Category جرم وانصاف

اسلام آباد (میڈیا 92 نیوز آن لائن ) مبینہ جعلی بینک اکاؤنٹس کیس میں گرفتار پیپلز پارٹی کی رہنما فریال تالپور کو آج وفاقی دار الحکومت اسلام آباد میں قائم احتساب عدالت میں پیش کیا جائے گا۔

نیب کی جانب سے سندھ اسمبلی کی ممبر صوبائی اسمبلی فریال تالپور کا14روزہ جسمانی ریمانڈ حاصل کرنے کی استدعا کی جائے گی۔

فریال تالپور کی گرفتاری کے بعد چیئرمین نیب جسٹس ریٹائرڈ جاوید اقبال کی طرف سے اسلام آباد کے سیکٹر ایف ایٹ میں واقع انکی رہائش گاہ کو سب جیل قرار دیا گیا ہے۔

نیب راولپنڈی کی طرف سے سابق صدرآصف علی زرداری کی بہن فریال تالپور کو اسلام آباد میں ان کی رہائش گاہ سے گزشتہ روز گرفتارکیا گیا۔

نیب کی جانب سے گزشتہ روز جاری اعلامیے میں کہا گیا ہے کہ فریال تالپور تاحکم ثانی اپنے گھر میں قید رہیں گی، ان کی عزت نفس کا پہلے بھی احترام رکھا گیا اور آئندہ بھی مکمل خیال رکھا جائے گا۔

نیب کے مطابق فریالپور کو ان کی رہائش گاہ میں ہی رکھا جائے گا اور نیب کی ٹیم ان کی رہائشگاہ پر ہی ان سےتفتیش کرے گی۔

نیب کی جانب سے فریالپور کی گرفتاری سے متعلق خبر پہلے ہی اپنے ناظرین کودے دی تھی۔

فریال تالپورکی گرفتاری کے بعد پیپلزپارٹی کارکن زرداری ہاؤس کے باہرجمع ہوئے ۔ خواتین کارکنان نے حکومت مخالف نعرے لگائے ۔ پولیس نے زرداری ہاوس کے گردونواح کی سیکیورٹی سخت کر دی ہے ۔

گرفتاری کے بعد مشیر اطلاعات سندھ مرتضیٰ وہاب نے اپنے ردعمل میں کہا تھا کہ فریال تالپور، آصف زرداری کی بہن ہیں اور وہ بھی بہادری کے ساتھ صورت حال کاسامنا کریں گی۔

انہوں نے کہا کہ پیپلز پارٹی کی قیادت قانونی تقاضوں کو پورا کرتی رہی ہے اور آصف زرداری اور فریال تالپور عدالتوں میں پیش ہوتے رہے۔

واضح رہے کہ آصف علی زرداری کی 10 جون کو عبوری ضمانت منسوخ کر دی گئی تھی جس کے بعد نیب نے انہیں زرداری ہاؤس سے گرفتار کیا تھا۔

ان کو نیب راولپنڈی کے دفتر میں علیحدہ سیل میں رکھا گیا ہے۔ میڈیکل بورڈ نے آصف زرداری کی ابتدائی طبی رپورٹ کو تسلی بخش قرار دیا تھا۔

سابق صدر اس وقت 10 روزہ ریمانڈ پر20جون تک نیب راولپنڈی کی حراست میں ہیں۔

لاہور (میڈیا 92 نیوز آن لائن ) پاکستان تحریک انصاف کے رہنما اوروزیر جنگلات پنجاب سبطین خان کو آج احتساب عدالت پیش کیا جائے گا۔

قومی احتساب بیورو(نیب )نے گزشتہ روز سبطین خان کوگرفتار کیا تھا آج جسمانی ریمانڈ کے حصول کیلئے احتساب عدالت کے جج جواد الحسن کی عدالت میں پیش کریگا۔

نیب کی طرف سے الزام عائد کیا گیاہے کہ سبطین خان نے چنیوٹ اور رجوعہ میں اربوں روپے مالیت کے 500 میٹرک ٹن آئرن کا غیر قانونی ٹھیکہ من پسند کمپنی کو دیا۔

سبطین خان نے جولائی 2007 میں میسرز ارتھ ریسورس پرائیویٹ لمیٹڈ نامی کمپنی کو ٹھیکہ فراہم کرنے کے غیر قانونی احکامات دئیے۔

نیب کے مطابق ملزم نے دیگر شریک ملزمان کی ملی بھگت سے ٹھیکہ ای آر پی ایل کو مروجہ قوانین سے انحراف کرتے ہوئے فراہم کیا۔ ای آر پی ایل نامی کمپنی ماضی میں کان کنی کے تجربہ کی حامل نہ تھی ۔

صوبائی وزیر جنگلات سبطین خان پر یہ الزام بھی ہے کہ انہوں نے معلوم ہونے کے باوجود ملی بھگت سے کمپنی کو کنٹریکٹ فراہم کیا۔

نیب کی طرف سے یہ بھی کہا گیاہے کہ ملزم سبطین خان نے اربوں روپے مالیت کے معدنی وسائل غیر قانونی طور پر25 لاکھ مالیت کی کمپنی کو فراہم کیے ۔

سبطین خان 1990 سے 93 تک صوبائی وزیر جیل خانہ جات، 2002 سے 2007 تک صوبائی وزیر مائنز اینڈ منرل اور 2013 سے 2018 تک رکن صوبائی اسمبلی رہے۔

2018 کے عام انتخابات میں سبطین خان چوتھی بار رکن صوبائی اسمبلی منتخب ہوئے ہیں۔ سبطین خان گزشتہ عام انتخابات میں پی پی 88 میانوالی 4 سے منتخب ہوئے تھے اوران کا تعلق میانوالی کی تحصیل پپلاں سے ہے۔

اسلام آباد ( میڈیا 92 نیوز آن لائن ) سابق صدرآصف زرداری کو احتساب عدالت میں پیشی کے لیے نیب راولپنڈی کے دفتر سے احتساب عدالت کے جج محمد ارشد ملک کے روبرو پیش کردیاگیاہے۔

نیب نے آصف زرداری کے جسمانی ریمانڈ کی استدعا کر دی ہے۔

نیب پراسیکیوٹر سردار مظفر عباسی نے عدالت کو بتایا کہ بنک حکام کی معاونت سے جعلی بینک اکاؤنٹس کھولے گئے۔ملزم کو گرفتار کیا ہے تفتیش کے لئے ریمانڈ کی ضرورت ہے۔

احتساب عدالت کے جج ارشد ملک نے نیب پراسیکیوٹر سے استفسار کیا زرداری کو کن بنیادوں پر گرفتار کیا ہے؟ پہلے یہ بتائیں۔

سردار مظفر عباسی نے آصف زرداری کی گرفتاری کی بنیاد پڑھ کر سنائی۔ آصف زرداری نے نیب حوالات میں اضافی سہولیات کی درخواست دائر کر دی۔

آصف زرداری نے درخواست میں موقف اختیار کیا ہے کہ ایک ذاتی خدمت گزار ساتھ رکھنے کی اجازت دی جائےاورمیڈیکل کی بھی تمام سہولیات مہیا کی جائیں۔

پولی کلینک کے میڈیکل بورڈ نےپیشی سے قبل آصف زرداری کو جسمانی ریمانڈ کیلئے فٹ قرار دیا۔

سابق صدرآصف علی زرداری کو ایک ایمبولینس اور 19گاڑیوں کے حصار میں نیب راولپنڈی آفس سے نیب کورٹ روانہ کیا گیا۔

واضح رہے کہ سابق صدر آصف علی زرداری کو گزشتہ روز اسلام آباد ہائیکورٹ سے انکی درخواست ضمانت مسترد ہونے کے بعد گرفتار کیا گیا تھا۔

ذرائع نے ہم نیوز کو بتایا ہے کہ نیب کے تفتیشی افسران نے آصف زرداری سے پوچھ گچھ کا سلسلہ گزشتہ رات ہی شروع کر دیاتھا۔ پہلے ہی روز آصف زرداری سے تقریبا تین گھنٹے پوچھ گچھ کی گئی۔

آصف زرداری سے پارک لین کیس، واٹر سپلائی اور سولر کے غیرقانونی ٹھیکوں سے متعلق تفتیش کی گئی۔ سابق صدر سے بحریہ ٹاؤن اور زرداری گروپ کے درمیان معاہدوں سے متعلق بھی پوچھ گچھ کی گئی۔

نیب راولپنڈی کے آفس میں آصف زرداری کو علیحدہ سیل میں رکھا گیا ۔میڈیکل بورڈ نے آصف زرداری کی ابتدائی طبی رپورٹ تسلی بخش قرار دی۔

آصف زرداری کو آج احتساب عدالت پیش کر کے جسمانی ریمانڈ حاصل کیا جائے گا۔

نیب کی جانب سے آصف زرداری کے جسمانی ریمانڈ کی استدعا کی جائے گی، اس موقع پر جوڈیشل کمپلیکس کے اندراور اطراف میں سیکیورٹی کے سخت انتظامات کئے گئے ہیں اور 300 اہلکار نیب راولپنڈی آفس کی سیکیورٹی جبکہ نیب عدالت کے باہر500اہلکار اور نیب راولپنڈی آفس سےنیب عدالت تک 200ٹریفک اہلکار تعینات رہیں گے۔

نیب راولپنڈی کے دونوں اطراف کی سٹرکیں مکمل بند رہیں گی جبکہ نیب عدالت کےجی الیون روڈبھی سیکیورٹی کی وجہ سےبندرہےگی اور نیب عدالت اور نیب راولپنڈی کے باہر رینجرز اہلکارگشت پر مامورہوں گے۔

پی پی کارکنان آئے تو آبپارہ چوک سےآگےجانےکی اجازت نہیں ہوگی ، پی پی کارکنان نیب عدالت پہنچےتوان کوپراجیکٹ موڑپرروک لیاجائےگا۔

ادھر وفاقی وزیر سائنس اینڈ ٹیکنالوجی فواد چودھری نے کہا ہے کہ آصف زرداری اور نواز شریف کی جیل یاتراپی ٹی آئی کے انتخابی وعدوں کا
اہم ترین باب تھا۔

اسلام آباد (میڈیا 92 نیوز آن لائن)وزیر خارجہ شاہ محمود قریشی نے کہاہے کہ آصف زرداری کی گرفتاری کے حوالے سے عدالتی فیصلے سے حکومت کا کوئی تعلق نہیں ہے ، نیب ہمارے تحت نہیں ہے ، ہم ان کو کوئی ہدایت نہیں دے سکتے ، آصف زرداری کا کیس 15دن نہیں بلکہ 3سال پرانا ہے ۔

تفصیلات کے مطابق قومی اسمبلی میں خطاب کرتے ہوئے وزیر خارجہ شاہ محمود قریشی نے کہاہے کہ آصف زرداری کی گرفتاری کے حوالے سے عدالتی فیصلے سے حکومت کا کوئی تعلق نہیں ہے ، نیب ہمارے تحت نہیں ہے ، ہم ان کو کوئی ہدایت نہیں دے سکتے ، آصف زرداری کا کیس 15دن نہیں بلکہ 3سال پرانا ہے ۔ انہوں نے کہا کہ نیب ایک خود مختار ادارہ ہے اور اس کا حکومت کے ساتھ کوئی تعلق نہیں ہے ، حکومت سمجھتی ہے کہ نیب کو کسی دباﺅکیلئے استعمال نہیں ہونا چاہئے ، ہم سمجھتے ہیں کہ نیب کو بلا امتیاز احتساب کرنا چاہئے ۔

انہوں نے کہا کہ یہ ان کاخیال ہے کہ حکومت نیب کی بیساکھیوں پر کھڑی ہے ، نیب جو بھی چاہئے شفاف انداز میں کرے ، حکومت اس میں رکاوٹ نہیں بنے گی ۔ انہوں نے کہا کہ میں شہباز شریف کا شکرگزار ہوں کہ میری بات کو تحمل کے ساتھ سنا گیا اور ہم نے بھی قائد حزب اختلاف کو بڑے تحمل سے سنا ہے ۔ ان کا کہنا تھا کہ شہباز شریف نے کہاہے کہ آصف زرداری کے پروڈکشن آرڈر جاری کئے جائیں۔

اسلام آباد (میڈیا 92 نیوز آن لائن) سابق صدر آصف علی زرداری کے وکیل سردار لطیف کھوسہ کا کہنا ہے کہ اس کے باوجود کہ سابق صدر ضمانت پر ہیں پھر بھی انہیں گرفتار کیا گیا ، چیئرمین نیب کی جانب سے جاری کیے گئے وارنٹ بد نیتی پر مبنی ہیں، انہوں نے ایک جوڈیشل آرڈر کو تابع کیا جو عدالتی حکم کی خلاف ورزی ہے۔

زرداری ہاﺅس کے باہر میڈیا سے گفتگو کرتے ہوئے سردار لطیف کھوسہ نے کہا کہ عدالت نے ریفرنس کے فیصلے تک آصف زرداری اور فریال تالپور کی حاضری ضامن کی کسٹڈی میں دی تھی، عدالتی حکم کے تابع ضامن کی ذمہ داری ٹھہری کہ وہ آصف زرداری اور فریال تالپور کو ہر تاریخ پر پیش کرے گا ۔ چیئرمین نیب کی جانب سے جاری کیے گئے وارنٹ بد نیتی پر مبنی ہیں، انہوں نے ایک جوڈیشل آرڈر کو تابع کیا جو عدالتی حکم کی خلاف ورزی ہے ۔

انہوں نے کہا اس کے باوجود کہ سابق صدر ضمانت پر ہیں لیکن پھر بھی انہیں گرفتار کیا گیا، آصف زرداری نے رضا کارانہ طور پر گرفتاری دی ہے، آصف علی زرداری جب صدر پاکستان بنے تو وہ زرداری گروپ کی ڈائریکٹر شپ سے مستعفی ہوگئے تھے جس کے بعد سے اب تک انہوں نے اپنی ڈائریکٹر شپ بحال نہیں کرائی۔

لطیف کھوسہ کا کہنا تھا کہ ساڑھے 4 ارب روپے کی رٹ لگا رکھی تھی لیکن ڈیڑھ ارب روپے نکلے موجودہ کیس میں ڈیڑھ کروڑ روپے کے گنے کی خریداری ہے جو اومنی گروپ عدالت میں تسلیم کرچکا ہے۔

لندن (میڈیا 92 نیوز آن لائن مانٹرنگ ڈیسک ) چیف جسٹس پاکستان آصف سعید کھوسہ کا کہنا ہے کہ حکومت جسٹس فائزعیسیٰ کو ہٹا نہیں سکتی، جسٹس فائزعیسیٰ کا معاملہ سپریم جوڈیشل کونسل کا ہے۔

کیمبرج یونیورسٹی میں طلبا ء سے خطاب کرتے ہوئے چیف جسٹس پاکستان آصف سعید کھوسہ کا کہنا تھا کہ اپنے ججز پر اعتماد کریں وہ انصاف کریں گے، حکومت جسٹس فائزعیسیٰ کو ہٹا نہیں سکتی، جسٹس فائزعیسیٰ کا معاملہ سپریم جوڈیشل کونسل کا ہے، ہم پاکستان میں عدالتوں میں اصلاحات لارہے ہیں جب کہ انصاف یقینی بنانا میری اولین ذمہ داری ہے، جب ان سے سوال کیا گیا کہ کیا آپ جسٹس قاضی فائز عیسیٰ سے لندن میں جائیدادوں پر منی ٹریل طلب کریں گے؟ اس پر چیف جسٹس نے کہاکہ یہ پاکستانی عدالتوں کا مسئلہ ہے اس پر یہاں کچھ نہیں کہہ سکتا، پاکستان میں انصاف کی فراہمی کی بہتری کیلئے ماڈلزکورٹس کے نتائج بہتربرآمد ہوئے۔

چیف جسٹس پاکستان نے کہا کہ مارشل لا، جمہوریت اور دیگرنظام آنے کے باوجود ہم آج تک قانون کی حکمرانی کیلئے جدوجہد کررہے ہیں، انصاف کا تقاضا ہے کہ سزا دیتے وقت مجرم کی فیملی اور اس کے حالات کو مد نظر رکھا جائے۔ ان کا کہنا تھا کہ انصاف کی فراہمی میں نظام پوری طرح کام نہ کر رہا ہوتو اس میں عدلیہ کا کوئی قصورنہیں، پاکستان میں قانون کی حکمرانی کو برقراررکھنے کیلئے ہمارا معاشرہ جدوجہد کررہاہے۔

چیف جسٹس پاکستان کا کہنا تھا کہ انصاف کا تقاضا ہے کہ تمام حالات کو مدنظر رکھا جائیں، ایک وکیل کی قانون سے آگاہی بھی ضروری ہے، دوران سماعت دلائل مختصر، اچھے اور مدلل ہونے چاہئیں، پاکستان میں برطانیہ کے برعکس عدلیہ میں ویٹو پاور کا رواج نہیں، ہم کم وسائل کے باوجود انصاف کی فراہمی کیلئے سخت جدوجہد کررہے ہیں۔

چیف جسٹس آصف سعیدکھوسہ نے کہا کہ بطور وکیل قانون کی جو روح ہے ہمیں اس کو دیکھنا چاہیے، ایک غیر ملکی کے سوال پر ان کا کہنا تھا کہ دنیا میں دو ریاستیں پاکستان اور اسرائیل مذہب کے نام پر بنی ہیں، اسی طرح 2 نئی ریاستیں ایک ساؤتھ سوڈان اور دوسری ایسٹ تیمور کرسچن ریاستیں بنی ہیں، انہوں نے بتایا کہ وہ کیمرج یونین کے مستقل رکن ہیں جب کہ انہوں نے طلبا کو پاکستان میں قانون سازی اور امن و امان کے حوالے سے بریفنگ بھی دی۔

اسلام آباد(میڈیا 92 نیوز آن لائن)قومی احتساب بیورو(نیب)نے فرتال تالپور کو گرفتار نہ کرنے کافیصلہ کیا ہے ،نیب ذرائع کا کہنا ہے کہ صرف آصف زرداری کو گرفتار کیا گیا ہے ۔

میڈیا رپورٹ کے مطابق نیب نے فریال تالپور کو گرفتار نہ کرنے کافیصلہ کیا ہے، دوسری جانب نیب نے آصف زرداری کو گرفتار کر کے نیب راولپنڈی منتقل کر دیا ہے جہاں پر انکا طبی معائنہ کیا گیا ہے

نیب کی جانب سے سابق صدر آصف زرداری کے لئے خصوصی کمرہ بنایا گیا ہے جس میں اے سی ،ٹی وی ، سنگل بیڈ کی سہولت دی گئی ہے ، اور انکے کمرے کا لاک کو سپیشل کوڈ لگایا گیا ہے

اسلام آباد (میڈیا 92 نیوز آن لائن) پیپلزپارٹی کے چیئرمین بلاول بھٹو زرداری نے آصف علی زرداری کی ممکنہ گرفتاری کے پیش نظر کارکنان کے لیے پیغام جاری کردیا اور کارکنوں سے پرامن رہنے کی اپیل کی ہے ۔

اپنے پیغام میں بلاول بھٹو زرداری کاکہناتھاکہ کارکن مشتعل نہ ہوں، ہم نےہمیشہ عدالتوں میں اپنی بےگناہی ثابت کی۔واضح رہے کہ نیب ٹیم زرداری ہاؤس سے انکو گرفتار کر لیا ہے

سابق صدر نے نیب کی ٹیم کو خودگرفتاری دی ہے نیب ٹیم نے سابق صدر کو ورانٹ گرفتاری دیکھائے جس کے بعد انہوں نے گرفتاری دے دی ، بظاہر نیب ٹیم کو آصف علی زرداری کی گرفتاری پر کسی قسم کی مزاضمت کا سامنا نہیں کرنا پڑا .. گرفتاری کے موقع پر زرداری ہاؤس کےباہرپولیس کی اضافی نفری تعینات رہی ، زرداری ہاوس جانے والے تمام راستے پولیس نے سیل کر رکھے تھے

سابق صدر کو بلیک کلر کی پراڈو گا ڑی میں نیب راولپنڈی پہنچا دیا گیا

اسلام آباد: ہائیکورٹ کی جانب سے ضمانت مسترد کیے جانے کے بعد نیب کی ٹیم نے آصف زرداری کو گرفتار کرلیا۔

قومی احتساب بیورو (نیب) کی ٹیم جعلی اکاؤنٹس کیس میں پیپلزپارٹی کے صدر آصف زرداری کی گرفتاری کے لیے پولیس کی بھاری نفری کے ہمراہ زرداری ہاؤس اسلام آباد پہنچی جہاں آصف زرداری کے وکلاء نے نیب کی ٹیم سے عدالت کی جانب سے گرفتاری کے احکامات طلب کیے۔

نیب ذرائع کا کہنا ہےکہ آصف زرداری کو نیب کی گاڑی میں ہی نیب راولپنڈی کے دفتر منتقل کیا جائے گا جہاں ان کا طبی معائنہ کرایا جائے گا جب کہ کل انہیں عدالت میں پیش کیا جائے گا جہاں ان کے ریمانڈ کی استدعا کی جائے گی۔

زرداری ہاؤس کو چاروں طرف سے پولیس کی بھاری نفری نے گھیر رکھا ہے اور اس کے اطراف بھاری تعداد میں اہلکار تعینات ہیں، پولیس نے زرداری ہاؤس کے اطراف راستے سیل کردیے اور مرکزی سڑک بھی سیل کردی گئی ہے۔

نیب ذرائع کے مطابق جعلی اکاؤنٹس کیس میں نامزد آصف زرداری کی ہمشیرہ فریال تالپور کو فوری گرفتار نہ کرنے کا فیصلہ کیا گیا ہے۔

آصف زرداری کے رکن پارلیمنٹ ہونے کے سبب نیب کو ان کی گرفتاری سے قبل اسپیکر قومی اسمبلی کو آگاہ کرنا ضروری ہے جس کے لیے نیب کی ایک ٹیم پارلیمنٹ ہاؤس پہنچی تھی جس نے اسپیکر کو آصف زرداری کے وارنٹ کے بارے میں مطلع کیا۔

دوسری جانب ذرائع کا کہنا ہےکہ نیب نے آصف زرداری کی گرفتاری کے لیے وزارت داخلہ سے بھی مدد مانگی ہے اور اس سلسلے میں سیکریٹری داخلہ کو خط لکھا گیا ہے۔

جعلی بینک اکاؤنٹس کیس کا پسِ منظر

منی لانڈنگ کیس 2015 میں پہلی دفعہ اسٹیٹ بینک کی جانب سے اُس وقت اٹھایا گیا، جب مرکزی بینک کی جانب سے وفاقی تحقیقاتی ادارے (ایف آئی اے) کو مشکوک ترسیلات کی رپورٹ یعنی ایس ٹی آرز بھیجی گئیں۔

ایف آئی اے نے ایک اکاؤنٹ سے مشکوک منتقلی کا مقدمہ درج کیا جس کے بعد کئی جعلی اکاؤنٹس سامنے آئے جن سے مشکوک منتقلیاں کی گئیں۔

معاملہ سپریم کورٹ تک پہنچا تو اعلیٰ عدالت نے اس کی تحقیقات کے لیے مشترکہ تحقیقاتی ٹیم ( جے آئی ٹی) تشکیل دی جس نے گزشتہ برس 24 دسمبر کو عدالت عظمیٰ میں اپنی رپورٹ جمع کرائی جس میں 172 افراد کے نام سامنے آئے۔

جے آئی ٹی نے سابق صدر آصف علی زرداری اور اومنی گروپ کو جعلی اکاؤنٹس کے ذریعے فوائد حاصل کرنے کا ذمہ دار قرار دیا اور ان کے نام ای سی ایل میں ڈالنے کی سفارش کی۔

اس کیس میں سابق صدر آصف علی زرداری، ان کی ہمشیرہ فریال تالپور سے بھی تفتیش کی گئی جب کہ پیپلز پارٹی کے چیئرمین بلاول بھٹو زرداری نے بھی تحریری طور پر جے آئی ٹی کو اپنا جواب بھیجا جب کہ اومنی گروپ کے سربراہ انور مجید اور نجی بینک کے سربراہ حسین لوائی ایف آئی اے کی حراست میں ہیں۔

سپریم کورٹ نے 7 جنوری 2019 کو اپنے فیصلے میں نیب کو حکم دیا کہ وہ جعلی اکاؤنٹس کی از سر نو تفتیش کرے اور 2 ماہ میں مکمل رپورٹ پیش کرے جب کہ عدالت نے جے آئی ٹی رپورٹ بھی نیب کو بجھجوانے کا حکم دیا۔

نیب نے 7 جنوری کو ہی جعلی اکاؤنٹس کیس کی تحقیقات کے لیے کمبائنڈ انویسٹی گیشن ٹیم (سی آئی ٹی) تشکیل دی جس کی سربراہی ڈی جی نیب راولپنڈی کو دی گئی۔

آصف علی زرداری اور بلاول بھٹو زرداری نے 20 مارچ کو نیب کی کمائنڈ انویسٹی گیشن کے سامنے پیش ہو کر بیان ریکارڈ کرایا۔

نیب راولپنڈی نے جعلی اکاؤنٹس کیس میں تین ریفرنسز تیار کر کے نیب ہیڈ کوارٹر بھجوائے اور چیئرمین نیب جسٹس (ر) جاوید اقبال کی زیر صدارت نیب ایگزیکٹو بورڈ نے 2 اپریل کو جعلی اکاؤنٹس کیس میں پہلا ریفرنس اومنی گروپ کے چیف ایگزیکٹو عبدالغنی مجید اور دیگر کے خلاف دائر کرنے کی منظوری دی۔

ملتان (میڈیا 92 نیوز آن لائن ) پنجاب کے ضلع ملتان کی تحصیل جلالپور پیر والا میں فائرنگ سے 4 افراد جاں بحق اور 2 زخمی ہو گئے۔

پولیس کے مطابق جلالپور پیر والا میں نامعلوم شخص نے گھر میں گھس کر فائرنگ کر دی جس کے نتیجے میں گھر میں موجود خاتون سمیت 2 افراد جاں بحق اور 2 خواتین سمیت 4 افراد زخمی ہو گئے۔ لاشوں اور زخمی ہونے والوں کو فوری طور پر اسپتال منتقل کیا گیا جہاں زخمیوں کو فوری طبی امداد فراہم کی گئی۔

واقعہ میں جاں بحق او زخمی ہونے والوں میں ایک ہی گھر کے افراد شامل ہیں جن میں باپ، بیٹے اور بیٹیاں شامل ہیں۔ جاں ہونے والوں کی شناخت رفیق، آصف اور نسیم بی بی کے نام سے ہوئی۔ واقعہ میں زخمی ہونے والی 10 سالہ بچی کو ملتان نشتر اسپتال منتقل کیا گیا تاہم وہ زخموں کی تاب نہ لاتے ہوئے اسپتال پہنچنے سے پہلے ہی دم توڑ گئی۔

پولیس کے مطابق حملہ آور نے واقعہ کے بعد خود کو بھی گولی مار کر خودکشی کر لی تاہم واقعہ کی تحقیقات جاری ہیں۔

ورثا نے واقعہ کے خلاف مین چوک بند کر کے پولیس کے خلاف احتجاج کیا۔ جس کی وجہ سے ٹریفک کی روانی متاثر ہوئی۔