Category جرم وانصاف

حکومت کی جانب سے دو ججز کے خلاف سپریم جوڈیشل کونسل میں ریفرنس بھجوانے پر پاکستان بار کونسل نے 14 جون کو ملک بھر میں ہڑتال کا اعلان کردیا۔

لاہور (میڈیا 92 نیوز آن لائن ) سپریم کورٹ میں وائس چیئرمین پاکستان بار کونسل سید امجد شاہ کی زیر صدارت پاکستان بھر کی بار کونسلز کا اجلاس ہوا۔

بعد ازاں صحافیوں سے گفتگو کرتے ہوئے امجد شاہ نے کہا کہ تمام وکلا اس بات پر متفق ہیں کہ ججز کے خلاف ریفرنس بدنیتی پر مبنی ہے، ریفرنس مس کنڈکٹ اور سپریم جوڈیشل کونسل کے دائرہ کار میں نہیں آتا، حکومت ریفرنس واپس لے ورنہ ملک کو بہت نقصان ہوگا۔

انہوں نے وزیر قانون فروغ نسیم اور اٹارنی جنرل سے مستعفی ہونے کا مطالبہ کیا اور ساتھ ہی کراچی بار کی جانب سے اٹارنی جنرل اور وزیر قانون کے خلاف قرارداد کی تائید کرتے ہوئے ان کی رکنیت منسوخ کرنے کا مطالبہ کیا۔

امجد شاہ نے کہا کہ ججز کے احتساب کے خلاف نہیں تاہم سیکشن 176 کے تحت پہلے نوٹس دیا جاتا ہے، لیکن جج صاحبان کو کوئی نوٹس نہیں دیا گیا جبکہ میرٹ کے لحاظ سے یہ بہت کمزور ریفرنس ہے جو کامیاب نہیں ہو گا۔

ان کا کہنا تھا کہ اعلیٰ عدلیہ کے ججز کے خلاف دائر ہونے والے ریفرنس کے خلاف ملک بھر کے وکلا 14 جون کو ہڑتال کریں گے، ہمارا احتجاج ججز کے لیے نہیں اداروں کی مضبوطی کے لیے ہے جبکہ ہڑتال اور احتجاج قانون کے دائرے میں رہ کریں گے۔

انہوں نے کہا کہ تمام ادارے اپنے دائرہ کار میں رہیں، جو دائرے سے باہر نکلے گا بار کونسل آگے کھڑی ہوگی۔

وائس چیئرمین پاکستان بار کونسل کا کہنا تھا کہ وکلا کا احتجاج ملک کی بقا اور اداروں کی مضبوطی کے لیے ہے، پہلے بھی تحریک افتخار چوہدری کے لیے نہیں ادارے کے لیے تھی۔

انہوں نے کہا کہ سپریم جوڈیشل کونسل کا ریکارڈ شاندار نہیں، کئی ججز کے خلاف ریفرنس پڑے رہے جبکہ وہ ججز ریٹائر ہوگئے، پھر اچانک پتہ چلا کہ تمام ریفرنس ختم ہوگئے، کونسل کی سفارش پبلک نہ ہونا اور ریفرنس ختم ہونے پر سوالیہ نشان ہیں۔

ان کا کہنا تھا کہ ریفرنس خارج ہو تو صدر اور وزیر اعظم کو مستعفی ہونا چاہیے۔

امجد شاہ نے معاون خصوصی اطلاعات فردوس عاشق اعوان کے آئین و قانون کے دائرے میں رہنے کے بیان پر کہا کہ ‘انہیں سوچ سمجھ کر بیان دینا چاہیے، آئین اور قانون کی بات وکیل نہیں بتائے گا تو کون بتائے گا جبکہ فردوس عاشق اعوان بار کونسلز کے بارے میں اپنا بیان واپس لیں۔’

انہوں نے کہا کہ حکمرانوں کو بادشاہ والی سوچ نہیں اپنانی چاہیے، جب حکمرانوں کی سوچ بادشاہوں والی ہو جائے تو ایسے ریفرنس آتے ہیں۔

واضح رہے کہ گزشتہ روز سپریم کورٹ بار ایسوسی ایشن کے صدر امان اللہ کنرانی نے بھی اعلان کیا تھا کہ وکلا 14 جون کو جسٹس قاضی فائز عیسیٰ کے خلاف دائر ریفرنس پر سپریم کورٹ کے باہر دھرنا دیں گے۔

امان اللہ کنرانی کا کہنا تھا کہ یہ دھرنا اس وقت تک جاری رہے گا جب تک جسٹس کے خلاف ریفرنس واپس نہیں لیا جاتا۔

ان کا کہنا تھا کہ ہم سپریم کورٹ کے باہر ریفرنس کی کاپیاں جلائیں گے اور ریفرنس کے دوران احتجاج کریں گے۔

ریفرنس کو سوچی سمجھی سازش قرار دیتے ہوئے انہوں نے کہا کہ ریفرنس کے ذریعے بلوچستان کو چیف جسٹس کے عہدے سے محروم رکھنے کی سازش ہے اور جسٹس قاضی فائز عیسیٰ کے خلاف ریفرنس میں بدنیتی واضح ہے۔

ججز کے خلاف ریفرنس
خیال رہے کہ صدر مملکت ڈاکٹر عارف علوی نے سپریم کورٹ کے جسٹس قاضی فائز عیسیٰ اور سندھ ہائی کورٹ کے جج جسٹس کے آغا کے خلاف سپریم جوڈیشل کونسل میں ریفرنس دائر کردیا تھا۔

سپریم جوڈیشل کونسل نے صدارتی ریفرنس کی سماعت 14 جون کو مقرر کرتے ہوئے اٹارنی جنرل کو نوٹس جاری کردیا ہے۔

صدر مملکت نے جسٹس قاضی فائز عیسیٰ اورجسٹس کے آغا پر اثاثوں کے حوالے سے مبینہ الزمات عائد کرتے ہوئے سپریم جوڈیشل کونسل سے آرٹیکل 209 کے تحت کارروائی کی استدعا کی تھی۔

ریفرنس دائر کرنے کی خبر کے بعد جسٹس قاضی فائز عیسیٰ نے صدر ڈاکٹر عارف علوی کو دو خطوط لکھے تھے اور پہلے خط میں انہوں نے کہا تھا کہ ذرائع ابلاغ میں آنے والی مختلف خبریں ان کی کردار کشی کا باعث بن رہی ہیں جس سے منصفانہ ٹرائل میں ان کے قانونی حق کو خطرات کا سامنا ہے۔

مستقبل میں چیف جسٹس آف پاکستان کے عہدے پر فائز ہونے والے متوقع ججوں میں سے ایک جسٹس قاضی فائز عیسیٰ نے صدر مملکت سے یہ درخواست بھی کی تھی کہ اگر ان کے خلاف ریفرنس دائر کیا جاچکا ہے، تو اس کی نقل فراہم کردی جائے، ’مخصوص افواہوں کے باعث متوقع قانونی عمل اور منصفانہ ٹرائل میں ان کا قانونی حق متاثر اور عدلیہ کے ادارے کا تشخص مجروح ہورہا ہے‘۔

صدر مملکت کو اپنے دوسرے خط میں جسٹس قاضی فائز عیسیٰ نے کہا تھا کہ انہوں نے لندن میں موجود جائیدادوں سے متعلق کچھ نہیں چھپایا۔

جسٹس قاضی فائز عیسیٰ نے 8 صفحات پر مشتمل خط میں اعتماد کا اظہار کرتے ہوئے کہا ہے کہ صدر مملکت اپنے اختیارات کے تحت اس بات کو یقینی بنائیں گے کہ آئین کی پیروی کی جائے۔

لندن میں 3 جائیدادیں رکھنے کے الزامات کا جواب دیتے ہوئے انہوں نے لکھا تھا کہ وہ خود پر اور اپنے خاندان کے خلاف تحقیقات کے طریقے پر صبر کرلیں لیکن کیا یہ معاملہ عدلیہ کی آزادی سلب کرنے کا مرتکب نہیں ہورہا۔

خط میں انہوں نے کہا کہ جج ایسا کچھ ہونے کی اجازت نہیں دیتے اور اپنے آئینی حلف کے مطابق وہ آئین کی حفاظت اور اس کا دفاع کرتے۔

جسٹس قاضی فائز عیسیٰ نے اس خدشے کا بھی اظہار کیا کہ اگر عدلیہ کی آزادی کو نقصان پہنچایا جاتا ہے تو آئین میں موجود لوگوں کے بنیادی حقوق کاغذ پر لکھے گئے الفاظ سے بھی چھوٹے ہوجاتے ہیں۔

صدرِ مملکت کو لکھے گئے خط میں ان کا مزید کہنا تھا کہ آئین کا تقدس ان کی اولین ترجیح ہے۔

اس سے قبل ایڈیشنل اٹارنی جنرل زاہد فخرالدین ابراہیم نے حکومت کی جانب سے سپریم جوڈیشل کونسل کو بعض سینئر ججوں کے خلاف ریفرنس بھیجنے پر استعفیٰ دے دیا تھا۔

قانونی ماہرین کے مطابق جسٹس قاضی فائر عیسیٰ کے خلاف حالیہ مہم نومبر 2017 میں تحریک لبیک پاکستان کے فیض آباد دھرنے کے خلاف 6 فروری کو دیے گئے فیصلے میں سخت الفاظ استعمال کرنے بعد شروع ہوئی، جس میں انہوں نے وزارت دفاع، پاک فوج، پاک بحریہ اور پاک فضائیہ کے سربراہان کو اپنے ماتحت، ان اہلکاروں کے خلاف کارروائی کی ہدایت کی تھی، جو اپنے حلف کی خلاف ورزی کے مرتکب ہوئے۔

سندھ حکومت نے متاثرہ اہلخانہ کو دیت، دم اور ارش کی مد میں 33 کروڑ 90 لاکھ روپے ادا کرکے مختلف جیلوں میں جرمانے کی عدم ادائیگی کے باعث قید 37 قیدیوں کو رہا کروادیا۔

لاہور (میڈیا 92 نیوز آن لائن ) ڈان اخبار میں شائع رپورٹ کے مطابق جیل حکام نے سندھ حکومت کے مذکورہ اقدام کو مثبت اور متعدد غریب اہلخانہ کے لیے مسرت کا باعث قرار دیا۔

اس حوالے سے بتایا گیا کہ رہائی پانے والے قیدی اپنے سزائیں مکمل کرچکے تھے تاہم متاثرہ خاندان کو جرمانے کی عدم ادائیگی کے باعث مجبوراً قید تھے۔

ذرائع نے بتایا کہ سیٹنرل جیل کراچی سے 10، ملیر جیل سے 4، حیدرآباد جیل سے 13، لاڑکانہ جیل سے 4 اور سانگڑھ جیل سے ایک قیدی اپنی سزائیں مکمل کر چکے تھے تاہم جرمانے کی رقم ادا کرنے سے قاصر تھے۔

انہوں نے بتایا کہ صوبائی حکومت کی جانب سے جمع کردہ معلومات کے مطابق مذکورہ تمام 37 قیدی قریب خاندانوں سے تعلق رکھتے جو جرمانے کی رقم ادا نہیں کرسکتے تھے۔

ذرائع نے بتایا کہ رہائی نصیب پانے والے تمام قیدیوں کا مجرمانہ ریکارڈ نہیں تھا۔

وزیر برائے جیل خانہ جات سید ناصر حسین شاہ نے بتایا کہ موجودہ صورتحال سندھ حکومت کی مداخلت کی متقاضی تھی۔

انہوں نے کہا کہ ہم یہ اقدام اس لیے اٹھایا کہ عدالت کی جانب سے عائد قیدیوں پر جرمانے کی رقم کوئی انفرادی شخص ادا نہیں کرسکتا۔

صوبائی وزیر کا کہنا تھا کہ جرمانے کی رقم بہت بڑی تھی اور تمام قیدی غریب خاندانوں سے تعلق رکھتے ہیں جن کی کوئی مجرمانہ سرگرمیاں نہیں تھیں۔

ہائی کورٹ کے وکیل حیدر علی حیدر نے صوبائی حکومت کے اقدامات سراہاتے ہوئے کہا ’ایسے اقدامات ملک کو فلاحی ریاست کے سانچے میں ڈھالتے ہیں‘۔

لاہور (اپنے رپورٹر سے ) ایف آئی اےسائبرکرائم ونگ میں بلیک ملیرگروہ کاانکشاف، سائبرکرائم کےجھوٹےمقدمات بناکرشہریوں کولوٹنےوالےافسران عہدےسےہٹادیئےگئے، انسپکٹرفیاض حمید کوعہدےسےہٹاکرہیڈکوارٹرزکلوزکردیاگیا

اےایس آئی عاشر آرون کوفوری طورپرلاہورسےکوئٹہ ٹرانسفرکردیاگیا جبکہ اے ایس آئی ملک محمد طاہر کوہلی کو عہدےسےہٹاکرہیڈکوارٹرزکلوزکردیا گیا

ذرائع کے مطابق تینوں افسران انکوائری کےدوران کرپشن اور بلیک میلنگ میں ملوث پائےگئے، ڈپٹی ڈائریکٹرایف آئی اے سجاد باجوہ نےبلیک میلرافسران کی نشاندہی کی تھی ۔

بلیک میلرافسران کے گروہ نے سجاد باجوہ کویہ معاملہ اٹھانےکےفوری بعداسلام آبادتبدیل کرادیا، سجاد باجوہ ایک ماہ قبل ہی ڈپٹی ڈائریکٹرسائبرونگ تعینات کیےگئےتھے، باوثوق ذرائع کے مطابق فیاض حمید،عاشر آرون اور محمد طاہر کوہلی منظم اندازمیں شہریوں کوپھنساتےتھے، خواتین کی مدد سےشہریوں کوموبائل پرقابل اعتراض تصاویراورویڈیوبھیجی جاتی تھیں، تصاویراورویڈیوبھیجنےکےبعد یہ افسران مذکورہ خواتین کوہراساں کرنےکےمقدمات درج کرتےتھے،

انکوائری میں تینوں افسران کےخلاف شہریوں کوبلیک میل کرنےکاالزام درست ثابت ہوا، ایف آئی اے کی جانب سے سخت کارروائی کےبجائےتینوں کوعہدوں سےہٹانےیاتبدیل کرنےپراکتفاکیاگیا ہے ذرائع کے مطابق سائبرکرائم کےمزیدافسران بھی اسی طرزکی وارداتوں میں ملوث ہیں۔

ڈپٹی ڈائریکٹرسائبرکرائم گوجرانوالہ محمدآصف کیخلاف بھی ایک شہری نےشکایت درج کروارکھی ہے، ڈپٹی ڈائریکٹرسائبرکرائم عثمان کیخلاف بھی شکایات سامنےآگئیں، دونوں ڈپٹی ڈائریکٹرزکیخلاف شکایات کےباوجودانکوائری شروع نہیں کی گئی!

یاد رہے ایف آئی اے میں ان افسران کی بلیک میلنگ کے خلاف شہریوں کی جانب سے شکایتی درخواستیں دی گئی تھیں جن میں ان تین افسران کے خلاف انکوائری کر کے انکومصنوعی سزا کے طور پر تبادلے کیا گیا ہے جبکہ اب بھی بہر سے ایسے افسران موجود ہیں جن کے خلاف کاروائی کی درخوستیں موجود ہیں لیکن ابھی تک کوئی کاروائی عمل میں نہیں لائی گئی ….

اسلام آباد (میڈیا 92 نیوز آن لائن ) اعلیٰ عدلیہ کے سینئر ججز کے خلاف ریفرنس دائر کیے جانے کے حوالے سے وزارت قانون نے بالآخر وضاحت کردی کہ یہ ریفرنسز وزیراعظم کے معاون خصوصی برائے احتساب شہزاد اکبر کے اثاثہ ریکوری (وصولی) یونٹ (اے آر یو) کی شکایت پر دائر کیے گئے ہیں۔

ڈان اخبار کی رپورٹ کے مطابق وزارت قانون کے ترجمان کا کہنا تھا کہ ’وزارت کے پاس اپنا ایسا کوئی طریقہ کار موجود نہیں جس سے کسی بھی جج کے اثاثوں کی چھان بین کی جائے اس لیے وزارت فیڈرل بورڈ آف ریونیو (ایف بی آر) اور اے آر یو کی جانب سے ملنے والی شکایات پر ملک کے بہترین مفاد میں کارروائی کی گئی‘۔

ان کا مزید کہنا تھا کہ وزارت، قانون کی بالادستی پر یقین رکھتی ہے اور اس پر عمل جاری رکھیں گے۔

یاد رہے کہ گزشتہ برس شہزاد اکبر نے قومی احتساب بیورو (نیب) اور وفاقی تحقیقاتی ایجنسی کے عہدیداروں پر مشتمل اے آر یو یونٹ تشکیل دینے کا اعلان کیا تھا جس کا کام پاکستانی شہریوں کی بیرونِ ملک موجود جائیدادوں کی تحقیقات کرنا تھا۔

انہوں نے یہ بھی بتایا تھا کہ پاکستانی شہریوں کی متحدہ عرب امارات (یو اے ای) اور برطانیہ میں موجود 10 ہزار جائیدادوں کی فہرست موصول ہوچکی ہے۔

ترجمان وزارت قانون نے اس بات کی تردید کی کہ عدالت عظمیٰ کے اعلیٰ جج کے خلاف ریفرنس دائر کرنے کے پس پردہ وفاقی وزیر برائے قانون و انصاف بیرسٹر محمد فروغ نسیم کا دماغ ہے۔

بدنیتی پر مبنی خبروں کے تاثر کے بارے میں بیان دیتے ہوئے ترجمان نے اس بات کی تردید کی کہ وزارت قانون نے صدر عارف علوی کی ہدایات پر ریفرنس میں درج تحریر تبدیل کردی تھی کیوں کہ اس سے قبل استعمال ہونے والی زبان خاصی سخت تھی۔
پیمرا نوٹس !
دوسری جانب سپریم کورٹ کے 7 جولائی 2018 کو دیے گئے فیصلے کے تناظر میں پیمرا نے میڈیا کو ہدایات جاری کیں کہ سپریم جوڈیشل کونسل کی کارروائی پر میڈیا میں مباحثہ، کالم اور اداریہ شائع نہیں کیا جائے گا اور نہ ہی اس پر کوئی عوامی تبصرہ کیا جائے گا، صرف کارروائی کی خبر دی جائے گی۔

علاوہ ازیں سپریم کورٹ نے 12 ستمبر 2018 کو از خود نوٹس لیتے ہوئے ضمنی عدالتی معاملات پر بھی بات چیت نہ کرنے کا حکم جاری کیا تھا۔

پیمرا کے مطابق فیصلے میں اس بات کی ضرورت پر زور دیا گیا تھا کہ تمام لائسنس یافتہ الیکٹرونک میڈیا (پروگرام اینڈ ایڈورٹائزمنٹ کے ضابطہ اخلاق 2015) کی پیروی کریں بصورت دیگر ادارہ بغیر کوئی رعایت دیے قانون کے مطابق کارروائی کرے گا۔

فیصلے میں واضح کیا گیا تھا کہ کوئی بھی ضمنی عدالتی معاملہ نشر کیا جاسکتا ہے لیکن صرف اس صورت میں کہ اس کا مقصد عوام کا اطلاع پہنچانا ہو اور اس سے معاملے کے مستقبل کے بارے میں رائے دینا تجویز دینا یا تبصرہ کرنا مقصود نہ ہو۔

پیمرا نے خبردار کیا کہ ان ہدایات پر عملدرآمد نہ کیا گیا تو اس کے خلاف پیمرا آرڈیننس 2002 کے تحت کارروائی عمل میں لائی جائے گی۔

پشاور (میڈیا 92 نیوز آن لائن)ڈپٹی کمشنر شمالی وزیرستان نے خر کمر واقعے کی رپورٹ خیبر پختونخوا حکومت کو ارسال کردی۔ رپورٹ میں پی ٹی ایم کے 2 ایم این ایز پر واقعے کا الزام عائد کیا گیا ہے ، رپورٹ میں کہا گیا ہے کہ دتہ خیل ، الواڑہ اور خر کمر کے علاقوں میں امن و امان کی صورتحال ابتر ہوئی۔

ڈپٹی کمشنر شمالی وزیرستان کی رپورٹ میں بتایا گیا ہے کہ 29 اپریل کو دتہ خیل میں آرمی قافلے پر حملہ کرکے تین سپاہیوں کو شہید کیا گیا۔ یکم مئی کو الواڑہ میں باڑ لگانے والی ٹیم پر حملے میں 4 سپاہی شہید ہوئے۔ 24 مئی کو سکیورٹی فورسز نے آپریشن کیا جس کے دوران 2 مشتبہ افراد کو حراست میں لیا گیا۔ 2 افراد کو حراست میں لینے کے خلاف خر کمر چیک پوسٹ تک ریلی نکالی گئی۔

25 مئی کو علاقہ بویہ میں 12 عمائدین کے ساتھ مذاکرات ہوئے اور دھرنا ختم کرنے کی شرط پر ایک مشتبہ شخص کو رہا کرنے پر آمادگی ظاہر کی گئی ۔26 مئی کوپی ٹی ایم کے ایم این اے 300 حمایتیوں کو لے کر چیک پوسٹ پر پہنچے، مظاہرین نے رکاوٹوں کو نقصان پہنچایا اور ریاست مخالف نعرے لگائے، فوج نے احتجاج کے دوران تحمل کا مظاہرہ کیا۔علی وزیر اور محسن داوڑ کے اکسانے پر کارکن دوبارہ چیک پوسٹ پر جمع ہوئے، علی وزیر نے سکیورٹی فورسز کے خلاف نازیبازبان استعمال کی اور مظاہرین کو چیک پوسٹ پر حملے کیلئے اکسایا۔

مظاہرین نے چیک پوسٹ پر پتھراﺅ کیا اور گولیاں چلائیں ، چیک پوسٹ پر مختلف اطراف سے گولیاں چلیں، سکیورٹی فورسز نے مختصر دورانیے کیلئے فائرنگ کی، مظاہرین نے سکیورٹی فورسز کی بندوقیں چھیننے کی بھی کوشش کی ، شر پسندوں کی گولیاں مظاہرین اور ایم این ایز کی گاڑیوں کو بھی لگیں جس کے نتیجے میں پاک فوج کا ایک جوان شہید اور 7 زخمی ہوئے، واقعے میں 13 افراد جاں بحق اور 25 زخمی ہوئے۔

لاڑکانہ(مانیٹرنگ ڈیسک) حالیہ ہفتوں میں لاڑکانہ اور سندھ کے دیگر شہروں میں ایڈز کے سینکڑوں مریض موجود ہونے کا انکشاف ہوا ہے جس پر پورے ملک میں پریشانی کی لہر دوڑ گئی۔ انہی میں ایک شکار پور کی 32سالہ شادی شدہ خاتون بھی تھی جسے اس کے شوہر نے موت کے گھاٹ اتار کر لاش درخت کے ساتھ لٹکا دی۔ ٹیلیگراف کے مطابق جب اس خاتون میں ایڈز کی تشخیص ہوئی تو اس کے شوہر نے اس پر بے وفائی کرنے اور کسی اور شخص کے ساتھ جنسی تعلق استوار کرنے کا الزام لگا دیا۔

رپورٹ کے مطابق ملزم نے بیوی کو پھندہ دے کر قتل کیا اور پھر اپنے گھر کے باہر موجود ایک درخت کے ساتھ اس کی لاش لٹکا دی۔ شکار پور کے ایک پولیس آفیسر روشن علی کا کہنا تھا کہ ”ملزم نے اس قتل کو خودکشی کا رنگ دینے کی کوشش کی تاہم اسے گرفتار کر لیا گیا ہے۔“ شکار پور پولیس کے ضلعی سربراہ ساجد سدوزئی کا کہنا تھا کہ ”قتل کے اس واقعے کی تحقیقات کی جا رہی ہیں اور ملزم کے خلاف بیوی کو قتل کرنے کے الزام کے تحت مقدمہ درج کر لیا گیا ہے۔“

دونوں اراکین اسمبلی کی گرفتاری کے بعد اس عمل میں قانونی پیچیدگیوں کا موضوع زیر بحث ہے۔

اسلام آباد (میڈیا 92 نیوز آن لائن ) ارکان اسمبلی محسن داوڑ اور علی وزیر کی وزیرستان میں چیک پوسٹ پر تصادم کے سلسلے میں گرفتاری کے بعد یہ بحث شروع ہو گئی ہے کہ آیا ان دونوں ارکان پارلیمان کی گرفتاری میں تمام ترقانونی پیچیدگیوں کا خیال رکھا گیا تھا یا نہیں۔

اسی طرح ان دونوں ارکان پارلیمان کو اسمبلی میں لانے کے لیے پاکستان پیپلز پارٹی کے چیئرمین بلاول بھٹو زرداری نے سپیکر اسمبلی کو ایک خط بھی لکھا ہے جس میں ان سے درخواست کی گئی ہے کہ دونوں گرفتار ارکان کو اسمبلی میں لایا جائے۔

اس مضمون مین انڈپینڈںٹ اردو نے ارکان پارلیمان کی گرفتاری کے حوالے سے قانونی راستوں پر ماہرین سے بات کی ہے اور اس حوالے سے قانون کو بھی پرکھا ہے۔

قانون اس بارے میں کیا کہتا ہے؟

قومی اسمبلی کے رولز آف پروسیجر اینڈ کنڈکٹ کی شق نمبر103 کے مطابق اگر کسی بھی رکن پارلیمان کو فوجداری کیس میں گرفتار کیا جائے یا اس کو کسی عدالت کی جانب سے سزا دی جائے تو جج یا مجسٹریٹ یا قانون نافذ کرنے والی اتھارٹی (پولیس و دیگر قانون نافذ کرنے والے ادارے) اس گرفتاری یا سزا کے بارے میں اسمبلی کے سپیکر کو جتنا جلد ہو سکے مطلع کرے گا۔

اسی شق میں یہ بھی درج ہے کہ کہ سپیکر کو پوری تفصیلات سے آگاہ کیا جائے گا کہ رکن کو کیوں، کہاں اور کس جرم میں گرفتار کیا گیا ہے۔ البتہ اس قانون میں یہ درج نہیں کہ کسی رکن پارلیمان کو سپیکر کی اجازت کے بغیر گرفتار نہیں کیا جا سکتا بلکہ یہ لکھا گیا ہے کہ گرفتاری کے بعد سپیکر کو مطلع کرنا لازمی ہے۔

اس کے علاوہ اسی قاعدے کے شق نمبر104 میں یہ بھی لکھا گیا ہے کہ جب رکن پارلیمان ضمانت پر رہا یا عدالت سے بری ہو جائے تو اس کے بارے میں میں بھی سپیکر کو بتانا لازمی ہوگا۔

یہ شق ارکان پارلیمان کی اسبملی کے احاطے کے باہر کے معاملے کے حوالے سے ہے۔ اگر کسی رکن اسمبلی پر پرچہ کٹا ہو اور پولیس یا دیگر قانون نافذ کرنے والے اداروں کو مطلوب ہو لیکن وہ اسمبلی کے احاطے میں موجود ہوں تو سپیکر کی اجازت کے بغیر گرفتاری نہیں کی جا سکتی۔

شق نمبر 107 کے مطابق کسی بھی رکن پارلیمان پر کوئی عدالتی یا ٹریبیونل یا کسی اتھارٹی کا فیصلہ اس وقت تک نافذ نہیں کیا جا سکتا جب تک سپیکر اسمبلی سے پہلے اجازت نہ لی جائے۔

ایسا ہی ایک کیس 2017 میں سابق رکن اسمبلی جمشید دستی کی گرفتاری کے وقت سامنے آیا تھا۔ اس معاملے پر اس وقت پیپلز پارٹی کے اپوزیشن رہنما خورشید شاہ کی جانب سے جمشید دستی کی گرفتاری پر بہت تنقید کی گئی تھی۔

اس وقت کے سپیکر قومی اسمبلی ایاز صادق تھے۔ انگریزی روزنامہ پاکستان ٹوڈے میں چھپی اس وقت کی خبر کے مطابق ایاز صادق نے اسمبلی کو بتایا تھا کہ کسی بھی رکن اسمبلی کو اسمبلی احاطے سے باہر گرفتاری کے لیے سپیکر کی اجازت کی ضروت نہیں ہے۔

انہوں نے کہا تھا کہ اجازت صرف اس وقت درکار ہوتی ہے جب رکن اسمبلی، اسمبلی کے احاطے میں موجود ہوں۔ اسمبلی سے باہر صرف سپیکر کو گرفتاری کے بعد بتانا لازمی ہے۔

سپیکر کو بتانے کے بعد کیا کارروائی کی جاتی ہے ؟َ

اسمبلی رولز کی شق نمبر105 میں درج ہے کہ جب سپیکر اسمبلی کو بتایا جائے کہ رکن پارلیمان کو گرفتار یا عدالت کے جانب سے سزا سنائی گئی ہے تو وہ یہ معلومات اسمبلی اجلاس میں تمام ارکان اسمبلی کو بتانے کے پابند ہوتے ہیں۔

اگر اسمبلی کا اجلاس جاری نہیں ہے اور اس قسم کا معاملہ آ جاتا ہے، تو اس صورتحال میں سپیکر کے لیے لازم ہے کہ وہ ایک مراسلے کے ذریعے اسمبلی کے تمام ارکان کو اس حوالے سے بتائیں۔

عوامی نیشنل پارٹی کے خیبر پختونخوا اسمبلی میں پارلیمانی رہنما سردار حسین بابک نے انڈپینڈنٹ اردو کو بتایا کہ سپیکر اسمبلی کو گرفتاری کے بارے میں نہ بتانا یا بتا کر سپیکر کا دیگر اراکین کے ساتھ شئیر نہ کرنا اس بات کو واضح کرتا ہے کہ حکومت بے اختیار ہے اور مہار کسی اور کے پاس ہے۔

انہوں نے مزید کہا ’دو منتخب اراکین اسمبلی کو گرفتار کیا گیا ہے اور ان کے پروڈکشن ارڈر کے بارے میں درخواستیں دی جا رہی ہے لیکن حکومت اس قانونی شق پر عمل نہ کرنے سے یہ بات عیاں کر رہی ہے کہ پارلیمان بے اختیار ہے۔ یہاں جنگل کا قانون ہے اور جس کی لاٹھی اس کی بھینس والا معاملہ ہے۔‘

پروڈکشن آرڈر کیا ہے؟َ

پیپلز پارٹی کے چیئرمین بلاول بھٹو زرداری نے سپیکر اسمبلی اسد قیصر کے نام خط لکھ کر اس بات کی استدعا کی ہے کہ دو گرفتار ارکان اسمبلی علی وزیر اور محسن داوڑ کو اسمبلی میں لایا جائے۔

اس خط میں لکھا ہے کہ محسن اور علی وزیر کو 27 مئی کے اسمبلی اجلاس سے پہلے گرفتار کیا گیا تھا تاہم اس حوالے سے قانونی طور پر سپیکر کو 27 مئی کے اجلاس میں اسمبلی کو اس حوالے سے آگاہ کرنا چاہیے تھا مگر نہیں کیا گیا۔

اسی خط میں سپیکر سے کہا گیا ہے کہ دونوں ارکان پارلیمان کے پروڈکشن آرڈر جاری کیے جائیں۔

پروڈکشن آرڈر کسی بھی گرفتار رکن اسمبلی کو اسمبلی میں بلانے کے لیے ایک آرڈر ہوتا ہے۔ اسمبلی قواعد کی شق نمبر108 میں ہے کہ ایک گرفتار رکن اسمبلی کی موجودگی اگر کسی بھی اسمبلی اجلاس یا کمیٹی میٹنگ میں ضروری ہو تو سپیکر پروڈکشن آرڈر جاری کر کے اس رکن کو اسمبلی میں بلا سکتا ہے۔

اسی شق میں یہ بھی بتایا گیا ہے کہ سپیکر متعلقہ صوبائی حکومت یا متعلقہ اتھارٹی کے نام پروڈکشن ارڈر بھیجے گا جس پر سیکرٹری اسمبلی یا کوئی دوسرا متعلقہ آفیسر کی دستخط ہو گی۔

حکومت یا اتھارٹی اس بات کی پابند ہوگی کہ وہ گرفتار رکن اسمبلی کو حفاظتی حصار میں اسمبلی اجلاس میں لائیں اور اجلاس ختم ہونے کے بعد دوبارہ جیل لے جائیں۔

اس قانون کا استعمال پنجاب کے سابق وزیراعلٰی شہباز شریف کے لیے کیا گیا تھا جب وہ آشیانہ ہاوسنگ سکیم کیس میں قومی احتساب بیورو کی حراست میں تھے۔

شہباز شریف جب نیب کی حراست میں تھے تو اسی دوران اسمبلی اجلاس بلایا گیا تھا اور پبلک اکاونٹس کمیٹی کا پہلا اجلاس ہونے جا رہا تھا جس میں شہباز شریف جو اسی کمیٹی کے صدر تھے کی شرکت ضروری تھی۔

اسمبلی سے پروڈکشن آرڈر جاری ہونے کے بعد شہباز شریف دو دن کے لیے اسمبلی اجلاس میں شرکت کرتے رہے اور بعد میں ان کو دوبارہ حراست میں دے دیا گیا تھا۔

کوئٹہ (میڈیا 92 نیوز آن لائن ) بلوچستان کے وکلاء نے حکومت کی جانب سے سپریم کورٹ کے جج جسٹس قاضی فائز عیسی کے خلاف ریفرنس کو آزاد عدلیہ کے خلاف سازش قرار دیتے ہوئے عید کے بعد ملک گیر تحریک کا اعلان کر دیا ہے۔

بلوچستان ہائی کورٹ بار ایسسی ایشن کے نائب صدر حاجی عطاء اللہ لانگو، بلوچستان بار کونسل کے نائب صدر اقبال کاسی ایڈوکیٹ، کوئٹہ بار کےصدر آصف ریکی ایڈوکیٹ اور ممبر جوڈیشل کونسل آف پاکستاں منیر کاکڑ ایڈوکیٹ نے کوئٹہ میں پریس کانفرنس سے خطاب کرتے ہوئے اس ریفرنس کی شدید الفاظ میں مذمت کی۔

انہوں نے کہا کہ اس وقت وطن عزیز شدید مالی بحران سے دوچار ہے اور حکومت نے ملک کو آئی ایم ایف کے ہاتھوں گروی رکھ دیا ہے۔

وکلا رہنماؤں کا کہنا تھا کہ مہنگائی اور بے روزگاری کے علاوہ امن و امان کا مسئلہ بھی بڑھتا جا رہا ہے، ایسے حالات میں اعلی عدلیہ کے ایک معزز جج کے خلاف ریفرنس غیرضروری اور عدل کے خلاف ہے۔

انہوں نے مزید کہا کہ ریفرنس وفاق کے لیے بھی نقصان دہ ہے، اس سے چھوٹے صوبے احساس محرومی کا شکار ہو جائیں گے کیونکہ سپریم کورٹ میں جسٹس قاضی فائز عیسی بلوچستان کے واحد جج ہیں۔

بارکونسلز کے نمائندوں نے کہا کہ ریفرنس ریفرنس آزاد عدلیہ کے خلاف سازش ہے جس کو ناکام بنانے کے لیے لئے کسی بھی قربانی سے دریغ نہیں کیا جائے گا۔

انہون نے کہا کہ اس مقصد کے لیے عید کے بعد آل بلوچستان وکلاء کانفرنس کا انعقاد کیا جائے گا اور آئندہ کا لائحہ عمل طے کرتے ہوئے ملکی سطح پر تحریک شروع کرنے کا اعلان کیا جائے گا۔

اسلام آباد (میڈیا 92 نیوز آن لائن ) وفاقی حکومت کی جانب ججز کے خلاف سپریم جوڈیشل کونسل میں ریفرنس دائر کرنے کے معاملے پر ایڈیشنل اٹارنی جنرل زاہد فخرالدین جی ابراہیم احتجاجاً مستعفی ہو گئے۔

وفاقی حکومت کی جانب سے ہائی کورٹس کے دو اور سپریم کورٹ کے ایک جج کے خلاف سپریم جوڈیشل کونسل میں ریفرنسز دائر کئے گئے ہیں۔

حکومت کی جانب سے ریفرنسز میں ججوں پر بیرون ملک جائیدادیں ظاہر نہ کرنے کے الزام لگایا گیا ہے۔

حکومت نے ہائیکورٹ کے 2 اور سپریم کورٹ کے ایک جج کیخلاف ریفرنسز دائر کردیے

ایڈیشنل اٹارنی جنرل پاکستان زاہد فخر الدین جی ابراہیم نے اپنا استعفیٰ صدر مملکت کو بھجوا دیا ہے جس میں انہوں نے کام کرنے سے معذرت کی ہے۔

زاہد فخر الدین نے ججز کے خلاف ریفرنس کو حکومت کی جانب سے سپریم کورٹ کو دباؤ میں لانے کی کوشش قرار دیا ہے۔

انہوں نے اپنے استعفے میں مزید لکھا کہ سپریم کورٹ کے ججز کی ساکھ ناقابل مواخذہ ہے۔ ایڈیشنل اٹارنی جنرل نے مزید لکھا کہ مجھے 2018 نومبرمیں اس عہدے پر تعینات کیا گیا جو کہ میرے لیے اعزاز کی بات تھی لیکن گزشتہ روز مجھے پریس کے ذریعے معلوم ہوا کہ وفاقی حکومت کی جانب سے مبینہ خلاف ورزیوں پر سندھ ہائیکورٹ اور سپریم کورٹ آف پاکستان کے ججز کے خلاف سپریم جوڈیشل کونسل میں ریفرنس دائر کیا گیاہے ۔

اڈیشنل اٹارنی جنرل کا کہناتھا کہ ان میں سے ایک ریفرنس سپریم کورٹ آف پاکستان کے سینئر جج کے خلاف بھی ہے جو کہ اپنی مضبوط سالمیت کے باعث شہرت رکھتے ہیں ۔ایڈیشنل اٹارنی جنرل کا کہناتھا کہ یہ عمل میر ے لیے ناقابل قبول ہے اور میں احتجاجی طور پر عہدے سے استعفیٰ دے رہا ہوں کیونکہ میں عدلیہ کے وقار پر سمجھوتہ نہیں کر سکتا ہوں ۔

اسلام آباد (میڈیا 92 نیوز آن لائن ) سابق صدر آصف زرداری اور چیئرمین پیپلز پارٹی بلاول بھٹو زرداری کی آج نیب میں پیشی کے موقع پر اسلام آباد انتظامیہ نے جیالوں کے شہر میں داخلے پر پابندی لگا دی۔

ضلعی انتظامیہ کی جانب سے جاری نوٹی فکیشن کے مطابق پیپلز پارٹی کی قیادت کی نیب میں پیشی پر دیگر شہروں سے اسلام آباد آنے والے کارکنوں کے داخلے سے حالات خراب ہوسکتے ہیں اس لیے انہیں روکنے کا حکم جاری کیا گیا ہے۔

بلاول بھٹو زرداری اب سے کچھ دیر بعد نیب کے روبرو پیش ہوں گے جب کہ ذرائع کا کہنا ہے کہ آصف زرداری نے رات گئے نیب میں پیشی سے ایک بار پھر معذرت کرلی ہے۔

ذرائع کے مطابق آصف زرداری پچھلی پیشی پر بھی مصروفیت کے باعث پیش نہیں ہوسکے تھے، نیب کی مشترکہ تحقیقاتی ٹیم آصف زرداری کی عدم پیشی کے بارے میں آج فیصلہ کرے گی۔

چیئرمین پیپلز پارٹی بلاول بھٹو زرداری نے اپنے ٹوئٹر بیان میں کہا کہ احتجاج کی کال نہ دیے جانے کے باوجود کارکنان اسلام آباد پہنچنا شروع ہوگئے۔

بلاول بھٹو نے حکومت پر تنقید کرتے ہوئے کہا کہ ڈرتے ہیں تبدیلی والے، پاکستانیوں کے جمہوری حقوق کی خلاف ورزی کرتے ہوئے رات گئے نوٹی فکیشن جاری کر کے خیبرپختونخوا، پنجاب اور اسلام آباد میں مخالفین کو ہراساں کرنے کی کوشش کی گئی ہے۔

دوسری جانب سیکرٹری جنرل پیپلز پارٹی نیر بخاری نے کارکنوں کو روکنے کے سرکاری حکم نامے کی شدید مذمت کی ہے۔

نیر بخاری کا کہنا ہے کہ جمہوریت کے لبادے میں آمریت منظور نہیں، احتساب کے نام پر انتقامی کارروائیوں کا نشانہ بنایا جانا نئی بات نہیں، پارٹی قیادت کے خلاف جعلی اور جھوٹے مقدمات بغض اور عناد کا تسلسل ہیں۔

نیر بخاری نے کہا کہ بلاول بھٹو زرداری کے خوف سے مخالفین کی ٹانگیں کانپ رہی ہیں، پارٹی قیادت ایک بار پھر سرخرو اور مخالفین شرمندہ ہوں گے۔