Category انٹرنیشنل

ریاض :مسجد نبوی کی انتظامیہ نے کہا ہے کہ اس سال رمضان کے دوران خواتین سکیورٹی اہلکار تعینات کی جائیں گی ۔

سعودی خبررساں ادارے کے مطابق مسجد نبوی کی انتظامیہ نے رمضان کے انتظامات کے لیے خصوصی اجلاس کا انعقاد کیا جس میں ہنگامی صورتحال ، خطرات سے نمٹنے ، امن و سلامتی کے انتظامات اور سہولتوں کا نظام جدید خطوط پر استوارکرنے کا جائزہ لیا گیا۔

اجلاس میں امن و سلامتی کے انتظامات کرنے والے ادارے اوردیگر عہدیداروں نے شرکت کی ، اجلاس میں فیصلہ کیا گیا کہ مسجد نبوی میں خواتین سکیورٹی اہلکار تعینات کی جائیں گی۔

واضح رہے کہ حرمین الشریفین انتظامیہ کے سربراہ اعلی شیخ ڈاکٹر عبدالرحمن السدیس کی ہدایات پر زائرین کو رمضان میں نئی سہولتیں فراہم کی جائیں گی۔

مائیکرو بلاگنگ سائٹ ٹوئٹر نے بھارت میں اپنے تین میں سے دو دفاتر بند کردیے۔

بھارتی میڈیا کے مطابق ٹوئٹر کے مالک ایلون مسک نے دہلی اور ممبئی میں اپنے دفاتر بند کرتے ہوئے ملازمین کو گھروں سے کام کرنے کی ہدایت کردی ہے۔

میڈیا رپورٹس کے مطابق ٹوئٹر کے دفاتر کو بند کرنے کے فیصلے کو اخراجات میں کمی سے متعلق اقدام قرار دیا ہے۔

اس سے قبل ٹوئٹر نے بھارت میں اپنے 90 فیصد ملازمین کو فارغ کردیا تھا جس کے بعد اب دہلی اور ممبئی دفاتر کے حوالے سے اہم فیصلہ کیا گیا ہے۔

بھارتی میڈیا کے مطابق ٹوئٹر بنگلورو میں واقع اپنے آفس سے آپریشنز کو جاری رکھے گا۔

ٹوئٹر کا کنٹرول سنبھالنے کے بعد سے ایلون مسک اب تک دنیا بھر میں ٹوئٹر کے متعدد ملازمین کو فارغ کرچکے ہیں جب کہ کئی دفاتر بھی بند کیے جاچکے ہیں۔

چین کے ارب پتی سرمایہ کار بینکر باؤ فین پراسرار طور پر غائب ہوگئے ہیں۔

یہ بات ان کے قائم کردہ بینک China Renaissance Holdings (سی آر ایچ) کی جانب سے ہانگ کانگ ایکسچینج میں جمع کرائی گئی دستاویزات میں بتائی گئی۔

بینک کی جانب سے جاری بیان میں بتایا گیا کہ ہمیں باؤ فین کی عدم دستیابی کے بارے میں کچھ علم نہیں اور گزشتہ چند دن سے ان سے رابطہ نہیں ہوسکا۔

بیان میں یہ نہیں بتایا گیا کہ باؤ فین کو غائب ہوئے کتنا عرصہ ہوچکا ہے، مگر میڈیا رپورٹس کے مطابق باؤ فین 2 دن سے اپنے دفتر نہیں آئے اور ان سے رابطے کی کوششیں بھی ناکام ثابت ہوئیں۔

رپورٹس میں بتایا گیا کہ سی آر ایچ کے صدر کونگ لین کے خلاف ستمبر 2022 سے تحقیقات کی جا رہی ہے۔

باؤ فین کا شمار چین کی ٹیکنالوجی صنعت کے اہم ترین ڈیل میکرز میں ہوتا ہے جو متعدد بڑی کمپنیوں کے معاملات کی نگرانی کرتے ہیں۔

انہوں نے امریکی کمپنی مورگن اسٹینلے میں ایک بینکر کے طور پر کیرئیر کا آغاز کیا تھا اور 2005 میں سی ایچ آر کی بنیاد رکھی تھی۔

خیال رہے کہ اس سے قبل بھی چین میں چند بڑے سرمایہ کار پراسرار طور پر گمشدہ ہوئے اور کئی ماہ یا سال بعد دوبارہ سامنے آئے۔

جاپان نے ملک میں شرح آبادی میں آنے والی ڈرامائی کمی پر قابو پانے کے لیے دفاعی بجٹ سے بھی دوگنا زیادہ رقم خرچ کرنے کا فیصلہ کیا ہے۔

یہ اعلان جاپان کے وزیراعظم فومیو کشیدا نے کیا۔

انہوں نے کہا کہ جاپان میں شرح آبادی میں اضافے کے لیے مختلف اقدامات کیے جائیں گے۔

انہوں نے بتایا کہ شرح آبادی میں اضافے کے لیے 200 کھرب ین (390 کھرب پاکستانی روپے سے زائد) خرچ کیے جائیں گے تاکہ جوڑوں میں زیادہ بچوں کے حصول کی حوصلہ افزائی ہوسکے۔

مجموعی طور پر  جاپانی جی ڈی پی کا 4 فیصد حصہ اس مقصد کے لیے خرچ کیا جائے گا جبکہ دفاعی بجٹ کے لیے جی ڈی پی کا 2 فیصد حصہ مختص کیا جائے گا۔

یہ اعلان اس وقت سامنے آیا ہے جب جاپانی حکومت کی جانب سے بچوں اور خاندانوں کے حوالے سے ایک نئے ادارے کو تشکیل دینے کی تیاری کی جا رہی ہے تاکہ لوگوں میں شادی اور اولاد کے حصول کے رجحان کی حوصلہ افزائی کی جاسکے۔

یہ نیا ادارہ شادی شدہ جوڑوں کو مختلف امور میں معاونت بھی فراہم کرے گا اور اپریل 2023 سے اپنا کام شروع کرے گا۔

جاپانی حکومت نے حال ہی میں ماہرین کی ایک کمیٹی بھی تشکیل دی تھی تاکہ آبادی کی شرح میں نمایاں کمی کے مسئلے کے حوالے سے لائحہ عمل تیار کیا جاسکے ۔

ابھی یہ تو واضح نہیں کہ جاپانی حکومت کی جانب سے جوڑوں کے لیے کس طرح کی مراعات کا اعلان کیا جاسکتا ہے مگر امکان ہے کہ 2 سے زائد بچوں پر ٹیکسوں میں چھوٹ دی جائے گی جبکہ ڈے کیئر مراکز جیسی سہولیات بھی فراہم کی جائیں گی۔

2017 میں جاپان کی آبادی 12 کروڑ 80 لاکھ تھی جو 2021 میں گھٹ کر 12 کروڑ 50 لاکھ تک پہنچ گئی۔

کورونا وائرس کی وبا سے قبل ایک تحقیق میں بتایا گیا تھا کہ رواں صدی کے اختتام تک جاپان کی آبادی مسلسل کمی کے بعد 5 کروڑ 30 لاکھ ہو جائے گی ۔

نیو دہلی :بھارت کی ریاست ہریانہ میں دو مسلمانوں کو مبینہ طور پرکار سمیت زندہ جلادیا گیا۔

بھارتی میڈیا رپورٹس کے مطابق دونوں افراد کو بدھ کے روز اغوا کیا گیا تھا اور اگلے روز جلی ہوئی  کار سے ان کی نعشیں برآمد ہوئیں ، نعش  ملنے کے واقعے کے اگلے دن 5 ملزمان کیخلاف اغوا کا مقدمہ درج کرلیا گیا ہے۔

مقتولین کے اہل خانہ کی جانب سے درج کرائے گئے مقدمے کے مطابق جاں بحق ناصر 25 اور جنید کی عمر 35 برس تھی جنہیں راجستھان سے اغوا کیا گیا۔

بھارتی پولیس کے مطابق اس بات کی تحقیقات کی جارہی ہیں کہ واقعے میں گائے کی حفاظت کرنے والے انتہاپسند تو شامل نہیں کیونکہ جنید پر گائے کی سمگلنگ کے 5 مقدمات درج تھے جبکہ ناصر کا کوئی مجرمانہ ریکارڈ موجود نہیں ہے۔

بھارتی میڈیا کے مطابق مونو مانیسر، لوکیش سنگھیا، رنکو سینی، انیل اور سری کانت پر مسلمان افراد کے اغوا کا الزام لگایا گیا ہے ، ان پانچوں ملزمان کا تعلق اس انتہا پسند مذہبی تنظیم سے ہے جو گائے کے محافظ ہونے کا دعویٰ کرتی ہے ۔

آکلینڈ:نیوزی لینڈ میں گبرئیل نامی سمندری طوفان کے باعث مختلف حادثات میں ہلاک افراد کی تعداد 5 ہوگئی جبکہ 100افراد تاحال لاپتا ہیں ۔

غیر ملکی خبر ایجنسی کے مطابق نیوزی لینڈ میں طوفانی بارشوں کے بعد آنے والے سیلاب کے باعث 10 ہزار سے زائد افراد بے گھر ہوگئے ہیں ۔

طوفان کی بگڑتی صورتحال کے باعث نیوزی لینڈ کے وزیراعظم کا کہنا ہے کہ امریکہ اور دوسرے ممالک کی جانب سے امداد کی پیشکش قبول کرلی گئی ہے ۔

حکام کا کہنا ہے کہ متاثرہ علاقوں میں بحالی کی کوششیں جاری ہیں ، کچھ شہروں میں رابطے اور رسائی کے ذرائع بدستور منقطع ہیں جبکہ لاکھوں لوگ بجلی سے بھی محروم ہیں۔

خبر ایجنسی کے مطابق نیوزی لینڈ کو تباہ شدہ سڑکوں، گھروں اور پُلوں کو بحال کرنے کے لیے مہینوں تک جاری رہنے والی کوششوں کا سامنا ہے ، متاثرہ علاقوں میں ہیلی کاپٹروں کی مدد سے پانی، خوراک اور فیول آبادی تک پہنچایا جا رہا ہے ۔

دوسری جانب محکمہ موسمیات نے نیوزی لینڈ کے مشرقی حصوں میں مزید بارشوں کی پیشگوئی کی ہے۔

سمندری طوفان کی شدت کے پیش نظر ملک بھر میں ایمرجنسی نافذ ہے ، 2019 کے کرائسٹ چرچ حملوں اور کوویڈ 19 وبا کے بعد ملک کی تاریخ میں تیسری بار ہنگامی حالت کا اعلان کیا گیا ہے ۔
 

سیئول : شمالی کوریا کے رہنما کم جونگ ان کی بیٹی جیسا نام رکھنے پر ملک میں پابندی عائد کردی گئی ۔

غیرملکی میڈیا کے مطابق شمالی کوریا میں اب لڑکیوں کا نام کم جونگ ان کی بیٹی جیسا نہیں رکھا جائے گا ، شمالی کوریا کے رہنما کم جونگ ان کی بیٹی کا نام جو اے (Ju Ae) ہے جس کی عمر 10 سال ہے ۔

کم جونگ ان رواں ہفتے کئی اہم ریاستی تقریبات میں اپنی بیٹی کے ساتھ منظر عام پر آئےتھے ،  شمالی کوریا میں اس نام کی دیگر لڑکیوں پر نام تبدیل کرنے کیلئے دباؤ ڈالا جارہا ہے اور تمام رجسٹرڈ لڑکیوں و خواتین کو کہا گیا ہے کہ وہ ایک ہفتے کے اندر اپنے نام تبدیل کرلیں ۔

رپورٹس کے مطابق ماضی میں شمالی کوریا نے شہریوں کو اپنے رہنماؤں اور ان کے قریبی خاندانوں کے نام استعمال کرنے سے روک دیا تھا۔

میڈیا رپورٹس کے مطابق کم جونگ ان کی 2 بیٹیاں اور ایک بیٹا ہے لیکن ابھی تک صرف ان کی بیٹی ہی مختلف تقریبات میں سامنے آئی ہیں ۔

واضح رہے کہ گزشتہ برس شمالی کوریا کے رہنما کم جونگ ان پہلی مرتبہ اپنی بیٹی کو منظر عام پر لائے تھے۔

غیرملکی خبر ایجنسی کے مطابق سری لنکا کے وزیر توانائی نے صحافیوں سے گفتگو میں کہا کہ آئی ایم ایف شرائط کے مطابق بجلی کے نرخوں میں دوبارہ اضافہ کرنا پڑا ،  بجلی کی قیمتیں برقرار رکھنے کے لیے خزانے سے ہینڈ آؤٹ حاصل نہیں کرسکتے۔

وزیر توانائی نے مزید کہا کہ اخراجات پورے کرنے کے لیے ریونیو پیدا کرنے کی ضرورت ہے، آمدنی میں اضافے سے بجلی کے لیےضروری ایندھن خریدنے کے قابل ہوں گے۔

غیرملکی خبر ایجنسی کے مطابق سری لنکا میں بجلی کے نرخوں میں 6 ماہ قبل 264 فیصد اضافہ کیا گیا تھا۔

رپورٹس کے مطابق سری لنکن حکومت آئی ایم ایف کے ساتھ ریسکیو پیکج کو حتمی شکل دینے کے آخری مراحل میں ہے ، سری لنکا 51 ارب ڈالر کے غیر ملکی قرض ادا نہیں کرسکا تھا جس کے بعد حکومت نے اپریل 2022میں ڈیفالٹ کا اعلان کردیا تھا

واشنگٹن: امریکی حکام نے دعویٰ کیا ہے کہ انہوں نے منگل کو شام میں ایک ایرانی ساختہ ڈرون مار گرایا، جو کہ مبینہ طور پر ایک فوجی بیس کی جاسوسی کر رہا تھا۔

امریکہ کی سینٹرل کمانڈ نے ٹوئٹر پیغام میں کہا کہ شمال مشرقی شام میں مشن سپورٹ سائٹ کونوکو کی جاسوسی کرنے کی کوشش کرنے والے ایک ایرانی ساختہ ڈرون کو مار گرایا گیا۔

غیر ملکی خبر رساں ادارے کے مطابق امریکی دفاعی حکام نے منگل کو دعویٰ کیا کہ ایران یوکرین میں روس کی جنگ کے لیے ڈرون فراہم کر رہا ہے۔

تہران کی شمولیت کو ظاہر کرنے کے لیے امریکہ نے مبینہ طور پر ایرانی بغیر پائلٹ کے طیاروں کی تصاویر اور ان کے بارے میں تجزیہ جاری کیا۔

ممبئی:بھارت کا مکروہ چہرہ دنیا کے سامنے بے نقاب کرنا بی بی سی کا جرم بن گیا، مودی کو خوش کرنے کیلئے انکم ٹیکس حکام اور پولیس نے دہلی اور ممبئی میں برطانوی نشریاتی ادارے کے دفاتر پر دھاوا بول دیا۔

دستاویزی فلم میں مودی کو بھارتی گجرات میں قتل عام کا ذمہ دار ٹھہرانے پر مودی سرکار آپے سے باہر ہو گئی، انتقام کی آگ میں جلتی مودی حکومت آزادی اظہار رائے کی اہمیت بھی بھول گئی۔

دہلی اور ممبئی میں بی بی سی کے دفاتر پر دھاوے کے دوران پولیس نے دفتر میں موجود صحافیوں سے اُن کے فون، لیپ ٹاپ اور دیگر دستاویزات قبضے میں لے لیں۔

بھارتی حکمران جماعت کے ترجمان نے بی بی سی کو کرپٹ ادارہ قرار دیتے ہوئے کہا کہ بی بی سی اور کانگریس کا ایجنڈا ایک ہی ہے۔

دوسری طرف اپوزیشن جماعت کانگریس نے بی بی سی دفاتر پر چھاپوں کی مذمت کی اور کہا کہ دستاویزی فلم کے معاملے پر بی بی سی کو نشانہ بنایا جا رہا ہے۔

دفاتر پر چھاپے کے ردعمل میں بی بی سی انتظامیہ کا کہنا ہے کہ بھارتی انکم ٹیکس حکام کیساتھ مکمل تعاون کیا جا رہا ہے، امید ہے کہ یہ صورتحال جلد حل ہو جائے گی۔