Category لاھور نامہ

سیکرٹری محکمہ پرائمری اینڈ سیکنڈری ہیلتھ، نےڈیلٹا وائرس اور عیدالاضحٰی کے پیشِ نظر این سی او سی کے نوٹیفیکشن کے مطابق سپیشل ایس او پیز جاری کر د یئے۔

تفصیلات کےمطابق سیکرٹری پرائمری اینڈ سکینڈری ہیلتھ کیئر سارہ اسلم کا کہناتھا کہ ڈیلٹا وائرس اور عیدالاضحٰی کے پیشِ نظر این سی او سی کے نوٹی فکیشن کے مطابق سپیشل ایس او پیز جاری کر د یئے، آگاہی ویک برائے کورونا ایس او پیز اور ویکسی نیشن” کا دورانیہ 25جولائی تک بڑھا دیا گیا،صوبہ بھر کے تمام ڈپٹی کمشنرز کو مراسلہ جاری کردیاگیا،این سی او سی کے نوٹی فکیشن کے مطابق مختلف سیکٹرز کے لیے سپیشل ایس او پیز جاری کردیں گئیں ہیں۔

سیکرٹری سارہ اسلم کا کہناتھا کہ سیاحتی مراکز کے لئےسپیشل ایس او پیز جاری کئے گئےہیں,صرف ویکسی نیٹد افراد کو بین الصوبائی سیاحتی مقامات پر جانے کی اجازت ہو گی، ویکسی نیشن سرٹیفکیٹ کے بغیر ہوٹلز میں بوکنگ نہیں کی جا سکے گی،سیاحتی مقامات کے داخلی راستوں پر سیاحوں کی خصوصی تصدیق کی جائے،ہوٹلز میں ڈائننگ کے لئے 50 ٪ گنجائش کےاصول پر عمل کیا جائے گا۔

ٹرانسپورٹ سیکٹر کے لئےسپیشل ایس او پیزجاری کئے گئے ہیں,تما م اقسام کی ٹرانسپورٹ سروسز صرف 70٪ گنجائش کے ساتھ سفر کرنے کی پابند ہوں گی،شاپنگ مالز اورکاروباری مراکز کے لئےسپیشل ایس او پیزجاری کئے گئے ہیں,مارکیٹس اور شاپنگ مالز تفویض کردہ اوقات میں ہی کام کریں گے،مارکیٹس اور کاروباری مراکز میں رش اور ہجوم کسی صورت نہ ہونے دیں ۔

سیکرٹری سارہ اسلم کا کہناتھا کہ صرف فارمیسیز، میڈیکل فیسیلیٹز،پٹرول پمپ، ویکسینیشن سینٹرز،ڈیری شاپس، تندور، ٹیک اویز اور ڈلیوری سروسز کو 24/7کام کرنے کی اجازت ہو گی، شادی ہالز، جمز ، ہوٹلز کے لئےسپیشل ایس او پیز جاری کئے گئے ہیں,ان ڈور شادی ہالز میں 200 جبکہ آوٹ ڈور شادی ہالز میں 400 افراد کی گنجائش کے ساتھ شادی کی تقریب کی اجازت ہو گی،شادی کی تقریبات میں شامل افراد کا مکمل طور پر ویکسی نیٹد ہونا یقینی بنائیں۔

شادی ہال کےسٹاف اور مہمانوں کی رینڈم چیکنگ بھی کی جائےگی، انڈور ڈائننگ ا ور دیگر انڈور سرگرمیوں میں صرف و یکسی نیٹد افراد ہی حصہ لے سکتے ہیں،تفریحی مقامات، سوئمنگ پولز کے لئےسپیشل ایس او پیز جاری کئے ہیں,صوبائی حکومت کی ہدایات کے مطابق تمام تفریحی پارکس اور سوئمنگ پولز 50 ٪ گنجائش کے ساتھ کام کریں گے، تمام شہری گھر سے نکلتے وقت اور خصوصاً رش والی جگہوں پر ماسک پہننے کو یقینی بنائیں گے۔

عیدالاضحیٰ کے قریب آنے کے باوجود لکھوڈیہر مویشی منڈی میں جانوروں کی قیمتیں آسمان سے باتیں کررہی ہیں، رواں سال قیمت میں بیس سے تیس فیصد تک اضافہ دیکھنے میں آ رہا ہے۔

سنت ابراہیمی کی ادائیگی کیلئے ہر صاحبِ حیثیت شہری کی خواہش ہوتی ہے کہ خوبصورت جانور کو اللہ کی راہ میں قربان کرے، مویشی منڈی لکھوڈیہر میں خوبصورت جانور تو موجود ہیں لیکن قیمت عام شہری کی قوت خرید میں نہیں رہی۔ بکرے کی قیمت میں گزشتہ سال کی نسبت بیس ہزار، دنبہ پندرہ ہزار جبکہ بیل کی قیمت میں اسی ہزار سے ایک لاکھ روپے تک اضافہ ہو ا ہے، جس کی وجہ سے گاہک خالی ہاتھ لوٹ رہے ہیں۔

دوسری جانب بیوپاری مہنگائی کا رونا روتے دکھائی دیتے ہیں۔ ان کا کہنا ہے کہ جانوروں کی خوراک کی قیمتیں بڑھنے کی وجہ سے ریٹ بڑھ گیا اور یہ گاہک کی سمجھ میں نہیں آ رہا۔ چھٹی کے روز بارش سے موسم خوشگوار تو ہوا لیکن یہ موسم بھی گاہکوں کو مویشی منڈی کی طرف راغب نہ کر سکا۔

لکھو ڈیر مویشی منڈی میں گاہک نہ ہونے کے برابر ہے، بیوپاری گاہک کا انتظار کر رہے ہیں تو گاہک شائد اس بات کے منتظر ہیں کہ عید کے مزید قریب آنے سے قیمتوں میں کمی آ جائے گی۔

لاہور کے باسیوں کیلئے خطرے کی گھنٹی بج گئی، تیزی سے پھیلنے والا بھارتی وائرس ” ڈیلٹا” لاہور کی فضاؤ ں میں پھیل گیا، جین سیکوئنسنگ میں لاہور میں 80 فیصد انڈین وائرس کی تصدیق ہوئی۔

وائرولوجسٹ پروفیسر وحید الزمان نے دعویٰ کیا ہے کہ بھارتی وائرس کی بڑے پیمانے پر موجود گی کا انکشاف این جی ایس میتھڈ پر و سیکوئنسنگ میں ہوا، چغتائی لیب نے این جی ایس میتھڈ پر وائرس کی سیکوئنسنگ کی، انڈین کورونا وائرس ڈیلٹا کی موجودگی نے خطرے کی سنگینی بڑھا دی، انڈین وائرس ڈیلٹا ملک کے دیگر شہروں میں بھی پایا گیا۔

پروفیسر وحید الزمان نے انکشاف کیا کہ اس وقت لاہور پر کورونا وائرس کی تین اقسام حملہ آور ہیں، لاہور میں80 فیصد انڈین ، 20 فیصد کورونا کی برٹش اور ووہان قسم بھی موجود ہے۔

دوسری جانب محکمہ صحت نے بھی 56 شہریوں میں ڈیلٹا وائرس کی تصدیق کردی ۔ ترجمان محکمہ پرائمری اینڈ سیکنڈری ہیلتھ کیئر پنجاب کا کہنا ہے کہ شہر میں ڈیلٹا وائرس کی روک تھام کے لیے تمام ممکنہ اقدامات کیے جا رہے ہیں، ڈیلٹا وائرس کے پھیلاؤ کی رفتار دوسرے وائرس سے 50 فیصد زیادہ تیز ہے، تاہم کورونا ایس او پیز پر عمل درآمد سے اس خطرناک وائرس سے بچا جا سکتا ہے۔

واضح رہےکہ کورونا وائرس کے حملوں میں پھر تیزی آگئی، گزشتہ 24 گھنٹوں کے دوران صوبائی دارالحکومت لاہور میں172 کیسز رپورٹ ہوئے جبکہ ایک شخص زندگی کی بازی ہار گیا، شہر میں مثبت کیسزکی شرح 2.7ریکارڈ کی گئی۔

ساندہ میں ڈیڑھ ماہ تک عورت کومبینہ زیادتی کا نشانہ بنانے والے جعلی پیر گرفتار کرلیا گیا۔

متاثرہ خاتون کی شادی ضلع شیخوپورہ میں ہوئی،متاثرہ خاتون ساندہ میں جعلی پیر کا نشانہ بنی،متاثرہ خاتون گھریلو ناچاکی پرجعلی پیرنوید کےپاس تعویذ کرانے آئی،ملزم ورغلاکرعورت کو ڈیڑھ ماہ تک زیادتی کا نشانہ بناتارہا،ایس ایچ او ساندہ شیخ خالد فاروق کا کہناتھا کہ عاصمہ بی بی کے گھر والے اپنے تئیں تلاش کرتے رہے نہ ملنے پر ساندہ پولیس سے رابطہ کیا ۔

ایس پی اویس شفیق کا کہناتھا کہ ساندہ پولیس نے کارروائی کرکے جعلی پیر کوگرفتار کر لیا،ملزم سے مزید تفتیش جاری کہ مزید کتنی عورتوں کو داغدار کر چکا،ملزم کے خلاف مقدمہ درج کر لیا ہے ۔

واضح رہے کہ آئے روز جعلی عالم، پیروں کے ہاتھوں خواتین، لڑکیوں کی تذلیل کی جارہی ہے،کالا جادو, شوہر کا ناراض، اولاد کا نہ ہونا اور جنات کا سایہ جیسےمسائل نے خواتین کی زندگی اجیرن کردی ہے۔ پھر خواتین ان مسائل سے چھٹکارا حاصل کرنے کیلئےجعلی عالموں سے رجوع کرتی ہیں اور ایسے لوگوں کی باتوں میں آکر اپنا خوشحال گھر اجاڑ لیتی ہیں۔

ضلعی انتظامیہ اور ایم ایس سروسز ہسپتال کی ہسپتال میں غیر قانونی رہائش پذیر ڈاکٹرز کے خلاف کارروائی، ایم ایس سروسز ہسپتال پر ڈاکٹر حامد بٹ کا حملہ، ڈاکٹر خلاف ایف آئی آر بھی درج کرلی گئی۔

تفصیلات کے مطابق ضلعی انتظامیہ اور ایم ایس سروسز ہسپتال نےغیرقانونی رہائش پذیر ڈاکٹرز کیخلاف کارروائی کی۔ کارروائی کے دوران ایم ایس سروسز ہسپتال پر ڈاکٹر حامد بٹ نے حملہ کردیا، حامد بٹ کو انتظامیہ 7 ماہ پہلے ہی نوکری سے برخاست کرچکی ہے۔ عدالت نے اے سی کو گھرکا قبضہ چھڑانےکاحکم دیا تھا۔

عدالت نے گھر اسسٹنٹ پروفیسر لقمان علی باجوہ کو الاٹ کرنے کا حکم دیا تھا۔ قبضہ چھڑوانے کےدوران ڈاکٹرحامد بٹ نے ایم ایس پرحملہ کردیا۔ ڈاکٹرحامد بٹ کےحملے میں ایم ایس سروسز محفوظ رہے جبکہ انتظامیہ نے ڈاکٹرحامد بٹ کے خلاف ایف آئی آرکا اندراج کروا دیا ہے۔

لاہور کو سرسبز بنانےکامشن،پنجاب بھر میں 10بلین سونامی پلانٹیشن منصوبے کے تحت لاہور میں 5 سے 7 لاکھ پودے لگائے جائیں گے جبکہ محکمہ ہیلتھ اور ایجوکیشن ڈیپارٹمنٹ کو فری پودے دیئے جائیں گے ۔

تفصیلات کےمطابق پنجاب بھرمیں10بلین پلانٹیشن سونامی منصوبےکےتحت لاہور میں 5
سے 7لاکھ پودے لگائےجائیں گے۔ اس حوالے سے جائزہ اجلاس ڈی سی مدثر ریاض ملک کی زیر صدارت منعقد ہوا جس میں تمام محکموں کو پودے لگانےکاخصوصی ٹارگٹ دیاگیا۔اگست میں پودے لگانے کی مہم کے دوسرے مرحلے کا آغاز ہوگا،اگست میں برکی کرول فاریسٹ گجومتہ کیساتھ دوسرے اداروں میں بھی پودے لگائے جائیں گے،میو ہسپتال،جلو پارک اور ڈی سی آفس میں پودے لگائے جائیں گے۔

ڈی سی مدثرریاض کا کہنا تھا کہ ایل ڈبلیو ایم سی کو 2لاکھ پودے، محکمہ ہیلتھ کو زیادہ سے زیادہ 50 ہزار اور کم سے کم 20 ہزار ،محکمہ ہیلتھ تمام 375 ڈسپنسریوں میں پودے لگائےگا،محکمہ تعلیم کے پاس 1340 سکول ہیں، چھوٹےسکولز100 اوربڑے سکولوں میں 500 پودے لگائے جائیں گے،ڈی سی مدثرریاض کا کہنا تھا کہ پولیس کو87تھانوں میں50ہزار،ریسکیو1122کوسٹیشنزپر5ہزارپودےلگانے سول ڈیفنس کو2000،ایم سی ایل کو2000،ڈی اوانڈسٹریز2000پودےلگا نے کا ہدف دیا گیا ہے۔ واسا50ہزار،پی ایچ اےپارکس میں5لاکھ جبکہ تمام اسسٹنٹ کمشنرز اپنے اپنے علاقوں میں 50 ہزار پودے لگائیں گے ۔ ڈی سی مدثر ریاض نے کہا کہ 14 اگست کیلئے 10 ہزار پودے لگانے کا ٹارگٹ رکھا گیا ہے۔ لاہور کے سکول کالج اور دیگر تمام محکموں میں بھی پودے لگائے جائیں گے۔ ڈی سی لاہور مدثر ریاض کا کہنا تھا کہ 30 ستمبر تک ہم نے یہ ہدف پورا کرنا ہے۔

لیسکو نے ناقص سنگل و تھری فیز میٹرز کی خریداری کر لی، کنکشن کی تنصیب کیساتھ ہی میٹرز میں تکنیکی خرابی پیدا ہونے کی وجہ سے ریڈنگ ریکارڈ نہ ہونے کا انکشاف ہوا۔

لیسکو کی جانب سے صارفین کے لئے ناقص میٹرز خریدنے کا انکشاف ہوا ہے جس کی وجہ سے میٹرز تنصیب کے دوران اچانک خراب ہونے لگے ہیں, کرنٹ پاس ہونے کیساتھ ہی میٹرز میں تکنیکی خرابیاں سامنے آنے لگی ہیں اور کمپنی کے سنگل و تھری فیز میٹرز میں ”اوپن” ہونے کے سگنلز موصول ہونے لگے۔

ذرائع نے بتایا کہ مذکورہ تکنیکی خرابی کی وجہ سے میٹرز میں ریڈنگ ریکارڈ کرنے کی صلاحیت ختم ہونے لگی ہے اور ریڈنگ ریکارڈ نہ ہونے کی وجہ سے صارفین کو اوسط بل بھجوانے کا سلسلہ شروع ہو گیا ہے، لیسکو میں ڈیفیکٹو کوڈ اور نئے کنکشنز کے حامل صارفین پریشان ہونے لگے۔

دوسری جانب لیسکو میں بائیس ارب روپے کی بے ضابطگیوں کی نشاندہی کی گئی ہے،اربوں روپے کی بے ضابطگیاں کمپنی کے مختلف شعبہ جات میں کی گئی ہیں۔ رپورٹ کے مطابق ایک سال کے دوران مختلف امور میں اربوں روپے کی بے ضابطگیاں ہوئیں، میٹریل کی خریداری میں اٹھارہ کروڑ روپے، بینک اکاؤنٹس کی مینجمنٹ میں نوے کروڑ روپے، گرڈ سمیت دیگر بے ضابطگیوں کی مد میں تین کروڑ روپے کی نشاندہی کی گئی ہے۔

مزنگ میں بدبخت بیٹے نے بیوی سے جھگڑے کا غصہ معمر والدہ پہ اتار دیا۔ ماں نے بیوی سے جھگڑے پر ڈانٹا تو ظالم بیٹے نے توے کے وار کر کے ماں کو ابدی نیند سلا دیا۔

تفصیلات کے مطابق بیٹے کے ہاتھوں ماں کے قتل کا واقعہ مزنگ کے علاقے صفاں والا چوک میں رات گئے پیش آیا، جہاں ملزم وسیم بیوی سے جھگڑا کر ماں کے پاس آیا۔ ستر سالہ ماں نے ڈانٹ ڈپٹ کی اور وسیم کو واپس بیوی کے پاس جانے کا کہا تو ملزم طعیش میں آگیا۔ پاس پڑا توا اٹھا کر معمر ماں کے چہرے اور سر پر پے در پے متعدد وار کر کے قتل کردیا۔

واقعے کا مقدمہ مقتولہ کے شوہر کی مدعیت میں درج کیا گیا لیکن ورثاء ماں کے قتل میں بیٹے کے ملوث ہونے سے انکاری ہیں۔ پولیس نے جائے وقوعہ سے آلہ قتل برآمد کرکے ملزم کو بھاٹی گیٹ سے گرفتار کرکے تحقیقات شروع کردیں ہے۔

ادھر چوہنگ کے علاقے میں تنخواہ کے تنازعہ پر فیصل اور یوسف نامی سیکورٹی گارڈ میں لڑائی ہوئی۔ فیصل نے لڑائی کے دوران فائرنگ کی جس کے باعث یوسف نامی گارڈ زخمی ہو گیا۔ پولیس نے موقع پر پہنچ کر زخمی سیکورٹی گارڈ یوسف کو طبی امداد کیلئے ہسپتال منتقل کردیاگیا۔ پولیس کا کہنا تھا کہ فائرنگ کرنے والے ملزم فیصل کو گرفتار کرلیا گیا ہے جبکہ ملزم کو حراست میں لیکر کارروائی شروع کردی گئی ہے۔

لاہورکے علاقے کاہنہ نو میں امتحانی سنٹر کے سپرنٹنڈنٹ سے حل شدہ پرچے چھین کر آگ لگادی گئی ، سینٹر سپر ٹینڈنٹ حل شدہ پرچے واپس بنک جمع کروانے جارہا تھا ، ملزمان آگ لگانے کے بعد موقع سے فرار ہو گئے.

تفصیلات کے مطابق لاہور بورڈ کے سیکنڈ ایئر کے اسلامیات کے پرچہ کی جوابی کاپیاں جلا دی گئیں، موٹر سائیکل سواروں نے سپرنٹنڈنٹ سے جوابی کاپیاں چھین کر جلانے کے بعد سپرنٹنڈنٹ محمد عامر کی موٹر سائیکل کو بھی آگ لگا دی ،انٹرمیڈیٹ سالانہ امتحان میں آج اسلامیات اختیاری کے مضمون کا پرچہ لیا گیا۔

کاہنہ کے امتحانی مرکز 8 کے سپرنٹنڈنٹس بینک میں جوابی کاپیوں کا بنڈل جمع کرانے جا رہے تھے ،دو موٹر سائیکل سواروں نے سپرنٹنڈنٹ کو روک کر جوابی کاپیاں چھین لیں، اس کے بعد ان کاپیوں اور موٹر سائیکل کو آگ لگا دی گئی، موٹر سائیکل سواروں نے سپرنٹنڈنٹ کو جان سے مارنے کی دھمکیاں بھی دیں۔

لاہور بورڈ نے متعلقہ تھانہ میں ملزمان کے خلاف ایف آئی آر درج کرا دی ہے،کاہنہ کے امتحانی مرکز میں 50 امیدواران کا پرچہ تھا جن میں سے 48 امیدواران نے پرچہ دیا تھا، صوبائی وزیر ہائیر ایجوکیشن راجہ یاسر نے حل شدہ پیپرز جلائے جانے کا نوٹس لیا ہے۔

پولیس نے ملزمان کی گرفتاری کے لئے خصوصی ٹیمیں تشکیل دے دیں، چیئرمین بورڈ، کنٹرولر امتحانات اور دیگر متعلقہ افسران جائے وقوعہ پر پہنچ گئے،صوبائی وزیر راجہ یاسر ہمایوں نے چیئرمین لاہور بورڈ کو واقعہ کی فوری رپورٹ پیش کرنے کا حکم دیا ہے۔

لاہور: پنجاب کے دارالحکومت میں کووڈ 19 کی انتہائی متعدی اور مہلک بھارتی قسم ‘ڈیلٹا’ کے 50 کیسز سامنے آگئے۔

رپورٹ کے مطابق ان کیسز نے صحت کے حکام کو خوفزدہ کردیا ہے جنہیں یہ پتہ چلا ہے کہ لاہور میں پائے جانے والے انفیکشن میں 70 فیصد سے زیادہ ڈیلٹا کے ہیں۔

ماہرین صحت کا کہنا ہے کہ ڈیلٹا قسم زیادہ تیزی سے منتقل ہوتی ہے جو اب تک 77 ممالک میں پہنچ چکی ہے۔

انہوں نے خبردار کیا کہ ویکسین نہ لگوانے والے یا اس کی ایک خوراک حاصل کرنے والے افراد کے لیے یہ سنگین خطرہ ہے۔

محکمہ صحت کے ایک سینیئر عہدیدار نے نام ظاہر نہ کرنے کی شرط پر ڈان کو بتایا کہ یہ وائرس، پنجاب میں کووڈ 19 کی آخری تین لہروں کے دوران رپورٹ ہونے والے وائرس سے 100 گنا زیادہ تیزی سے پھیلتا ہے۔

سرکاری اعداد و شمار بتاتے ہوئے انہوں نے بتایا کہ ماہرین صحت نے پنجاب کے محکمہ پرائمری اینڈ سیکنڈری ہیلتھ کیئر کی ریفرنس لیب میں چند روز قبل 26 نمونوں کی تشخیص کی۔

انہوں نے کہا کہ ان میں سے 13 ڈیلٹا قسم کے لیے مثبت سامنے آئے جو کووڈ نمونوں کا 50 فیصد ہے، اس کے بعد انہوں نے مزید 22 نمونوں کا بھی ٹیسٹ کیا جن میں سے 14 ڈیلٹا قسم کے نکلے تھے۔

عہدیدار نے بتایا کہ جمعہ کے روز 25 مزید نمونوں میں سے 23 میں ڈیلٹا وائرس کا مثبت نتیجہ آیا جو خطرناک حد تک زیادہ مثبت شرح ظاہر کرتا ہے۔

انہوں نے لاہور میں فوری لاک ڈاؤن کی تجویز پیش کرتے ہوئے کہا کہ ماہرین کا خیال ہے کہ انفیکشن کے تیزی سے پھیلاؤ کی وجہ سے آئندہ چند روز میں صورتحال قابو سے باہر ہو سکتی ہے۔

ان کا کہنا تھا کہ تجارتی مارکیٹوں، تھیٹرز، مزارات اور اس طرح کے دیگر مقامات کے اوقات میں بھی ترمیم کی جانی چاہیے تاکہ عوام کی نقل و حرکت کو محدود رکھا جاسکے۔

عہدیدار نے بتایا کہ زیادہ تر کورونا نمونے لاہور، سیالکوٹ اور چنیوٹ کے سرکاری ہسپتالوں میں جانے والے مریضوں سے حاصل کیے گئے تھے۔

انہوں نے کہا کہ ’ہمیں صوبے کے تمام ہسپتالوں میں ایمرجنسی نافذ کرنی چاہیے تاکہ ڈیلٹا قسم کے نئے چیلنج کا مقابلہ کیا جاسکے‘۔

ایک سوال کے جواب میں عہدیدار نے کہا کہ ماہرین، لیب میں بے ترتیب کورونا نمونوں کا تجزیہ کر رہے ہیں اور اس کے نتیجے میں پنجاب، خصوصاً لاہور میں ڈیلٹا وائرس کی موجودگی سامنے آئی۔

دریں اثنا محکمہ صحت پنجاب کی جانب سے جاری کردہ سرکاری اپ ڈیٹ میں مزید خطرے کی گھنٹی بجنے لگی جب لاہور اور راولپنڈی میں انفیکشن کی مثبت شرح 5.4 فیصد ہوگئی۔

پنجاب کے پرائمری اور سیکنڈری ہیلتھ کیئر ڈپارٹمنٹ کی سیکریٹری سارہ اسلم نے بتایا کہ کووڈ انفیکشن کی شرح ملتان میں 4 فیصد، بہاولپور میں 3 فیصد اور فیصل آباد میں 1.7 فیصد ہوگئی ہے۔

انہوں نے بتایا کہ پنجاب میں گزشتہ 24 گھنٹوں کے دوران 364 نئے کیسز رپورٹ ہوئے ہیں جس کے بعد کیسز کی مجموعی تعداد 3 لاکھ 49 ہزار 475 ہوگئی۔

انہوں نے کہا کہ ’ہم نے پنجاب بھر میں قربانی کے جانوروں کی فروخت کے لیے 118 موبائل ویکسین لگانے والے کیمپ لگائے ہیں‘۔

ان کا کہنا تھا کہ ’ہم نیشنل کمانڈ اینڈ آپریشن سینٹر (این سی او سی) کے طے شدہ ہدف کو حاصل کرنے کے لیے صوبے بھر میں روزانہ اوسطاً 3 لاکھ 50 ہزار افراد کو ویکسین لگا رہے ہیں‘۔