Category لاھور نامہ

لاہور(M92) محکمہ تعلیم نے سرکاری سکولوں میں ٹیچنگ اور نان ٹیچنگ سٹاف کے لئے اپنے بچوں کو سرکاری سکولز میں داخل کرانے کی لازمی شرط عائد کردی ہے جبکہ اپنے محلہ کے کم ازکم ایک بچے کو داخل کرانا بھی ان کی ذمہ داریوں میں شامل کردیا گیاہے۔ غفلت برتنے پر سخت کارروائی عمل میں لائی جائےگی۔ تفصیلات کے مطابق محکمہ تعلیم نے نئی داخلہ پالیسی کو جاری کردیا ہے جس کے تناظر میں ہرماہ نئے داخل کیے جانے والے بچوں اور بچیوں کا باقادہ ڈیٹا حسب سابق محکمہ کو تحریری طو پر ارسال کیا جائے گا تاہم ہر سکول کے ٹیچنگ اور نان ٹیچنگ سٹاف کےلئے لازم قرار دیا گیا ہے کہ وہ اپنے بچوں کے علاوہ کم ازکم ایک داخلہ اپنے نام سے سرکاری سکولوں میں کرائیں گے جو انکی محکمانہ ذمہ داریوں کا حصہ بنادیا گیا ہے اس تناظر میں سرکاری سکولوں کے سربراہان کو ہدایات جاری کردی گئی ہے۔

لاہور(M92) شہر کے سب سے طویل انڈر پاس چوبچہ پھاٹک کا نام کیا ہوگا ، شالامار ، گرین ، گرین شالامار، ایل ڈی اے نے تینوں میں سے ایک نام کو فائینل کرنے کی تجویز وزیراعلیٰ پنجاب کو ارسال کردی۔تفصیلات کے مطابق لاہور ڈویلپمنٹ اتھارٹی نے زیر تعمیر چوبچہ پھاٹک انڈر پاس کا نیا نام رکھنے کا فیصلہ کیا ہے ۔ ایل ڈی اے حکام نے انڈر پاس کا نام رکھنے کی تجاویز وزیراعلیٰ پنجاب کو ارسال کردی ہے ۔ ڈی جی ایل ڈی اے نے تین نام تجویز کر کے وزیراعلیٰ کو ارسال کئے ہیں۔
ایل ڈی اے حکام کی جانب سے شالامار انڈرپاس ، گرین انڈر پاس اور شالامار گرین انڈرپاس نام تجویز کئے گئے ہیں ۔ وزیراعلیٰ پنجاب تینوں میں سے ایک نام فائینل کریں گے ۔ ایل ڈی اے حکام کی جانب سے انڈر پاس کا نام فائینل ہوتے ہی بورڈ بھی آویزائن کردیئے جائیں گے جو اب تک نام فائینل نہ ہونے کی وجہ سے التواء کا شکار ہیں۔

لاہور(M92) غازی آباد میں سسرالیوں نے دوسری شادی پر داماد کو وحشیانہ تشدد کا نشانہ بنا ڈالا۔ذرائع کے مطابق لاہور کے علاقے غازی آباد میں دوسری شادی کے معاملے پر سسرالیوں نے داماد کو وحشیانہ تشدد کا نشانہ بنا ڈالا۔ غازی آباد کے رہائشی دلاور کی 3 ماہ قبل نسرین بی بی سے شادی ہوئی تھی لیکن دونوں کے درمیان لڑائی جھگڑا رہتا تھا جس پر دلاور دوسری شادی کرنے جارہا تھا۔
پولیس کا کہنا ہے کہ دوسری شادی کے معاملے پر خاتون نسرین بی بی کے بھائیوں نے مذاکرات کے بہانے دلاور کو گھر بلایا اورنجی اسکول میں یرغمال بنائے رکھا۔ دلاور کے سالوں نے اس کو کرسی پر باندھ کر تشدد کیا، آدھا سر مونڈھ دیا اور دوران تشدد دلاور کی آدھی مونچھ اور بھویں بھی کاٹ دیں۔
پولیس کے مطابق ملزمان نے تشدد کے بعد دلاور کا منہ کالا کرکے گدھے پر بٹھایا اور گلے میں جوتوں کا ہار پہنا کر محلے کا چکر لگواتے رہے۔ پولیس نے متاثرہ شخص کی درخواست پر مقدمہ درج کرلیاہے، مقدمے میں حبس بےجا، تشدد اور دہشت گردی کی دفعات شامل کی گئیں ہیں۔

لاہور(میڈیا پاکستان) پنجاب حکومت نے عدالتی حکم پر سانحہ ماڈل ٹاؤن کی جوڈیشل انکوائری رپورٹ ہائیکورٹ کے فل بینچ کے رو بروپیش کر دی۔ عدالت نے قرار دیا کہ وقت کی کمی کے باعث 14 نومبر کو رپورٹ دوبارہ پیش کی جائے جس کا جائزہ اسی روز چیمبر میں لیا جائیگا۔لاہور ہائیکورٹ کے جسٹس عابد عزیز شیخ کی سربراہی میں تین رکنی بینچ نے حکومتی انٹرا کورٹ اپیل پر سماعت کی جس میں سانحہ ماڈل ٹاؤن کی جوڈیشل انکوائری رپورٹ منظر عام پر لانے سے متعلق سنگل بینچ کے فیصلے کو چیلنج کیا گیا ہے۔سماعت شروع ہوتے ہی بینچ کے سربراہ جسٹس عابد عزیز شیخ نے حکومتی وکیل خواجہ حارث سے استفسار کیا کہ بتائیں کیا آپ سانحہ ماڈل ٹاؤن کی رپورٹ ساتھ لائے ہیں جس پر خواجہ حارث نے جواب دیا کہ عدالتی حکم کی تعمیل ہوگئی ہے جس پر عدالت نے ریمارکس دئیے کہ وقت کی کمی کے باعث فل بینچ رپورٹ کا جائزہ نہیں لے سکتا تاہم رپورٹ دوبارہ 14 نومبر کو پیش کی جائے، عدالت اسی روز ان کیمرہ رپورٹ کا جائزہ لے گی۔

لاہور(میڈیا پاکستان)’’داتا علی ہجویری ؒ و دیگر اولیا ء اکرام کی خدمات کونصاب کاحصہ بنایا جائے ، داتا دربار، لال شہباز قلندرسمیت تمام مزارات پر دہشتگردی کرنیوالے ملزمان گرفتار کرکے انہیں سرعام پھانسیاں دی جائیں اور پاکستان بھر کے مزارات کو فول پروف سکیورٹی فراہم کی جائے ،بادشاہی مسجد سے چوری شدہ نعلین پاک ﷺ برامدکیا جائے ،تاکہ پاکستان اوردنیا بھر میں اولیاء اکرام کے ماننے والے سکھ کا سانس لے سکیں ‘‘ان خیالات کااظہارپاکستان فلاح پارٹی کے تحت لاہور میں منعقدہ 40دینی وسیاسی جماعتوں جمعیت علماپاکستان (نورانی)، سنی اتحادکونسل، نظامِ مصطفی ﷺ پارٹی،سنی نیشنل پارٹی،مصطفائی تحریک ،انجمن طلباء اسلام،المصطفے ویلفےئرسوسائٹی ،سنی تحریک ،تحفظ ناموس رسالت محاذ،پاکستان رضا ء کار کونسل،جمعیت اتحاد اہلسنت ،روشن پاکستان لیگ،عوامی احتساب پارٹی ،تنظیم السعید،جماعت اہلسنت ،سنی موومنٹ پاکستان ، آل پاکستان مزارات کونسل ودیگرتنظیموں کے قائدین نے مشترکہ اعلامیہ میں کیا،پی ایف پی کے مرکزی صدر قاضی عتیق الرحمن نے کہا کہ اولیاء اکرام نے برصغیر اورپوری دنیا میں امن ،اخوت اور بھائی چارے کا آفاقی پیغام دیا ،روزانہ لاکھوں شہری مزارات پر غریب عوام کی خدمت کرتے ہیں ،مگردوسری جانب ان درباروں سے پیسے اکٹھے کرنیوالی حکومتیں لوٹ مار کے سوا کچھ نہیں کررہیں ، ضرورت اس امرکی ہے کہ مزارات کی فول پروف سکیورٹی کو یقینی بنائے اور اولیاء اکرام کی خدمات کے اعتراف میں انکے مضامین کو نصاب کاحصہ بنایا جائے اس موقع پر سیکرٹری جنرل امانت علی زیب، سنےئرنائب صدر پنجاب حافظ زاہدرازی،ڈپٹی سیکرٹری پنجاب وامیدوار این اے 120عطاء محمدقصوری ودیگر بھی موجود تھے، اجلاس کے بعد نئے سیاسی اتحاد “نظامِ مصطفی ﷺ متحدہ محاذ کے قیام کاخیرمقدم کیا گیااورختم نبوت ﷺ کے قانون میں بددیانتی کرنیوالوں کیخلاف کاروائی کامطالبہ کیاگیا ۔

لاہور(میڈیا پاکستان) تھانہ غازی آباد کے علاقہ میں دوسری شادی کی ضد پر بیوی نے خاوند کو چھری مار دی جبکہ خاوند نے بھی بیوی کو جواباً چھری مار کر زخمی کر دیا۔ طبی امداد کیلئے دونوں کو ہسپتال منتقل کر دیا۔ معلوم ہوا ہے کہ تھانہ غازی آباد کے علاقہ میں قاسم اور اس کی بیوی ساجدہ نے جھگڑے کے دوران ایک دوسرے کو چھریاں مار دی۔ چیخ وپکار کی آواز سن کر جب محلہ دار ان کے گھر گئے تو دونوں کو زخمی حالت میں دیکھ کر انہوں نے پولیس کو اطلاع دی۔ پولیس جائے وقوعہ پر پہنچ گئی اور میاں بیوی کو طبی امداد کیلئے ہسپتال منتقل کر دیا۔ پولیس کا کہنا ہے کہ قاسم کی دوسری شادی کی ضد پر دونوں میاں بیوی قاسم اور ساجدہ کا جھگڑا ہوا تھا۔

لاہور(میڈیا پاکستان) پنجاب یونیورسٹی میں نئے تعلیمی سال کے لئے داخلے جاری ہیں جبکہ اس دوران پی یو لا کالج کی انتظامیہ بھی من پسند طلبہ کو خلاف میرٹ نوازنے کی کوششوں میں مصروف ہے، کالج انتظامیہ نے میرٹ لسٹوں سے ہٹ کر طلبہ کو اضافی نمبر دے دئیے ، طلبہ کے بھرپور احتجاج کے بعد فیصلہ واپس لے لیا۔تفصیلات کے مطابق پنجاب یونیورسٹی لاءکالج میں داخلے جاری ہیں اور اس حوالے سے چوتھی لسٹ 6نومبر کو آویزا ں کی گئی جس کے ساتھ فیزیکل آپیرنس کی لسٹ آویزاں کی جانی تھی فیزیکل آپیرنس لسٹ ان طلبہ کے لیے ہوتی ہے جن کو اگلے دن صبح تک کا وقت دیا جاتا ہے اور جو طالبعلم مقررہ تاریخ اور وقت پر پہنچ جائیں ان کا میرٹ بن کر داخلے کی لسٹ آویزاں کر دی جاتی ہے۔لاءکالج انتظامیہ نے ملی بھگت کے ساتھ 6تاریخ بروز سوموار کو ہی فیزیکل آپیرنس کے داخلے کی کوشش کی جو کہ 7نومبر بروز منگل کو ہونے تھے۔اس لسٹ میں انتظامیہ نے عبدالواحد نامی طالبعلم کے نمبر بڑھائے اور لسٹ میں اسکا نام شامل کر کے داخلہ کرنے کی کوشش کی جس پر بروقت لاءکالج کے طالبعلموں نےانتظامیہ سے شکایت کی ۔عبدالواحد کا جنرل میرٹ لسٹ میں ایگریگیٹ 64.182ہے جبکہ 6نومبر کو لگائی جانے والی لسٹ میں عبدالوحد کا ایگریگیٹ 66.639کر دیا گیا۔ کالج انتظامیہ نے موقف اختیار کیا کہ عبدالواحد حافظ قرآن بھی ہے اس کے نمبر شامل کیے گئے ہیں مگر عبدالواحد پنجاب یونیورسٹی کو حفظ کے لئے دیے جانے والے ٹیسٹ میں فیل قرار دیا جا چکا ہے ۔انتطامیہ نے اس معاملے کو دبانے کے لیے 6نومبر کو لگائی جانے والی لسٹ خارج کر دی اور 7نومبر کو دوبارہ لسٹ لگائی ۔

لاہور(میڈیا پاکستان)پنجاب فوڈ اتھارٹی نے کچے پھلوں کوکیمیکل لگا کر پکانے پر پابندی لگانے کافیصلہ کیا گیا ہے ،اس حوالے سے کولڈ سٹوریج،فروٹ فارمزاور منڈیوں کونوٹسز جاری کر دئیے گئے ۔پی ایف اے کے مطابق اس طرح سے تیار کئے گئے فروٹس کینسراور انتڑیوں کی بیماریوں کاسبب بنتے ہیں ۔پنجاب فوڈ اتھارٹی نے متعلقہ حکام کو اس حوالے سے اقدامات کے لئے 10دسمبر کی تک ڈیڈ لائن دی ہے ۔کیمیکل لگا کر فروٹس کو پکاکر عوام میں مہنگے داموں فروخت کیا جاتا ہے ،کیونکہ اس طرح پھل اپنی قدرتی تیاری مراحل سے تیار ہونے سے پہلے ہی کھانے کے استعمال بنادیا جاتا ہے ،جو بیماریوں کاباعث بنتا ہے۔

لاہور (میڈیا پاکستان) حکومت پنجاب میں بدستور اہم ترین انتظامی اسامیاں خالی پڑی ہیں جس سے سرکار امور بری طرح متاثر ہو رہے ہیں۔ذرائع کے مطابق اس وقت ایڈیشنل چیف سیکرٹری پنجاب، ایڈیشنل چیف سیکرٹری انرجی، سیکرٹری بلدیات، کمشنر راولپنڈی ، ڈی سی ننکانہ صاحب اور ڈی سی گوجرانوالہ کی اسامیاں خالی پڑی ہیں۔سیکرٹری بلدیات کی اسامی پر بار بار تقرر ہونے والے کسی بھی سیکرٹری نے گزشتہ پانچ سال میں اپنی تقرری کا دورانیہ پورا نہیں کیا ہے جس سے محکمہ بلدیات کی لانگ ٹرم پالیسیاں نہیں بن سکیں ہیں۔ پنجاب حکومت کے پاس ان اسامیوں کو خالی ہونے سے عوام کو شدید مشکلات کا سامنا ہے۔

لاہور (میڈیا پاکستان) نصابی کتب میں من پسند ترامیم پر پنجاب حکومت کو ہوش آ گیا، کتب میں تبدیلی کی شکایات اور آئندہ کمی بیشی کی منظوری کے لئے اعلی سطحی کمیٹی تشکیل دے دی گئی۔تفصیلات کے مطابق سکولوں میں بچوں کو پڑھائی جانے والی نصابی کتب کا معاملہ پنجاب کریکولم اینڈ ٹیکسٹ بک بورڈ کے زیر انتظام ہونے کے باوجود گزشتہ دنوں میں نصابی کتب میں من پسند تبدیلی کی بے شمار شکایات سامنے آئی تھیں جس پر پنجاب حکومت نے پانچ رکنی اعلی سطحی کمیٹی تشکیل دے دی ہے جس کا نوٹیفکیشن جلد جاری کردیا جائے گا۔ذرائع کے مطابق صوبائی وزیر تعلیم رانا مشہود احمد خان کمیٹی کے چیئرمین ، ایم ڈی بورڈ میاں عبدالقیوم کمیٹی کے سیکرٹری ہوں گے، دیگر ممبران میں سیکرٹری سکولز، ڈاکٹر ظفر اقبال قریشی ، ڈاکٹر خالد حمید شیخ اور چیئرمین پی سی ٹی بی لیفٹیننٹ جنرل ریٹائرڈ محمد اکرم شامل ہیں، کمیٹی نصابی کتب میں اضافے یا کمی کا جائزہ لے گی۔نصابی کتب میں کسی قسم کی ترمیم کمیٹی کی اجازت سے مشروط ہو گی۔