Category انٹرنیشنل

(میڈیا پاکستان) ویسے تو 71 سالہ ڈونلڈ ٹرمپ کی زیادہ تر ٹیم نوجوانوں پر مشتمل ہے۔ان کی نوجوان ٹیم میں ان کے 36 سالہ داماد جیرڈ کشنر جو صدر کے سینیئر ایڈوائزر ہیں سمیت وائٹ ہاؤس کی بغیر تنخواہ کی ملازم 35 سالہ ایوانکا ٹرمپ بھی شامل ہیں جو ڈونلڈ ٹرمپ کی بڑی صاحبزادی ہیں۔عمر رسیدہ امریکی صدر کی نوجوان ٹیم کے دیگر ارکان میں وائٹ ہاؤس کی پریس سیکریٹری 36 سالہ سارہ ہیکبی سینڈرس بھی شامل ہیں، اور اب ان کی ینگ ٹیم میں مزید ایک لڑکی شامل ہوگئی، جو دیگر تمام جوانوں سے بھی زیادہ جوان ہیں۔ڈونلڈ ٹرمپ نے اپنی ٹیم میں 29 سالہ ہوپ ہکس کو بھی شامل کرلیا ہے، جو وائٹ ہاؤس کے ڈائریکٹر کمیو کیشن کی ذمہ داریاں نبھائیں گی۔یہ وہ عہدہ ہے جس سے ڈونلڈ ٹرمپ گزشتہ 6 ماہ کے دوران 46 سالہ سین اسپائسر اور اتنی ہی عمر کے اینتھونی اسکارا کو عہدوں سے الگ کرچکے ہیں۔اگرچہ سین اسپائسر وائٹ ہاؤس کے پریس سیکریٹری بھی تعینات رہے، تاہم وہ کچھ عرصہ ڈائریکٹر کمیونی کیشن بھی رہے۔سلیبرٹی انسائیڈر کے مطابق اب ڈونلڈ ٹرمپ نے 29 سالہ ہوپ ہکس کو اس اہم ترین عہدے پر عارضی بنیادوں پر فائز کیا ہے، ان کی تقرری کا اعلان گزشتہ ماہ ستمبر میں ہی کردیا گیا تھا۔یہ پہلا موقع ہوگا کہ نوجوان ہوپ ہکس کسی سیاسی، حکومتی وریاستی عہدے پر خدمات سرانجام دیں گی، اس سے قبل وہ 2016 میں ڈونلڈ ٹرمپ کی صدارتی مہم چلانے والی ٹیم کا حصہ تھیں۔ہوپ ہکس ڈونلڈ ٹرمپ کی صدارتی مہم چلانے والی ٹیم کا حصہ بننے سے قبل ٹرمپ آرگنائیزیشن کی ملازمہ تھیں، انہیں 2014 میں ایوانکا ٹرمپ نے اپنی فیشن کمپنی میں ملازم کے طور پر بھرتی کیا تھا۔ہوپ ہکس امریکی ریاست کنیکٹی کٹ میں پیدا ہوئیں، اور وہیں تعلیم حاصل کی، تعلیم مکمل ہونے کے بعد ہوپ ہکس نے ماڈلنگ کا آغاز کیا، لیکن جلد ہی ایوانکا ٹرمپ کی فیشن کمپنی سے منسلک ہوگئیں۔ایوانکا ٹرمپ کی کمپنی میں ملازمت اختیار کرنے کے بعد جب وہ ٹرمپ ٹاور پہنچیں تو جلد ہی انہوں نے ڈونلڈ ٹرمپ کا اعتماد حاصل کرلیا، اور وہ ان کے ساتھ متعدد میٹنگز میں دیکھی گئیں۔معروف امریکی میگزین فوربز نے رواں برس باثر انڈر 30 کی فہرست میں ہوپ ہکس کا نام بھی شامل کیا تھا۔نوجوان ترین لڑکی کو وائٹ ہاؤس کا کمیونی کیشن ڈائریکٹر تعینات کیے جانے کے بعد ہوپ ہکس کے امریکی میڈیا اور سوشل میڈیا پر چرچے ہیں۔

ریاض (میڈیا پاکستان) امریکی سیکریٹری خارجہ ریکس ٹلرسن سعودی عرب کے شاہ سلمان سے دارالحکومت ریاض میں ملاقات کر رہے ہیں۔ ان کا یہ دورہ خطے کے ممالک کے درمیان تعلقات بہتر بنانے اور ایران کے اثر کو کم کرنے کی کوشش کا حصہ ہے۔ریکس ٹلرسن عراق اور سعودی عرب کے درمیان ہونے والے اس اہم اجلاس میں بھی شرکت کریں گے جس میں مشترکہ تعاون کونسل کے قیام پر غور کیا جائے گا۔ اس کونسل کے بارے میں امید ظاہر کی جارہی ہے کہ یہ برسوں کے کشیدہ تعلقات کے بعد تعاون کی فضا قائم کرے گی۔توقع ہے کہ امریکی وزیرِ خارجہ سعودی عرب اور اس کے دیگر اتحادیوں پر قطر کے بائیکاٹ کو ختم کرنے پر بھی زور دیں گے۔خیال رہے کہ قطر پر سعودی عرب نے اسلامی شدت پسندوں کی مدد کرنے کا الزام عائد کیا ہے جس سے قطر انکار کرتا رہا ہے۔سنیچر کے روز سعودی وزیر خارجہ عادل الجبیر کے ساتھ عشائیے پر ملاقات کے بعد اتوار کو ریکس ٹلرسن کی ملاقات دیگر سعودی رہنماؤں سے طے ہے جس کے بعد وہ دوحہ روانہ ہو جائیں گے۔سعودی عرب اور دوحہ کے دورے کے دوران توقع کی جا رہی ہے کہ ریکس ٹلرسن خطے میں ایران کے بڑھتے ہوئے اثر و رسوخ اور کئی ماہ سے جاری بحران کے بارے میں بھی گفتگو کریں۔سعودی عرب، بحرین، متحدہ عرب امارات اور مصر نے قطر کے ساتھ تعلقات جون کے مہینے سے منقطع کیے ہوئے ہیں۔اس سے قبل جولائی کے مہینے میں خطے کے دورے کے دوران بھی ریکس ٹلرسن خلیجی بحران کو ختم کرنے کی ایک کوشش کر چکے ہیں جس میں وہ کامیاب نہیں ہو سکے تھے۔حالیہ دورے پر سعودی عرب پہنچنے کے بعد بلوم برگ کو انٹر ویو دیتے ہوئے امریکی سیکریٹری خارجہ ریکس ٹلرسن نے کہا کہ ’مجھے بہت زیادہ امیدیں نہیں ہیں کہ یہ معاملہ جلد حل ہو جائے گا۔ ایسا لگ رہا ہے کہ معاملے کے حل کے لیے کچھ فریق آمادہ نہیں ہیں۔‘واضح رہے کہ اس دورے کے دوراں امریکی سیکریٹری خارجہ نئی دہلی کا بھی دورہ کریں گے جہاں ان کے بقول وہ انڈیا کے ساتھ 100 سالہ ’سٹریٹیجک پارٹنرشپ‘ کا آغاز کریں گے۔خبررساں ادارے اے ایف پی کے مطابق امریکی سیکریٹری خارجہ ریکس ٹلرسن اسلام آباد میں بھی قیام کریں جس کے دوران وہ انڈیا کی بالادستی سے متعلق پاکستان کے خوف کو کم کرنے کی کوشش کریں گے۔ لیکن اس دورے کے دوران توقع ہے کہ پاکستان پر شدت پسند گروپوں کے خلاف کارروائیاں مزید سخت کرنے کے لیے دباؤ بھی ڈالا جائے گا۔

مکہ(میڈیا پاکستان)سعودی عرب کے شہر مکہ مکرمہ کے نائب گورنر شہزادہ عبداللہ بن بندر نے حکم جاری کیا ہے کہ مکہ میں اب ٹیکسی صرف سعودی شہری ہی چلا سکیں گے۔سعودی روزنامہ کے مطابق مکہ کے نائب گورنر نے جدہ کے گورنر ہاؤس میں نائب وزیر محنت کی موجودگی میں ملازمتوں کی ‘سعودائزیشن’ پروگرام کا افتتاح کیا۔
اس موقع پر اظہار خیال کرتے ہوئے شہزادہ عبداللہ بن بندر نے اس امر پر زور دیا کہ مکہ میں ٹیکسی چلانےکی اجازت صرف سعودی شہریوں کو ہوگی۔
انہوں نے کہا کہ خاص طور پر حج وعمرہ سیزن کے دوران یہ استحقاق صرف سعودی شہریوں کو حاصل ہوگا، کوئی دوسری شہریت کا حامل فرد مکہ میں ٹیکسی چلانے کا مجاز نہیں ہوگا۔

نیویارک(میڈیا پاکستان) امریکی صدر ڈونلڈ ٹرمپ نے کہا ہے کہ ان کے برسراقتدار آنے میں سوشل میڈیا کا بہت بڑا کردار ہے جس کے استعمال کے بغیر وہ صدارتی الیکشن نہیں جیت سکتے تھے۔بین الاقوامی میڈیا کے مطابق صدر ٹرمپ نے حال ہی میں ایک امریکی ٹی وی چینل کو انٹرویو دیتے ہوئے بتایا کہ ان کی جیت کا سہرا سوشل میڈیا کے سرجاتا ہے جس کے بغیر ان کا امریکا کا صدر بننا بہت مشکل تھا۔
ڈونلڈ ٹرمپ نے کہا کہ وہ خود سوشل میڈیا استعمال کرتے ہیں جہاں پیغامات لکھنا ایسا ہی ہے جیسے ٹائپ رائٹر پر لکھنا، آج کل ہرکوئی سوشل میڈیا استعمال کرتا ہے جس کے ذریعے پیغام براہ راست پوری دنیا تک پہنچ جاتا ہے۔
امریکی صدر نے کہا کہ مجھے کچھ بھی کہنا ہوتا ہے وہ سوشل میڈیا کے ذریعے ہی کہہ دیتا ہوں اور براہ راست پیغام بھیجنے سے غیر شفاف میڈیا کوریج سے بچ جاتاہوں، اس کے علاوہ کوئی میرے بارے میں کچھ بھی کہتا ہے میں اس کا فوراً جواب دے دیتا ہوں، موجودہ دور میں سوشل میڈیا پیغام رسانی کا بہت زبردست پلیٹ فارم ہے۔

کرناٹک(میڈیا پاکستان) بھارت کی حکمران جماعت بی جے پی کے وزیر اسکل ڈیولپمنٹ اننت کمار نے ہرزہ سرائی کرتے ہوئے ریاست میسور کے مسلمان حکمران ٹیپو سلطان کو ظالم اور قاتل قرار دے دیا۔بھارت کی حکمران جماعت بی جے پی جہاں ملک میں اقلیتوں کو تحفظ فراہم کرنے میں بری طرح ناکام ہوچکی ہے وہیں اپنی ملکی تاریخ کو مسخ کرنے کے درپے ہے۔ گزشتہ چند روز سے بی جے پی کے وزرا اور رہنماؤں نے دنیا کے ساتویں عجوبے اور بھارت کے منفرد تفریحی مقام تاج محل کو اپنی سیاحت کے کتابچے سے نکال باہر کیا جب کہ ایک وزیر نے تو تاج محل کو بھارتی تاریخ پر بدنماداغ قرار دے دیا۔ بی جے پی کے رہنما بھارت کی تاریخ کو تبدیل کرنے کے لئے ہرطرح کے اوچھے ہتھکنڈے استعمال کررہے ہیں اور اب 18 ویں صدی میں ریاست میسور کے بادشاہ اور انگریزوں کے خلاف 4 جنگیں لڑنے والے ٹیپوسلطان بھی ہندو انتہا پسندی کے نشانے پر آگئے ہیں۔
ریاست کرٹانک میں بی جے پی کی حزب مخالف جماعت کانگریس نے 2015 میں ٹیپو سلطان کے یوم پیدائش کو ریاستی سطح پر منانے کا فیصلہ کیا تھا تاہم 2015 سے اب تک یہ فیصلہ متنازعہ بنا ہوا ہے۔ کانگریس نے ایک بار پھر رواں برس 10 نومبر کو ریاست میں ٹیپو سلطان کے یوم پیدائش کی مناسبت سے تقریب منعقد کرنے کا فیصلہ کیا ہے اور اس کے لئے ریاست سمیت مرکز کے تمام رہنماؤں کو بھی مدعو کیا گیا ہے تاہم بی جے پی کے مرکزی رہنما اننت کمار ہیگڑے نے ناصرف تقریب میں شرکت سے معذرت کردی بلکہ زہر اگلتے ہوئے ٹیپوسلطان کو ظالم، قاتل قرار دے دیا۔
اننت کمار ہیگڑے نے ریاستی حکومت کو خط لکھا ہے جس میں کہا ہے کہ مجھے اس طرح کی شرمناک تقاریب میں مدعو نہ کیا جائے اور آئندہ بھی اس بات کا خیال رکھا جائے، حکومت کو خط لکھنے سے بھی جی نہ بھرنے پر اننت کمار نے ٹویٹر پر دعوت نامے کو پوسٹ کرتے ہوئے تحریر کیا ہے کہ میں نے ایک ظالم، قاتل کو عزت دینے والی تقریب میں شرکت نہ کرنے کے حوالے سے کرناٹک حکومت کو مطلع کردیا ہے۔بی جے پی کے ممبر پارلیمنٹ شوبھا کرندلا نے بھی ہیگڑے کی بھرپور حمایت کرتے ہوئے کہا ہے کہ ٹیپوسلطان ایک ہندومخالف رہنما تھے جن کے یوم پیدائش کا انعقاد ریاست کا غلط اقدام ہے۔
دوسری جانب کرناٹک کے وزیر اعلیٰ سدھارمیا کا کہنا ہے کسی وزیر کو حکومت میں رہتے ہوئے اس قسم کا خط نہیں لکھنا چاہیے۔ ٹیپوسلطان کی سالگرہ کی تقریب میں شرکت کے لئے تمام مرکزی اور ریاستی وزرا کو دعوت نامے بھیجے گئے ہیں اس تقریب میں شرکت کرنا یا نہ کرنا ان کی اپنی مرضی پرہے۔

(میڈیا پاکستان) ویسے تو 2 دہائیاں قبل دنیا میں اسمارٹ فونز ہی نہیں تھے، تاہم جب اسمارٹ فونز آئے تو وقتاً بوقتاً اس کے ڈیزائن میں تبدیلیوں کے ٹرینڈ چل نکلے۔سب سے پہلے تو اسمارٹ فونز ایک ہی سم اور ایک ہی کیمرے کے ساتھ متعارف کرائے گئے، تاہم جلد ہی ان میں ڈوئل سم اور ڈوئل کیمرے جیسے فیچرز مقبول ہونے لگے۔آج کل تقریبا بڑی کمپنیوں کے زیادہ تر اسمارٹ موبائل ماڈلز میں ڈوئل کیمرے موجود ہیں، بعد میں بیزلیس، اور ہوم اسکرین بٹن کے علاوہ بھی اسمارٹ موبائل آنے لگے۔لیکن اب اسمارٹ فونزکمپنیوں کے درمیان فولڈ ایبل، فیس آئی ڈی اور فنگر پرنٹ جیسے فیچرز کے حامل موبائل فونز متعارف کرانے کا رجحان چل نکلا ہے۔اگرچہ سام سنگ اور ایپل جیسی کمپنیاں بھی ابھی تک فولڈ ایبل فونز متعارف نہیں کراسکیں، تاہم گزشتہ ہفتے ہی چینی کمپنی زیڈ ٹی ای نے سب کو پیچھے چھوڑتے ہوئے پہلا فولڈ ایبل ڈوئل اسکرین فون ایکسون ملٹی معارف کرایا تھا۔اب خبریں ہیں کہ خود کے لیے اسمارٹ موبائل کی تیسری بڑی کمپنی کا دعویٰ کرنے والی چینی کمپنی’ہواوے‘ بھی فولڈ ایبل فون پر کام کر رہی ہے۔ہواوے نے حال ہی میں اپنے پرو میٹ موبائل فون متعارف کرائے تھے، تاہم وہ بھی اپنی حریف کمپنیوں ’ایپل‘ اور ’سام سنگ‘ کی دیکھا دیکھی فولڈ ایبل فون بھی متعارف کرانے پر کام کر رہی ہے۔ہواوے کے کنزیومر بزنس گروپ کے چیف ایگزیکٹو آفیسر (سی ای او) رچرڈ یوو نے سی نیٹ کو بتایا کہ ان کی کمپنی فولڈ ایبل فون کی تیاریوں میں مصروف ہے، جو 2018 کے آغاز میں تیار ہوجائے گا۔رچرڈ یوو کے مطابق اگرچہ ان کی کمپنی چاہے تو پہلے بھی فولڈ ایبل فون متعارف کراسکتی ہے، مگر ہواوے چاہتی ہے کہ تیار ہونے والے فولڈ ایبل اسمارٹ فون کی اسکرین دیگر کمپنیوں کے موبائل کے مقابلے بہترین ہو۔رچرڈ یوو نے اگرچہ فولڈ ایبل فون کے حوالے سے مزید تفصیلات فراہم کرنے سے انکار کردیا، تاہم انہوں نے اس بات کی تصدیق کی کہ 2018 کی پہلی سہ ماہی میں موبائل فون کو متعارف کرایا جا سکتا ہے۔خیال کیا جا رہا ہے کہ ہوواے کا فولڈ ایبل فون زیڈ ٹی ای کے ایکسون ملٹی کے مقابلے زیادہ بہتر ہوگا، کیوں کہ ہواوے معیاری فون دے کر یورپ اور امریکا میں مارکیٹ بنانے میں مصروف ہے۔ہواوے کے فولڈ ایبل فون میں بھی ممکنہ طور پر یکساں سائز کے ڈوئل اسکرین ہوں گے، مگر کمپنی کا دعویٰ ہے کہ ان کے موبائل کے اسکرین دیگر فونز کے مقابلے زیادہ بہتر ہوں گے۔

واشنگٹن (میڈیا پاکستان) امریکا کی خاتون اول میلانیا ٹرمپ نے جب اپنے شوہر ڈونلڈ ٹرمپ کے صدر منتخب ہونے کے بعد افتتاحی تقریب میں سفید رنگ کا گاؤن پہن کر ڈانس کیا تو سب نے ہی ان کے اسٹائل کی خوب تعریف کی تھی، تاہم اب یہ گاؤن ایک میوزیم کا حصہ بن چکا ہے۔ڈیلی میل کی رپورٹ کے مطابق میلانیا ٹرمپ نے اپنا یہ گاؤن امریکی تاریخ پر مبنی سمتھ سونین نیشنل میوزیم کو عطیہ کردیا، جسے امریکی پرچم کے ساتھ میوزیم میں سجا دیا گیا ہے۔میلانیا ٹرمپ کا یہ گاؤن فرانسیسی نژاد امریکی ڈیزائنر ہروے پیئر نے تیار کیا تھا۔اس دوران میلانیا نے نہ صرف امریکی تاریخ کو ایک جگہ سمیٹ کر رکھنے پر میوزیم کی انتظامیہ کا شکریہ ادا کیا بلکہ اپنے شاندار گاؤن کے ڈیزائنر پر بھی بات کی۔میلانیا نے یہ جوڑا ڈونلڈ ٹرمپ کے صدر منتخب ہونے کے بعد افتتاحی تقریب پر پہنا تھا ۔ان کا کہنا تھا کہ ’ویسے تو میں اس وقت اسٹیج پر ہوں، لیکن میں اس انسان سے آپ کا تعارف کروانا چاہتی ہوں، جس نے یہ گاؤن بنایا تھا، وہ ایک بہترین آرٹس ہیں۔انہوں نے مزید کہا کہ ’آپ سب ہی جانتے ہیں کہ میرے شوہر صدر بننے سے قبل سیاست کا حصہ کبھی نہیں رہے، تو آپ سوچ سکتے ہیں کہ ان کے الیکشن جیتنے کے بعد ہم سب طرح طرح کی تیاریوں میں کس حد تک مصروف ہوگئے ہوں گے، یقین کریں افتتاحی تقریب میں مجھے کیا پہننا چاہیے یہ سوچ میرے ذہن میں سب سے آخر میں آئی، اور ڈیزائنر کو اس گاؤن کو تیار کرنے کے لیے صرف دو ہفتے ملے۔میلانیا نے اس سے قبل ڈیزائنر کے بنائے ہوئے جوڑے کبھی زیب تن نہیں کیے، مگر وہ ہمیشہ سے ان کا جوڑا پہننے کی خواہش مند تھیں۔خیال رہے کہ میلانیا ٹرمپ ماضی میں ایک کامیاب ماڈل رہ چکی ہیں، اور اس دوران انہوں نے یہ بھی بتایا کہ وہ ہمیشہ سے فیشن ڈیزائنر بننا چاہتی تھیں۔

میونخ (میڈیا پاکستان) جرمنی کے شہر میونخ میں پولیس حکام کے مطابق ایک شخص نے چاقو کے وار کر کے متعدد افراد کو زخمی کر دیا ہے۔پولیس جائے وقوعہ سے فرار ہونے والے حملہ آور کی تلاش کر رہی ہے۔پولیس نے اپنے بیان میں کہا ہے کہ اس حملے کا مقصد معلوم نہیں ہے۔علاقے کے مکینوں کو کہا جا رہا ہے کہ وہ اپنے گھروں کے اندر رہیں۔پولیس کا کہنا ہے کہ کسی بھی متاثرہ شخص کو زندگی کو خطرناک چوٹیں نہیں آئیں۔ متاثرین نے بتایا ہے کہ مشتبہ حملہ آور چالیس کے پیٹھے میں تھا اور وہ سیاہ موٹر سائیکل پر جائے وقوعہ سے فرار ہوا۔

ممبئی (میڈیا پاکستان) ہولی وڈ اداکارہ و گلوکارہ لِنڈِسے لوہان نے کہا ہے کہ ’جب ان کے منگیتر نے ان کے ساتھ بدسلوکی کی تو ان کے حق کے لیے کسی ایک خاتون نے بھی آواز نہیں اٹھائی۔خیال رہے کہ 31 سالہ اداکارہ لِنڈِسے لوہان اورروسی نژاد برطانوی ارب پتی کاروباری شخص ایگور ترابسوو کے درمیان 2015 کے بعد قربتوں کی خبریں آئی تھیں۔22 سالہ ایگور ترابسوو اور لِنڈِسے لوہان کے درمیان لندن میں پہلی ملاقات ہوئی، جس کے بعد دنوں میں قربتیں بڑھیں، اور خبریں تھیں کہ دونوں نے منگنی بھی کرلی، جو زیادہ کامیاب نہ ہوسکی۔اداکارہ اور ارب پتی روسی کاروباری شخص کے درمیان تنازع اور جھگڑے کی خبریں بھی میڈیا کی زینت بنتی رہیں۔اب جب کہ ہولی وڈ کی کئی اداکارائیں یا پھر امریکا و برطانیہ کی دیگر خواتین ہولی وڈ پروڈیوسر ہاروی وائنسٹن کی جانب سے خواتین کو مبینہ طور پر جنسی طور پر ہراساں کرنے کے خلاف بول رہی ہیں تو لِنڈِسے لوہان نے شکایت کی ہے کہ جب ان کے ساتھ ظلم ہو رہا تھا تو اس کی کسی خاتون نے مدد نہیں کی۔فاکس نیوز نے اپنی خبر میں بتایا کہ لِنڈِسے لوہان نے اپنے انسٹاگرام پر اپنی ایک شیئر تصویر کی، جس میں انہوں نے شکایت کی کہ جب وہ اپنے منگیتر ایگور ترابسوو کی جانب سے بدسلوکی کا نشانہ بنیں تو کسی امریکی خاتون نے ان کی مدد نہیں کی۔لِنڈِسے لوہان کا کہنا تھا کہ ان کے ساتھ ہونے والی بدسلوکی پر کسی پر کوئی فرق نہیں پڑا۔لِنڈسے لوہان نے جس انسٹاگرام پوسٹ پر یہ باتیں لکھیں تھی، اب اس کو اپڈیٹ کرکے مختصر کردیا گیا ہے، تاہم برطانوی اخبار ڈیلی میل نے ان کی پہلی شیئرنگ کا اسکرین شاٹ شائع کیا ہے، جس میں ان کی جانب سے کہی گئی باتیں پڑھی جاسکتی ہیں۔خیال رہے کہ لِنڈِسے لوہان کی جانب سے یہ بیان اس وقت سامنے آیا ہے جب کہ گزشتہ ہفتے ہی انہوں نے متعدد اداکاراؤں کو جنسی طور پر ہراساں کرنے والے ہاروی وائنسٹن کے حق میں بات کی تھی۔لِنڈِسے لوہان نے گزشتہ ہفتے اپنے انسٹاگرام پر ایک مختصر ویڈیو شیئر کی تھی، جس میں انہوں نے کہا کہ وہ اس وقت دبئی میں ہیں، اور وہ ہاروی وائنسٹں معاملے پر برا محسوس کر رہی ہیں۔

(میڈیا پاکستان) امریکی خفیہ ادارے سی آئی اے کے ڈائریکٹر مائیک پاؤمپے نے خبردار کیا ہے کہ شمالی کوریا امریکہ کو جوہری میزائل سے نشانہ بنانے کی صلاحیت حاصل کرنے کے قریب ہے۔انھوں نے زور دیا کہ واشنگٹن اب بھی سفارتکاری اور پابندیوں کو ترجیح دے گا لیکن ان کا کہنا تھا کہ عسکری قوت کے استعمال کا آپشن بھی موجود رہے گا۔شمالی کوریا کا دعویٰ ہے کہ وہ امریکہ کو نشانہ بنانے کی صلاحیت پہلے ہی رکھتا ہے۔جمعرات کو واشنگٹن میں ایک تھنک ٹینک فاؤنڈیشن فار ڈیفنس آف ڈیموکریسیز سے خطاب کرتے ہوئے ان کا کہنا تھا کہ شمالی کوریا امریکہ کو نشانہ بنانے کی ‘(جوہری صلاحیت) حاصل کرنے کے قریب ہے اور امریکی پالیسی کے تناظر میں اس مقصد کو حاصل کرنے کی بلندیوں کو چھو رہا ہے۔ان کا کہنا تھا کہ ‘اب یہ سوچنے کی بات ہے کہ ہم انھیں روکنے کے لیے کیا حتمی قدم اٹھائیں۔مائیک پاؤمپے نے خبردار کیا کہ پیانگ یانگ اس قدر تیزی سے میزائل مہارت بڑھا رہا ہے کہ امریکی انٹیلیجنس کے لیے یہ یقین دہانی مشکل ہے کہ وہ کب کامیاب ہوں گے۔گذشتہ ہفتے امریکی سیکریٹری خارجہ ریکس ٹلرسن نے بھی صدر ڈونلڈ ٹرمپ سے اصرار کیا تھا کہ وہ شمالی کوریا کے ساتھ تنازع کو سفارتکاری کے ذریعے حل کرنا چاہتے ہیں۔ان کا یہ بیان صدر ٹرمپ کے اس بیان کے بعد سامنے آیا تھا جس میں انھوں نے کہا کہ وہ کم جونگ ان کے ساتھ مذاکرات کرنے کی کوششوں میں وقت ضائع نہ کریں۔حالیہ مہینوں کے دوران شمالی کوریا نے بین الاقوامی آرا کو نظر انداز کرتے ہوئے چھ جوہری تجربات کیےہیں اور دو میزائل جاپان کی سرزمین کے اوپر سے داغے ہیں۔تجزیہ نگاروں کا کہنا ہے کہ رازداری برتنے والا کمیونسٹ ملک اقوام متحدہ کی پابندیوں کے باوجود واضح طور پر جوہری ہتھیار لے جانے والے میزائل تیار کر رہا ہے جو کہ امریکہ کے لیے خطرہ ہو سکتا ہے۔گذشتہ ماہ کے آخر میں ریکس ٹلرسن نے بتایا تھا کہ امریکہ شمالی کوریا کے ساتھ براہِ راست رابطے میں رہا ہے اور مذاکرات کے امکان پر غور کر رہا ہے۔