Category لاھور نامہ

گڑھی شاہو پولیس نے عید قربان کے جانور چوری کرنے والے رکشہ ڈرائیور کو گرفتار کر لیا،رکشہ ڈرائیور ملزم اویس شہری کے چھترے لیکر فرار ہو گیاتھا۔

پولیس کے مطابق ملزم نے شہری کو راستے میں بریک فیل ہونے کا بہانا بنا کرنیچے اُتار دیا تھا،ملزم دھوکہ دہی سے 4چھتروں سمیت رکشہ لے کر فرار ہو گیا تھا لیکن شہری کی خوش قسمتی کہ ملزم اویس کو گرفتار کر کے چھترے برآمد کر لیے گئے ہیں۔

واضح رہے کہ مویشی چرانے والے گروہ مختلف علاقوں میں وارداتیں کر رہے ہیں سبزہ زار میں چور بیل موٹرسائیکل رکشہ پر لوڈ کر کے لے گئے تھے، شام نگر میں گھر کے باہر بندھا بکرا اور گارڈن ٹاؤن سے دنبہ چرا لیا گیا تھا، نشترکالونی سے بیوپاری دو بیل سے ہاتھ دھو بیٹھا، سبزہ زار میں چور بیل کو موٹر سائیکل رکشہ پر لوڈ کر کے فرار ہوگئے۔

شام نگر میں گلزار نامی شخص نے گلی میں بکرا باندھ رکھا تھا، ایک چور بکرے کو پیار کرنے کا ڈھونگ کرنے لگا، اس کا ساتھی موٹر سائیکل پر پہنچا تو کمال پھرتی کا مظاہرہ کرتے ہوئے بکرا اٹھایا اور فرار ہو گئے، کاہنہ کے علاقہ صوئےآصل سے چور 14 بکرے لے اڑے تھے۔گارڈن ٹائون میں گھر کے باہر بندھا دنبہ چوری کر لیا گیا تھا، سفید رنگ کی گاڑی میں چور آئے، ایک نے گاڑی سے اتر کے اردگرد کا جائزہ لیا اور موقع پاتے ہی دنبہ گاڑی میں ڈال کر چلتے بنے۔

قدرت لاہوریوں پر مہربان ہوگئی،حبس اور گرمی کے ستائے لاہوریوں پر ساون کی گھٹا چھا گئی ، موسلادھار بارش سے جل تھل ایک ہوگیا،محکمہ موسمیات نے آئندہ چوبیس گھنٹوں کے دوران لاہور سمیت پنجاب کے دیگر شہروں میں مزید بارش کی پیش گوئی کردی۔

لاہور کے مختلف علاقوں میں موسلادھار بارش سے نشیبی علاقے زیر آب آ گئے، جوہرٹاؤن ، پانی والا تالاب میں 56 ،لکشمی چوک48، سمن آباد ، پنجاب یونیورسٹی 43 ملی میٹر بارش ہو ئی، فرخ آباد54،چوک ناخدا40،اقبال ٹاؤن27، مغلپورہ 29،جیل روڈ 26، گلبرگ23، تاجپورہ 14 ملی میٹربارش ریکارڈ کی گئی، سب سے زیادہ بارش 68 ملی میٹر نشتر ٹاؤن میں ریکارڈ کی گئی۔

محکمہ موسمیات کے مطابق پنجاب سمیت ملک کے بیشتر علاقوں میں بارش کا سلسلہ آئندہ دو روز تک جاری رہے گا، تیز بارش کے بعد اربن فلڈنگ کا بھی خدشہ ہے۔

دوسری جانب بارش کے باعث چائنہ سکیم بڑی پارک کے قریب کچے مکان کی چھت گر گئی،حادثے میں میاں بیوی اور4بچے زخمی ہو گئے, زخمی ہونے والوں میں امانت ،ملائکہ ،فہد،بشری،لائبہ اور حسن شامل ہیں ،واقعہ کی اطلاع ملنے پر ایدھی ایمبولینس اور پولیس موقع پر پہنچ گئی،زخمیوں کو طبی امداد کیلئے کوٹ خواجہ سعید ہسپتال منتقل کر دیا گیا.

لاہور میں ہونیوالی بارش کی وجہ سے لیسکو کا ترسیلی نظام شدید متاثر، کمپنی کے تین سو سے زائد فیڈرز ٹرپ کرگئے، مختلف علاقوں میں گھنٹوں بجلی کی فراہمی معطل رہی۔

شہر میں بارش کی وجہ سے لیسکو کے الیون کے وی سسٹم میں ٹرپنگ ہوئی جس کی وجہ سے بیشتر علاقوں میں پانچ گھنٹے سے زائد تک بجلی کی فراہمی معطل رہی، بارش کی وجہ سے سب سے زیادہ فیڈر ناردرن سرکل میں ٹرپ ہوئے جس کی وجہ سے بادامی باغ، شادباغ، شاہدرہ، گلشن راوی، جیا موسی اور بیگم کوٹ کے علاقوں میں بجلی بند رہی۔

اسی طرح سینٹرل سرکل میں گرین ٹاؤن، مانگا منڈی، رائیونڈ ، اقبال ٹاؤن، شاہ جمال جبکہ کینٹ اور ڈیفنس میں بھی بجلی کی سپلائی معطل رہی، تاہم شمالی لاہور میں لیسکو کے سسٹم میں سب سے کم خرابیاں پیدا ہوئیں، بارش کی وجہ سے لیسکو کے سٹاف کو کام کرنے میں دشواری کا سامنا رہا، ابتدائی تین گھنٹے کے دوران ایک سو بیس فیڈرز سے بجلی بحال کی گئی جس کے بعد بارش کا سلسلہ تھم جانے پر تمام علاقوں میں ٹیموں نے بجلی بحالی کا کام شروع کیا۔

دوسری جانب لاہور کے مختلف علاقوں میں موسلادھار بارش سے نشیبی علاقے زیر آب آ گئے، جوہرٹاؤن ، پانی والا تالاب میں 56 ملی میٹر ،لکشمی چوک48، سمن آباد ، پنجاب یونیورسٹی 43 ملی میٹر بارش ہو ئی، فرخ آباد54،چوک ناخدا40،اقبال ٹاؤن27، مغلپورہ 29،جیل روڈ 26،گلبرگ23،تاجپورہ14ملی میٹربارش ریکارڈ کی گئی، سب سے زیادہ بارش 68 ملی میٹر نشتر ٹاؤن میں ریکارڈ کی گئی۔

قربانی کے جانوروں کی خریداری کا فائنل راؤنڈ، مویشی منڈیوں میں رش بڑھ گیا لیکن آسمان سے باتیں کرتی قیمتوں کے باعث خریداری میں تیزی نہ آ سکی۔

شہریوں کو مناسب قیمت میں بہترین جانور کی تلاش ہے تو بیوپاری بھی بہتر سے بہترین قیمت ملنے کی امید لگائے بیٹھے ہیں،مویشی منڈیوں میں جانوروں کی خریداری کا حتمی مرحلہ شروع ہو گیا, منڈیوں میں چھوٹے بڑے ایک سے بڑھ کر ایک خوبصورت جانور موجود ہیں۔ شہریوں کا رش بھی بڑھ گیا ہے، بلند قیمتوں کے باعث خریداری میں تیزی نہیں آ سکی۔

شہریوں نے شکوہ کیا ہے کہ گزشتہ سال کی نسبت جانوروں کے ریٹ پچاس فیصد بڑھا دیئے گئے ہیں۔بیوپاریوں کا کہنا ہے کہ جانوروں کو پالنا جان جوکھوں کا کام ہے۔ ان کے اخراجات بھی بڑھ گئے ہیں، وہ کم قیمت پر جانور کیسے فروخت کریں،عید میں ایک دن رہ گیا ہے اور مویشی منڈیوں میں ابھی بھی پچاس فیصد جانور کھڑے ہیں,شہری امید کر رہے ہیں کہ ریٹ ٹوٹے تو وہ بھی جانور کی خریداری کریں۔

باغبانپورہ میں سگے بھائی نے محض اس بنا پر بہن کو قتل کر دیا کیونکہ اس نے پارلر کی نوکری چھوڑنے سے انکار کر دیا تھا۔

پولیس کے مطابق 33 سالہ حنا بٹ بیوٹی پارلر میں کام کرتی تھی، ملزم مقتولہ کو پارلر میں کام کرنے سے منع کرتا تھا، بات نہ ماننے پر ملزم نے طیش میں آکر اپنی سگی بہن کو قتل کردیا اور موقع سے فرار ہوگیا، پولیس نے مقتولہ کی لاش کو مردہ خانے منتقل کر دیا گیا ہے، جبکہ ملزم کی تلاش جاری ہے۔

واضح رہے کہ حالیہ دنوں ہی مزنگ میں بدبخت بیٹے نے توے کے وار کر کے ماں کو ابدی نیند سلا دیا تھا۔ بیٹے کے ہاتھوں ماں کے قتل کا واقعہ مزنگ کے علاقے صفاں والا چوک میں رات گئے پیش آیا تھا جہاں ملزم وسیم بیوی سے جھگڑا کر ماں کے پاس آیا۔ ستر سالہ ماں نے ڈانٹ ڈپٹ کی اور وسیم کو واپس بیوی کے پاس جانے کا کہا تو ملزم طیش میں آگیا۔ پاس پڑا توا اٹھا کر معمر ماں کے چہرے اور سر پر پے در پے متعدد وار کر کے قتل کردیا تھا۔

شہر کے میگا پراجیکٹس پر عیدا لاضحیٰ کے باعث کام بند ، شاہکام ، شیرانوالہ فلائی اوور ، گلاب دیوی انڈر پاس سمیت تمام ترقیاتی منصوبوں پر کام اتوار کے روز تک مکمل بند رہے گا۔

شاہکام فلائی اوور ، شیرانوالہ گیٹ منصوبے پر کام بند کردیا گیا ہے ۔ گلاب دیوی انڈر پاس منصوبے پر بھی کام مکمل طور پر بند کردیا گیا ہے ۔ واسا کے کشمیر روڈ پر زیر زمین واٹر سٹوریج ٹینک اور ایل ڈی اے سٹی منصوبے کے ترقیاتی کام بھی بند رہیں گے جبکہ ایل ڈی اے سٹی نیا پاکستان ہاوسنگ پراجیکٹ ، واسا ہیڈ آفس جوہر ٹاون اور لوکل گورنمنٹ کمپلیکس کی تعمیر کا کام بھی بند رہے گا ۔ منصوبوں پر باقاعدہ کام کا آغاز پیر کے روز سے ہوگا۔

منصوبوں پر کام کرنے والی تعمیراتی کمپنی کے انجنئیرز اور سٹاف چھٹیوں پر چلے گئے ہیں جو اب عیدالضحی کی تعطیلات کے بعد ہی لوٹیں گے۔

کورونا وبا کے معاشی اثرات اور مہنگائی کی وجہ سے اس سال ملک بھر میں قربانی کے رجحان میں 10 سے 15 فیصد کمی کا امکان ہے۔

عیدالاضحی چمڑے کی صنعت کے لیے خام مال کے حصول کا اہم ذریعہ ہے، قربانی کے جانوروں کی95 فیصد کھالیں ٹینریز کو موصول ہوتی ہیں جن سے سالانہ قربانی کے اعدادوشمار واضح ہوتے ہیں، پاکستان ٹینرز ایسوسی ایشن کو امید ہے کہ اس سال 60 سے 70لاکھ کھالیں موصول ہوں گی جو گزشتہ سال کے مقابلے میں 10سے 15فیصد کم ہوں گی۔

پاکستان ٹینرز ایسوسی ایشن کی کور کمیٹی اور منیجنگ کمیٹی کے رکن اعجاز احمد شیخ کے مطابق کوروناکی وبا کے معاشی اثرات کی وجہ سے دیگر صنعتوں کی طرح چمڑے کی صنعت بھی مشکلات کا شکار ہے، عالمی سطح پر فیشن کے بدلتے ہوئے رجحانات کی وجہ سے لیدر کی صنعت دباؤ کا شکار تھی جس میں کورونا کے باعث پیدا ہونے والے حالات میں نمایاں اضافہ ہوا ہے جس کے اثرات پاکستان کی لیدر انڈسٹری پر بھی مرتب ہو رہے ہیں۔

انھوں نے کہا کہ اس سال عید قربان پر خام کھالوں کی تعداد میں 10سے 15فیصد کمی متوقع ہے تاہم گزشتہ سال کے مقابلے میں کھالوں کی قیمت میں قدرے اضافہ ہوا ہے انھوں نے بتایا کہ اس سال گائے بیل کی کھالیں 700 روپے میں خریدی جائیں گی اسی طرح بکرے کی کھال200 روپے، بھیڑ کی کھالیں 100 روپے میں خریدی جائیں گی گزشتہ سال گائے بیل کی کھالیں 500روپے سے 600 روپے میں خریدی گئی تھیں اسی طرح بکرے کی کھال 125سے 150روپے جبکہ بھیڑ کی کھالیں 25سے 35روپے میں خریدی گئی تھیں۔

اعجاز احمد شیخ کے مطابق 3 سال کے دوران کھالوں کی تعداد ایک کروڑ 10لاکھ سے کم ہوکر گزشتہ سال 80سے 85 لاکھ تک آ گئی جبکہ رواں سال یہ تعداد مزید کم ہوکر 60 سے 70 لاکھ تک محدود رہنے کی توقع ہے، لیدر انڈسٹری سے وابستہ اعجاز احمد شیخ نے کہا کہ کورونا کی وجہ سے دنیا میں لاک ڈاؤن ہے اور سیاحت کی صنعت کے ساتھ انٹرٹینمنٹ سیاحت اور ہوٹلنگ کی صنعتیں بھی بند پڑی ہے۔

دنیا کی بڑی منڈیوں یورپ اور امریکا میں عوام 2 سال سے گھروں سے کام کررہے ہیں اس لیے ملبوسات، فٹ ویئر اور گارمنٹس کی فروخت کم ہورہی ہے صرف کھانے پینے کی اشیا کی طلب بڑھ رہی ہے، لیدر مصنوعات کا شمار لگژری آئٹمز میں کیا جاتا ہے اور تمام لگژری آئٹمز کی فروخت متاثر ہوئی ہے۔

جیسے جیسے دنیا میں ویکسی نیشن ہو رہی ہے تجارتی سرگرمیاں بحال ہو رہی ہیں جس سے لیدر کی طلب بڑھنے کی امید ہے لیکن 3 سے 4 سال کی سطح کی بحالی میں کافی وقت لگے گا انھوں نے بتایا کہ لیدر کی طلب کم ہونے کی وجہ سے پاکستان میں کئی بڑی ٹینریز بند ہوچکی ہیں جن میں تاجر رہنما ایس ایم منیر کی ٹینری بھی شامل ہے اس وقت ملک بھر میں30 فیصد ٹینریز میں کام مکمل طور پر بند ہے جبکہ باقی ٹینریز بھی پیداواری استعداد سے کم پر چل رہی ہیں۔

شہر کے پبلک ٹرانسپورٹ کے تمام بند روٹس فعال ہونگے۔ رواں مالی سال ساٹھ کروڑ کے بجائے 3 ارب 50 کروڑ کی لاگت سے الیکٹرک بسوں کی خریداری کی جائیگی۔

ذرائع کے مطابق پہلے فیز میں شہر کےتمام روٹس فعال کرنے کے لیے 200 بسوں کی فراہمی رواں سال ہی یقینی بنائی جائیگی، دوسرے فیز میں پنڈی اور تیسرے فیز میں فیصل آباد کے لیے دو دو سو بسیں خریدی جائیں گی ۔ محکمہ ٹرانسپورٹ نے بسوں کی خریداری کے لیے درکار مزید دو ارب 90 کروڑ کی گرانٹ مانگ لی۔

ذرائع کے مطابق صوبائی وزیر ٹرانسپورٹ جہانزیب کھچی بسوں کی خریداری کے لیے درکار اضافی گرانٹ کے لیے ڈٹ گئے۔ رواں مالی سال بسوں کی خریداری کے لیے صرف ساٹھ کروڑ کا بجٹ رکھا گیا۔ محکمہ ٹرانسپورٹ نے 60 کروڑ کے بجائے رواں سال ہی لاہور کے لیے 200 بسوں کی خریداری سفارشات بھجوا دیں۔ الیکٹرک بسوں کی خریداری کے لیے درکار بقیہ دو ارب 90 کروڑ کے فنڈز سپلمنٹری گرانٹ دیے جائیں گے۔ الیکٹرک بسوں کو لاہور شہر میں بند ہونے والے روٹس اور بطور فیڈر روٹس بھی استعمال کیا جائیگا۔

ڈی سی لاہور مدثر ریاض ملک نے چینی کی قیمت کا تعین کر دیا.ڈی سی لاہور مدثر ریاض نے چینی کی قیمت 88 روپے 24 پیسے قیمت متعین کرکے باقاعدہ طور پر نوٹیفکیشن جاری کردیا۔

تفصیلات کے مطابق ڈی سی لاہور مدثر ریاض ملک نے چینی کے سرکاری نرخ معتین کردیئے۔ لاہور شہر میں چینی کی تعین کردہ فِی کلو قیمت 88 روپے 24 پیسے متعین کرنے کا نوٹیفیکشن جاری کردیا۔ ڈی سی نے اسسٹنٹ کمشنرز کو ہدایت کی کہ چینی حکومت کی جانب سے مقرر کردہ نرخوں پر فروخت کروائی جائے۔

ڈپٹی کمشنر نے تمام پرائس کنٹرول مجسٹریٹ کو بھی ہدایات جاری کرتے ہوئے کہا کہ تمام پرائس کنٹرول مجسٹریٹ سرکاری نرخ نامے کے مطابق چینی کی فروخت کو یقینی بنائیں، گراں فروشی کرنے والے دکانداروں کے خلاف سخت ایکشن لیا جائے گا۔

دوسری جانب عید قرباں کے قریب آتے ہی سبزیوں کی قیمتیں آسمان سے باتیں کرنے لگیں ہیں۔لہسن 5 روپے اضافے کے بعد 130 سے 135 روپے کلو ،ادرک پانچ روپے اضافے کے بعد 415 سے 425 روپے فی کلو،لیموں 105 سے 110 روپے کلو ،ٹماٹر 3 روپے اضافے کے بعد 70 سے 73 روپے فی کلو ،ہری مرچ2 روپے اضافے کے بعد 85 سے 88 روپے فی کلو ،گاجر 80 سے 83 روپے فی کلو، کھیرا 50 سے 52 روپے فی کلو میں فروخت ہو رہا ہے۔

شہریوں کا کہنا ہےعمران خان نے کہا تھا کہ غریب عوام کے بارے میں سوچا جائے گا، غریب عوام بھوکے نہیں سوئیں گےمگر جو حالات جا رہے لگتا ہے کہ عید کے روز بھی غریب عوام بھوکے رہیں گے۔

بلدیاتی ادارےبحال نہ کرنےسےمتعلق کیس کی سماعت، حکومت نے ہائیکورٹ میں جمع کرایا گیاجواب واپس لے لیا ۔ اداروں کی بحالی کیلئے تشکیل دی گئی کمیٹیوں کا نوٹیفکیشن پیش۔ جسٹس عائشہ اے ملک نے پلان آف ایکشن پر عملدرآمد کیلئے 28 جولائی تک مہلت دے دی۔

تفصیلات کے مطابق لاہورہائیکورٹ کی جسٹس عائشہ اے ملک نے سابق میئر لاہور کرنل مبشر سمیت دیگر کی درخواست پر سماعت کی ,عدالتی حکم پر چیف سیکرٹری پنجاب جواد رفیق ملک اور سیکرٹری بلدیات نورالاامین مینگل عدالت میں پیش ہوئے، درخواست گزاروں کی جانب سے چودھری عمران ایڈووکیٹ سمیت دیگر وکلاء پیش ہوئے۔ جسٹس عائشہ اے ملک نے چیف سیکرٹری سے مکالمہ کرتے ہوئے کہا کہ بتائیں کہ سپریم کورٹ کے حکم کے باوجود بلدیاتی ادارے بحال کیوں نہیں کیے جار ہے ۔ چیف سیکرٹری نے جواب دیا کہ بلدیاتی اداروں کی بحالی کے لئے کمیٹیاں تشکیل دینے کا نوٹیفکیشن جاری کردیا گیا ہے ۔چیف سیکرٹری نےبلدیاتی ادارے بحال کرنے سے متعلق چار کمیٹیاں تشکیل دینے کا نوٹیفکیشن عدالت میں پیش کردیااورعدالت کو بتایا کہ بلدیاتی اداروں کو بحال کرنے سےمتعلق ہر جمعہ کو کمیٹیاں جائزہ اجلاس منعقد کریں گی ۔کمیٹیاں بلدیاتی اداروں کےاثاثے،آمدن و خرچ کی تفصیلات۔ترقیاتی بجٹ اور تنخوا ہوں پر خرچ ہونے والے اخرجات بارے تخمینہ رپورٹ مرتب کر یں گی۔

چیف سیکرٹری کا مزید کہنا تھا کہ دوہزار نو سے بلدیاتی ادارے کام کررہے ہیں ۔اب حالات کے مطابق ان کی بحالی کے لئے اقدمات کریں گے۔جسٹس عائشہ اے ملک نے چیف سیکرٹری سے مکالمہ کرتے ہوئے کہا کہ بہتر ہے کہ آپ بلدیاتی ادارے بحال نہ کرنے کا حکومتی جواب عدالت سے واپس لے لیں جس پر ایڈیشنل ایڈووکیٹ جنرل نے حکومتی جواب واپس لےلیا۔جسٹس عائشہ اےملک نے کہاحکومت بلدیاتی اداروں کی بحالی کے لئے پلان آف ایکشن بنائےاور رپورٹ پیش کرے۔ جسٹس عائشہ اے ملک نے ریمارکس دئیے کہ کوئی کام رات رات نہیں ہوسکتا۔ حکومت پلان آف ایکشن تیار کرے ۔حکومت کو موقع دے رہے ہیں کہ وہ بلدیاتی اداروں کی بحالی کے لئے اقدامات اٹھائے۔