپورٹ آتے ہیں، گزشتہ ماہ اسرائیلی وزیراعظم بن یامین نیتن یاہو کا انہوں نے ایئرپورٹ پر گلے لگا کر استقبال کیا تھا لیکن جسٹن ٹروڈو کے لیے انہوں نے خیرمقدمی ٹوئٹ تک نہیں کی۔

جسٹس ٹروڈو اور بھارتی ہم منصب نریندر مودی سے ملاقات بھی سرکاری دورے کے آخری روز یعنی جمعہ 23 فروری کو وزیراعظم ہاؤس میں ہوگی جس کے بعد وہ واپس کینیڈا روانہ ہوجائیں گے۔

کینیڈین وزیراعظم جسٹن ٹروڈو کو تاج محل دیکھ کر بچپن کی یاد آگئی

جسٹن ٹروڈو کو نظرانداز کرنے کے حوالے سے بھارت کے کینیڈا کے لیے سابق سفیر وشنو پرکاش کا کہنا تھا کہ کینیڈین حکومت، بھارتی پنجاب میں سکھوں کی علیحدگی پسند تنظیم خالصتان موومنٹ کی سرپرستی کر رہی ہے اور جسٹن ٹروڈو کی حکومت میں اس میں شدت آگئی ہے۔

سابق بھارتی سفیر نے مزید کہا تھا کہ کینیڈین وزیراعظم جسٹن ٹروڈو نے ٹورنٹو میں گزشتہ سال اپریل میں خالصتان موومنٹ کی جانب سے منعقدہ تقریب میں بھی شرکت کی تھی۔

مختلف حلقوں کی جانب سے اس بات کا مطالبہ بھی کیا گیا تھا کہ جسٹن ٹروڈو خالصتان موومنٹ کے حوالے سے کوئی پالیسی بیان جاری کریں۔

تہران(فارن ڈیسک/میڈیا 92نیوز) ایران کی تشخیص مصلحت نظام کونسل کے سیکریٹری محسن رضائی نے غاصب اسرائیلی حکومت کے وزیراعظم بینجمن نتن یاہو کی دھمکی پرردعمل کا اظہار کرتے ہوئے کہا ہے کہ اسرائیل نے اگر ایران کے خلاف حماقت کا مظاہرہ کرتے ہوئے کوئی معمولی سی بھی غلطی کی تو اسے کھنڈرات میں تبدیل کردیا جائے گا۔

لبنان کے المنار ٹی وی سے گفتگوکرتے ہوئے انھوں نے کہا کہ اقوام متحدہ اور میونخ سیکیورٹی کانفرنس میں اسرائیلی وزیراعظم کی ڈرامے بازی بچوں کے کھیل کے برابر بھی اہمیت نہیں رکھتی۔

انھوں نے کہا کہ امریکی اور اسرائیلی حکام ایران کو نہیں پہچانتے اور وہ مزاحمت کی طاقت کو نہیں سمجھتے یہی وجہ ہے کہ وہ ہر بار شکست کھاتے ہیں۔ محسن رضائی نے شام کے اینٹی ایئرکرافٹ سسٹم کے ہاتھوں اسرائیل کے ایف 16جنگی طیارے کی ہونے والی تباہی کی طرف اشارہ کرتے ہوئے کہا کہ یہ اقدام اس بات کو ثابت کرتا ہے کہ شامی فوج اپنے پیروں پر کھڑی ہوئی ہے۔

سری نگر(فارن ڈیسک/میڈیا 92نیوز) مقبوضہ کشمیر میں بھارتی فوجیوں نے ضلع شوپیان میں کئی دیہات کا محاصرہ کرکے تلاشی کی کارروائیاں کرتے ہوئے ضلع کے علاقوں گنڈ وئین امام صاحب، ترکہ وانگام اور نولی پوشواری کا محاصرہ کرکے گھر گھر تلاشی لی۔

بھارتی فورسز نے لوگوں کے چلنے پھرنے پر پابندی عائد کردی اور علاقوں کو جانیوالے تمام راستوں کو سیل کردیا۔ کاروائی کے دوران فوجیوں نے نولی پوشواری میں لوگوں کو خوفزدہ کرنے کیلیے اندھا دھند فائرنگ کی تاہم کسی جانی نقصان کی کوئی اطلاع نہیں ہے۔ بھارتی فورسز نے ضلع پلوامہ کے علاقے پرڑھو کا محاصرہ کرکے گھر گھر تلاشی لی اور راستے سیل کردیے۔ دریں اثنا مقبوضہ کشمیر میں بھارتی فوسز کی پیلٹ فائرنگ سے زخمی ہونیوالے سیکڑوں افراد نے سرینگر میں احتجاجی مظاہرہ کیا۔ انھوں نے اپنے ہاتھوں میں بینرز اور پلے کارڈز اٹھارکھے تھے۔

جن پر پیلٹ متاثرین کی تصاویر کے ساتھ ساتھ ’’مہلک ہتھیاروں کا استعمال بند کرو‘‘ اور ’’آنکھیں بیش قیمت ہیں‘‘ کے نعرے درج تھے۔ حریت رہنماؤں شبیر احمد ڈار، محمد اقبال میر، امتیاز احمد ریشی،محمد آحسن انتو اورغلام نبی وار نے سانحہ کنن پوشپورہ کے متاثرین کے ساتھ ہمدردی اور یکجہتی کا اظہار کیا ہے۔ 22 اور 23 فروری 1991 کی درمیانی رات کو بھارتی فوجیوں نے ضلع کپواڑہ کے علاقے کنن پوشپورہ میں تلاشی کی کارروائی کے دوران 13 سال سے80 سال تک کی تقریباً 100 خواتین کی عصمت دری کی تھی۔ سید علی گیلانی نے مقبوضہ علاقے اور بھارت کی جیلوں میں کشمیری سیاسی نظربندوں کے ساتھ روا رکھے جارہے غیر انسانی سلوک پر گہری تشویش کا اظہار کرتے ہوئے کہاہے کہ نظربندوں کو بدترین سیاسی انتقام کا نشانہ بنایا جا رہا ہے۔

دمشق(فارن ڈیسک/میڈیا 92نیوز)شامی افواج کی وحشیانہ فضائی بمباری کے نئے سلسلے میں اب تک 200 سے زائد افراد لقمہ اجل بن چکے ہیں جن میں بڑی تعداد میں بچے بھی شامل ہیں۔

تجزیہ کاروں کے مطابق مشرقی غوطہ میں لگاتار بمباری کی گئی ہے جس میں بڑے پیمانے پر تباہی کے علاوہ عام شہری ہلاک ہوئے ہیں۔

اس علاقے کے متعلق کہا جارہا ہے کہ یہاں بڑی تعداد میں شامی حکومت کے باغی سرگرم ہیں تاہم یہاں بڑی تعداد میں عام افراد رہتے ہیں جن کا کہنا ہے کہ اگر ہم بمباری سے نہ مرے تو بھوک سے ہلاک ہوجائیں گے کیونکہ اس علاقے کا محاصرہ ہوچکا ہے اور اشیائے خورونوش ختم ہوچکی ہیں۔

مشرقئ غوطہ کی ایک خاتون شمس نے بتایا کہ کل سے اب تک شامی افواج نے علاقے میں ہرلمحے ہر طرح کی بمباری کی ہے، لڑاکا طیاروں کی مسلسل پرواز جاری ہے جب فوج بمباری روکتی ہے تو طیاروں سے میزائل فائر ہونا شروع ہوجاتے ہیں۔

لگاتار گولہ باری کے بعد غوطہ کا علاقہ خوف، تباہی اور ہیبت کی تصویر پیش کررہا ہے۔ یہاں موجود ایک ڈاکٹر خالد ابولعبد نے کہا کہ 2013ء سے وہ یہاں محصور ہے اور اب صورتحال تباہ کن اور وحشیانہ ہوچکی ہے۔ تجزیہ نگاروں کے مطابق شامی افواج اسکول، اسپتال، بازار، رہائشی علاقوں اور ہر جگہ کو نشانہ بنارہی ہیں جس سے لوگوں کی بڑی تعداد ہلاک اور زخمی ہوئی ہے۔

شام کی انسانی حقوق کی تنظیم سیریا آبزوریٹری کے مطابق اتوار کے بعد سے اب تک 200 افراد کی ہلاکت کی تصدیق ہوچکی ہے جن میں 20 بچے شامل ہیں جبکہ زخمیوں کی تعداد 300 سے زائد ہے۔ اب اس علاقے میں زندگی کے آثار ختم ہوتے جارہے ہیں ۔ یہاں رہنے والے چار لاکھ افراد نقل مکانی پر مجبور ہیں کیونکہ ادویہ اور غذا ختم ہوچکی ہیں۔

بشار الاسد کی افواج نے اتوار کی صبح سے اس علاقے کو نشانہ بنانا شروع کیا اور عینی شاہدین نے اس منظر کو بموں کی برسات قرار دیا۔ دوسری جانب سخت محاصرے کی وجہ سے اقوامِ متحدہ اور دیگر ادارے ان علاقوں میں امداد پہنچانے سے قاصر ہیں جہاں بمباری سے بچنے والے لوگ بھوک سے مررہے ہیں۔

بعض تجزیہ کاروں کے مطابق گزشتہ تین سال میں شام میں ایک روز میں مرنے والوں کی یہ سب سے بڑی تعداد ہے۔

دمشق / انقرہ(فارن ڈیسک/ایمرا نیوز) شامی فوج کی مشرقی غوطہ میں شدید بمباری کے نتیجے میں 94 شہری جاں بحق اور 325 زخمی ہوگئے۔

مشرقی غوطہ کے علاقے ہمویہ، سکبا اور دارالحکومت دمشق کے نواحی علاقوں میں بمباری کی گئی۔ جاں بحق ہونے والوں میں 20 بچے بھی شامل ہیں۔

شام کے سرکاری ٹی وی نے بتایا کہ دمشق حکومت کی حامی فورسز شمال مغربی شام میں عفرین کے علاقے میں داخل ہونے ہی والی ہیں۔ اسد حکومت کی حامی پاپولر فورسز کا عفرین میں داخلہ اب صرف چند گھنٹوں کی بات ہے۔ عفرین میں ترک فوجی دستے شامی کردوں کے خلاف اپنی زمینی کارروائیاں جاری رکھے ہوئے ہیں۔

واضح رہے کہ اتوار کے روز شامی کرد فورسزکے ایک مشیر نے کہا تھا کہ عفرین میں مغربی دنیا کے حمایت یافتہ شامی کرد جنگجو اب صدر اسد کی حامی فورسز کے ساتھ مل کر ترک دستوں کے خلاف کارروائیاں کریں گے۔

ادھر ترک مسلح افواج کی طرف سے شام کے علاقے عفرین میں جاری شاخ زیتون آپریشن کے دائرہ کار میں مزید3دیہات کو دہشت گردوں سے پاک کردیا گیا۔

بغداد(فارن ڈیسک/ایمرا نیوز)عراق میں حکومت نواز ملیشیا کے ایک قافلے پر داعش کے خونریز حملے میں27افراد ہلاک ہو گئے۔

حملہ رات گئے شمالی عراقی شہر کرکوک کے قریب پاپولر موبیلائزیشن فورسز یا پی ایم ایف کے ایک قافلے پر کیا گیا۔ اس حملے کے بعد سے بغداد حکومت کی حامی اس ملیشیا کے کم از کم10 ارکان لاپتہ بھی ہیں۔

عراقی سیکیورٹی فورسز کے اعلی ذرائع نے پیر کو بتایا کہ یہ حملہ شدت پسند تنظیم اسلامک اسٹیٹ یا داعش کے ایسے جنگجوؤں نے کیاجو عراقی پولیس کی وردیاں پہنے ہوئے تھے۔
دریں اثنا عراقی فوج نے کہا ہے کہ موصل شہرکے جنوب میں اجتماعی قبر سے 70 افراد کی لاشیں ملی ہیں جنھیں داعش دہشتگردوں نے صوبے نینوا میں موصل کے جنوب میں موت کے گھاٹ اتار دیا تھا۔

علاوہ ازیں عراق کی عدالت نے داعش میں شمولیت اختیار کرنے پر ترک خاتون کو پھانسی کی سزا سنا دی۔

سری نگر(فارن ڈیسک/ایمرا نیوز)مقبوضہ کشمیر میں بھارتی فوجیوں نے اپنی ریاستی دہشت گردی کی تازہ کارروائی میں ذہنی معذوربزرگ سمیت 2 افراد کو شہید کردیا۔

گزشتہ روز ضلع پونچھ میں نوجوان کو ضلع کے علاقے کھاری کرمارا میں محاصرے اور تلاشی کی ایک کارروائی کے دوران شہیدکیا گیا۔ بھارتی فوج کے ایک ترجمان نے دعویٰ کیا ہے کہ نوجوان بھارتی فوج کے ساتھ ایک جھڑپ میں مارا گیا ہے اور جھڑپ کے دوران 3 فوجی زخمی ہوئے ہیں جن میں سے ایک شدید زخمی ہے۔

بھارتی فورسز نے ضلع بڈگام میں ایئرفورس اسٹیشن کے نزدیک ایک ذہنی طورپر معذور شخص کوفائرنگ کرکے موقع پر ہی شہید کردیا۔ پولیس کے مطابق اس کی عمر 55سال تھی اوریہ ذہنی طورپر معذور تھا۔ ذہنی طورپر ناکارہ ہونے کی وجہ سے یہ شخص سخت سردی میں بھی جوتوںاور مناسب کپڑوں کے بغیر تھا جبکہ اس کے پاس شناختی کارڈ بھی نہیں تھا۔
بھارتی فوج کی30اور32راشٹریہ رائفلز نے ضلع کپواڑہ کے علاقوں گنڈکلان، کرالہ گنڈ اورہندواڑہ میں بڑے پیمانے پر آپریشن شروع کردیا ہے۔ بھارتی پولیس نے سری نگر کے علاقے ڈل گیٹ سے ایک نوجوان کو گرفتارکرلیاہے۔

قابض انتظامیہ نے ضلع بانڈی پورہ کے علاقے حاجن میں جموں وکشمیر مسلم لیگ کے رہنما سمیت 4 افراد پر کالا قانون پبلک سیفٹی ایکٹ نافذکردیا۔

کشمیر میڈیا سروس کے مطابق کالا قانون مسلم لیگ کے رہنما محمد اسد اللہ پرے، رئیس احمد بابا، محمد ایاز پرے اور غلام محی الدین خان پر لاگو کیا گیاہے۔ محمد اسداللہ پرے کو جون 2015 میں گرفتار کیا گیا تھااور ان پرمسلسل چھٹی بار کالا قانون نافذ کیا گیا۔ چاروں افراد کوٹ بھلوال جیل جموں میں نظربندکیا گیا ہے۔

ادھر کل جماعتی حریت کانفرنس کے چیئرمین سید علی گیلانی نے خبردارکیا ہے کہ اگرکشمیری نوجوانوں کے خلاف بھارتی فورسز کی ظالمانہ کارروائیاں فوری طور پرنہ روکی گئیں تو سنگین نتائج پرآمد ہوں گے جس کی تمام تر ذمے داری بھارت نواز پیپلز ڈیموکریٹک پارٹی اوربھارتی پولیس پر عائد ہوگی۔

تہران(مانیٹرنگ ڈیسک/ایمرا نیوز)ایران میں مظاہرین اور پولیس کے درمیان جھڑپ میں 3 پولیس اہلکار ہلاک ہوگئے۔

بین الاقوامی خبر رساں ایجنسی کے مطابق ایران کے دارالحکومت تہران کی شاہراہ پاسداران پر بڑی تعداد میں لوگ مقامی مذہبی پیشوا کی رہائی کے لئے احتجاج کررہے تھے، پولیس نے مظاہرین کو منتشر کرنے کے لیے پیش قدمی کی تو مظاہرین نے مشتعل ہوکر حملہ کردیا۔ جس کے نتیجے میں تین اہلکار ہلاک اور متعدد زخمی ہوگئے۔

تہران پولیس چیف سعید منتظر مہدی نے واقعے کی تفصیلات بتاتے ہوئے کہا کہ ایران کے اقلیتی فرقے ’کنا آبادی جماعت‘ کے مظاہرین کی جانب سے تشدد کا راستہ اختیار کیا گیا اور پولیس پر فائرنگ کی گئی، پولیس تشدد کا راستہ اختیار کرنے والے مظاہرین کی تلاش میں چھاپے مار رہی ہیں۔

واشنگٹن(فارن ڈیسک/ایمرا نیوز)امریکی صدر ڈونلڈ ٹرمپ نے فلوریڈا اسکول فائرنگ واقعے پر ایف بی آئی کو شدید تنقید کا نشانہ بنایا ہے۔

امریکی صدر نے سوشل میڈیا پر اپنے پیغام میں کہا ہے کہ انہیں دکھ ہے کہ ایف بی آئی نے فلوریڈا اسکول کے حملہ آور سے متعلق تمام شواہدکھودیئے، یہ کوتاہی قابل قبول نہیں۔

امریکی صدر نے ایف بی آئی کو امریکی انتخابات پر روسی سازش کے حوالے سے بھی آڑے ہاتھ لیا ۔ان کا کہنا تھا کہ ایف بی آئی نے زیادہ وقت ٹرمپ انتخابی مہم میں روسی سازش ثابت کرنے میں لگایا،ایف بی آئی بنیادی کاموں پر توجہ دیاورہمیں خودپرفخرکرنیکاموقع دے۔