Category انٹرنیشنل

(میڈیا پاکستان)شمالی کوریا نے آسٹریلیا کو دھمکی آمیز خط لکھا ہے جس میں کہا گیا ہے کہ آسٹریلیا یا تو واشنگٹن سے تعلقات منقطع کرے یا سنگین نتائج بھگتنے کے لئے تیار رہے۔شمالی کوریا کی جانب سے آسٹریلیا کے نام بھیجے گئے کھلے خط کے متن کے مطابق امریکی صدر ڈونلڈ ٹرمپ شمالی کوریا کو تباہ کرنے اور کم جونگ ان حکومت کا تختہ الٹنا چاہتے ہیں۔
خط میں آسٹریلیا کو دھمکی دی ہے کہ آسٹریلیا یا تو امریکا سے تعلقات کو محدود کرے یا سنگین نتائج کے لئے تیار رہے۔
شمالی کوریا کی جانب سے لکھے گئے خط کے متن میں کہا گیا ہے کہ ٹرمپ کی بھول ہے اگر وہ یہ سمجھتے ہیں کہ شمالی کوریا کو قدموں میں گرالیں گے، ایٹمی طاقت کے بارے میں ایسا تصور جہالت پر مبنی ہوگا۔
دوسری جانب آسٹریلوی وزیر خارجہ جولی بشپ کا کہنا ہے کہ شمالی کوریا کی جانب سے اس قسم کا خط پہلی مرتبہ بھیجا گیا جو آسٹریلیا کے لئے غیرمعمولی ہے۔
جولی بشپ نے کہا کہ خط اس بات کا اظہار ہے کہ شمالی کوریا پر پابندیاں کام کر گئی ہیں اور وہ خود کو تنہا محسوس کر رہا ہے۔
آسٹریلوی وزیر خارجہ نے کہا کہ شمالی کوریا کے خط کا مقصد عالمی برادری کو تقسیم کرنے کی کوشش کرنا ہے۔

لندن(میڈیا پاکستان) امریکا کی سیکریٹری برائے سلامتی الین ڈیوک کاکہنا ہے کہ داعش اور القاعدہ نائن الیون طرزکے حملوں کی منصوبہ بندی کررہے ہیں۔برطانیہ میں اپنی ہم منصب امبرروڈ سے ملاقات کے بعد میڈیا سے گفتگوکرتے ہوئے الین ڈیوک کا کہنا تھا کہ 11ستمبر2001 میں القاعدہ نے مسافر جہاز کو جس طرح دہشت گردی کےلئے استعمال کیا وہ ناقابل فراموش ہے اس حملے میں تقریبا 3 ہزار سے زائد افراد مارے گئے تھے۔ ان کا کہنا تھا کہ دہشت گرد گروپ اپنی شناخت برقرار رکھنے کےلئے مختلف علاقوں میں چھوٹے چھوٹے حملے کررہے ہیں یہ چھوٹے حملے کسی بھی وقت بڑے حملوں میں تبدیل ہوسکتے ہیں۔
امریکی وزیربرائے سلامتی کا کہناتھا کہ دہشت گرد دنیا میں دہشت کا ماحول قائم رکھنا چاہتےہیں جس کے لئے نائن الیون طرز کے حملے کی منصوبہ بندی کررہے ہیں۔ انہوں نے کہا کہ دہشت گردی اور پروپیگنڈا کو روکنے کےلئے انٹرنیٹ کو کنٹرول کرنا بہت ضروری ہے جس کےلئے ضروری اقدامات کئے جارہے ہیں۔
الین ڈیوک نے کہا کہ اس حوالے سے سوشل میڈیا کی کمپنیوں کے ساتھ جی سیون ممالک کے وزرائے داخلہ کی ملاقات نہایت فائدہ مند ثابت ہوئی ہے، انہوں نے دہشت گردی کے خلاف عزم کا اعادہ کرتے ہوئے کہا کہ ددہشت گردی کے خلاف وہ سب کیا جائےگا جس کی ضرورت ہوگی۔

اسلام آباد ( میڈیا پاکستان) مکہ مکرمہ میں سعودی ہی ٹیکسی چلائیں گے، تفصیلات کے مطابق مکہ کے نائب گورنر شہزادہ عبداللہ بن بندر نے گورنر ہاؤس میں نائب وزیر محنت کی موجودگی میں ملازمتوں کی سعودائزیشن کے پروگرام کاافتتاح کیا اس دوران انہوں نے اس بات پر زور دیتے ہوئے کہا کہ مکہ مکرمہ میں ٹیکسی چلانے کا کام صرف سعودیوں کا ہونا چاہیے خصوصاً اس وقت جب حج و عمرہ کا سیزن ہو سعودی شہری کے علاوہ کسی کو ٹیکسی چلانے کی اجازت نہ دی۔

الریاض(میڈیا پاکستان)سعودی عرب کی قومی ایئرلائن نے 27 سال بعد عراق کے لئے براہ راست پروازوں کا دوبارہ آغاز کردیا۔غیر ملکی میڈیا کے مطابق سعودی عرب نے 27 سال قبل عرب عراق جنگ کے باعث بغداد کے لئے معطل کی گئی براہ راست پروازوں کا دوبارہ آغاز کر دیا ہے۔
سعودی عرب کی جانب سے عراق کے لیے براہ راست سستی پرواز کے دوبارہ آغاز کو دونوں ممالک کے درمیان تعلقات کی بہتری کے حوالے سے اہم اقدام کہا جا رہا ہے۔
سعودی عرب کی نیشنل ایئر سروس کے سی ای او بندر المحنہ کی جانب سے جاری بیان میں کہا گیا کہ ہم نے بہت جدوجہد کے بعد برادر ملک عراق کے لیے سستی پروازوں کا آغاز کر دیا ہے تاکہ دونوں پڑوسی ممالک کے درمیان 27 برس قبل معطل ہونے والے معاشی اور سماجی تعلقات دوبارہ سے شروع ہوں۔
سعودی عرب کی قومی پرواز کے عراق کے لئے سول ایوی ایشن کے میڈیا ڈائریکٹر عباس الخفاجی نے بتایا کہ بغداد کے لیے 27 سال بعد پہلی پرواز جمعرات کو اڑان بھرے گی۔اس کے علاوہ سعودی عرب نے 1990 میں عراق کی جانب سے کویت پر حملے کے بعد بند کی گئی سرحد کو دوبارہ کھولنے کا منصوبہ بھی بنا رکھا ہے۔
یہ سرحد 1990 سے بند ضرور تھی مگر کچھ حج کی غرض سے سعودی عرب جانے والے عازمین کے لئے اس سرحد کو ضرور کھولا جاتا رہا۔

واشنگٹن(میڈیا پاکستان) امریکی وزیر خارجہ ریکس ٹیلرسن نے کہا ہے امید کرتے ہیں کہ پاکستان اپنے علاقوں میں موجوددہشت گردوں کے خلاف فیصلہ کن کارروائی کرے گا۔واشنگٹن تھنک ٹینک کے سینٹرل فاراسٹریٹیجک اینڈ انٹرنیشنل اسٹڈیز سے خطاب کرتے ہوئے امریکی وزیرخارجہ ریکس ٹلرسن کاکہنا تھا کہ امریکا بھارت کے ساتھ دہشت گردی کےخلاف جنگ میں شانہ بشانہ کھڑاہے، امید کرتے ہیں کہ پاکستان اپنے علاقوں میں موجوددہشت گردوں کے خلاف فیصلہ کن کارروائی کرے گا۔ ان کا کہنا تھا کہ دہشت گردی کےخلاف جنگ لڑنا مہذب قوم کا انتخاب نہیں ذمہ داری ہے۔
بحرہند کےعلاقے میں امن وسلامتی کویقینی بنانےکےلیے امریکا اوربھارت کومل کرکام کرنے کی ضرورت پرزوردیتے ہوئے امریکی وزیرخارجہ کا کہنا تھا کہ امریکا بھارت کے ساتھ مضبوط تعلقات چاہتا ہے۔
ریکس ٹیلرسن نےچین کو شدید تنقید کا نشانہ بناتے ہوئے کہا کہ جنوبی چین کےسمندروں میں چین کا اشتعال انگیز رویہ براہ راست بین
الاقوامی قوانین کو چیلنج کرنے کےمترادف ہے جس کے خلاف بھارت اور امریکا کا مؤقف ایک ہے۔

اوٹاوا(میڈیا پاکستان) کینیڈا کے صوبے کیوبک میں حکومتی خدمات کی انجام دہی یا پبلک سروسز سے فائدہ اٹھاتے وقت خواتین کے نقاب پہننے پر پابندی عائد کردی گئی ہے۔بین الاقوامی میڈیا رپورٹس کے مطابق کیوبک کے قانون ساز ادارے نے مسلمان خواتین کے حوالے سے متنازعہ بل منظور کیا ہے جس کے تحت برقع یا چہرہ ڈھانپنے والی کوئی بھی خاتون سرکاری ڈیوٹی کے دوران یا سرکاری اداروں سے رجوع کے دوران فائدہ حاصل کرنے سے محروم رہیں گی۔
2014 سے برسرِاقتدار صوبائی جماعت لبرلز نے یہ قانون 2014 میں تجویز کیا تھا جس پر رائے شماری کی گئی اور اسمبلی میں یہ قانون 51 کے مقابلے میں 66 ووٹوں سے منظور ہوگیا۔
اس قانون کے تحت بیوروکرٹس، پولیس اہلکاروں، اساتذہ، بس ڈرائیوروں، عوامی اسپتالوں میں کام کرنے والے ڈاکٹروں اور نرسیں، سب کو اب کام کے دوران اپنا چہرہ چھپانے کی اجازت نہیں ہوگی جب کہ اس قانون کی ایک اور شق کے تحت عوامی مراعات حاصل کرنے والے ڈے کیئر سینٹر اب مذہبی تعلیمات نہیں دے سکتے۔
متنازعہ قانون کی منظوری کے بعد باپردہ مسلمان خواتین کےلیے کینیڈا میں حکومتی سروسز کا حصول مشکل ہوگیا ہے اور اس پابندی سے سب سے زیادہ وہ مسلمان خواتین متاثر ہوں گی جو پبلک ٹرانسپورٹ، پیشہ وارانہ اموراور دوران تعلیم چہرے کا پردہ کرتی ہیں۔

واشنگٹن (میڈیا پاکستان) اقوام متحدہ میں امریکی سفیر نکی ہیلی کا کہنا ہے کہ امریکا پاکستان پر نظر رکھنے کے لیے بھارت سے بھی مدد لے سکتا ہے کیونکہ واشنگٹن خطے میں ایسی حکومت کو برداشت نہیں کرے گا جو دہشت گردوں کو پناہ دیتی ہے۔واشنگٹن میں ‘امریکا بھارت فرینڈشپ کونسل سے خطاب کرتے ہوئے نکی ہیلی نے بھارت کو تجویز دیتے ہوئے کہا کہ اگر بھارت اقوام متحدہ کی سیکیورٹی کونسل کا مستقل رکن بننا چاہتا ہے تو وہ سیکیورٹی کونسل کے موجودہ ویٹو ڈھانچے میں دخل اندازی نہ کرے۔نئی دہلی میں واشنگٹن کے بڑھتی ہوئی دلچسپی کی وضاحت کرتے ہوئے بھارتی نژاد امریکی سیاست دان کا کہنا تھا کہ امریکا کو افغانستان میں امن قائم کرنے کے لیے بھارت کی مدد کی ضرورت ہے جبکہ امریکا، افغان جنگ کے جلد خاتمے کے لیے جنوبی ایشیا کی اس طاقت ور ریاست کی جانب مدد کی جانب دیکھ رہا ہے۔ان کا مزید کہنا تھا کہ بھارت، افغانستان کے بنیادی ڈھانچے اور تعمیر نو کے لیے دی جانے والی امداد کے تناظر میں امریکا کی مدد کر سکتا ہے بلکہ بھارت پڑوسی ملک پاکستان پر نظر رکھنے کے لیے بھی امریکا کی مدد کر سکتا ہے۔نکی ہیلی نے کہا کہ ہم نے پاکستان کے ساتھ بہتر تعلقات کے لیے اپنی جانب سے بنیادی کام کر لیے ہیں تاہم ہمیں یہ باور کرانے کی ضرورت ہے کہ ہم انہیں (پاکستان کو) جوابدہ بنائیں جس کے لیے بھارت ہماری مدد کرنے جارہا ہے۔امریکی سفیر برائے اقوامِ متحدہ نے واضح کیا کہ امریکا ایٹمی ہتھیاروں کو دہشت گردوں کے ہاتھوں میں جانے سے روکنے کے لیے جنوبی ایشیا میں دہشت گردوں کی محفوظ پناہ گاہوں کا خاتمہ چاہتا ہے اور اس مقصد کے لیے امریکا اپنے تمام معاشی، سفارتی اور فوجی وسائل کو بروئے کار لائے گا۔پاک امریکا تعلقات پر بات چیت کرتے ہوئے نکی ہیلی نے کہا کہ اسلام آباد اور واشنگٹن طویل عرصے سے عالمی سطح پر شراکت دار ہیں لیکن امریکا، پاکستان میں یہ حکومت یا پھر ایسی کوئی حکومت برداشت نہیں کرے گا جو دہشت گردوں کو مبینہ طور پر محفوظ پناہ گاہیں فراہم کرتے ہیں جو امریکیوں کو نشانہ بناتے ہیں۔جب ان سے سوال کیا گیا کہ کیا امریکا پاکستان اور بھارت کے ساتھ علیحدہ علیحدہ تعلقات استوار کرنا چاہتا ہے تو اس کے جواب میں انہوں نے کہا کہ امریکا کے نئے نقطہ نظر میں پاکستان اور بھارت کی جانب سے افہام و تفہیم اور تحمل کی ضرورت ہوگی۔ان کا مزید کہنا تھا کہ امریکا افغانستان میں امن و استحکام کے لیے بھارتی کردار کو سراہاتا ہے جبکہ واشنگٹن کی یہ خواہش ہے کہ بھارت افغانستان میں امن و استحکام کے حوالے سے اپنا کردار جاری رکھے۔اقوامِ متحدہ کی سیکیورٹی کونسل میں بھارت کی مستقل رکنیت کے معاملے پر انہوں نے کہا کہ سیکیورٹی کونسل کے 5 مستقل ارکان میں سے 2 ارکان (چین اور روس) سیکیورٹی کونسل کے موجودہ ڈھانچے کو تبدیل کرنے کی مخالفت کر رہے ہیں۔انہوں نے واضح کرتے ہوئے کہا کہ یہ مخالفت سیکیورٹی کونسل کے ڈھانچے کی تبدیلی نہیں بلکہ ویٹو پاور کا استعمال ہے۔

کابل(میڈیا پاکستان) افغانستان کے صوبے قندھار میں فوجی اڈے پر خودکش حملے کے نتیجے میں 40 اہلکار ہلاک اور 24 زخمی ہوگئے۔افغان میڈیا کے مطابق صوبے قندھار میں فوجی اڈے پر خودکش حملے کے نتیجے میں 40 فوجی ہلاک اور 24 زخمی ہوگئے، حملے کے بعد سیکیورٹی فورسز نے علاقے کو گھیرے میں لیکر سرچ آپریشن شروع کردیا ہے جب کہ زخمیوں کو قریبی اسپتال منتقل کیا گیا جہاں بیشتر زخمیوں کی حالت تشویشناک ہونے کے باعث ہلاکتوں میں اضافہ کا خدشہ ہے۔
افغان سیکیورٹی فورسز کے مطابق دہشت گردوں نے پہلے بارود سے بھری گاڑی کو دھماکے سے اڑایا جس کے بعد انہوں نے ملٹری بیس پر فائرنگ شروع کردی، دوسری جانب ملٹری بیس پر خود کش حملے اور فائرنگ کے دوران غیر ملکی افواج فضائی کارروائی میں دہشت گردوں کو نشانا بھی بنایا جس کے نتیجے میں 10 طالبان مارے گئے۔
قندھار پولیس چیف نے حملے کی تصدیق کردی ہے تاہم وزارت دفاع کی جانب سے اس حوالے سے کوئی بیان جاری نہیں کیا گیا جب کہ طالبان نے حملے زمہ داری قبول کرلی ہے۔
واضح رہے کہ منگل کے روز صوبے پکتیا میں پولیس ٹریننگ سینٹر پر طالبان کے حملے میں پولیس چیف سمیت 71 افراد ہلاک ہوگئے تھے۔

لاہور (میڈیا پاکستان) امریکی ایجنسی ایف بی آئی نے 4 پاکستانی نوجوانوں کو موت کے منہ سے بچا لیا، نوجوان بلیو وہیل کی طرز کا ٹاسک مکمل کر رہے تھے، ٹاسک دینے والے نوجوان کی انٹرنیٹ ڈیوائسز قبضے میں لیکر اُسے بھی شامل تفشیش کر لیا گیا۔تفصیلات کے مطابق 17 اکتوبر کی شام کو ایف آئی اے کو امریکی تحقیقاتی ایجنسی کی جانب سے ایک ای میل موصول ہوئی، جس میں اطلاع دی گئی کہ لاہور میں کچھ نوجوان سنیپ چیٹ پر مختلف ٹاسک کر رہے ہیں جس میں ایک ٹاسک خود کشی کی جانب بھی جا رہا ہے۔اطلاع ملتے ہی ایف آئی اے کا سائبر کرائم سرکل متحرک ہوگیا۔ ایف بی آئی کی نشاندہی پر جوہر ٹائون میں ایک گھر پر ایف آئی اے نے چھاپہ مار کر نوجوان سلمان شہزاد کی انٹرنیٹ ڈیوائسز قبضے میں لے لیں۔ تحقیقات میں ایک ویڈیو ملی جس میں ایک اور نوجوان کو اغوا کرنے کا ٹاسک مکمل کیا جا چکا تھا۔ڈپٹی ڈائریکٹر سائبر کرائم سید شاہد حسین کا کہنا تھا کہ سلمان شہزاد کے گروپ میں مزید چار لوگ شامل تھے جنہیں مختلف ٹاسک دئیے گئے۔ایف آئی اے نے سلمان شہزاد اور اس کے دوست کو شامل تفشیش کر لیا۔ سلمان شہزاد کا کہنا تھا کہ وہ اس طرح کے ٹاسک پہلے بھی کرتے تھے لیکن غلطی سے سنیپ چیٹ پر اپ لوڈ ہوا۔ایف آئی اے کا کہنا تھا کہ پاکستان میں سوشل میڈیا کے غلط استعمال میں اضافہ ہو رہا ہے جس کو کنٹرول کرنے کے لیے حکومتی سطح پر اقدامات کی ضرورت ہے۔

لندن(میڈیا پاکستان) برطانوی خفیہ ایجنسی ایم آئی 5 کے سربراہ نے خبردار کرتے ہوئے کہا ہے کہ ملک میں مزید دہشت گرد حملوں کا خطرہ ہے۔برطانیہ کی خفیہ ایجنسی ایم آئی فائیو کے سربراہ اینڈریو پارکر نے کہا کہ برطانیہ میں ممکنہ حملوں کی اطلاعات ہیں، 34 سالہ کیرئیر میں دہشت گردی کے اتنے سنگین خطرات کبھی نہیں دیکھے جن کا برطانیہ کو اب سامنا ہے، انفرادی حیثیت میں دہشت گروں کی کاروائیوں کا خطرہ بھی بڑھ گیا ہے جن کو روکنا مشکل ہے۔
ایم آئی 5 کے سربراہ اینڈریو پارکر کا کہنا تھا کہ حالیہ دنوں میں بہت سے دہشت گرد برطانیہ کا رخ کررہے ہیں جنہیں ڈھونڈنا بہت مشکل ہے، رواں سال برطانیہ میں 5 دہشت گردی کے واقعات ہوئے جس کے باعث خفیہ ایجنسی کے آپریشنز متاثر ہوئے ہیں، گزشتہ چار سال کے دوران برطانیہ میں دہشت گردی کے 20 بڑے منصوبے ناکام بنائے ہیں۔