Category انٹرنیشنل

کابل(فارن ڈیسک/میڈیا 92نیوز) افغان صوبے عزنی میں سیکیورٹی فورسز سے مقابلے میں 15 طالبان ہلاک اور16 زخمی ہوگئے ہیں۔

گورنر غزنی کے ترجمان نے کہا ہے کہ طالبان نے سیکیورٹی چیک پوسٹوں پر اتوار کی رات حملے کیے۔ مقابلے میں 3 افغان فوجی زخمی ہوئے۔ لغمان میں امریکی ڈرون حملے میں 3شدت پسند ہلاک ہوگئے جب کہ افغان سیکیورٹی فورسز نے کمانڈر سمیت 11پاکستانی شدت پسندوں کو ہلاک کرنے کا دعویٰ کیا ہے۔

افغان میڈیاکے مطابق ایک سینئر پولیس کمانڈر کا کہنا ہے کہ11پاکستانی شدت پسند اس وقت مارے گئے جب وہ ڈیورنڈ لائن کے قریب واقع ضلع کمدش میں بارڈر پولیس فورسز پرحملے کی کوشش کررہے تھے۔ ہلاک ہونے والوں میں ایک کمانڈ ربھی شامل ہے۔
دریں اثنا مشرقی صوبہ لغمان میں امریکی ڈرون طیارے کے حملے میں 3شدت پسند ہلاک ہوگئے ۔افغان فوج کی20ویں صلیب کورکاکہنا ہے کہ ڈرون حملہ ضلع علی نگر میں کیا گیا۔

ذرائع کا کہنا ہے کہ حملے میں دہشت گرد گروپ کے ٹھکانے کو نشانہ بنایا گیا جس میںایک مقامی کمانڈر بھی زخمی ہوا ہے۔ جبکہ امریکا کی فوج نے روس کے ان دعوؤں کو مسترد کیا ہے کہ افغانستان میں شدت پسند گروپ داعش کے عسکریت پسندوں کی تعداد ہزاروں میں ہے، روس اور ایران داعش کو شکست دینے کے لیے طالبان کے بجائے افغان حکومت کی مدد کریں۔

دوسری جانب افغانستان میں بین الاقوامی فورسزکے کمانڈر جنرل جان نکلسن نے یہ بیان روس کے ان الزاما ت کے جواب میں دیا کہ واشنگٹن ارادی طور پر ملک میں داعش کے عسکریت پسندوں کے پھیلنے کے معاملے کو اہمیت نہیں دے رہا ہے۔

جنرل نکلسن نے ایک نیوزکانفرنس میں کہاکہ “روس کی طرف سے داعش کے جنگجوؤں کی بتائی جانے والی تعداد میں بہت زیادہ مبالغہ آرائی ہے۔ یہ(تعداد) تقریباً 1500 ہے۔امریکی جنرل نے کہا کہ داعش کے عسکریت پسند مشرقی صوبے ننگر ہار اور کنڑ کے علاقوں اور شمالی صوبے جوزجان کے کچھ علاقوں میں سرگرم ہیں۔

ریاض(فارن ڈیسک/میڈیا 92نیوز) سعودی عرب کے فرماں روا شاہ سلمان نے مسلح افواج اور انتظامیہ میں اعلیٰ ترین سطح پر برطرفیاں اور تقرریاں کی ہیں۔

عرب میڈیا کے مطابق شاہ سلمان کی جانب سے جاری فرمان میں کہا گیا ہے کہ سعودی عرب کی فضائیہ کے سربراہ لیفٹیننٹ جنرل محمد بن عوض سحیم اور بری فوج کے سربراہ لیفٹیننٹ جنرل عبدالرحمان بن صالح البنیاں کو ان کے عہدے سے برطرف کرتے ہوئے جبری طور پر ریٹائر کردیا ہے۔ جنرل سحیم کی جگہ میجر جنرل فیاض بن حامد الرویلی جب کہ فواد الروائلی کو لیفٹیننٹ جنرل عبدالرحمان بن صالح البنیاں کی جگہ ذمہ داریاں سونپی گئی ہیں۔

دوسری جانب خادم الحرمین الشریفین شاہ سلمان بن عبدالعزیز نے ایک شاہی فرمان کے ذریعے شہزادہ فہد بن بندر بن عبدالعزیز کو ان کے عہدے سے بٹا کر شہزادہ بندر بن سلطان بن عبدالعزیز کو الجوف کا گورنر مقرر کردیا ہے۔ سعودی عرب کے سرکاری میڈیا کا کہنا ہے کہ شہزادہ فہد بن بندر کو ان کی اپنی درخواست پر گورنر کے عہدے سے ہٹایا گیا ہے تاہم وہ خادم الحرمین الشریفین کے مشیر کے مددگار ہوں گے اور ان کا عہدہ وزیر کے مساوی ہو گا۔

شاہ سلمان نے شہزدہ ترکی بن طلال بن عنداالعزیز کو عسیر ریجن کا گورنر مقرر کیا ہے، ان کا عہدہ بھی وزیر کے مساوی ہو گا۔ شہزادہ فیصل بن فہد بن مقرن بن عبدالعزیز کو حائل ریجن کا نائب گورنر جب کہ شہزادہ سلطان بن احمد بن عبدالعزیز کو شاہی دیوان کورٹ کا مشیر مقرر کیا گیا ہے۔ اس کے علاوہ سعودی عرب کی کابینہ میں وزارت محنت وسماجی ترقی میں نائب وزیر کا عہدہ تخلیق کرکے ڈاکٹر تماضر بنت الرماح کو سونپا گیا ہے، ڈاکٹر تماضر ایک سیکرٹری سے نائب وزیر کے عہدے پر ترقی پانے والی دوسری خاتون ہیں۔

واشنگٹن (فارن ڈیسک/میڈیا 92نیوز)امریکا نے شمالی کوریا پر نئی اقتصادی پابندیاں عائد کردی ہیں جنہیں تاریخ کی سب سے بڑی اقتصادی پابندیاں کہا جارہا ہے۔

غیر ملکی خبر ایجنسیوں کے مطابق امریکی محکمہ خزانہ نے شمالی کوریا کے خلاف نئی پابندیوں میں 56 اداروں، 27 جہاز رانی اور تجارتی کمپنیوں، 28 بحری جہازوں اور ایک فرد کو نشانہ بنایا ہے۔ ان کمپنیوں اور اداروں کا تعلق شمالی کوریا، چین، تائیوان، ہانگ کانگ، پاناما اور تنزانیہ سے ہے۔ ان پابندیوں کا مقصد شمالی کوریا پر دباؤ بڑھانا اور اس کے جوہری پروگرام کے لیے مالی وسائل کو ختم کرنا بتایا گیا ہے۔

پابندیوں کے اعلان کے بعد واشنگٹن ڈی سی میں آسٹریلیا کے وزیر اعظم میلکم ٹرنبل کے ہمراہ پریس کانفرنس کے دوران ڈونلڈ ٹرمپ نے کہا کہ شمالی کوریا کے خلاف تاریخ کی ’’سب سے بڑی پابندیاں لگائی جارہی ہے اور اگر یہ بھی ناکافی ثابت ہوئی تو ہم اس کا ’دوسرا مرحلہ‘ شروع کریں گے، جو دنیا کے لیے انتہائی بدقسمت بات ہوگی۔‘‘

واضح رہے کہ شمالی کوریا پر اس کے جوہری پروگرام کی وجہ سے امریکی اور عالمی اقتصادی پابندیاں عائد ہیں تاہم اس کے باوجود شمالی کوریا اپنا جوہری پروگرام جاری رکھے ہوئے ہے۔

مالے(مانیٹرنگ ڈیسک/میڈیا 92نیوز) مالدیپ کی حکومت نے بھارت کو خبردار کیا ہے کہ وہ اُس کے اندرونی معاملات میں مداخلت سے باز رہے۔

جرمن نشریاتی ادارے کے مطابق بھارت نے چند روز قبل مالدیپ کے سیاسی بحران پر تشویش کا اظہار کرتے ہوئے اسے مایوس کُن قرار دیا تھا، جس پر مالدیپ کی وزارت خارجہ نے خصوصی بیان جاری کیا ہے۔

مالدیپ کی وزارت خارجہ کے بیان میں کہا گیا ہے کہ یہ حقیقت ہے کہ ہمارا ملک اپنے تاریخ کے مشکل ترین وقت سے گزر رہا ہے۔ بھارت سمیت پوری عالمی برادری کو مالدیپ کے اندرونی معاملات میں غیر ضروری مداخلت سے اجتناب کرنا چاہیے کیونکہ کسی بھی طرح کی مداخلت یا بیان بازی سے مالدیپ کے اندرونی معاملات سلجھنے کے بجائے مزید الجھ سکتے ہیں۔

واضح رہے کہ مالدیپ میں صدر کی جانب سے ایمرجنسی نافذہے جب کہ ملک کے چیف جسٹس کو بھی گرفتار کیا جاچکا ہے۔

کابل(بیورو رپورٹ/میڈیا 92نیوز) افغانستان کے دارالحکومت کابل میں خودکش حملے کے نتیجے میں ایک شخص ہلاک اور 6 زخمی ہوگئے۔

خبر رساں ادارے اے ایف پی کے مطابق افغان وزارت داخلہ کے ترجمان نجیب دانش نے بتایا کہ کابل کے علاقے شش درک میں ایک خودکش بمبار نے خود کو دھماکے سے اڑا لیا، جس کے نتیجے میں ایک شخص ہلاک اور 6 زخمی ہوئے۔

ایک سیکیورٹی اہلکار نے نام ظاہر نہ کرنے کی شرط پر بتایا کہ خودکش دھماکا افغان انٹیلی جنس ایجنسی، نیشنل ڈائریکٹوریٹ آف سیکیورٹی (این ڈی ایس) کے ایک کمپاؤنڈ میں ہوا۔

این ڈی ایس کا یہ کمپاؤنڈ نیٹو اور امریکی سفارت خانے کے قریب واقع ہے۔

واقعے کی ذمہ داری ابھی تک کسی گروپ کی جانب سے قبول نہیں کی گئی۔

یاد رہے کہ گذشتہ برس دسمبر میں بھی ایک خودکش بمبار نے اسی کمپاؤنڈ کے قریب خود کو دھماکے سے اڑا لیا تھا، جس کے نتیجے میں کم از کم 6 شہری جاں بحق ہوگئے تھے۔

رواں برس کے آغاز سے افغان دارالحکومت میں متعدد بڑے دہشت گرد حملے ہوئے، جن کے نتیجے میں 130 سے زائد افراد ہلاک ہوچکے ہیں۔

سعودی عرب (فارن ڈیسک/میڈیا 92نیوز)سعودی عرب نےمغربی طرز پر تفریح کی صنعت کو بہتر بنانےکے لئے اربوں خرچ کرنے کی منصوبہ بندی کا اعلان کیا ہے۔

عرب میڈیا کے مطابق یہ منصوبہ سعودی ولی عہد محمد بن سلمان کے معاشی اور معاشرتی اصلاحی پروگرام’’ وژن 2030 ‘‘ کا حصہ ہے جس کا آغاز دو سال قبل ہوا ۔

جنرل انٹرٹینمنٹ اتھارٹی (جی ای اے) کے سربراہ، احمد بن عقیل کا کہنا ہے کہ رواں سال تقریباً 5000 تقریبات کی منصوبہ بندی کی گئی ہے ، خدا نے چاہا تو آپ 2020 میں اصل تبدیلی دیکھیں گے۔

انہوں نے کہا کہ ماضی میں، سرمایہ کار کام کی تیاری کے لیے ملک سے باہر جاتے تھے، اور اس کے بعد سعودی عرب واپس آکر اس کی نمائش کرتے تھے۔ آج تبدیلی آرہی ہے اور انٹرٹینمنٹ سے متعلقہ ہر کام یہیں ہوگا۔

رپورٹ کے مطابق ملک میں سیاحت کے فروغ کو مدنظر رکھتے ہوئے دارالحکومت ریاض کے قریب تقریباً لاس ویگس کے برابر کے ایک بڑے تفریحی شہر کی منصوبہ بندی کی گئی ہے۔

واضح رہے حالیہ دنوں سعودی عرب نے کئی ایسے اقدامات کیے ہیں جو ملک میں اپنی نوعیت کے پہلے تھے ،ان میں گذشتہ ماہ خواتین کوا سٹیڈیمز میں فٹبال میچ دیکھنے کی اجازت اور جون سے خواتین کو گاڑی چلانے کی اجازت کا اعلان اور گزشتہ دنوں پہلی بار عرب فیشن ویک کا انعقاد شامل ہیں۔

گذشتہ سال ولی عہد محمد بن سلمان نے اپنے عزم کا اظہار کرتے ہوئے کہا تھا کہ سعودی عرب ایک بار پھر ’اعتدال پسندملک بنے گا جہاں تمام مذاہب، ثقافتوں اور لوگوں کے لیے راہیں کھلیں گی۔

واشنگٹن(فارن ڈیسک/میڈیا 92نیوز) ریاست فلوریڈا میں اسکول پر حملے کے بعد امریکی صدر ڈونلڈ ٹرمپ نے اساتذہ کو اسلحہ سے لیس کرنے کی تجویز کی حمایت کی تاہم ٹیچرز ایسوسی ایشن نے اسے ناقابل عمل قرار دیتے ہوئے مسترد کردیا۔

امریکی صدر ٹرمپ نے مخصوص اسلحہ خریدنے کے لیے عمر کی حد بڑھا کر 21 سال کرنے کی حمایت کردی جبکہ انہوں نے ٹیچرز کو اسلحہ سے لیس کرنے کی تجویز کی بھی حمایت کے ساتھ اسلحہ ٹریننگ لینے والے ٹیچرز کو بونس دینے کی بھی تجویز دی ہے۔

وائٹ ہاؤس میں مختلف وفود سے بات چیت میں صدر ٹرمپ کا کہنا تھا کہ اپنے بچوں کی حفاظت سے زیادہ اہم بات کوئی نہیں ہے۔

صدر ٹرمپ نے اسکولوں کو اسلحے سے پاک بنانے اور اساتذہ کو بندوقوں سے لیس کرنے کی حمایت کرتے ہوئے کہا کہ اسلحے سے لیس ٹیچر حملے کو روک سکتا ہے۔

دوسری جانب ٹیچرز ایسوسی ایشن نے اس تجویز کی شدید مخالفت کرتے ہوئے اسے مسترد کردیا، امریکا کی سب سے بڑی ٹیچرز یونین نے صدر ٹرمپ کی اس تجویز کی مخالفت میں کہا کہ یہ تجویز قابل عمل نظر نہیں آتی۔

امریکی ریاست فلوریڈا کے اسکول میں فائرنگ، 17 افراد ہلاک

ریاست فلوریڈا کی ایک کاؤنٹی میں طلبا کی حفاظت کو یقینی بنانے کے لیے ٹیچرز کو اسلحہ رکھنے کی اجازت کا فیصلہ کیا گیا ہے۔

پوک کاؤنٹی کے شیرف گریڈی جڈ نے میڈیا کو بتایا کہ انہوں نے ایک پروگرام کا آغاز کیا ہے جس کے تحت کاؤنٹی کے اساتذہ کو تربیت فراہم کی جارہی ہے جس کے بعد وہ اسکول میں اسلحہ ساتھ رکھ سکیں گے تاکہ کسی ناخوشگوار واقعے کی صورت میں طلبا کی حفاظت کو یقینی بنایا جاسکے۔

خیال رہے کہ فلوریڈا کے قوانین کے تحت اسکول کے کیمپس میں پولیس کے علاوہ کسی اور کو اسلحہ ساتھ لانے کی قطعی اجازت نہیں ہے۔

اور حال ہی میں ریاست فلوریڈا کے مارجوری اسٹون مین ڈگلس ہائی اسکول میں فائرنگ کے نتیجے میں 17 افراد ہلاک اور 50 سے زائد زخمی ہوگئے تھے۔

اور اس حملے کو جدید امریکا کی تاریخ میں اسکول پر کیے جانے والے 10 بڑے حملوں میں سے ایک قرار دیا گیا تھا۔

اسرائیلی (فارن ڈیسک/میڈیا 92نیوز)اسرائیلی وزیراعظم بنیامین نتن یاہو کے خلاف بدعنوانی کیسز میں اُن کا ایک قریبی ساتھی وعدہ معاف گواہ بننے پر تیار ہو گیا ہے۔

اسرائیلی میڈیا کے مطابق وزیراعظم کے خلاف حال ہی میں بدعنوانی کے دو نئے الزامات کے تحت تفتیش کرنے کا اعلان کیا گیا تھا۔

امکان ظاہر کیاجا رہا ہے کہ اس نئی پیش رفت کے بعد قبل از وقت انتخابات یا پھر نتن یاہو کے مستعفی ہونے کا اعلان سامنے آ سکتا ہے۔

پولیس نے ابھی اس حوالے سے کوئی بھی تبصرہ کرنے سے انکار کیا ہے۔

نئی دلی(فارن ڈیسک/میڈیا 92نیوز) کینیڈین وزیراعظم جسٹن ٹروڈو کی اہلیہ صوفی ٹروڈو کی خالصتان تحریک کے سابق رہنما کے ساتھ تصویر سامنے آنے پر بھارتی میڈیا طلملا اٹھا۔

کینیڈین وزیراعظم جسٹن ٹروڈو فیملی سمیت ایک ہفتے کے سرکاری دورے پر بھارت میں موجود ہیں جہاں انہوں نے مختلف مقامات کا دورہ اور شخصیات سے ملاقاتیں کیں لیکن 20 فروری کو ممبئی میں خالصتان موومنٹ کے رہنما سے ان کی ملاقات کی تصویر پر بھارتی میڈیا نے ہنگامہ کھڑا کردیا ہے۔

کینیڈین ہائی کمیشن میں وزیراعظم جسٹن ٹروڈو کے اعزاز میں 20 فروری کو ایک تقریب کا انعقاد کیا گیا جس میں جیسپل اٹوال بھی شریک تھے اور کینیڈین وزیراعظم کی اہلیہ کے ساتھ ان کی ایک تصویر وائرل ہوگئی جس پر بھارتی سیاستدانوں سمیت میڈیا کی جانب سے ناگواری کا اظہار کیا جارہا ہے۔

جیسپل اٹوال انٹرنیشنل سکھ یوتھ فیڈریشن کے سابق ممبر رہ چکے ہیں جسے خالصتان تحریک کا عسکری ونگ قرار دیا جاتا ہے جب کہ ان پر 1986 میں ایک وزیر کے قتل کا بھی الزام ہے۔

جیسپل اٹوال کینیڈین وفد کا حصہ ہیں جو وزیراعظم ٹروڈو کے ہمراہ بھارت سے آئے ہیں۔

کینیڈین وزیراعظم جسٹن ٹروڈو دورہ بھارت کے دوران مسلسل نظرانداز

تصویر سامنے آنے پر سینیٹ (راجیا سبھا) کے رکن سبرامانیا سوامی نے کہا کہ یہ ہماری بیوقوفی ہے کہ ہم نے کسی کا پس منظر دیکھے بغیر بھارت آنے کی اجازت دی، اگر کینیڈین کہتے ہیں کہ ہم خالصتان تحریک کی حمایت نہیں کرتے تو انہوں نے کس طرح جیسپل اٹوال کو بھارت آنے کی اجازت دی۔

بھارتی میڈیا کے مطابق جیسپل اٹوال نے وزیراعظم جسٹن ٹروڈو کو کھانے کی دعوت بھی دی جسے انہوں نے مسترد کردیا جب کہ کینیڈین ہائی کمیشن نے اس حوالے سے کسی بھی قسم کا بیان دینے سے معذرت کی ہے۔

یاد رہے کہ 17 فروری کو اہلخانہ سمیت 7 روزہ سرکاری دورے پر بھارت آنے والے کینیڈین وزیراعظم کو بھارت میں مسلسل نظرانداز کیا جارہا تھا۔

کینیڈین وزیراعظم کا ایئرپورٹ پر نہ تو بھارتی ہم منصب نے استقبال کیا اور نہ ہی کوئی سینئر وزیر وہاں پہنچا بلکہ ایک جونیئر بھارتی وزیر نے ان کا استقبال کیا۔

جسٹس ٹروڈو اور بھارتی ہم منصب نریندر مودی سے ملاقات بھی سرکاری دورے کے آخری روز 23 فروری کو شیڈول ہے جس کے بعد وہ واپس کینیڈا روانہ ہوجائیں گے۔

کینیڈا ایک متحد بھارت کی حمایت کرتا ہے، جسٹن ٹروڈو کی وضاحت

گزشتہ روز جسٹن ٹروڈو امرتسر میں سکھوں کی عبادت گاہ گولڈن ٹیمپل بھی گئے جہاں انہوں نے سکھ رہنماؤں سے بھی ملاقات کی۔

بھارت کی سرد مہری کے بعد کینیڈین پریس کی جانب سے ایک ویڈیو جاری کی گئی جس میں جسٹن ٹروڈو نے وضاحت دی کہ وہ اور ان کے تمام وزراء ایک متحد بھارت کے حامی ہیں اور اس پر سختی سے کار بند رہیں گے۔

جسٹن ٹروڈو کا مزید کہنا تھا کہ ان کی حکومت اس بات کی حامی ہے کہ خالصتان تحریک کا معاملہ بات چیت اور پُرامن طریقے سے حل کیا جائے۔

جنوبی افریقا(فارن ڈیسک/میڈیا 92نیوز)جنوبی افریقا کے مشرقی صوبے کیپ میں مسلح افراد کے پولیس اسٹیشن پر حملے کے نتیجے میں 5 افسران اور ایک فوجی ہلاک ہو گیا۔

جنوبی افریقا کی سرکاری خبر رساں ایجنسی کے مطابق نامعلوم مسلح افراد نے اوٹاما کے نزدیک پولیس اسٹیشن پر اندھا دھند فائرنگ کی جس کے نتیجے میں 3 افسران موقع پر ہی ہلاک ہو گئے۔

رپورٹ کے مطابق حملہ آوروروں نے فرار ہوتے ہوئے آف ڈیوٹی فوجی کو بھی ہلاک کیا اور دو پولیس افسران کو اغوا کر کے ساتھ لے گئے جن کی لاشیں کچھ دور سے برآمد ہوئیں۔

پولیس کو تاحال حملے کی وجوہات معلوم نہیں ہو سکی ہیں تاہم اس بات کا شبہ ہے کہ حملہ آوروں نے پولیس اسٹیشن پر دھاوا بولنے سے کچھ دیر قبل ایک اے ٹی ایم چرائی تھی۔

حملہ آور پولیس اسٹیشن سے 10 بندوقیں اور پولیس وین بھی ساتھ لے گئے۔

جنوبی افریقا کی پولیس سروس کے نیشنل کمشنر نے حملے پر شدید غم و غصے کا اظہار کرتے ہوئے کہا ہے کہ قاتلوں کو گرفتار کرنے کے عزم کا اظہار کیا۔