Category لاھور نامہ

شاہدرہ میں نامعلوم کار سواروں کی فائرنگ سے 25 سالہ نوجوان ہلاک ہوگیا، پولیس نے لاش کو مردہ خانے منتقل کر کے کاروائی کا آغاز کر دیا۔

تفصیلات کے مطابق ہلاک ہونے والے شخص کی شناخت عمران ولد غلام نبی کے نام سے ہوئی،مقتول بیگم کوٹ کا رہائشی تھا جسے نامعلوم کار سواروں نے فائرنگ کرکے قتل کیا اور فرار ہوگئے۔ پولیس نے لاش مردہ خانے منتقل کر کے ورثا کو اطلاع کردی ہے۔پولیس کے مطابق واقعہ دیرینہ دشمنی پر پیش آیا ،ملزمان کی گرفتاری کے لئے چھاپہ مار ٹیمیں تشکیل دے دی گئی ہیں۔

مسلم ٹاؤن کے قریب نہر سے نامعلوم شخص کی لاش برآمد،پولیس نے شناخت نہ ہونے پر لاش مردہ خانے منتقل کر دی۔

تفصیلات کے مطابق مسلم ٹاؤن کے قریب نہر سے نامعلوم شخص کی لاش برآمد ہوئی ہے،ریسکیو نے نہر سے لاش نکال کر پولیس کے حوالے کر دی ۔ پولیس کا کہنا ہے کہ ملنے والی لاش کی شناخت نہیں ہو سکی البتہ لاش دو سے تین روز پرانی معلوم ہوتی ہے ، شناخت نہ ہونے پر پولیس نے لاش مردہ خانے منتقل کر دی۔دوسری جانب سی سی پی او غلام محمود ڈوگر نے نوٹس لیتے ہوئے ایس پی اقبال ٹاون کو واقع کی تحقیقات کر کے ملزمان کی گرفتاری کا حکم دے دیا ہے۔

کورونا کے وار پھر سے تیز ہونے لگے،گزشتہ 24 گھنٹوں میں لاہور میں132کیسز رپورٹ ہوئے۔

تفصیلات کے مطابق کورونا ایک بار پھر بڑا خطرہ بننے لگا، موذی وائرس کے وار پھر سے تیز ہونے لگے ہیں،لاہور میں کورونا کی مثبت شرح 4.8 ریکارڈ کی گئی جبکہ 2 افراد جان کی بازی ہار گئے۔

ملکی مجموعی صورتحال کی بات کی جائے تو کورونا سے ملک بھر میں گزشتہ چوبیس گھنٹوں کے دوران مزید 40 افراد جان کی بازی ہار گئے جبکہ 24 گھنٹے میں 2 ہزار 158 نئے کیسز رپورٹ ہوئے ہیں۔ مجموعی اموات کی تعداد 22 ہزار 928 ہو گئی، مثبت کیسز کی شرح 6اعشاریہ 30ریکارڈ کی گئی۔

این سی اوسی کے مطابق پاکستان میں ایکٹو کیسز کی تعداد 52ہزار 752ہو گئی ، مجموعی کیسز کی تعداد 9لاکھ 98ہزار 609 تک پہنچ گئی ہے جبکہ 9لاکھ 22ہزار 929افراد کورونا سے صحت یاب ہوئے ہیں۔

پنجاب میں 3لاکھ 51ہزار 592، سندھ میں 3لاکھ 61ہزار 160، خیبر پختونخوا میں ایک لاکھ 41ہزار 288 اور بلوچستان میں 29 ہزار 301 کیسز رپورٹ ہوئے ہیں جبکہ اسلام آباد میں 85ہزار 179،آزاد کشمیر میں 22ہزار 538 اور گلگت بلتستان میں 7ہزار 551افراد کورونا سے متاثر ہوئے۔

بادامی باغ : گھریلو جھگڑے پر خاتون نے تیل چھڑک کر خود کو آگ لگا لی .

تفصیلات کے مطابق بیس سالہ ردا نے شوہر سے جھگڑ کر خودسوزی کی کوشش کی. ردا کو تشویشناک حالت میں میو ہسپتال منتقل کر دیا گیا۔افسوسناک واقعے میں خاتون بری طرح جل چکی ہے

عید کے دوسرے روز کمشنر لاہور کیپٹن ر محمد عثمان کا چلڈرن ہسپتال ، دارالشفقت یتیم خانہ اور ڈسٹرکٹ جیل کا دورہ ،، عملے سے عید ملی، مٹھائی اور تحائف بھی تقسیم کئے۔۔

تفصیلات کے مطابق عید کے دوسرے روز کمشنر لاہور نے چلڈرن ہسپتال میں بچوں کی عیادت کی اور عیدکے تحائف تقسیم کیے ، دارالشفقت میں موجود افراد کو بھی عید کی مبارک دی اور مٹھائی تقسیم کی۔کمشنر لاہور کیپٹن ر محمد عثمان کا کہنا ہے کہ عید کی حقیقی خوشی ایک دوسرے کی خوشیوں میں شریک ہو کر ملتی ہے۔

ڈسٹرک جیل آمد پر کمشنر لاہور کو چاک و چوبند پولیس دستے نے سلامی دی، جیل کتاب میں کمشنر لاہور نے تاثرات تحریر کئے اور پودا بھی لگایا۔کمشنر لاہور نے قذافی سٹیڈیم میں ایل ڈبلیو ایم سی کے ورکرز کےساتھ خصوصی ملاقات کی ،ان میں مٹھائی تقسیم کی اور کہا کہ ہر وہ شخص قابل تعریف ہے جو آج کے دن بھی اپنے فرائض کو ادا کر رہا ہے۔۔۔

یو ای ٹی کی 100 سالہ تاریخ میں پہلی بار خاتون پروفیسر کی تقرری، ڈاکٹر صائمہ یاسین شعبہ کیمیکل انجینئرنگ ڈیپارٹمنٹ کی چیر پرسن تعینات، خاتون پروفیسر پنجاب بھر میں انجینئرنگ کے شعبے میں تعینات ہونے والی پہلی پروفیسر ہیں۔

تفصیلات کے مطابق یونیورسٹی آف انجینئرنگ اینڈ ٹیکنالوجی لاہور نے کیمیکل انجینئرنگ ڈیپارٹمنٹ میں پہلی خاتون پروفیسر کو تعینات کردیا ہے۔ ڈاکٹر صائمہ یاسین 1921 میں مغل پورہ ٹیکنیکل کالج سے یو ای ٹی بننے تک کے 100 سالہ سفر میں انجینئرنگ کے شعبہ میں تعینات ہونے والی پہلی خاتون پروفیسر ہیں۔

وہ پنجاب بھر میں انجینئرنگ کے شعبہ میں واحد خاتون پروفیسر بھی ہیں۔ 23 اساتذہ پر مشتمل کیمیکل انجینئرنگ ڈیپارٹمنٹ میں واحد خاتون پروفیسر ہونے کے باعث انہیں شعبہ کا چیرپرسن بھی مقرر کردیا گیا ہے۔

قانون کی طالبہ خدیجہ صدیقی کو چھریاں مار کر زخمی کرنے والے اس کے کلاس فیلو شاہ حسین کو سزا مکمل ہونے پرلاہور کی جیل سے رہا کردیا گیا۔

تفصیلات کے مطابق قانون کے طالب علم شاہ حسین کے خلاف کلاس فیلوخدیجہ صدیقی پر3مئی 2016 کو حملے کے الزام میں مقدمہ درج کیا گیا تھا،ایف آئی آر کے مطابق خدیجہ اپنی چھوٹی بہن کو شملہ پہاڑی کے قریب اسکول سے لینے گئی، ڈیوس روڈ پر شاہ حسین نے اس پرچھریوں سے حملہ کر دیا اور 23 وار کرکے اسے شدید زخمی کر دیا۔ٹرائل مکمل ہونے پر شاہ حسین کو جوڈیشل مجسٹریٹ نے29جولائی2017 کو 7 سال قید کی سزا سنائی۔ اپیل میں سیشن عدالت نے شاہ حسین کی سزا2 سال کم کرکے 5 سال کر دی جبکہ جون2018 میں لاہور ہائیکورٹ نے سزا ختم کر کے شاہ حسین کو بری کر دیا تاہم جنوری2019 میں سپریم کورٹ نے لاہور ہائیکورٹ کا بریت کا حکم ختم کرکے اس کی5سال قیدکی سزا بحال کر دی۔سزا مکمل ہونے پر شاہ حسین کو لاہور کی جیل سے رہا کر دیا گیا ہے۔

غیرقانونی وزہریلی شراب کی خرید وفروخت کیخلاف ایکسائز متحرک ہوگیا، محکمہ ایکسائز نے عیدالاضحیٰ کے موقع پرزہریلی اورغیرقانونی شراب کی خریدوفروخت اور استعمال روکنے کیلئے خصوصی ٹیمیں تشکیل دے دیں۔

ای ٹی او ایکسائز لاہورفیصل سندھو کی جانب سے عیدسے پہلے اورعیدکے تینوں روزناکہ بندی کرکے چھاپے مارنے کے احکامات جاری کئے گئےہیں، انسپکٹر قمرشاہ کی سربراہی میں 4 ٹیمیں بھی تشکیل دے دی گئی ہیں،ٹیمیں شہرکے داخلی وخارجی راستوں پرناکہ بندی جبکہ شہرمیں چھاپے ماریں گی، قیمتی جانوں کے ضیاع کوروکنے کے لئے خصوصی اقدامات کیے جارہے ہیں، غیرقانونی اورزہریلی شراب بیچنے والوں کیخلاف سخت کارروائیاں کی جائیں گی۔

واضح رہےکہ حضرت ابراہیم علیہ السلام اور حضرت اسماعیل علیہ السلام کی عظیم قربانی کی یاد میں لاہور سمیت ملک بھر میں آج عیدالاضحیٰ مذہبی عقیدت و احترام سے منائی جارہی ہے،شہربھر کی مساجد، امام بارگاہوں میں نمازعیدالاضحیٰ کے بڑے بڑے اجتماعات ہوئے,نماز عید کے بعد فرزندان اسلام سنت ابراہیمی میں مصروف ہیں۔

سبزہ زار میں مبینہ طور پر نشے میں دھت رائیور نے نمازیوں پر گاڑی چڑھا دی، واقعہ میں دو افراد زخمی ہوگئے۔

تفصیلات کے مطابق افسوس ناک واقعہ لاہور کے علاقہ سبزہ زار میں پیش آیا، جہاں نشے میں دھت رائیور نے نمازیوں پر گاڑی چڑھا دی، واقعہ میں دو افراد زخمی ہوگئے،ٹیج سٹی نیوز نیٹ ورک کو موصول ہوگئی،سی سی ٹی وی فوٹیج میں دیکھا جا سکتا ہے کہ نمازی عید کی نماز پڑھ کر مسجد سے باہر آ رہے ہیں اور دوسری طرف سے کرولا گاڑی آ رہی ہے۔

اچانک گاڑی کی رفتار تیز ہو جاتی ہے اور یہ دو نوجوانوں اور موٹرسائیکل کو روندتے ہوئے کھمبے سے جا ٹکراتی ہے، گاڑی کا فرنٹ حصہ بھی تباہ ہو جاتا ہے، مقامی افراد نے شبہ ظاہر کیا کہ ڈرائیور نے نشہ کیا ہوا تھا جبکہ متاثرہ نوجوان کی جانب سے پولیس کو قانونی کارروائی کیلئے درخواست دے دی گئی ہے۔

ڈپٹی کمشنر لاہور مدثر ریاض ملک نے نماز عید کی ادائیگی کے بعد کیمپ جیل کا دورہ کیا، قیدیوں سے ملاقات کی، پھول اور مٹھائی تقسیم کی۔

تفصیلات کے مطابق ڈی سی لاہور مدثر ریاض ملک نے جیل سپرنٹنڈنٹ نورالحسن کے ہمراہ کیمپ جیل کا دورہ کیا. سٹی فورٹی ٹو سے خصوصی گفتگو کرتے ہوئے مدثر ریاض ملک کا کہنا تھا کہ وزیر اعلی پنجاب عثمان بزدار کی خصوصی ہدایت پر کیمپ جیل کا دورہ کیا گیا ہے، کیمپ جیل کے ہسپتال میں موجود مریضوں کی عیادت کی ہے۔عیدالاضحیٰ کے موقع پر مریضوں میں مٹھائی بھی تقسیم کی گئی ہے۔

ڈی سی مدثر ریاض ملک کیمپ جیل میں قید بچوں کے پاس بھی گئے، ان سے ملاقات کی اور مٹھائی دی. ڈی سی نے قیدیوں سے گفتگو کرتے ہوئے کہنا تھا آج عید کا پہلا دن ہے، اس دن لوگ اللہ کی رضا کی خاطر جانور کی قربانی کرتے ہیں۔ بچوں کو مخاطب کرتے ہوئے ان کا کہنا تھا کہ انسان غلطی کرتا ہے، میری اللہ سے دعا ہے کہ آپ لوگ جلد از جلد ذمہ دار شہری بن کر جیل سے باہر نکلیں۔