Category انٹرنیشنل

لندن :کراچی سے تعلق رکھنے والے بزنس مین جابرموتی والا نے برطانوی حکومت کے خلاف 3 کیس جیت لیے۔ غیر ملکی خبر رساں ادارے کے مطابق جابر موتی والا کے وکلا نے برطانوی حکومت کے خلاف ویزامنسوخی، غیرقانونی حراست اور قانونی اخراجات کی ادائیگی کاکیس دائر کیا تھا جس کا فیصلہ جابر موتی والا کے حق میں آیا ہے۔رائل کورٹ آف جسٹس نے ہوم آفس کو ہرجانہ ادا کرنے کاحکم جاری کرتے ہوئے جابر موتی والا کا ملٹی پل انٹری ویزا بھی بحال کردیا۔واضح رہے کہ جابر موتی والا کو اسکاٹ لینڈ یارڈ نے امریکا کی درخواست پر ایجوئیر روڈ سے گرفتار کیا تھا۔

نیویارک :آئی ایم ایف نے انتباہ کیا ہے کہ 2023 گزشتہ سال کے مقابلے میں زیادہ سخت ثابت ہونے والا ہے۔ آئندہ چند ماہ چین کے لیے سخت ہوں گے اور اس کے منفی اثرات عالمی معیشت پر بھی مرتب ہوں گے۔ غیر ملکی خبر رساں ادارے کے مطابق آئی ایم ایف کی سربراہ کرسٹالینا جارجیوا نے اپنے ایک انٹرویو میں کہا کہ ہمیں توقع ہے کہ عالمی معیشت کے ایک تہائی حصے کو کساد بازاری کا سامنا ہوگا، جو ممالک اس سے محفوظ رہیں گے وہاں بھی کساد بازاری کے منفی اثرات محسوس ہوں گے۔ انہوں نے کہا کہ عالمی شرح نمو کے لیے اہم ترین خطوں یعنی امریکا، یورپ اور چین سب کو معاشی سست روی کا سامنا ہوگا۔انہوں نے بتایا کہ دنیا کی دوسری بڑی معیشت چین کی معاشی شرح نمو 2022 کے دوران ممکنہ طور پر 40 سال میں پہلی بار عالمی شرح نمو سے کم رہے گی جس کی وجہ کووڈ 19 کی نئی لہر ہے۔ انہوں نے کہا کہ آئندہ چند ماہ چین کے لیے سخت ہوں گے اور اس کے منفی اثرات عالمی معیشت پر بھی مرتب ہوں گے۔ انہوں نے کہا کہ ہوسکتا ہے کہ امریکی معیشت کساد بازاری کو ٹالنے میں کامیاب ہوجائے مگر اسے بھی منفی اثرات کا سامنا ہوگا۔

ابوظبی : فرانس کی بحریہ نے بحیرہ عرب میں کارروائی کرتے ہوے بھاری مقدار میں منشیات ضبط کرلی۔غیرملکی خبر رساں ادارے کے مطابق بین الاقوامی نیول ٹاسک فورس میں شامل فرانسیسی بحریہ کے جہاز نے بحیرہ عرب میں گشت کے دوران ایک کشتی سے 500 کلو ہیروئن اور3500 کلو بھنگ برآمد کرلی۔متحدہ عرب امارات کے دارالحکومت ابو ظبی میں موجود بحیریہ عرب کی میری ٹائم کمانڈ نے اپنے جاری بیان میں کہا ہے کہ ضبط کی گئی منشیات کی مالیت 50 ملین یورو ہے۔ یہ منشیات ممکنہ طورپر یورپ پہنچائی جانا تھی۔

مقبوضہ بیت المقدس : اسرائیل نے کہا کہ ایران کے جوہری منصوبے کے خلاف عالمی محاذ بنانے کی دھمکی دیتے ہوے کہا ہے کہ ہم اپنی فوجی صلاحیتوں کو مزید بڑھانے پر بھی کام کریں گے ۔ غیر ملکی خبر رساں ادرے کے مطابق اسرائیل کے وزیرخارجہ ایلی کوہن نے اپنے بیان میں دھمکی دیتے ہوئے کہا کہ ایران کو فوجی جوہری طاقت بننے سے روکنے کے لیے عالمی محاذ بنائیں گے۔ انہوں نے کہا اسرائیل اپنی فوجی صلاحیتوں کو مزید بڑھانے پر بھی کام کرے گا۔ انہوں نے دعویٰ کیا کہ ایران طویل فاصلے تک مار کرنے والے میزائل اور ڈرون تیار کررہا ہے۔ ایران کی فنانسنگ سرگرمیاں دنیا میں دہشتگردی کا باعث بن رہی ہیں۔ اس سے قبل بھی اسرائیلی حکام ایران کو جوہری ہتھیاروں کے حصول سے روکنے کے لیے تمام آپشنز استعمال کرنے کی دھمکیاں دے چکے ہیں۔

لندن :ٹیسلا ٹوئٹر اور اسپیس ایکس کے مالک ایلون مسک نے ایک اور اعزاز اپنے نام کر لیا ہے۔ایلون مسک دنیا کے پہلے شخص بن گئے ہیں جن کی دولت میں 200 ارب ڈالرز کی کمی ا?ئی ہے، لیکن یہ شاید وہ اعزاز ہے جو دنیا کا کوئی بھی امیر ترین شخص حاصل کرنا نہیں چاہے گا۔میڈیا رپورٹ کے مطابق اس سال ایلون مسک کو سب سے زیادہ خسارہ ان کی کمپنی ٹیسلا کی جانب سے ہوا، رپورٹ کے مطابق ٹیسلا کے شئیرز میں 70 فیصد کمی دیکھنے میں آئی۔ جس کے وجہ سرمایہ داران نے ٹوئٹر کو ٹہرایا ہے۔ٹیسلا کے ممبران کا کہنا ہے کہ ایلون مسک اپنا سارا وقت اور توجہ ٹوئٹر کو دے رہے ہیں جس سے ٹیسلا کو نقصان اٹھا پڑ رہا ہے۔گزشتہ سال بلومبرگ کی رپورٹ کے مطابق ایلون مسک ایمازون کے بانی جیف بیزوس کے بعد دنیا کے دوسرے فرد بنے تھے جن کے اثاثوں کی مالیت 200 ارب ڈالرز سے تجاوز کرگئی تھی، جبکہ نومبر 2021 میں ایلون مسک کی دولت ریکارڈ 340 ارب ڈالرز تک پہنچی مگر 2022 کے اختتام پر وہ 137 ارب ڈالرز تک پہنچ گئی، جس کی ایک وجہ ٹوئٹر ہے۔یاد رہے ایلون مسک نے اکتوبر میں 44 ارب ڈالرز میں ٹوئٹر کو خریدا تھا۔2022 کے اختتام میں ہی ایلون مسک سے دنیا کا امیر ترین شخص ہونے کا اعزاز بھی چھن چکا ہے، ایلون مسک کی جگہ فرانس سے تعلق رکھنے والے برنارڈ ا?رنلٹ نے لے لی ہے۔فوربز اور بلومبرگ نے دنیا کی امیر ترین شخصیت کی نئی فہرست جاری کرتے ہوئے برنارڈ ا?رنلٹ کو دنیا کا امیر ترین شخص قرار دے دیا ہے، ایل وی ایم ایچ کے سی ای او برنارڈ ا?رنلٹ نے اس سے پہلے 7 دسمبر اور پھر 8 دسمبر کو کچھ گھنٹوں کے لیے ایلون مسک کو پیچھے چھوڑا تھا، مگر اس کے بعد 73 سالہ ا?رنلٹ 188.6 ارب ڈالرز کے ساتھ دنیا کے امیر ترین شخص بن چکے ہیں۔

دمشق:شام کے دارالحکومت دمشق کے ائیر پورٹ پر اسرائیل کی جانب سے میزائل حملہ کیا گیا جس میں 2 فوجی اہلکار مارے گئے،شامی فوج کے مطابق اسرائیلی فوج نے پیر کی صبح بین الاقوامی ایئرپورٹ پر میزائل داغے جس کے نتیجے میں دو فوجی اہلکار ہلاک اور دو زخمی ہو گئے ہیں،دمشق کے بین الاقوامی ہوائی اڈے پر سات ماہ میں ہونیو الا یہ دوسرا حملہ ہے جس سے قریبی علاقے کو نقصان پہنچا ہے،شام میں جنگی صورتحال پر نظر رکھنے والی تنظیم نے کہا ہے کہ اسرائیلی حملوں میں ایئرپورٹس کے ساتھ ساتھ دمشق کے جنوب میں واقع اسلحے کے ڈپو کو بھی نشانہ بنایا گیا، واضح رہے کہ اس سے قبل10 جون کو دمشق کے بین الاقوامی ایئرپورٹ پر ہونے والے اسرائیلی فضائی حملوں سے انفراسٹرکچر اور رن ویز کو کافی نقصان پہنچا۔ اسے مرمت کے بعد دو ہفتے بعد دوبارہ کھول دیا گیا تھا

کابل : افغان حکام نے کہا ہے کہ پاکستان سے اچھے تعلقات کے خواہاں ہیں ، کسی کو کابل پر حملے کی اجازت نہیں دینگے ۔ غیر ملکی خبر رساں ادارے کے مطابق امارت اسلامیہ کے ترجمان ذبیح اللہ مجاہد نے کہا کہ کسی کو بھی افغانستان میں حملہ کرنے کی اجازت نہیں دیں گے۔ انہوں نے کہا افغانستان پاکستان سے اچھے تعلقات کا خواہاں ہے، پاکستانی حکام کو بات کرتے ہوئے محتاط رہنا چاہیے۔ انہوں نے کہا کہ کسی ملک کو دوسرے ملک کے علاقے میں حملہ کرنے کا حق نہیں ہے، دنیا کا کوئی قانون ایسی جارحیت کی اجازت نہیں دیتا،اگر کسی کو کوئی پریشانی ہے تو امارت اسلامیہ سے بات کرے،ہماری سیکیورٹی فورسز کارروائی کرسکتی ہیں۔دوسری طرف افغان وزارت دفاع سے جاری بیان میں کہا گیا ہے کہ پاکستانی حکام کا بیان بے بنیاد اور اشتعال انگیز ہے، کوئی بھی مسئلہ یا تنازع سمجھوتے کے تحت حل ہونا چاہیے۔

نیو یارک : محبت کرنے والے لوگ دنیا میں طویل ساتھ رہنے کی خواہش رکھتے ہیں اور امریکی جوڑے کا یہ خواب شاید پورا ہوگیا کیونکہ حال ہی میں 102 سالہ جوڑے نے اپنی شادی کی 80 ویں سالگرہ ساتھ منائی۔غیر ملکی خبر رساں ادارے کے مطابق ریاست پنسلوانیا سے تعلق رکھنے والے رابرٹ اور ایڈتھ کی ملاقات 1936 میں ہائی اسکول میں فٹ بال میچ کے دوران ہوئی جہاں رابرٹ اپنے والد کے ساتھ میچ دیکھنے گئے تھے لیکن اس میچ کے بعد رابرٹ ایڈتھ کے سحر سے نہ نکل پائے اور پڑھائی ختم ہونے کے بعد دونوں نے 26 دسمبر 1942 میں شادی کرلی۔ اپنے انٹرویو کے دوران خوشحال جوڑے نے اپنی طویل ازدواجی زندگی کے رزا سے پردہ اٹھاتے ہوئے بتایا کہ ہم دونوں ایک دوسرے کو ہی سب کچھ اور زندگی تصور کرتے ہیں، ساتھ ہی اپنی ازدواجی زندگی کے دوران ہم سونے سے پہلے اپنی ناراضگی دور کردیتے ہیں، یہی ہماری 8 دہائیوں پر مشتمل خوشگوار اور خوشحال ازدواجی زندگی کا راز ہے۔

سڈنی :آسٹریلیا میں دو ہیلی کاپٹر فضا میں ٹکرا گئے جس کے نتیجے میں 4 افراد ہلاک جبکہ تین زخمی ہو گئے۔ غیرملکی خبر رساں ادارے کے مطابق واقعہ آسٹریلیا کے شہر سڈنی کے ساحلی علاقے میں پیش آیا جس میں حکام نے 4 افراد کے ہلاک ہونے کی تصدیق کرتے ہوئے کہا کہ ایک ہیلی کاپٹر کا ملبہ ساحل کے قریب ریت پر آکر گرا۔حکام کا کہنا ہے کہ حادثے میں تین افراد شدید زخمی بھی ہوئے ہیں جنہیں تشویشناک حالت میں اسپتال منتقل کردیا گیا۔پولیس کا کہنا ہیکہ فضا میں ٹکرانے کے بعد دونوں ہیلی کاپٹر کریش ہوکر نیچے آگرے جو سی ورلڈ ریزورٹ سے چند فاصلے پر گرے جب کہ اس حادثے میں 4 افراد ہلاک ہوئے اور تین زخمی ہیں۔آسٹریلیا کے ایوی ایشن حکام نے حادثے کی تحقیقات کا حکم دیا ہے۔

ریاض :سعودی عرب میں پہلی بارخواتین ڈرائیورز حرمین ایکسپریس چلانے لگیں۔ملکی میڈیا رپورٹ کے مطابق سعودی وزارت ریلوے ’سار‘ نے خواتین ٹرین ڈرائیور کی ویڈیو ٹوئٹرپرشئیر کردی جوسوشل میڈیا پر وائرل ہوگئی۔ ملک کی تاریخ میں خواتین کی جانب سے دنیا کی تیزرفتار ٹرینوں میں شامل ’ حرمین ایکسپریس‘ چلانے کا یہ پہلا موقع ہے۔ میڈیا رپورٹ کے مطابق 24 سعودی خواتین نے حرمین ایکسپریس چلانے کی تربیت مکمل کی ہے۔ خواتین ٹرین ڈرائیورز نے مشرق وسطیٰ کی تیز رفتار ٹرین چلانے کو اعزاز اور بڑی ذمہ داری قرار دیا۔