Category انٹرنیشنل

کیلیفورنیا: امریکی ریاست کیلی فورنیا میں طوفانی بارشوں کے بعد مٹی اور کیچڑ کے تودوں سے پیش آنے والے حادثات میں کم از کم 13 افراد ہلاک جب کہ سیکڑوں لاپتہ اور زخمی ہوگئے ہیں۔غیر ملکی خبر رساں ادارے کے مطابق

دنیا کے دیگر ملکوں کی طرح امریکا بھی موسمیاتی تبدیلیوں کے زیر اثر ہے، جس کی ایک مثال ریاست کیلیفورنیا میں قحط سالی اور شدید گرمی کے باعث جنگل میں لگنے والی امریکی تاریخ کی خوفناک ترین آگ اور اس کے کچھ ہی دنوں بعد شدید بارشیں ہیں۔کیلی فورنیا کا علاقہ سانتا باربرا شدید گرمی کے بعد ہونے والی شدید بارشوں کی وجہ سے سب سے زیادہ متاثر ہوا ہے ۔ جہاں اب تک 13 افراد کی ہلاکتوں کی تصدیق کی جاچکی ہے۔ اس کے علاوہ کم از کم 20 افراد زخمی ہیں جن میں سے 4 کی حالت تشویشناک بتائی جا رہی ہے۔سیلاب اور کیچڑ کے سبب ساحلی ریل لائن تقریبا 50 کلومیٹر تک بند ہے، ماہرین کا کہنا ہے کہ بارش کے ساتھ مٹی کے تودے اسی علاقے میں آئے ہیں جہاں گزشتہ ماہ جنگل کی آگ سے تباہی ہوئی تھی۔سانتا باربرا کاؤنٹی کی ترجمان امبر اینڈرسن کا کہنا ہے کہ درجنوں لوگ سمندر اور جنگل کے درمیان محصور ہوکر رہ گئے ہیں، جن کی تلاش کے لیے سراغ رساں کتوں، ہیلی کاپٹرز اور دیگر ذرائع استعمال کئے جارہے ہیں۔دوسری جانب

طوفانی بارشوں کے باعث واشنگٹن ڈی سی ،نیویارک سٹی ، بالٹی مور، فلاڈیلفیا اور بوسٹن سمیت کئی شہروں میں نظام زندگی درہم برہم ہے، ہزاروں پروازیں تاخیر کا شکار اور سیکڑوں منسوخ کردی گئی ہیں۔ امریکی محکمہ موسمیات نے رواں ہفتے کے آ خر میں وسط مغربی اور شمال مشرقی ریاستوں میں نئے سمندری طوفان کی وارننگ جاری کردی ہے جبکہ شدید بارشوں کا بھی امکان ظاہر کیا گیا ہے۔
(بشکریہ ایکسپریس)

(بشکریہ‌جنگ)
سعودی عرب اور بھارت کے درمیان سالانہ حج معاہدہ طے پا گیا ہے جس کے تحت بھارت بحری راستے سے عازمینِ حج کو جدہ بھیجے گا۔

اس سلسلے میں بھارت کے مرکزی وزیر مملکت برائے اقلیتی امور مختار عباس نقوی کا کہنا ہے کہ سعودی عرب نے اس پلان کی منظوری دے دی ہے اور آئندہ برس تک اس پر عملدرآمد شروع کر دیا جائے گا۔

اس اقدام سے حاجیوں کے سفری اخر اجات کو نمایاں طور پر کم کرنے میں مدد ملے گی۔

خیال رہے کہ سمندری راستہ حاجیوں کو سعودیہ بھیجنے کیلئے پہلے بھی استعمال کیا جاتا تھا لیکن 1995ء میں اس پر پابندی عائد کر دی گئی تھی۔

اس کے علاوہ بھارت کی نئی حج پالیسی کے مطابق پہلی بار خواتین محرم کے بغیر حج کیلئے جا سکیں گی۔

ان خواتین حاجیوں کیلئے علیحدہ رہائش اور ٹرانسپورٹ کا اہتمام کیا گیا ہے۔ تقریباً 1300؍ سے زائد خواتین نے حج کی درخواست جمع کرائی ہے۔

(بشکریہ‌جنگ)
بھارتی ریاست اترپردیش میں 20 جنوری سے اذانوں کی آوازیں نہیں آئیں گی۔حکام نے مساجد، مندر اور گرجا گھروں سے لاؤڈ اسپیکر ہٹانے کا فیصلہ کرلیا ہے۔

میڈیا ذرائع کے مطابق ریاست میں 20 جنوری سے پبلک ایڈریس سسٹم ہٹا دیئے جائیں گے جس کے بعد مساجد میں اذان کے لیئے بھی لاؤڈ اسپیکر استعمال نہیں ہوسکیں گے۔

واضح رہے کہ 20 دسمبر کو الہ آبادہائی کورٹ کے لکھنؤ بینچ نے ریاستی حکومت سے استفسار کیا تھا کہ آیا مساجد، مندروں اور گرجا گھروں میں لاؤڈ اسپیکرز اور پبلک ایڈریس سسٹم انسٹال کرنے کے لیے اجازت طلب کی گئی تھی یا نہیں۔

عدالت کی جانب سے 10 صفحات پر مشتمل آرڈر میں نے ریاستی حکومت کو حکم دیا گیا تھا کہ ایسے تمام مذہبی یا عوامی مقامات کی نشاندہی کی جائے جہاں بغیر اجازت لاؤڈ اسپیکرز لگائے گئے ہیں۔

استنبول (اے این این)ترک صدر رجب طیب ایردوآن نے کہا ہے کہ ان کی حکومت ترکی کی یورپی یونین میں شمولیت کی بار بار درخواست نہیں دے گی۔ دوسری جانب فرانسیسی صدر ایمانویل میکرون نے کہا ہے کہ ترکی اور فرانس کے مفادات اور چیلنجز مشترک ہیں۔ فلسطینی میڈیا رپورٹس کے مطابق پیرس میں الیزیہ محل میں فرانسیسی صدر میکرون کے ہمراہ ایک مشترکہ پریس کانفرنس سے خطاب کرتے ہوئے ترک صدر کا کہنا تھا کہ ان کا ملک یورپی یونین میں شمولیت کے انتظار میں تھک گیا ہے۔ یورپی یونین کی طرف سے ترکی کے ساتھ کیے گئے وعدے بالخصوص شامی پناہ گزینوں کے حوالے سے کیے گئے عہد ایفا نہیں کیے ہیں۔صدر ایردوآن نے ترکی اور فرانس کے درمیان تعلقات کوخوش آئند قرار دیا اور کہا کہ دونوں ملکوں کے درمیان آنے والے دنوں میں تعلقات مزید مستحکم ہوں گے۔ ترک صدر کا کہنا تھا کہ دہشت گردی ترکی اور فرانس دونوں کا مشترکہ مسئلہ ہے۔ دہشت گردی کے خلاف جنگ جاری رکھی جائے گی۔ ترکی نے دہشت گردی کے خلاف جنگ میں بھاری قیمت چکائی ہے۔اس موقع پر فرانسیسی صدر بے کہا کہ ترکی اور فرانس کیدرمیان باہمی شراکت کے فروغ کے ساتھ اختلافات کو کم کرنا ہوگا۔ انہوں نے توقع ظاہر کی کہ ترکی شمالی اوقیانوس کے فوجی اتحاد نیٹو میں اپنی شمولیت برقرار رکھے گا۔صدر ایردوآن نے کہا کہ ترکی کو دہشت گردی سے دہرا خطرہ ہے۔ کردستان ورکرز پارٹی دہشت گرد گروپ ہے۔

تہران (اے این این)مغربی ایران میں ہفتے کے روز5 اعشاریہ 1کے زلزلے میں زخمی افراد کی تعداد 21ہوگئیں۔ہفتے کے روز ایران کے متاثرہ علاقے میں زلزلے کے5 آفٹرشاکس محسوس کیے گئے جن کی شدت2 اعشاریہ 7سے 5 اعشاریہ 1ریکارڈ کی گئی۔زلزلے کے جھٹکے قصریں شیریں اورگلان غرب میں بھی محسوس کیے گئے۔اسپتال ذرائع کے مطابق 2شدید زخمیوں کو کرمان شاہ کے اسپتال منتقل کردیا گیا ہے دیگر معمولی زخمیوں کو ابتدائی طبی امداد کے بعد اسپتال سے فارغ کردیا گیا۔

رانچی(اے این این)بھارت کی عدالت نے معروف سیاستدان لالو پرساد یادیو کوچارہ سکینڈل کیس میں ساڑھے3 سال کی قید اور 5 لاکھ جرمانہ کی سزا سنادی ہے۔ گزشتہ سال 3دسمبر کو بھارتی ریاست جھاڑکھنڈ کے شہر رانچی کی عدالت نے لالو پرساد کو چارہ سکینڈل کیس میں فرد جرم عائدکرتے ہوئے گرفتار کرنے کا حکم دیا تھا۔ بہارکے سابق وزیراعلی لالو پرسادکوچارہ سکینڈل میں 80 لاکھ سے زائد غبن کا الزام ثابت ہونے پر گرفتار کیاگیا تھا۔ گذشتہ روز عدالت نے اس مقدمے میں سابق وزیراعلی کو قید اور جرمانے کی سزا سنا دی ہے۔

بیجنگ(اے این این) چین کے مختلف علاقوں میں برفانی طوفان کی تباہی جاری ہے صوبے انہوئی میں گزشتہ تین دن کے دوران سے کم سے کم 13 افراد ہلاک ہوگئے ہیں، انتظامیہ کی جانب سے بلیوالرٹ جاری کردی گئی۔چین کے نیشنل کمیشن فار ڈیزاسٹرریڈکشن کے مطابق چین کے 9صوبوں میں شدید برفباری کے باعث ایمرجنسی نافذ کردی گئی ہے جبکہ شہریوں کو غیرضروری طورپرگھروں سے نہ نکلنے کی ہدایت کی گئی ہے۔چین کے مختلف صوبوں شانزی ، شینزی ، ہینان ، انہوئی اورہیبی کے بعض حصوں میں 20سینٹی میٹر تک برف پڑچکی ہے جس کے باعث چینی معیشت کوتقریبا 190ملین ڈالر کا نقصان اٹھانا پڑرہا ہے، 1.06 ملین افراد برفباری سے متاثر ہورہے ہیں جبکہ چین کے محکمہ موسمیات نے خبردار کرتے ہوئے بتایا ہے کہ برفباری کا سلسلہ آئندہ دو روز تک جاری رہے گا۔چین کے شمال مغربی ، مرکزی اور مشرقی علاقوں میں نئے سال کی یہ پہلی برفباری تھی جو بدھ سے شروع ہوئی اور آج اتوار تک جاری رہنے کا امکان ہے ، شدید برفباری اور برفانی ہوائوں کے باعث مرکزی اور مشرقی چین میں اب تک 10افراد کے ہلاک ہونے کی اطلاعات ہیں۔

واشنگٹن(اے این این) امریکی صدر ڈونلڈ ٹرمپ نے کہا ہے کہ وہ ایٹمی پروگرام کے معاملے پر شمالی کوریا کی حکومت سے براہ راست بات چیت کے لیے تیار ہیں اس کے لیے وہ کم جونگ ان کو فون بھی کرسکتے ہیں۔کیمپ ڈیوڈ میں نیوز کانفرنس کے دوران امریکی صدر سے ایک صحافی نے پوچھا کہ شمالی کوریا کے ایٹمی پروگرام کے معاملے پر کیا آپ ان کی حکومت سے بات چیت کرسکتے ہیں؟ ٹرمپ نے جواب دیا کہ یقینا، میں بات چیت پر ہمیشہ یقین رکھتا ہوں۔امریکی صدر نے جواب میں کہا کہ مذاکرات کیلئے کم جونگ ان سے بھی بات کرسکتا ہوں اور انہیں فون بھی کرسکتا ہوں، اگر مذاکرات سے ہم انتہائی پرامن اور بہترین حل کی طرف چلے جائیں تو یہ پوری انسانیت اور پوری دنیا کیلئے ایک بہتر اقدام ہوگا۔دریں اثنا ڈونلڈ ٹرمپ نے امید ظاہر کی کہ اگلے ماہ جنوبی کوریا میں ہونے والے سرمائی اولمپکس میں شمالی کوریا تعاون کرے گا۔واضح رہے کہ 2017 کے دوران شمالی کوریا نے ایٹم بموں کے علاوہ کئی بیلسٹک میزائلوں کے بھی کامیاب تجربات کرتے ہوئے امریکا کو براہ راست دھمکی دی تھی جب کہ متعدد مرتبہ جوہری میزائل تجربے کے سبب اقوام متحدہ اور امریکا کی جانب سے شمالی کوریا پرسخت اقتصادی پابندیاں عائد کی گئی ہیں۔

کابل (اے این این ) امریکی محکمہ دفاع نے پاکستان کے ردعمل کی صورت میں افغانستان میں فوجیوں کو سپلائی جاری رکھنے کے لیے مختلف تجاویز پر غور شروع کردیا ہے۔میڈیا رپورٹس کے مطابق افغانستان میں اتحادی فوج کے ترجمان لیفٹننٹ کرنل کون فاکنر نے بتایا کہ افغانستان نیشنل ڈیفنس سیکورٹی فورسز کی تربیت اور مشن میں معاونت کے لیے فوجی ساز و سامان کی مسلسل ترسیل کے لیے متعدد منصوبے تیار کر رکھے ہیں۔ذرائع کے مطابق افغانستان میں فورسز کو سامان کی ترسیل کے لئے منصوبوں میں ایک منصوبہ چارٹرڈ طیاروں کے ذریعے سامان کو پہنچانا بھی شامل ہے۔ پاکستان نے 2011 میں امریکا سے تعلقات میں کشیدگی کے بعد اپنی حدود سے جانے والی امریکی فوجیوں کی سپلائی معطل کردی تھی جس کے بعد امریکا نے چارٹرڈ طیاروں کے ذریعے ساز و سامان کی ترسیل کا عمل جاری رکھا۔ 2011 میں امریکا نے فوجیوں کی رسد کے لئے طیاروں یا پھر شمالی راستہ اپنایا جو روس اور وسط ایشیائی ریاستوں سے ہوتا ہوا افغانستان جاتا ہے لیکن یہ آپشن اسے بہت مہنگا پڑا تھا۔خیال رہے کہ یکم جنوری کو امریکی صدر ڈونلڈ ٹرمپ کی جانب سے پاکستان مخالف ٹوئٹ کے بعد سے دونوں ممالک کے درمیان کشیدگی میں اضافہ ہوگیا ہے۔ اس سے قبل امریکی اخبار نے انتباہ کیا تھا کہ امریکا کو دی گئی رسائی پاکستان کسی بھی لمحے بند کرسکتا ہے۔اخبار کا مزید کہنا تھا کہ صدر ٹرمپ اس بات کے متحمل نہیں ہوسکتے کہ پاکستان کو چھوڑ دیں تاہم ٹرمپ کے پاکستان کے خلاف فیصلے سے لگتا نہیں کہ ان کے پاس اثرات سے نمٹنے کی پالیسی موجود ہے ۔

واشنگٹن(اے این این )امریکی اخبار نے صدر ٹرمپ کو خبردار کیا ہے کہ پاکستان کے ساتھ پنگے نہ لئے جائیں ،پاکستان کسی بھی لمحے امریکہ کی افغان رسائی بندکر سکتا ہے، امریکہ پاکستان کو چھوڑنے کا متحمل نہیں ہو سکتا، ٹرمپ کا پرانے پارٹنرز کو امریکا سے دور کرنے کا فیصلہ چین کے لیے فائدہ مند ثابت ہوگا ، پاکستان کے ساتھ تعلقات بہتر بنانے کیلئے سعودی عرب اور متحدہ عرب امارات سے مدد لی جائے ۔امریکا کے صف اول کے اخبار نیو یارک ٹائمز نے اپنے اداریے میں خبردار کیا کہ صدر ٹرمپ اس بات کے متحمل نہیں ہوسکتے کہ پاکستان کو چھوڑ دیں تاہم ٹرمپ کے پاکستان کے خلاف فیصلے سے لگتا نہیں کہ ان کے پاس اثرات سے نمٹنے کی پالیسی موجود ہے ۔امریکی اخبار کے مطابق ٹرمپ کا پرانے پارٹنرز کو امریکا سے دور کرنے کا فیصلہ چین کے لیے فائدہ مند ثابت ہوگا جب کہ ٹرمپ انتظامیہ کو دیگر سفارتی طریقے اپنانے چاہییں۔امریکی اخبار نے ٹرمپ کو انتباہ کیا کہ سعودی عرب اور امارات سے تعلقات استعمال میں لانے چاہییں اور امریکا کو پاکستان سے تعاون کے لیے شور مچانے کے بجائے خاموش بات چیت کرنے کی ضرورت ہے۔نیو یارک ٹائمز کے مطابق پاکستان نے اہم خفیہ معلومات اکثر امریکا کو فراہم کی ہیں اب یہ دیکھنا ہوگا کہ امداد منجمد کرنے پر پاکستان تعاون کرتا بھی ہے یا نہیں ۔امریکی اخبار کے مطابق افغانستان کے لیے ہر فوجی پرواز پاکستانی فضا سے گزرتی ہے، زیادہ ترسپلائی پاکستانی ریل یا روڈ سے ہوتی ہے تاہم امریکا کو دی گئی رسائی پاکستان کسی بھی لمحے بند کرسکتا ہے۔اخبار نے اپنے اداریے میں امریکی صدر کو مشورہ دیا ہے کہ سعودی عرب اور متحدہ عرب امارات کے ذریعے طالبان کی خلیج فارس میں فنڈز اکھٹا کرنے کی کوشش ناکام بنانا چاہیے۔خیال رہے کہ 2018 کے آغاز کے ساتھ ہی پاکستان اور امریکا کے درمیان تعلقات میں تنا پیدا ہوگیا ہے۔ڈونلڈ ٹرمپ نے یکم جنوری کو ٹوئٹر پر اپنے پیغام میں پاکستان کو تنقید کا نشانہ بناتے ہوئے کہا تھا کہ ہم نے گزشتہ 15 سالوں کے دوران پاکستان کو 33 ملین ڈالر امداد دے کر حماقت کی جبکہ بدلے میں پاکستان نے ہمیں دھوکے اور جھوٹ کے سوا کچھ نہیں دیا